1. Yehova ahaire ki buri muheereza we omwesigwa?

YEHOVA ahaire buri muheereza we omwesigwa omwanya omu kibiina kye. N’obu turaabe twine emyanya etarikushushana, twena turi ab’omuhendo kandi buri omwe naayetenga mugyenzi we. Entumwa Paulo naatuhwera kwetegyereza enshonga nkuru egi. Mu muringo ki?

2. Kurugiirira aha Abaefeso 4:16, ahabw’enki twine kutwara abandi nk’ab’omuhendo, kandi tukakorera hamwe?

² Nk’oku kiri omu kyahandiikirwe kikuru ky’ekicweka eki, Paulo naayoreka butunu ngu tihaine oshemereire kureeba omuheereza Yehova mugyenzi we akamugira ati: “Tonyiniire mugasho.” (1 Kor. 12:21) Ekibiina kubaasa kubamu obusingye, twine kureeba abandi nk’ab’omuhendo kandi tukakorera hamwe. (Shoma Abaefeso 4:16.) Twakorera hamwe omu bumwe, ekibiina nikitunguuka kandi nikihamibwa omuri rukundo.

3. Nituza kwega ki omu kicweka eki?

³ Nitubaasa kworeka tuta ngu nituha abandi ekitiinisa omu kibiina? Omu kicweka eki, nituza kureeba oku abareeberezi barikubaasa kuhaana ekitiinisa. Bwanyima, nituza kureeba oku twena turikubaasa kworeka ngu ab’eishe-emwe na banyaanyazi-itwe abatari mu bushwere nitubatwara nk’ab’omuhendo omu kibiina. Aha muheru, nituza kwega oku turikubaasa kworeka ngu nitusiima abatarikugamba gye orurimi rwaitu.

4. Paulo akaha buhabuzi ki omu Abarooma 12:10 obu abareeberezi baine kukuratira?

⁴ Abareeberezi boona omu kibiina nibatooranwa omwoyo gurikwera. Kwonka, buri omwe aine okubaasa n’ebiconco bitarikushushana. (1 Kor. 12:17, 18) Abamwe nibabaasa kuba nibwo baherize kutooranwa barikumanya ebiringaniire. Abandi nibabaasa kuba batakikora bingi ahabw’emyaka ya bukuru nari ahabw’amagara mabi. Kwonka tihaine mureeberezi n’omwe oshemereire kureeba ondiijo reero akagira ati: “Tonyiniire mugasho.” Kureka buri mureeberezi aine kukuratira obuhabuzi bw’entumwa Paulo oburi omu Abarooma 12:10.​—Kishome.

5. Abareeberezi nibabaasa kworeka bata ngu nibahaana ekitiinisa, kandi ahabw’enki kiri kikuru kukikora?

⁵ Abareeberezi nibooreka ngu nibahaana ekitiinisa barikuhurikiza gye bagyenzi baabo. Eki ni kikuru na munonga abareeberezi baagira orukiiko kugaaniira aha nshonga z’amaani. Ahabw’enki? Yetegyereze ebyabaire biri omu Watchtower ey’Okitoba 1, 1988: “Abareeberezi baine kumanya ngu Kristo, ahabw’omwoyo gurikwera, naabaasa kuhuguura ebiteekateeko by’omureeberezi weena ori aha kakiiko k’abareeberezi kuha omusingye gwa Baibuli ogurikwetengyesa kwemera embeera emwe nari omu kucwamu aha nshonga nkuru. (Byak. 15:6-15) Tihaine mureeberezi orikuba aine omwoyo gurikwera kukira abandi aha kakiiko.”

6. Abareeberezi nibabaasa kukorera hamwe bata bakwataniise, kandi ekibiina nikigasirwa kita baakora batyo?

⁶ Omureeberezi orikuha abandi ekitiinisa tarikuteeraho kuba niwe yaabanza kugamba baaba baine orukiiko. Tiwe arikuguma naagamba obwire obwingi, kandi taine kuteekateeka ngu ekitenso kye butoosha nikyo kihikire. Kureka, naagamba eki arikuteekateeka omu bucureezi kandi atuurize. Naahurikiza gye ebitenso by’abandi. Ekikuru munonga, naagamba aha misingye y’Ebyahandiikirwe kandi akuratira obuhabuzi ‘bw’omwambari omwesigwa kandi ow’obwengye.’ (Mat. 24:45-47) Abareeberezi baagaaniira aha nshonga omu muringo gwa rukundo kandi ogw’ekitiinisa, Ruhanga naabaha omwoyo gurikwera, kandi nigwija  kubahwera kucwamu ebiraahamye ekibiina.​—Yak. 3:17, 18.

