1. ¿Tlen kinkauilia Jehová ma kichiuakan itekipanojkauan?

JEHOVÁ techtlasojtla, ik non, techkauilia ma tiktekichiuilikan itech itlanechikol. Tlatlamantli titlapaleuiaj pero tinochtin techpatioita Jehová uan tinochtin moneki timopaleuiskej. Tlatitlanil Pablo techpaleuia ma tikajsikamatikan tleka miak ipati nin tlamantli. ¿Tlen okijto?

2. Ijkon ken kijtoua Efesios 4:16, ¿tleka moneki timotlakaitaskej uan timopaleuiskej?

² Ijkon ken kijtoua texto kanin kisa nin tlamachtil, Pablo kiteititia amo uelis tikiluiskej se tokni: “Amo techpoloa” noso amo techpaleuis (1 Cor. 12:21). Tla tiknekij kuali timouikaskej iuan tokniuan, moneki timotlakaitaskej uan timopaleuiskej (xiktlajtolti Efesios 4:16). Tla kuali timouikaj, tokniuan moyolchikauaskej uan kimachiliskej tikintlasojtlaj.

3. ¿Tlen timomachtiskej?

³ ¿Ken uelis tikteititiskej tikintlakaitaj tokniuan? Axkan tikitaskej ken tlayekankej uelis kintlakaitaskej oksekimej tlayekankej. Noijki tikitaskej ken tikintlakaitaskej tokniuan  tlen katej inselti. Satepan tikitaskej ken uelis tikintlakaitaskej tokniuan tlen amo kuali tlajtouaj totlajtol.

4. ¿Tlen okijto Pablo moneki kichiuaskej tlayekankej ijkon ken kijtoua Romanos 12:10?

⁴ Jehová kinpejpena tlayekankej ika iespíritu santo. Pero sejse tlayekankej kimatij kichiuaskej seki tlamantli (1 Cor. 12:17, 18). Sekimej xamo yikin okintlalijkej tlayekankej uan oksekimej ayamo okachi kimatij ken tlapaleuiskej. Noijki oksekimej xamo yikipiaj miak xiuitl noso mokokouaj. Pero nion se tlayekanki uelis kijtos amo uelis tlapaleuis. Nochtin moneki kichiuaskej tlen kijtoua Romanos 12:10 (xiktlajtolti).

5. ¿Ken kiteititiskej tlayekankej kintlakaitaj oksekimej tlayekankej uan tleka moneki ijkon kichiuaskej?

⁵ Tlayekankej kiteititiskej kintlakaitaj oksekimej tlayekankej tla kuali kinkakij. Ijkon moneki kichiuaskej ijkuak monechikouaj uan motlapouiaj seki tlamantli miak ipati. ¿Tleka? Revista Akin Tetlapouijtok 1 de octubre 1988 okijto: “Nochtin tlayekankej moneki ma kilnamiktokan Cristo kinyekana ika iespíritu santo Jehová uan san akin uelis kijtos se principio bíblico tlen kinpaleuis ma kiyektlalikan se ouijkayotl uan ma kipejpenakan tlen miak ipati (Hech. 15:6-15). Iespíritu santo Jehová kinpaleuia nochtin tlayekankej uan amo san se”.

6. (1) ¿Tlen kinpaleuis tlayekankej san sekan ma kitekichiuilikan Jehová? (2) ¿Ken kinpaleuia tokniuan tla ijkon kichiuaskej tlayekankej?

⁶ Tla se tlayekanki kintlakaita oksekimej tlayekankej, amo san niman itlaj kijtos ijkuak monechikoskej. Amo san ye kinekis tlajtojtos nion mokuayejyekos san ye okachi kimati. Ye mochijchikauas yetos yolyamanki ijkuak kijtos tlen mokuayejyekoua uan kuali kinkakis  oksekimej tlayekankej. Nochipa momachtis tlen kijtouaj principio bíblicos uan kichiuas tlen kijtoua “tlakeuali yolmelajki uan ixtlamatki” (Mat. 24:45-47, TNM). Ijkuak tlayekankej motlakaitaj uan motlasojtlaj, iespíritu santo Jehová kinpaleuia ma kipejpenakan tlen kinpaleuis tokniuan (Sant. 3:17, 18).

