1. Kodi Yahova ambapasa ciyani mtumiki wace ali-wentse wakukhulupirika?

THANGWE ra lufoyi, Yahova ambapasa mbuto kwa mtumiki wace ali-wentse m’gwere. Napo kuti tina maudindo yakusiyana, tentsenefe ndife wakufunika, ndipo ali-wentse ambathemba mwanzace. Mpostolo Paulo ambatithandiza kubvesesa nkhani yakufunikayi. Kodi ambatithandiza tani?

2. Mwakubverana na Wayefezo 4:16, thangwe ranyi tin’funika kumbalemekezana na kumbaphata basa pabodzi?

² Mu vesi lakutsogolera nkhani ino, Paulo adatsindika kuti, pan’funika lini kugumanika munthu wakunyang’anisa mwanzace acilewa kuti: ‘Ndiribe namwe basa.’ (1 Wakolinto 12:21) Kuti gwere likhale lakulinganizika bwino, tin’funika kumbalemekezana na kumbaphata basa pabodzi. (Werengani Wayefezo 4:16. *) Tikambaphata basa pabodzi mwakuphatana, tentse timbabzibva bwino ndipo gwere limbakhala lakulimba.

3. Kodi mu nkhani ino tin’pfunza ciyani?

³ Kodi ni mbali ziponi zomwe tin’funika kumbalatiza ulemu kuna abale wathu m’gwere? Mu nkhani ino, tiniwona momwe akulu wa m’gwere angalatizire lufoyi kwa akulu anzawo. Patsogolo pace, tiniwonambo momwe tingalatizire ulemu kwa abale na mpfumakazi omwe akanati kulowola ayai kulowodwa. Ndipo pakumalizira, tiniwona momwe tingalatizire ulemu kwa wale omwe ambalewalewa lini bwino-bwino cirewedwe cathu.

4. Kodi ni malango yaponi yakugumanika pa Waroma 12:10 yomwe akulu an’funika kuyateweza?

⁴ Akulu wentse wa m’gwere ambaikhidwa na mzimu wakucena  wa Yahova. Ndipo mkulu ali-wentse ana mphaso na luso lakusiyana na mwanzace. (1 Wakolinto 12:17, 18) Winango aikhidwa tsapanopa kuti akhale akulu ndipo ambadziwa lini bzizinji. Ndipo winango mbacikulire ndipo ambaduwala-duwala. Napo bziri tenepo, pan’funika lini kugumanika mkulu wa gwere wakunyang’anisa mwanzace acilewa kuti ‘Ndiribe namwe basa.’ M’mbuto mwace, mkulu ali-wentse an’funika kuteweza malango yomwe Paulo adayalewa pa Waroma 12:10.​—Werengani. *

5. Kodi akulu wa gwere angalatize tani kuti ambalemekezana, ndipo thangwe ranyi mpsakufunika kuti iwo ambacite bzimwebzi?

⁵ Kodi akulu wa gwere angalatize tani kuti ambalemekeza akulu anzawo wa gwere omwe ambacitambo mbali ya bungwe lawo la akulu? Mwa kumbawatetekera mwatceru. Bzimwebzi mpsakufunika kwene-kwene maka-maka pa nthawe yomwe akuluwo atsonkhana kuti acezerane bza nkhani yakufunika kwene-kwene. Thangwe ranyi? Onani bzomwe Nsanza ya Mulindiri ya 1 Outubro, 1988 idalewa, iyo idati: “Akulu wa gwere an’dzazindikira kuti Kristu mwakuphatisa basa mzimu wakucena, angatsogolere makumbukidwe ya mkulu ali-wentse wa gwere wa bungwe la akulu kuti afotokoze nfundo zakufunika za m’Bibliya, kuti adziwe bzomwe angacite pa nkhani iri-yentse ayai kucita cakusankhula cakufunika kwene-kwene. (Mabasa 15:6-15) Mzimu wakucena umbathandiza akulu wentse wa gwere, sikuti mkulu m’bodzi.”

6. Kodi n’ciyani comwe cingathandize akulu wa gwere kuti ambaphate basa mwakuphatana, ndipo bzimwebzi bzimbathandiza tani gwere?

