1. Kɛkɔnge kɛ Yehova ɔpɛyɛnde onkambi wɔnde onkfumɔ wolekɔ la n’kɔmano?

YEHOVA mpɛyɛka onkambi wɔnde onkfumɔ wolekɔ la n’kɔmano mpipo kɛmɔtshi l’otshumano. Kaanga mpipo kana edjito wɛso otshikitanawɔ, isankfumɔ tolekɔ la n’tshina edjinge la djonyi dj’anto ankina. Ɔpɔstɔlɔ Poolo ntokotshɛka dj’iso nsipisoyɛ djonyi djelekɔ l’olakanyelo wɔsɔ. Ngete mo?

2. Lá nkilika Ɛfɛsɔ 4:16, ladjikɛnge oyɛso la djɛ ndɔsana la ntshina edjinge nkambaka esanga?

² Etengo vɛrse djembɔsama ɔtɛ wɔ djamba djɛnɛ otepelawɔ, Poolo ɛnyɛka papoo ante lako onto wokoka ndenda onkambi wɔ Yehova onkina edjinge ndoshimela ante: ‘Lemi mpalekɔ la djonyi djɛko.’ (1 Kɔ. 12:21) Djɛ mvu ndjala l’otshumano, iso ladjɛ ndɔsanaka la ntshina edjinge nkambaka esanga. (Wala Ɛfɛsɛ 4:16.) Wina wokambaso esanga, otshumano nfulaka edjinge ngandji kelekɔ l’anteyi kɛso ndjalaka wolo.

3. Kɛkɔnge kɔkɔpaso nyɛna lá djamba djɛnɛ?

³ Topo tɔkɔnge tɔmɔtshi tokokaso nyɛnyɛ dj’iso ndɔsaka Akristo ankina wa l’otshumano l’djito? Lá djamba djɛnɛ tɛɛna lɔ wopo wokoka tokokolo nyɛnyɛ dj’iwɔ ndɔsaka winawɔ tokokolo l’odjito. M’asɔ tɔngɛna l’onkina wopo wokokaso isankfumɔ nyɛnyɛ dj’iso ndɔsaka wananyɔ la wankaana yɛso yetatshuke l’odjito. Edjinge l’ekomo tɔngɛna wopo wokokaso nyɛnyɛ djedjɛ djɛso te waapatepela otepela wɔso wɔlɔ.

4. Dako djɛkɔnge Poolo ndapɛyɛ djelekɔ l’Ɔrɔma 12:10 tokokolo oyɛwɔ la djɛ nkilika?

⁴ Tokokolo t’onkfumɔ tolekɔ l’otshumano nsɔnamaka m’okotshɔ wɔ nyuma k’ekina kɛ Yehova. Koko, iyankfumɔ walekɔ  l’akoka watshikitanyi edjinge l’epapɛyɛ wetshikitanyi. (1 Kɔ. 12:17, 18) Tokokolo tɔmɔtshi watayale ila, edjinge wataleke mba balo kana ndjewa akambo efula walendana la tokokolo. Ankina wapalekɔ l’akoka wa nagha akambo efula ladjikɛnde wambo tshunda edjinge walekɔ l’elando. Koko, lako ikokolo yikoka nkanela kana nshimela winande ikokolo ante, ‘Lemi mpalekɔ la djonyi djɛko.’ Koko, ikokolo inkfumɔ ladjɛ nkilika dako djɛ Poolo djelekɔ lá Ɔrɔma 12:10.​—Wala.

5. Wopo wɔkɔnge tokokolo oyɛwɔ la djɛ nyɛnyɛ dj’iwɔ ndɔsaka winawɔ tokokolo tonkina l’odjito, ko ladjikɛnge n’kambo n’tshɔ oyewɔ djonyi?

