1. Saida mak Jeová fó ba ninia atan ida-idak?

JEOVÁ ho laran-diʼak fó knaar ba ninia atan ida-idak iha kongregasaun. Maski ita ida-idak iha knaar neʼebé la hanesan, maibé ita hotu folin-boot no presiza malu. Apóstolu Paulo ajuda ita atu komprende pontu importante neʼe. Oinsá?

2. Tuir Éfeso 4:16, tanbasá ita presiza hafolin malu no serbisu hamutuk?

² Iha eskritura tema ba lisaun neʼe, Paulo hatudu ho klaru katak Jeová nia atan ida labele hatete ba atan seluk: “Haʼu la presiza ó.” (1 Kor 12:21) Atu kongregasaun bele iha dame, ita presiza hafolin malu no serbisu hamutuk. (Lee Éfeso 4:16.) Bainhira ema hotu serbisu hamutuk ho unidade, kongregasaun sei metin no ema hotu bele sente domin.

3. Iha lisaun neʼe, ita sei aprende saida deʼit?

³ Oinsá ita bele hatudu respeitu ba malu iha kongregasaun laran? Iha lisaun neʼe, primeiru ita sei aprende oinsá katuas sira bele hatudu respeitu ba malu. Segundu, ita sei aprende oinsá ita hotu bele hatudu katak ita hafolin irmaun-irmán neʼebé klosan. Terseiru, ita mós sei aprende oinsá atu hatudu respeitu ba irmaun-irmán sira neʼebé seidauk koʼalia ita-nia língua ho moos.

4. Iha Roma 12:10, Paulo fó konsellu saida ba katuas sira?

⁴ Jeová mak hili katuas hotu iha kongregasaun liuhusi espíritu santu. No katuas ida-idak iha abilidade neʼebé la hanesan. (1 Kor 12:17, 18) Balu foin mak sai katuas, tan neʼe sira ladún iha esperiénsia barak. Katuas seluk labele halo buat barak tanba saúde ka idade ona. Maski nuneʼe,  katuas ida labele hatete ba katuas seluk: “Haʼu la presiza ó.” Duké halo nuneʼe, katuas ida-idak presiza halo tuir Paulo nia konsellu neʼebé hakerek iha Roma 12:10.—Lee.

5. Oinsá katuas sira bele hatudu respeitu ba malu? Tanbasá ida-neʼe importante?

⁵ Katuas sira hatudu respeitu ba malu hodi rona ba malu ho didiʼak. Ida-neʼe importante liuliu bainhira katuas sira halo enkontru hamutuk atu koʼalia kona-ba asuntu importante ruma. Tanbasá? Livru Haklaken 1 Outubru 1988 iha lian Inglés hatete: “Katuas sira rekoñese katak Jesus bele uza espíritu santu atu ajuda katuas kongregasaun ida atu hanoin-hetan Bíblia nia prinsípiu. No prinsípiu neʼe bele ajuda katuas sira atu rezolve problema no mós halo desizaun importante. (Após 15:6-15) Espíritu santu ajuda katuas hotu laʼós katuas ida deʼit.”

6. Oinsá katuas sira bele serbisu hamutuk ho unidade? Oinsá ida-neʼe lori benefísiu ba kongregasaun?

⁶ Katuas ida hatudu respeitu ba ninia maluk katuas seluk hodi la koko atu sempre koʼalia uluk durante enkontru katuas nian. Nia la koʼalia barak durante enkontru neʼe, no nia mós la hanoin katak ninia ideia mak sempre loos. Duké halo nuneʼe, nia fó sai ninia ideia ho haraik an. Nia rona didiʼak ba katuas seluk durante enkontru. Buat neʼebé importante liu mak nia prontu atu fó sai prinsípiu husi Bíblia no halo tuir matadalan husi “atan laran-metin no matenek”. (Mt 24:45-47) Durante enkontru, se katuas sira hatudu respeitu no domin ba malu, Maromak nia espíritu santu sei hamutuk ho sira, no sei ajuda sira atu foti desizaun neʼebé hametin kongregasaun.​—Tgo 3:17, 18.

