1. Jehova okwa pitika omupiya gwe kehe omudhiginini a ninge shike?

JEHOVA okwa pitika pahole omupiya gwe kehe omudhiginini, a kale oshitopolwa shegongalo lye. Nonando iilonga yetu oya yoolokathana megongalo, atuheni otu na oshilonga notwa pumbwathana. Omuyapostoli Paulus ote tu kwathele tu uve ko oshiilongomwa shoka sha simana. Ngiini mbela?

2. Shi ikolelela kAaefeso 4:16, omolwashike tu na okukala twa simanekathana nohatu longele kumwe?

² Ngaashi sha popiwa menyolo lyenenedhiladhilo lyoshitopolwa shika, Paulus okwa tsu omuthindo kutya kapu na gumwe gwomutse ta vulu okulombwela omupiya omukwawo kutya ‘inandi ku pumbwa.’ (1 Kor. 12:21). Ngele otwa hala egongalo li kale li na ombili, otu na okusimanekathana nokulongela kumwe. (Lesha Aaefeso 4:16.) Ngele otwa kala hatu longele kumwe twa hangana, nena egongalo otali ke shi enditha nawa notali ka kala lya kola pambepo.

3. Oshike tatu ka kundathana moshitopolwa shika?

³ Omomikalo dhilwe dhini tatu vulu okuulika kutya otwa simaneka Aakriste ooyakwetu megongalo? Moshitopolwa shika otatu ka kundathana nkene aakuluntugongalo taya vulu okuulika kutya oya simaneka aakuluntugongalo ooyakwawo. Shimwe ishewe, otatu ka kundathana nkene atuheni tatu vulu okuulika kutya otwa simaneka aamwatate naamwameme mboka kaaye li mondjokana. Opo nduno, otatu ki ilonga nkene tatu vulu okusimaneka mboka tashi vulika ihaaya popi elaka lyetu nawanawa.

4. Omayele gaPaulus geni ngoka taga adhika mAaroma 12:10, aakuluntugongalo ye na okutula miilonga?

⁴ Aakuluntugongalo ayehe megongalo, ohaya langekwa po kombepo  ondjapuki yaJehova. Nonando ongawo, kehe gumwe gwomuyo oku na omagano gi ili. (1 Kor. 12:17, 18) Yamwe otashi vulika opo ya langekwa po nokaye na owino oyindji. Yamwe otashi vulika ihaya vulu okulonga oshindji, omolwuukokele nenge uukolele. Nonando ongawo, kapu na okukala omukuluntugongalo tu ula omukuluntugongalo omukwawo ta ti ‘Inandi ku pumbwa.’ Pehala lyaashono, kehe omukuluntugongalo oku na okutula miilonga omayele gaPaulus ngoka ge li mAaroma 12:10. — Lesha.

5. Aakuluntugongalo ohaya ulike ngiini kutya oya simanekathana, nomolwashike sha simana ye shi ninge?

⁵ Aakuluntugongalo ohaya ulike kutya oya simanekathana mokupulakenathana neitulomo. Shika osha simana, unene tuu uuna ya gongala ye li olutu, ya kundathane iinima ya kwata miiti. Omolwashike mbela? Ndhindhilika shoka Oshungolangelo yOshiingilisa ye 1 Kotoba 1988 tayi ti: “Aakuluntugongalo oye shi kutya Kristus okupitila mombepo ondjapuki, oha vulu okuwilika omadhiladhilo gomukuluntugongalo kehe, a gandje ekotampango lyopaMbiimbeli ndyoka lya pumbiwa, opo ya vule okuungaunga nonkalo kehe nenge ya ninge etokolo lya simana. (Iil. 15:6-15) Ombepo ondjapuki ihayi kwathele owala omukuluntugongalo gumwe molutu lwaakuluntugongalo.”

