1. Wanem samting nao Jehovah givim lo each servant blo hem?

FROM Jehovah lovem iumi, hem givim each faithful servant blo hem wanfala ples insaed kongregeson blo hem. Nomata olketa waka wea iumi duim hem difren, evriwan important and evriwan needim each other. Aposol Paul helpem iumi for luksavve lo disfala important leson. Lo wanem wei?

2. Olsem Ephesus 4:16 storyim, why nao iumi need for tinghae lo each other and waka tugeta?

² Olsem theme scripture lo disfala article showimaot, Paul strongim hao no eniwan lo iumi shud luk lo nara servant blo Jehovah and sei, “Mi no needim iu.” (1 Cor. 12:21) For wanfala kongregeson hem garem peace, iumi mas tinghae lo each other and waka tugeta. (Readim Ephesus 4:16.) Taem iumi waka tugeta witim wan mind, kongregeson bae garem wan mind and evriwan showimaot love lo each other.

3. Wanem nao bae iumi storyim lo disfala article?

³ Wat nao samfala wei wea iumi savve showimaot respect lo olketa nara Christian insaed kongregeson? Lo disfala article, bae iumi story raonem hao olketa elder savve showimaot respect lo olketa nara elder. Then, bae iumi storyim hao nao evriwan savve showimaot olketa tinghae lo olketa brata and sista blo iumi wea no marit. And last samting, iumi bae lanem hao nao iumi savve showimaot iumi tinghae lo olketa wea no savve gud hao for story lo languis blo iumi.

4. Wanem kaonsel blo Paul wea stap lo Rome 12:10 nao olketa elder shud followim?

⁴ Evri elder lo kongregeson kasem appointment from holy spirit. Nomata olsem, evriwan garem olketa difren waka and hao olketa duim samting hem no semsem. (1 Cor. 12:17, 18) Samfala maet just kamap elder, so olketa no garem staka experience olsem olketa nara elder. Olketa narawan maet faendem hem hard for duim staka samting bikos olketa olo and health blo olketa hem no mas gud. Nomata olsem, no eni elder bae luk lo nara elder and sei, “Mi no needim iu.” Bat, each elder shud followim kaonsel blo Paul wea stap lo Rome 12:10.—Readim.

5. Hao nao olketa elder showimaot olketa respectim olketa nara elder, and why nao datwan hem important samting for olketa duim?

⁵ Olketa elder showim olketa respectim nara elder taem olketa lisin gud lo hem. Diswan hem important especially taem body of elders meet for story abaotem olketa important samting. Why nao olsem? The Watchtower blo October 1, 1988, hem sei: “Olketa elder luksavve hao Jesus Christ savve iusim holy spirit for helpem eni elder insaed datfala body of elders for tingim wanfala Bible principle for helpem olketa for deal witim eni situation or for mekem wanfala important disison. (Acts 15:6-15) Holy spirit savve helpem evri elder, hem no helpem wanfala lo olketa nomoa.”

6. Hao nao olketa elder savve waka tugeta witim wan mind, and hao nao datwan savve mekem kongregeson kasem gud samting?

⁶ Wanfala elder wea showimaot respect lo olketa nara elder, bae no kwiktaem for toktok taem olketa insaed meeting blo olketa elder. Winim wei for hem nomoa toktok evritaem, and tingse wanem hem tingim nomoa hem stret, hem bae evritaem talemaot tingting blo hem lo wei wea hem hambol. Hem bae lisin gud taem olketa narawan toktok. Samting wea moa important nao, hem bae laek for sharem olketa Bible principle and lisin lo direction wea kam from “datfala wakaman wea faithful and wise.” (Matt. 24:45-47) Taem olketa elder gohed for story, olketa duim datwan lo wei wea  showimaot love and respect. Taem olsem, holy spirit blo God bae stap witim olketa and bae helpem olketa for mekem olketa disison wea bae strongim kongregeson.—Jas. 3:17, 18.

