1. Andi Jehovah da hiniwan u dee dinima fëën?

JEHOVAH da hiniwan u dee dinima fëën wan wooko a di ölganisaasi fëën. Hii fa u abi tookatooka wooko ta du a di ölganisaasi u Jehovah, tökuseei u abi useei fanöudu. Apösutu Paulosu bi heepi u fuu fusutan di soni aki. Unfa a bi du ën?

2. Faandi mbei u musu ta lesipeki useei, ta wooko makandi ku useei, te u luku Efeise 4:16?

² Di soni di sikifi a di tëkisi u di woto aki, ta lei taa Paulosu bi kë taki taa na wan fuu sa luku wan woto dinima u Jehovah, nöö u piki ën taa: „Ma abi i fanöudu” (1 Kol. 12:21). Ee u kë libi fiifii ku useei a di kemeente, nöö u musu ta lesipeki u na u, söseei u musu ta wooko makandi. (Lesi Efeise 4:16.) Te u ta wooko makandi, nöö hii sëmbë o ta fii bunu, söseei hii sëmbë a di kemeente o abi wan taanga biibi.

3. Andi woo taki a di woto aki?

³ Na un fasi u sa ta lei woto baaa ku sisa taa u ta lesipeki de? A di woto aki woo luku unfa gaanwomi sa ta lei taa de ta lesipeki de na de. Baka di dë, woo luku unfa u sa ta lesipeki dee baaa ku dee sisa fuu dee an tööu. Söseei woo luku unfa u sa lei taa u lobi dee baaa ku dee sisa dee an ta fan di töngö di u ta fan sö bunu.

4. Andi dee gaanwomi musu du, te u luku Loomë 12:10?

⁴ Jehovah bi wooko ku di santa jeje fëën u buta hii dee gaanwomi a wooko. Ma tökuseei hiniwan u de abi soni di de sa’ u du bunu (1 Kol. 12:17, 18). Kandë so u de an dë gaanwomi longi poi, nöö kandë de an abi öndöfeni sö kuma dee wotowan. Kandë wotowan an sa du hia soni, u di de ko gaandi kaa, nasö u di de dë ku suwaki. Ma aluwasi ee sö a dë, tökuseei na wan gaanwomi musu si kuma an abi di wotowan fanöudu. Ka faa dë sö, de sa wooko ku di soni di Paulosu bi taki a Loomë 12:10.​—Lesi ën.

5. Unfa dee gaanwomi sa lei taa de ta lesipeki deseei, nöö faandi mbei di soni aki dë fanöudu?

⁵ Dee gaanwomi sa ta lei taa de ta lesipeki deseei te de ta haika te di wotowan ta fan. Di soni aki dë fanöudu möönmöön te de o ko makandi u de taki u fanöudu soni. Faandi mbei u taki sö? Wë luku andi di Waktitoren u 1 u tinimu-liba u di jaa 1988 bi taki u di soni aki. A bi taki taa: „Dee gaanwomi musu fusutan taa Jesosi sa wooko ku di santa jeje u heepi hiniwan gaanwomi a di kemeente faa feni mama wëti u Bëibel di sa heepi de u de sabi andi de musu du (Tjab. 15:6-15). Di santa jeje u Jehovah ta heepi hii dee gaanwomi u di kemeente, an ta heepi wan kodo nöö.”

6. Andi sa heepi dee gaanwomi u de sa ta wooko fiifii makandi, nöö unfa di kemeente sa feni wini fëën?

⁶ Wan gaanwomi di ta lesipeki dee woto gaanwomi, an ta suku hii juu u dë di fosu sëmbë di o taki wan soni a wan komakandi di de hoi. An o ta fan hia poi, söseei an o ta hoi taa dee soni dee a ta taki ta bunu hii juu. Ma ku sakafasi a o ta taki andi a ta pakisei. A o ta haika te dee wotowan ta taki unfa de ta si soni. Ma di möön fanöudu soni, hën da a o dë kabakaba u taki andi a feni a Bëibel, söseei a o dë kabakaba u du andi „di köni saafu di dë u futoou” ta taki (Mat. 24:45-47, NW). Te dee gaanwomi ta lei taa de lobi deseei, söseei te de ta lesipeki deseei, nöö di santa jeje u Gadu o dë ku de. Di santa jeje o heepi de u de du soni di o tja wini ko da di kemeente.​—Jak. 3:17, 18.

