1. E na Jɛhova enɛā pya ye zooro a yira agɛrɛ a?

AĀBU wereloo, Jɛhova su dɔtam bu ye bɔŋanaloo nɛ ziī ziī pya ye zooro a yira gɛrɛ. Kere adoo i ɛrɛ keekee dɔtam, dɛ̄dɛɛ̄ ii kuī ye loo e i gbī nage ziī. Nɛɛ lɛɛratam Pɔɔl yerebah i nɛ kɔ i dābeeloo gbɛnɛ nu enɔ ama. Bu mɛ sīdee?

2. Dookɛ̄ Pya Ɛfɛsɔs 4:16 kɔ doo, e na anua i nwadɛɛ̄ ziī sa gbaa si tam a?

² Dookɛ̄ alu e’ɛm doo bu dɔ kpa kaɛ a bɛɛ ekobee ue ama, Pɔɔl kɔ siībah dɛɛ̄ kɔ lɔgɔ ii ii dap kɔ nɛ dɔɔ̄na zooro Jɛhova kɔ: ‘Mm a gbī.’ (1 Kɔr 12:21) Lo i gbī kɔ bɔŋanaloo a le bu efɛɛloo, i ɛrɛ enwadɛɛ̄ ɛnia ii sa gbaa si tam. (Buū Pya Ɛfɛsɔs 4:16.) Sɔ̄ i si tam bu gbaaloo, bɔŋanaloo nyim kiisī sa agaloo bu wereloo.

3. Pio e na i gaa le nɔ bu ekobee ue ama a?

³ Bu pya amunu sīdee na i dap tɔgɛ enwadɛɛ̄ loo pya dɔɔ̄na Nɛɛ Kraist a le bu bɔŋanaloo ani? Bu ekobee ue ama, i gaa le nɔ kɛ̄ pya kanɛɛ dap nɛ enwadɛɛ̄ pya dɔɔ̄na nɛɛ kanɛɛ doo. Lo dɔɔ̄na, i suā nage kɛ̄ dɛ̄dɛɛ̄ ii dap tɔgɛ kɔ pya i wuga nɛɛdam le nɛɛwa ba le aba aba kuīe i loo doo. Lo kpɛdumɛ, i dābeeloo kɛ̄ i dap tɔgɛ nia loo pya a naa aadee para ekɔ i muɛ̄ ue doo.

4. Amunu zuurabahtɔ̄ Pɔɔl a le bu Pya Rom 12:10 na pya kanɛɛ enyɔɔnɛ a?

⁴ Lu etubobaloo pya kanɛɛ bu bɔŋanaloo tɛ̄maloo kaɛ edɔɔ̄ Jɛhova. Kerewo, ziī ziī nɛɛ ɛrɛ alɛɛ dɔɔ̄nu le nu a para. (1 Kɔr 12:17, 18) Dap lu etubobaloo pio nɛɛ kanɛɛ aā, sa ba sii dābeeloo pio nu. Pio aba naa dapna doo dookɛ̄ ba ebee dap doo nyɔɔbee ba e’ina gaa ana le nyɔɔ dumɛloo. Kerewo, lɔgɔ nɛɛ kanɛɛ aa ɛp nɛɛ le ɛɛ gbaa lu nɛɛ kanɛɛ sa a kɔ, ‘Mm a gbī.’ Taāwo, ziī ziī nɛɛ kanɛɛ a nyɔɔnɛ zuurabahtɔ̄ Pɔɔl a le bu Pya Rom 12:10.—Buū.

