1. Yehowa mmupe mufubi aaye ooso sha lulamato kinyi?

YEHOWA mmupe bana baye booso ba sha lulamato mbalo mu kakongye. Sunga twekala na midimo ilekene, atwe booso twi na muulo, na twi na lukalo lwa bangi. Mpoolo mutumiibwa mwitukwashe bwa kupusha kalolo dino dilongyesha di na muulo. Mushindo kinyi?

2. Muyile Beena-Efeso 4:16, bwakinyi abitungu twinemekyeshene na kufuba mu buumune?

² Bu byabadi bebileshe mu kifundwe kya uno mwisambo, Mpoolo ashimika kasele’shi, muntu su ngumune akwatudi ta mulombene kulungula ungi mufubi a Yehowa’shi: “Ntshii noobe lukalo.” (1 Kod. 12:21) Su atukumina’shi mu kakongye mwikale buumune, abitungu tuneemekye muntu ooso na tufube pamune. (Badika Beena-Efeso 4:16.) Nsaa y’atufubu pamune mu buumune, muntu ooso epusha bu mufudibwe, na bino abinyingisha kakongye.

3. Mmyanda kinyi yatwisambila mu uno mwisambo?

³ Nsaa kinyi ayitungu’shi tunemekye mwina Kidishitu ooso yawa mu kakongye? Mu uno mwisambo, atutaluula mushindo ulombeene bakulu kwinemekyeshena. Akupu, atwisambila mushindo watudi balombene kulesha’shi atuneemeka bakwetu balume na bakashi be bukupi. Na ku nfudilo, atulongo  mushindo watudi balombene kulesha’shi atuneemeka baaba bash’abakula ludimi lwetu kalolo.

4. Elango kinyi dya Mpoolo di mu Beena-Looma 12:10 aditungu’shi bakulu balonde?

⁴ Bakulu booso ba mu kakongye mbasangudibwe na kikudi kiselele kya Yehowa. Anka, mukulu ooso e na kyaaye kya buntu. (1 Kod. 12:17, 18) Bangi mbafikye bakulu binobino na tabeuku myanda ibungi bu bangi bakulu abapu kwiisha. Bangi ta be na ngobesha ya kukita bibungi mwanda wa bununu sunga maladi. Sunga mbyabya, mukulu su ngumune, ta mulombene kubepula bangi bakulu, na kwakula’shi: “Ntshii noobe lukalo.” Anka, abitungu mukulu ooso alonde elango dya Mpoolo di mu Beena-Looma 12:10.​—Badika.

5. Mushindo kinyi ulombene kulesha mukulu’shi aneemeka benaye, na bwakinyi bi na muulo?

⁵ Mukulu alesha’shi aneemeka bakulu naaye, pa kwibatemesha kalolo. Bino bi na muulo bikishekishe nsaa y’abebungu bwa kwisamba. Bwakinyi? Pusha bibaadi bileshe Kitenta kya Mulami kya 1/10/1988: “Abitungu bakulu bakumiine’shi Yesu kwete kufubisha kikudi kiselele bwa kukwasha mukulu ooso yawa, bwadya kunangushena pabitale mushindo wa kufubisha mayi a kulonda a mu Bible bwa kukwasha bakulu naaye bwabadya kwata kitshibilo ki na muulo. (Bik. 15:6-15) Kikudi kiselele akikwashaa bakulu booso, kushii penda mukulu umune.”

6. Nkinyi kilombene kukwasha bakulu bwa kufuba mu buumune, na nsaa yabebikitshi, kakongye akekala naminyi?

⁶ Mukulu aneemeka bangi bakulu, t’akulaa nka nsaa yooso mu kisangilo kya bakulu nya, na kupwandjikisha’shi nka aaye mweneno nyi ebuwa. Anka, na kwiyisha kooso, atusha aaye mweneno. Atemesha kalolo ap’akula bangi bakulu. Na kii na muulo nkya’shi, atusha mayi a kulonda a mu Bible na kulonda bukunkushi bwa “mpika a lulamato na mudimukye.” (Mat. 24:45-47, NWT) Nsaa ayileshena bakulu kifulo na kineemo p’abesamba, kikudi kiselele ky’Efile Mukulu akikala  n’abo, akibakunkusha bwabadya kwata bitshibilo abinyingisha kakongye.​—Shak. 3:17, 18.

