1. Nyen la Jéhovah amû na awakua be-ta-zo ti lo oko oko kue?

NDOYE apusu Jéhovah ti mû na awakua ti lo so ayeke be-ta-zo kue mbeni place na yâ ti congrégation ti lo. Atâa so akua ti e ayeke nde nde, e kue e yeke ye ti ngangu ngere nga e bezoin mba. Bazengele Paul amû maboko na e ti hinga kpengba ye ti manda so. Na lege wa?

2. Ti gue oko na aÉphésien 4:16, ngbanga ti nyen la e bezoin ti bâ mba na nene ni nga ti sara kua legeoko?

² Na yâ ti versê so amû li ti article so, Paul afa polele so zo oko na popo ti e alingbi pëpe ti bâ mbeni mba ti lo wakua ti Jéhovah na ti tene na lo: “Mbi yeke na bezoin ti mo pëpe.” (1 aCor. 12:21). Tongana e ye ti tene congrégation aduti na siriri, a lingbi e bâ amba ti e na nene ni nga e sara kua legeoko. (Diko aÉphésien 4:16.) Tongana e sara kua legeoko na yâ ti mango terê, congrégation ayeke kpengba nga azo kue ayeke ndoye terê.

3. Aye wa la e yeke bâ ande na yâ ti article so?

³ Na yâ ti ambeni ye wa la e lingbi ti fa so e ne amba ti e aChrétien na yâ ti congrégation? Na yâ ti article so, e yeke bâ ande tongana nyen la a-ancien alingbi ti fa so ala bâ mba na nene ni. Na pekoni, e yeke bâ tongana nyen la e kue e lingbi ti fa so e bâ aita ti e so asara mariage ape na nene ni. Na nda ni, e yeke bâ tongana nyen la e lingbi ti fa so e bâ aita so atene yanga ti kodro ti e nzoni ape na nene ni.

4. Wango ti Paul wa la ayeke na aRomain 12:10 so a lingbi a-ancien amû peko ni?

⁴ A yeke na lege ti yingo vulu ti Jéhovah la a zia a-ancien kue na yâ ti congrégation. Ye oko, akode ti a-ancien oko oko kue ayeke nde nde (1 aCor. 12:17, 18). Peut-être ambeni aga a-ancien ade ti ninga ape, tongaso ade ala hinga ye mingi na ndö ti kua ni tongana ti ambeni mba ti ala ape. Peut-être ambeni alingbi ti sara kua mingi ape ndali ti ngu ti ala wala ndali ti kpale ti seni. Ye oko, a lingbi mbeni ancien abâ pëpe mbeni mba ti lo ancien mo bâ mo tene lo tene na lo: “Mbi yeke na bezoin ti mo pëpe.” Me a lingbi a-ancien oko oko kue amû peko ti wango ti Paul so ayeke na aRomain 12:10.—Diko ni.

5. Tongana nyen la a-ancien ayeke fa so ala ne amba ti ala a-ancien? Ngbanga ti nyen la a yeke kota ye ti tene ala ne mba?

⁵ A-ancien ayeke fa so ala ne amba ti ala a-ancien na lege so ala dengi mê nzoni ti mä mba. Ye so ayeke kota ye mingi mbilimbili na ngoi so a-ancien awara terê ti bâ ambeni kota tënë. Ngbanga ti nyen? Tour ti Ba Ndo ti lango 1 ti octobre, ngu 1988, na Français, atene: “A-ancien ahinga so Christ alingbi ti sara kua na yingo vulu ti mû maboko na a-ancien kue ti yâ ti congrégation ti fa mbeni mama-ndia ti Bible so ayeke mû maboko na ala ti hinga ye so ala yeke sara na yâ ti aye nde nde wala ti mû mbeni kpengba desizion (Kus. 15:6-15). Yingo vulu ayeke mû maboko na a-ancien kue ti congrégation, me gï na mbeni oko ape.”

