1. Dahme Siohwa ketikihong emenemen sapwellime ladu lelepek kan?

SIOHWA kin ni limpoak ketikihong emenemen sapwellime ladu lelepek kan nan sapwellime mwomwohdiso pwukoa kan. Mendahte atail pwukoa kan wekpeseng, kitail koaros kesempwal oh kitail koaros anahne emenemen. Wahnpoaron Pohl sewese kitail en wehwehki mehn kasukuhl kesempwal wet. Ia duwen?

2. Nin duwen me Episos 4:16 mahsanih, dahme kahrehda kitail anahne kesempwalki emenemen oh doadoahkpene?

² Nan iren Paipel me iren onop wet poahsoandahsang, Pohl kasalehda ni sansal me sohte emen kitail kak kilang sapwellimen Siohwa ladu teio oh nda: “I sohte anahne iuk.” (1 Kor. 12:21) Ma kitail men popohl en mie nan mwomwohdiso, kitail anahne kesempwalki emenemen oh doadoahkpene. (Wadek Episos 4:16.) Ni atail kin doadoahkpene ni minimin, koaros pahn kehn limpoak en meteikan oh mwomwohdiso pahn kehlailla.

3. Dahme kitail pahn koasoiapene nan iren onop wet?

³ Ni ahl dah kei me kitail kak kasalehda wahu ong Kristian teikan nan mwomwohdiso? Nan iren onop wet, kitail pahn koasoiapene ia duwen elder kan ar kak kasalehda arail wauneki iengarail elder teikan. Mwurin mwo, kitail pahn koasoiapene ia duwen kitail koaros kak kasalehda me kitail kesempwalki riatail Kristian kiripw kan. Oh kaimwisekala, kitail pahn sukuhlki ia duwen atail kak kasalehda atail wauneki irail kan me sohte uhdahn koahiek en lokaiahki atail lokaia.

4. Kaweid dahieu me Pohl kihda nan Rom 12:10 me elder kan anahne idawehn?

⁴ Elder kan koaros idihdida sang ni sawas en sapwellimen Siohwa manaman. Ahpw emenemen irail ahneki kisakis oh koahiek kan me wekpeseng. (1 Kor. 12:17, 18) Ele ekei irail ahpwtehn idihdida oh sohte uhdahn koahiek duwehte elder teikan. Ekei ele sohte kak wia soahng tohto pwehki re mahlahr oh kohwahki soumwahu. Ahpw elder men en dehr kilangwohng ienge elder teio oh nda, “I sohte anahne iuk.” Emenemen elder anahne idawehn ahn Pohl kaweid me kileldi nan Rom 12:10.​—Wadek.

5. Ia duwen elder kan ar kasalehda arail wauneki iengarail elder teikan, oh dahme kahrehda e kesempwal irail en wia met?

⁵ Elder kan kin kasalehda me re wauneki iengarail elder teikan sang ni arail kin rong kanahieng irail. Met uhdahn kesempwal ni elder kan nan ehu mwomwohdiso ar tuhpene pwehn koasoia ire kesempwal kan. Dahme kahrehda? Tehk dahme Kahn Iroir (lokaiahn wai) en October 1, 1988 koasoia: “Elder kan pahn wehwehki me Krais kak ketin doadoahngki sapwellimen Koht manaman pwehn kaweid madamadau en emen elder sang pwihnen elder ko, sohte lipilipil ihs, pwehn kihda kaweid en Paipel me anahn en apwalihala irair ehu, de pil wiahda pilipil kesempwal ehu. (Wiewia 15:6-15) Sapwellimen Koht manaman kin sewese elder kan koaros nan mwomwohdisou, ahpw kaidehn emente irail.”

6. Ia duwen elder kan ar kak doadoahkpene ni minimin, oh ia duwen mwomwohdiso eh kak paiekihda ni arail wia met?

⁶ Elder men me kin wauneki ienge elder kan sohte kin ahnsou koaros song en koasoi mahs ni mihting en elder kan. E sohte kin koasoakoasoi pali laud en ahnsou, oh e sohte kamehlele me dahme e medewe kin ahnsou koaros pwung. Ahpw e kin kasalehda eh madamadau ni aktikitik. E kin rong kanahieng dahme meteikan kin koasoia. Kesempwal sang met, e kin perenki ehukihong irail kaweid en Paipel kan oh idawehn kaweid en ‘ladu lelepek oh loalokongo.’ (Mad. 24:45-47) Ni elder kan ar koasoipene ni limpoak oh wahu, sapwellimen Koht manaman pahn ieiang irail, oh pahn kaweid  irail en wiahda pilipil kan me pahn kakehlakahda mwomwohdiso.​—Seims 3:17, 18.

