1. ¿Imapaqmi taytanchik Jehovaqa sapakamata saqiwanchik?

TAYTANCHIK Jehovaqa llapallanchiktam kuyawanchik. Chayraykum sapakama imapipas yanapakunanchikpaq saqiwanchik. Sapakama mana chaynalla kaspanchikpas llapallanchikmi yanapanakunanchik. Chayna yanapanakunamantam apostol Pablopas yachachiwarqanchik.

2. Efesios 4:16 nisqanman hinaqa, ¿imanasqataq kuyanakuspa yanapanakunanchik?

² Apostol Pablopa nisqanman hinaqa, manam mayqan iñiqmasinchikmantapas nichwanchu “manam necesitanichu” nispaqa (1 Cor. 12:21). Iñiqmasinchikkunawan huk sunqulla kanapaqqa kuyanakuspam yanapanakunanchik (qaway Efesios 4:16). Huk sunqulla kaptinchikqa llapallan iñiqmasinchikkunam hawka hinaspa kusisqa tarikunqaku.

3. ¿Imakunamantam kay yachachikuypi yachasunchik?

³ Kay yachachikuypim yachasunchik, iñiqkunapi punta apaqkuna punta apaqmasinkuwan imayna kanankumanta. Yachasuntaqmi manaraq casarasqa iñiqmasinchikkunawan imayna kanamantapas. Chaymantapas yachasunmi rimayninchikta chayllaraq yachaq iñiqmasinchikkunawan imayna kanamanta.

4. ¿Imaynatam iñiqkunapi punta apaqkunaqa Romanos 12:10 nisqanta kasukunanku?

⁴ Iñiqkunapi llapallan punta apaqkunam Jehova Diospa atiyninwan churasqa kanku. Chaywanpas manam llapallankuchu chaynalla kanku (1 Cor. 12:17, 18). Ichapas wakiqninkuqa chayllaraq punta apaqkuna kanku, wakinkuñataqchá unqusqankurayku utaq yuyaqña kasqankurayku, hukkuna hinaqa mana yanapakuyta atinkuchu. Ichaqa, manam iñiqkunapi mayqan punta apaqpas punta apaqmasinkunamantaqa ninanchu “manam necesitanichu” nispaqa. Aswanqa apostol Pablopa ima nisqantam kasukunanku (qaway Romanos 12:10).

5. ¿Imatam iñiqkunapi punta apaqkunaqa ruwananku, hinaspapas imanasqataq chayqa ancha allin?

⁵ Iñiqkunapi punta apaqkunaqa punta apaqmasinkupa ima rimasqantam sumaqta uyarinanku. Astawanraqmi chayna kananku imatapas tantianankupaq huñunakuptinkuqa, ¿imanasqa? 1988 watapi octubre killapa 1 kaq punchawninpi lluqsimuq La Atalaya sutiyuq qillqam kaynata nin: “Iñiqkunapi punta apaqkunaqa manam iskayrayanankuchu imatapas tantianankupaq mayqin punta apaqtapas Jesus yanapananmantaqa. Jesusqa iñiqkunapi mayqan punta apaqtapas yanapanmanmi imatapas tantiananku kaptinqa (Hech. 15:6-15). Chayraykum punta apaqkunaqa llapallanku sumaqta uyariykanakunanku”, nispa.

6. (1) ¿Imataq iñiqkunapi punta apaqkunata yanapanqa punta apaqmasinkuwan huk sunqulla kanankupaq? (2) ¿Chayna kaptinkuqa imaynataq iñiqmasinkupas kanqaku?

⁶ Kuyakuq punta apaqqa, huñunakuyninku kaptinpas punta apaqmasinkuna rimarinantam saqinqa. Manataqmi paypa rimasqallan aswan allin kasqantachu ninqa. Chaymantapas mana hatun tukuspanmi imapas tantiasqanta rimarinqa. Sumaqtataqmi uyarinqa punta apaqmasinkunatapas. Chayna punta apaqqa bibliapa nisqanman hinam imatapas ruwanqa, hinaspapas allin yuyayniyuq  sirvientepa nisqantam kasukunqa (Mat. 24:45-47). Iñiqkunapi punta apaqkuna kuyakuywan uyariykanakuspa imatapas tantiaptinkuqa Jehova Diosmi yanapan. Chaynapim imapas tantiasqankuqa iñiqmasinkupa allinninpaq kanqa (Sant. 3:17, 18).

