1. Ko e heigoa kua fakaatā e Iehova ke he tau fekafekau fakamooli takitaha haana?

KUA totonu a Iehova he fakaatā e tau fekafekau fakamooli takitaha haana ke fai vala i loto he fakapotopotoaga haana. Pete he kehekehe e tau matagahua ha tautolu, kua uho a tautolu oti mo e atihake e taha ke he taha. Lagomatai he aposetolo ko Paulo a tautolu ke mailoga e fakaakoaga aoga nei. Fēfē?

2. Ia Efeso 4:16, ko e ha kua lata a tautolu ke tokiofa e taha mo e taha mo e gahua auloa?

² He kupu tohi ne fakavē e vala tala nei ki ai, fakamaama fakamitaki e Paulo kua nakai fai a tautolu kua onoono ke he taha fekafekau ha Iehova mo e manatu “Nakai aoga a koe kia au.” (1 Kori. 12:21) Ka manako a tautolu ke mafola e fakapotopotoaga, lata a tautolu ke tokiofa e taha mo e taha ti gahua auloa. (Totou Efeso 4:16.) Ka gahua fakalataha a tautolu, to tupu olaola e fakaalofa he fakapotopotoaga.

3. Ko e heigoa ka fakatutala a tautolu he vala tala nei?

³ Ko e heigoa e falu puhala ka fakakite e tautolu e fakalilifu ke he falu Kerisiano he fakapotopotoaga? He vala tala nei, to fakatutala a tautolu ke he puhala ka fakalilifu he tau motua e falu motua. Uaaki, to fakatutala a tautolu ke he puhala ka fakakite e tautolu oti e uho he tau matakainaga ha tautolu ne nakai faitaane po ke faihoana. Fakahiku, to fakaako e tautolu e puhala  ke fakakite e loto fakaaue ki a lautolu ne liga nakaila iloa mitaki ke fakaaoga e vagahau ha tautolu.

4. Ko e heigoa e fakatonuaga ha Paulo ia Roma 12:10 kua lata e tau motua ke muitua?

⁴ Ko e tau motua oti he fakapotopotoaga kua kotofa he agaaga tapu ha Iehova. Ka e igatia a lautolu mo e kehekehe e tau mena fakaalofa mo e tau lotomatala. (1 Kori. 12:17, 18) Liga kotofa foou e falu mo e nakai lahi e iloaaga. Liga fakakaupā e falu ha ko e tau tau he moui mo e malolō tino. Ka e nakai fai motua kua lata ke onoono ke he falu motua mo e liga pehē “Nakai aoga a koe kia au.” Ka e igatia e motua mo e muitua ke he fakatonuaga ha Paulo ia Roma 12:10.​—Totou.

5. Fakakite fēfē he tau motua kua fakalilifu e lautolu e falu motua, ti ko e ha kua aoga ke taute pihia ai?

⁵ Fakakite he tau motua kua fakalilifu e lautolu e falu motua he fanogonogo fakamitaki ki a lautolu. Aoga lahi e mena nei ka fono e tau motua ke fakatutala ke he tau matakupu hokulo. Ko e ha? Pehē The Watchtower ia Oketopa 1, 1988: “To mailoga he tau motua ko Keriso, puhala he agaaga tapu ka takitaki e manatu he tau motua takitaha he kau he tau motua ke fahia ke he ha tuaga po ke taute e tau fifiliaga aoga lahi. (Gahua 15:6-15) Lagomatai he agaaga tapu e tau motua oti he matakau.”

