1. Йегъовӕ йӕ иузӕрдион лӕггадгӕнджытӕй алкӕмӕн дӕр цавӕр фадат радта?

ЙЕГЪОВӔ йӕ иузӕрдион лӕггадгӕнджыты тынг уарзы, ӕмӕ сӕ алкӕмӕн дӕр фадат радта, цӕмӕй йын ӕмбырды уа йӕхи бынат. Кӕд ӕмбырды иухуызон хъуыддӕгтӕ нӕ аразӕм ӕмӕ ныл иухуызон хӕстӕ нӕй, уӕддӕр нӕ Йегъовӕ алкӕмӕн дӕр аргъ кӕны. Стӕй кӕрӕдзийы дӕр тынг хъӕуӕм. Апостол Павел нын ӕххуыс кӕны ацы ахсджиаг хъуыддаг бамбарынӕн.

2. Ефесӕгтӕм 4:16 стихмӕ гӕсгӕ, кӕрӕдзийӕн цӕмӕн хъуамӕ аргъ кӕнӕм ӕмӕ ӕмгуыст цӕмӕн хъуамӕ кӕнӕм?

² Ацы статьяйы сӕйраг стихы куыд бакастыстӕм, афтӕмӕй Павел бӕлвырд бамбарын кодта, махӕй иуӕн дӕр йӕ бон кӕй нӕу Йегъовӕйы лӕггадгӕнджытӕй искӕмӕн зӕгъын, «ницӕмӕн мӕ хъӕуыс», зӕгъгӕ (1 Кор. 12:21). Кӕд нӕ фӕнды, цӕмӕй ӕмбырды фарн уа, уӕд хъуамӕ кӕрӕдзийӕн аргъ кӕнӕм ӕмӕ ӕмгуыст кӕнӕм. (Бакӕс Ефесӕгтӕм 4:16.) Иумӕ ӕмвӕнд-ӕмзондӕй куы фӕархайӕм, уӕд алчидӕр фембары, иннӕтӕ йӕ кӕй уарзынц, ӕмӕ ӕмбырд вӕййы фидар.

3. Ацы статьяйы цӕуыл аныхас кӕндзыстӕм?

³ Ӕмбырды иннӕтӕн кӕй аргъ кӕнӕм, уый нӕ бон куыд у равдисын? Ацы статьяйы аныхас кӕндзыстӕм, хистӕр нӕлгоймӕгтӕн сӕ бон куыд у равдисын, иннӕ хистӕр нӕлгоймӕгтӕн кӕй аргъ кӕнынц. Аныхас ма кӕндзыстӕм, нӕ бон куыд у ӕвдисын, бинонтӕ кӕмӕн нӕй, уыцы хотӕ ӕмӕ ’фсымӕртӕн кӕй аргъ кӕнӕм. Стӕй ма базондзыстӕм, не ’взагыл ӕвзӕр чи дзуры, уыдонӕн кӕй аргъ кӕнӕм, уый цӕмӕй уыдзӕн бӕрӕг.

4. Хистӕр нӕлгоймӕгтӕ цавӕр уынаффӕмӕ гӕсгӕ хъуамӕ архайой? (Ромӕгтӕм 12:10).

⁴ Хистӕр нӕлгоймӕгтӕ иууылдӕр нысангонд ӕрцӕуынц Йегъовӕйы сыгъдӕг тыхӕй. Фӕлӕ, гӕнӕн ис, се ’ппӕтмӕ иухуызон курдиӕттӕ ма уа (1 Кор. 12:17, 18). Иуӕй-иутӕ хистӕр  нӕлгоймӕгтӕ ӕрӕджы систы, ӕмӕ сӕм, иннӕ хистӕр нӕлгоймӕгтӕм цас фӕлтӕрддзинад ис, уыйбӕрц фӕлтӕрддзинад нӕй. Иннӕтӕн та сӕ бон бирӕ аразын нӕу, азтӕ сыл сӕ уӕз кӕй ӕруагътой кӕнӕ се ’нӕниздзинад кӕй фӕцудыдта, уый тыххӕй. Фӕлӕ иу хистӕр нӕлгоймаг дӕр хъуамӕ иннӕмӕй афтӕ ма хъуыды кӕна, «ницӕмӕн мӕ хъӕуыс», зӕгъгӕ. Хъуамӕ сӕ алчидӕр архайа, Павел Ромӕгтӕм 12:10 стихы цы уынаффӕ радта, уымӕ гӕсгӕ. (Бакӕс ӕй.)