6. Tongana nyen la a-ancien alingbi ti sara kua legeoko na yâ ti mango terê? Tongana ala sara ni congrégation ayeke bâ nzoni dä tongana nyen?

⁶ Na ngoi ti abungbi ti a-ancien, mbeni ancien so ane amba ti lo a-ancien ayeke gi lakue pëpe ti sara tënë kozo. Lo yeke sara tënë ahon ndö ni ape, nga lo yeke bâ pëpe so gï bango ndo ti lo la ayeke lakue nzoni. Me lo yeke fa abango ndo ti lo na mbeni lege so afa so lo sara terê ti lo kete. Lo yeke mä nzoni atënë so amba ti lo atene. Ye so ayeke kota mingi ayeke so lo yeke nduru ti fa amama-ndia ti Bible nga ti mû peko ti fango lege ti “ngbâa be-ta-zo so ayeke sara ye na ndara”. (Mat. 24:45-47). Tongana a-ancien asara ye na ndoye nga ala ne mba na ngoi so  ala yeke sara lisoro na ndö ti mbeni tënë, yingo vulu ti Nzapa ayeke duti na ala nga ayeke fa na ala ti mû adesizion so ayeke kpengba congrégation.—Jacq. 3:17, 18.

7. Jésus abâ lani dutingo kumbamba tongana nyen?

⁷ Na yâ ti congrégation laso, mo yeke wara azo so asara mariage awe nga ambeni na popo ti ala ayeke na amolenge. Ye oko, mo yeke wara nga aita mingi so asara mariage ape. A lingbi e bâ aita so ayeke akumbamba so tongana nyen? Gbu li na ndö ti bango ndo ti Jésus na ndö ti dutingo kumbamba. Na ngoi so Jésus asara kua ti fango tënë ti lo na sese, lo sara mariage ape. Lo ngbâ kumbamba nga lo mû ngoi ti lo mingi ndali ti kua so a mû na lo nga lo zia li ti lo na ndö ni. Jésus afa lâ oko ape so a lingbi zo asara mariage wala lo duti kumbamba. Ye oko, lo tene so ambeni Chrétien ayeke soro ti sara mariage ape (Mat. 19:11, 12). Jésus abâ na nene ni azo so asara mariage ape. Lo bâ lani pëpe akumbamba tongana azo so ayeke na gbe ni wala azo so mbeni ye amanke ala.

8. Ti gue oko na 1 aCorinthien 7:7-9, nyen la Paul awa aChrétien ti gbu li dä?

⁸ Legeoko tongana Jésus, bazengele Paul asara lani kua ti lo ti fango tënë sân ti sara mariage. Paul afa lâ oko ape so a yeke sioni ti tene mbeni Chrétien asara mariage. Lo hinga lani so a yeke na zo oko oko ti bâ. Me lo wa aChrétien ti bâ wala ala lingbi ti sara na Jéhovah na dutingo kumbamba. (Diko 1 aCorinthien 7:7-9.) Kite ayeke dä ape so Paul abâ lani pëpe aChrétien so ayeke akumbamba tongana ambumbuse zo. Lo soro lani maseka Timothée, so ayeke kumbamba, ti sara akota kua. * (aPhil. 2:19-22). Tongaso, a yeke polele so a yeke duti na lege ni ape ti pensé so mbeni ita-koli alingbi ti sara mbeni kua na yâ ti bungbi wala lo lingbi ti sara ni ape gï ndali ti so lo sara mariage wala pëpe.—1 aCor. 7:32-35, 38.

9. E lingbi ti tene nyen na ndö ti sarango mariage nga na dutingo kumbamba?

⁹ Jésus wala Paul afa lâ oko ape so aChrétien adoit gï ti sara mariage wala ala doit gï ti ngbâ kumbamba. Tongaso, e lingbi ti tene nyen na ndö ti sarango mariage nga na dutingo kumbamba? Tour ti Ba Ndo ti lango 1 ti octobre ngu 2012, na Français, amû pendere kiringo tënë so: “Biani, [ti sara mariage nga ti duti kumbamba] use kue ayeke mbeni matabisi so alondo  na Nzapa. . . . Jéhovah abâ pëpe [dutingo kumbamba] tongana mbeni ye so asara zo kamene wala vundu.” Tongaso, a lingbi e ne aita so ayeke akumbamba na yâ ti congrégation.

