EDWƐKƐ 35
Bu Awie Mɔ Kɛ Bɛ Nwo Hyia Wɔ Gyihova Asafo Ne Anu
“Ɛnyelɛ ɛngola ɛnga ɛngile ɛsalɛ kɛ, ‘Ɛ nwo ɛngyia me,’ anzɛɛ etile noko ɛngola ɛnga ɛngile egyakɛ kɛ, ‘Ɛ nwo ɛngyia me.’”—1 KƆL. 12:21.
EDWƐNE 124 Di Nɔhalɛ Dahuu
MƆƆ YƐBAZUKOA *
1. Duzu a Gyihova ɛva ɛmaa ye nɔhalɛ sonvolɛ ko biala a?
GYIHOVA ɛvi ɛlɔlɛ nu ɛmaa ye nɔhalɛ sonvolɛ ko biala gyima wɔ asafo ne anu. Ɔnva nwo kɛ asolo gyima mɔɔ awie biala yɛ la, yɛ muala yɛsonle bolɛ yɛɛ yɛhyia yɛ nwo ngoko. Ɛzoanvolɛ Pɔɔlo maa yɛte ɛzukoalɛdeɛ ɛhye mɔɔ anwo hyia la abo. Adenle boni azo?
2. Kɛ mɔɔ Ɛfɛsɛsema 4:16 ka la, duzu ati a ɔwɔ kɛ yɛbu yɛ nwo ngoko na yɛyɛ gyima yɛbɔ nu a?
2 Kɛ mɔɔ edwɛkɛtile tɛkese ne kile la, Pɔɔlo zile zo kɛ, ɔnle kɛ yɛ nuhua ko biala nea Gyihova sonvolɛ bie na ɔka kɛ: “Ɛ nwo ɛngyia me.” (1 Kɔl. 12:21) Amaa anzodwolɛ adɛnla asafo ne anu la, ɔwɔ kɛ yɛbu yɛ nwo ngoko na yɛyɛ gyima yɛbɔ nu. (Kenga Ɛfɛsɛsema 4:16.) Saa yɛfa koyɛlɛ yɛyɛ gyima a, ɔmaa awie biala te nganeɛ kɛ bɛkulo ye na asafo ne anwo yɛ se.
3. Duzu a yɛbazuzu nwo wɔ edwɛkɛ ɛhye anu a?
3 Kɛzi yɛbahola yɛahile kɛ yɛbu Kilisienema gyɛne mɔɔ bɛwɔ asafo ne anu la ɛ? Wɔ edwɛkɛ ɛhye anu, yɛbanwu kɛzi asafo nu mgbanyima bahola ala ɛbulɛ ali ahile bɛ gɔnwo mɔ mgbanyima la. Bieko, yɛbanwu kɛzi yɛ muala yɛbahile kɛ yɛbu yɛ mediema mrenyia nee mraalɛ mɔɔ bɛtɛgyale la. Awieleɛ bɔkɔɔ ne, yɛbanwu kɛzi yɛbahile kɛ yɛbu bɛdabɛ mɔɔ bɛngola bɛnga yɛ aneɛ ne kpalɛ la.
BU Ɛ GƆNWO MƆ ASAFO NU MGBANYIMA
4. Pɔɔlo folɛdulɛ mɔɔ wɔ Wulomuma 12:10 la boni a ɔwɔ kɛ asafo nu mgbanyima di zo a?
4 Bɛdua Gyihova sunsum nwuanzanwuanza ne azo a bɛkpa asafo nu mgbanyima kɔsɔɔti a. Noko asolo bɛ nuhua ko biala ɛlolɛ ahyɛlɛdeɛ nee ye mɔdenlebɔlɛ. (1 Kɔl. 12:17, 18) Bɛkpale bie mɔ la ɛtɛkyɛle yɛɛ bɛnlɛ anwubielɛ dɔɔnwo. Yɛɛ bie mɔ ɛngola ɛnyɛ dɔɔnwo ɔlua bɛ ɛvolɛ nee bɛ kpɔkɛdelɛ ti. Noko ɔnle kɛ asafo nu kpanyinli biala nea ɔ gɔnwo na ɔfa ye nyɛleɛ ɔka kɛ, “Ɛ nwo ɛngyia me.” Emomu, ɔwɔ kɛ asafo nu kpanyinli biala di Pɔɔlo folɛdulɛ mɔɔ wɔ Wulomuma 12:10 la azo.—Kenga.
