1. A Jehovah, ngera ngmla mesterir a rederta el blak a rengrir el mesiungel?

NGBLTKIL a rengul a Jehovah a uchul me ngmla mesterir a rederta el mesiungel a basio er tir er a ongdibel er ngii. Me alta ngkakerous a ngerecheled, engdi kede rokui el meklou a ultuteled e dirrek el diak el sebeched el di kid. A apostol Paulus a ngosukid el mo medengelii tia el klou a ultutelel el tekoi. Ngmekera loruul uaisei?

2. A doltirakl er a Efesus 4:16, e ngera me ngkired el omes er a ta me a tang el meklou a ultutelir e mo dmak el oureor?

² El ua ledung a bades el lemlengai er ngii tia el suobel, a Paulus a millisiich el kmo ngdiak a ngii di el techa er kid el sebechel lomes er a ta er a mesiungel a Jehovah e dmu er ngii el kmo: “Ng diak kuusbech er kau.” (1 Ko. 12:21) Me a lsekum e ngsoad a ongdibel a lebo er ngii a budech er ngii, e ngkired el omes er a ta me a tang el meklou a ultutelir e mo dmak el oureor. (Monguiu er a Efesus 4:16.) Sel dedak el oureor el ngar er a kltarreng, e a ongdibel a mo mesisiich e dirrek el meteketek lokiu a bltikerreng.

3. Ngera kede mo mesaod er tia el suobel?

³ Ngera bebil er a rolel e ngsebeched el olecholt a omengull el mora rebebil er a chelsel a ongdibel? Ngar tia el suobel, e kede mo mesaod er a rolel e a remechuodel a sebechir el kaiuecholt a omengull. E a uriul, e kede mo mesaod er a rolel e kid el rokui a sebeched el olecholt el kmo, kede omes er a remesobil el rudam me a rudos el meklou a ultutelir. E a ulebongel, e kede mo mesuub er a rolel e ngsebeched el olecholt a omereng el saul el kirir tirke el dirkak bo lemeduch el melekoi a omelekinged.

4. Ngera el omellach er a Paulus el ngar er a Rom 12:10 a kirir a remechuodel el oltirakl er ngii?

⁴ A remechuodel er a ongdibel a meltutk loeak a chedaol reng er a Jehovah. Me nguaisei, engdi a rederta er tir a kakerous a duch er tir. (1 Ko. 12:17, 18) A rebebil a locha dirk mlo mesiou el ta er a remechuodel me ngdirkak el bo el klou a klemedengei er tir el ua rebebil. A rekuk bebil a locha diak el sebechir el meruul a betok e le ngcheluodel me a lechub e ngsecherir a uchul. Me nguaisei, engdi a remechuodel a diak el kirir el omes er a tang e lomdasu el kmo, “Ng diak kuusbech er kau.” Ngbai kirir a rederta er tir el oltirakl er a omellach er a Paulus el ngar er a Rom 12:10.​—Monguiu.

5. Te mekera remechuodel a lekaiuecholt a omengull er a delongelir, e ngera uchul me ngklou a ultutelel a loruul uaisei?

⁵ A remechuodel a olecholt el kmo te kakull lokiu sel lekaiuerenges. E tiang a kmal klou a ultutelel sel lebo ledak el mesaod a oberaod el tekoi. E ngera uchul? Ka momtab a lolekoi a The Watchtower er a October 1, 1988 el kmo: “A remechuodel a mtebengii el kmo ng Kristus, el oeak a chedaol reng, a sebechel mekrolii a uldesuel a ngii di el mechuodel el ngar er a chelechad el mo ochotii a omellach er a Biblia el lousbech er ngii me bo lodengelii a tekoi el kirel ruoll me a omelilt el kirel meketmokl. (Rel. 15:6-15) Ngdiak di el chimo el mechuodel oba klisichel a chedaol reng.”

6. Te mekera remechuodel a ledak el oureor el ngar er a kltarreng, e mekera e mo klungiolel a ongdibel sel loruul uaisei?

⁶ A mechuodel el mengull er a rekldemel el mechuodel a diak lolasem el di mo kot el mengedecheduch er aike el miting er tir. E diak di el ngii el tang a mengedecheduch, e lomdasu el kmo a uldesuel a blechoel melemalt. Ngbai oba klengariourreng me a tabesul el uldasu e ochotii a uldesuel. Ngungil el orrenges a uldesuir a rebebil. E sel kot el klou a ultutelel a kmo ngkmal soal el ouchais a omellach er a Bades e orrenges a ulekrael el mla er a “blak a rengul e mellomes a rengul el mesiou.” (Mt. 24:45-47) Me a remechuodel sel ledak el mesaod a tekoi el loeak a bltikerreng me a omengull, e a chedaol reng er a Dios a mo  obengterir, e omekrael er tir el mo melilt a tekoi el melisiich er a ongdibel.​—Jak. 3:17, 18.