5. Хистӕр нӕлгоймӕгтӕ кӕрӕдзийӕн кӕй аргъ кӕнынц, уый цӕмӕй вӕййы бӕрӕг ӕмӕ уый ахсджиаг цӕмӕн у?

⁵ Хистӕр нӕлгоймӕгтӕ кӕрӕдзийӕн кӕй аргъ кӕнынц, уый бӕрӕг вӕййы, кӕрӕдзимӕ лӕмбынӕг кӕй фӕхъусынц, уымӕй. Афтӕ кӕнын сӕ уӕлдайдӕр фӕхъӕуы, хистӕр нӕлгоймӕгты совет ахсджиаг хъуыддӕгтыл куы фӕныхас кӕны, уӕд. 1988 азы 1 октябры «Хъахъхъӕнӕн мӕсыджы» (англисаг ӕвзагыл) фыст уыд: «Хистӕр нӕлгоймӕгтӕ хъуамӕ ӕмбарой, Йесо Чырыстийӕн сыгъдӕг тыхы фӕрцы йӕ бон кӕй у, хистӕр нӕлгоймӕгты советы чи ис, уыдонӕй кӕмӕнфӕнды дӕр йӕ зӕрдыл Библийы уагӕвӕрд ӕрлӕууын кӕнын, цӕмӕй бамбарой, кӕцыдӕр уавӕры куыд бакӕной, уый кӕнӕ ахсджиаг уынаффӕ рахӕссой (Хъуыд. 15:6–15). Сыгъдӕг тых хистӕр нӕлгоймӕгтӕй ӕрмӕст иуӕн нӕ феххуыс кӕны, фӕлӕ се ’ппӕтӕн дӕр».

6. Хистӕр нӕлгоймӕгтӕн цы баххуыс кӕндзӕн ӕмвӕнд-ӕмзондӕй архайынӕн ӕмӕ уый ӕмбырдӕн цы пайда хӕсдзӕн?

⁶ Хистӕр нӕлгоймаг иннӕ хистӕр нӕлгоймӕгтӕн куы фӕаргъ кӕны, уӕд нӕ фӕархайы, цӕмӕй-иу сӕ фембӕлдты алы хатт дӕр йӕ хъуыды фыццаг уый зӕгъа. Ӕрмӕст йӕхӕдӕг нӕ фӕдзуры, фӕлӕ иннӕтӕн дӕр ныхасы бар фӕдӕтты. Стӕй афтӕ нӕ фӕхъуыды кӕны, ӕмӕ, цы дзуры, уый алкӕддӕр раст вӕййы. Йӕ хъуыды сӕрныллӕгӕй бамбарын кӕны ӕмӕ иннӕтӕм лӕмбынӕг байхъусы. Ноджы ахсджиагдӕр та уый у, ӕмӕ цӕттӕ вӕййы Библийы уагӕвӕрдтыл аныхас кӕнынмӕ ӕмӕ «ӕууӕнкджын ӕмӕ зондджын цагъары» разамындмӕ гӕсгӕ архайынмӕ (Матф. 24:45–47). Хистӕр нӕлгоймӕгтӕ кӕрӕдзи куы уарзой  ӕмӕ кӕрӕдзийы ныхасӕн куы аргъ кӕной, уӕд Хуыцауы сыгъдӕг тых уыдзӕн семӕ. Ӕмӕ-иу сын баххуыс кӕндзӕн, ӕмбырд кӕй фӕрцы бафидар уыдзӕн, ахӕм уынаффӕ рахӕссынӕн (Иак. 3:17, 18).

7. Бинонтӕ кӕмӕн нӕ уыд, уыдонмӕ Йесо цы цӕстӕй каст?