Mgbanyima tie bɛ gɔnwo mɔ asafo nu mgbanyima kpalɛ bɛfa bɛkile kɛ bɛbu bɛ (Nea ɛdendɛkpunli 5-6)
5. Kɛzi asafo nu mgbanyima bahile kɛ bɛbu bɛ gɔnwo mɔ mgbanyima ɛ, na duzu ati a ɛhye anwo hyia a?
5 Asafo nu mgbanyima yɛ ɛnzolɛ tie bɛ gɔnwo mɔ kpalɛ bɛfa bɛkile kɛ bɛbu bɛ. Ɛhye anwo hyia titili wɔ mekɛ mɔɔ bɛkɛyia kɛ mgbanyima eku na bɛlɛsuzu edwɛkɛ mɔɔ anwo hyia anwo la. Duzu ati ɔ? Yɛ mɔɔ October 1, 1988 The Watchtower ne hanle la nzonlɛ: “Ɔwɔ kɛ mgbanyima nwu ye kɛ, Kelaese bahola alua sunsum ne azo amaa kpanyinli ko biala ava Baebolo ngyinlazo mɔɔ bahola aboa amaa bɛali tɛnlabelɛ bie anwo gyima anzɛɛ bɛazi kpɔkɛ bie mɔɔ hyia la amaa. (Gyi. 15:6-15) Sunsum ne ɛnyɛ gyima wɔ kpanyinli bie anwo zo ɛndɛla bie.”
6. Kɛzi mgbanyima bava koyɛlɛ ayɛ gyima ɛ, na kɛzi ɛhye boa asafo ne ɛ?
6 Asafo nu kpanyinli mɔɔ ɔbu ɔ gɔnwo mɔ mgbanyima la ɛmbɔ mɔdenle kɛ dahuu ɔbalimoa yeadendɛ wɔ mgbanyima ayia bo. Ɔndendɛ dɔɔnwo, yɛɛ ɔnyɛ ye adwenle kɛ dahuu ye edwɛkɛ a ɔwɔ kɛ bɛfa a. Emomu, ɔfi mɛlɛbɛnwoaze nu ɔkile ye adwenle. Ɔ gɔnwo mɔ ɛlɛtendɛ a, ɔtie ye kpalɛ. Mɔɔ hyia kpalɛ la, ɔbɔ mɔdenle kɛ ye edwɛkɛ bagyinla Baebolo ngyinlazo zo na yeava adehilelɛ mɔɔ vi “akɛlɛ nɔhavo nee badwema ne” ɛkɛ la yeayɛ gyima. (Mat. 24:45-47) Saa asafo nu mgbanyima fi ɛlɔlɛ nee ɛbulɛ nu suzu edwɛkɛ nwo a, Nyamenle sunsum ne bayɛ gyima wɔ bɛ nwo zo na yeahile bɛ adenle yeamaa bɛazi kpɔkɛ mɔɔ baboa asafo ne la.—Gye. 3:17, 18.
