1. O le ā ua tuuina e Ieova i ana auauna faamaoni taʻitoʻatasi?

O LE alofa o Ieova ua ia tuuina ai i ana auauna faamaoni taʻitoʻatasi o latou tulaga i lana faapotopotoga. E ui e eseese a tatou matafaioi, ae e matuā tāua i tatou uma ma e manaʻomia e le tasi le isi. O lea, ua fesoasoani mai le aposetolo o Paulo ia tatou amanaʻia lenei lesona tāua. E faapefea?

2. E tusa ai o le Efeso 4:16, aiseā e manaʻomia ai ona matuā faatāua e le tasi le isi ma galulue faatasi?

² I le mau autū o lenei suʻesuʻega, na faamatilatila ai e Paulo le manatu, e leai se tasi o i tatou e mafai ona faapea atu i le isi auauna a Ieova: “E leai sou aogā iā te aʻu.” (1 Kori. 12:21) O lea, pe a tatou mananaʻo ia filemu le faapotopotoga, e tatau ona matuā faatāua e le tasi le isi ma ia galulue faatasi. (Faitau le Efeso 4:16.) Pe a tatou galulue faatasi i le autasi, o le a faamalosia le faapotopotoga ma atiaʻe ai i le alofa.

3. O le ā o le a tatou talanoaina i lenei mataupu?

³ O ā nisi o auala e tatou te faaalia ai le faaaloalo i isi Kerisiano o le faapotopotoga? O le a tatou talanoaina i lenei mataupu le auala e faaalia ai e toeaina le faaaloalo i isi toeaina. O le a tatou talanoaina ai foʻi le auala e faaalia atu ai, e matuā tāua iā i tatou o tatou uso ma tuafāfine nofofua. O le a aʻoaʻoina ai foʻi i tatou i le auala e tatou te faaalia ai le talisapaia o i  latou e lē lelei la latou tautatala i la tatou gagana.

4. O le ā le fautuaga a Paulo o loo i le Roma 12:10 e tatau i toeaina ona mulimuli ai?

⁴ Na tofia e le agaga paia o Ieova toeaina uma o le faapotopotoga. Peitaʻi, e eseese uma o latou tomai ma agavaa. (1 Kori. 12:17, 18) O nisi faatoʻā avea ma toeaina ma e itiiti lo latou poto masani. O nisi ua faatapulaa mea e mafai ona latou faia, ona ua loa lo latou soifua ma ua aafia i maʻi o le tino. E ui i lea, e leai se toeaina e mafai ona faapea atu i le isi toeaina: “E leai sou aogā iā te aʻu.” O lea, e tatau i toeaina taʻitoʻatasi ona mulimuli i le fautuaga a le aposetolo o Paulo o loo faamauina i le Roma 12:10.​—Faitau.

5. E faapefea ona faaalia e toeaina le faaaloalo i isi toeaina, ma aiseā e tāua ai lo latou faia faapea?

⁵ E faaalia e toeaina le faaaloalo i isi toeaina e ala i le faalogologo lelei iā i latou. E tāua tele le faia faapea pe a fono toeaina e talanoa ni mataupu tāua. Aiseā? Seʻi mātau le manatu o loo i Le Olomatamata faa-Peretania o Oketopa 1, 1988: “E amanaʻia e toeaina, e faaaogā e Keriso le agaga paia e fesoasoani ai i so o se toeaina e mafaufau ai i mataupu silisili e manaʻomia e le ʻautoeaina, ina ia fesoasoani ai iā i latou e iloa le mea e fai pe a feagai ma so o se tulaga e tulaʻi mai, pe faia foʻi se filifiliga tāua. (Galu. 15:6-15) E fesoasoani le agaga paia i toeaina uma o le faapotopotoga, ae e lē na o se toeaina se toʻatasi.”

6. E faapefea ona galulue ma le autasi toeaina, ma e faapefea ona aogā i le faapotopotoga lo latou faia faapea?

⁶ O se toeaina e faaaloalo i isi toeaina, e lē fai ma ana masani le faaali muamua atu o ona manatu pe a faia fono a le ʻautoeaina. E lē taumafai e faaali atu ona manatu i taimi uma, ma e lē manatu o ia e saʻo i taimi uma mea e fai atu ai. Ae e lotomaulalo ma faamaulalo i le auala e faaali atu ai ona manatu. E faalogologo lelei atu i manatu o isi. Ae e sili ona tāua e naunau o ia e faasoa atu mataupu silisili mai  i le Tusi Paia, ma gauaʻi atu i taʻitaʻiga a “le pologa faamaoni ma le faautauta.” (Mata. 24:45-47) Pe a talanoaina e toeaina mataupu i se auala alofa ma faaaloalo, o le a faatasi le agaga paia ma i latou ma taʻitaʻia ai i latou e fai faaiʻuga e faamalosia ai le faapotopotoga.​—Iako. 3:17, 18.