⁷ Не ’мбырдты ис алыхуызон хотӕ ӕмӕ ’фсымӕртӕ: кӕмӕндӕрты дзы бинонтӕ ис, кӕмӕндӕрты та – нӕй. Бинонтӕ кӕмӕн нӕй, уыцы хотӕ ӕмӕ ’фсымӕртӕм цы цӕстӕй хъуамӕ кӕсӕм? Нӕ зӕрдыл-ма ӕрлӕууын кӕнӕм, бинонтӕ кӕмӕн нӕ уыд, уыдонмӕ Йесо цы цӕстӕй каст, уый. Йесойӕн йӕхицӕн бинонтӕ нӕ уыд, ӕмӕ йӕ тыхтӕ ӕмӕ йӕ рӕстӕг не ’вгъау кодта хорз хабар хъусын кӕнынӕн. Уый афтӕ никуы загъта, ӕмӕ чырыстӕттӕ бинонтӕ ӕнӕмӕнг хъуамӕ скӕной, нӕдӕр афтӕ дзырдта, ӕмӕ хъуамӕ бинонтӕ ма скӕной. Фӕлӕ загъта, чырыстӕттӕй чидӕртӕ кӕй аскъуыддзаг кӕндзысты, бинонтӕ не скӕндзынӕн, зӕгъгӕ (Матф. 19:11, 12). Йесо аргъ кодта, бинонтӕ кӕмӕн нӕ уыд, уыдонӕн. Уый афтӕ нӕ хъуыды кодта, ӕмӕ, бинонтӕ кӕмӕн уыд, уыдонӕй ӕвзӕрдӕр уыдысты кӕнӕ цыдӕр хъуаг уыдысты.

8. 1 Коринфӕгтӕм 7:7–9 стихтӕм гӕсгӕ, Павел чырыстӕттӕн цы фӕдзӕхста?

⁸ Апостол Павелӕн дӕр Йесойау бинонтӕ нӕ уыд, куы лӕггад кодта, уӕд. Павел никуы загъта, ӕмӕ, чырыстӕттӕй исчи бинонтӕ куы скӕна, уӕд уый раст нӕ уыдзӕн. Уый ӕмбӕрста, уыцы фарста алчидӕр йӕхӕдӕг кӕй скъуыддзаг кӕны. Фӕлӕ уӕддӕр чырыстӕттӕн фӕдзӕхста, цӕмӕй сӕ уавӕртыл дзӕбӕх ахъуыды кодтаиккой. Чи зоны, сӕ бон уыд Йегъовӕйӕн дарддӕр лӕггад кӕнын, бинонтӕ ма скодтаиккой, афтӕмӕй. (Бакӕс 1 Коринфӕгтӕм 7:7–9.) Бинонтӕ кӕмӕн уыд, уыдоны Павел ӕнӕус ӕфсымӕртӕ ӕмӕ ӕнӕцыд хотӕй уӕлдӕр не ’вӕрдта. Зӕгъӕм, Тимофей уыд ӕрыгон ӕмӕ йын бинонтӕ нӕ уыд. Фӕлӕ йын Павел йӕ бар бакодта ахсджиаг хъуыддӕгтӕ (Фил. 2:19–22) *. Уӕдӕ раст нӕ уаид афтӕ хъуыды кӕнын, ӕмӕ, ӕфсымӕрӕн йӕ бар цавӕрдӕр хӕстӕ бакӕнӕн ис ӕви нӕ, уый кӕнгӕ у, бинонтӕ йын ис ӕви нӕ, уымӕй (1 Кор. 7:32–35, 38).

9. Цы ис зӕгъӕн, бинонтӕ кӕмӕн ис ӕмӕ бинонтӕ кӕмӕн нӕй, уыдонӕй?

⁹ Уӕдӕ Йесо ӕмӕ Павел нӕдӕр афтӕ дзырдтой, ӕмӕ чырыстӕттӕ бинонтӕ ӕнӕмӕнг хъуамӕ скӕной, нӕдӕр афтӕ дзырдтой, ӕмӕ  хъуамӕ бинонтӕ ма скӕной. Уыцы хъуыддагмӕ цы цӕстӕй хъуамӕ кӕсӕм, уый тыххӕй 2012 азы 1 октябры «Хъахъхъӕнӕн мӕсыджы» фыст ис: «Адӕймагӕн цардӕмбал куы уа, уӕд уый у Хуыцауы лӕвар. Куы нӕ йын уа, уӕд уый дӕр у Хуыцауы лӕвар. [...] Йегъовӕ афтӕ нӕ зӕгъы, ӕмӕ адӕймагӕн цардӕмбал куы нӕ уа, уӕд уый худинаг у кӕнӕ уый тыххӕй мӕт кӕнын хъӕуы». Уӕдӕ хъуамӕ, бинонтӕ кӕмӕн нӕй, уыцы хотӕ ӕмӕ ’фсымӕртӕн аргъ кӕнӕм.

