1. Kodi Yahova asaperekanji kuna atumiki ace akukhulupirika?

MWAUFUNI, Yahova asapasa basa atumiki ace akukhulupirika. Maseze ife tisacita mabasa akusiyana mu mpingo, tonsene ndife akufunika kakamwe. Mpostolo Paulu asatiphedza toera kubvesesa mwadidi ntsonga ineyi. Munjira ipi?

2. Mwakubverana na Aefesi 4:16, thangwi yanji tisafunika kulemedzana unango na ndzace na kuphata basa pabodzi?

² Pa lemba ya 1 Akorinto 12:21, Paulu agomezera kuti nee m’bodzi wa ife asafunika kuyang’ana ntumiki unango wa Yahova mbalonga kuti “ine nkhabe funa ciphedzo cako.” (1 Akor. 12:21) Khala ife tisafuna ntendere mu mpingo, tisafunika kulemedzana unango na ndzace. (Lerini Aefesi 4:16.) Tingaphata basa pabodzi mwakuphatana, onsene anaona kuti ndi akufuniwa, pontho mpingo unakhala wakuwanga.

3. Tinapfundzanji mu nsolo uno?

³ Ndi m’makhundu api akuti tinakwanisa kupangiza cilemedzo kuna abale na alongo anango mu mpingo? Mu nsolo uno, tinapfundza kuti akulu a mpingo anapangiza tani cilemedzo kuna akulu a mpingo andzawo. Buluka penepo, tinapfundza kuti tinapangiza tani cilemedzo kuna abale na alongo athu akuti nee amanga banja. Pakumalisa, ife tinapfundza kuti tinapangiza tani cilemedzo kuna ale akuti nee asalonga mwadidi cilongero cathu.

4. Ndi uphungu upi unagumanika pa Aroma 12:10 wakuti akulu a mpingo asafunika kuubvera?

⁴ Akulu a mpingo onsene asakhazikiswa na nzimu wakucena wa Yahova. M’bodzi na m’bodzi wa iwo ali na maluso akusiyana.  (1 Akor. 12:17, 18) Anango akhazikiswa cincino ninga akulu a mpingo, natenepa iwo nee ali na maluso mazinji ninga akulu a mpingo anango. Akulu a mpingo anango nee asakwanisa kucita pizinji thangwi ya kugwesera peno nyatwa za ungumi. Mbwenye nkulu wa mpingo nee asafunika kunyerezera kuti nkulu wa mpingo ndzace nee ndi wakufunika. M’mbuto mwace, akulu a mpingo onsene asafunika kubvera uphungu wa mpostolo Paulu unagumanika pa Aroma 12:10.—Lerini.

5. Kodi akulu a mpingo anapangiza tani kuti asalemedzana unango na ndzace, pontho thangwi yanji pyenepi ndi pyakufunika?

⁵ Akulu a mpingo anapangiza kuti asalemedza akulu ampingo andzawo mu kuabvesera mwadidi. Pyenepi ndi pyakufunika kakamwe makamaka mu ndzidzi unagumanyikana iwo toera kutsalakana pinthu pyakufunika pya mpingo. Thangwi yanji? Thangwi A Sentinela ya 1.° de Outubro de 1988 isalonga: “Akulu a mpingo asafunika kudziwa kuti Yezu anakwanisa kuphatisira nzimu wakucena toera kuphedza nkulu wa mpingo onsene kunyerezera midida ya m’Bhibhlya yakuti inaphedza nsoka wa akulu a mpingo toera kucita pinthu. (Mabasa 15:6-15) Nzimu wakucena usaphedza akulu a mpingo onsene, tayu basi ene nkulu wa mpingo m’bodzi.”