5. Bu mɛ sīdee na pya kanɛɛ etɔgɛ enwadɛɛ̄ loo pya le aba gbaa lu nɛɛ kanɛɛ a, e e na anua alu ebɛɛ̄ kɔ ba a doo wo a?

⁵ Pya kanɛɛ enɛ enwadɛɛ̄ pya le aba gbaa lu nɛɛ kanɛɛ tɛ̄maloo egbaɛ̄ wa tɔ̄ kaāna. Lo ama lu ebɛɛ̄ kaāna sɔ̄ pya kanɛɛ gbaa bɔŋana lo ekɔnia ue alu gbɛnɛ. E na anua a? Yere nukuādɛɛ̄ loo nu Watchtower October 1, 1988, kɔ ama: “Pya kanɛɛ ɛrɛ esuā kɔ Kraist, tɛ̄maloo kaɛ edɔɔ̄ dap yerebah nɛ ɛrɛgeba nɛɛ kanɛɛ kɔ a nɛ zuurabahtɔ̄ a le bu Baibol lokwa ba dap su aābaloo ɛrɛgeba kɛ̄tɔɔ̄ ale biaɛfii a kuī. (Doonu pya Nɛɛ lɛɛratam 15:6-15) Kaɛ edɔɔ̄ wee yerebah nɛ dɛ̄dɛɛ̄ pya kanɛɛ naale aba ziī nɛɛ kanɛɛ.”

6. Bu mɛ sīdee na pya kanɛɛ esitam bu gbaaloo a, e dodoo wo dɔbiī nɛ bɔŋanaloo doodoo wa?

⁶ Nɛɛ kanɛɛ a nɛ enwadɛɛ̄ pya le ɛɛ gbaa lu nɛɛ kanɛɛ naa wee bialoo gbī edasī kɔ ue sɔ̄ ba ɛrɛ zɔ̄zɔ̄ŋia pya kanɛɛ. A naa wee gbī kɔ aba alɛ ekɔe ue, e a naa wee kɛɛrɛ kɔ nu a kɔe lera dɛ̄dɛɛ̄ sɔ̄. Taāwo, a kɔ nu a kɛɛrɛ bu kumalookɛ̄. A gbaɛ̄tɔ̄ nu pya dɔɔ̄na kɔ. E lo a kuī eera, a wee wa nyɔɔnɛ ponia pya zuurabahtɔ̄ a le bu Kpa Kaɛ sa nyɔɔnɛ tɔgɛdee a aabah “zooro a bɔloo eture nyiɛ loo sa suā nu.” (Mat 24:45-47) Sɔ̄ pya kanɛɛ kɔnia ue bu wereloo le enwadɛɛ̄, kaɛ edɔɔ̄ Bari ele wa loo, e ebaɛ wa loo sa doo kɔ ba a  biaɛfii nu bu sīdee e’agɛrɛloo bɔŋanaloo.—Jem 3:17, 18.

7. Jizɔs bee ɛp pya a le aba aba doodoo wa?

⁷ Gbɛnɛkpo pya a le bu bɔŋanaloo anii’ee na pya ba e iya sa ii le pya butɔ. Kerewo, pya a sii ii sa iya lenage bu bɔŋanaloo. I ɛp pya a le aba aba doodoo wa? Kɛɛrɛ kɛ̄ Jizɔs bee ɛp pya a le aba aba doo. Sɔ̄ a gaa bee si tam zue ue a kɛnɛkɛ̄, a naa bee ii wa. A bee le aba ɛɛ sa sere ekɛɛrɛ nyɔɔ ye esiatam. Jizɔs naa bee kɔ nɛɛ ɛrɛ e’ii sa iya ale bee nɛɛ ɛrɛ etɔɔ̄ aba ɛɛ. Kerewo, a bee kɔ pio pya Nɛɛ Kraist dap biaɛfii kɔ ba naale e’iie sa iya. (Mat 19:11, 12; buū nu enɔ nu nyɔɔ loo Matiu 19:12.) Jizɔs bee nɛ enwadɛɛ̄ pya a naa bee ii wa ale iya dam. A naa bee ɛp pya a naa ii sa iya kumakɛ̄ ale ɛp wa doodoo bee a ɛrɛ nu ba gaa peere nyɔɔbee ba naa ii sa iya.