7. Hao nao Jesus ting lo wei for singol?

⁷ Insaed lo olketa kongregeson distaem, iumi garem olketa marit couple and olketa famili. Bat iumi garem tu staka brata and sista wea no marit. Hao nao iumi shud ting lo olketa wea singol? Iumi shud followim example blo Jesus lo hao hem ting lo wei for singol. Taem hem stap lo earth, Jesus hem no marit. Hem gohed singol and from datwan hem garem staka taem for duim moa samting lo assignment blo hem. No enitaem Jesus teachim hao man mas marit or hem mas gohed singol. Bat hem sei samfala Christian olketa chus for no marit. (Matt. 19:11, 12.) Jesus respectim olketa wea no marit. Hem no lukdaonem olketa wea singol or tingse olketa missim samfala samting bikos olketa no marit.

8. Olsem 1 Corinth 7:7-9 storyim, wat nao Paul encouragem olketa Christian for ting raonem?

⁸ Olsem Jesus, aposol Paul hem gohed singol taem hem duim ministry blo hem. Paul no enitaem teachim hao hem rong for wanfala Christian for marit. Hem luksavve diswan hem disison blo man wanwan. Bat Paul still encouragem olketa Christian for ting raonem sapos olketa savve gohed singol for servem Jehovah. (Readim 1 Corinth 7:7-9.) Tru nao, Paul hem no lukdaonem olketa Christian wea singol. Hem chusim young Timothy wea hem singol brata for lukaftarem olketa big responsibility. * (Phil. 2:19-22) So hem no stret for ting dat wei wea wanfala brata qualify for duim wanfala waka, hem depend lo wei wea hem marit or singol.—1 Cor. 7:32-35, 38.

9. Wat nao iumi savve sei abaotem marit and wei for singol?

⁹ Jesus and Paul, tufala evriwan no teachim dat olketa Christian mas marit or mas gohed for singol. So wat nao bae iumi savve talem abaotem wei for marit and for singol? The Watchtower blo October 1, 2012, givim wanfala naes ansa for datwan, hem sei: “Really, [marit and wei for singol] tufala evriwan olsem present from God. . . . Jehovah hem no ting lo [wei for singol] olsem samting for shame lo hem or for sorre abaotem.” So taem iumi tingim datwan, iumi need for respectim  olketa brata and sista blo iumi lo kongregeson wea singol.

10. Hao nao iumi savve showimaot iumi respectim olketa singol brata and sista blo iumi?

¹⁰ Hao nao iumi savve showimaot iumi respectim feeling and situation blo olketa singol brata and sista blo iumi? Iumi shud evritaem tingim hao samfala singol brata or sista olketa disaed finis for no marit. Olketa nara singol brata or sista olketa laek marit, bat olketa no faendem samwan wea fitim olketa. Olketa narawan maet marit partner hem dae. Nomata wanem nao reason, waswe, hem fitim for olketa lo kongregeson askem datfala singol brata or sista why nao hem no marit, or trae helpem hem for faendem samwan for maritim? Hem tru, samfala singol brata or sista maet ask for datkaen help. Bat sapos hem no askem help, iu ting, hao nao bae feeling blo wanfala singol brata or sista sapos samwan duim olsem lo hem? (1 Thess. 4:11; 1 Tim. 5:13) Bae iumi storyim wanem olketa faithful singol brata and sista talem.

11-12. Hao nao iumi maet mekem olketa singol wan for feel discourage?

¹¹ Wanfala singol circuit overseer wea barava duim gud assignment blo hem, ting dat taem man hem singol hem savve kasem staka gud samting. Bat hem sei, samfala taem hem savve feel discourage taem olketa brata and sista wea laek for helpem hem, olketa ask olsem: “Why nao iu no marit?” Wanfala singol brata wea serve lo wanfala branch office hem sei: “Samfala taem, mi lukim hao olketa brata and sista ting dat olketa shud sorre lo olketa wea singol. Diswan mekem hem luk olsem wei for singol hem wanfala problem, and hem no wanfala present.”