10. Tongana nyen la e lingbi ti bâ na nene ni aita ti e so ayeke akumbamba?

¹⁰ Tongana nyen la e lingbi ti bâ na nene ni atënë ti bê ti aita so ayeke akumbamba? A yeke nzoni e girisa ape so a yeke ndali ti araison nde nde la aita angbâ akumbamba. Na tapande, ambeni Chrétien so ayeke akumbamba amû desizion ala wani ti sara mariage ape. Ambeni aye ti sara mariage, me ade ala wara zo so alingbi na ala ape. Me peut-être ambeni aperdre koli wala wali ti ala. Atâa raison ni ayeke so wa, eskê a yeke na lege ni ti tene aita ti congrégation ahunda aChrétien so ayeke akumbamba ndani so ala sara mariage ape wala ti hunda ti mû maboko na ala ti wara mbeni zo ti sara mariage na lo? Biani, ambeni Chrétien so ayeke akumbamba alingbi ti hunda mara ti mungo maboko so. Me tongana ala hunda ni ape, si e sara ni ayeke sara ala tongana nyen? (1 aThes. 4:11; 1 Tim. 5:13). Zia e bâ ambeni tënë so aita kumbamba so ayeke be-ta-zo atene.

11-12. Tongana nyen la e lingbi ti découragé aita so ayeke akumbamba?

¹¹ Mbeni surveillant ti circonscription so asara kua ti lo nzoni mingi so ayeke kumbamba abâ so dutingo kumbamba aga na aye ti nzoni mingi. Me lo tene so zo alingbi ti découragé tongana na sioni bê ape aita ahunda lo, atene: “Ngbanga ti nyen la mo sara mariage ape?” Mbeni ita-koli so ayeke kumbamba so ayeke sara kua na Béthel atene: “Na ambeni ngoi, mbi bâ so ambeni ita apensé so ala doit ti bâ mawa ti akumbamba. Ye so alingbi ti sara si zo abâ so dutingo kumbamba ayeke mbeni kpale me pëpe mbeni matabisi.”

¹² Mbeni ita-wali kumbamba so ayeke sara kua na Béthel atene: “Ambeni ita apensé so akumbamba kue ayeke gi mbeni zo ti sara mariage na lo wala akumbamba kue abâ ngoi ti ngia tongana mbeni ngoi ti warango mbeni zo ti sara mariage na lo. Mbeni lâ na ngoi so mbi voyagé mbi gue na mbeni kete gbata ti sara kua so a mû na mbi, mbi si na lakui so bungbi ayeke dä. Ita-wali so mbi lango na ndo ti lo atene na mbi so aita-koli use so ngu ti mbi na ala oko ayeke na yâ ti congrégation ni. Lo tene na mbi so lo yeke gi ti mû na mbi mbeni koli ape. Me gï so e lï na yâ ti Da ti Royaume, lo gue na mbi ti wara terê na aita-koli use so. Ye so asara si kamene asara mbi na aita-koli ni kue mingi.”

13. Atapande ti azo wa la akpengba mbeni ita-wali kumbamba?

¹³ Mbeni ita-wali kumbamba ni nde so ayeke sara kua na Béthel atene: “Mbi hinga apionnier so ayeke akumbamba so ngu ti ala ague na li ni so ahinga ti bâ yâ ti aye nzoni, so aye so ala zia na gbele ala ayeke polele, so ayeke nduru ti mû maboko na azo nga so ayeke na ngia. Ala mû maboko mingi na congrégation. Ala yeke na nzoni bango ndo na ndö ti dutingo kumbamba ti ala, ala bâ ape so ala yeke nzoni ahon amba ti ala ndali ti so ala ngbâ kumbamba wala vundu asara ala ape ndali ti so ala yeke na koli wala wali ape nga ala yeke na amolenge ape.” A yeke ndani la a nzere mingi ti duti na yâ ti congrégation so azo kue abâ mba na nene ni. Mo hinga so aita ti mo asara mawa ti mo ape nga ala sara kota bê na terê ti mo ape, ala sara sanka ti mo ape nga ala bâ pëpe so mo yeke nzoni ahon ala. Mo hinga gï so ala ye mo.