7. ¿Imatam Jesusqa nirqa mana casarasqa kaqkunamanta?

⁷ Huñunakusqanchikpi iñiqmasinchikkunaqa manam casarasqa hinaspa churi-wawayuqkunallachu kanku. Kankutaqmi sapallankuraq achka iñiqmasinchikkunapas. ¿Imaynataq paykunawan kananchik? Rimarisun Jesusmanta. Kay allpa pachapi kachkaspanqa manam haykakipas payqa casarakurqachu, hinaspapas tukuy tiemponwanmi taytanmanta willakurqa. Payqa manam haykapipas nirqachu iñiqkuna casarasqa kayninku aswan allin kasqanmantaqa nitaq sapallanku kayninku aswan allin kasqanmantaqa. Ichaqa nirqam wakin iñiqkuna mana casarakunankupaq kikinku tantiakunankumanta (Mat. 19:11, 12). Jesusqa sapallankuraq kaqkunataqa manam mana casarasqa kasqankuraykuchu mana allinpaq hapiq.

8. 1 Corintios 7 nisqanman hinaqa, ¿imapaqmi Pabloqa iñiqkunata kallpancharqa?

⁸ Jesus hinam apostol Pablopas mana casarakurqachu. Payqa manam haykapipas nirqachu casarakuy mana allin kasqantaqa. Payqa yacharqam casarakuyqa sapakamamanta kasqanta. Chaywanpas iñiqkunatam kallpancharqa mana casarakuspanku astawan Jehova Diosta servinankupaq (qaway 1 Corintios 7:7-9). Pabloqa manamá mana casarasqa kaqkunataqa mana allinpaqchu hapirqa. Chaymi Timoteotapas akllaykurqa yanapaqnin kananpaq (Filip. 2:19-22). * Chaynaqa, manamá allinchu kanman “casarasqa kaspanmi astawanqa yanapakunman” utaq “mana casarasqa kaspanmi astawanqa yanapakunman” niyqa (1 Cor. 7:32-35, 38).

9. ¿Imatam nichwan casarasqa hinaspa mana casarasqa kaymanta?

⁹ Manamá Jesusqa nitaq Pablopas nirqachu “casarakunaykichikpunim” utaq “sapallaykichikmi kanaykichik” nispaqa. Chaynaqa, ¿imatam nichwan casarasqa hinaspa mana casarasqa kaymanta? 2012 watapi octubre killapa 1 kaq punchawninpi lluqsimuq La Atalaya sutiyuq qillqam kaynata nin: “Casarasqa kaypas  utaq sapallanchik kaypas Diosmantam. [...] Jehova Diosqa sapallanchik kaytaqa manam pinqaypaqta hinachu qawan”, nispa. Ñuqanchikpas sapallankuraq kaq iñiqmasinchikkunataqa manamá hukmanyachinanchikchu.

10. ¿Imaynam kananchik mana casarasqa iñiqmasinchikkunawan?

¹⁰ Wakin iñiqmasinchikkunaqa kikinkum tantiakurunku mana casarakunankupaq. Wakinkuñataqmi casarakuyta munaspankupas mana kikinkupaq hinaqa tarinkuchu. Hukkunañataqmi warminku utaq qusanku wañukuptin sapallanku qiparunku. ¿Imaynam paykunawan kananchik? Manam tapunanchikchu imanasqa mana casarakusqankumantaqa nitaqmi maskapunanchikpaqpas ninanchikchu. Wakinpiqa ichapas yanapananchikpaq nichwan, ichaqa manaraq “yanapasqayki” nichkaspanchikmi yuyaymanananchik chay nisqanchikwan imayna tarikunanpi (1 Tes. 4:11; 1 Tim. 5:13). Qatiqninpi qawasun mana casarasqa iñiqmasinchikkunapa ima nisqankumanta.

11, 12. ¿Imakunawanmi sapallankuraq kaq iñiqmasinchikkunata hukmanyarachichwan?

¹¹ Llaqtan-llaqtan watukuq iñiqmasinchikmi nin sapallanraq kaynin ancha allin kasqanmanta. Ichaqa wakinpim hukmanyasqa tarikun iñiqmasinkuna tapuptin. Paykunam tapunku: “¿Imanasqataq mana casarakunkichu?”, nispa. Betelpi yanapakuq manaraq casarasqa iñiqmasinchikpas kaynatam willakun: “Wakinpim piensani manaraq casarasqa kaqkunamanta iñiqmasinchikkuna ‘¿imanasqataq manaraq casarakunkuraqchu?’ nispa nisqankuta, yaqapas mana casarakuy mana allin kachkanmanpas hina”, nispa.