6. Gahua fakalataha fēfē e tau motua, ti aoga fēfē e fakapotopotoaga ka taute pihia e lautolu?

⁶ Ko e motua ne fakalilifu e falu motua kua nakai lali tumau ke tutala fakamua he tau fono motua. Nakai pule e ia e fakatutalaaga, ti nakai talitonu a ia kua hako tumau e manatu haana. Ka e talahau fakatokolalo e ia e manatu haana he puhala totonu. Fanogonogo fakamitaki a ia ke he tau manatu he falu. Mua atu, kua makai a ia ke fakatutala ke he tau matapatu fakaakoaga he Tohi Tapu mo e fanogonogo ke he takitakiaga mai he “fekafekau fakamoli mo e loto matala.” (Mata. 24:45-47) He fakatutala e tau motua he takatakaiaga fakaalofa mo e fakalilifu, to ha ha i ai e agaaga tapu he Atua, mo e to takitaki a lautolu ke hokotia ke he tau fifiliaga kua fakamalolō e fakapotopotoaga.​—Iako. 3:17, 18.

7. Fēfē e onoonoaga ha Iesu ke he nofo tokotaha?

⁷ Ko e fakapotopotoaga he vahā nei kua putoia e tau hoa mau mo e tau magafaoa. Ka e putoia foki e tau matakainaga ne nakai faitaane po ke faihoana. Lata ke fēfē e onoonoaga ha tautolu ki a lautolu ne nonofo takitokotaha? Manamanatu ke he onoonoaga ha Iesu ke he nofo tokotaha. He fekafekauaga ha Iesu he lalolagi, ne nakai faihoana a ia. Fakatumau a ia ke nofo tokotaha mo e fakaaoga e magaaho ke taute e kotofaaga haana. Nakai fakaako e Iesu kua lata ke mau po ke nofo tokotaha. Ka e pehē a ia to fifili e falu Kerisiano ke mau. (Mata. 19:11, 12) Fakalilifu e Iesu a lautolu ne nakai mau. Nakai onoono a ia ke he tau tagata nonofo takitokotaha kua fakateaga po ke nakai katoatoa e tau momoui.

8. Ia 1 Korinito 7:7-9, ko e heigoa ne fakamalolō e Paulo ke he tau Kerisiano ke manamanatu ki ai?

⁸ Tuga a Iesu, taute he aposetolo ko Paulo e fekafekauaga haana ko e tagata nofo tokotaha. Nakai fakaako e Paulo kua hepe e Kerisiano ke mau. Mailoga e ia ko e fifiliaga fakatagata anei. Ka e fakamalolō e Paulo e tau Kerisiano ke manamanatu po ke maeke a lautolu ke fekafekau ki a Iehova he nonofo takitokotaha. (Totou 1 Korinito 7:7-9.) Nakai onoono hifo a Paulo ke he tau Kerisiano nonofo takitokotaha. Na fifili e ia e matakainaga fuata nofo tokotaha ko Timoteo ke taute e tau kotofaaga aoga lahi. * (Filipi 2:19-22) Maaliali ai mogoia, to hepe ke manamanatu kua hokotia po ke nakai hokotia e matakainaga taane ke he kotofaaga ha kua mau po ke nakai mau a ia.​—1 Kori. 7:32-35, 38.

9. Ko e heigoa ka talahau e tautolu hagaao ke he fakamauaga mo e nonofo takitokotaha?

⁹ Nakai fakaako e Iesu po ko Paulo kua lata e tau Kerisiano ke mau po ke fakatumau a lautolu ke nonofo takitokotaha. Ti ko e heigoa ka talahau e tautolu hagaao ke he fakamauaga mo e nonofo takitokotaha? Talahau fakamitaki he The Watchtower ia Oketopa 1, 2012: “Ko e [fakamauaga mo e nonofo takitokotaha] ka fakamaama ai ko e mena fakaalofa mai he Atua. . . . Nakai onoono a Iehova ke he [nofo tokotaha] ko e mena fakamā po ke momoko.” He tokaloto e mena nei, lata a tautolu ke fakalilifu e tau matakainaga taane mo e fifine nonofo takitokotaha he fakapotopotoaga.