7. Unfa Jesosi bi ta si sëmbë di an tööu?

⁷ A di kemeente u abi sëmbë di tööu ku sëmbë di abi miii. Ma u abi sömëni baaa ku sisa di an tööu tu. Unfa u musu si dee baaa ku dee sisa dee an tööu? Wë u musu si de kumafa Jesosi ta si de. Di Jesosi bi dë a goonliba aki, an bi tööu. A bi ta buta hii hën pakisei a di wooko di a bi musu du. Na wan daka seei Jesosi bi piki sëmbë taa de musu tööu nasö taa de an musu tööu. Ma a bi taki taa so Keesitu sëmbë o taki taa de an o tööu (Mat. 19:11, 12). Jesosi bi ta lesipeki dee sëmbë dee an bi tööu. An bi ta si kuma sëmbë di an tööu lagi möön dee sëmbë dee tööu, nasö taa de ta makei wan soni, u di de an tööu.

8. Na un soni Paulosu bi da dee Keesitu sëmbë taanga u de buta pakisei, te u luku 1 Kolenti 7:7-9?

⁸ Kuma Jesosi, apösutu Paulosu seei an bi tööu di a bi ta du di peleikiwooko. Paulosu an bi taki wan daka taa an bunu u wan Keesitu sëmbë tööu. A bi sabi taa hiniwan sëmbë musu luku andi a o du. Ma Paulosu bi da dee Keesitu sëmbë taanga u de luku ee de bi o sa dini Jehovah söndö u tööu. (Lesi 1 Kolenti 7:7-9.) Paulosu an bi ta si kuma dee sëmbë dee an bi tööu bi lagi möön dee sëmbë dee tööu. U sa taki sö, u di hii fa Timoteo an bi tööu, tökuseei Paulosu bi tei Timoteo faa du wantu gaangaan wooko a di dini u Jehovah * (Fil. 2:19-22). U ta fusutan gbelingbelin taa an bi o dë wan bunu soni ee u ta luku taa wan baaa fiti u feni wan faantiwöutu a di kemeente u di a tööu, nasö u di an tööu.​—1 Kol. 7:32-35, 38.

9. Andi u sa taki u di tööu di wan sëmbë ta tööu, nasö u di dë di wan sëmbë ta dë söndö tööu?

⁹ Jesosi an bi ta lei sëmbë taa wan Keesitu sëmbë musu tööu nasö taa an musu tööu, nöö Paulosu an bi du ën tu. Ma andi u sa taki u di woto aki? Wë Di Waktitoren u 1 u tinimu-liba u di jaa 2012, bi taki taa: „Di tööu di wan sëmbë ta tööu, nasö di dë di a ta dë söndö tööu, da wan kado di Gadu ta da di sëmbë. . . . Jehovah an ta si kuma sëmbë di an tööu musu ta sen, nasö taa de musu ta tjali u di de an tööu.” Di soni aki ta lei u taa u musu ta lesipeki dee baaa ku dee sisa dee an tööu.

10. Unfa u sa lei taa u ta lesipeki dee baaa ku dee sisa fuu dee an tööu?

¹⁰ Unfa u sa lei taa u ta hoi dee baaa ku dee  sisa dee an tööu a pakisei? U musu hoi a pakisei taa so baaa ku sisa buta taa de an o tööu. Wotowan bi o kë tööu, ma de an feni wan sëmbë u tööu. Nöö i abi wotowan di bi tööu, ma di sëmbë di de ku ën bi tööu bi ko lasi libi. Aluwasi fa soni dë da de, i si kuma a o dë wan bunu soni ee wotowan u di kemeente go hakisi di baaa nasö di sisa di an tööu faandi mbei an tööu ö, nasö i si kuma a o dë wan bunu soni u de suku wan baaa nasö wan sisa dëën fu hën ku ën tööu ö? Wë kandë so baaa nasö sisa di an tööu, bi o kë u wotowan heepi de ku di soni aki. Ma ee de an ta suku dee lö heepi dë, nöö unfa de sa ta fii te wan sëmbë ta taki taa de o heepi de feni wan sëmbë u de ku ën tööu? (1 Tes. 4:11; 1 Tim. 5:13) Boo buta pakisei a dee soni di so baaa ku sisa di an tööu bi taki.

11-12. Unfa u sa mbei wan baaa nasö wan sisa di an tööu fii bookosaka?

¹¹ Wan keling-gaanwomi di an tööu, söseei di ta du di wooko fëën bunu, ta taki taa a ta feni sömëni wini u di an tööu. Ma a ta taki tu taa a ta mbei a fii bookosaka te baaa ku sisa ta hakisi ën taa: „Faandi mbei ja tööu?” Wan baaa di an tööu, di ta dini a wan bëikantoo bi taki taa: „So juu, mi ta si kuma dee baaa ku dee sisa ta si kuma tjali u dee sëmbë dee an tööu musu kisi de. Di soni dë sa mbei a djei kuma te ja tööu, nöö i abi wan fuka. An dë wan kado.”