7. Oinsá Jesus nia hanoin kona-ba ema neʼebé klosan?

⁷ Iha kongregasaun laran, iha kaben-naʼin sira no mós família. Maibé iha mós irmaun no irmán barak neʼebé klosan. Ita presiza hanoin oinsá kona-ba sira  neʼebé klosan? Ita presiza banati-tuir dalan neʼebé Jesus haree sira. Jesus rasik la kaben no nia uza tempu atu tau fokus ba ninia knaar. Jesus nunka hanorin katak ema Kristaun tenke klosan nafatin ka tenke kaben. Maibé nia dehan katak ema Kristaun balu deside atu la kaben. (Mt 19:11, 12) Jesus hatudu respeitu ba sira neʼebé la kaben. Nia la hanoin katak ema neʼebé kaben mak diʼak liu fali sira neʼebé klosan ka sira falta buat ruma iha sira-nia moris tanba klosan nafatin.

8. Tuir 1 Korinto 7:7-9, Paulo anima ema Kristaun atu tetu didiʼak kona-ba saida?

⁸ Hanesan Jesus, apóstolu Paulo mós klosan no tau fokus ba ninia knaar atu haklaken. Paulo nunka hanorin katak sala ba ema Kristaun atu kaben. Nia rekoñese katak neʼe mak ema ida-idak nia desizaun. Maski nuneʼe, Paulo anima ema Kristaun atu tetu didiʼak se sira bele serbí Jeová nuʼudar ema klosan. (Lee 1 Korinto 7:7-9.) Paulo la hanoin katak ema neʼebé kaben mak diʼak liu fali sira neʼebé klosan. Paulo hili joven Timóteo neʼebé klosan atu halaʼo knaar importante. * (Flp 2:19-22) Tan neʼe, sala atu hanoin katak irmaun ida nia knaar iha kongregasaun depende deʼit ba nia klosan hela ka kaben ona.​—1 Kor 7:32-35, 38.

9. Ita presiza hanoin oinsá kona-ba kaben no klosan nafatin?

⁹ Jesus no Paulo nunka hanorin katak ema Kristaun tenke klosan nafatin ka tenke kaben. Entaun, ita presiza hanoin oinsá kona-ba kaben no klosan nafatin? Livru Haklaken 1 Outubru 2012 iha lian Inglés hatete: “Tuir loloos, [moris kaben ka klosan nafatin] mak prezente husi Maromak. . . . Jeová la hanoin katak ema klosan presiza sente moe ka triste tanba la kaben.” Tan neʼe, ita presiza hatudu respeitu ba irmaun-irmán sira neʼebé klosan iha kongregasaun.

10. Oinsá ita bele hatudu respeitu ba irmaun-irmán klosan sira?

¹⁰ Oinsá ita bele hatudu respeitu ba irmaun-irmán klosan sira-nia sentimentu no situasaun? Ita presiza hanoin-hetan katak ema Kristaun balu neʼebé klosan deside atu la kaben. Sira seluk hakarak kaben, maibé seidauk hetan ema neʼebé diʼak ba sira. Ema balu tan klosan tanba sira-nia kaben mate ona. Iha situasaun hotu neʼe, ema seluk iha kongregasaun  labele husu tanbasá ema neʼebé klosan seidauk kaben no koko atu buka pár ba sira. Karik dala ruma, irmaun-irmán klosan balu husu ita atu ajuda sira hetan pár. Maibé se irmaun-irmán sira-neʼe la husu ita-nia ajuda no ita buka pár ba sira, sira sei sente oinsá? (1 Tes 4:11; 1 Tim 5:13) Mai ita koʼalia kona-ba irmaun-irmán klosan balu nia hanoin.

11-12. Saida mak bele halo ema klosan sira sente laran-kraik?

¹¹ Katuas área ida neʼebé klosan no badinas hatete katak moris nuʼudar ema klosan lori benefísiu oioin. Maibé, nia fó sai katak dala ruma ita bele sai laran-kraik tanba irmaun-irmán sira koko atu ajuda hodi husu: “Tanbasá ó seidauk kaben?” Irmaun ida neʼebé klosan no serbí iha sukursál hatete: “Dala ruma irmaun-irmán balu halo haʼu sente katak moris nuʼudar ema klosan mak kuitadu loos. Neʼe bele halo ema sente katak moris nuʼudar ema neʼebé klosan mak buat neʼebé todan laʼós nuʼudar prezente.”

