1. Со денѓа о Јехова секоле пле верно слугаске?

О ЈЕХОВА мангипаја денѓа секоле пле верно слугаске тхан ко лескоро собрание. Иако иси амен различна улоге, сарине сием скапоцена хем јекх јекхеске сием потребна. О апостол Павле поможинѓа аменге те хаљова кобор тано важно акава. Сар?

2. Спрема Ефешаните 4:16, соске ваљани те ценина амен јекх јекхеа хем заедно те соработина?

² Сар со дикхела пе таро стихо колесте сој темелими акаја статија, о Павле истакнинѓа кај никој амендар нашти те вакерел јавере Јеховаскере слугаске: „На ваљанеа манге“ (1. Кор. 12:21). Те шај те овел мир ко собрание, мора те ценина амен јекх јекхеа хем заедно те соработина. (Читин Ефешаните 4:16.) Кеда соработинаја ко јекхипе, секој ка осетинел пе мангло хем о собрание ка овел позорало.

3. Со ка дикха ки акаја статија?

³ Ко кола начинија шај те сикава кај поштујнаја е пхрален хем е пхењен ко собрание? Ки акаја статија ка дикха сар о старешине шај те сикавен кај поштујнена јекх јекхе. Пало адава, ка дикха сар шај сарине те сикава кај ценинаја са е пхрален хем е пхењен со нане ко брако. Хем ко крајо, ка дикха сар шај те сикава кај ценинаја околен со на керена шукар лафи ки амари чхиб.

4. Кова совет таро Римјаните 12:10 ваљани те шунен о старешине?

⁴ Са о старешине ко собрание тане именујме таро е Јеховаскоро свети дух. Ама, секоле јекхе лендар иси ле различна способностија (1. Кор. 12:17, 18). Несаве лендар шај тане неве хем нане лен доволно искуство сар о јавера старешине. Јавера шај нашти те керен бут адалеске сој пхуре или иси лен проблемија састипаја. Сепак, никој таро старешине на ваљани те мислинел кај било кова јавер старешина нане потребно. Наместо адава, секова старешина ваљани те шунел о совет е Павлескоро сој пишимо ко Римјаните 12:10. (Читин.)

5. Сар о старешине сикавена кај поштујнена е јавере старешинен, хем соске тано важно те керен адава?

⁵ О старешине сикавена кај поштујнена е јавере старешинен аѓаар со шукар шунена лен. Акава тано посебно важно кеда о старешине ко пле состанокија керена лафи башо важна буќа. Соске? Приметин со пишинела сине ки Стражарско кула таро 1 октомври 1988 берш: „О старешине ваљани те овен свесна кај о Христос, преку о свети дух, шај те поможинел било коле пхралеске таро старешинство те сетинел пе ко несаво библиско начело со ка поможинел ленге те аракхен решение баши несави ситуација или те анен важно одлука (Дела 15:6-15). О свети дух поможинела са е старешиненге таро собрание, а на само јекхеске“.

6. Со ка поможинел е старешиненге те соработинен ко јекхипе, хем сар адава користинела е собраниеске?

⁶ О старешина со поштујнела е јавере старешинен на мангела секогаш прво те вакерел пло мислење кеда иси лен состанок. На керела цело време лафи хем на мислинела кај секогаш ов тано ко право. Наместо адава, понизно хем скромно вакерела пло мислење. Ов шукар шунела кеда о јавера керена лафи. Сој панда поважно, ов секогаш трудинела пе те керел лафи башо библиска начелија хем те икерел пе ко упатствија таро „верно хем разборито робо“ (Мат. 24:45-47). Ако ко пумаре дискусие о старешине сикавена  мангипе хем поштујнена пе јекх јекхеа, о Девел ка дел лен пло свети дух хем ка водинел лен те анен одлуке кола со ка овен башо шукарипе е собраниескоро (Јак. 3:17, 18).

7. Сар дикхела сине о Исус ко адала со нане ко брако?

