1. Akin ya nibagan importante tayon amin ed si Jehova?

AMIN ya matoor a lingkor nen Jehova et maaro ton inawat ed kongregasyon to. Anggano nandurumay nagagawaan tayo, importante tayon amin ed sikato tan kaukolan tayoy balang sakey. Walay balibalin bilin nen apostol Pablo ed satan.

2. Base ed Efeso 4:16, akin ya kaukolan tayon pablien so balang sakey tan mantutulongan tayo?

² Diad pinagkateman teksto na sayan artikulo, indanet nen Pablo ya agtayo nayarin melmelagen so arum ya lingkor nen Jehova, tan ibaga tayon, “Agta ka kaukolan.” (1 Cor. 12:21) Pian mansiansian mareen so kongregasyon, kaukolan tayon pablien so balang sakey tan mantutulongan tayo. (Basaen so Efeso 4:16.) No walay pankakasakey tayo, onaligwas so kongregasyon tan balibali so ulopan tayo.

3. Antoy pantongtongan tayo ed sayan artikulo?

³ Panon tayon nipanengneng ya rerespetoen tayo ray agagi ed kongregasyon? Diad sayan artikulo, pantongtongan tayo no panon ya nipanengneng na saray elder so respeto ed kapara dan elder. Insan tayo pantongtongan no panon tayon nipanengneng so respeto ed saray agagi tayon anggapoy asawa ra. Tan aralen tayo met no panon tayon nipanengneng so respeto ed saramay agda ni kabisadon maong so lenguahe tayo.

4. Antoy simbawa nen Pablo ed Roma 12:10 ya nepeg ya unoren na saray elder?

⁴ Amin ya elder ed kongregasyon et tinuro nen Jehova panamegley na masanton espiritu to. Balet aliwan pareparehoy abilidad da. (1 Cor.12:17, 18) Saray arum ed sikara et balo nin elder kanian daiset ni eksperiensya ra. Say arum et nayarin matatken la tan makapuy lay laman da. Balet agnepeg ya isipen na sakey ya elder ya anggapoy nitutulong na saray kapara ton elder, ya singa to ibabagan “Agta kayo kaukolan.” Importantin unoren na amin ya elder imay simbawa nen Pablo ya walad Roma 12:10.​—Basaen.

5. Panon ya nipanengneng na saray elder ya rerespetoen da iray kapara dan elder, tan akin ya importante itan?

⁵ Ipapanengneng na saray elder ya rerespetoen da iray kapara dan elder no dedengelen day suhestion na balang sakey. Importante iya lalo la no manmimiting iray elder pian pantongtongan iray seryoson bengatla. Akin? Oniay imbaga na The Watchtower ya Oktubre 1, 1988: “Sankanonot na saray elder ya diad panamegley na masanton espiritu et sarag nen Kristo ya igiya so anggan siopan elder pian makalmo na prinsipyo ed Biblia ya ontulong ed sikaran manggawa na dugan desisyon. (Gawa 15:6-15) Igigiya na masanton espiritu so interon ulop na mamatatken, aliwan saksakey labat ya elder.”

6. Panon ya napansiansia na saray elder so pankakasakey da, tan antoy resulta na satan ed kongregasyon?

⁶ Rerespetoen na sakey ya elder iray kapara ton elder no aliwan sikaton lanang so unonan mansalita no manmimiting ira. Aliwa met ya sikato so salita lan salita tan agto isipen ya mas maong so opinyon to nen say arum. Mapaabeba so pangibaga to ed saray suhestion to. Dedengelen ton maong iray kapara ton elder no sikara met so mansasalita. Tan say ipapaimano to et no antoy ibabaga na Biblia tan say sankabaloan ya instruksion na “matoor tan makabat ya aripen.” (Mat. 24:45-47) No ipanengneng na saray elder so panangaro tan respeto no manmimiting ira, igiya ira na masanton espiritu na Dios pian makapanggawa ra na  dugan desisyon ya mamabiskeg ed kongregasyon.​—Sant. 3:17, 18.