7. O le ā le silasila a Iesu i le nofofua?

⁷ O faapotopotoga i aso nei, e aofia ai ulugalii faaipoipo ma aiga. Ae e aofia ai foʻi uso ma tuafāfine nofofua. O le ā le vaaiga e tatau ona iā i tatou e faatatau i ē nofofua? Seʻi o tatou iloiloina le silafaga a le Atua e faatatau i ē nofofua. E leʻi faaipoipo Iesu a o fai lana faiva i le lalolagi. Na nofofua pea o ia ma faaaogā lona taimi e uaʻi atu ai i lona tofiga. E leʻi aʻoaʻo atu e Iesu e manaʻomia e se Kerisiano ona faaipoipo pe e nofofua foʻi. Peitaʻi, na ia fetalai o le a filifili nisi Kerisiano e lē faaipoipo. (Mata. 19:11, 12) Na faaaloalo Iesu i ē nofofua. E leʻi manatu faatauvaa Iesu i ē nofofua, ma faapea e iai se mea o loo misia i o latou olaga ona e leʻi faaipoipo.

8. E tusa ai o le 1 Korinito 7:7-9, o le ā na faalaeiau e Paulo Kerisiano e iloilo?

⁸ Na pei foʻi Paulo o Iesu, na nofofua a o fai lana faiva. E leʻi aʻoaʻoina e Paulo e sesē le faaipoipo o se Kerisiano. Na ia iloa o lenei mataupu o le filifiliga lava lenā a le tagata. Peitaʻi, na faalaeiau pea e Paulo Kerisiano e iloilo pe e mafai ona latou auauna iā Ieova o ni ē e nofofua. (Faitau le 1 Korinito 7:7-9.) E mautinoa e leʻi vaai maulalo Paulo i Kerisiano nofofua, auā na ia filifilia le talavou o Timoteo, o se uso nofofua e faia ni tofiga tāua i le auaunaga iā Ieova. * (Fili. 2:19-22) O lea la, ua manino mai, e sesē pe a tatou manatu e na o le pau le auala e fua i ai le agavaa po o le lē agavaa o se uso i se faaeaga, ona ua faaipoipo pe e leai foʻi.​—1 Kori. 7:32-35, 38.

9. O le ā so tatou manatu e faatatau i le faaipoipo ma le nofofua?

⁹ E leʻi aʻoaʻoina e Iesu po o Paulo, e tatau i Kerisiano ona faaipoipo pe e nofofua. O lea, o le ā so tatou manatu e faatatau i le faaipoipo ma le nofofua? O loo taʻua i Le Olomatamata o Oketopa 1, 2012, “O le mea moni, o nei tulaga uma [faaipoipo ma le nofofua] o ni meaalofa mai i le Atua. . . . Ae e tusa ai o le tulaga  nofofua, e lē silasila i ai Ieova o se tulaga e māsiasi ai.” O lea la, e tatau ona tatou faaaloalo i tulaga o uso ma tuafāfine nofofua i le faapotopotoga.

10. E faapefea ona tatou faaalia le faaaloalo i o tatou uso ma tuafāfine nofofua?

¹⁰ E faapefea ona tatou faaalia le faaaloalo i faalogona ma tulaga o tatou uso ma tuafāfine nofofua? E lelei ona tatou manatua, o nisi o Kerisiano nofofua ua avea ma o latou sini le lē faaipoipo. O nisi Kerisiano e mananaʻo e faaipoipo, ae e latou te leʻi mauaina se paaga talafeagai. A o nisi ua maliliu a latou paaga faaipoipo. Po o le ā lava le māfuaaga, ae pe e talafeagai i se uso po o se tuafafine ona fesili atu i se Kerisiano nofofua pe aiseā ua lē faaipoipo ai, pe e ofo atu foʻi lana fesoasoani e saʻili sana paaga? Atonu e talosaga atu se Kerisiano nofofua mo lenā fesoasoani. Ae pe afai e lē o talosaga atu mo se fesoasoani, o ā ni faalogona o uso ma tuafāfine nofofua pe a e ofo atu lenā ituaiga fesoasoani? (1 Tesa. 4:11; 1 Timo. 5:13) Seʻi tatou iloiloina nisi o faamatalaga mai i Kerisiano nofofua faamaoni.

11-12. E ono faapefea ona tatou faavaivaia ē nofofua?

¹¹ E manatu se ovasia matagaluega nofofua ma e maelega i lona tofiga, e tele aogā o le nofofua. Peitaʻi, e na te lagona le lotovaivai pe a fesili atu uso ma tuafāfine iā te ia: “Aiseā ua e lē faaipoipo ai?” e ui e lelei o latou faanaunauga na māfua ai ona fesili. Ua faapea mai se uso nofofua o loo auauna i se ofisa o le lālā: “O nisi taimi ona o tala a uso ma tuafāfine ou te lagona ai le misialofa i ē nofofua. O lea, ua foliga mai ai o se avega mamafa le nofofua nai lo o se meaalofa.”