⁷ Авдиве ко христијанска собранија иси брачна парија хем несаве лендар или лен чхаве. Ама, иси хем бут пхраља хем пхења кола со нане ко брако. Сар ваљани те дикха ки ленде? Ваљани те овел амен сар е Исусескоро стави. Џикоте сине ки Пхув, о Исус на кхувѓа ко брако. Ов ачхило беќари хем посветинѓа пло време хем внимание ки пли задача. О Исус никогаш на вакерѓа кај некој ваљани те кхувел ко брако или те ачхол коркори те шај те овел христијани. Ама, вакерѓа кај несаве христијања ка одлучинен те на кхувен ко брако (Мат. 19:11, 12). О Исус поштујнела сине адален со нане ко брако. Ов на мислинела сине кај окола сој ко брако тане пошукар таро окола сој коркори или кај фалинела нешто ко живото околенге сој коркори.

8. Спрема 1. Коринќаните 7:7-9, ко со поттикнинѓа о Павле е христијанен?

⁸ Исто сар о Исус, о апостол Павле на сине женимо џикоте керела сине пли служба. О Павле никогаш на вакерѓа кај тано погрешно о христијања те кхувен ко брако. Сине свесно кај адаја тани лично бути. Сепак, поттикнинѓа е христијанен те размислинен дали шај те служинен е Јеховаске бизо те кхувен ко брако. (Читин 1. Коринќаните 7:7-9.) Сигурно, о Павле на мислинѓа кај о христијања со нане ко брако врединена похари таро адала сој ко брако. Уствари, ов денѓа важна одговорностија е Тимотееске, кова со на сине женимо * (Фил. 2:19-22). Значи погрешно тано те мислина кај дали јекх пхрал ка овел именујмо зависинела таро адава дали тано ко брако или на (1. Кор. 7:32-35, 38).

9. Со шај те вакера башо брако хем башо адава те ачховел пе коркори?

⁹ Ни о Исус ни о Павле на сикавѓе кај о христијања мора те кхувен ко брако или мора те ачховен коркори. Тегани со шај те вакера башо брако хем башо адава те ачховел пе коркори? Ки Стражарско кула таро 1 октомври 2012 берш пишинела сине: „Чаче, хем те овел пе ко брако хем те ачховел пе коркори тано поклон таро Девел... О Јехова на мислинела кај о мануша со нане ко брако ваљани те лаџан или те овен тажна башо адава“. Спрема  акава, ваљани те поштујна е пхрален хем е пхењен со нане ко брако.

10. Сар шај те сикава кај поштујнаја е пхрален хем е пхењен со нане ко брако?

¹⁰ Сар шај те сикава кај поштујнаја о чувствија амаре пхраленгере хем пхењенгере со нане ко брако? Шукар тано те на бистра кај амаре пхраља хем пхења тане коркори таро различна причине. На пример, некој свесно одлучинѓа те на кхувел ко брако. Јавера христијања мангена те кхувен ко брако, ама панда на аракхле некас со одговоринела ленге. А јаверендар муло ленгоро брачно партнери. Било сар, на би овела сине шукар о јавера таро собрание те пучен лен соске нане ко брако или те нудинен пе те поможинен ленге те аракхен брачно партнери. Џанѓола пе, несаве шај ка роден асавки помош. Ама, ако на родена асавки помош, сар шај те осетинен пе ако нудинаја амен те поможина ленге? (1. Сол. 4:11; 1. Тим. 5:13). Те дикха со вакерѓе несаве верна пхраља хем пхења со нане ко брако.

11-12. Сар шај те обесхрабрина околен со нане ко брако?

¹¹ Јекх покраинско надгледнико со нане женимо хем кова со шукар керела пли служба мислинела кај иси бут предностија те на овел пе ко брако. Сепак, вакерела кај понекогаш обесхрабринела пе кеда несаве пхраља хем пхења шукар намераја пучена ле: „Соске панда на сиан женимо?“ Јекх јавер пхрал кова со нане женимо хем служинела ки јекх подружница вакерѓа: „Понекогаш дикхава кај несаве пхраља хем пхења мислинена кај адала сој тане коркори тане жалибаске. Тари адаја причина, те на овел пе ко брако шај те изглединел сар проблеми, а на сар поклон“.