6. Oshike hashi kwathele aakuluntugongalo ya longe ya hangana, notashi ka kwathela ngiini egongalo uuna taye shi ningi?

⁶ Omukuluntugongalo ngoka a simaneka aakuluntugongalo ooyakwawo, iha kala aluhe oye a hala okupopya tango pokugongala kwawo. Iha kala ta pangele oonkundathana noiha dhiladhila kutya omaetopo ge aluhe ogo ge li mondjila. Pehala lyaashono, omaetopo ge ohe ge eta po momukalo gweifupipiko. Oha pulakene nuukeka komatyokosha gayalwe. Shoka sha simanenena, oha kala e na ehalo lyokukundathana omayele gopaMbiimbeli nokutaamba ko ewiliko okuza ‘komupiya omudhiginini nomunandunge.’ (Mat. 24:45-47, NW) Ngele aakuluntugongalo ohaya kundathana iinima pamukalo gwohole nogwesimaneko, ombepo ondjapuki yaKalunga otayi ka kala pamwe nayo notayi ke ya wilika ya ninge omatokolo ngoka taga koleke egongalo. — Jak. 3:17, 18.

7. Jesus okwa li a tala ko ngiini mboka inaaya ya mondjokana?

⁷ Momagongalo kunena omu na aaihokani nosho wo omaukwanegumbo. Nonando ongawo, omu na wo aamwatate naamwameme oyendji mboka inaaya ya mondjokana. Mboka inaaya ya mondjokana otu na oku ya tala ko ngiini? Otu na oku ya tala ko ngaashi Jesus a li e ya tala ko. Jesus ka li a ya mondjokana pethimbo lyuukalele we kombanda yevi. Okwa kala inaa ya mondjokana nokulongitha ethimbo lye neitulomo lye koshinakugwanithwa she. Jesus ka li nando a longo aantu kutya okuya mondjokana nenge okukala inoo ya mo, oshi li oshitegelelwa. Ihe okwa li a popi kutya Aakriste yamwe otashi vulika ya tokole kaaya ye mondjokana. (Mat. 19:11, 12) Jesus okwa li a simaneka mboka inaaya ya mondjokana. Ka li a tala ko mboka inaaya ya mondjokana ye vulike kwaamboka ya ya mo nenge kutya oya kambela sha monkalamwenyo yawo.

8. Shi ikolelela kAakorinto yotango 7:7-9, Paulus okwa li a ladhipike Aakriste ya ninge shike?

⁸ Ngaashi Jesus, omuyapostoli Paulus naye pethimbo lyuukalele we, ka li a ya mondjokana. Paulus ka li nando a longo aantu kutya osha puka Omukriste a ye mondjokana. Okwa li e shi kutya ndyoka etokolo lyomuntu mwene. Nonando ongawo, okwa li a ladhipike Aakriste ya tale ngele otaya vulu okulongela Jehova inaaya ya mondjokana. (Lesha 1 Aakorinto 7:7-9.) Paulus ka li ha dhiladhila kutya Aakriste mboka inaaya ya mondjokana, inaya simana. Okwa li nokuli a pe Timoteus, ano omumwatate inaa hokana, iinakugwanithwa ya simana. * (Fil. 2:19-22) Osha yela kutya otashi ka kala sha puka okudhiladhila kutya omumwatate ota ka kala owala a gwana okupewa oshinakugwanithwa, ngele a hokana. — 1 Kor. 7:32-35, 38.

9. Otu na okutala ko ngiini okuya mondjokana nenge okwaa ya mo?

⁹ Jesus nenge Paulus inaya longa Aakriste kutya oye na okuya mondjokana nenge kaye na okuya mo. Ano otu na okutala ko ngiini okuya mondjokana nosho wo okwaa ya mo? Oshungolangelo yOshiingilisa ye 1 Kotoba 2012, oye shi yelitha nawa ya ti: “Uushili owo kutya [okuya mondjokana nokwaa ya mo] oku li omagano ga za kuKalunga. . . . Jehova ine shi tala ko kutya mboka [inaaya ya mondjokana] oye na okukala ya sa ohoni nenge ya yemata.” Tu na shoka momadhiladhilo, otwa pumbwa okukala twa simaneka aamwatate naamwameme mboka inaaya ya mondjokana.