7. Yesu baadi amono bantu be bukupi naminyi?

⁷ Mu tukongye twi bungi lelo uno, mwi bantu beyibakishene, na mwi bifuko. Kadi mwi dingi bakwetu balume na bakashi be bukupi. Mushindo kinyi watumonaa bano bakwetu? Tala mushindo ubaadi Yesu amono bantu be bukupi. Pabaadi pa nsenga, Yesu ta mwibakile nya. Baadi mushaale bukupi bwa kukisha nsaa ibungi na kutula binangu byaaye ku mudimo waaye. Yesu ta mulongyeshe’shi abitungu mwina Kidishitu ebakile sunga kushaala bukupi. Anka, bakwile’shi bangi bena Kidishitu mbalombene kusangula bwa kushaala bukupi. (Mat. 19:11, 12; Kilombeeno kipya 2014) Yesu baadi aneemeka baba abaadi bukupi. Tabaadi ebamono bu bashaadile sunga bu bakutwe kintu kampanda mwanda wa’shi be bukupi nya.

8. Muyile 1 Beena-Kodinda 7:7-9, nkinyi kibaadi Mpoolo munyingishe bena Kidishitu bwabadya kutaluula?

⁸ Nka bu Yesu, Mpoolo mutumiibwa baadi mulombashe mudimo waye kalolo bu bibaadi bukupi. Mpoolo ta mulongyeshe’shi su mwina Kidishitu bebakila bakitshi bibubi nya. Baadi auku’shi nyi kitshibilo kya muntu nabeene. Anka baadi anyingisha bena Kidishitu su mbalombene kufubila Yehowa bukupi. (Badika 1 Beena-Kodinda 7:7-9.) Mpoolo ta baadi abepuula bantu be bukupi nya. Byabya, baadi musangule nsongwalume Timote, baadi bukupi bwadya kukita bibungi mu mudimo wa Yehowa. * (Fid. 2:19-22) Abipushika’shi, bibubi kupwandjikisha’shi mukwetu mulume mmulombene kupeta mashito sunga kwiakutwa penda mwanda wa’shi mwibakile sunga’shi ebukupi.​—1 Kod. 7:32-35, 38.

9. Twi kwakula kinyi pabitale kwibakila na kushala bukupi?

⁹ Byabikala Yesu sunga Mpoolo, ta kwi muntu mulongyeshe’shi abitungu bena Kidishitu bebakile sunga’shi bashale bukupi. Byabya, twi kwamba kinyi pabitale kwibakila sunga kushala bukupi? Kitenta kya Mulami kya 1/10/2012 mu fwalanse, nkyaluule luno lukonko kalolo. Akyamba’shi: “Byoso bibidi, [kwibakila na kushala bukupi] nyi bya buntu abifiki kwi Efile Mukulu. . . . Yehowa t’apwandjikisaa’shi [bukupi] nyi mwanda wa buufu sunga wa kwinyongola.” Byabya, abitungu tuneemekye bakwetu balume na bakashi be bukupi mu kakongye.

10. Mushindo kinyi watudi balombene kulesha’shi atuneemeka bena Kidishitu be bukupi?

 ¹⁰ Twi kulesha’shi atwataa na kineemo abipusha bakwetu be bukupi na nshalelo aabo naminyi? Abitungu tutentekyeshe’shi bangi bena Kidishitu mbeatshile kitshibilo kya kwikala bukupi. Bangi bena Kidishitu be bukupi abakumiina kwibakila, anka ta mbapete muntu mulombane abadya kwiyibakishena n’aye. Bangi namu mbafwishe mwina dibaka n’abo. Sunga byekala naminyi, t’abitungu’shi bangi bena kakongye bepushe bena Kidishitu be bukupi bwakinyi ta mbebakile, sunga kwibalombwela muntu abadi balombene kwiyibakishena naaye. Eyendo’shi bangi bena Kidishitu be bukupi mbalombene kuteka bukwashi. Byabya, su t’abatekye bukwashi, mushindo kinyi ulombene kwipusha mukwetu mulume sunga mukashi e bukupi p’abamulombwela muntu adya kwiyibakishena naaye? (1 Tes. 4:11; 1 Tim. 5:13) Tubandeyi kutaluula abyakula bakwetu bena Kidishitu be bukupi ba sha lulamato.

11-12. Mushindo kinyi watudi balombne kubofusha bena Kidishitu be bukupi ku mashimba?

¹¹ Ungi mukunkushi a kifunda kii bukupi akitaa mudimo waye kalolo amba’shi, kwikala bukupi kwi na myabi ibungi. Kadi amba’shi, mbilombene kubofusha kwishimba nsaa ayimwipusha bakwetu balume na bakashi’shi: “Bwakinyi twe mwibakile?” Ungi mukwetu mulume kii bukupi mwina betele amba’shi: “Ingi nsaa, bangi bena Kidishitu abamonaa’shi, kwikala bukupi nyi mwanda wa lusa. Kunangushena bino akulesha’shi bukupi nyi nkiita kibushito kushii bu kya buntu.”