8. Dookɛ̄ 1 Pya Kɔrint 7:7-9 kɔ doo, e na Pɔɔl bee yere mɛm loo pya Nɛɛ Kraist kɔ ba a kɛɛrɛ a?

⁸ Doodoo Jizɔs, nɛɛ lɛɛratam Pɔɔl naa bee ii wa sɔ̄ a gaa bee si tam zue ue. Pɔɔl naa bee ɛp kɔ a bee piya lo Nɛɛ Kraist ii sa iya. A bee suā kɔ lo biaɛfii kuu ziī ziī nɛɛ. Kerewo, Pɔɔl bee yere mɛm loo pya Nɛɛ Kraist kɔ ba dap tɔɔ̄ aba aba sa si tam nɛ Jɛhova. (Buū 1 Pya Kɔrint 7:7-9.) Bu kaka, Pɔɔl naa bee ɛp pya Nɛɛ Kraist a naa ii sa iya kumakɛ̄. A bee tubobaloo zege Timoti lo alu wuga nɛɛdam a bee le aba ɛɛ kɔ a kuūdɛɛ̄loo gbɛnɛ tam bu bɔŋanaloo Bari. * (Fil 2:19-22) A sirapie kɔ, a naa lee e’ɛp ziī wuga nɛɛdam kɔ a nyim tura ale kɔ a naa nyim tura nyɔɔbee e’ira wa ale nyɔɔbee a sii ii.—1 Kɔr 7:32-35, 38.

9. E na i dap kɔ akiiloo iya dam le wa le tɔɔ̄ aba ɔɔ a?

⁹ Jizɔs le Pɔɔl naa bee kɔ pya Nɛɛ Kraist ɛrɛ e’ii sa iya ale kɔ ba a bia aba aba. E na i dap kɔ akiiloo iya dam le wa le tɔɔ̄ aba ɔɔ ani? Watchtower October 1, 2012, baatɛ̄ doo wo ama sɔ̄ a kɔ: “Bu kaka, dap lu ebaatɛ̄ [iya dam le wa le tɔɔ̄ aba ɔɔ] nua dɔɔ̄nu a aabah Bari. . . . Jɛhova naa ɛp [tɔɔ̄ aba ɔɔ] nua nu kɛɛ ale nu ekiɛ̄nu.” Kɛkɛɛrɛbu pya nu ama  edoo kɔ i nɛ enwadɛɛ̄ pya wuga nɛɛdam le nɛɛwa ba le bu bɔŋanaloo lo ba le aba aba.

10. Bu mɛ sīdee na i tɔgɛ enwadɛɛ̄ loo pya wuga nɛɛdam le nɛɛwa ba le aba aba a?

¹⁰ Bu mɛ sīdee na i dap tɔgɛ enwadɛɛ̄ loo kɛ̄tɔɔ̄ pya wuga nɛɛdam le nɛɛwa ba le aba aba le kɛ̄ nu wa tɔɔ̄loo doo a? I doo leere lo esuā kɔ pio pya Nɛɛ Kraist biaɛfii kɔ ba etɔɔ̄e aba aba. Pya dɔɔ̄na Nɛɛ Kraist ba le aba aba gbī e’ii sa iya, mɛ ba sii muɛ̄ nɛɛ bu wa ɛɛ loo kaāna. E pio aba, wa dam ale wa wa e’ua. Ɛrɛgeba kɛ̄ a le doo, ekɔ pya a le bu bɔŋanaloo e bipge pya a le aba aba ama nu anua ba sii ii ale iya dam ale kɔ wa nɛ kɔ ba egbīe nɛɛ ba e’ii ale iya wa nɛ ni? Bu kaka, pio pya Nɛɛ Kraist ba le aba aba dap gbī dua yerebah ama. Mɛ lo ba naa bip, kɔ dua ue a le doo wo wa nɛ etɔɔ̄ wa loo doodoo wa? (1 Tɛs 4:11; 1 Tim 5:13) I naa kɔ ue nyɔɔ pio nu pya wuga nɛɛdam le nɛɛwa ba le aba aba kɔ.

11-12. Bu mɛ sīdee na i dap ɔɛloo pya a le aba aba a?

¹¹ Nɛɛ kuūdɛɛ̄loo sɛkiut a le aba ɛɛ a piiga lo esi ye tam leere kɛɛrɛ kɔ gbɛnɛ-edo biī le bu tɔɔ̄ aba ɔɔ. Kerewo, a kɔ a ɔɛe ye loo sɔ̄ pio pya wuga nɛɛdam le nɛɛwa ye bip kɔ: “E na anua o sii iige wa a?” Ziī wuga nɛɛdam a gaa si tam tɔ naa tam bee kɔ: “Pio sɔ̄ pya wuga nɛɛdam le nɛɛwa doo kɔ m kɛɛrɛ kɔ a bɔloo eto esaɛ̄ pya a le aba aba. Lo ama doo kɔ a bee kɔ tɔɔ̄ aba ɔɔ lu toh taā alu dɔɔ̄nu.”