10. Нӕ бон куыд у равдисын, бинонтӕ кӕмӕн нӕй, уыцы хотӕ ӕмӕ ’фсымӕрты ӕнкъарӕнтыл кӕй хъуыды кӕнӕм?

¹⁰ Нӕ бон куыд у равдисын, бинонтӕ кӕмӕн нӕй, уыцы хотӕ ӕмӕ ’фсымӕрты ӕнкъарӕнтыл кӕй хъуыды кӕнӕм, уый? Мах ӕй нӕ зонӕм, бинонтӕ сын цӕуылнӕ ис. Зӕгъӕм, иуӕй-иутӕ аскъуыддзаг кодтой, ус кӕй нӕ ракурдзысты кӕнӕ мой кӕй не скӕндзысты. Кӕйдӕрты та фӕнды бинонтӕ скӕнын, фӕлӕ, цардӕмбалӕн кӕй равзариккой, ахӕм адӕймагыл нӕма фембӕлдысты. Кӕмӕндӕр та, чи зоны, йӕ цардӕмбал амард. Куыдфӕнды ма уа, уӕддӕр раст нӕ уаид хойы кӕнӕ ’фсымӕры фӕрсын, бинонтӕ дын цӕуылнӕ ис, зӕгъгӕ, кӕнӕ йын искӕй амонын. Чи зоны дын исчи зӕгъа, цӕмӕй йын уыцы хъуыддаджы баххуыс кӕнай. Фӕлӕ дын йӕхӕдӕг куы ницы зӕгъа, афтӕмӕй йын искӕй куы амонай, уӕд ын уый ӕхсызгон уыдзӕн? (1 Фес. 4:11; 1 Тим. 5:13). Ӕркӕсӕм, бинонтӕ кӕмӕн нӕй ӕмӕ Йегъовӕйӕн иузӕрдионӕй чи лӕггад кӕны, уыцы хотӕ ӕмӕ ’фсымӕртӕ цы зӕгъынц, уымӕ.

11, 12. Нӕхи цӕмӕй хъуамӕ хизӕм, цӕмӕй, бинонтӕ кӕмӕн нӕй, уыдонӕн сӕ ныфс ма асӕттӕм?

¹¹ Йӕ лӕггады ӕнтыстджын чи у, иу ахӕм районон цӕстдарӕг зӕгъы, бинонтӕ йын кӕй нӕй, уый бирӕ цӕмӕйдӕрты кӕй у хорз. Фӕлӕ йӕ хотӕ ӕмӕ ’фсымӕртӕ сӕ хорз зӕрдӕйӕ куы афӕрсынц, ус цӕуылнӕ курыс, зӕгъгӕ, уӕд хатт йӕ ныфс асӕтты. Филиалы чи лӕггад кӕны, иу ахӕм ӕнӕус ӕфсымӕр загъта: «Иуӕй-иу хатт хотӕ ӕмӕ ’фсымӕрты ныхӕстӕй афтӕ фӕуайы, цыма, бинонтӕ кӕмӕн нӕй, уыдон тӕригъӕд сты. Уый тыххӕй мӕм афтӕ кӕсын дӕр райдайы, ӕмӕ мын бинонтӕ кӕй нӕй, уый лӕвар нӕу, фӕлӕ уаргъ».

¹² Вефилы чи лӕггад кӕны, иу ахӕм хо загъта: «Иуӕй-иу хотӕ ӕмӕ ’фсымӕртӕм афтӕ кӕсы, ӕмӕ, бинонтӕ кӕмӕн нӕй, уыдон иууылдӕр сӕхицӕн цардӕмбал агурынц кӕнӕ, хотӕ ӕмӕ ’фсымӕртӕ искуы куы ӕрӕмбырд вӕййынц, уӕд уырдӕм дӕр уый тыххӕй ацӕуынц. Иухатт мӕ лӕггадимӕ баст хъуыддӕгты фӕдыл ӕндӕр горӕтмӕ ацыдтӕн. Кӕмӕ ӕрлӕууыдтӕн, уыцы хойӕн уыцы изӕр хъуамӕ ӕмбырд уыдаид. Хо мын афтӕ бакодта, не ’мбырды, дам, ис, дӕ карӕн чи сты, дыууӕ ахӕм дзӕбӕх ӕфсымӕры. Ӕнӕуи, дам, дын ӕй дзурын, амонгӕ, дам, дын сӕ нӕ кӕнын. Фӕлӕ куыддӕр Паддзахады залмӕ бацыдыстӕм, афтӕ дын мӕ уыцы ӕфсымӕрты раз куы балӕууын кӕнид. Гъемӕ ӕртӕйӕ дӕр куыннӕ фефсӕрмы стӕм».