7. Antoy panmoria nen Jesus ed saray anggapoy asawa ra?

⁷ Diad kongregasyon tayo et wala ray sanasawa tan pamilya, balet dakel met so anggapoy asawa ra. Antoy nepeg ya panmoria tayo ed saramay anggapoy asawa ra? Aligen tayoy panmoria nen Jesus ed sikara. Nen wadiad dalin si Jesus, sikatoy ag-angasawa. Nampokus ed asainmin to. Ag-imbangat nen Jesus ya saray Kristiano et kaukolan day mangasawa o miasawa, tan agto met imbangat ya nepeg iran mansiansian single. Balet imbaga to ya wala ray Kristianon mandesisyon ya agla mangasawa o miasawa. * (Mat. 19:11, 12) Nirespeto nen Jesus iramay anggapoy asawa ra. Agto inisip ya makapuy ira odino walay kulang ed bilay da.

8. Base ed 1 Corinto 7:7-9, antoy imbaga nen Pablo ya pannonotan na saray Kristiano?

⁸ Singa si Jesus, anggapo met so asawa nen apostol Pablo legan na ministeryo to. Agbalot imbangat nen Pablo ya mauges so mangasawa. Amta to ya personal a desisyon itan. Balet pinaseseg nen Pablo iray Kristiano ya pannonotan da no kasin sarag day mansiansian single pian mas makapampokus ira ed panaglingkor da ed si Jehova. (Basaen so 1 Corinto 7:7-9.) No ontan sirin, ag-inisip nen Pablo ya makapuy iray Kristianon anggapoy asawa ra. Diad tua, inikdan to na ambelat ya responsabilidad so sakey ya balolakin brother, si Timoteo. * (Fil. 2:19-22) Aliwa sirin no say pangibasian tayo ed kualipikasyon na sakey ya brother et no kasin walay asawa to odino anggapo.​—1 Cor. 7:32-35, 38.

9. Antoy dugan panmoria ed pangasawa tan agpangasawa?

⁹ Agbalot imbangat nen Jesus tan Pablo ya kaukolan a mangasawa iray Kristiano odino kaukolan ya mansiansia ran single. Anto sirin so dugan panmoria ed pangasawa tan pansiansian single? Oniay balibalin imbaga na Say Panag-bantayan ya Oktubre 1, 2012: “Diad tua, parehon ibabaga na Biblia ya regalo na Dios so pangasawa o agpangasawa. . . . Agbalot imbaga nen Jehova ya kababaing o kaskasian iramay anggapoy asawa ra.” Importante sirin  ya respetoen tayo iray agagi ed kongregasyon ya anggapoy asawa ra.

10. Antoy agtayo gagawaen pian nipanengneng tayo ya rerespetoen tayo iramay anggapoy asawa ra?

¹⁰ Panon tayon nipanengneng ya rerespetoen tayoy liknaan na saray agagi tayon anggapoy asawa ra? Tandaan tayo ya nandurumay rason no akin ya anggapoy asawa ra. Wala ray agagin nandesisyon ya aglan talaga mangasawa o miasawa. Say arum balet et labay day mangasawa o miasawa, balet agda ni nalmoy kapakpakna ra. Wala met iray agagi tayo ya abalo. Antokaman so rason, duga kasi ya tepetan tayo ra no akin et agni ra angasawa o akiasawa? Odino duga kasin ibaga tayo ya iyanapan tayo ra? Siempre, walan wala ray agagi ya manpaanap na magmaliw ya asawa ra. Balet anto kasi nalikna ra no ibaga tayon iyanapan tayo ra anta agmet ira manpapaanap? (1 Tes. 4:11; 1 Tim. 5:13) Nengnengen tayo so imbaga na pigaran matoor ya agagi ya anggapoy asawa ra.

11-12. Antoy pakakadismayaan na saray agagin anggapoy asawa ra?

¹¹ Imbaga na sakey ya makulikulin manangasikaso na sirkito ya dakdakel so pankaabigan no say sakey et balolaki. Balet imbaga to ya nadidismaya no say lanang ya tetepeten na agagi ed sikato et, “Akin et agka ni mangasawa?” Oniay imbaga na sakey ya balolakin manlilingkor ed Bethel: “No maminsan et ipalikna na saray agagi ya kaskasian ka no anggapoy asawam. Ompapaway laingen ya say agpangasawa et baleg ya problema imbes ya regalo.”