7. Ngmle uangera osengel a Jesus el kirel a klemesobil?

⁷ A ongdibel er chelechang a uldimukl er a rubekel me a retelungalek. Me nguaisei, engdi ngdirrek el uldimukl er a rebetok el mesobil el rudam me a rudos. Me ngkirel uangera osenged el bedul a remesobil? Ka molatk er a osengel a Jesus el kirel a klemesobil. Ngar er a omesiungel er tia el chutem, e a Jesus a dimlak bo el bechiil. Ngdi mle mesobil e ultaut a osengel me a temel er a ngerechelel. A Jesus a dimlak a ta lolisechakl el kmo ngkirel a Kristiano el mo bechiil me a lechub e ngdi mesobil. Me nguaisei, engdi ngdilu el kmo a rebebil el Kristiano a mo melilt el diak bo el bechiil. (Mt. 19:11, 12) A Jesus a ullecholt a omengull el mora remesobil. E dimlak lomdasu el kmo ngdiak el meklou a ultutelir me a lechub e lengar ngii a olengesonges er tir.

8. A doltirakl er a 1 Korinth 7:7-9, e a Paulus ngmillisiich er a Rekristiano el mo melatk el kirel a ngera el tekoi?

⁸ A apostol Paulus a di mle uai a Jesus el mle mesobil er a loruul er a omesiungel. Ngdimlak a ta lolisechakl el kmo ngmekngit er a Rekristiano a bo el bechiil. Ngmle medengei el kmo tia di ior er a chad. Me nguaisei, engdi ngmillisiich er a Rekristiano me bo lolatk el di mesobil e losiou er a Jehovah. (Monguiu er a 1 Korinth 7:7-9.) Me a Paulus a dimlak lemetengel a osengel er a remesobil Kristiano. Ngbai ngileltii a kekerei el chad el Timothy, el mle mesobil odam, el mo mengetmokl a oberaod el ngerachel. * (Fil. 2:19-22) Nguaisei, ngdiak el melemalt a bo domdasu el kmo a odam a kmal rredemelel me a lechub e ngdiak lerredemelel a ngerachel e le ngii el bechiil me a lechub e ngmesobil.​—1 Ko. 7:32-35, 38.

9. Ngera sebeched el melekoi el kirel a chebechiil me a klemesobil?

⁹ A Jesus me a Paulus a dimlak lolisechakl er a Rekristiano el kmo ngkirir el mo bechiil me a lechub e te di mesobil. Me ngera sebeched el melekoi el kirel a chebechiil me a klemesobil? Ngkmal ungil a nger er a The Watchtower er a October 1, 2012 el kmo: “A mera er ngii, aika el teblo el tekoi [el chebechiil me a klemesobil] a sengk el mla er a Dios. . . . A Jehovah a diak lomes er a [klemesobil] el uchul a rur me a lechub e ngklengiterreng.” Sei a uchul me ngkired el mengull er a basio er a remesobil el rudam me a rudos er a ongdibel.

10. Ngmekera dolecholt a omengull el bedul a remesobil el rudam me a rudos?

 ¹⁰ Ngmekera dolecholt a omengull el kirel a uldesuir me a blekerdelel a klengar er a remesobil el rudam me a rudos er kid? Lak dobes el kmo a rebebil mesobil el Kristiano a mla tibir el diak bo el bechiil. A rekuk bebil a sorir el mo bechiil, engdi ngdirkak lebetik er a ungil chad el kirir. Ngdirrek el ngar ngii a remla mad a rebecherir. Me a leuaisei, e ngkirir a rechad er a ongdibel el mo oker er tir er a uchul me ngdiak lebechiil, me a lechub e lengesuterir el osiik er a rebecherir? Nguaisei el locha ngar ngii a rebebil mesobil el Kristiano el mo olengit a ngeso el kirel tia el tekoi. Engdi a lsekum e ngdimlak lolengit a ngeso, e ngmo uangera uldesuir a lsekum ngdi kid el mo olengeseu er tir? (1 Th. 4:11; 1 Ti. 5:13) Ka me bo dosaod a uldesuir a rebebil el blak a rengrir el mesobil el rudam me a rudos.

11-12. Kede mekera mo mengitechut er a remesobil?