10. Ongiini tatu vulu okuulika esimaneko kaamwatate naamwameme mboka inaaya ya mondjokana?

 ¹⁰ Ongiini tatu vulu okuyaalela omaiyuvo noonkalo dhaamwatate naamwameme mboka inaaya ya mondjokana? Natu shi kaleke momadhiladhilo kutya Aakriste yamwe mboka inaaya ya mondjokana, oya hogolola kaaya ye mo. Yamwe oya hala okuya mondjokana, ihe inaya mona ngoka te ya opalele. Yalwe otashi vulika ya silwa ookuume kawo kopandjokana. Kutya nduno etompelo olyashike, mbela otu na oku ya pula kutya omolwashike inaaya ya mondjokana nenge tu iyambe tu ya kongele ookuume kopandjokana? Odhoshili kutya yamwe otashi vulika ye tu pule tu ya kwathele. Ihe ngele inaye tu pula, ngele otwi iyamba tu ya kwathele, mbela otashi ke ya uvitha ngiini? (1 Tes. 4:11; 1 Tim. 5:13) Natu ka taleni komatyokosha gaamwatate naamwameme aadhiginini mboka inaaya ya mondjokana.

11-12. Omomukalo guni tashi vulika tu teye omukumo mboka inaaya ya mondjokana?

¹¹ Omutonatelishikandjo gumwe ngoka inaa hokana, nohe shi enditha nawa moshinakugwanithwa she, oku uvite kutya okukala inoo ya mondjokana, oku na uuwanawa owundji. Ihe okwa ti wo kutya ohashi vulu oku mu teya omukumo, uuna aamwatate naamwameme oyendji mboka aniwa ya hala oku mu kwathela, taye mu pula taya ti: “Omolwashike inoo hokana?” Omumwatate ngoka inaa hokana ha longo koshitayimbelewa shontumba okwa ti: “Omathimbo gamwe aamwatate naamwameme ohaya ningitha ndje ndi kale ndi uvite kutya mboka inaaya ya mondjokana oye etitha ohenda. Shoka ohashi vulu okuningitha omuntu a kale a tala ko okwaa ya mondjokana ku li omutengi, pehala lyoku ku tala ko ku li omagano.”

¹² Omumwameme gumwe ngoka inaa hokanwa, ha longo koBetel, okwa ti: “Aauvithi yamwe ohaya dhiladhila kutya ayehe mboka inaaya ya mondjokana, ohaya kala taya kongo ookuume kopandjokana, nenge kutya uuna ye li pokuma pu na aantu oyendji, ohaya kala ye shi tala ko shi li ompito yokwiimonena kuume kopandjokana. Oshikando shimwe sho nda li nda ya niilonga kehala lilwe moshilongo shetu, onda thiki ko mesiku ndyoka haku gongalwa. Omumwameme ngoka nda li handi zi kuye okwa lombwele ndje kutya megongalo lyawo omu na aamwatate yaali yepipi lyandje. Okwa li a shilipaleke ndje kutya ka li ta kambadhala okukongela ndje kuume kopandjokana. Ihe sho ngaa twa thiki poshinyanga shUukwaniilwa, ye ota fala ndje paamwatate mboka yaali. Shoka osha li lela shisitha ohoni kutse yatatu.”

13. Iiholelwa yini ya tsa omukumo omumwameme ngoka inaa hokanwa?

¹³ Omumwameme gumwe ngoka inaa hokanwa, ha longo koBetel, okwa ti: “Ondi shi aakokolindjila aakuluntu kungame, inaaya ya mondjokana, mboka ye na ondjele, ye na omalalakano omawanawa, ye na ehalo lyokukwathela yalwe, yu uvitile ombili oshinakugwanithwa shawo noye li ekwatho enene kegongalo. Oye na etaloko ewanawa kombinga yokwaa ya mondjokana, inayi itala ko ye vule yalwe, molwaashoka yo inaaya ya mondjokana nenge ya dhiladhile kutya itaya vulu okukala ya nyanyukwa, molwaashoka kaaye na kuume kopandjokana nenge aanona.” Onkee ano, oshinyanyudha okukala megongalo moka kehe gumwe e ku simaneka nokwe ku tala ko wu na oshilonga. Oho kala wu shi kutya aamwaho kaye ku uvitile ohenda sho kuu li mondjokana nenge ye ku sila ondumbo. Ihaye ku ipwililikile noihaya kala ye ku tala ko wu ya vule. Oho kala lela wu shi kutya oye ku hole.