13. Иу хойӕн кӕй цӕвиттонтӕ сты ныфсы хос?

¹³ Ӕндӕр хо та загъта (уый дӕр лӕггад кӕны Вефилы): «Ӕз зонын, бинонтӕ бирӕ азты дӕргъы кӕмӕн нӕй ӕмӕ пионертӕй чи лӕггад кӕны, ахӕм хотӕ ӕмӕ ’фсымӕрты. Уыдон сты уӕззаузонд, сӕ разы нысӕнттӕ ӕвӕрынц, цӕттӕ вӕййынц иннӕтӕн баххуыс кӕнынмӕ ӕмӕ сӕ лӕггадӕй райгонд сты. Уыцы лӕггадгӕнджытӕ ӕмбырдӕн стыр ӕххуыс сты. Уыдон сӕхимӕ раст цӕстӕй кӕсынц: бинонтӕ кӕмӕн ис, сӕхи уыдонӕй хуыздӕрыл нӕ нымайынц кӕнӕ сын бинонтӕ ӕмӕ сывӕллӕттӕ кӕй нӕй, уый тыххӕй сӕхи ӕнамонд нӕ хонынц». Куыд хорз вӕййы, ӕмбырды иууылдӕр кӕрӕдзийыл куы фӕхъуыды кӕнынц ӕмӕ кӕрӕдзийӕн куы фӕаргъ кӕнынц, уӕд. Адӕймаг ӕй фӕзоны, ӕмӕ йын бинонтӕ кӕй нӕй, уый тыххӕй афтӕ ничи хъуыды кӕндзӕн, цы тӕригъӕд у, зӕгъгӕ. Стӕй хӕлӕг ничи никӕмӕ кӕндзӕн, ӕнӕрвӕссон цӕстӕй ничи никӕмӕ кӕсдзӕн ӕмӕ  ӕгӕр бӕрзонд дӕр ничи никӕй ӕвӕрдзӕн. Адӕймаг фӕзоны, ӕмбырды йӕ кӕй уарзынц.

14. Бинонтӕ кӕмӕн нӕй, уыцы хотӕ ӕмӕ ’фсымӕртӕн кӕй аргъ кӕнӕм, уый нӕ бон куыд у равдисын?

¹⁴ Бинонтӕ кӕмӕн нӕй, уыцы хотӕ ӕмӕ ’фсымӕрты нӕ фӕнды, цӕмӕй сын иннӕтӕ тӕригъӕд кӕной. Уыдонӕн ӕхсызгон уыдзӕн, сӕ хорз миниуджыты тыххӕй сын куы аргъ кӕнӕм. Хъуамӕ сын аргъ кӕнӕм сӕ иузӕрдиондзинады тыххӕй. Ӕмӕ сӕм уӕд афтӕ нӕ кӕсдзӕн, цыма нӕ ницӕмӕн хъӕуынц (1 Кор. 12:21). Фӕлӕ зондзысты, кӕй сын аргъ кӕнӕм ӕмӕ, не ’мбырды кӕй сты, уый нын ӕхсызгон кӕй у.

15. Иуӕй-иутӕ сӕ царды цы фӕивтой, цӕмӕй фылдӕр лӕггад кӕной?