¹² Ziī wuga nɛɛwa a le aba ɛɛ a gaa si tam Bɛtɛl bee kɔ: “Pio pya wuga nɛɛdam le nɛɛwa kɛɛrɛ kɔ dɛ̄dɛɛ̄ pya a le aba aba gaa gbī nɛɛ ba e’ii ale nɛɛ ba e’iya ale bee ɛrɛgeba sɔ̄ ba gbaa zɔ̄ŋia lu dee a wa kpaā nɛ lo e’ɛp nɛɛ ba e’ii ale nɛɛ ba e’iya. Ɛrɛ sɔ̄ m bee aa Bɛtɛl si dɔɔ̄na edo uwe tam, sa m ina lo kɛ̄ dee enɔānu. Wuga nɛɛwa a gaa bee mɛ kuūdɛɛ̄loo bee mɛ kɔ nɛ kɔ a ɛrɛ baɛ wuga nɛɛdam a le bu wa bɔŋanaloo ba lu na sikoh. A bee mɛ kɔ nɛ kɔ a naa gaa gbī kɔ m iya wa. Mɛ aba sɔ̄ i ina Tɔ Nɔnu Buɛ̄-mɛnɛ, a bee mɛ su kuma kɛ̄ pya lo wuga nɛɛdam le. Bu kaka, lo ama bee doo kɔ kɛɛ a bɔp baɛ lo wuga nɛɛdam le mm.”

13. Pya amunu edoba na a bee yere mɛm loo ziī wuga nɛɛwa a bee le aba aba ɛɛ a?

¹³ Dɔɔ̄na wuga nɛɛwa a gaa si tam Bɛtɛl bee kɔ: “M suāloo pya wuga ba gaa si tam sɛmdee ba le aba aba lo ba agaloo, sere ekɛɛrɛ nyɔɔ wa tam, su loo nɛ, sa doo kɔ nu ba ɛrɛ a gbɔɛ̄ wa loo bu wa tam sa ba gaa yerebah nɛ bɔŋanaloo. Ba ɛp wa tɔɔ̄ aba aba bu sīdee a kuūnadɛɛ̄, sa naa kɛɛrɛ kɔ ba lee e ee pya dɔɔ̄na nyɔɔbee ba le e aba aba ale ɛrɛ e’ɔaloo nyɔɔbee ba naa ɛrɛ dam ale wa le kɔ ba naa ɛrɛe butɔ.” Nu anua a lee ele bu bɔŋanaloo kɛ̄ dɛ̄dɛɛ̄ nɛɛ tɔgɛ enwadɛɛ̄ sa tɔgɛ nia loo ziī lo. O suā kɔ o wuga nɛɛdam le nɛɛwa naa to a esaɛ̄ gbɛnɛ ale ma a nyiɛ, e ba naa ɛp a tɛrɛ ale ɛp kɔ o lee e wa ee. O suā kɔ ba were a loo.

14. Bu mɛ sīdee na i dap nɛ enwadɛɛ̄ pya ba le aba aba a?

¹⁴ Bu pya wuga nɛɛdam le nɛɛwa ba le aba aba e’ɛɛ kaāna lo i tɔgɛ wa nia loo nyɔɔ wa le elap dogo, naale to wa esaɛ̄ nyɔɔbee ba sii ii sa iya. Taā i wa to esaɛ̄ yeekɛ̄, i tɔgɛ nia loo wa elap dogo yira agɛrɛ. E nu esira aabu na bee, pya i wuga nɛɛdam le nɛɛwa ba le aba aba naale ekɛɛrɛ doodoo bee i gaa wa kɔ nɛ kɔ: ‘Mm a gbī.’ (1 Kɔr 12:21) Taāwo, ba  gaa le suā kɔ i nɛ wa enwadɛɛ̄ sa tɔgɛ nia loo pya nu ba gaa doo bu bɔŋanaloo.