6. Ninji cinafuna kuphedza akulu a mpingo toera kuphata basa mwakubverana, pontho pyenepi pinaphedza tani mpingo?

⁶ Nkulu wa mpingo wakuti asalemedza akulu a mpingo andzace asasiya toera anango alongembo maonero awo, pontho nee asanyerezera kuti ndzidzi onsene maonero ace ndi adidi. Mbwenye iye asalonga maonero ace mwakucepeseka. Pontho iye asabvesera mwadidi andzace angapereka maonero. Kusiyapo pyenepi iye asaphatisira midida ya Bhibhlya, pontho asatowezera pitsogolero pya “m’bandazi wakukhulupirika na wandzeru.” (Mat. 24:45-47) Akulu a mpingo angapangiza ufuni na cilemedzo kuna unango na ndzace mu ndzidzi unacedza iwo thangwi ya pinthu pya mpingo, nzimu wa Mulungu usakhala na iwo, pontho usaatsogolera toera kucita pisankhulo pyakuti pinawangisa mpingo.—Tiya. 3:17, 18.

7. Kodi Yezu akhaona tani Akristu akuti nee amanga banja?

⁷ Mu mpingo Wacikristu lero musagumanika mabanja mazinji, pontho anango mwa iwo ali na ana. Pontho musagumanikambo abale na alongo azinji akuti nee amanga banja. Kodi ife tisafunika kuona tani abale na alongo anewa akuti adzati kumanga banja? Tisafunika kutowezera citsandzo ca Yezu munjira ikhaona iye anthu akuti nee akhadamanga banja. Pikhali iye pa dziko yapantsi, Yezu nee amanga banja. Iye apitiriza tenepo mbaikha manyerezero ace m’basa ikhacita iye. Yezu cipo alonga kuti Akristu asafunika kumanga banja peno nkhabe. Mbwenye iye alonga kuti Akristu anango asasankhula kukhonda kumanga banja. (Mat. 19:11, 12) Yezu akhalemedza ale akuti nee akhadamanga banja. Yezu nee akhaona kuti Akristu akumanga banja ndi akufunika kakamwe kupiringana Akristu akukhonda manga banja.

8. Mwakubverana na 1 Akorinto 7:7-9, kodi Paulu awangisa Akristu toera kunyerezeranji?

⁸ Ninga Yezu, mpostolo Paulu nee amanga banja mu ndzidzi ukhacita iye basa yakumwaza mphangwa. Paulu cipo alonga kuti Akristu nee asafunika kumanga banja. Iye akhadziwa kuti cisankhulo cakumanga banja ndi ca munthu paekha. Ngakhale tenepo, Paulu awangisa Akristu toera kunyerezera khala anakwanisa kutumikira Yahova nee kumanga banja. (Lerini 1 Akorinto 7:7-9.) Mwandimomwene, Paulu nee akhanyerezera kuti Akristu akumanga banja ndi akufunika kakamwe kupiringana Akristu akuti nee amanga banja. Mbidakhala kuti iye akhali na maonero anewa, nee mbadasankhula m’phale Timoti toera kucita pinthu pyakufunika kakamwe m’basa ya Yahova. * (Afil. 2:19-22) Natenepa nee ndi pyakuthema kulonga kuti m’bale anakwanisa kukhala na miyai mizinji yakutumikira basi ene khala ndi wakumanga banja peno wakukhonda kumanga banja.—1 Akor. 7:32-35, 38.

9. Tinalonganji thangwi ya kumanga banja na kukhonda manga banja?

⁹ Yezu na mpostolo Paulu nee pfundzisa kuti Akristu asafunika kumanga banja peno nee asafunika kumanga banja. Mphapo tinalonganji thangwi ya kumanga banja na kukhonda manga banja? A Sentinela ya 1.° de Outubro de 2012 yatawira mwadidi mbvundzo unoyu. Iyo yalonga: “Mwandimomwene, kukhala wakumanga banja peno wakukhonda kumanga banja pinakwanisa kukhala muoni wakubuluka kwa Mulungu. . . . Yahova nee asaona kuti ndi pyakupasa manyadzo  khala munthu nee amanga banja.” Na thangwi ineyi, ife tisafunika kulemedza abale na alongo akukhonda manga banja.