¹¹ A ta el mesobil el odam el mesiou el oldingel a ongdibel el kmal meduch er a ngerechelel a kmo ngbetok a klungiolel a demesobil. Engdi ngmelekoi el kmo ngsebechel mo mengitechut sel sekum a rudam me a rudos, el alta ngungil a moktek er tir, a oker el kmo: “Ngera uchul me ngdiak obechiil?” A mesobil el odam el mesiou er a obis er a Resioning er a Jehovah a kmo: “A lebebil er a taem, e a rudam me a rudos a rullak el mo omdasu el kmo ak chebuul e le kdirk mesobil. E tia sebechel rullii a klemesobil el mo ua leberraod el diak el sengk.”

¹² A mesobil odos el mesiou el ngar er a Bethel a kmo: “A rebebil el rudam me a rudos a omdasu el kmo te rokui el mesobil a osiik er a rebecherir me a lechub a remesobil a omes a bek el kldibel el ua letechall el losiik er a rebecherir. A ta el taem er a kbora ta er a beluu el kirel a urerek er a Bethel, e ak mlong er a temel a miting. Ngike el odos el blo kiei er a blil a dilu er ngak el kmo ngar ngii a reteru el odam el di ua meklungek er a ongdibel er ngii. Me nguaisei, engdi ngdilu er ngak el kmo ngdiak losiik er a bechik. Engdi sera ksiseb er a Blil a Ongdibel, e ngilikak el mo mengedecheduch er tirka el teru el odam. Tia kmal mle omekrur el blekeradel.”

13. Ngera el kerebai a millisiich er a ta el mesobil odos?

¹³ A kuk ta er a mesobil odos el mesiou el ngar er a Bethel a omtab el kmo: “Ak medengelterir a remesobil el pioneer el tabesul a uldesuir, ultaut a osengir er a omesiungir, kongei el olengeseu er a rebebil, dmeu a rengrir, e klou a lengesuir er a ongdibel. Ngtabesul a osengir el kirel a klemesobil er tir, e diak lomdasu el kmo te kuk ungil er a rebebil e le tir el di mesobil me a lechub e lengar ngii a olengesonges er tir e le ngdiak a becherir me a telungalek er tir.” Tiaikid a klebekelel a ongdibel, el rechad er ngii a kakull e omes er a rederta el chad el meklou a ultutelir. Ke medengei el kmo ngdiak mchebuul me a diak a mechechei er kau, me a ka mngar er a kemikr, me a diak omdasu el kmo ke kuk ungil er tir. Ke bai melechesuar a bltkil a rengrir er kau.

14. Ngmekera dochotii el kmo kede mengull er a remesobil?

¹⁴ A remesobil el rudam me a rudos er kid a mo dmeu a rengrir a lsekum kede omes er tir el meklou a ultutelir e le tir el ungil a blekerdelir, el diak lultuil er a kmo te bechiil me a lechub e ngdiak. Me ngdiak el soad el omes er tir el kmo te chebuul, kede bai oba omereng el saul el kirel a blakerreng er tir. Seikid e a remesobil el rudam me a rudos a diak bo lomdasu el kmo kede melekoi er tir el kmo: “Ng diak kuusbech er kemiu.” (1 Ko. 12:21) Te bai mo medengei el kmo kede mengull er tir e mengreos er a basio er tir er a ongdibel.

15. Ngera el omelodech a mle kirir a rebebil el meruul me bo longlou er a omesiungir?

¹⁵ Ngar er aika el dirk mlo merek el rak, e a rebetok el publisher a mirruul a turrekong er tir el mo mesuub er a ta er a omelekoi me bo longlou er a omesiungir. Tia belkul a kmo ngkirir el meruul a omelodech er a klengar er tir. Tirka mla melukl el mora ongdibel el melekoi a ngodech el omelekoi el ousbech a ngeso el omerk er a klumech. (Rel. 16:9) Ngdi mle tir el melilt el meruul uaisei me bo longlou er a omesiungir el mora Jehovah. Me alta te ousbech er a kemanget el taem el mo medengelii a ta er a omelekoi, me nguaisei engdi ngklou a lengesuir er a ongdibel. A ungil blekerdelir me a experience er tir a melisiich er a ongdibel. Kede mera el mengreos er chouaitirka el rudam me a rudos!

16. Ngera olterekokl el kmo a odam a sebechel el mo ta er a remechuodel me a lechub e ngta er a mesiou er a ongdibel?

¹⁶ A chelechad er a remechuodel a diak el kirel lomdasu el kmo, a odam a dirkak bo lemeduch el melekoi a omelekinged me ngdiak el sebechel el mo mesiou el ta er a remechuodel me a lechub e ngta er a remesiou er a ongdibel. Ngbai merriter er a odam loltirakl er aike el lolekoi a Biblia el kirir a remechuodel me a remesiou er a ongdibel.​—1 Ti. 3:1-10, 12, 13; Tit. 1:5-9.