⁶ Mkulu wa gwere omwe ambalemekeza akulu anzace ambayezera lini nthawe zentse kukhala wakuyambirira kulewalewa akakhala akucezerana pa mtsonkhano wawo wa akulu. Iye ambalewalewa lini kwene-kwene kuposa anzace, ndipo ambakumbuka lini kuti bzentse bzomwe alewabzo ndibzo bziri bwino kuposa bzomwe anzace alewambo. M’mbuto mwace, iye ambalewa bzomwe akukumbuka mu njira yakubzicepesa na mwakudeka mtima. Ndipo anzace akakhala akulewalewa bzomwe akukumbuka, iye ambawatetekera bwino ndipo ambawagwata lini mafala. Kuposa bzentse, iye ambakhala wakukonzeka kugawana na anzacewo nfundo za m’Bibliya na kuteweza malango yakucokera kwa ‘kapolo wakukhulupirika na wanzeru.’ (Mateu 24:45-47) Akulu wa gwere akambalatizana lufoyi na  kumbalemekezana pa nthawe yakucezerana, mzimu wakucena umbakhala nawo pabodzi ndipo umbawatsogolera kuti acite bzakusankhula bzomwe bzimbalimbisa gwere.​—Tiyago 3:17, 18.

7. Kodi Jezu akhawawona tani wanthu omwe akhali lini pa banja?

⁷ M’gwere muna mabanja yakusiyana-siyana. Koma napo bziri tenepo, m’gweremo munambo abale na mpfumakazi omwe ali lini pa banja. Kodi tin’funika kumbawawona tani omwe akanati kulowola ayai kulowodwa? Onani bzomwe Jezu akhakumbuka pa nkhani imweyi. Pomwe iye akhali pano pa dziko la pantsi, alibe kulowola. Iye adapitiriza kukhala wakusaya kulowola ndipo adaphatisa basa nthawe na mphanvu zace pa utumiki bwace. Jezu alibe kulewa kuti kukhala wakusaya kulowola ayai kukhala na banja ni nkhani yakucita kungingimizana. Koma iye adalewa kuti Akristau winango angadadzasankhula kusaya kulowola ayai kulowodwa. (Mateu 19:11, 12; onani mafala ya m’nyantsi pa Mateu 19:12.) Jezu akhalemekeza wale omwe akhali lini pa banja. Iye akhakumbuka lini kuti wanthu omwe alibe banja mbakusalira, nee kuwawona ninga wanthu omwe akhaluza cinthu cabwino.

8. Mwakubverana na 1 Wakolinto 7:7-9, kodi Paulo adalewa kuti Akristau an’funika kumbacita ciyani?

⁸ Tenepo ninga Jezu, mpostolo Paulo adasankhula kupitiriza kutumikira Mulungu ali khowa. Iye alibe kulewa kuti bzikhali bzakuphonyeka Mkristau kulowola ayai kulowodwa, thangwe akhazindikira kuti cimweci ni cakusankhula ca munthu ali-wentse payekha. Napo bziri tenepoyo, Pauloyo adalewa kuti bziri bwino Mkristau kubzipenda kuti awone penu angasankhulembo kubakatumikira Mulungu akali khowa. (Werengani 1 Wakolinto 7:7-9. *) Kulewa cadidi, Paulo akhakumbuka lini kuti Akristau wakusaya kulowola ayai kulowodwa akhasalira m’mbuyo. Ndipopa iye adasankhula Timotio, omwe akhanati kulowola kuti asamalire maudindo * yakufunika kwene-kwene. (Wafiripo 2:19-22) Bzimwebzi bzikulatiza kuti mpsakuphonyeka kukumbuka kuti m’bale an’themera lini kupasidwa maudindo thangwe rakuti akanati kulowola.​—1 Wakolinto 7:32-35, 38.

9. Kodi njiponi nfundo pa nkhani ya kulowola na kusaya kulowola?

⁹ Jezu na Paulo alibe kungingimiza Akristau kulowola ayai kukhala wakusaya kulowola. Tsono, kodi nfundo njiponi pa nkhani imweyi? Nsanza ya Mulindiri ya 1 Outubro, 2012, idalewa bwino  bza nkhani imweyi, Iyo idati: “Mbali zentse ziwirizi, [kulowola na kusaya kulowola] zingalewedwe kuti ni mphaso zakucokera kwa Mulungu. . . . Yahova ambawona lini nkhani yakusaya kulowola ayai kulowodwa ninga cinthu cakupasa manyazi.” Tenepo, wale omwe akanati kulowola ayai kulowodwa ana mbuto yawo m’gwere la Mulungu, ndipo ifepano tin’funika kulemekeza bzimwebzo.