¹² Oniay imbaga na sakey ya marikit a manlilingkor ed Bethel: “Iisipen na arum ya agagi ya no balolaki o marikit ka et manaanap ka odino labalabay moy onla ed saray gathering pian makalmo ka na mangasawa ed sika. Aminsan nen imbaki ak na Bethel diad sakey ya lugar ed bansa mi, dugaruga ya eskedyul na aral da nen sinmabi ak. Imbaga na samay sister ya panaayaman ko ya walay duaran brother ed kongregasyon da ya kaedaran ko. Impaseguro tod siak ya agto ak isutil. Balet nen kasabi mid Kingdom Hall, tinawag ton tampol imay duaran brother. Nababaingan kami laingen ya talo.”

13. Antoy akapaseseg ed sakey ya marikit ya manlilingkor ed Bethel?

¹³ Oniay naobserbaan na sakey a marikit ya manlilingkor ed Bethel: “Wala ray kabat kon mamarikit tan babalolaki ya abayag lan payunir. Responsable ira, akapokus ira ed panaglingkor da, masakripisyo ira, tan kontento rad bilay da. Dakel so nitutulong dad kongregasyon. Balanse met so panmoria ra ed situasyon da. Kanian agda iisipen ya mas maong ira nen say arum ta nansiansia ran single, tan agda met iisipen ya pakaskasi ira lapud anggapoy asawa odino pamilya ra.” On, malikeliket so kongregasyon no nalikna na balang sakey ya sikatoy rerespetoen tan papablien na saray kakongregasyon to. Agmo nalikna ya pakaskasi ka odino naiinggit iray agagi ed sika. Agmo met nalikna ya agda ka labay tan agda iisipen ya mas maong ka nen say sikara. Basta say segurado, inar-aro da ka.

14. Panon tayon nipanengneng ya rerespetoen tayo iray agagin anggapoy asawa ra?

¹⁴ Seguradon misalsalamat ed sikatayo iray agagi tayon anggapoy asawa ra no aroen tayo ra lapud saray maong ya kualidad da, tan agtayo ipaliknan pakaskasi ira. Apresyaen tayoy panmamatoor da. No ontan so gawaen tayo, agda nalikna ya singa tayo ibabaga ed sikaran, “Agta kayo kaukolan.” (1 Cor. 12:21) Imbes, nalikna ra ya talagan rerespetoen tayo ra tan maliket tayo ta kaiba tayo ra ed kongregasyon.

15. Anton pananguman so ginawa na arum pian mas dakel so natulongan dad ministeryo?

¹⁵ Diad apalabas iran taon, dakel ya agagi so nanaral na arum a lenguahe pian mas dakel so natulongan dad ministeryo. Siempre, wala ray pananguman ya ginawa dad bilay da. Sarayan agagi tayo et tinaynan day datin kongregasyon da pian makapanlingkor ira ed kongregasyon ya sananey so lenguahe tan mas baleg so pankaukolan. (Gawa 16:9) Ontan so desisyon da lapud labay dan aruman so nagagawaan da parad Panarian. Anggano agda nakabisadon tampol so lenguahe, dakdakel so nitutulong da ed kongregasyon. Seguradon napapabiskeg iray agagi lapud saray balibalin ugali ra tan eksperiensya ra. Pinabpabli tayo irayan masakripisyon agagi tayo!

16. Antoy nepeg ya pangibasian na saray elder no kasin say sakey et kualipikado lan manlingkor ya elder odino ministeryal a lingkor?

¹⁶ Agnepeg ya isipen na ulop na mamatatken ya say sakey a brother et agni nirekomenda ya elder odino ministeryal a lingkor lapu labat ta agto ni kabisadon maong so lenguahe na kongregasyon. Nepeg ya say pangibasian da et saray Makasulatan ya kualipikasyon parad saray elder tan ministeryal a lingkor. Agda itan ibabase ed no kasin kabisado to lan maong so lenguahe na kongregasyon odino andi.​—1 Tim. 3:1-10, 12, 13; Tito 1:5-9.