¹² Irmán klosan ida neʼebé serbí iha Betel hatete: “Irmaun-irmán balu hanoin katak ema klosan hotu buka pár ka ema klosan sira haree tempu atu halibur hamutuk nuʼudar oportunidade atu buka pár. Loron ida haʼu bá fatin seluk atu halaʼo knaar ruma, no haʼu toʼo fatin neʼe iha loron neʼebé halaʼo reuniaun. Irmán neʼebé simu haʼu nuʼudar bainaka hatete katak iha irmaun naʼin-rua iha ninia kongregasaun neʼebé tinan hanesan ho haʼu. Nia hatete katak nia la koko atu buka pár ba haʼu. Maibé, kuandu ami toʼo Reuniaun-Fatin, nia fó koñese kedas haʼu ba irmaun naʼin-rua neʼe. No neʼe halo ami naʼin-tolu sente moe.”

13. Sé nia ezemplu mak anima irmán klosan ida?

¹³ Irmán klosan seluk neʼebé serbí iha Betel hatete: “Haʼu koñese pioneiru sira neʼebé klosan ba tempu kleur. Sira iha hanoin neʼebé loos, fokus ba sira-nia planu, prontu atu ajuda ema seluk no kontente. Sira ajuda tebes kongregasaun. Sira iha hanoin neʼebé loos kona-ba sira-nia moris nuʼudar ema klosan. Sira la hanoin katak sira diʼak liu tanba klosan nafatin ka la hanoin katak sira falta buat ruma tanba la kaben no la iha oan.” Ita kontente tebes atu sai parte ba kongregasaun neʼebé ema hotu respeitu no hafolin malu. Ita hatene katak ita-nia irmaun-irmán sira la hanoin ita mak kuitadu loos ka sai laran-moras ba ita, sira hatudu laran-diʼak ba ita no sira la sente katak sira diʼak liu fali ita. Ita hatene katak sira hadomi ita.

14. Oinsá ita bele hatudu respeitu ba irmaun-irmán klosan sira?

¹⁴ Irmaun-irmán neʼebé klosan sei kontente se ita hafolin sira-nia hahalok diʼak no la hanoin katak sira mak kuitadu tanba klosan hela. Diʼak se ita hafolin sira tanba sira-nia laran-metin. Rezultadu mak irmaun-irmán neʼebé klosan sei la sente katak ita hatete ba sira: “Haʼu la presiza ó.” (1 Kor 12:21) Maibé sira sei sente katak ita hatudu respeitu ba sira no hafolin sira iha kongregasaun.

15. Ema balu halo mudansa saida atu serbí Jeová liután?

¹⁵ Iha tinan hirak-neʼe nia laran, haklaken-naʼin barak halo planu atu aprende língua seluk hodi nuneʼe sira bele aumenta liután sira-nia serbisu haklaken.  Atu halo nuneʼe sira presiza halo mudansa. Irmaun-irmán sira-neʼe husik sira-nia kongregasaun atu bele serbí iha kongregasaun neʼebé uza língua seluk no presiza liután haklaken-naʼin. (Após 16:9) Sira halo desizaun neʼe atu bele aumenta sira-nia serbisu ba Jeová. Maski presiza tinan barak atu sira bele koʼalia língua foun ho moos, maibé sira bele ajuda nafatin kongregasaun iha dalan oioin. Sira-nia hahalok diʼak no esperiénsia bele hametin kongregasaun. Ita hafolin tebes irmaun-irmán sira-neʼe tanba sira-nia sakrifísiu.

16. Katuas sira presiza halo desizaun bazeia ba saida?

¹⁶ Grupu katuas sei la dada an atu rekomenda irmaun ida atu serbí nuʼudar katuas ka atan maski nia seidauk koʼalia língua foun ho moos. Katuas sira sei halo desizaun bazeia ba Bíblia nia kritéria kona-ba serbí nuʼudar katuas ka atan, no neʼe la depende ba nia koʼalia língua foun ho moos ka lae.​—1 Tim 3:1-10, 12, 13; Tito 1:5-9.