14. Ongiini tatu vulu okuulika kutya otwa simaneka mboka inaaya ya mondjokana?

¹⁴ Aamwatate naamwameme mboka inaaya ya mondjokana otaye ke shi pandula, ngele ohatu ya simaneke shi ikolelela komaukwatya gawo omawanawa. Ihe hamolwaashoka inaaya ya mondjokana. Pehala lyokukala tu ya uvitile ohenda, otu na okukala twe ya lenga omolwuudhiginini wawo. Ngele osho twa ningi, kaye na esiku taya ka kala yu uvite twa fa tatu ya lombwele  kutya ‘inandi ku pumbwa.’ (1 Kor. 12:21) Pehala lyaashono, otaya ka kala ye shi kutya otwe ya simaneka notwe ya tala ko ye na oshilonga megongalo.

15. Omalunduluko geni yamwe ya li ya ningi, opo ya tamunune mo uukalele wawo?

¹⁵ Omimvo opo dha zi ko, aauvithi oyendji oya li yi itulile po elalakano yi ilonge elaka lilwe, opo ya vule okutamununa mo uukalele wawo. Opo ye shi ninge, oya li ye na okuninga omalunduluko moonkalamwenyo dhawo. Aamwatate naamwameme mboka, oya thigi po omagongalo gawo moka hamu popiwa elaka ndyoka ya yama, opo ya ka kwathele kegongalo hoka haku popiwa elaka lilwe noku na ompumbwe onene yaauvithi yUukwaniilwa. (Iil. 16:9) Aakriste mboka oya li ya ningi etokolo lyopaumwene, opo ya humithe komeho iinima yUukwaniilwa. Nonando oshe ya pula omimvo odhindji opo ya kale ye shi nawa elaka ndyoka epe, ohaya kwathele egongalo momikalo odhindji. Omaukwatya gawo omawanawa niimoniwa yawo, ohayi koleke egongalo. Otwa pandula kombepo yawo yeiyambo.

16. Aakuluntugongalo ohaya tala kushike ngele taya langeke po aamwatate, ye li aakuluntugongalo naayakuligongalo?

¹⁶ Olutu lwaakuluntugongalo kalu na nando okutokola kutya omumwatate ita vulu okuninga omukuluntugongalo nenge omuyakuligongalo, molwaashoka owala ihaa popi natango nawa elaka ndyoka hali popiwa megongalo. Aakuluntugongalo otaya ka tala ngele omumwatate okwa gwana okuninga omukuluntugongalo nenge omuyakuligongalo shi ikolelela kiitegelelwa yopamanyolo, ihe itaye ke mu langeka po taya tala ngele oku shi nawa elaka ndyoka hali popiwa megongalo moka e li. — 1 Tim. 3:1-10, 12, 13; Tit. 1:5-9.

17. Omapulo geni omaukwanegumbo ge na okwiipula, uuna taga tembukile koshilongo shilwe?

¹⁷ Omaukwanegumbo gamwe oga tembukila kiilongo yilwe omolwoonkalo oondhigu moshilongo shawo nenge ya ka konga iilonga. Omolwoonkalo ndhoka, oyana otashi vulika ya tameke okwiilonga elaka ndyoka hali popiwa moshilongo moka ye li ngashingeyi. Aavali nayo otashi vulika ya kale ya pumbwa okwiilonga elaka ndyoka, opo ya vule okumona iilonga. Ongiini ngele moshilongo moka omu na egongalo nenge ongundu yelaka ndyoka ya yama? Mbela oye na okukala megongalo moka hamu popiwa elaka lyomoshilongo moka ye li nenge okegongalo hoka haku popiwa elaka ndyoka ya yama?