⁵ Tokokolo nyɛnyɛka dj’iwɔ ndɔsaka winawɔ tokokolo l’odjito ntsha wangopikake lotoyi la n’kɔmɛ nkfumɔ wina wotepela winawɔ. N’kambo n’tshɔ dekɔ djonyi efula pekapeka wina w’oloyi wɔtokokolo otshumanawɔ djɛ nsawola akambo w’amɔtshi wa djonyi. Ladjikɛnge? Kolenda wopo wɔ Etange k’Olami kɛ Ngɔndɔ kɛ djomi 1, 1988, (lá Falase) otepelande ante: “Tokokolo ladjɛ ndjewa ambɔ, má okotshɔ wɔ nyuma k’ekina, Kristo nkoka ndɔndjɛ ikokolo inkfumɔ y’elekɔ l’oloyi wɔ tokokolo djɛ mpɛyɛ ikfɔ imɔtshi yɛ djonyi yelekɔ lá Bible djɛ mpɛyɛ nkando lá n’kambo mɔtshi kana ndɔsa n’kano mɔtshi djɛ djonyi. (Ele. 15:6-15) Lako ikokolo yekoka ndjapamela oloyi wɔ tokokolo.”

6. Wopo wɔkɔnge tokokolo okokawɔ nkamba esanga, edjinge wopo wɔkɔnge otshumano okokawɔ mba wapɔ ntsha iwɔ wambonangha nghɔsɔ?

⁶ Ikokolo yɔsaka winande tokokolo l’odjito apahonaka djɛ ngo nde ntepela ntondo wina onkfumɔ woyɛwɔ lá losanghanyɛ. Apahonaka djɛ ntepela efula wina wosawolawɔ edjinge nde apawolaka djɛ ikanyi yɛnde ndjalaka wina tshɛ ngo wɔlɔ. Koko, nde mpɛyɛka ikanyi yɛnde l’okitshakitshɛ. Nde mpikaka lotoyi la n’kɔmɛ nkfumɔ wina wɔ tokokolo tonkina otepelawɔ. N’kambo deka djonyi nde, nde mponaka djɛ mpɛyɛ tɔkfɔ tolekɔ l’Afunelo edjinge nde nkilikaka ɛlɔndjɛlɔ kɛ ‘nfumbe kɛ n’kɔmano la n’kɛsɔ.’ (Mat. 24:45-47) Ntsha wamba wa tokokolo wa nanghema la ngandji edjinge la ntshunamu, nyuma k’ekina kɛ Ndjambe kengoyala esanga la wɔ edjinge kengalɔndjɛ djɛ akano wɔsawɔ nkeketshɛ otshumano.—Dja. 3:17, 18.

7. Wopo wɔkɔnge Yeso ndɔɔsaka londjemba?

⁷ Lá ntshumano djɛso djɛ lɔɔko kɛnɛ tolekɔ la waambotshuka edjinge l’ankfumbo. Koko, tolekɔ lonkina la wananyɔ la wakaana yetatshuke. Wopo wɔkɔnge wokokaso ndɔsa wananyɔ la wakaana yɛso yɛ m’polo? Tokolenda wopo wɔ Yeso ndɔsaka londjemba. Wina wɔ ndayalaka lá looko, Yeso atatshuka. Nde atshikalaka epolo edjinge ilaka yimba efula l’olemo wɔnde. Lako kaanga loshi lɔ Yeso ndalakanyɛ ante ntshukana kana ntshikala epolo ndeke loleka djonyi. Koko nde atepelaka ante Akristo amɔtshi wangɔsɔna dj’ipatshukana. (Mat. 19:11, 12) Yeso ɔsaki wanɛ watatshukana l’odjito. Nde atɔsaki m’polo entengo anto walekɔ l’anse k’antshukanyi kana etengo anto wambosamba ekete kɛmɔtshi.

8. Lá nkilika 1 Kɔrɛtɔ 7:7-9, Kɛkɔnge kɛ Poolo ndakembɛ Akristo dj’iwɔ ndenda?

⁸ Etengo Yeso, ɔpɔstɔlɔ Poolo atshikalaka epolo l’ila tshɛ k’olemo wɔnde. Lako kaanga lotshi lɔ Poolo ndalakanyɛ ante, alekɔ nyɛtshi Okristo ntshukana. Nde ewaki ante ntshuka kana ntshukana alekɔ n’kano dj’onto nyɔmɛlɛ. Koko, Poolo akembɛka Akristo dj’iwɔ ndenda ntsha kana iwɔ nkoka ntshikala m’polo djɛ nkambela Yehova. (Wala 1 Kɔrɛtɔ 7:7-9.) N’kambo djɛ nsɔsɔlɔ nde, Poolo atɔsaki Akristo wa m’polo entengo anto wanyanya kana etengo walekɔ l’anse kɛ wanɛ wambotshuka. Djɛko ndeke ndasɔnɛ olangala Timɔte, wɔnanyɔ w’epolo djɛnde mbɛmba edjito wɛ n’kekete l’olemo wɔ Yehova. * (Flp. 2:19-22) Djɛko ndeke, angoyala n’kambo djɛ nyɛtshi nkanela ente wɔnanyɔ ɔmɔtshi alekɔ l’akoka efula wa mbɛmba edjito kana lako l’akoka efula ngo má wopo woyɛnde ontshuki kana epolo.​—1 Kɔ. 7:32-35, 38.