15. Amunu kwabaloo nu na pio pya wuga edora lokwa ba dap nyimɛ esiatam zue ue a?

¹⁵ Bu pio zua lo, gbɛnɛ-edo pya zue ue eseea sī lo enɔ dɔɔ̄na muɛ̄ ue lokwa ba dap nyimɛ wa esiatam zue ue. Dodoo wo kura kɔ ba ekwabaloo pio nu. Pya wuga nɛɛdam le nɛɛwa ama e’aara bɔŋanaloo a kɔ taɛ wa muɛ̄ ue lokwa ba dap si tam bie bɔŋanaloo a kɔ dɔɔ̄na muɛ̄ ue lo a ɛrɛ ebɛɛ̄ loo pya zue ue Buɛ̄-mɛnɛ. (Doonu pya Nɛɛ lɛɛratam 16:9) Lo ama lu biaɛfii ziī ziī pya Nɛɛ Kraist ama doo lo enyimɛ esiatam Buɛ̄-mɛnɛ. Kere a su wa gbɛnɛ-edo zua bah lɛɛ ba gae para ekɔ lo aā muɛ̄ ue leere, ba yerebah nɛ lo bɔŋanaloo bu gbɛnɛ-edo sīdee. Wa le elap dogo le pya nu ba etɛ̄na bu yere mɛm loo sa wu pya wuga a le bu bɔŋanaloo. I tɔgɛ nia loo su loo nɛ pya wuga nɛɛdam le nɛɛwa ama!

16. Sɔ̄ pya kanɛɛ gbī etubobaloo ziī nɛɛ nua nɛɛ kanɛɛ ale nɛɛ yerebah tam, ba e’ɛp lo nɛɛ dɛɛa nyɔɔ e?

¹⁶ Eku pya kanɛɛ a le bu bɔŋanaloo naale ebiaɛfii kɔ ziī wuga nɛɛdam aa lu nɛɛ yerebah tam ale nɛɛ kanɛɛ nyɔɔbee a sii dap kɔ muɛ̄ ue ye bɔŋanaloo gaa kɔ leere. Pya kanɛɛ e’ɛp lo wuga nɛɛdam dɛɛa nyɔɔ nu Kpa Kaɛ kɔ nɛɛ edoo lo etɔgɛ kɔ a nyim e tura lo elu nɛɛ yerebah tam le nɛɛ kanɛɛ, naale nyɔɔ kɛ̄ a naa para ekɔ muɛ̄ ue a gaa lu ekɔ bu lo bɔŋanaloo doo.—1 Tim 3:1-10, 12, 13; Taitɔs 1:5-9.

17. Pya amunu ebip na pio butɔ wee bip aba aba sɔ̄ ba gaa gbī ekii dɔɔ̄na edo a?

¹⁷ Pio pya butɔ pya Nɛɛ Kraist ekira dɔɔ̄na edo nyɔɔ e’aga kɛ̄tɔɔ̄ a le wa edo, ale bee nyɔɔ tam esi. Sɔ̄ a sira doowo, pya wa miɔŋɔ esi tɔkpa ba kɔ muɛ̄ ue lo edo ba le a. Pya wa tɛ le ka enɔ nage taɛ lo muɛ̄ ue lokwa ba dap gbī tam esi. E lo a ɛrɛ bɔŋanaloo a wee kɔ taɛ alaba muɛ̄ a? Amunu bɔŋanaloo na lo butɔ esi enɔānu a? Ekɔ lo butɔ esi enɔānu bɔŋanaloo ba kɔ muɛ̄ ue edo ba le a, sɛh bɔŋanaloo a kɔ taɛ alaba muɛ̄ ue ni?

18. Dookɛ̄ ue a le bu Pya Galetia 6:5 kɔ doo, bu mɛ sīdee na i nɛ enwadɛɛ̄ biaɛfii pya alu tɛ bee tɔ a?

¹⁸ Nɛɛ alu tɛ bee tɔ ɛrɛ ebiaɛfii lo bɔŋanaloo pya ye butɔ esi enɔānu. Nyɔɔbee biaɛfii ama le nɛ ziī ziī nɛɛ a, a ɛrɛ e’ɛp nu elee loo pya ye butɔ kaāna. (Buū Pya Galetia 6:5.) Alu ebɛɛ̄ kɔ i nɛ enwadɛɛ̄ biaɛfii lo tɛ bee tɔ. I su ɛrɛgeba nu a biaɛfii, sa su baɛ bah suā pya lo butɔ nua pya a nuuna i bɔŋanaloo.—Rom 15:7.