¹² Ua faapea mai se tuafafine nofofua o loo auauna i le Peteli: “E manatu nisi tagata talaʻi, o tagata nofofua uma o loo saʻili ni a latou paaga, po o tagata nofofua uma foʻi e latou te vaai i faatasitasiga faasamasamanoa uma o ni avanoa e suʻe ai ni a latou paaga. Na iai se aso na ou malaga ai i se isi itu o le atunuu ona o se galuega na tofia ai aʻu e le Peteli, ma na ou taunuu i le pō o le sauniga. Na taʻu mai e le tuafafine lea na ou nofo ai, e iai uso e toʻalua i le faapotopotoga e matou te tupulaga. Na ia faamautinoa mai e na te lē o taumafai e suʻe saʻu paaga. Ae o le taimi lava na ma taunuu ai i le Maota mo Sauniga, na ia ave aʻu e faafeiloaʻi i uso e toʻalua. O le mea moni, o se tulaga na matuā ou māsiasi ai ma e faapena foʻi i uso.”

13. O ā faaaʻoaʻoga na faalaeiauina ai se tuafafine nofofua?

¹³ Na mātauina foʻi e se tuafafine nofofua o loo auauna i le Peteli: “Ou te iloa paeonia nofofua matutua e paleni, e uaʻi atu i le auaunaga, e faataulaga, ma e fiafia i le auaunaga ma e fesoasoani tele i le faapotopotoga. E saʻo la latou vaai i o latou tulaga nofofua. E latou te lē manatu e sili i latou i isi ona o lo latou tulaga nofofua. E latou te lē manatu foʻi e iai ni mea ua misia i o latou olaga ona ua lē faaipoipo.” E tāua tele le iai i se faapotopotoga e faaaloalo tagata uma ma e faatāua e le tasi le isi. E te lē lagona ai le misialofa po o le matauʻa, le lē ano mai po o le faatāua naʻuā foʻi o oe. E te lagona e latou te matuā alolofa iā te oe.

14. E faapefea ona tatou faaalia le faaaloalo i ē nofofua?

¹⁴ E talisapaia e o tatou uso ma tuafāfine nofofua lo tatou faatāua o i latou ona o latou uiga lelei, ae e lē ona o latou tulaga nofofua. Nai lo o le misialofa iā i latou ae e tatou te talisapaia lo latou faamaoni. O le iʻuga, o le a lē manatu o tatou uso ma tuafāfine nofofua ua tatou faapea atu: “E leai sou aogā iā te aʻu.” (1 Kori. 12:21) Ae o le a latou iloa, e tatou te  faaaloalo iā i latou, ma e tatou te faatāua o latou tulaga i le faapotopotoga.

15. O ā fetuunaʻiga ua faia e nisi ina ia faalautele atu ai la latou faiva?

¹⁵ I tausaga talu ai, e toʻatele tagata talaʻi na fai ma o latou sini le aʻoina o se isi gagana ina ia faalautele atu ai la latou faiva. O le faia faapea e manaʻomia ai fetuunaʻiga. Ua tuua e nei uso ma tuafāfine faapotopotoga e tautatala i la latou lava gagana, ina ia auauna i isi faapotopotoga o loo telē ai le manaʻoga mo tagata talaʻi o le Malo, ae e ese le gagana e tautatala ai. (Galu. 16:9) Na fai e nei Kerisiano na faaiʻuga ina ia faaauiluma ai manaʻoga o le Malo. E ui e umi se taimi faatoʻā mafai ona lelei le tautatala a nei Kerisiano i le gagana fou, ae e tele mea lelei ua latou faia mo le faapotopotoga. O o latou uiga lelei ma lo latou poto masani, ua faamalosia ma faamausalī ai le faapotopotoga. Maʻeu lo tatou talisapaia o le agaga faataulaga o nei uso ma tuafāfine!

16. O le ā e fua i ai le iloiloina e toeaina o agavaa mo uso e auauna ai o ni toeaina po o ni auauna o le faiva?

¹⁶ E lē tatau ona faatalatū le ʻautoeaina e faatū atu se uso e avea ma toeaina po o se auauna o le faiva, ona e leʻi lelei lana tautala i le gagana o loo faaaogā e le faapotopotoga. E iloilo e toeaina se uso e fua i agavaa faale-Tusi Paia mo toeaina ma auauna o le faiva, ae e lē fua i le lelei o lana tautala i le gagana a le faapotopotoga o loo auauna ai.​—1 Timo. 3:1-10, 12, 13; Tito 1:5-9.