9. Kɛkɔnge kokokaso ntepela lá n’kambo djɛ bala edjinge djɛ londjemba?

⁹ Edjinge Yeso kana Poolo lako lolakanyisa ante Akristo ladjɛ ntshukana kana ntshikala m’polo. Iya okokaso ntepela nge lá n’kambo djelendana la bala edjinge londjemba? Etange k’Olami kɛ Ngɔndɔ kɛ djomi 1, 2012, (lá Falase) mpɛyɛka nsakiso kɛ wɔlɔ lá n’kambo ntshɔ ante: “Lá nsɔsɔlɔ, [bala kana londjemba] oyɛwɔnde epapɛyɛ wɛ Ndjambe. . . . Yehova apɔshi [londjemba] etengo n’kambo djɛ nsɔnyi kana dj’okiyano.” Wina wokanelaso n’kambo n’tshɔ, iso ladjɛ ndɔsaka l’odjito mpipo kelekɔ la wananyɔ la wakaana l’otshumano.

10. Wopo wɔkɔnge wokaso nyɛnyɛ dj’iso nɛmɛyɛka wananyɔ la wakaana yɛso yɛ m’polo?

 ¹⁰ Wopo wɔkɔnge okokaso nyɛnyɛ dj’iso nɛmɛyɛka tokanyi edjinge akambo wa wananyɔ la wakaana yɛ m’polo? Alekɔ wɔlɔ iso ndjewaka ente Akristo wamɔtshi wa m’polo wɔsaka iyɔmɛlɛ n’kano djepatshukana. Akristo ankina wa m’polo nkɔpaka ntshukana, koko iyotatanende wome kana wadji wɔ wɔlɔ le wɔ. Nkoka ndjala ko, amɔtshi wambovushɛka wame kana wadji wawɔ. Kaanga elonga kɛkɔnge kɛsɔ, ase otshumano nkoka ndjopola Akristo wa m’polo ladjikɛnge yopatshukana kana, ndashimela dj’iwɔ nkɔpaka ndahonela wome kana wadji? Nsɔsɔlɔ Akristo wamɔtshi wa m’polo nkoka ntɔlɔmba okotshɔ wɔsɔ. Iya ntsha wapatɔlɔmbisa okotshɔ wɔsɔ, wopo wɔkɔnge wokoka ndawoka wɔnanyɔ kana nkaana k’epolo ntsha onto ɔmɔtshi ambohonela wome kana wadji? (1 Te. 4:11; 1 Ti. 5:13) Nyotshɔ tokolenda akambo wamɔtshi watepelisa wananyɔ la wakaana yɛso imɔtshi yelekɔ la n’kɔmano.

11-12. Wopo wɔkɔnge wokokaso ntɛwɔla wanɛ walekɔ m’polo?

¹¹ Onami w’edjinga ngɔlɔ ɔmɔtshi w’epolo wokotshɛ odjito wɔnde wɔlɔ angɛnake ante ntshikala epolo alekɔ la wapɔ efula. Koko, nde atepelaka ante nkoka ndjala onyunghu kana ɔkɔmwɛlɔ ntsha wananyɔ la wakaana yelekɔ la tokanyi tɔ wɔlɔ nkopolaka ambɔ: “Ladjikɛnge ngopatshuke?” Wɔnanyɔ ɔmɔtshi wokamba lá filialɛ kɛmɔtshi atepelaka ante: “Wina ɛmɔtshi wananyɔ la wakaana yɛso nyɛnyɛka etengo wanɛ walekɔ m’polo walekɔ anto woyɛwɔ ladjɛ ndjoka djandji. N’kambo n’tshɔ nkoka nyɛnyɛ etengo londjemba alekɔ ngete odjito koko ape opapɛyɛ.”