BU KILISIENEMA MƆƆ BƐTƐGYALE LA
7. Kɛzi Gyisɛse bule belazinlililɛ ɛ?
7 Mbusua nee agyalɛma dɔɔnwo wɔ asafo ne anu ɛnɛ. Mediema mrenyia nee mraalɛ mɔɔ bɛtɛgyale la noko dɔɔnwo wɔ nu. Kɛzi ɔwɔ kɛ yɛbu bɛdabɛ mɔɔ bɛtɛgyale la ɛ? Nea kɛzi Gyisɛse bule belazinlililɛ la. Mɔɔ Gyisɛse yɛ ye ɛzonlenlɛ gyima ne wɔ azɛlɛ ye azo la yeangya. Ɛhye maanle ɔnyianle mekɛ ɔvale ye adwenle ɔziele ye gyimalilɛ ne azo. Gyisɛse angilehile kɛ ɔwɔ kɛ awie gya anzɛɛ ɔdi belazinli. Noko ɔhanle kɛ Kilisienema bie mɔ bazi kpɔkɛ kɛ bɛnrɛgya. (Mat. 19:11, 12) Gyisɛse bule menli mɔɔ bɛtɛgyale la. Yeande nganeɛ kɛ menli mɔɔ ɛtɛgyale la anwo ɛngyia anzɛɛ bɛ nwo yɛ alɔbɔlɛ.
8. Kɛ mɔɔ 1 Kɔlentema 7:7-9 kile la, duzu a Pɔɔlo maanle Kilisienema anwosesebɛ kɛ bɛyɛ a?
8 Le kɛ Gyisɛse la, mɔɔ ɛzoanvolɛ Pɔɔlo yɛ ye ɛzonlenlɛ gyima ne la, yeangya. Pɔɔlo annyia adwenle kɛ saa Kilisienenli bie gya a ɛnee yeyɛ ɛtane. Ɔnwunle kɛ ɛhye le awie biala kpɔkɛzilɛ. Noko Pɔɔlo maanle Kilisienema anwosesebɛ kɛ saa ɔkɛyɛ boɛ a, bɛva bɛ belazinlililɛ bɛzonle Gyihova. (Kenga 1 Kɔlentema 7:7-9.) Nɔhalɛ nu, Pɔɔlo ambu Kilisienema mɔɔ bɛtɛgyale la kɛ bɛ nwo ɛngyia. Ɔkpale Timote mɔɔ ɛnee ɔtɛgyale la na ɔvale gyima mgbole ɔwulale ɔ sa. * (Fel. 2:19-22) Yemɔti ɔnle kɛ yɛnyia adwenle kɛ, kɛmɔ adiema bie ɛtɛgyale la ati ɔnfɛta gyimalilɛ bie.—1 Kɔl. 7:32-35, 38.
9. Duzu a yɛbahola yɛaha ye wɔ agyalɛ nee belazinlililɛ nwo a?
9 Gyisɛse nee Pɔɔlo anga kɛ ɔwɔ kɛ Kilisienema gya anzɛɛ bɛdi belazinli. Yemɔti, duzu a yɛbahola yɛaha yɛavale agyalɛ nee belazinlililɛ nwo a? October 1, 2012 The Watchtower ne hanle kɛ: “Nɔhalɛ nu, agyalɛ nee belazinlililɛ le ahyɛlɛdeɛ mɔɔ vi Nyamenle ɛkɛ. . . . Gyihova ɛmbu belazinlililɛ kɛ ɔmaa bɛdi nyane anzɛɛ ɔle anyiemgba.” Yemɔti ɔwɔ kɛ yɛbu mediema mrenyia nee mraalɛ mɔɔ bɛtɛgyale mɔɔ bɛwɔ yɛ asafo ne anu la.