10. Tinapangiza tani cilemedzo kuna abale na alongo athu akuti nee amanga banja?

¹⁰ Tinapangiza tani cilemedzo thangwi ya mabvero na makhaliro a abale na alongo athu akuti nee amanga banja? Tisafunika kukumbuka kuti Akristu anango asankhula okha kukhonda manga banja. Akristu anango asafuna kumanga banja, mbwenye adzati kugumana munthu wakuthema. Anango panango ndi thangwi yakuti aferwa na ndzawo wa m’banja. Mwakukhonda tsalakana mathangwi anaacitisa kukhonda kumanga banja, ife nee tisafunika kuabvundzisa kuti thangwi yanji nee akumanga banja? Ndimomwene kuti Akristu anango asaphemba ciphedzo toera kugumana ndzawo kuti amange naye banja. Mphapo khala m’bale peno mulongo nee aphemba ciphedzo ceneci anapibva tani mungansakira munthu toera amange naye banja? (1 Ates. 4:11; 1 Tim. 5:13) Tendeni tione mafala adalonga abale na alongo anango akukhulupirika akuti nee amanga banja.

11-12. Thangwi yanji tisafunika kucita mphole-mphole na pinthu pinalonga ife na pinacita ife kuna Akristu akuti nee amanga banja?

¹¹ Muyang’aniri wa cisa unango wakukhonda manga banja wakuti asacita mwadidi basa yace alonga kuti asakhala na nkhombo zizinji thangwi ya kukhonda manga banja. Mbwenye ndi pyakutsukwalisa kudziwa kuti abale na alongo asambvundzisa kuti: “Thangwi yanji nee ukumanga banja?” M’bale unango wakukhonda manga banja anatumikira pa Bheteli alonga: “Midzidzi inango ndisaona kuti abale na alongo asanyerezera kuti ale akuti adzati kumanga banja asafunika kubverwa ntsisi. Pyenepi pinakwanisa kucitisa anthu kunyerezera kuti kukhala wakukhonda manga banja ndi nyatwa, tayu muoni.”

¹² Mulongo unango wakukhonda kumanga banja anatumikira pa Bheteli alonga: “Abale na alongo anango asanyerezera kuti anyakukhonda manga banja onsene asasaka munthu toera kumanga naye banja. Peno asanyerezera kuti anyakukhonda manga banja onsene angagumanika pa mwinji wa anthu asaona kuti mwai toera kugumana munthu wakumanga naye banja. Ntsiku inango ndacita ulendo toera kuenda kacita basa ya Bheteli ku mbuto inango, mbwenye ndafikira panyumba ya mulongo unango wakuti akhali na misonkhano ntsiku ineyi namasiku, pontho iye andipanga kuti mu mpingo mwawo muli na abale awiri akuti akhali na thunga yanga. Iye andipanga kuti nee ndiri kukusakira munthu toera umange naye banja. Mbwenye pidapita ife mu Nyumba ya Umambo iye acemera abale anewa awiri toera ndidziwane nawo. Mwakukhonda penula, pyenepi pikhali pyakupasa manyadzo kakamwe kuna ine na kuna abale anewa awiri.”

13. Ndi citsandzo cipi cidawangisa mulongo m’bodzi wakukhonda kumanga banja?

¹³ Mulongo unango wakukhonda kumanga banja wakuti asatumikira pa Bheteli alonga: “Ine ndisadziwa apainiya akukhonda kumanga banja akuti ndi akulu kupiringana ine, mbwenye ali na maonero adidi, ali dzololo toera kuphedza anango, pontho ndi akutsandzaya. Iwo asaphedzera kakamwe toera mpingo ukhale wakuwanga. Iwo nee asanyerezera kuti ndi akufunika kakamwe peno akukhonda kufunika thangwi yakukhonda kumanga banja, pontho nee asakhala akutsukwala thangwi yakukhonda kumanga banja.” Pyenepi ndipyo pinacitisa mpingo kukhala wakutsandzayisa thangwi onsene asaona kuti ndi akulemedzwa na akufunika. Thangwi munthu onsene asadziwa kuti ali na basa yace.