¹² Nkaana kɛso kɛmɔtshi k’epolo kekamba lá Betɛlɛ atepelaka ante: “Wananyɔ la wakaana imɔtshi nkanelaka ambɔ, epolo kenkfumɔ alekɔ mpona ngo wome kana wadji, iwɔ nkanelaka lonkina ambɔ epolo kenkfumɔ ndɔsaka djɛ, wina onkfumɔ w’anto amɔtshi osanghanawɔ alekɔ mbamba k’iwɔ mba wame kana wadji. Wina ɔmɔtshi wiyantome l’onkoko onkina wɔ l’ongidji wɔmi djɛ tokamba olemo, ntshɔka tá losanghanyɛ la n’kɔlɔ. Nkaana k’imayalaka lakande ashimelaka ante, tolekɔ la wananyɔ ape l’otshumano wɔso walekɔ lawɛ lɔsɔkɛ. Nde anshimelaka l’onkina ante nde ahonaki nkotshɛ lemi djɛ mba wome. Koko ngo m’ingela lá Mvulu k’Onkfumi, nde ansepaka djɛ lemi mpomana la wananyɔ ape wakɔ. Nsɔsɔlɔ, n’kambo n’tshɔ n’tɔpɛyɛka is’asato kɛkɔ nsɔnyi.”

13. Ndjɔmbɔmba yɛkɔnge yekotshisa nkaana kɛso kɛmɔtshi k’epolo?

¹³ Nkaana kɛso k’enkina k’epolo kekamba la Betɛlɛ ntepelaka ante: “Lemi ndjewaka tatekalo tɔmɔtshi tɔ m’polo tolekɔ la tokanyi tɔ wɔlɔ, t’ila yimba l’olemo, tolekɔ l’ikanyi yɛ ndaasambɛ, tolekɔ l’osasa l’olemo wɔwɔ edjinge tonanghaka akambo efula l’otshumano. Iwɔ walekɔ l’ikanyi y’ɛdje lá kɛnɛ kelendana la londjemba lɔwɔ, iwɔ wapoyawɔshi djɛ iwɔ ndeka anto ankina ladjikɛnde watshikalaka m’polo, kana ndawoka djɛ wasamba ekete kɛmɔtshi, kana wapalekɔ l’osasa ladjikɛnde wapalekɔ la wame kana la wana.” Alekɔ wɔlɔ efula ndjala l’otshumano wolekɔ l’anto walɛmɛyana edjinge wɔsana l’odjito. L’otshumano wɔ nghɔsɔ, wɛ ndjewaka djɛ wananyɔ la wakaana wapɔkɔshi ngete onto wɔ djandji, wapakoke djewɔ, wapakimɛ yimba edjinge wapakanela djɛ wɛ ndaleka. Ongewake dj’iwɔ nkɔkɔpaka.

14. Wopo wɔkɔnge okokaso nyɛnyɛ ente iso nɛmɛyɛka la ndɔsaka wanɛ walekɔ m’polo l’odjito?

¹⁴ Wananyɔ la wakaana yɛso yelekɔ m’polo wangoyala la djedjɛ ntsha isɔ ndawɔsa l’odjito má nanghedji djɛwɔ djɛ wɔlɔ, koko  ape ladjikɛnde walekɔ m’polo. L’edjena kɛ ndawoka djandji ente walekɔ m’polo, alekɔ wɔlɔ iso nyɛnyɛ djedjɛ djɛso tewɔ l’ɔtɛ wɔ n’kɔmano djɛwɔ. Má nangha nghɔsɔ wananyɔ la wakaana yɛso yɛ m’polo wapongoyawoka ente ngo t’ashimela ente: ‘Lemi mpalekɔ la djonyi djɛnyo.’ (1 Kɔ. 12:21) Koko iwɔ wangɛna ente iso ndawɔsaka l’odjito edjinge tolekɔ ndɔsa mpipo kelekɔ la wɔ l’otshumano la n’tshina.