¹² Ungi mukwetu mukashi kii bukupi afubaa ku Betele amba’shi: “Bangi balungudi abapwandjishaa’shi booso bena Kidishitu be bukupi bakwete kukimba muntu akwiyibakishena naaye sunga’shi nsaa yooso yabaadi mu kisaka, nyi nsaa ibuwa bwa kupeta mulume sunga mukashi. P’anaadi mwende mu kingi kibundji bwa mudimo wande wa ku Betele, nayile ku bisangilo kyolwa. Mukwetu mukashi baadi muntule kwaaye bandungwile’shi kwi bakwetu balume babidi mu kakongye be nami bipwa bimune. Aye nkundungula’shi, takwete ku nkimbila mulume nya. Kadi, pabatutwelele mu Nshibo ya Bufumu, bantwadile kwi baba bakwetu balume babidi bwa’shi nemonene nabo. N’ami na baaba bakwetu balume babidi, bibaadi bitukwate buufu, twakutwa kya kwakula.”

13. Nkileshesho kinyi kibaadi kinyingishe ungi muketu mukashi e bukupi?

¹³ Ungi mukwetu mukashi baadi afubu ku Betele bakwile’shi: “Nauku ba mbala-mashinda bebungi abetulaa pa mbalo ya bangi, be na kisumi, be na bipatshila bibuwa na bakwete kukwasha kakongye ngofu. Be na mweneno ebuwa pabitale bukupi. T’abemonaa bu bakile bangi mwanda be bukupi sunga kwinyongola mwanda’shi ta mbebakile na tabe na bana nya.” Kwikala mu kakongye mwi muntu ooso aneemeka bangi na kwibaata na muulo, kwi buwa bukile. Twepusha bu bakwete nkupusha lusa, nkulankila, nkulenguula sunga kumona’shi we mukile bangi. Ouku nka penda’shi mbakufule.

14. Mbikunyi byatudya kulesha’shi tukwete kuneemeka baaba be bukupi?

¹⁴ Bakwetu balume na bakashi be bukupi, abekala na muloo nsaa yatwibaneemeka mwanda wa ngikashi yabo ibuwa, kushi kwibapusha lusa mwanda’shi be bukupi. Pamutwe pa kwibapusha lusa, bibuwa twibatumbule bwa lulamato lwabo. Paapa, bakwetu balume na bakashi bakii bukupi, tabapusha bu’twe bakwete kwibamba’shi: ‘Ntshii neenu lukalo.’ (1 Kod. 12:21) Kadi, pamutwe pa byabya,  abamono’shi tukwete kwibaneemeka na twi na muloo wa kwikala nabo mu kakongye.

15. Nkitshibilo kinyi kyaate bangi bwa kutamisha mudimo wabo?

¹⁵ Mu bipwa bishale’bi, balungudi bebungi bekeele baate mpángo ya kulonga lungi ludimi bwabadya kutamisha mudimo wabo wa bulungudi. Bwa kukita byabya, abitunganga’shi bashintuule ingi myanda mu nshalelo aabo. Bano bakwetu balume na bakashi, mbakatukye mu tukongye twabakula ludimi lwabo bwa nkatwela mu kakongye kabakula lungi ludimi, mwabadi na lukalo lukata lwa balungudi. (Bik. 16:9) Kino nyi kitshibilo kyabadi baate abo banabene bwa kuyisha myanda ya Bufumu kumpala. Sunga byekala’shi abitekye bipwa bibungi bwa kwakula lwalwa ludimi kalolo, bakwete kukwasha kakongye ngofu. Ngikashi y’abo ibuwa na myanda y’abauku ikwete kunyingisha bakwetu balume na bakashi mu tukongye. Twi na muloo wibungi bwa bano bakwetu balume na bakashi bepaane!

16. Nkinyi kilombene kulesha bakulu’shi mukwetu kampanda balombana bwa kumupa mashito a bukulu sunga bu mufubi a midimo?

¹⁶ Kasaka ka bakulu ta nkalombene kupela kupa muntu mashito a bukulu sunga bu mufubi a midimo penda mwanda wa’shi t’akula kalolo ludimi lwa kakongye nya. Bakulu abataluula ngikashi ya muntu muyile abyakula bifundwe pabitale kwikala bu mukulu sunga bu mufubi a midimo kushii muyile byakula ludimi lwa kakongye.​—1 Tim. 3:1-10, 12, 13; Tt. 1:5-9.