¹⁵ Фӕстаг азты хъусынгӕнджытӕй бирӕтӕ райдыдтой ӕндӕр ӕвзаг ахуыр кӕнын, цӕмӕй сӕ бон уа фылдӕр лӕггад кӕнын. Уый тыххӕй сӕ бахъуыд сӕ царды цыдӕртӕ фӕивын, зӕгъӕм, сӕ мадӕлон ӕвзагыл дзурӕг ӕмбырдӕй ацӕуын, цӕмӕй ӕндӕр ӕвзагыл дзурӕг ӕмбырдӕн баххуыс кӕной (Хъуыд. 16:9). Ӕмӕ кӕд иуӕй-иуты цалдӕр азы дӕр бахъӕуы, цӕмӕй ӕндӕр ӕвзагыл хорз дзурын райдайой, уӕддӕр ӕмбырдӕн стыр ӕххуыс вӕййынц. Сӕ хорз миниуджыты ӕмӕ сӕ фӕлтӕрддзинады фӕрцы ӕмбырд тынг бафидар вӕййы. Мах уыцы удуӕлдай хотӕ ӕмӕ ’фсымӕртӕн тынг аргъ кӕнӕм!

16. Ӕфсымӕры хистӕр нӕлгоймагӕй кӕнӕ кӕстӕриуӕггӕнӕг ӕфсымӕрӕй снысан кӕнӕн кӕд ис?

¹⁶ Кӕд ӕфсымӕр, цы ӕмбырды лӕггад кӕны, уыцы ӕмбырды ӕвзагыл хорз нӕма дзуры, уӕддӕр хистӕр нӕлгоймӕгтӕ афтӕ нӕ хъуыды кӕндзысты, ӕмӕ йӕ нырма нӕй хистӕр нӕлгоймагӕй кӕнӕ кӕстӕриуӕггӕнӕг ӕфсымӕрӕй снысан кӕнӕн. Ӕвзаг хорз зоны ӕви нӕ, уый сӕйраг нӕу. Сӕйраг у, цӕмӕй йӕм уа, Библимӕ гӕсгӕ хистӕр нӕлгоймагмӕ кӕнӕ кӕстӕриуӕггӕнӕг ӕфсымӕрмӕ чи хъуамӕ уа, уыцы миниуджытӕ (1 Тим. 3:1–10, 12, 13; Тит. 1:5–9).

17. Иуӕй-иу бинонты цӕуыл фӕхъӕуы ахъуыды кӕнын, ӕндӕр бӕстӕмӕ куы ацӕуынц, уӕд?

¹⁷ Иуӕй-иу чырыстон бинонты сӕ бӕстӕйӕ лидзын бахъуыд, тӕссаг сын кӕй уыд, уый тыххӕй кӕнӕ та ӕндӕр бӕстӕмӕ ацыдысты куыстагурӕг. Ӕмӕ, чи зоны, сӕ сывӕллӕттӕ цы скъоламӕ цӕуынц, уым сын уроктӕ вӕййынц уыцы бӕстӕйы сӕйраг ӕвзагыл. Чи зоны, ныййарджыты дӕр хъӕуы уыцы ӕвзаг сахуыр кӕнын, цӕмӕй сӕ бон уа куыст ссарын. Ӕмӕ дзы, зӕгъӕм, сӕ мадӕлон ӕвзагыл ӕмбырд (кӕнӕ къорд) куы уа, уӕд хъуамӕ уыцы ӕмбырдмӕ цӕуой? Ӕви уыцы бӕстӕйы сӕйраг ӕвзагыл дзурӕг ӕмбырдмӕ?

18. Галатӕгтӕм 6:5 стихмӕ гӕсгӕ, нӕ бон куыд у равдисын, бинонты хистӕр цы уынаффӕ рахаста, уымӕн кӕй аргъ кӕнӕм?

¹⁸ Бинонтӕ кӕцы ӕмбырдмӕ цӕудзысты, уый хъуамӕ бинонты хистӕр аскъуыддзаг кӕна *. Ӕмӕ хъуамӕ ахъуыды кӕна, йӕ бинонтӕн хуыздӕр цы уыдзӕн, ууыл. (Бакӕс Галатӕгтӕм  6:5.) Цавӕрфӕнды уынаффӕ ма рахӕсса,– хъуамӕ йын аргъ кӕнӕм. Ӕмӕ уыцы бинонтӕ не ’мбырды куы уой, уӕд-иу сӕм хъуамӕ хорз цӕстӕй ракӕсӕм, цӕмӕй бамбарой, зынаргъ нын кӕй сты (Ром. 15:7).

19. Бинонты хистӕр дзӕбӕх цӕуыл хъуамӕ ахъуыды кӕна?