15. Etshikitano wɛkɔnge wenanghisa anto wamɔtshi djɛ nfudjɛ olemo wɔwɔ w’ipoposanyɛ?

¹⁵ Lá ɛnɔnyi emangha wemboheta wɛnɛ, ansakodji efula w’ɔsaka n’kano djɛ ndjeka otepela onkina djɛ nfundjɛ olemo wɔwɔ. Djɛ nangha n’kambo n’tshɔ iwɔ wayalaka la djɛ nangha etshikitano ɛmɔtshi. Wananyɔ la wakaana wasɔ, watshikaka otshumano wɔ l’otepela wɔwɔ wɔ lowotshɔ djɛ ntokamba l’otshumano wɔ l’otepela onkina woyɛwɔ la djonyi djɛ asakodji w’Onkfumi. (Ele. 16:9) Ɔsɔ alekɔ n’kano djɔsisa Akristo wasɔ iyɔmɛlɛ djɛ ntɔla wapɔ w’Onkfumi ta ntondo. Kaanga n’kano n’tshɔ okokawɔ ndɔsa ɛnɔnyi efula dj’iwɔ ndotepela wɔlɔ otepela w’otshumano w’iyombokoma, iwɔ nanghaka wayi efula wa wɔlɔ. Wekeka wawɔ wa wɔlɔ edjinge balo djɛwɔ dj’olemo nkotshɛka dj’otshumano nkemba la mpikama wɔlɔ. Iso ndɔsaka wananyɔ la wakaana yɛso yelekɔ l’ikanyi yɛ ndaasambɛ yɛsɔ l’odjito!

16. Wayi wakɔnge wakotshɛ tokokolo djɛ ndashikikɛ ambɔ wɔnanyɔ ɔmɔtshi ambokoka ndjala ikokolo kana onkambi wokotshɛ?

¹⁶ Oloyi wɔ tokokolo wapakoke nkaakanda djɛ ndjila wɔnanyɔ djɛ ndjala ikokolo kana wakotshɛ tokokolo ladjikɛnde apatepela otepela wel’otshumano wɔlɔ. Kɛnɛ k’Afunelo ɔlɔmbande ndeke longokotshɛ tokokolo djɛ ndashikikɛ ente wɔnanyɔ ɔmɔtshi nkoka ndjala ikokolo kana onkambi wokotshɛ koko ape wopo wotepelande otepela wel’otshumano kɛnde wɔlɔ.​—1 Ti. 3:1-10, 12, 13; Tit. 1:5-9.

17. Weepó wɛkɔnge wokoka nkfumbo imɔtshi ndawopola ntsha wambotintatshɛ l’owila onkina?

¹⁷ Nkfumbo imɔtshi y’Akristo yimaka m’ewila wɛwɔ djɛ nt’isama la tohona olemo. Lá mbamba kɛ nghɔsɔ, wana wawɔ t’ingelaká mbala imɔtshi ankalasa yɛwɔ l’otepela woleki ntepelama l’owila wɔkɔ. Iya okokaso ntepela nge ntsha otshumano kana oloyi ɔmɔtshi wɔ l’eteyi w’olekɔ l’otepela wɔwɔ wɔ lowotshɔ? L’otshumano wɔkɔnge wonanghema nsanghanyɛ, nkfumbo kɛ nghɔsɔ oyɛwɔ ladjɛ ndjingela? Iwɔ ladjɛ ndjingela l’otshumano w’otepela woleki ntepelama l’owila wɔkɔ kana l’otshumano w’otepela wɔwɔ wɔ l’owotshɔ?

18. Lá nkilika Ngalatiya 6:5, wopo wɔkɔnge okokaso nyɛnyɛ ente iso nɛmɛyɛka n’kano djɛ ɔtɛ wɔ nkfumbo nyɔmbɔsa?

¹⁸ Ɔtɛ wɔ nkfumbo ladjɛ ndɔsa n’kano djelendana l’otshumano wɔ nkfumbo kɛnde oyɛwɔ ladjɛ ndjingela. Ladjikɛnde ɔsɔ alekɔ n’kano djelendana lawɔ iyɔmɛlɛ, nde ladjɛ ndenda kɛnɛ kelekɔ wɔlɔ efula le nkfumbo kɛnde. (Wala Ngalatiya 6:5.) Iso ladjɛ nɛmɛyɛ n’kano djɛ ɔtɛ wɔ nkfumbo nyɔmbosa. Kaanga  n’kano djɛkɔnge nyɔmbɔsa, tɔlɛmɛyɛ edjinge tosangele nkfumbo kɛsɔ l’otshumano wɔso.​—Ɔrɔ. 15:7.