17. Ngera el omelilt a kirel a telungalek el meruul er ngii sel lolukl el mora ta er a beluu?

¹⁷ A bebil telungalek el Kristiano a mla melukl el mora ta er a beluu el mo osiik a osebechakl me a lechub e te osiik a ureor. Ngar chouaika el blekeradel, e a rengelekir a mora skuul el ousbech a omelekoi er sel beluu el lullukl el mo er ngii. A ruungalek a locha dirrek el kirir el suubii tia el omelekoi me bo lebetik a ureor. Me te mekerang a lsekum e ngar ngii a ongdibel me a lechub e ng group er tia el beluu el ngar er a omelekingir? Te mora ngera el ongdibel? Te mora ongdibel el ousbech a omelekoi er sel beluu me a lechub e ngongdibel el ngar er a omelekingir?

18. A doltirakl er a Galatia 6:5, e ngmekera dochotii el kmo kede mengull er a omelilt el bla lerellii a bdelul a telungalek?

¹⁸ Me a bdelul a telungalek a kirel el melilt el kmo te mora ngera el ongdibel. Tia el omelilt a kirel a telungalek er ngii me ngkirel melatk er sel mo kot el ungil el kirir. (Monguiu er a Galatia 6:5.) Kid a kired el mengull er a omelilt er ngii. A ngii di el omelilt el bo loruul, e ngkired el kongei er ngii e mo outkeu er a telungalek er ngii el meklou a ultutelir el chedal a ongdibel.​—Rom 15:7.

19. Ngera kirir a rebdelul a telungalek el kerekikl el meluluuch el kirel?

¹⁹ Ngar er a kuk bebil blekeradel, e a telungalek a locha ngar er a ongdibel el ousbech a omelekingel a chedam me a chedil, engdi a rengalek a diak lemeduch el melekoi er tia el  omelekoi. A lsekum tia el ongdibel el ngar er a omelekingir a ngar er a beluu el ngodech a omelekoi er ngii, e nglocha mo meringel er a rengalek el mo medengei a tekoi el losaod er a miting e diak bo lolengeriakl er a tekoi er a klereng. E ngera uchul? E le rengalek a mora skuul el ousbech a omelekoi er tia el beluu el diak el omelekingir a redemerir me a rederrir. Ngar chouaika el blekeradel, e a rebdelul a telungalek a kirir el mo kerekikl el meluluuch e melatk aike el lousbech a rengelekir me bo el sebechir el ngosuterir el mo kmeed er a Jehovah me a rechedal. Me ngmo kirir el ngosuterir a rengelekir el kmal mo medengelii a omelekingir me a lechub e te melukl el mora ongdibel el ousbech er a omelekoi el rengelekir a ungil medengelii. Me a omelilt a ngar er a bdelul a telungalek, me nguaisei engdi sel ongdibel el lengiltii a kirel rullii ngii me a telungalek er ngii el mo melechesuar el kmo te meklou a ultutelir.

20. Ngmekera dochotii el kmo kede mengull er a rudam me a rudos er kid el mesuub a beches el omelekoi?

²⁰ Me ngua ika el bla desaod, ngmo er ngii a rudam me a rudos el ngar er a betok el ongdibel, el tir a mo meringel er tir a suubii a beches el omelekoi. Nglocha mo diak lebeot er tir el louchais a uldesuir. Engdi a bo domes el engelakl er tiang, e kede mo mesa bltkil a rengrir el mora Jehovah me a urungulir el sorir el mesiou er ngii. Sel deues aika el klebokel el blekerdelir, e kede mo omes er tir el meklou a ultutelir. Ngdiak bo dolekoi er tir el kmo “Ng diak kuusbech er kemiu” e le tir el dirkak bo lemeduch el melekoi a omelekinged.

21-22. Ngera el ileakl el techall a dobang?

²¹ A Jehovah a mla meskid a kmal ileakl el techall el ngar ngii a basio er kid er a ongdibel. Me a desechal me a deredil, demesobil me a debechiil, demekekerei me a demeklou, me a dungil medengelii a omelekoi me a lechub e ngdiak, me kid a meklou a ultuteled er a osengel a Jehovah me a dirrek el osengir a rebebil.​—Rom 12:4, 5; Kol. 3:10, 11.

²² Mada dolemolem el oltaut aika el betok el ungil el bla desuub er a okesiu er a Paulus el kirel a bedenged a rechad. Seikid e ngmo sebeched el osiik a betok el rolel e kede kiresii a basio er kid me a dirrek el basio er a rebebil er a ongdibel er a Jehovah.