14. Tinapangiza tani kuti tisalemedza abale na alongo akukhonda kumanga banja?

¹⁴ Abale na alongo akukhonda kumanga banja asakomerwa kakamwe angalemedzwa thangwi ya makhaliro awo adidi, tayu thangwi yakukhonda kumanga banja. M’mbuto mwakuabvera ntsisi thangwi yakukhonda kumanga banja, ife  tisafunika kupereka takhuta thangwi ya kukhala kwawo akukhulupirika. Tingacita pyenepi, iwo nee ananyerezera kuti tikuapanga: “Ine nkhabe funa ciphedzo canu.” (1 Akor. 12:21) Mbwenye iwo anadzaona kuti tisaalemedza, pontho tisapereka takhuta thangwi ya basa inacita iwo mu mpingo.

15. Ndi macinjo api anacita abale na alongo anango toera kucita pizinji m’basa yakumwaza mphangwa?

¹⁵ Mu pyaka pya cincino, amwazi mphangwa azinji asapfundza cilongero cinango toera akwanise kucita pizinji m’basa yakumwaza mphangwa. Toera kucita pyenepi, iwo asafunika kucita macinjo mu umaso wawo. Abale na alongo anewa asasiya mpingo unalongwa cilongero cawo mbaenda ku mpingo unalongwa cilongero cinango wakuti usafuna amwazi mphangwa azinji. (Mabasa 16:9) Iwo asacita macinjo anewa toera akwanise kucita pizinji m’basa ya Yahova. Maseze asamala pyaka pizinji toera kulonga mwadidi cilongero cinango, mbwenye iwo asaphedza mpingo munjira zizinji. Makhaliro awo adidi na maluso awo asawangisa abale na alongo mu mpingo. Mwakukhonda penula abale na alongo anewa ndi akufunika kakamwe kwa ife.

16. Akulu a mpingo asafunika kuphatisiranji pakusankhula m’bale toera atumikire ninga nkulu wa mpingo peno ntumiki wakutumikira?

¹⁶ Nsoka wa akulu a mpingo nee usafunika kucalira kusankhula m’bale adathema toera kutumikira ninga nkulu wa mpingo peno ntumiki wakutumikira, basi ene thangwi nee asakwanisa kulonga mwadidi cilongero ca mpingo. Mbwenye iwo asafunika kuphatisira Malemba toera kuona khala m’bale athema kutumikira ninga nkulu wa mpingo peno ntumiki wakutumikira.—1 Tim. 3:1-10, 12, 13; Tito 1:5-9.

17. Ndi pisankhulo pipi pyakuti mabanja Acikristu asafunika kupicita angaenda kakhala ku dziko inango?

¹⁷ Mabanja anango Acikristu asafuluka mbaenda ku dziko inango thangwi ya kunentsa kwa makhaliro a dziko yawo peno toera kusaka basa. Na thangwi ineyi, panango anawo anapfundza xikola yakuti isalongwa cilongero ca dziko ineyi. Anyakubala panango anafunikambo kupfundza cilongero ca dziko ineyi toera kugumana basa. Mphapo ndiye tani khala mu dziko ineyi muli na mpingo peno nsoka wakuti usalonga cilongero ca banja ineyi? Kodi iwo asafunika kusonkhana kupi? Kodi iwo asafunika kusonkhana mu mpingo wa cilongero ca dziko ineyi peno wa cilongero ca dziko yawo?