19. N’kambo djɛkɔnge ɛtɛ wɛ nkfumbo oyɛwɔ ladjɛ ndenda wɔlɔ la ndɔmba lá n’kambo djɛkɔ?

¹⁹ Wina ɛmɔtshi, nkoka ndjala nkfumbo imɔtshi yelekɔ l’otshumano w’otepela wɔ lowotshɔ w’ambotshi, koko mbala imɔtshi wana wapatepela otepela wɔkɔ wɔlɔ. Ntsha otshumano wɔsɔ wolekɔ l’edjena kotepelawɔ otepela w’owila, nkoka ndjala ko wana walekɔ l’okakasano djɛ nsipisoyɛ kɛnɛ k’otepelawɔ la nsanghanyɛ edjinge djɛ nfula la nyuma. La mo nghɔsɔ? Ladjikɛnde wana wingela mbala imɔtshi, l’ankalasa yolakanyɛwɔ otepela wel’owila, koko ape l’otepela wɔ lowotshɔ w’ambotshi wawɔ. Lá wina wɛnghɔsɔ, ɛtɛ wɛ nkfumbo ladjɛ ndenda wɔlɔ kɛnɛ kokokawɔ nangha djɛ nkotshɛ wana wawɔ djɛ ndjala entshupa la Yehova l’ankambi wande edjinge ndjila n’kambo djɛkɔ lá lɔlɔmbɔ. Iwɔ nkoka mpona djɛ nkotshɛ wana wawɔ djɛ ntepela otepela wɔwɔ wɔ lowotshɔ wɔIɔ, kana ntshɔ tá ontshumano w’otepela wɔ wana ewawɔ wɔlɔ. Kaanga n’kano djɛkɔnge ɔtɛ wɔ nkfumbo ndɔngɔsa, ase otshumano wɔ ndongingela la djɛ ndɔlɛmɛyɛ nde nya nkfumbo kɛnde edjinge ndawɔsa l’odjito.

20. Wopo wɔkɔnge wokokaso nyɛnyɛ dj’iso ndɔsaka wananyɔ la wakaana yɛso yeka otepela onkina l’odjito?

²⁰ L’ɔtɛ wɔ donga djɛsombeka djenyi, n’tshumano efula ngoyalaka la wananyɔ la wakaana yonangha la wolo djɛ ndjeka otepela onkina. Iwɔ nkoka ndjala l’okakasano djɛ ntepela tokanyi tɔwɔ lá nsanghanyɛ. Koko ntsha iso ndenda welo wonanghawɔ djɛ djewa otepela wɔkɔ, tɔngɛna dj’iwɔ nkɔpaka Yehova edjinge walekɔ la mposɛ kɛ ndokambela. Ntsha iso ndenda wekeka wa wɔlɔ walekɔ la wananyɔ la wakaana yɛso yɛsɔ, mbɔ koko tongawɔsa l’odjito efula. Topangashimela ente ‘iso topalekɔ la djonyi djɛnyo’ ngo l’ɔtɛ wiyopewe otepela wɔso.

21-22. Mpeyi kɛkɔnge k’ekekete koyɛso la kɛkɔ?

²¹ Yehova atɔpɛyɛka mpeyi k’ekekete kɛ mba edjena kana mpipo kɛmɔtshi l’otshumano wɔnde. Kaanga oyɛso mpame kana womoto, epolo kana ontshukanyi, olangala kana ekokolo, tongotepelake otepela wɔmɔtshi wɔlɔ kana topewe ntepela wɔlɔ, Yehova ntɔsaka l’odjito edjinge iso ndɔsanaka l’odjito.​—Ɔrɔ. 12:4, 5; Kɔl. 3:10, 11.

²² Djɛkondeke, nyotshɔ ntokindjɛ nkamba l’elakanyelo wɛ wɔlɔ w’isombowa la ndjɔmbɔmba kɛ Poolo kɛ demba dj’onto. Má nangha nghɔsɔ, tongohona topo efula tɔ ndɔsa edjena kana mpipo koyɛso latɔ la kelekɔ l’anto ankina l’otshumano wɔ Yehova l’odjito.