¹² Betelpi yanapakuq manaraq casarasqa warmi iñiqmasinchikpas kaynatam nin: “Wakin iñiqmasinchikkunaqa piensankum sapallanraq kaqkunaqa llapallanku casarakuy munasqankuta. Piensankutaqmi kusirikuykuna kaptinqa casarakunankupaq warmita utaq qarita maskanankurayku risqankutapas. Huk kutipim niykuwarqaku karu llaqtapi huk llamkayta ruwaq rinaypaq. Hinaptinmi chayarurqani huñunakuyta ruwananku punchaw. Samapakunaypaq chaskiykuwaqniy iñiqmasinchikmi niwarqa huñunakusqanpi wiñaymasiy iskay musukuna kasqanmanta. Niwarqamá casarakunaypaq mana hikutawasqantaqa. Chaywanpas, huñunakuna wasiman yaykuykuptillaykum chay musu iñiqmasinchikkunaman pusawarqa riqsichiwananpaq. ¡Kimsaykumá pinqakuymanta pukayarqaniku!”, nispa.

13. ¿Iñiqmasinchikkunapa imayna kasqankutaq sapallanraq kaq iñiqmasinchikta kallpancharqa?

¹³ Betelpi yanapakuq warmi iñiqmasinchikñataqmi kaynata nin: “Diosmanta tukuy tiemponkuwan willakuq sapallankuraq iñiqmasinchikkunatam riqsini. Paykunaqa yuyayniyuqmi kanku, hinaspapas Diosmanta willakuyninkuta puntapi churaspankum kusisqa tarikunku. Iñiqmasinkutapas allintam yanapanku. Chaymantapas, manam aswan allinpaqchu hapikunku sapallankuraq kasqankuraykuqa. Manataqmi mana valeqpaq hinataqa hapikunkuchu mana casarasqa hinaspa mana wawa-churiyuq kasqankuraykuqa”, nispa. ¡Ancha kusisqamá tarikunchik kuyakuq iñiqmasinchikkunawan kaspaqa! Chayna iñiqmasinchikkunapiqa manamá pitapas aswan allinpaqqa hapinkuchu, nitaqmi pitapas pinqaymanqa churankuchu. Llapallankumá kuyasqa kanku.

14. ¿Imaynam kananchik manaraq casarasqa iñiqmasinchikkunawan?

¹⁴ Sapallankuraq kaq iñiqmasinchikkunaqa imapas allin ruwasqankumanta niykuptinchikmi kusisqa tarikunku. Chaynaqa, amayá paykunamantaqa nisunchu: “¿Imanasqaya  mana casarakunkuchu?”, nispaqa. Chaynata ninanchikmantaqa tukuy sunqunkuwan Diosta servisqankumantayá alabaykusun. Chaynata ruwaptinchikqa manamá haykapipas piensanqakuchu “manam necesitaykichu” nisqanchiktaqa (1 Cor. 12:21). Aswanqa yachanqakum anchata kuyasqanchikta.

15. ¿Imapaqtaq wakin iñiqmasinchikkuna tantiakurunku?

¹⁵ Kay watakunapiqa achka iñiqmasinchikkunam Diosmanta astawan willakunankurayku huk rimayta yachanankupaq tantiakurunku. Chaypaqmi chay rimaypi huñunakuq iñiqmasinchikkunapa kasqanman astakurunku (Hech. 16:9). Paykunaqa chay rimayta unaypi yachaspankupas imayna kasqankuwan hinaspa imapas ruway yachasqankuwanmi iñiqkunata anchata kallpanchanku. ¿Manachu kusisqa tarikunchik anchata kallpanchakusqankuwan?

16. ¿Imapa nisqanman hinataq iñiqkunapi punta apaqkunaqa tantiananku pipas punta apaq utaq yanapaqnin kanankupaqpas?

¹⁶ Ichapas iñiqkunapi punta apaq iñiqmasinchikkunaqa qari kaq iñiqmasinkumanta kaynata ninmanku: “Rimayninchikta manaraq allintapuni yachachkaspanqa manam kanmanchu punta apaqqa utaq paykunapa yanapaqninqa”, nispanku. Chaynata niyninkuqa manamá allinchu. Punta apaq utaq paykunapa yanapaqnin kanankupaqqa tantiananku bibliapa nisqanman hinam, manam chaypi rimayninkuta allinta yachasqanman hinachu (1 Tim. 3:1-10, 12, 13; Tito 1:5-9).