7. ¿Tlen okichi Jesús?

⁷ Kanin timonechikouaj amo san katej akinmej yomonamiktijkej uan akinmej kinpia inkoneuan, noijki katej akinmej inselti. ¿Moneki tikintlakaitaskej? Ma tikchiuakan ken okichi Jesús. Ijkuak nikan okatka amo omonamikti uan nochipa otetlapoui. Amo keman okijto moneki timonamiktiskej noso moneki tiyetoskej toselti. Pero okijto sekimej kinekiskiaj monamiktiskej (Mat. 19:11, 12). Ye okintlakaitaya akinmej okatkaj inselti uan amo omokuayejyekouaya amitlaj inpati noso omonekiaya monamiktiskej tla okinekiayaj yolpakiskej.

8. Ijkon ken Pablo okijto itech 1 Corintios 7:7-9, ¿tlen moneki mokuayejyekoskej tokniuan?

⁸ Pablo okatka ken Jesús, okatka iselti uan okitekichiuili Jehová. Amo okijto tlajtlakoli tla ikaj monamiktia. Ye okimatiaya tisejse tikijtoskej kox timonamiktiskej noso amo. Pero ye okijto ma timokuayejyekokan kox uelis toselti tiktekichiuiliskej Jehová (xiktlajtolti 1 Corintios 7:7-9). Pablo amo okinchikoitak akinmej okatkaj inselti. Ye okilui Timoteo okachi ma kitekichiuili Jehová maski okatka iselti (Filip. 2:19-22). * Ik non, amo ma tikijtokan se tokni ixtlamatki porque yomonamikti uan akin kajki iselti amitlaj kimati (1 Cor. 7:32-35, 38, TNM).

9. ¿Ken moneki tikinmitaskej akinmej yomonamiktijkej uan akinmej katej inselti?

⁹ Jesús uan Pablo amo okijtojkej moneki timonamiktiskej noso moneki tiyetoskej toselti. Ik non, ¿tlen uelis tikijtoskej? Revista Akin Tetlapouijtok 1 de octubre 2012 okijto: “Ma tikitakan se tetliokolil tlen techmaka toTajtsin Dios, tla timonamiktiskej noso tiyetoskej toselti. [...] Tla  tikatej toselti, Jehová amo kita teyolkoko noso tepinati”. Ik non, moneki tikintlakaitaskej tokniuan tlen touan monechikouaj uan katej inselti.

10. ¿Ken tikteititiskej tikintlakaitaj tokniuan tlen katej inselti?

¹⁰ ¿Ken tikteititiskej tikintlakaitaj tokniuan tlen katej inselti? Ma tikilnamiktokan sekimej kinekij yetoskej inselti. Sekimej tokniuan kinpaktiskia monamiktiskej pero amo kajsij akin iuan monamiktiskej. Oksekimej katej inselti porque oixpoliuik innamik. Amo ma tikintlajtlanikan tleka amo monamiktiaj nion ma tikinmiluikan tikinpaleuiskej ma kajsikan akin iuan monamiktiskej. Xamo sekimej kinekiskej ma tikinpaleuikan. Pero tla amo techiluiaj ma tikinpaleuikan, ma timokuayejyekokan ken momachiliskej tla tikinmiluiskej kox kinekij ma tikinpaleuikan (1 Tes. 4:11; 1 Tim. 5:13). Ma tikitakan tlen yokijtojkej sekimej tokniuan tlen katej inselti.

11, 12. ¿Tleka ualeua tikinyolkokouaj tokniuan tlen katej inselti?