18. Mwakubverana na Agalata 6:5, tinapangiza tani kuti tisalemedza cisankhulo ca nsolo wa banja?

¹⁸ Ndi nsolo wa banja usafunika kucita cisankhulo ca mpingo unafuna kusonkhana banja yace. Nakuti ceneci ndi cisankhulo ca munthu paekha, nsolo wa banja usafunika kuona kuti ndi pinthu pipi pinafuna kuphedza banja yace. (Lerini Agalata 6:5.) Ife tisafunika kulemedza cisankhulo cinacita nsolo wa banja. Mwakukhonda kutsalakana cisankhulo cinacita nsolo wa banja, ife tisafunika kulemedza cisankhulo cace  mbatitambira na manja mawiri banja ineyi mu mpingo mwathu.—Aroma 15:7.

19. Kodi nsolo wa banja usafunika kucitanji mbudzati kucita cisankhulo cakuti cinaphedza banja yace?

¹⁹ Mabanja anango panango anasonkhana mu mpingo wa cilongero cawo, mbwenye anawo panango nee asalonga mwadidi cilongero ceneci. Khala mpingo wa cilongero ca anyakubala usagumanika mu cisa cakuti cisalongwa cilongero ca dziko ineyi, panango pinakhala pyakunentsa kuna anapiana toera kubvesera misonkhano na kuthambaruka mwauzimu. Thangwi yanji? Thangwi kuxikola iwo asapfundza cilongero ca dziko ineyi tayu ca anyakubala awo. Pyenepi pingacitika, nsolo wa banja asafunika kuphemba udziwisi wa Yahova toera akwanise kucita cisankhulo cakuti cinaphedza anawo kukhala na uxamwali wakuwanga na Yahova na atumiki ace. Anyakubala asafunika kupfundzisa anawo toera kudziwa mwadidi cilongero cawo peno kucinja mpingo mbaenda ku mpingo wa cilongero cakuti anawo anacibvesesa mwadidi. Mwakukhonda kutsalakana cisankhulo cinafuna kucita nsolo wa banja, abale na alongo a mpingo udasankhula iwo asafunika kuatambira mwadidi na kualemedza.

20. Tinapangiza tani kuti tisalemedza abale na alongo anapfundza cilongero cinango?

²⁰ Na mathangwi onsene adalonga ife, m’mipingo mizinji muli na abale na alongo akuti asawangisira kakamwe toera kupfundza cilongero cinango. Panango pinakhala pyakunentsa kwa iwo toera kulonga pinanyerezera iwo. Mbwenye ife tinganyerezera kuwangisira kunacita iwo toera kulonga cilongero cipswa, tinaona kuti iwo asafuna kakamwe Yahova, pontho asafuna kuntumikira. Tingayesera kuona makhaliro awo adidi, tinakomerwa na iwo mbatialemedza kakamwe. Pontho nee tinalonga kuti “ine nkhabe funa ciphedzo canu” thangwi nee musalonga mwadidi cilongero cathu.

21-22. Thangwi yanji ife tisapereka takhuta kakamwe kuna Yahova?

²¹ Ife tisapereka takhuta kakamwe kuna Yahova thangwi ya kutipasa basa mu mpingo wace. Mwakukhonda tsalakana khala ndife mamuna peno nkazi, wakumanga banja peno wakukhonda manga banja, nkhalamba peno m’phale, khala tisalonga mwadidi cilongero peno nkhabe, tonsene ndife akufunika kakamwe kuna Yahova na kuna unango na ndzace.—Aroma 12:4, 5; Akol. 3:10, 11.

²² Tendeni tipitirize kuphatisira pyonsene pidapfundza ife kubulukira mu citsandzo cidaphatisira mpostolo Paulu. Pyenepi pinatiphedza toera kucita pyonsene pinakwanisa ife toera kuwangisa abale na alongo athu. Pontho pinatiphedzambo toera kuafuna na kualemedza ndzidzi onsene.