7. Ia duwen Sises eh kin ketin kilangwohng me kiripw kan?

⁷ Nan sapwellimen Siohwa mwomwohdiso rahnwet, mie pwopwoud kan oh pil peneinei kan. Ahpw pil mie riatail Kristian kiripw kan. Ia duwen atail en kilangwohng irail me kiripw kan? Medewehla ia sapwellimen Sises madamadau ong irail pwukat. Sises ketin wia emen me kiripw oh ketin medemedewehte en ketikihong sapwellime ahnsou oh kehl ong sapwellime doadoahk. Sises sohte ketin medewe me Kristian men anahne pwopwoudida de sohte pwopwoudida. Ahpw e mahsanih me ekei Kristian pahn pilada en dehr pwopwoudida. (Mad. 19:11, 12) Sises kin ketin wauneki irail kan me sohte pwopwoud. E sohte ketin wiahki me kiripw kan me re sohte kesempwal duwehte me pwopwoud kan, de mie mehkot me re katihasang pwehki re sohte pwopwoudida.

8. Nin duwen me 1 Korint 7:7-9 mahsanih, dahme Pohl kangoangehki Kristian kan en medemedewe?

⁸ Duwehte Sises, wahnpoaron Pohl pil wia emen me kiripw ni eh kin wia eh doadoahk en kalohk. Pohl sohte kin medewe me e pahn sapwung Kristian men en pwopwoudida. E wehwehki me met wia pein ahn emenemen pilipil. Ahpw Pohl kangoange Kristian kan en medemedewe ma re kak papah Siohwa nin duwen me kiripw kei. (Wadek 1 Korint 7:7-9.) Uhdahno Pohl sohte kin medewe me Kristian kiripw kan sohte kesempwal duwehte me pwopwoud kan. E pilada mwahnakapwo Timoty, emen me kiripw, en apwalih pwukoa kesempwal kan. * (Pil. 2:19-22) Eri, sansal me e pahn sapwung en medewe me brother men uhdahn warohng en ale pwukoa kan de sohte warohng, ihte pwehki e pwopwoud de kiripw.​—1 Kor. 7:32-35, 38.

9. Dahme kitail kak ndahki duwen pwopwoudida oh kiripw?

⁹ Sises oh Pohl sohte padahngki me Kristian kan anahne pwopwoudida de dehr pwopwoudida. Eri, dahme kitail kak ndahki duwen pwopwoudida oh kiripw? Kahn Iroir (lokaiahn wai) en October 1, 2012 kihda pasapeng mwahu ong peidek wet. E koasoia: ‘Ni mehlel, kitail kak nda me pwopwoudida oh kiripw wia kisakis kei sang rehn Koht. . . . Siohwa sohte ketin medewe me me kiripw kan anahne namenengki de nsensuwedki arail sohte pwopwoudida.’ Pwehki met, kitail anahne wauneki riatail kiripw kan nan mwomwohdiso.

10. Ia duwen atail kak kasalehda atail wauneki riatail me kiripw kan?

 ¹⁰ Ia duwen atail kak kasalehda atail wauneki pepehm oh irair en riatail Kristian kiripw kan? Kitail anahne tamataman me ekei Kristian kiripw kan piladahr en sohte pwopwoudida. Ahpw ekei Kristian kiripw men pwopwoudida, ahpw re saikinte diar emen me re men pwoudiki. Oh ele ekei irail, arail pwoud melahr. Sohte lipilipil irair dah, e konehng irail kan nan mwomwohdiso en idek rehn Kristian kiripw kan dahme kahrehda re sohte pwopwoudida, de ma re anahne sawas en rapahkihda ihs me ren pwoudiki? Ei mehlel, ekei Kristian kiripw kakete anahne peki soangen sawas wet. Ahpw ma re sohte anahne peki sawas, ia pahn en me kiripw men eh pepehm ma emen pahn idek reh ma e anahne sawas en rapahki eh pwoud? (1 Des. 4:11; 1 Tim. 5:13) Kitail pahn tehkpene dahme ekei Kristian kiripw kan ndahki met.

11-12. Ia duwen atail kakete kahrehiong me kiripw kan en mworusala?

¹¹ Emen brother kiripw me wia sounapwalih me kin seiloak uhdahn koahiek nan eh pwukoa. E medewe me mie kamwahu tohto me kohsang eh kiripw. Ahpw e koasoia me e kin mworusala ni riatail Kristian kan ar song en sawas oh idek reh: “Dahme kahrehda ke sohte pwopwoud?” Emen brother kiripw sang ehu ohpis en Sounkadehdehn Siohwa kan nda: “Ekei pak I kak kilang me ekei riatail kan kin medewe me re anahne poakehla me kiripw kan. Met kak kahrehiong en mwomwen me en sohte pwopwoudida kin wia kahpwal ehu ahpw kaidehn kisakis ehu.”