Saa yɛte yɛ mediema mɔɔ bɛle mbelazinli la edwɛkɛ bo na yɛbu bɛ a, duzu a yɛnrɛyɛ a? (Nea ɛdendɛkpunli 10)
10. Kɛ ɔkɛyɛ na yɛahile kɛ yɛbu yɛ mediema mrenyia nee mraalɛ mɔɔ bɛtɛgyale la ɛ?
10 Kɛ ɔkɛyɛ na yɛahile kɛ yɛdwenle yɛ mediema mɔɔ bɛtɛgyale la nganeɛdelɛ nwo ɛ? Ɔwɔ kɛ yɛkakye kɛ, Kilisienema bie mɔ ɛzi kpɔkɛ kɛ, bɛnrɛgya ɛlɛ. Bie mɔ wɔ ɛkɛ ne mɔɔ bɛkulo kɛ bɛgya noko bɛtɛnyianle awie mɔɔ fɛta bɛ la. Yɛɛ bie mɔ noko bokavolɛ ɛwu. Noko ye biala anu, asoo nwolɛ hyia kɛ menli mɔɔ wɔ asafo ne anu la babiza Kilisienema ɛhye mɔ deɛmɔti bɛtɛgyale la na bɛabɔ mɔdenle kɛ bɛkpondɛ awie bɛamaa bɛ ɔ? Ɔle zɔ, ɔyɛ a Kilisienema mɔɔ bɛtɛgyale la bie mɔ maa awie mɔ boa bɛ. Noko saa bɛtɛbizale moalɛ ɛhye a, kɛzi edwɛkɛ ɛhye bamaa bɛade nganeɛ ɛ? (1 Tɛs. 4:11; 1 Tim. 5:13) Maa yɛzuzu edwɛkɛ bie mɔ mɔɔ mediema mrenyia nee mraalɛ mɔɔ bɛtɛgyale la bie mɔ ɛha la anwo.
11-12. Kɛzi yɛbahola yɛamaa bɛdabɛ mɔɔ bɛtɛgyale la asa anu ado ɛ?
11 Maangyebakyi zo neavolɛ bie mɔɔ ɔtɛgyale na ɔbɔ mɔdenle wɔ ye gyimalilɛ ne anu la ka kɛ, nvasoɛ dɔɔnwo wɔ belazinlililɛ zo. Noko ɔhanle kɛ, saa mediema mɔɔ ɛze kɛ bɛbɔ mɔdenle la bie mɔ biza wɔ kɛ: “Duzu ati a ɛtɛgyale a?”, ɔyɛ nyane kpalɛ. Adiema nrenyia bie mɔɔ ɔsonle wɔ Bɛtɛle na ɔtɛgyale la hanle kɛ: “Ɔdwu mekɛ ne bie a, mediema ne mɔ maa mete nganeɛ kɛ kɛmɔ mele belazinli la ati, me nwo yɛ alɔbɔlɛ. Bɛmaa ɔyɛ kɛ asɛɛ belazinlililɛ ɛnle ahyɛlɛdeɛ, emomu ɔle adesoa.”
12 Adiema raalɛ bie mɔɔ ɔsonle wɔ Bɛtɛle na ɔtɛgyale la hanle kɛ: “Nolobɔlɛma bie mɔ dwenle kɛ awie biala mɔɔ le belazinli la kpondɛ awie agya, yemɔti saa bɛwɔ ɛleka mɔɔ menli wɔ biala a, ɛnee bɛlɛkpondɛ bokavolɛ. Mekɛ bie, me Bɛtɛle gyimalilɛ ne maanle mengɔle ɛleka bie, na mendwule ɛkɛ ne nɔsolɛ nu mɔɔ ɛnee bɛlɛkɔ debiezukoalɛ. Adiema raalɛ ne mɔɔ liele me ɛyɛvolɛ la hanle kɛ, mediema mrenyia nwiɔ bie wɔ asafo ne anu mɔɔ bɛle me tipɛnema a. Ɔhanle kɛ, tɛ kɛ ɔkpondɛ nrenyia yeamaa me. Noko mɔɔ yɛdwule Belemgbunlililɛ Asalo ɛkɛ ne la, ɔzɔle me sa ɔhɔle mediema mrenyia nwiɔ ne ɛkɛ. Nɔhalɛ nu, yɛdayɛ menli nsa ne amuala ati zile aze.”