¹² Јекх пхен со нане ко брако хем служинела ко Бетел вакерѓа: „Несаве пхраља хем пхења мислинена кај сарине со нане ко брако родена брачно партнери или кај ко секова дружибе дикхена сар прилика те аракхен песке некас. Јекх пути сиум сине бичхалди ко јавер дело тари пхув баши несави задача поврзими мле бетелско службаја, хем ресљум и рат кеда сине состанок. И пхен колате со совава сине пхенѓа манге кај ко собрание иси дуј пхраља со иси лен мле берша. Иако вакерѓа манге кај нане ла намера те аракхел манге некас, одма само со кхувѓем ки дворана ингарѓа ман ки ленде те запознајна амен. Шај само те замислинен туменге кобор сине незгодно манге хем е дује пхраленге“.

13. Кастар сине охрабрими јекх пхен со нане ко брако?

¹³ Јекх јавер пхен со нане ко брако хем служинела ко Бетел вакерела: „Пенџарава попхуре пионерен со нане ко брако хем сој тане стабилна, иси лен јасна целија, спремна тане те поможинен е јаверенге хем бахтале тане. Ола бут поможинена ко собрание. Акале пхрален хем пхењен иси лен урамнотежено стави баши пумари ситуација — на мислинена кај тане пошукар таро јавера адалеске со нане ко брако, а ни на мислинена кај нашти те овен бахтале адалеске со нане лен брачно партнери или чхаве“. Чаче тано бут шукар те служине ко собрание коте со сарине поштујнена пе хем ценинена пе машкар песте. Џанеа кај тле пхраља хем пхења на жалинена тут или нане туке љубоморна. Исто аѓаар, на игнориринена тут или на мислинена кај сиан пошукар лендар. Едноставно џанеа кај мангена тут.

14. Сар шај те сикава кај поштујнаја адален со нане ко брако?

¹⁴ Амаре пхраља хем пхења со нане ко брако ка овен благодарна ако ценинаја лен башо ленгере шукар особине. Наместо те жалина лен адалеске со нане ко брако, ваљани те ценина лен адалеске сој тане верна е Јеховаске.  Аѓаар, ола нане те осетинен пе сар те пхене вакераја ленге: „На ваљанеа манге“ (1. Кор. 12:21). Наместо адава, ка џанен кај поштујнаја лен хем кај ценинаја ленгоро тхан ко собрание.

15. Саве промене керѓе несаве те шај те керен повише ки служба?

¹⁵ Ко последна берша, бут објавителија чхивѓе песке цел те сикљовен јавер чхиб те шај те служинен ки побари мера. Адалеске мора сине те керен бут промене ко пло живото. Акала пхраља хем пхења мукхле о собрание ки ленгири чхиб те шај те служинен ко собрание коте со керела пе лафи ки јавер чхиб хем коте со ваљанена повише објавителија (Дела 16:9). Ола коркори анѓе асавки одлука те шај панда повише те служинен е Јеховаске. Иако понекогаш ваљанена повише берша те шај те сикљовен шукар те керен лафи ки неви чхиб, ола ко бут начинија поможинена ко собрание. Пле шукар особиненцар хем искуствоја бут охрабринена е јаверен. Бут ценинаја акале самопожртвувана пхрален хем пхењен!

16. Таро со зависинела дали некој шај те овел препорачимо сар старешина или слуга-помошнико?

¹⁶ Ако јекх пхрал панда на керела шукар лафи ки чхиб со користинела о собрание, адава на значинела кај о старешине на ваљани те препорачинен ле сар старешина или слуга-помошнико. Кеда одлучинена дали те препорачинен ле башо акала одговорностија, о старешине на ваљани те дикхен кобор шукар пенџарела и чхиб, него дали исполнинела о библиска условија (1. Тим. 3:1-10, 12, 13; Тит 1:5-9).