10. Fakalilifu fēfē e tautolu e tau matakainaga nonofo takitokotaha ha tautolu?

 ¹⁰ Fakalilifu fēfē e tautolu e tau logonaaga mo e tau tuaga he tau matakainaga nonofo takitokotaha ha tautolu? Lata a tautolu ke tokaloto ko e falu Kerisiano nonofo takitokotaha ne taute e fifiliaga fakatagata ke ua mau. Falu Kerisiano nonofo takitokotaha kua manako ke mau, ka e nakai moua e tagata hako. Falu ne liga kua mate e hoa mau. He ha tuaga, logona hifo kia e lautolu he fakapotopotoaga e lata ke hūhū ke he tau Kerisiano nonofo takitokotaha e kakano ne nakai mau, po ke tala age ke lagomatai a lautolu ke kumi e hoa mau? Liga ole e falu Kerisiano nonofo takitokotaha ke moua e lagomataiaga pihia. Kaeke ke nakai ole ma e lagomataiaga, liga fēfē e logonaaga he tau matakainaga nonofo takitokotaha ke he tau lagomataiaga pihia? (1 Tesa. 4:11; 1 Timo. 5:13) Kia manamanatu ke he falu talahauaga mai he tau matakainaga nonofo takitokotaha mahani fakamooli.

11-12. Liga fakalolelole fēfē e tautolu a lautolu ne nonofo takitokotaha?

¹¹ Taha e leveki takaiaga nofo tokotaha kua taute fakamitaki e kotofaaga haana ne logona hifo na loga e aoga he nofo tokotaha. Ka e pehē a ia na fakalolelole ka hūhū e tau matakainaga ki a ia: “Ko e ha ne nakai mau a koe?” Ko e matakainaga taane nofo tokotaha ne gahua he la ofisa ne pehē: “Falu magaaho ko e tau matakainaga ne taute au ke logona hifo ko e fakaalofa ha ia he tuaga ha lautolu ne nonofo takitokotaha. Tuga kua taute ai e nofo tokotaha mo kavega ka e nakai ko e mena fakaalofa.”

¹² Ko e matakainaga fifine kua gahua he Peteli ne pehē: “Falu tagata fakailoa ne fuafua manatu ko e tau tagata nonofo takitokotaha kua kumi hoa po ke onoono ke he tau tagata nonofo takitokotaha oti kua eke e tau fakafiafiaaga mo magaaho ke kumi hoa. Fai mogo ne fano au ke he taha faahi he motu ke lata mo e gahua haaku he Peteli, ne fina atu au he pō he feleveiaaga. Ko e matakainaga fifine ne nofo ai au ne tala mai na tokoua e matakainaga taane he fakapotopotoaga ne atutaha mo au. Pehē a ia kua nakai lali a ia ke kumi kapitiga taane ma haaku. Ka ko e mogo ne huhū atu a maua ke he Fale he Kautu, ne uta e ia au ke feleveia mo e tau matakainaga taane tokoua. Ko e tuaga fakafuafua kelea mooli ki a mautolu tokotolu.”

13. Ko e heigoa e tau fakafifitakiaga kua fakamalolō e matakainaga fifine nofo tokotaha?

¹³ Ko e taha matakainaga fifine nofo tokotaha ne gahua he Peteli ne talahau: “Iloa e au ko e tau paionia momotua nonofo takitokotaha ne mauokafua, hagaaki tumau, mo e fiafia ke he tau matagahua ha lautolu ti lahi e lagomatai ke he fakapotopotoaga. Lagotatai e onoonoaga ha lautolu ia ke he nonofo takitokotaha, nakai mua hake ha kua nonofo takitokotaha a lautolu po ke nakai fiafia ha kua nakai fai hoa mo e magafaoa.” Ko e mena mitaki mooli ma e fakapotopotoaga he logona hifo e koe e fakalilifu mo e uho lahi. Nakai logona hifo e koe e momoko po ke mahekeheke, fakaheu po ke mua atu a koe ki a lautolu. Iloa e koe kua ofania e lautolu a koe.