10. Penu timbalemekeza abale na mpfumakazi zathu omwe ali lini pa banja, n’ciyani comwe tin’funika lini kucita?

¹⁰ Kodi tingalatize tani kuti timbalemekeza makumbukidwe ya wale omwe ali lini pa banja na momwe bzinthu bziriri pa moyo wawo? Mpsabwino kukumbuka kuti Akristau winango ali lini pa banja thangwe acita kufuna. Alipo winango omwe akufuna banja, koma akanati kugumana mwanzawo wakuthemerana naye. Ndipo alipombo winango omwe adafedwa mwanzawo wa m’banja. Bziribe basa penu adafedwa ayai nee, kodi bzingakhale bzakuthemera abale wa m’gwere kumbakhala acibvunza abale omwe ali lini pa banja kuti thangwe ranyi an’saya kulowola ayai kulowodwa? Ayai kukhala na cakulinga cakufuna kuthandiza abalewo kugumana munthu kuti amange naye banja? Bzingacitike kuti munthu omwe ali lini pa banja kukumbira thandizo. Tsono iye akasaya kukukumbirani kuti mumuthandize mun’kumbuka kuti iye angabzibve tani winango akalewa kuti animunyang’anira munthu basi? (1 Watesalonika 4:11; 1 Timotio 5:13) Onani bzomwe adalewa abale na mpfumakazi zathu omwe akanati kulowola ayai kulowodwa.

11-12. Kodi ni mwa njira ziponi tingasunamise wale omwe ali lini pa banja?

¹¹ Nyakunyang’anira dera omwe ni khowa wakubzipereka pa utumiki bwace, adalewa kuti kukhala khowa kuna phindu kwene-kwene. Tsono iye ambakhala wakusunama abale na mpfumakazi akamubvunza kuti: “Thangwe ranyi m’bale mun’saya kulowola?” M’bale munango omwe ni khowa, omwe akutumikira pa Beteli adalewa kuti: “Nthawe zinango abale na mpfumakazi ambandicitisa kukumbuka kuti wale omwe akanati kulowola ayai kulowodwa bzin’funika kumbawabvera ntsisi. Bzimwebzi bzimbandicitisa kukhala na makumbukidwe yakuti kukhala khowa ni mphaso lini koma ni cintolo.”

¹² Mpfumakazi yomwe iri lini pa banja yomwe ikutumikira pa Beteli idalewa kuti: “Apalizi winango ambakumbuka kuti wentse omwe ali lini pa banja akunyang’ana munthu kuti amange naye banja, ayai akakhala pa mthithi wa wanthu ambakhala akunyang’ana mpata wakuti akhale paumakhadzi na munthu. Nthawe inango ndidacita ulendo bwakuyenda kukakwanirisa utimiki bwa pa Beteli ku mbuto inango. Ndidafika usiku komwe ndikhayendako, ndipo ikhali ntsiku ya mitsonkhano. Mpfumakazi yomwe idanditambira idalewa kuti mu gwere layene mukhana abale awiri wa msinkhu wangu. Mpfumakaziyo idanditsimikizira kuti ikhandinyang’anira lini munthu. Tsono pomwe tidapita mu Nyumba ya Umambo, mpfumakaziyo idayenda nande komwe kukhana abale awiri wale kuti ndikaceze nawo. Kulewa cadidi, bzimwebzi bzidakhala bzakupasa manyazi kwa inepano napo kuna abalewo.”