7. Yesu akaba naareeba ata okutaza omu bushwere?

⁷ Ekibiina obunaku obu kirimu abari omu bushwere n’amaka. Kwonka, kirimu n’ab’eishe-emwe na banyaanyazi-itwe abatari mu bushwere. Tushemereire kureeba tuta abatari mu bushwere? Yetegyereze oku Yesu yaabaire naareeba okutaza mu bushwere. Yesu taragiire omu bushwere obu yaabaire naaheereza aha omu nsi. Kureka akaguma amaririire kukoresa obwire bwe n’amaani ge kuhikiiriza obujunaanizibwa bwe. Yesu tarayegyeise ngu Omukristaayo aine kuza omu bushwere nari kutabuzamu. Kureka, akagira ngu Abakristaayo abamwe nibabaasa kucwamu kutaza omu bushwere. (Mat. 19:11, 12; Reeba ebigambo by’okwegaho ebiri ahari Matayo 19:12.) Abatari mu bushwere Yesu akaba naabaha ekitiinisa. Akaba atarikubareeba nk’ab’ahansi nari nk’abaine eki babuzirweho.

8. Kurugiirira aha biri omu 1 Abakorinso 7:7-9, entumwa Paulo akahiga Abakristaayo kuteekateeka ahari ki?

⁸ Nka Yesu, entumwa Paulo nawe akahikiiriza obuheereza bwe atagiire mu bushwere. Paulo tarayegyeiseho eizooba na rimwe ngu kigwire Omukristaayo kuza omu bushwere. Akeetegyereza ngu egi n’enshonga ei buri omwe aine kwecweramu. Kwonka, Paulo akahiga Abakristaayo kureeba yaaba nibabaasa kuheereza Yehova batagiire mu bushwere. (Shoma 1 Abakorinso 7:7-9.) Buzima, entumwa Paulo akaba atarikugaya Abakristaayo abatari mu bushwere. Nangwa, akatoorana omunyeeto Timoseo, owaabaire atari mu bushwere, kwejumba omu buheereza bukuru. * (Fil. 2:19-22) N’ahabw’ekyo buzima kigwire kuteekateeka ngu ow’eishe-emwe naaba ahikire kuheebwa obujunaanizibwa nari atahikire gye ahabw’okugira ngu ari omu bushwere nari ataburimu.​—1 Kor. 7:32-35, 38.

9. Nitubaasa kugamba ki aha kuza omu bushwere n’okutabuzamu?

⁹ Yesu n’entumwa Paulo tibarayegyeise ngu Abakristaayo baine kuza omu bushwere nari kutabuzamu. Mbwenu shi nitubaasa kugamba ki aha kuza omu bushwere n’okuguma wenka? Watchtower eya Okitoba 1, 2012, ekagira eti: “Buzima, byombi [okuza omu bushwere n’okutabuzamu] n’ebiconco kuruga ahari Ruhanga.  . . . Yehova tarikureeba [okutaza mu bushwere] nk’ekirikuhemurana nari ekirikureeta amaganya.” Twine ekyo omu biteekateeko, tushemereire kuha ekitiinisa ab’eishe-emwe abatari mu bushwere abari omu kibiina Ekikristaayo.

10. Nitubaasa kworeka tuta ngu nituha ekitiinisa ab’eishe-emwe abatakagiire mu bushwere?

¹⁰ Nitubaasa kuha tuta ekitiinisa enyehurira n’embeera ez’ab’eishe-emwe na banyaanyazi-itwe abatari mu bushwere? Ni kirungi kwijuka ngu Abakristaayo abamwe abatari mu bushwere baine ekigyendererwa ky’okuguma batyo. Ab’eishe-emwe abandi bo nibenda kuza omu bushwere kwonka tibakatungire abantu abu barikwenda. Abandi nibabaasa kuba baafeereirwe abakundwa baabo. Mbwenu shi, abandi omu kibiina bashemereire kubuuza abatari mu bushwere ahabw’enki bataburimu, nari kuteeraho kubahwera kusherura abakundwa? N’amazima, Abakristaayo abamwe abatari mu bushwere nibabaasa kushaba obuhwezi nk’obwo. Kwonka shi omuntu yaaba atashabire buhwezi, naija kwehurira ata baayenda kumuhwera omu nshonga egyo? (1 Tes. 4:11; 1 Tim. 5:13) Ka tureebe ebi ab’eishe-emwe abatakataahire mu bushwere baagambire.

11-12. Nitubaasa kureetera tuta ab’eishe-emwe abatari mu bushwere kwehurira kubi?