17. O ā fesili e feagai ma aiga pe a siitia atu i se isi atunuu?

¹⁷ O nisi aiga Kerisiano ua siitia i se isi atunuu e sulufaʻi i ai, pe saʻili ai foʻi se galuega. O lona uiga ua aʻoaʻoina ai a latou fanau i le gagana autū a lenā atunuu. E ono manaʻomia foʻi ona aʻoaʻoina e mātua le gagana autū a lenā atunuu ina ia mafai ona maua ai se galuega. Ae faapefea pe afai e iai i inā se faapotopotoga po o se vaega e tautatala i la latou gagana? O lē fea faapotopotoga e tatau ona auai ai le aiga? Pe e tatau ona auai i le faapotopotoga e tautatala i le gagana autū a le atunuu o loo latou iai, pe auai i le faapotopotoga e tautatala i le gagana a le aiga?

18. E tusa ai o le Kalatia 6:5, e faapefea ona tatou faaalia le faaaloalo i le faaiʻuga a le ulu o le aiga?

¹⁸ E filifili e le ulu o le aiga le faapotopotoga e tatau ona auai i ai lona aiga. Talu ai o le filifiliga lea e patino i le aiga, e tatau la ona iloilo e le tane le mea e sili ona lelei mo lona aiga. (Faitau le Kalatia 6:5.) E tatau ona tatou faaaloalo i le faaiʻuga ua faia e le ulu o le aiga. Po o le ā lava le faaiʻuga e na te faia, ia tatou amanaʻia lana faaiʻuga ma talia lenā aiga o se vaega tāua o le faapotopotoga.​—Roma 15:7.

19. O le ā e tatau ona mafaufau lelei i ai ulu o aiga ma tatalo ai?

¹⁹ O nisi aiga e auai i se faapotopotoga e  tautatala i le gagana a mātua, ae e lē iloa lelei e tamaiti lenā gagana. Afai e tu lenā faapotopotoga i se vaipanoa e tautatala ai tagata i le gagana autū a lenā atunuu, atonu la e faigatā mo le fanau ona malamalama i sauniga ma lē agaʻigaʻi ai i luma faaleagaga. Aiseā? Ona atonu o loo auai le fanau i se aʻoga e faaaogā ai le gagana autū a le atunuu, ae lē o le gagana e tautatala ai o latou mātua. I nei tulaga, e tatau ona mafaufau lelei ulu o aiga ma tatalo mo le atamai, e fesoasoani iā i latou e filifili le mea e tatau ona fai, ina ia mafuta vavalalata atu ai le fanau iā Ieova ma ona tagata. E mafai e mātua ona fesoasoani i fanau ia malamalama lelei ma tautatala i le la gagana, po o le filifili e auai i se faapotopotoga e tautatala i le gagana e malamalama lelei ai le fanau. Po o le ā lava le faaiʻuga a le ulu o le aiga, e tatau i le faapotopotoga ua ia filifili e auauna ai ona faatāua ma faaaloalo iā te ia ma lona aiga.

20. E faapefea ona tatou faaalia le faaaloalo i o tatou uso ma tuafāfine o loo aʻoaʻoina se gagana fou?

²⁰ E tusa ai ma māfuaaga uma na tatou talanoaina, e tele faapotopotoga e iai uso ma tuafāfine o loo tauivi i le aʻoaʻoina o se gagana fou. Atonu e faigatā iā i latou ona faaali atu o latou manatu. Peitaʻi, pe afai e tatou te ʻalofia le vaai i le auala e latou te tautatala ai i le gagana fou, o le a tatou iloa ai lo latou alolofa iā Ieova ma lo latou faanaunauga e auauna iā te ia. O le a tatou matuā faatāua ma faaaloalo i nei uso ma tuafāfine, pe a tatou iloa nei uiga matagofie. O le lē lelei o la latou tautatala i le tatou gagana, o le a lē avea lenā ma māfuaaga e tatou te faapea atu ai, “E leai sou aogā iā te aʻu.”

21-22. O le ā le faaeaga mataʻina ua tatou maua?

²¹ Ua tuuina mai e Ieova iā i tatou se faaeaga mataʻina o le iai o so tatou tulaga i lana faapotopotoga. E tusa po o i tatou o ni alii po o tamaʻitaʻi, nofofua pe faaipoipo, matutua pe e talavou, pe e faigofie ona tatou tautatala i se gagana pe faigatā ae e matuā tāua i tatou iā Ieova ma isi.​—Roma 12:4, 5; Kolo. 3:10, 11.

²² Tau ina ia faaauau ona tatou faatatauina le tele o lesona matagofie mai i le talafaatusa a Paulo e uiga i le tino o le tagata. O le faia faapea, o le a tatou iloa ai isi auala e tatou te faatāua ai o tatou tulaga ma tulaga o isi i le faapotopotoga a Ieova.