17. Nkonko kinyi ayifumankanaa nayo bifuko abyende mu kushala mu dingi eumbo?

¹⁷ Bingi bifuko bya bena Kidishitu mbifilukye kwabo byenda mu dingi eumbo mu kushaala sunga kukimba mudimo. Byabya, bana babo abalongo kalaasa mu ludimi lwa dyadya eumbo. Baledi baabo abakumiina kulonga ludimi lwa dyadya eumbo bwabadya kupeta mudimo. Byabya, bekukita kinyi su mwekala kakongye sunga kasaka ka mu ludimi lwabo? Bena kifuko be kutwela bisangilo mu kakongye nkinyi? Bekutwela mu kakongye ka ludimi lwa dyadya eumbo, su nka ludimi lwabo?

18. Muyile Beena-Ngalatea 6:5, mushindo kinyi watudi balombene kulesha’shi atuneemeka kitshibilo kya nfumu a kifuko?

¹⁸ Nfumu a kifuko mmulombene kwata kitshibilo pabitale kakongye kabadya kutwela na kifuko kyaye. Mwanda, uno mmwanda wibatale abo banabene, abitungu aate kitshibilo kibuwa bwa kifuko kyaye. (Badika Beena-Ngalatea 6:5.) Abitungu tuneemekye kitshibilo kya nfumu a kifuko. Kyoso kitshibilo kyata, twikikumineyi na tukukile kifuko na twikileshe kifulo mu kakongye.​—Lom. 15:7.

19. Abitungu’shi ba nfumu ba bifuko batekye na kunangushena ngofu pabitale mwanda kinyi?

¹⁹ Ku lungi lupese, bingi bifuko mbilombene kwikala mu kakongye ka ludimi lwabo,  kadi pangi bana tabakwete kwilwakula kalolo. Mwanda, su kaka kakongye kee mu mbalo y’abakula ludimi lwa mu dyadya eumbo dyabadi bashaale, sunga lwabalongyeshaa ku kalaasa, mbilombene kwikela bana bukopo bwabadya kupusha bisangilo kalolo na kunyinga mu kikudi. Bwakinyi? Mwanda bana mbalombene kutwela ku kalaasa kw’abalongyesha mu ludimi lwa dyadya eumbo kushii mu ludimi lwa baledi babo. Mu yaya nsaa, abitungu ba nfumu ba bifuko banangushene ngofu na batekye Yehowa kinangu bwabadya kwata kitshibilo kilombene kukwasha bana bwabadya kwifubwila peepi na Yehowa na mwilo waye. Abitungu baledi balongyeshe bana babo ludimi lwabo sunga kwenda mu kakongye mwabakula ludimi alupusha bana kalolo. Sunga nfumu a kifuko ata kitshibilo ki naminyi, abitungu bena kakongye kasangula baleshe’shi abamuneemeka na kifuko kyaye na’shi abebata na muulo.

20. Twi kulesha naminyi’shi atuneemeka bakwetu balume na bakashi bakwete kulonga ludimi lupya?

²⁰ Bwa tuno tubingilo tubatukatuka mu kwisambila, mu tukongye twi bungi, mwi bakwetu balume na bakashi bakwete kwitatshisha bwa kulonga ludimi lupya. Abibelela bukopo bwa kwakula byabapusha. Su twaleka kunangushena penda mu mushindo wabakula ludimi lwabalongo, atumono kifulo kyabo bwa Yehowa na lukalo lwabo lwa kumufubila. Su twamona ngikashi yabo ibuwa, atwibaneemeka ngofu. Tatwakula’shi “ntshii noobe lukalo” penda mwanda wa’shi t’abakula ludimi lwetu kalolo nya.

21-22. Nkineemo kikata kinyi kyatudi nakyo?

²¹ Twi na lutumbu lukata kwi Yehowa mwanda mmupe ooso a kwatudi mbalo mu kakongye. Byatwikala bana balume sunga bana bakashi, bebakile sunga be bukupi, bakinga sunga banunu, sunga twekala atwakula ludimi kampanda kalolo sunga bibubi, twi na muulo ku meso kwa Yehowa na kwi bakwetu bena Kidishitu.​—Lom. 12:4, 5; Kol. 3:10, 11.

²² Tutungunukyeyi na kutumikila ano malongyesha ebuwa abatulongyela ku kileshesho kya Mpoolo kya mbidi ya muntu. Yaya nsaa, atwikala atukimbi mishindo ya kusanka na mbalo yetu mpa na ya bangi mu kakongye ka Yehowa.