¹¹ Ow’eishe-emwe omwe orikutaayaayira ebibiina otari mu bushwere naateekateeka ngu hariho ebirungi bingi ebiri omu kutaza mu bushwere. Kwonka, akagira ngu nikiteganisa kureeba ab’eishe-emwe na banyaanyazi-itwe bataine bigyendererwa bibi barikumubuuza ‘ahabw’enki atari mu bushwere?’ Ow’eishe-emwe otari mu bushwere orikukora aha ofiisi y’eitaagi akagira ati: “Obumwe ab’eishe-emwe nibandeetera kuteekateeka ngu abatari mu bushwere n’ab’okusaasibwa. Eki nikibaasa kukureetera kureeba okutaza mu bushwere nk’omugugu beitu kitari kiconco.”

¹² Munyaanyazi-itwe otari mu bushwere Omubeseeli naagira ati: “Abamwe omu kibiina nibateekateeka ngu boona abatari mu bushwere nibareeba buri mukoro oguriho abantu baingi nk’omugisha gw’okusherura omukundwa. Eizooba rimwe kikanyetengyesa kuza omu kicweka ekindi eky’eihanga, kandi nkahikayo aha izooba ry’enteerane. Munyaanyazi-itwe owaabaire naaza kundaaza akangira ngu omu kibiina kyabo harimu ab’eishe-emwe babiri ab’orwingano rwangye. Akampamiza ngu tariyo naateeraho kumpwera kusherura omukundwa. Kwonka ahonaaho ku naahikire omu Kyombeko ky’Obukama, akantwara ahu ab’eishe-emwe abo babiri baabaire bari. Hatariho kubangaanisa, nyowe n’ab’eishe-emwe abo tukabwerabwera twashoberwa.”

13. Ni by’okureeberaho ki ebyahigire munyaanyazi-itwe omwe otari mu bushwere?

¹³ Munyaanyazi-itwe ondiijo Omubeseeli otari mu bushwere akagira ati: “Nnimanya banyaanyazi-itwe baapayoniya abakuzire abatari mu bushwere, kandi abahamire, abarikwefeerereza, abamazirwe omu buheereza bwabo, kandi abarikuhwera munonga ekibiina. Baine emiteekateekyere eringaniire aha kutaza mu bushwere, tibarikuteekateeka ngu nibakira abandi nari ngu haine ekirikubaburaho ahabw’okutaza mu bushwere bakagira eka.” Eki nikireetera ekibiina kuba omwanya murungi waaba noohurira ngu nooheebwa ekitiinisa kandi nootwarwa nk’ow’omuhendo. Torikwehurira nk’ou barikusaasibwa, ou barikwegomba, otarikufuubwaho, nari nk’orikukira abandi. Kureka noomanya ngu ori omwe aharibo.

14. Nitubaasa kworeka tuta ngu nituha ekitiinisa abatari mu bushwere?

¹⁴ Ab’eishe-emwe na banyaanyazi-itwe abatari mu bushwere nibashemererwa twabatwara nk’ab’omugasho ahabw’emitwarize yaabo mirungi, beitu etari mbeera yaabo. Omu  mwanya gw’okubasaasibwa, ni kirungi kubasiima ahabw’obwesigwa bwabo. Ekirikurugamu, ab’eishe-emwe abatari mu bushwere tibarikwija kwehurira nk’abu turikugira ngu: “Tonyiniire mugasho.” (1 Kor. 12:21) Omu mwanya gw’ekyo, nibaija kumanya ngu nitubaha ekitiinisa kandi ngu nitubatwara nk’ab’omuhendo omu kibiina.

15. Ni mpinduka ki ezi bamwe bakozire kwongyera aha buheereza bwabwo?

¹⁵ Omu myaka mikye ehingwire, ababuurizi baingi bataireho ekigyendererwa ky’okwega orurimi orundi kubaasa kwongyera aha buheereza bwabo. Kubaasa kukora ekyo baine kukora empindahinduka. Ab’eishe-emwe aba batsigireho ekibiina kyabo ekirikukoresa orurimi oru barikugamba, kubaasa kuheereza omu kibiina ekirikukoresa orurimi orundi ahu ababuurizi b’Obukama barikwendwa munonga. (Byak. 16:9) Abakristaayo nibacwamu batyo kwebembeza eby’Obukama. N’obu kiraabe nikibaasa kubatwarira emyaka kwega gye orurimi rusya, okwefeerereza kwabo n’okw’omugasho munonga. Emitwarize yaabo mirungi n’okumanya oku baine nikuhamya ekibiina. Ab’eishe-emwe aba abarikwefeerereza n’ab’omuhendo munonga omu kibiina!

16. Abareeberezi nibaihirira ahari ki kushwijuma abaine kuba abareeberezi nari abaheereza?

¹⁶ Akakiiko k’abareeberezi tikarikubaasa kwanga kuhamya ow’eishe-emwe ohikire kuba omureeberezi nari omuheereza ahabw’okugira ngu tarikugamba gye orurimi rw’ekibiina eki arimu. Abareeberezi baine kushwijuma ow’eishe-emwe barikwihirira aha bi abareeberezi nari abaheereza baine kuhikiiriza ebiri omu byahandiikirwe kwonka kutari kugamba gye orurimi orusya.​—1 Tim. 3:1-10, 12, 13; Tit. 1:5-9.