18. Metsokumwe nAagalati 6:5, ongiini tatu vulu okuulika kutya otwa simaneka etokolo lyomutse gwuukwanegumbo?

¹⁸ Omutse gwuukwanegumbo ogu na okutokola kutya okegongalo lini uukwanegumbo wawo tawu kala hawu gongala. Molwaashoka shika oshi li oshinima shopaumwene, ogu na okutala kwaashoka tashi opalele uukwanegumbo wawo. (Lesha Aagalati 6:5.) Otwa pumbwa okusimaneka etokolo lyomutse gwuukwanegumbo. Kutya nduno oshike gwa pumbwa okuninga po, natu taambe ko etokolo ndyoka, noku wu taamba ko wu li oshitopolwa shegongalo lyetu. — Rom. 15:7.

19. Omitse dhomaukwanegumbo odhi na okudhiladhila nawa nokugalikana kombinga yashike?

 ¹⁹ Poompito dhilwe, omaukwanegumbo otashi vulika ga kale megongalo lyelaka ndyoka hali popiwa kaavali, ihe aanona otashi vulika kaaya kale ye shi elaka ndyoka nawa. Ngele egongalo ndyoka oli li moshitopolwa moka hamu popiwa elaka lyomoshilongo shoka, otashi vulika shi kale oshidhigu kaanona yu uve ko shoka tashi longwa aantu pokugongala noitaya ka huma komeho pambepo. Omolwashike mbela? Omolwaashoka otashi vulika aanona haya hiti osikola hoka haku longithwa owala elaka lyomoshilongo shoka, ihe haandyoka hali popiwa kaavali yawo. Moonkalo dha fa ndhoka, omitse dhomaukwanegumbo odhi na okudhiladhila nawa nokugalikana dhi pewe oondunge, opo dhi tseye shoka dhi na okuninga, dhi kwathele oyana ya hedhe popepi naJehova nonoshigwana she. Kutya nduno onkalo oya fa peni, aavali otaya ka pumbwa okulonga oyana okupopya elaka lyawo nawa nenge ya tembukile kegongalo lyelaka ndyoka oyana haya uvu nawa. Kutya nduno omutse gwuukwanegumbo ogwa tokola ngiini, ayehe muukwanegumbo oye na okukala yu uvite kutya oya simanekwa noye na oshilonga megongalo moka ya tembukila.

20. Ongiini tatu vulu okuulika kutya otwa simaneka aamwatate naamwameme mboka tayi ilongo elaka epe?

²⁰ Omolwomatompelo agehe ngoka twa zi nokukundathana, momagongalo ogendji otamu ka kala aamwatate naamwameme mboka taya kondjo nokwiilonga elaka epe. Otashi vulika hashi kala oshidhigu kuyo okupopya nkene yu uvite. Ihe ngele otwa kala ihaatu konenene nkene haya popi elaka ndyoka epe, otatu ka mona kutya oye hole Jehova noya hala oku mu longela. Ngele otwa tala komaukwatya gawo ngaka omawanawa, nena otatu ka kala twe ya lenga notwe ya simaneka. Itatu ke ya lombwela kutya ‘inandi ku pumbwa,’ molwaashoka owala ihaaya popi elaka lyetu nawa.

21-22. Uuthembahenda wuni tu na?

²¹ Jehova okwe tu pa uuthembahenda wa dhenga mbanda wokukala oshitopolwa shegongalo lye. Kutya nduno uukashikekookantu wetu owuni, tu li aagundjuka nenge aakokele, hatu popi elaka lyontumba nawa nenge ihaatu li popi nandonando, atuheni otu na ongushu momeho gaJehova notu na oshilonga kooitaali ooyakwetu. — Rom. 12:4, 5; Kol. 3:10, 11.

²² Natu tsikile okutula miilonga iiyilongomwa iiwanawa mbyoka twi ilonga kethaneko lyaPaulus lyiilyo yolutu. Shoka otashi ke tu kwathela tu kale tu shi shoka tu na okuninga, tu tse omukumo aamwatate naamwameme. Otashi ke tu kwathela wo tu kale aluhe tu ya hole notwe ya simaneka.