¹² Emen sister kiripw me kin papah nan Pedel nda: “Ekei sounkalohk kin medewe me me kiripw kan koaros kin raparapahki ihs me ren pwoudiki, de me kiripw koaros kin wiahki ahnsoun mwemweit kan ahnsou mwahu en diar ihs me ren pwoudiki. Ehu pak ni ei seiloakla ehu wasa nan sahpwohte pwehki ei doadoahk en Pedel, I lella wasao nipwong ni rahnen mihting ehu. Sister me I pahn mi reho ndahng ie me mie brother riemen nan mwomwohdisou me ara sounpar duwehte ahi sounpar. E nda me e sohte songosong en sewese ie diar ihs me I pahn pwoudiki. Ahpw ni at lellahte nan Wasahn Kaudoko, e kahreiehla rehn brother riemeno pwe ien tuhwong ira. Met uhdahn kanamenekiehda oh pil brother riemeno.”

13. Mehn kahlemeng dah kan me kangoange emen sister kiripw?

¹³ Pil emen sister kiripw me kin papah nan Pedel nda: “I ese pioneer mah kan me wia aramas toupahrek kei. Re ahneki mehn akadei mwahu kan, perenki sewese meteikan, oh kin peren nan arail kin papah Koht. Irail kin wia sawas laud ong mwomwohdiso. Irail ahneki madamadau toupahrek duwen en sohte pwopwoudida. Re sohte kin medewe me re mwahusang meteikan pwehki re kiripw, de medewe me re sohte kak peren pwehki sohte arail pwoud de neirail seri.” Ihme kahrehda e uhdahn kaperen en mi nan mwomwohdiso ehu me koaros kin wauneki oh kesempwalki emenemen. Ke kin ese me riomw Kristian kan sohte kin poakehla de peirinkin uhk, re sohte kin pohnsehseiuk, oh re sohte kin medewe me ke mwahusang irail. Ke uhdahn ese me re kin poakohng uhk.

14. Ia duwen atail kak kasalehda me kitail kin wauneki me kiripw kan?

¹⁴ Riatail Kristian kiripw kan pahn kalahnganki ma kitail kin kesempwalki irail pwehki arail irair kaselel kan a kaidehn pwehki re sohte pwopwoud. Kitail en dehr poakehla me sohte arail pwoud, ahpw kitail en kalahnganki arail kin lelepek. Ni atail wia met, riatail Kristian kiripw kan sohte pahn medewe me kitail kin ndindaiong irail: “I sohte anahne iuk.” (1 Kor. 12:21) Ahpw irail pahn ese me kitail kin wauneki irail oh perenki me irail mi nan mwomwohdiso.

15. Wekidekla dah kan me ekei wiadahr pwehn kalaudehla arail doadoahk en kalohk?

¹⁵ Nan pahr neklahr ko, sounkalohk tohto wiahkihla arail mehn akadei en sukuhlki ehu lokaia tohrohr pwehn kalaudehla arail doadoahk en kalohk. Pwehn wia met, re anahne wiahda wekidekla kan. Riatail Kristian pwukat kin keseusang mwomwohdiso ehu me kin lokaiahki arail lokaia pwehn kohla papah nan ehu mwomwohdiso me kin lokaiahki ehu lokaia tohrohr, wasa me anahn laud mie ong sounkalohki Wehio kan. (Wiewia 16:9) Met wia pilipil ehu me irail pwukat wiadahr pwehn kalaudehla arail papah Siohwa. Mendahki re pahn nannanti erein sounpar kei pwehn esehla mwahu ehu lokaia kapw, re kin sewese mwomwohdiso ni ahl tohto. Arail mehn kahlemeng mwahu oh arail koahiek kan kin kangoange riatail kan nan mwomwohdiso. Kitail kin wauneki en riatail kan arail tounmetei!

16. Dahme pahn kasalehda me brother men kak wiahla emen elder de sounsawas men?

¹⁶ Elder kan en dehr koasoanehdi me brother men sohte kak wiahla emen elder de sounsawas men ihte pwehki e sohte koahiek en lokaiahki lokaia me mwomwohdiso kin doadoahngki. Elder kan pahn wiahda pilipil me poahsoandahsang dahme Paipel mahsanih duwen irair me konehng elder men oh sounsawas men en ahneki oh kaidehn ia uwen eh koahiek en lokaiahki lokaia me mwomwohdisou kin doadoahngki.​—1 Tim. 3:1-10, 12, 13; Taitus 1:5-9.