¹¹ Se tlayekanki itech circuito kijtoua kipaleuia yetos iselti. Pero ualeua moyolkokoua ijkuak sekimej tokniuan kitlajtlaniaj tleka ayamo monamiktia. Se tokni tlen tlapaleuia Betel okijto: “Ualeua sekimej tokniuan kintekipachoua tleka ayamo timonamiktiaj. Tokniuan mokuayejyekouaj titlajyouiaj ijkuak amo timonamiktiaj uan amo kitaj se tetliokolil tikatej toselti”.

¹² Se tokni siuatl tlen tlapaleuia Betel okijto: “Sekimej tokniuan mokuayejyekouaj tiknekij timonamiktiskej, ik non, ijkuak timonechikouaj kijtouaj ompa tikajsiskej akin iuan timonamiktiskej. Se tonal oksekan onechtitlankej ma nitlapaleuiti uan non tiotlak tokniuan omonechikojkej. Tokni tlen onechkaloti onechilui kanin ye monechikoua katej ome telpokamej. Okijto non amo kijtosneki nechtemolijtok akin iuan nimonamiktis. Pero ijkuak otiajsitoj kanin monechikoua, san niman onechuikak ma nikinmixmatiti ome telpokamej. Sapanoua onimopinati uan noijki nonmej telpokamej”.

13. ¿Tlen okiyolchika se tokni tlen kajki iselti?

¹³ Okse tokni tlen tlapaleuia Betel okijto: “Nikinmixmati precursores tlen katej inselti, mochijchikauaj kitekichiuiliskej Jehová uan yolpakij. Noijki kinpaleuiaj tokniuan. Amo moueyinekij porque katej inselti nion moyolkokouaj porque amo monamiktiaj nion kinpiaj inkoneuan”. Tiyolpakij ijkuak tokniuan techtlakaitaj uan techtlasojtlaj. Amo kintekipachoua tleka amo timonamiktiaj, amo technexikolitaj, amo kijtouaj amitlaj topati nion kijtouaj tejuan okachi tiixtlamatkej. Tinochtin timotlasojtlaj.

14. ¿Ken tikteititiaj tikintlakaitaj tokniuan tlen katej inselti?

¹⁴ Tokniuan tlen katej inselti motlasojkamatij ijkuak tikitaj tlen kuali kichiuaj uan amo tikinteneuaj tleka amo monamiktiaj. Amo ma timokuayejyekojtokan tleka amo monamiktiaj. Ma tikpatioitakan nochipa kitekichiuiliaj Jehová. Ijkon amo kimachiliskej tikinmiluiaj: ‘Amo techpoloah’ noso amo techpaleuiaj (1 Cor. 12:21). Kitaskej tikintlakaitaj uan tikpatioitaj tlapaleuiaj itech tlanechikol.

15. ¿Tlen kichiuaj sekimej tokniuan?

¹⁵ Axkan miakej tokniuan momachtiaj okse tlajtoli uan ijkon okachi kitekichiuiliaj Jehová. Ik non, tlapaleuitiuij okse tlanechikol kanin okachi moneki (Hech. 16:9). Yejuan kipejpenaj okachi kitekichiuiliskej Jehová. Sapanoua tlapaleuiaj itech tlanechikol maski oui momachtiaj non tlajtoli. Kinyolchikauaj tokniuan porque kipiaj kuali inyelis uan kimatij ken tlapaleuiskej. Sapanoua tikpatioitaj tlen kichiuaj.

16. ¿Tlen moneki kitaskej tlayekankej tla se tokni kineki yetos tlayekanki noso siervo ministerial?

¹⁶ Tla se tokni amo kuali tlajtoua se tlajtoli tlen momachtijtok, ¿kijtosneki tlayekankej kijtoskej amo uelis yetos tlayekanki noso siervo ministerial? Amo. Tlayekankej moneki ma kitakan ma kichiua tlen kijtoua Biblia tla kineki yetos tlayekanki noso siervo ministerial uan amo ma kitakan kox kuali tlajtoua tlajtoli tlen momachtijtok (1 Tim. 3:1-10, 12, 13; Tito 1:5-9).