¹² Wanfala singol sista wea serve lo Bethel hem sei: “Samfala pablisa tingse evriwan wea singol olketa laek for faendem samwan for maritim, or olketa ting dat enitaem wea pipol hipap hem chance for olketa singol wan faendem samwan. Wantaem, mi go lo nara part lo kantri for wanfala assignment. Datfala day wea mi arrive olketa garem meeting lo evening. Sista wea bae mi stap lo haos blo hem talem mi dat tufala brata lo kongregeson blo hem tufala sem age olsem mi. Hem sei dat hem no trae for stretem mi for samwan. Bat taem mifala kasem Kingdom Hall, hem pullim mi go for meetim tufala brata hia. Really, datwan hem mekem mi thrifala evriwan for feel nogud.”

13. Wanem example nao encouragem wanfala singol sista?

¹³ Nara singol sista wea serve lo Bethel sei: “Mi savve lo staka mature singol pioneer wea garem staka experience and wea tingim nomoa assignment blo olketa. Olketa willing for sakrifaesim seleva, olketa satisfae lo waka wea olketa duim, and olketa barava helpem kongregeson. Olketa garem balance tingting abaotem wei wea olketa singol, olketa no feel olsem olketa gud winim narawan bikos olketa singol, or ting daonem olketa seleva bikos olketa no garem marit partner or famili.” Taem evriwan tinghae and respectim each other insaed kongregeson, datwan mekem datfala kongregeson for barava luk naes. Iu no feel olsem olketa bae sorre or jealous lo iu, or les lo iu or haem iu. Iu bae barava feelim hao olketa lovem iu.

14. Hao nao iumi savve showimaot iumi respectim olketa singol wan?

¹⁴ Olketa singol brata and sista blo iumi bae hapi tumas sapos wei wea iumi tinghae lo olketa hem bikos lo gudfala wei blo olketa and no bikos olketa singol or marit. Winim wei for feel sorre lo olketa, iumi showimaot iumi tinghae lo wei wea olketa faithful. From datwan, olketa singol brata and sista blo iumi bae no feel dat iumi sei: “Mi no needim iu.” (1 Cor. 12:21)  Bat olketa bae savve dat iumi respectim olketa and tinghae lo ples blo olketa insaed lo kongregeson.

15. Wanem nao samfala change wea samfala duim mekem olketa savve duim moa samting lo ministry?

¹⁵ Lo olketa year wea go pas, staka pablisa markem goal for lanem nara languis mekem olketa savve duim moa samting lo ministry. For duim datwan olketa mas mekem staka change. Olketa brata and sista hia lusim kongregeson wea iusim languis blo olketa mekem olketa savve go serve lo kongregeson wea iusim nara languis wea needim help from olketa nara pablisa. (Acts 16:9) Diswan hem disison blo olketa seleva for duim moa samting lo ministry. Nomata hem bae tek longtaem for olketa story gud lo datfala niu languis, olketa duim staka gud samting. Gudfala wei blo olketa and experience blo olketa hem strongim kongregeson. Iumi tinghae lo sakrifaes wea olketa brata and sista hia duim!

16. Wanem nao olketa elder bae luk lo hem taem olketa ting for markem wanfala brata for serve olsem elder and ministerial servant lo kongregeson?

¹⁶ Body of elders shud no hol bak for recommendim wanfala brata for serve olsem elder or ministerial servant from hem no savve gud yet hao for story lo languis wea kongregeson iusim. Olketa elder bae iusim olketa mark wea stap lo olketa scripture lo Bible for luksavve sapos wanfala brata fit for kamap elder or ministerial servant, and olketa no lukluk lo wei wea hem savve gud hao for story lo languis wea kongregeson iusim.—1 Tim. 3:1-10, 12, 13; Titus 1:5-9.