17. Dahme pahpa nohno kan anahne pilada ni ahnsou me irail keseula nan ehu sahpw?

¹⁷ Ekei peneinei Kristian kin keseula nan ehu sahpw pwehn kohkohsang irair apwal me kin wiawi nan arail wasa de pwehn rapahki doadoahk. Nan soangen irair wet, ele neirail seri kan pahn kohla sukuhl oh doadoahngki lokaiahn sahpw me re keseula ieo. Ele papaho oh nohnou pil anahne sukuhlki lokaiahn sahpwo pwe ira en diarada doadoahk. Ia duwen ma mie mwomwohdiso de pwihn ehu me kin doadoahngki arail lokaia nan sahpwo? Mehnia mwomwohdiso me re pahn iang? Me kin lokaiahki uhdahn arail lokaiao de me kin lokaiahki lokaiahn sahpw me re keseudo ieo?

18. Pwehn pahrekiong Kalesia 6:5, ia duwen atail kak kasalehda me kitail wauneki pilipil en tapwin peneinei ehu?

¹⁸ Tapwin peneineio pahn anahne pilada mehnia mwomwohdiso me eh peneineio pahn iang. E anahne pilada dahme keieu mwahu ong eh peneineio. (Wadek Kalesia 6:5.) Pwehki met wia pein en emen pilipil, kitail anahne wauneki pilipil en tapwin peneineio. Sohte lipilipil dahme e pilada, kitail en wauneki eh pilipilo oh kasamwo peneineio ong atail mwomwohdiso oh kasalehiong irail limpoak.​—Rom 15:7.

19. Dahme tapwin peneinei anahne medewe kanahieng oh kapakapki?

¹⁹ Nan ekei irair, ele ekei peneinei kin papah nan mwomwohdiso me kin lokaiahki lokaia me  arail pahpa oh nohno kin lokaiahki, ahpw seri ko sohte nohn koahiek en doadoahngki lokaiao. Ma mwomwohdiso wet mi nan kisin wasa ehu me kin lokaiahki lokaiahn sahpwo me irail keseula ie, ele e pahn apwal ong seri ko en wehwehki dahme wiewiawi nan mihting kan oh re kakete sohte karanihala Siohwa. Dahme kahrehda? Pwehki seri ko kakete iang sukuhl me kin doadoahngki lokaia me re esehla nan sukuhl ahpw kaidehn ahn arail pahpa oh nohnou lokaiao. Ni ahnsou me met wiawi, tapwin peneinei kan anahne medewe ni keneinei oh kapakapki erpit pwehn sewese irail en pilada dahme re anahne wia pwehn sewese neirail seri ko en karanihala Siohwa oh sapwellime aramas. Pahpa oh nohno kan pahn anahne padahkihong neirail seri ko en koahiekla lokaiahki uhdahn arail lokaiao de keseula nan mwomwohdiso me kin lokaiahki lokaia me neirail seri ko uhdahn kak wehwehki. Sohte lipilipil dahme tapwin peneineio pilada, mwomwohdiso me e pilada ren papah pahn anahne wauneki arail koasoandio oh kesempwalki.

20. Ia duwen atail kak kasalehda me kitail wauneki riatail Kristian kan me sukusukuhlki ehu lokaia kapw?

²⁰ Ong kahrepe kan koaros me kitail koasoiapenehr, e pahn mie riatail Kristian kan nan mwomwohdiso tohto me kin nannanti laud en esehla ehu lokaia kapw. E kakete apwal ong irail en kasalehda arail madamadau. Ahpw, ma kitail sohte kin medewehte mwomwen arail kin lokaiahki lokaia kapw me re sukusukuhlkio, kitail pahn kilang arail limpoak ong Siohwa oh arail ineng en men papah ih. Ma kitail kilang irair kaselel pwukat, atail kesempwalki oh wauneki irail pwukat pahn laudla. Kitail sohte pahn nda “I sohte anahne iuk” ihte pwehki re sohte koahiek en lokaiahki atail lokaia.

21-22. Pwais kaselel dahieu me kitail ahneki?

²¹ Kitail uhdahn kalahngankihong Siohwa eh ketikihong emenemen kitail doadoahk kesempwal en wia nan sapwellime mwomwohdiso. Mehnda ma kitail ohl de lih, kiripw de pwopwoud, pwulopwul de mah, de kitail koahiek en lokaiahki lokaia ehu de ekiste ese, kitail kesempwal rehn Siohwa oh pil rehn meteikan.​—Rom 12:4, 5; Kol. 3:10, 11.

²² Kitail en pousehlahte doadoahngki iren mehn kasukuhl kaselel kan me kitail sukuhlkier sang en Pohl karasaras en paliwar en aramas. Met pahn sewese kitail en tehk dahme kitail kak wia pwehn kangoange riatail Kristian kan. E pahn pil sewese kitail en kin ahnsou koaros poakohng oh wauneki irail.