13. Kodi ni bziratizo bziponi bzomwe bzidalimbikisa mpfumakazi yakusaya kulowodwa?

¹³ Mpfumakazi pomwe inango yomwe iribe kulowodwa yomwe ikutumikira pa Beteli idati: “Inepano nimbadziwa apainiya wa msinkhu wangu omwe ambawona bzinthu mwakuthemera, ambaceukisidwa lini, wakubzipereka na wakukondwa na utumiki bwawo. Iwo ambathandizira kuti bzinthu bzifambe bwino m’gwere. Iwo ambabziwona mwakuthemera: iwo ambabziwona lini kukhala wakufunika kwene-kwene thangwe ra kusaya kulowola ayai kulowodwa, ne ambasunama lini thangwe ra kusaya kukhala na banja acikhalambo na wana.” Bzimwebzi ndibzo bzomwe bzimbacitisa kuti gwere likhale mbuto yabwino! Wentse ambabzibva kuti mbakulemekezedwa na wakufunika. Palibe omwe ambabzibva kuti ngwakupasa ntsisi, ayai kubziwona kuti ngwakufunika kuposa anzace. Ali-wentse ambadziwa kuti ana mbuto yace.

14. Kodi tingalatize tani kuti timbalemekeza omwe alibe pa banja?

¹⁴ Bzomwe abale na mpfumakazi omwe akanati  kulowola ayai kulowodwa ambafuna mpsakuti gwere limbawalemekeze thangwe ra makhalidwe yomwe iwo anayo, sikuti na momwe aliri. M’mbuto mwakuwabvera ntsisi tin’funika kumbawalemekeza thangwe ra kukhulupirika kwawo. Tikambacita bzimwebzi abale na mpfumakazi omwe akanati kulowola ayai kulowodwa an’dzakumbuka lini kuti tikuwauza kuti: ‘Ndiribe namwe basa.’ (1 Wakolinto 12:21) M’mbuto mwace iwo an’dzabzibva kuti timbawalemekeza ndipo timbalemekezambo mbuto yomwe iwo anayo m’gwere.

15. Kodi abale winango ambacita ciyani kuti athimizire utumiki bwawo?

¹⁵ Kuyambira magole yamalaya mpaka pano, apalizi azinji asankhula kupfunza cirewedwe cipsa na cakulinga cakuti apalizire wanthu azinji. Ndipo kuti akwanise kucita bzimwebzi, iwo adafunika kucinja bzinthu bzizinji pa moyo wawo. Iwo adacoka mu gwere la cirewedwe cawo acifulukira mu gwere la cirewedwe cipsa comwe cikhalibe apalizi azinji. (Mabasa 16:9) Kucinjako ni cakusankhula comwe iwo adacita kuti athimizire utumiki bwawo kwa Yahova. Napo kuti pangatenge nthawe kuti iwo adziwe cirewedwe cipsaco, koma iwo ambathandiza kwene-kwene. Makhalidwe yawo yabwino pabodzi na bziratizo bzawo bzimbalimbikisa gwere. Tikupenukira lini kuti abale wakubziperekawa mbakufunika kwene-kwene kwa ifepano!

16. Kodi akulu wa gwere an’funika kucita ciyani kuti awone penu m’bale an’themera kukhala mkulu ayai mtumiki wakuthandiza?

¹⁶ Bungwe la akulu wa gwere lin’funika lini kulewa kuti m’bale an’themera lini kutumikira ninga mtumiki wakuthandiza ayai mkulu wa gwere thangwe rakuti ambadziwa lini kulewalewa cirewedwe ca gwerelo. Akuluwo an’funika kuphatisa basa nfundo za m’Bibliya kuti awone penu m’baleyo an’themera kukhala mkulu ayai mtumiki wakuthandiza, sikuti penu m’baleyo ambadziwa ayai ambadziwa lini kulewalewa cirewedweco.​—1 Timotio 3:1-10, 12, 13; Tito 1:5-9.

17. Kodi mabanja yomwe yafulukira ku dziko linango yangagumane na bvuto liponi?

¹⁷ Mabanja yanango yadafulukira dziko linango kuti yakanyang’ane mbuto yakukhotcerereka na basa. Pinango wana wawo angakhale akupfunza ku xikola yomwe imbaphatisa basa cirewedwe ca m’dzikolo. Ndipo pinango aberekiwo kuti agumane basa angafunikembo kupfunza cirewedweco. Tsono tani penu m’dzikolo muna gwere ayai kagulu ka abale wa cirewedwe ca ku dziko lawo? Kodi banjalo lingafunikire kukatsonkhana mu gwere la cirewedwe ca m’dzikolo ayai ca ku dziko lawo?