14. Fakalilifu fēfē e tautolu a lautolu ne nonofo takitokotaha?

¹⁴ To loto fakaaue e tau matakainaga nonofo takitokotaha ha tautolu ka tokiofa e tautolu a lautolu ha ko e tau mahani mitaki ha lautolu ka e nakai ha kua nonofo takitokotaha a lautolu. He nakai logona hifo e momoko ki a lautolu, kia loto fakaaue a tautolu ke he mahani fakamooli ha lautolu. Ti ko e fua, to nakai logona hifo he tau matakainaga nonofo  takitokotaha ha tautolu kua pehē a tautolu ki a lautolu: “Nakai aoga a koe kia au.” (1 Kori. 12:21) Ka e to iloa e lautolu kua fakalilifu e tautolu a lautolu mo e uho a lautolu i loto he fakapotopotoaga.

15. Ko e heigoa e tau hikihikiaga ne taute he falu ke fakalaulahi e fekafekauaga ha lautolu?

¹⁵ He tau tau loga kua mole, tokologa e tau tagata fakailoa ne eke mo foliaga ha lautolu ke fakaako e taha vagahau ke fakalaulahi e fekafekauaga ha lautolu. Ka pihia, lata a lautolu ke taute e tau hikihikiaga. Toka he tau matakainaga nei e fakapotopotoaga ne fakaaoga e vagahau motu ha lautolu ke fekafekau he fakapotopotoaga ne fakaaoga e vagahau kehe mo e manako ke moua e tau tagata fakailoa he Kautu. (Gahua 16:9) Ko e fifiliaga fakatagata ne taute he tau Kerisiano nei ke fakaholo ki mua e gahua ke lata mo e Kautu. Pete he liga totou tau ato maeke a lautolu ke iloa mitaki e vagahau foou, loga e puhala ne lagomatai e lautolu e fakapotopotoaga. Ko e tau mahani mitaki mo e tau iloaaga ha lautolu kua fakamalolō e fakapotopotoaga. Uho ki a tautolu e tau matakainaga nei!

16. Fakavē ke he heigoa e fifiliaga he tau motua ke he tau lotomatala he tau matakainaga taane ke eke mo tau motua mo e tau fekafekau lagomatai?

¹⁶ To nakai tautaofi e kau he tau motua he talia e matakainaga taane ke fekafekau ko e motua po ke fekafekau lagomatai ha kua nakaila iloa mitaki e ia e vagahau he fakapotopotoaga. To fifili he tau motua e matakainaga taane he fakavē ke he tau lotomatala he Tohi Tapu ma e tau motua mo e tau fekafekau lagomatai ka e nakai ha ko e nakaila iloa mitaki ke fakaaoga e vagahau he fakapotopotoaga.​—1 Timo. 3:1-10, 12, 13; Tito 1:5-9.

17. Ko e heigoa e tau hūhū kua fehagai mo e falu magafaoa he hiki atu a lautolu ke he taha motu?

¹⁷ Falu magafaoa Kerisiano ne hiki atu ke he taha motu ke kumi puipuiaga po ke gahua tupe. He tau tuaga ia, ko e tau fanau ha lautolu mogonei kua liga o atu he tau aoga he motu foou ia. Liga lata foki e tau matua ke fakaako e vagahau he motu ia ke maeke ke moua e gahua tupe. Ka e kua ka fai fakapotopotoaga po ke matakau he vagahau motu ha lautolu? Ko e fakapotopotoaga fe kua lata e magafaoa ke o atu ki ai? Ko e fakapotopotoaga kia he vagahau he motu foou ia po ke fakapotopotoaga ne fakaaoga e vagahau motu ni he magafaoa ha lautolu?