¹² Wan sisa di an tööu, di ta dini a Bëtëli bi taki taa: „So baaa ku sisa ta pakisei taa hii sëmbë di an tööu ta suku wan sëmbë fu hën ku ën tööu. Nasö taa te baaa ku sisa ko makandi, nöö de ta tei di okasi dë u de suku wan sëmbë u de tööu. Wan daka, mi bi musu go a wan woto foto u mi du wan soni di nama ku di Bëtëli wooko u mi. Di daka di mi bi dou a di kamian, a bi dë wan daka ka dee baaa ku dee sisa fu ala ta hoi komakandi. Mi bi tuwë lai a wan sisa pisi, hën di sisa dë bi piki mi taa tu baaa dë a di kemeente ka a nango di mi ku de abi di wan jaa. A bi piki mi tu taa na suku a ta suku baaa da mi. Ma di u dou a di Könuköndë zali, hën wantewante a tja mi go u mi go fan ku dee tu baaa aki. Wë an dë u taki taa di soni dë bi mbei mi ku dee tu baaa dë fii wan fasi.”

13. Andi bi heepi wan sisa di an tööu?

¹³ Wan woto sisa di an tööu, di ta wooko a Bëtëli bi taki taa: „Mi sabi sömëni baaa ku sisa di dë gaanwan u mi, söseei di an tööu. De ta du di pioniliwooko, nöö de ta du soni ku köni, de sabi andi de kë du a de libi, söseei de ta dë kabakaba u heepi wotowan, nöö de ta dë waiwai tu. De ta heepi di kemeente gaanfa. De ta si soni a wan soifi fasi. De an ta si kuma de bunu möön wotowan u di de an tööu. De an ta si tu kuma de an sa ta dë waiwai u di de an tööu, söseei u di de an abi miii.” I ta fii bunu seei te i dë a wan kemeente ka sëmbë ta lesipeki de na de. I ta sabi taa tjali fii an ta kisi dee baaa ku dee sisa fii u di ja tööu, söseei de an ta haun ku i tu. De an ta disa i, söseei de an ta si kuma i bunu möön de. Sabi nöö i ta sabi taa de lobi i.

14. Unfa u sa lei taa u ta lesipeki dee baaa ku dee sisa fuu dee an tööu?

¹⁴ Dee baaa ku dee sisa fuu dee an tööu, o tei ën u bigi te u lobi de u di de abi bunu fasi, ma na u di de tööu nasö u di de an tööu. Hën da, ka fuu mbei tjali u de kisi u u di de an tööu, u sa ta tei di hoi di de ta hoi deseei a Jehovah u bigi. Ee u du di soni aki, nöö dee baaa ku dee sisa fuu dee an tööu an o fii kuma u kë piki de taa: „Ma abi i fanöudu” (1 Kol. 12:21). Ka u di dë, de o sabi taa u ta lesipeki de, söseei taa u ta wai taa de dë a di kemeente fuu.

15. Andi so baaa ku sisa du u de bi sa dini Jehovah möön gaanfa?

¹⁵ A dee jaa dee pasa, sömëni peleikima bi buta taa de o lei wan woto töngö, sö taa de bi sa go peleiki a woto kamian. U de bi sa du di soni aki, de bi musu tooka so soni a de libi. Dee baaa ku sisa aki, bi kumutu a wan kemeente ka de ta fan de mamabëë töngö, u de bi sa go dini a wan kemeente ka de ta fan wan woto töngö, u di ala de abi möön peleikima fanöudu (Tjab. 16:9). Di soni di de ta du aki, da soni di deseei taki taa de o du, u de sa dini Jehovah möön gaanfa. Hii fa a sa tei wantu jaa ufö de sa fan di njunjun töngö bunu, tökuseei de ta heepi di kemeente a sömëni fasi. Dee bunu fasi di de abi, ku di öndöfeni di de abi, ta heepi dee baaa ku dee sisa. U ta tei ën u bigi seei taa dee baaa ku dee sisa aki an ta pakisei deseei nöö!

16. Andi dee gaanwomi musu luku, te de ta luku ee wan baaa sa toon wan gaanwomi nasö wan dinai?

¹⁶ Dee gaanwomi an musu taki taa wan baaa an musu toon wan gaanwomi nasö wan dinai u di an ta kaba fan di töngö di de ta fan a di kemeente sö bunu. Ka u de du di soni dë, de musu luku andi di Bëibel ta taki u di fasi fa wan baaa musu dë faa sa feni dee faantiwöutu dë.​—1 Tim. 3:1-10, 12, 13; Tit. 1:5-9.