13. Neazo boni a maanle adiema raalɛ ko mɔɔ ɛtɛgyale la anwosesebɛ a?
13 Adiema raalɛ bieko mɔɔ sonle wɔ Bɛtɛle la hanle kɛ: “Meze adekpakyelɛma mɔɔ bɛ nye ɛvi mɔɔ bɛtɛgyale mɔɔ bɛ nye gyi bɛ ti anwo, bɛtu bɛ nwo bɛmaa yɛɛ bɛ kunlu dwo bɛ nwo wɔ bɛ ɛzonlenlɛ nu na bɛboa asafo ne kpalɛ la. Bɛlɛ bɛ belazinlililɛ ne anwo adwenle kpalɛ, bɛnde nganeɛ kɛ bɛ nwo hyia somaa ɔluakɛ bɛtɛgyale la ati, yɛɛ bɛnde nganeɛ kɛ bɛminli debie.” Saa ɛwɔ asafo mɔɔ awie biala kulo wɔ na ɔbu wɔ la anu a, ɛ nye die. Ɛ nwo ɛnyɛ bɛ alɔbɔlɛ yɛɛ bɛ nye ɛmbolo wɔ, ɛ nwo hyia bɛ yɛɛ bɛnde nganeɛ kɛ ɛle kpalɛ ɛtɛla bɛ. Mɔɔ ɛze ye la ala a le kɛ bɛkulo wɔ.
14. Kɛzi yɛbahile kɛ yɛbu menli mɔɔ bɛtɛgyale la ɛ?
14 Yɛ mediema mrenyia nee mraalɛ mɔɔ bɛtɛgyale la anye balie kɛ yɛbava yɛ adwenle yɛazie bɛ subane ngɛnlɛma zo. Kɛ anrɛɛ yɛbali nyane yɛamaa bɛ la, yɛkulo kɛ yɛkile bɛ nɔhalɛlilɛ ne anwo anyezɔlɛ. Saa yɛyɛ zɔ a, yɛ mediema mɔɔ bɛtɛgyale la ɛnrɛde nganeɛ kɛ yɛlɛka yɛahile bɛ kɛ ‘Bɛ nwo ɛngyia yɛ.’ (1 Kɔl. 12:21) Emomu, bɛbanwu kɛ yɛbu bɛ na yɛ nye die mɔɔ bɛlɛyɛ bɛaboa asafo ne la anwo.
BU MENLI MƆƆ BƐNGA WƆ ANEƐ NE KPALƐ LA
15. Nzenzaleɛ boni mɔ a bie mɔ ɛyɛ amaa bɛadɛlɛ bɛ ɛzonlenlɛ gyima ne anu a?
15 Kenle nsa ye, nolobɔlɛma dɔɔnwo ɛva ɛyɛ bɛ bodane kɛ bɛsukoa aneɛ fofolɛ amaa bɛadɛlɛ bɛ ɛzonlenlɛ gyima ne anu. Amaa bɛayɛ zɔ la, ɔwɔ kɛ bɛyɛ nzenzaleɛ dɔɔnwo. Mediema ɛhye mɔ ɛvi asafo mɔɔ bɛka bɛ aneɛ la anu amaa bɛahola bɛazonle wɔ asafo mɔɔ bɛka aneɛ gyɛne na bɛhyia Belemgbunlililɛ nolobɔlɛma dɔɔnwo la anu. (Gyi. 16:9) Ɛhye le kpɔkɛ mɔɔ Kilisienema ɛhye mɔ ɛzi amaa bɛahola bɛaboa Belemgbunlililɛ gyima ne. Bie a ɔbalie mekɛ dɔɔnwo na bɛahola bɛaha aneɛ fofolɛ ne kpalɛ, noko bɛboa kpalɛ. Bɛ subane ngɛnlɛma nee bɛ anwubielɛ maa asafo ne anwo yɛ se. Yɛ nye die mediema ɛhye mɔ mɔɔ tu bɛ nwo maa la anwo kpalɛ!