17. Olketa wanem kwestin nao samfala famili mas ting raonem taem olketa muv go lo nara kantri?

¹⁷ Samfala famili maet muv go lo nara kantri bikos lo hard taem lo kantri blo olketa or for faendem waka for selen. Taem olketa samting olsem happen, pikinini blo olketa maet skul lo datfala niu kantri and iusim main languis blo datfala kantri. Parents tu maet need for lanem main languis lo datfala kantri mekem olketa savve faendem waka. Bat, waswe sapos wanfala kongregeson or grup hem stap lo languis blo olketa? Which kongregeson nao datfala famili shud attendim? Waswe, bae olketa go lo kongregeson wea story lo languis blo datfala kantri, or bae olketa go lo kongregeson wea iusim languis blo olketa?

18. Olsem Galatia 6:5 storyim, hao nao iumi savve respectim disison blo wanfala famili hed?

¹⁸ Famili hed bae disaed which kongregeson hem laekem famili blo hem for joinim. Diswan hem disison blo olketa seleva, hem mas tingim wanem nao best samting for famili blo hem. (Readim Galatia 6:5.) Iumi need for respectim disison blo famili hed. Nomata wanem nao hem disaedem, iumi acceptim disison blo hem lo wei wea iumi welkamim olketa for kamap part lo kongregeson blo iumi.—Rome 15:7.

19. Wanem nao olketa famili hed shud ting raonem and prea abaotem?

 ¹⁹ Lo nara situation, wanfala famili maet serve insaed lo wanfala kongregeson wea iusim languis blo parents, bat maet olketa pikinini no savve gud lo datfala languis. Sapos datfala kongregeson stap lo wanfala ples wea olketa iusim main languis blo kantri wea olketa stap, olketa pikinini maet stragol for minim wanem nao olketa herem lo meeting and bae olketa no gohed gud lo spiritual wei. Why nao olsem? Bikos olketa pikinini go lo skul and iusim languis lo datfala ples and olketa no iusim languis blo parents. Lo taem olsem, famili hed shud prea and ting raonem wanem olketa need for duim for helpem pikinini blo olketa for fren gud witim Jehovah and pipol blo hem. So maet parents need for helpem pikinini blo olketa for story lo languis blo olketa, or maet olketa need for muv lo kongregeson wea iusim languis wea olketa pikinini savve minim gud. Nomata wanem nao famili hed disaedem, olketa lo kongregeson wea olketa chus for muv lo hem shud mekem hem and famili blo hem for feel olsem olketa respectim and tinghae lo olketa.

20. Hao nao iumi savve showimaot iumi respectim olketa brata and sista blo iumi wea lanem wanfala niu languis?

²⁰ Olsem iumi storyim finis, samfala reason hem stap why staka kongregeson garem olketa brata and sista wea traem best for lanem wanfala niu languis. Hem maet hard for olketa storyim tingting blo olketa. Nomata olsem, taem iumi no luk nomoa lo wei wea olketa no savve hao for story gud lo languis blo iumi, bae iumi lukim dat olketa lovem Jehovah and barava laek for servem hem. Sapos iumi lukim olketa gudfala wei hia, bae iumi barava tinghae and respectim olketa brata and sista hia. Bae hem hard for iumi sei, “Mi no needim iu” just bikos olketa no savve story gud lo languis blo iumi.

21-22. Wanem nambawan privilege nao iumi garem?

²¹ Jehovah hem givim iumi wanfala nambawan privilege for garem ples insaed lo kongregeson blo hem. Nomata iumi man or woman, singol or marit, olo or young, iumi savve gud lo wanfala languis or nomoa, iumi spesol lo Jehovah and lo each other.—Rome 12:4, 5; Col. 3:10, 11.

²² Iumi laek gohed for followim staka leson wea iumi lanem from tokpiksa blo Paul abaotem wanfala body. Taem iumi duim olsem, iumi bae traem best for duim samfala samting moa for showimaot iumi tinghae lo ples wea iumi garem and wea olketa narawan garem insaed kongregeson blo Jehovah.