17. ¿Imatam allintapuni tantiananku huk law nacionman astakuq iñiqmasinchikkunaqa?

¹⁷ Wakin iñiqmasinchikkunam wawa-churintin huk law nacionman astakurunku llaqtankupi sasachakuy kasqanrayku utaq llamkayta maskasqankurayku. Ichapas chayrayku chay nacionpa rimayninta yachananku kanqa. Ichaqa, ¿imatam ruwanmanku kikinkupa rimayninkupi Diosmanta yachanapaq huñunakuy kaptinqa? ¿Mayqan huñunakuymantaq rinanku? ¿Kikinkupa rimayninkupi huñunakuymanchu, icha chay nacionpa rimayninpi huñunakuymanchu?

18. Galatas 6:5 nisqanman hinaqa, ¿imaynam kananchik ayllunkupi nanachikuqkuna imatapas tantiaptinkuqa?

¹⁸ Ayllunpi nanachikuqmi tantianan ima rimaypi huñunakuyman rinankupaqpas. Chaypaqqa ayllunpaq ima aswan allin kasqanpim tantianan (qaway Galatas 6:5). Chayqa sapakamamanta kasqanraykum ayllunpi nanachikuqpa ima tantiasqanmantaqa mana imatapas ninanchikchu. Chayraykum mayqan huñunakuyman hamuptinkupas kusikuywan chaskiykunanchik (Rom. 15:7).

19. ¿Imatam ayllupi nanachikuqkuna ruwananku churinku utaq wawanku kikinkupa rimayninkuta allinta mana yachaptinkuqa?

¹⁹ Wakin iñiqmasinchikkunaqa hina rimayninkupim  huñunakunku. Churi-wawankum ichaqa tayta mamankupa rimayninkutaqa allintaqa mana yachankuchu. Yaqapaschá huñunakuykunapi yachachikuykunataqa mana allintachu entiendenku. Hinaspapas manapaschá iñiyninkupiqa allintachu ñawparinku. Chayna kaptinqa ayllunpi nanachikuqmi Jehova Diosta mañakuspan tantianan churinkunata utaq wawankunata imaynata astawan yanapananpaq. Chaynapi tukuy sunqunkuwan Jehova Diosta kuyanankupaq. Chaypaqqa churi-wawankutam yachachinmanku kikinkupa rimayninkuta allinta yachanankupaq, utaqmi tantianmanku churi-wawankupa rimayninkupi huñunakuyman rinankupaq. Mayqan rimaypiña huñunakuyman rinankupaq tantiakuptinkupas iñiqkunaqa kuyakuywanmi chaskiykunanku.

20. ¿Imaynam kananchik rimayninchikta chayllaraq rimayta yachaqkunawan?

²⁰ Kaypi yachamusqanchikman hinam achka iñiqmasinchikkuna kallpanchakuchkanku huk rimayta yachanankupaq. Paykunaqa yaqapaschá rimayta sasachakunku. Ichaqa amayá chayraykuqa mana kaqpaqta hapispaqa pinqachisunchu. Aswanqa Jehova Diosta kuyasqankutawan tukuy sunqunkuwan serviy munasqankutayá qawasun. Chayta ruwaspaqa sunqumantam kuyasunchik. Manataqmi rimayninchikta allinta mana yachasqankuraykuqa nisunchu mana yanapakusqankutaqa.

21, 22. ¿Imamantam Jehova Diosta anchata agradecekunchik?

²¹ Jehova Diostam anchata agradecekunchik llapallanchik imapipas yanapakusqanchikmanta. Llapallanchiktamá Jehova Diosqa hinaspa iñiqmasinchikkunaqa kuyawanchik. Kuyawanchikmá qari utaq warmi kaptinchikpas, casarasqa utaq sapallanchik kaptinchikpas, musu-sipas utaq yuyaq kaptinchikpas hinaspa huk rimayta allinta utaq mana allinta yachaptinchikpas (Rom. 12:4, 5; Col. 3:10, 11).

²² Tukuytamá yacharunchik iñiqmasinchikkunata cuerpopa partenkunawan apostol Pablopa tupachisqanmantaqa. Chayman hina ruwaspaqa astawanmi kallpanchakusun iñiqmasinchikkunata kuyanapaq hinaspa yanapanapaq.