17. Башо кола пучиба ваљани те размислинен о родителија кеда селинена пе пумаре фамилијаја ки јавер пхув?

¹⁷ Несаве христијања селинѓе пе заедно пле фамилијаја ки јавер пхув адалеске со живинена сине ко пхаре условија или мангле те аракхен бути. Тегани, ленгере чхаве џана ки школа ки чхиб тари адаја пхув. Веројатно о родителија да ка ваљани те сикљон адаја чхиб те шај те аракхен бути. Со шај те керен ако адатхе иси собрание или група ки ленгири чхиб? Дали и фамилија ваљани те џал ко собрание ки чхиб тари адаја пхув или ко собрание коте со керела пе ленгири чхиб лафи?

18. Ко склад е стихоја таро Галатите 6:5, сар шај те сикава кај поштујнаја и одлука е поглаварескири ки фамилија?

¹⁸ О поглавари ки фамилија мора те одлучинел ко кова собрание ка џал лескири фамилија. * Акаја тани лично бути, адалеске ов мора те размислинел сој најшукар лескере фамилијаке. (Читин Галатите 6:5.) Амен мора те поштујна лескири одлука. Било со те одлучинел, амен ваљани те прифатина лескири одлука аѓаар со ка кера ов хем лескири  фамилија те осетинен пе шукар ко собрание хем ка сикава кај мангаја лен (Рим. 15:7).

19. Башо со ваљани о поглавари ки фамилија шукар те размислинел хем те молинел пе?

¹⁹ Несаве фамилие шај служинена ко собрание коте со керела пе лафи ки чхиб е родителенгири, ама ленгере чхаве на керена шукар лафи ки адаја чхиб. Ако адава собрание тано ко подрачје коте со керела пе лафи ки официјално чхиб адале пхувјакири хем ако о чхаве џана ки школа ки адаја чхиб, шај ка овел ленге пхаро те хаљовен о состанокија хем те напредујнен духовно. Ко асавко случај, о поглавари ки фамилија ваљани шукар те размислинел хем те молинел пе баши мудрост те шај те поможинел пле чхавенге те овен попаше е Јеховаја хем лескере народоја. О родителија ка ваљани те поможинен пумаре чхавенге шукар те сикљон ленгири чхиб, или ка ваљани сар фамилија те џан ко собрание коте со керела пе лафи ки чхиб која со ленгере чхаве најшукар хаљовена ла. Бизи разлика која одлука ка анел о поглавари, о собрание коте со ка џан те служинен ваљани те ценинен хем те поштујнен ле хем лескере фамилија.

20. Сар шај те сикава кај поштујнаја амаре пхрален хем пхењен со сикљона неви чхиб?

²⁰ Факти тано кај, бизи разлика тари која причина, ко бут собранија иси пхраља хем пхења кола со бут трудинена пе те сикљон неви чхиб. Шај ленге пхаро те вакерен адава со мислинена. Ама ако на мислинаја само ко адава сар керена лафи ки адаја неви чхиб, ка дикха кај ола мангена е Јехова хем мангена те служинен леске. Ако дикхаја акала шуже особине ки ленде, бут ка ценина лен хем ка поштујна лен. Нане те вакера: „На ваљанеа манге“, само адалеске со на керена шукар лафи ки амари чхиб.

21-22. Сави чест иси амен?

²¹ Бут сием благодарна е Јеховаске со секаске амендар денѓа чест те овел амен тхан ко лескоро собрание. Бизи разлика дали сием мурш или џувли, ко брако или на, терне или пхуре или кераја шукар лафи ки јекх чхиб или на, сием скапоцена е Јеховаске хем јекх јекхеске (Рим. 12:4, 5; Кол. 3:10, 11).

²² Те трудина амен понадари да те применина о бут шуже поуке со сиклилем тари е Павлескири споредба башо манушикано тело. Акава ка поможинел аменге те ова свесна башо адава сар шај те охрабрина амаре пхрален хем пхењен. Исто аѓаар, ка поможинел аменге секогаш те манга лен хем те поштујна лен.