14. Tongana nyen la e lingbi ti fa so e bâ akumbamba na nene ni?

¹⁴ Aita ti e so ayeke akumbamba ayeke kiri singila na e tongana e bâ ala na nene ni ndali ti anzoni sarango ye ti ala me pëpe ndali ti so ala  sara mariage wala ala sara mariage ape. Ahon ti tene e sara mawa ti ala, a yeke nzoni e bâ ala na nene ni ndali ti dutingo be-ta-zo ti ala. Ye so ayeke sara si aita ti e so ayeke akumbamba ayeke bâ lâ oko ape so e yeke tene na ala, e tene: “Mbi yeke na bezoin ti ala pëpe.” (1 aCor. 12:21). Me ala yeke hinga so e bâ ala na nene ni nga e yeke na ngia so ala yeke na yâ ti congrégation.

15. Achangement wa la ambeni ita asara ti fa tënë mingi?

¹⁵ Na yâ ti angu so ahon ade ti ninga ape, awafango tënë mingi azia na gbele ala ti manda mbeni yanga ti kodro nde tongaso si ala lingbi ti fa tënë mingi. Ti sara ni, a lingbi ala sara achangement na yâ ti fini ti ala. Aita so azia congrégation ti yanga ti kodro ti ala ti gue ti sara kua na yâ ti congrégation ti mbeni yanga ti kodro nde so a bezoin awafango tënë mingi dä (Kus. 16:9). Aita so amû desizion so ala wani ti mû lege na ala ti sara kua ti Jéhovah mingi. Atâa so ti tene fini yanga ti kodro ni nzoni alingbi ti ninga, ala sara anzoni kua mingi. Anzoni sarango ye ti ala nga na aye so ala hinga ayeke kpengba aita ti congrégation. E bâ na nene ni aita so asara asacrifice so.

16. Nyen la ayeke fa so mbeni ita alingbi ti ga ancien wala wakua ti mungo maboko?

¹⁶ Mbeni bungbi ti a-ancien ayeke tene ape so ala yeke mû pëpe mbeni ita ti ga ancien wala wakua ti mungo maboko gï ndali ti so lo hinga pëpe ti tene yanga ti kodro ti congrégation ni nzoni. A-ancien ayeke bâ ita ni alingbi na aye so Bible ahunda ndali ti a-ancien nga na awakua ti mungo maboko me pëpe alingbi na fason so lo yeke tene na yanga ti kodro ti congrégation ni.—1 Tim. 3:1-10, 12, 13; Tite 1:5-9.

17. Nyen la ababâ na amama abezoin ti mû desizion na ndö ni tongana ala na sewa ti ala ague na mbeni kodro nde?

¹⁷ Ambeni sewa so ayeke aChrétien ague na mbeni kodro ti bata terê ti ala wala ti gi kua. Na yâ ti aye tongaso, peut-être a yeke fa ye na amolenge ti ala na ekole na yanga ti kodro so a yeke tene ni mingi na yâ ti fini kodro ni. Peut-être ababâ na amama ni nga abezoin ti manda yanga ti kodro ni ti mû lege na ala ti wara kua. Ka tongana mbeni congrégation wala mbeni groupe ayeke dä na yanga ti kodro ti ala? Congrégation wa la sewa ni ayeke gue dä? A yeke nzoni ala gue na congrégation ti yanga ti kodro so a yeke tene ni mingi na yâ ti kodro ni wala na congrégation ti yanga ti kodro ti ala?