17. Família Kristaun sira presiza deside kona-ba saida kuandu muda ba nasaun seluk?

¹⁷ Família Kristaun balu muda ba nasaun seluk atu bele hetan protesaun ka buka serbisu. Iha situasaun sira-neʼe, karik sira-nia oan sei tuir eskola neʼebé uza língua nasionál. Sira-nia inan-aman mós karik presiza aprende língua neʼe atu bele hetan serbisu. Oinsá se iha nasaun neʼe, iha kongregasaun ka grupu neʼebé uza sira-nia língua materna? Família Kristaun sira-neʼe presiza tuir kongregasaun neʼebé uza sira-nia língua materna ka kongregasaun neʼebé uza língua nasionál?

18. Tuir Galásia 6:5, oinsá ita hatudu respeitu ba desizaun neʼebé ulun ba família foti?

¹⁸ Ulun ba família mak presiza deside ninia família sei tuir kongregasaun ida-neʼebé. Desizaun neʼe afeta ninia família tomak, tan neʼe nia tenke hanoin saida mak diʼak liu ba ninia família. (Lee Galásia 6:5.) Ita tenke hatudu respeitu ba desizaun neʼebé ulun ba família foti. Ho laran-diʼak, simu ninia desizaun neʼe hodi hatudu domin no simu ninia família iha ita-nia kongregasaun.​—Rom 15:7.

19. Ulun ba família tenke hanoin didiʼak no halo orasaun kona-ba saida?

¹⁹ Inan-aman balu tuir kongregasaun neʼebé uza sira-nia língua materna, maski sira-nia oan la komprende didiʼak língua materna neʼe. Se kongregasaun neʼe uza língua neʼebé la hanesan ho língua nasionál, karik oan sira sente susar atu komprende reuniaun no labele laʼo ba oin iha dalan espirituál. Tanbasá? Tanba labarik sira tuir eskola neʼebé uza língua nasionál, laʼós sira-nia inan-aman nia língua materna. Iha situasaun neʼe, ulun ba família tenke hanoin didiʼak no halo orasaun kona-ba saida mak nia bele halo  atu ajuda ninia oan hakbesik ba Jeová no Jeová nia povu. Inan-aman presiza hanorin sira-nia oan atu komprende sira-nia língua materna ka muda ba kongregasaun neʼebé uza língua neʼebé sira-nia oan komprende ho didiʼak. Irmaun-irmán sira iha kongregasaun presiza hatudu respeitu ba ulun ba família nia desizaun no hatudu katak sira hafolin nia no ninia família.

20. Oinsá ita hatudu respeitu ba irmaun-irmán sira neʼebé aprende daudaun língua foun?

²⁰ Entaun klaru katak kongregasaun barak iha irmaun-irmán sira neʼebé hakaʼas an atu aprende língua foun. Karik susar ba sira atu fó sai sira-nia hanoin. Maibé se ita la hanoin deʼit kona-ba dalan neʼebé sira koʼalia língua foun, ita sei tau fokus ba sira-nia domin ba Jeová no sira-nia hakarak atu serbí nia. Bainhira ita tau fokus ba sira-nia hahalok furak sira-neʼe, neʼe sei book ita atu hafolin no respeitu sira. Ita sei la dehan: “Haʼu la presiza ó” tanba deʼit sira la koʼalia ita-nia língua ho moos.

21-22. Ita hotu iha priviléjiu saida?

²¹ Jeová fó knaar ba ita ida-idak iha ninia kongregasaun, no neʼe mak priviléjiu. Maski ita mak mane ka feto, klosan ka kaben ona, joven ka idade, ka ita seidauk koʼalia língua ho moos, ita hotu mak folin-boot ba Jeová no ita mós hafolin malu.​—Rom 12:4, 5; Kol 3:10, 11.

²² Mai ita kontinua aplika buat neʼebé ita aprende husi Paulo nia ai-knanoik kona-ba isin-lolon. Hodi halo nuneʼe, ita sei hafolin liután ita-nia knaar no mós hafolin ema seluk iha Jeová nia kongregasaun.