19. E na pya tɛ bee tɔ eyere kara sa kɛɛrɛbu a?

 ¹⁹ Bu pya dɔɔ̄na kɛ̄tɔɔ̄, pio butɔ dap le gaa si enɔānu bie bɔŋanaloo kɛ̄ aba tɛ le ka na a para ekɔ muɛ̄ ue a gaa lu ekɔ a, mɛ pya wa miɔŋɔ naa dap kɔ lo muɛ̄ ue leere. Lo a le lo bɔŋanaloo kɔ aba muɛ̄ ue wa ka le tɛ dābeeloo, e’aga bah pya lo miɔŋɔ edābeeloo nu a gaa lu ekɔ bie enɔānu sa edoo nage kɔ ba aa dap nyim kiisī bu edɔɔ̄. E na anua a? Nyɔnɛbee pya lo miɔŋɔ le tɔkpa a gaa lu ekɔ muɛ̄ ue alu ekɔ dɛ̄dɛɛ̄ lo barasī, e a naale muɛ̄ ue wa ka le tɛ wee kɔ. Sɔ̄ wo sira, pya tɛ bee tɔ eyere kara sa kɛɛrɛ nu alu ebɛɛ̄ kɔ ba a doo lokwa ba dap yerebah nɛ pya wa miɔŋɔ kɔ ba a tɔɔ̄ waɛloo Jɛhova le pya ye nɛɛ. Ba dap yerebah nɛ pya wa miɔŋɔ kɔ ba a para ekɔ lo muɛ̄ ue leere, ale ba ekɛɛrɛbu ekii bɔŋanaloo a kɔ lo muɛ̄ ue pya wa miɔŋɔ dābeeloo kaāna a. Ɛrɛgeba nu lo tɛ bee tɔ biaɛfii, pya wuga a le bu lo bɔŋanaloo a gbī etɔɔ̄ a, enɛ enwadɛɛ̄ sa tɔgɛ nia loo pya lo butɔ.

20. Bu mɛ sīdee na i dap tɔgɛ enwadɛɛ̄ loo pya wuga nɛɛdam le nɛɛwa ba gaa nɔ aā muɛ̄ ue a?

²⁰ Nyɔɔ dɛ̄dɛɛ̄ nu i ekɔa nu akiiloo ama, bu gbɛnɛ-edo bɔŋanaloo, gbɛnɛ-edo pya wuga nɛɛdam le nɛɛwa gaa piiga lo enɔ aā muɛ̄ ue. A dap wa agabah ekɔ kɛ̄ ba kɛɛrɛ nu doo. Kerewo, lo ii kɛɛrɛ aba nu akiiloo kɔ ba naa dap kɔ lo muɛ̄ ue, i muɛ̄ wereloo ba ɛrɛ loo Jɛhova le wa taɛ lo etaāŋa ye bah. Lo i ɛp pya lele elap dogo ama, i gaa le agɛrɛbah nɛ enwadɛɛ̄ sa tɔgɛ nia loo pya wuga nɛɛdam le nɛɛwa ama. Ii le ekɔ ‘Mm a gbī’ aba nyɔɔbee ba naa dap kɔ i muɛ̄ ue leere.

21-22. Amunu dee na i ɛrɛ a?

²¹ Jɛhova enɛa i gbɛnɛ dee lo esitam bu ye bɔŋanaloo. Kere i lu pya nɛɛdam ale pya nɛɛwa, i le aba ii ale i e’iya sa ii, i le zege ale i e’ana, ale i dap kɔ ziī muɛ̄ ue leere ale ii dap kɔ, dɛ̄dɛɛ̄ ii kuī loo Jɛhova le loo pya i wuga nɛɛdam le nɛɛwa.—Rom 12:4, 5; Kɔl 3:10, 11.

²² Doraa i kiisī lo esu pya nu i enɔā aāloo edoba Pɔɔl akiiloo ekpaloo nɛɛ ama yere bu dogo. Bu lo sīdee, i gaa le gbī pya sīdee etɔgɛ nia loo tam i ɛrɛ bu bɔŋanaloo Jɛhova le lo pya dɔɔ̄na nɛɛ.