17. Antoy nepeg ya desisyonan na saray pamilyan inmalis ed arum ya bansa?

¹⁷ Saray arum ya agagi et inmalis iran buon pamilya ed arum ya bansa lapud mairap so kipapasen ed bansa ra, odino pian makalmo ra na trabaho. Lapud satan, no maneskuela la iray ananak da, say naaralan da lan lenguahe et say lenguahe na inalisan dan bansa. Ompan kaukolan met na saray atateng ya aralen itan a lenguahe pian makalmo ra na trabaho da. Panon to balet no walay kongregasyon odino grupo ed satan ya bansa ya manguusar ed samay datin lenguahe ra? Anton kongregasyon so nepeg ya atendian na pamilya? Kasin samay kongregasyon ya manguusar ed lenguahe na inalisan dan bansa, odino diad samay kongregasyon ya manguusar ed lenguahe na bansan nanlapuan da?

18. Base ed prinsipyo ya walad Galacia 6:5, panon tayon nipanengneng ya rerespetoen tayoy desisyon na ulo na pamilya?

¹⁸ Say ulo na pamilya so mandesisyon no anton kongregasyon so atendian na interon pamilya. Lapud pamilya to so nalalanor, kaukolan ton nonoten ya maong no antoy sankaabigan parad pamilya to. (Basaen so Galacia 6:5.) Kaukolan tayon respetoen so desisyon na ulo na pamilya. Anggan antoy desisyon to, suportaan tayo itan. I-welcome tayo ra ed kongregasyon tayo tan aroen tayo ra.​—Roma 15:7.

19. Antoy nepeg ya pannonotan tan ipikasi na ulo na pamilya?

¹⁹ Wala ray pamilya ya say lenguahe na kongregasyon  ya aatendian da et samay lenguahe na atateng, balet ag-itan masyadon natatalosan na saray ananak. No satan ya kongregasyon et walad lugar ya say manunan uusaren et say lenguahe na bansan inalisan da, ompan nairapan iray ananak ya talosan iray aaralen ed Kingdom Hall tan ag-ira onaligwas ed espiritual. Akin? On ta nayarin say lenguahen uusaren ed eskuelaan na saray ananak et samay lenguahe na bansan inalisan da, aliwan samay lenguahe na atateng da. No ontan so situasyon, kaukolan ya pannonotan tan ipikasi na ulo na pamilya no antoy sankaabigan parad ananak to, pian onaligwas irad espiritual tan nakaaro da iray agagi. Sikato so manpili no kasin mas praktikal ya ibangat da iray ananak da ed samay lenguahe ra pian natalosan da iray aaralen ed Kingdom Hall, odino mandesisyon ya onalis la rad kongregasyon ya manguusar na lenguahen mas natalosan na ananak da. Antokaman so desisyon na ulo na pamilya, nepeg ya sikaray i-welcome na kongregasyon ya napili to. Ipalikna dan rerespetoen tan inar-aro day pamilya to.

20. Panon tayon nipanengneng ya rerespetoen tayo ray agagi ya manaaral na sananey a lenguahe?

²⁰ Diad dakel a kongregasyon, walan wala ray agagi ya nanairapan a manaral na sananey a lenguahe. Ompan nairapan iran mangibaga ed iisipen da. Balet no aliwan satan so pampokusan tayo, say nanengneng tayo et say panangaro dad si Jehova tan say pansasagpot dan manlingkor ed sikato. Kanian mas narespeto tan naaro tayo irayan agagi. Agtayo met nipalikna ed sikara ya ‘agtayo ra kaukolan’ lapu labat ta agda ni kabisadon maong so lenguahe tayo.

21-22. Antoy balibalin pribilehyo tayo?

²¹ Misalsalamat tayo ed si Jehova ta inikdan to itayo na pribilehyon magmaliw ya kabiangan na kongregasyon to. Amin tayo​—lalaki odino bibii, anggapoy asawa odino walaan na asawa, ugugaw odino maedad la, kabisado tayo lan maong so sakey a lenguahe odino andi ni—​et inar-aro nen Jehova, tan papablien tayoy balang sakey.​—Roma 12:4, 5; Col. 3:10, 11.

²² Komon ta itultuloy tayon iyaplika ed bilay tayo iray balibalin naaralan tayo ed ilustrasyon nen Pablo nipaakar ed laman na too. No ontan so gawaen tayo, mas makaisip tayo na saray paraan ya makatulong tayo ed kongregasyon. Napansiansia tayo met so panangaro tan respeto tayo ed balang sakey.