17. Ni bibuuzo ki ebi abaine amaka bashemereire kwebuuza baaza omu ihanga erindi?

¹⁷ Abakristaayo abamwe abaine amaka bafurukire baaza omu mahanga agandi kusherura obuhungiro nari emirimo. Omu mbeera nk’ezi, abaana baabo nibabaasa kuba nibaza omu mashomero agarikukoresa orurimi rw’eihanga eri barimu. Abazaire nabo nibabaasa kwega orurimi orusya kubaasa kutunga emirimo y’okwebaisaho. Kwonka shi ku haakuba hariho ekibiina nari guruupu erikukoresa orurimi rwabo rw’obuzaarwa? Mbwenu shi ab’eka egyo nibaija kuza mu kibiina ki? Bashemereire kuza omu kibiina ekirikukoresa orurimi rw’eihanga erisya eri barimu nari eky’orurimi rwabo?

18. Kuhikaana na Abagalatia 6:5, nitubaasa kworeka tuta ngu nitushagika okucwamu kw’omutwe gw’eka?

¹⁸ Omutwe gw’eka aine kucwamu ekibiina eki eka ye eraazemu. Egi n’enshonga y’okwecweramu, ei omutwe gw’eka aine kuteekateekaho kureeba ekirikubaasa kugasira eka ye. (Shoma Abagalatia 6:5.) Twine kuha ekitiinisa okucwamu kw’omutwe gw’eka. Kyona eki araacwemu, twine kukiikiriza, kandi twakiire  eka ye omu kibiina tugitware nk’ey’omuhendo.​—Rom. 15:7.

19. Emitwe y’amaka baine kushaba kandi bakateekateeka ahari ki?

¹⁹ Omu mbeera ezindi, ab’eka emwe nibabaasa kuba nibaheereza omu kibiina ekirikukoresa orurimi rw’enzaarwa, kwonka abaana bo batarikurugamba gye. Ekibiina ekirikukoresa orurimi rw’abazaire kyaba kiri omu ihanga erindi, abaana nibabaasa kugumirwa kwetegyereza gye enteerane, kandi babure kutunguuka omu by’omwoyo. Ahabw’enki? Ahakuba aha ishomero abaana nibabaasa kuba nibeegyesibwa omu rurimi orundi rutari orw’abazaire baabo. Omu mbeera nk’ezi, omutwe gw’eka aine kuteekateeka n’obwegyendesereza akashaba Yehova kumuhwera kucwamu gye kugira ngu ahwere abaana be kwirira haihi Ruhanga n’abaheereza be. Nibabaasa kucwamu kuhwera abaana kwega gye orurimi rw’enzaarwa nari bacwemu kuza omu kibiina ekirikukoresa orurimi oru abaana barikwetegyereza gye. Kyona eki nyineeka arikucwamu, ekibiina eki arikutoorana kuzamu kishemereire kumwakiira gye, akahurira naaheebwa ekitiinisa kandi ari ow’omugasho.

20. Nitubaasa kworeka tuta ngu nituha ekitiinisa ab’eishe-emwe abarikwega orurimi rusya?

²⁰ Ahabw’enshonga ezi twagambaho, omu bibiina bingi nihaba harimu abarikugumirwa kwega orurimi rusya. Nikibaasa kubagumira kugamba ebi barikuteekateeka. Kwonka, twaba tutafiireyo aha muringo ogu barikugambamu orurimi oru barikwega, nitwija kureeba rukundo ei bainiire Yehova n’ekyetengo ky’okumuheereza. Twareeba emitwarize mirungi ei baine, nitwija kubaha ekitiinisa tubatware nk’ab’omuhendo. Titurikwija kubagira ngu ‘tibatwiniire mugasho’ ahabw’okugira ngu tibarikugamba gye orurimi rwaitu.

21-22. Twine mugisha ki ogw’omutaano?

²¹ Yehova atuhaire omugisha gw’omuhendo ogw’okuba omu kibiina kye. Yaaba ori mushaija nari mukazi, ori omu bushwere nari otaburimu, ori muto nari mukuru, orikugamba gye orurimi orundi nari otarikurugamba gye, twena turi ab’omuhendo ahari Yehova n’ahari bagyenzi baitu.​—Rom. 12:4, 5; Kol. 3:10, 11.

²² Ka tumariirire kuta omu nkora enshonga enkuru ezi twayega omu ky’okureeberaho ky’entumwa Paulo eky’ebicweka by’omubiri. Twakora tutyo, nitwija kwongyera kusherura emiringo y’okuha ekitiinisa omwanya gwaitu omu kibiina kya Yehova n’ogw’abandi.