18. Ti gue oko na aGalate 6:5, tongana nyen la e lingbi ti fa so e bâ na nene ni desizion ti mbeni mokonzi ti sewa?

¹⁸ A lingbi mokonzi ti sewa ni asoro congrégation so sewa ti lo ayeke gue dä. Ndali ti so a yeke mbeni tënë so abâ sewa ni, a lingbi lo gbu li na ndö ti ye so ayeke nzoni mingi ndali ti sewa ti lo. (Diko aGalate 6:5.) A lingbi e bâ na nene ni desizion ti mokonzi ti sewa ni. Atâa desizion wa la lo mû, a lingbi e yeda na ni na lege  so e yamba azo ti sewa ni nga e ye ala.—aRom. 15:7.

19. Nyen la a lingbi amokonzi ti sewa agbu li nzoni na ndö ni nga ala sambela ndali ni?

¹⁹ Peut-être ambeni sewa ayeke sara bungbi na yâ ti congrégation ti yanga ti kodro ti ababâ na amama ni, me peut-être amolenge ti ala ayeke tene yanga ti kodro ni nzoni ape. Tongana congrégation so sewa ni ayeke gue dä ayeke na ndo so a yeke tene yanga ti kodro ti fini ndo ni dä, a lingbi ti duti kete ye ape na amolenge ni ti mä yâ ti aye so a yeke fa na bungbi nga ti maï na lege ti yingo. Ngbanga ti nyen? Ngbanga ti so peut-être amolenge ni ayeke gue na mbeni ekole so a tene yanga ti kodro ti fini ndo ni me pëpe yanga ti kodro ti babâ na mama ti ala. Tongana ye tongaso asi, a lingbi amokonzi ti sewa agbu li nzoni nga ala sambela ti wara ndara so ayeke mû maboko na ala ti mû desizion na ndö ti ye so alingbi ti mû maboko na amolenge ti ala ti ga nduru mingi na Jéhovah nga na azo ti lo. Ababâ na amama abezoin ti fa na amolenge ti ala ti tene yanga ti kodro ti ala nzoni wala ti gue na congrégation so a tene yanga ti kodro so amolenge ni amä yâ ni nzoni. Atâa desizion wa la mokonzi ti sewa ni amû, congrégation so lo soro ti tene ala gue dä adoit ti sara si lo na sewa ti lo abâ so a ne ala.

20. Tongana nyen la e lingbi ti fa so e ne aita so angbâ ti manda mbeni fini yanga ti kodro?

²⁰ Ndali ti araison kue so e fa fade, na yâ ti acongrégation mingi, mo yeke wara aita so ayeke sara ngangu ti manda mbeni fini yanga ti kodro. A lingbi ti duti ngangu na ala ti fa apensé ti ala. Ye oko, tongana e bâ gï pëpe fason so ala yeke tene na fini yanga ti kodro ni, e yeke bâ so ala ye Jéhovah mingi nga ala ye mingi ti sara na lo. Tongana e bâ apendere sarango ye so, e yeke bâ aita so na nene ni mingi. E yeke tene ape, e tene “mbi yeke na bezoin ti ala pëpe” gï ndali ti so ala tene yanga ti kodro ti e nzoni ape.

21-22. Pendere pasa wa la e yeke na ni?

²¹ Jéhovah amû na e pendere pasa ti duti na mbeni place na yâ ti congrégation ti lo. Atâa e yeke koli wala wali, kumbamba wala e sara mariage, maseka wala kangba wala e tene mbeni yanga ti kodro nzoni wala nzoni ape, Jéhovah nga na amba ti e abâ e na nene ni mingi.—aRom. 12:4, 5; aCol. 3:10, 11.

²² Zia e ngbâ ti sara ye alingbi na apendere ye ti manda ti yâ ti tapande ti Paul na ndö ti terê ti zo. Tongana e sara tongaso, a yeke mû maboko na e ti bâ aye so e lingbi ti sara ti kpengba aita ti e. A yeke mû nga maboko na e ti ye ala nga ti ne ala lakue.