18. Mwakubverana na Wagalata 6:5, kodi tingalatize tani kuti tikulemekeza bzomwe msolo wa banja wasankhula?

¹⁸ Ni msolo wa banja omwe an’funika kusankhula komwe banja lace lingakatsonkhane. Pakuti cimweci ni cakusankhula ca ali-wentse payekha, iye an’funika kukumbukira bzomwe bzingathandize banja lacero. (Werengani Wagalata 6:5. *) Ifepano tin’funika kumbalemekeza cakusankhula ca msolo wa banja. Bziribe basa kuti angasankhule bziponi, ifepano tin’funika kubvuma bzomwe iye wasankhulabzo, ticiritambira banjalo mwalufoyi m’gwere mwathu.​—Waroma 15:7.

19. Kodi ni nkhani iponi yomwe msolo wa banja an’funika kuipempherera?

 ¹⁹ Bzinango bzomwe bzingacitike na mabanjayo mpsakuti, yangakhale kuti yambatsonkhana mu gwere la cirewedwe ca komwe iwo adacokera, tsono wana wawo ambacidziwisisa lini cirewedweco. Penu gwerelo liri ku mbuto komwe wanthu ambaphatisa basa cirewedwe cikulu ca dzikolo, bzingakhale bzakunesa kuna wana kubvesesa mitsonkhano na kuyenda patsogolo mwauzimu. Thangwe ranyi? Thangwe bzingacitike kuti wanawo ambapfunza ku xikola yomwe imbaphatisa basa cirewedwe cikulu ca dzikolo, sikuti cirewedwe ca aberekiwo. Pa nkhani ninga imweyi, msolo wa banja an’funika kuipempherera nkhaniyo kuti akwanise kuwona bzomwe bzingathandize wanawo kukula mwauzimu. Iye angathandize wanawo kudziwa cirewedwe ca kwawo ayai angasankhule kukatsonkhana na gwere lomwe limbaphatisa basa cirewedwe comwe wanawo ambabvesesa bwino-bwino. Bziribe basa bzomwe iye asankhule, gwere lomwe iye an’sankhulalo lin’funika kuthandiza iye na banja lacero kubzibva kukhala wanthu wakulemezeka na wakufunika kwene-kwene.

20. Kodi tingalatize tani kuti timbalemekeza abale na mpfumakazi omwe akupfunza cirewedwe cipsa?

²⁰ Bzomwe tawonabzi bzikulatiza kuti m’magwere mazinji muna abale na mpfumakazi omwe akucita nyongo ikulu kuti apfunze cirewedwe cipsa. Kuna iwo bzingakhale bzakunesa kufotokoza bzomwe akukumbuka. Tsono tikaleka kumbandokumbukira bzomwe iwo ambaphonya pakulewalewa cirewedwe cathu, tin’dzakwanisa kuwona lufoyi lomwe iwo analo kwa Yahova na mtima wakufunisisa kumutumikira. Ndipo tikakhala tceru pa makhalidwe yabwino yomwe abale na mpfumakazi zathu anayo, tin’dzawawona kukhala wakufunika ndipo tin’dzawalemekeza kwene-kwene. Ndipo kutazira kwawo kulewalewa bwino cirewedwe cathu lin’dzakhala lini thangwe lakulewera kuti: ‘Ndiribe namwe basa.’

21-22. Kodi nguponi mwayi ukulu omwe tinawo?

²¹ Yahova ambatipasa mwayi ukulu wakukhala na mbuto mu gulu lace. Kuna iye bziribe basa penu ndife amuna ayai akazi, penu tina banja ayai tiribe, penu ndife wana ayai akulu, ne penu timbadziwa kulewalewa cirewedwe cipsa ayai penu bzimbatinesa. Tentse ndife wakufunika kwa Yahova ndipo ndifembo wakufunika kuna winango.​—Waroma 12:4, 5; Wakoloso 3:10, 11.

²² Mbatipitirizeni kucita nyongo yakuphatisisa bzomwe tapfunza na ciratizo ca mpostolo Paulo cakulewa bza thupi la munthu. Tikacita bzimwebzi, tin’dzakhala tceru kuti tiphatise basa mpata uli-wentse omwe tingakhale nawo kuti tilatize kuti timbalemekeza mbuto yathu na mbuto yomwe anzathu anayo m’gwere la Yahova.