¹⁹ Иуӕй-иу бинонтӕ вӕййынц, ныййарджытӕ кӕуыл дзурынц, уыцы ’взагыл дзурӕг ӕмбырды. Фӕлӕ скъолайы уроктӕ паддзахадон ӕвзагыл кӕй фӕцӕуынц, уымӕ гӕсгӕ сывӕллӕттӕн, гӕнӕн ис, зын уа, сӕ ныййарджытӕ кӕуыл дзурынц, уыцы ’взаг ӕмбарын. Ӕмӕ, ӕмбырдты цы фӕдзурынц, уый дӕр, гӕнӕн ис, ма ӕмбарой. Ӕмӕ уӕд сӕ уырнындзинад нӕ фидар кӕндзӕн. Ахӕм уавӕры бинонты хистӕр хъуамӕ Йегъовӕмӕ скува ӕмӕ дзӕбӕх ахъуыды кӕна, хуыздӕр куыд уаид бакӕнын, цӕмӕй сывӕллӕттӕ Йегъовӕмӕ дӕр ӕмӕ йӕ адӕммӕ дӕр ӕввахсдӕр кӕной. Чи зоны, аскъуыддзаг кӕна, сӕ сывӕллӕттӕн сӕ мадӕлон ӕвзаг сахуыр кӕнынӕн кӕй баххуыс кӕндзысты. Кӕнӕ та аскъуыддзаг кӕндзӕн, ӕнӕхъӕн бинонтӕй кӕй ахиздзысты, сывӕллӕттӕ хорз кӕй ӕмбарынц, уыцы ӕвзагыл дзурӕг ӕмбырдмӕ. Бинонты хистӕр цавӕрфӕнды уынаффӕ ма рахӕсса,– цы ӕмбырд равзардзӕн, уыцы ӕмбырды хотӕ ӕмӕ ’фсымӕртӕ хъуамӕ равдисой, кӕй сын аргъ кӕнынц.

20. Нӕ бон куыд у равдисын, ӕндӕр ӕвзаг чи ахуыр кӕны, уыцы хотӕ ӕмӕ ’фсымӕртӕн кӕй аргъ кӕнӕм?

²⁰ Ӕндӕр ӕвзаг чи ахуыр кӕны, ахӕм хотӕ ӕмӕ ’фсымӕртӕ бирӕ ӕмбырдты ис. Чи зоны сын зын вӕййы сӕ хъуыдытӕ дзурын. Фӕлӕ, ӕвзагмӕ арӕхсынц ӕви нӕ, уымӕ-иу куы нӕ ныккомкоммӕ уӕм, уӕд фендзыстӕм, Йегъовӕйы куыд тынг уарзынц ӕмӕ йын куыд зӕрдиагӕй лӕггад кӕнынц, уый. Ӕмӕ сӕ уӕд бауарздзыстӕм, стӕй сын аргъ кӕндзыстӕм. Не ’взагыл хорз кӕй нӕ дзурынц, уый тыххӕй нӕхи афтӕ никуы дардзыстӕм, цыма сын афтӕ зӕгъӕм, «ницӕмӕн нӕ хъӕут», зӕгъгӕ.

21, 22. Йегъовӕ нын цавӕр фадат радта?

²¹ Йегъовӕ махӕй алкӕмӕн дӕр фадат радта, цӕмӕй нӕ бон уа ӕмбырд фидар кӕнын. Уӕлдай нӕу, нӕлгоймӕгтӕ стӕм ӕви сылгоймӕгтӕ, бинонтӕ нын ис ӕви нӕ, ӕрыгӕттӕ стӕм ӕви ацӕргӕтӕ, ӕндӕр ӕвзагыл хорз дзурӕм ӕви нӕ,– Йегъовӕйӕн тынг зынаргъ стӕм ӕмӕ кӕрӕдзийӕн дӕр тынг аргъ кӕнӕм (Ром. 12:4, 5; Кол. 3:10, 11).

²² Павел ӕмбырд адӕймаджы буаримӕ кӕй абарста, уымӕй зондӕн бирӕ цыдӕртӕ райстам. Ӕмӕ уыцы хъуыдытӕ нӕ зӕрдыл куы дарӕм, уӕд алкӕддӕр аргъ кӕндзыстӕм, Йегъовӕйы ӕмбырды нӕхӕдӕг дӕр цы аразӕм ӕмӕ иннӕтӕ дӕр цы аразынц, уымӕн.