17. ¿Tlen uelis kipejpenaskej akinmej chantitiuij okse altepetl?

¹⁷ Miakej tokniuan mopaleuitiuij itech okse altepetl noso ompa tekipanotiuij. Xamo inkoneuan yauij escuela uan ompa tlajtouaj okse tlajtoli uan noijki intatajuan moneki momachtiskej non tlajtoli tla kinekij kajsiskej tekitl. Ma tikijtokan onka se tlanechikol noso se grupo kanin tlajtouaj intlajtol. ¿Kanin moneki monechikoskej? ¿Kanin tlajtouaj intlajtol noso tlen tlajtouaj itech non altepetl kanin ochantitoj?

18. Ijkon ken kijtoua Gálatas 6:5, NHY, ¿ken tikteititiskej tiktlakaitaj se teta?

¹⁸ Teta kijtos kanin monechikoskej. Moneki kitas tlen okachi kipaleuis ifamilia (xiktlajtolti Gálatas 6:5, Itlajtol totajtzin Dios [NHY]). * San teta kipejpenas kanin moneki monechikoskej, ik non, ma tiktlakaitakan tlen kichiua. Kuali ma tikinselikan uan ma tikintlasojtlakan tla touan monechikouaj (Rom. 15:7).

19. ¿Tlen moneki kichiuas teta tla ikoneuan amo kajsikamatij itlajtol?

¹⁹ Xamo sekimej tokniuan monechikouaj kanin tlajtouaj intlajtol. Pero xamo konemej yomomachtijkej se tlajtoli ompa escuela uan itatajuan amo kuali kajsikamatij. Ik non, konemej kitaj oui kajsikamatiskej tlen momachtiaj ijkuak  monechikouaj uan amo kipiaj chikauak intlaneltokilis. Teta moneki motlatlaujtis uan mokuayejyekos tlen okachi kinpaleuis ikoneuan ma mouikakan iuan Jehová uan tokniuan. Uelis kuali kinmachtiskej intlajtol noso uelis monechikotiuij kanin okachi kuali kajsikamatiskej konemej. Pero kanin monechikotiuij, tokniuan moneki kintlakaitaskej uan kintlasojtlaskej.

20. ¿Ken tikteititiskej tikintlakaitaj tokniuan tlen momachtijtokej okse tlajtoli?

²⁰ Axkan yotikitakej miakej tokniuan mochijchikauaj momachtiskej okse tlajtoli. Xamo amo okachi tlajtouaj tlajtoli tlen momachtijtokej pero amo san ma tikitakan tlen amo kuali kitenkixtiaj. Ma tikitakan yejuan kitlasojtlaj Jehová uan mochijchikauaj kitekichiuiliskej. Non techpaleuis ma tikintlakaitakan uan ma tikintlasojtlakan ika nochi toyolo. Amo timokuayejyekoskej amo techpaleuiskej porque amo kuali kimatij totlajtol.

21, 22. ¿Tleka tiktlasojkamatiliaj Jehová?

²¹ Tiktlasojkamatiliaj Jehová techkauilia titlapaleuiaj itech itlanechikol. Jehová techpatioita uan noijki tokniuan maski titlakamej, tisiuamej, maski toselti tikatej, maski yotimonamiktijkej, titelpokamej noso tiichpokamej noso yitikpiaj miak xiuitl uan maski kuali titlajtouaj se tlajtoli noso amo (Rom. 12:4, 5; Col. 3:10, 11).

²² Miak tlamantli otechmachti tlen okijto Pablo ijkuak otlajto itech totlalnakayo. Tla tikchiuaskej tlen okijto Pablo, tikteititiskej tikpatioitaj titlapaleuiaj itech tlanechikol uan tikpatioitaj tlen kichiuaj tokniuan.