18. Ia Kalatia 6:5, fakalilifu fēfē e tautolu e fifiliaga ne taute he ulu he magafaoa?

¹⁸ Ko e ulu he magafaoa kua lata ke fifili e fakapotopotoaga ka o atu e magafaoa haana ki ai. Ha ko e fifiliaga fakatagata anei, kua lata a ia ke manamanatu ke he tau mena kua latatonu ma e magafaoa haana. (Totou Kalatia 6:5.) Lata a tautolu ke fakalilifu e fifiliaga he  ulu he magafaoa. Ko e mena ni ne fifili e ia, kia talia e tautolu e fifiliaga haana mo e fakafeleveia mai e magafaoa ko e vala uho he fakapotopotoaga ha tautolu.​—Roma 15:7.

19. Ko e heigoa he tau ulu he magafaoa kua lata ke manamanatu fakamitaki he liogi?

¹⁹ He falu tuaga, ko e tau magafaoa kua fekafekau he fakapotopotoaga ne fakaaoga e vagahau he tau matua ka e nakaila iloa mitaki he fanau e vagahau ia. Ka tū e fakapotopotoaga ia he matakavi ne fakaaoga e vagahau he motu kua o atu a lautolu ki ai, to liga uka e tau fanau ke maama e tau feleveiaaga mo e nakai tupu ki mua fakaagaaga. Ko e ha? Ha kua liga o atu e tau fanau he aoga ne fakaaoga e vagahau he motu ka e nakai fakaaoga e vagahau he tau matua ha lautolu. He tau tuaga pihia, lata e tau ulu he magafaoa ke liogi ti fifili fakamitaki e mena ha lautolu ka taute ke lagomatai e tau fanau ke fakatata lahi ki a Iehova mo e haana tau tagata. Liga lata a lautolu ke lagomatai e tau fanau ha lautolu ke iloa mitaki e vagahau he tau matua ha lautolu po ke lata ke fifili ke hiki ke he fakapotopotoaga ne fakaaoga e vagahau ne maama mitaki he tau fanau. Ko e mena ni ne fifili he ulu he magafaoa, ko e fakapotopotoaga ka fifili e ia ke o atu ki ai kua lata ke logona hifo e ia mo e magafaoa haana e lilifu mo e uho.

20. Fakalilifu fēfē e tautolu e tau matakainaga ha tautolu hane fakaako e vagahau foou?

²⁰ Ma e tau kakano oti kua fakatutala a tautolu ki ai, to ha ha i ai e tau matakainaga he tau fakapotopotoaga loga ka taufetului he lali ke fakaako e vagahau foou. Liga uka a lautolu ke talahau e tau manatu ha lautolu. Ka nakai ni manamanatu a tautolu ke he puhala vagahau ha lautolu, to kitia e tautolu e fakaalofa ha lautolu ki a Iehova mo e manako ke fekafekau ki a ia. Ka kitia e tautolu e tau mahani mitaki nei, to uho mo e fakalilifu lahi e tautolu e tau matakainaga nei. To nakai pehē a tautolu “Nakai aoga a koe kia au” ha kua nakaila iloa mitaki e koe e vagahau ha mautolu.

21-22. Ko e heigoa e lilifu lahi kua moua e tautolu?

²¹ Kua fakaatā e Iehova a tautolu ke fai vala i loto he fakapotopotoaga haana. Ko e tagata taane po ke fifine, nofo tokotaha po ke mau, fuata po ke fuakau po ke iloa e tautolu e taha vagahau po ke nakai, kua uho lahi a tautolu ki a Iehova mo e taha ke he taha.​—Roma 12:4, 5; Kolo. 3:10, 11.

²² Kia matutaki a tautolu ke fakagahua e tau fakaakoaga aoga kua ako mai e tautolu he fakataiaga ha Paulo ke he tino he tagata. He taute pihia, to kumi foki e tautolu e falu puhala ke tokiofa e tuaga ha tautolu mo e tuaga he falu i loto he fakapotopotoaga ha Iehova.