17. Andi mama ku tata musu luku, te de ku de wosudendu foloisi go libi a wan woto köndë?

¹⁷ So baaa ku sisa foloisi go libi a wan woto köndë ku hii de wosudendu, u di soni bi ta taanga da de a di köndë u de, nasö u di de an bi sa feni wooko. A dee lö ten dë, nöö dee mii u de o abi fu lei di töngö u di köndë te de o go a siköö. Kandë de mama ku de tata musu lei di töngö dë tu u de sa feni wooko. Ma unfa a dë ee wan kulupu nasö wan kemeente dë, ka de ta fan di mamabëë töngö u de? De musu go a wan kemeente ka de ta fan di töngö di sëmbë ta fan a di köndë ka de foloisi go u, naa de musu go ka de ta fan di mamabëë töngö u de?

18. Unfa u sa lesipeki di soni di wan hedima u wan wosudendu buta taa a o du, te u luku Galasia 6:5?

¹⁸ Di sëmbë di dë hedima u di wosudendu o luku na un kemeente de o go. A musu luku andi möön bunu da dee sëmbë fëën. (Lesi Galasia 6:5.) U di di soni aki da wan soni ka hënseei musu taki andi a o du, mbei u musu lesipeki di soni di a taki. Nöö aluwasi andi a buta taa de o du, u musu tei dee sëmbë aki ku wai a di kemeente.​—Lom. 15:7.

19. Fuun soni wan hedima u wan wosudendu musu pakisei?

¹⁹ So juu a ta pasa taa sëmbë u wan wosudendu ta dë a wan kemeente ka de ta fan di mamabëë töngö u di mama ku di tata, ma kandë dee mii an ta fusutan di töngö dë sö bunu. Nöö ee di kemeente ka de nango, dë a wan kamian ka de ta fan di töngö di sëmbë ta fan a di köndë, nöö a sa taanga da dee mii u de fusutan  dee soni di de ta jei a dee komakandi. Nöö kandë de an o sa ko möön taanga a di biibi. Faandi mbei u taki sö? Biga kandë dee mii o go a wan siköö ka de ta fan di töngö di de ta fan a di köndë. Ee sö soni dë da de, nöö di hedima u di wosudendu musu pakisei luku andi a sa du faa sa heepi dee mii fëën, u de ko möön zuntu ku Jehovah ku dee sëmbë fëën. Söseei a musu begi fëën tu. Kandë a o dë u de lei dee mii u de de mamabëë töngö, nasö kandë de musu luku ee de musu go a wan kemeente ka de ta fan di töngö di dee mii u de ta fusutan bunu. Aluwasi andi di hedima u di wosudendu taki taa de o du, tökuseei dee baaa ku dee sisa u di kemeente ka de go, musu mbei hën ku dee sëmbë fëën wosudendu tuu fii taa de lobi de.

20. Unfa u sa lei taa u ta lesipeki dee baaa ku dee sisa fuu dee ta lei wan woto töngö?

²⁰ Wë peipei soni sa mbei wan baaa nasö wan sisa musu lei wan woto töngö. Nöö a sa kan taa di soni aki o taanga da de. Kandë a o ta taanga da de o de taki unfa de ta fii. Ma ee wa buta pakisei a di fa de an sa’ u fan di töngö, nöö woo sa si unfa de lobi Jehovah tjika, söseei unfa de kë dini ën tjika. Ee u ta mbei möiti fuu si dee bunu fasi u de, nöö woo lobi de, söseei woo lesipeki de. Nöiti woo taki taa: „Ma abi i fanöudu”, u di de an ta fan di töngö fuu sö bunu.

21-22. Un gaandi u abi?

²¹ U ta tei ën u bigi seei taa Jehovah da hiniwan fuu wan wooko fuu du a di ölganisaasi fëën. Ee u da wan womi nasö wan mujëë, ee u tööu nasö ee wa tööu, ee u gaandi nasö u njönku, ee u ta fan wan töngö bunu nasö ee wa ta fan ën sö bunu, tökuseei Jehovah lobi u, nöö u musu ta lesipeki useei.​—Lom. 12:4, 5; Kol. 3:10, 11.

²² Boo mbei möiti fuu du dee soni dee u lei a di soni di Paulosu bi taki u libisëmbë sinkii. Te u du di soni aki, nöö a o heepi u fuu suku peipei fasi fuu da dee baaa ku dee sisa fuu taanga. A o heepi u fuu lei taa u lobi de, söseei taa u ta lesipeki de.