16. Duzu a ɔwɔ kɛ asafo nu mgbanyima gyinla zo suzu mediema mɔɔ bɛkulo kɛ bɛkpa bɛ kɛ asafo nu mgbanyima nee azonvolɛ la anwo a?
16 Ɔnle kɛ mgbanyima eku bie twehwe bɛ bo aze kɛ bɛbahanvo adiema bie bɛahile kɛ asafo nu kpanyinli anzɛɛ sonvolɛ ɔluakɛ ɔngola ɔnga asafo ne aneɛ ne kpalɛ la ati. Mɔɔ Ngɛlɛlera ne kpondɛ avi asafo nu mgbanyima nee azonvolɛ ɛkɛ la azo a ɔwɔ kɛ bɛgyinla bɛsuzu adiema nrenyia bie anwo a, na tɛ kɛzi ɔka asafo ne aneɛ ne kpalɛ la azo.—1 Tim. 3:1-10, 12, 13; Tae. 1:5-9.
17. Saa abusua bie tu kɔ maanle fofolɛ zo a, duzu kpɔkɛ a ɔwɔ kɛ bɛsi a?
17 Kilisienema bie mɔ nee bɛ mbusua ɛdu ɛhɔ maanle fofolɛ zo kɛ tutanema anzɛɛ kɛ bɛkakpondɛ gyima. Saa ɔba ye zɔhane a, bɛ mra ne mɔ kɔ sukulu na bɛsukoa maanle ne anu aneɛ ne. Bie a ɔwɔ kɛ awovolɛ ne mɔ noko sukoa maanle ne anu aneɛ titili ne amaa bɛanyia gyima. Bie a asafo anzɛɛ ekpunli mɔɔ fa bɛ sua zo aneɛ ne di gyima la wɔ ɛkɛ. Saa ɔba ye zɛhae a, asafo boni a ɔwɔ kɛ abusua ne kɔ nu a? Asoo ɔwɔ kɛ bɛkɔ asafo mɔɔ fa maanle ne anu aneɛ titili di gyima la anu anzɛɛ mɔɔ fa bɛ sua zo aneɛ di gyima la anu?
18. Kɛ mɔɔ Galeehyeama 6:5 kile la, kɛzi yɛbahola yɛahile kɛ yɛdie abusua tile ne kpɔkɛzilɛ yɛto nu ɛ?
18 Ɔwɔ kɛ abusua tile ne si asafo mɔɔ abusua ne bahɔ debiezukoalɛ wɔ nu la anwo kpɔkɛ. Ɛhye le bɛ ti anwo kpɔkɛzilɛ, na ɔwɔ kɛ ɔsuzu mɔɔ baboa ye abusua ne kpalɛ la anwo. (Kenga Galeehyeama 6:5.) Ɔwɔ kɛ yɛbu kpɔkɛ mɔɔ abusua tile ne bazi la. Ɔwɔ kɛ yɛdie ye kpɔkɛzilɛ ne yɛto nu na yɛdie abusua ne kɛnlɛma wɔ yɛ asafo ne anu.—Wlo. 15:7.
19. Duzu a ɔwɔ kɛ abusua tile fa asɔneyɛlɛ suzu nwo a?
19 Wɔ tɛnlabelɛ fofolɛ nu, bie a ɛnee abusua ne wɔ asafo mɔɔ bɛfa bɛ sua zo aneɛ bɛdi gyima la anu, noko ngakula ne mɔ ɛngola ɛnga aneɛ ne kpalɛ. Saa asafo zɔhane wɔ ɛleka mɔɔ bɛka maanle ne anu aneɛ titili ne la a, ɔbayɛ se kɛ ngakula ne mɔ bade debiezukoalɛ ne abo na bɛanyia anyuhɔlɛ wɔ sunsum nu. Duzu ati ɔ? Ɔluakɛ ngakula ne mɔ kɔ sukulu a, bɛbava maanle ne anu aneɛ titili a bali gyima a, na tɛ bɛ sua zo aneɛ ne. Saa ɔba ye zɔhane a, ɔwɔ kɛ abusua tile ne fa asɔneyɛlɛ suzu kɛ ɔkɛyɛ na ngakula ne mɔ abikye Gyihova nee ye menli ne la anwo. Bie a kyesɛ bɛboa ngakula ne mɔ bɛmaa bɛte bɛ sua zo aneɛ ne kpalɛ anzɛɛ bɛtu bɛkɔ asafo mɔɔ fa aneɛ mɔɔ ngakula ne mɔ te ye kpalɛ di gyima la anu. Ɔnva nwo kpɔkɛ biala mɔɔ abusua tile ne bazi la, ɔwɔ kɛ asafo ne mɔɔ bɛbahɔ nu la maa abusua ne te nganeɛ kɛ bɛ nwo hyia na bɛbu bɛ.
Kɛ ɔkɛyɛ na yɛahile kɛ yɛbu bɛdabɛ mɔɔ bɛlɛsukoa aneɛ fofolɛ la ɛ? (Nea ɛdendɛkpunli 20)
20. Kɛ ɔkɛyɛ na yɛahile kɛ yɛbu yɛ mediema mrenyia nee mraalɛ mɔɔ bɛlɛsukoa aneɛ fofolɛ la ɛ?
20 Mɔɔ yɛzuzu nwo la ɛmaa yɛnwu kɛ, wɔ asafo biala anu, mediema mɔɔ ɛlɛbɔ mɔdenle azukoa aneɛ fofolɛ la wɔ ɛkɛ. Bie a ɔbayɛ se kɛ bɛbala bɛ nganeɛdelɛ ali kpalɛ. Noko saa yɛanva yɛ adwenle yɛanzie kɛzi bɛka yɛ aneɛ ne la azo somaa a, yɛbanwu kɛ bɛkulo Gyihova na bɛkulo kɛ bɛsonle ye. Saa yɛnwu subane ngɛnlɛma ɛhye mɔ wɔ yɛ mediema ne mɔ anwo a, ɛbulɛ mɔɔ yɛlɛ yɛmaa bɛ la bayɛ kpole. Yɛnrɛha kɛ, “Bɛ nwo ɛngyia yɛ” ɔluakɛ bɛnga yɛ aneɛ ne kpalɛ la ati.
YƐSONLE BOLƐ YƐMAA GYIHOVA
21-22. Nwolɛ adenle kɛnlɛma boni a yɛnyia a?
21 Yɛ nye sɔ nwolɛ adenle mɔɔ Gyihova ɛmaa yɛnyia yɛlɛyɛ gyima yɛaboa wɔ asafo ne anu la. Saa yɛle nrenyia anzɛɛ raalɛ, yɛgya anzɛɛ yɛtɛgyale, kpanyinli anzɛɛ kakula, yɛka aneɛ bie kpalɛ anzɛɛ yɛngola yɛnga ye kpalɛ bɔbɔ a, yɛsonle bolɛ yɛmaa Gyihova nee yɛ nwo ngoko.—Wlo. 12:4, 5; Kɔl. 3:10, 11.
22 Bɛmaa yɛhɔ zo yɛva ɛzukoalɛdeɛ ngɛnlɛma ngakyile mɔɔ yɛnyia yɛvi Pɔɔlo ndonwo ne mɔɔ fale sonlabaka ne anwo la yɛyɛ gyima. Saa yɛyɛ zɔ a, ɔbamaa yɛakpondɛ ndenle yɛalua zo yɛamaa yɛ mediema anwosesebɛ. Eza ɔbamaa yɛahulo bɛ na yɛahile kɛ bɛ nwo hyia wɔ Gyihova asafo ne anu.
EDWƐNE 90 Bɛmaa Yɛmaa Yɛ Nwo Anwosesebɛ
