1. Ino ty raha nimey i Jehovah ty mpanompo’e tsikiraidraike?

BEY HATEA ty Jehovah, le nimei’e anjara asa sambe hafa ty mpanompo’e tsikiraidraike agnivo fiangonagne eo. Faie ndra tie eo zay, le sambe tena ilaegne iaby tika sady sambe mila ty hafa ka. Magnampe antika hahatakatse ze lesogne lahibey zay ty raha nirehafe i apostoly Paoly. Ino zay?

2. Nagnino tika ro mila magnaja ty hafa naho miara-miasa amy iareo, arake ty Efesianina 4:16?

² Naseho i Paoly mazava soa tamy i andinin-teny fototse ty fianaragne toỳ fa tsy misy amantika afake mirehake amo o mpiara-manompo amantikagneo tie: “Tsy misy ilàko azo.” (1 Kor. 12:21) Mila magnaja ty hafa naho miara-miasa amy iareo tikagne naho teantika hilongo soa o fiangonagneo. (Vakio ty Efesianina 4:16.) Naho miharo saigne tikagne, le sambe hahatsapa ho teagne naho hahazo fampaherezagne.

3. Ino ty hodinehentikagne amy ty lahatsoratse toy?

³ Ino iaby ty azontikagne atao mba hampisehoagne fa magnaja ty hafa tika? Hodinehentikagne voaloha’e tie akore ty azo o androanavi-pagnahio ampisehoagne fa magnaja ty androanavi-pagnahy hafa reke. Faharoe, akore ty ampisehoantikagne fa magnaja o Kristiana tsy manambalio tika. Fahatelo, akore ty ampisehoantikagne fa magnaja ty ndaty tsy mahay soa ty firehantikagne tika.

4. Ino ty toko’e hatao o androanavi-pagnahio, arake ty torohevetse nimey i Paoly amy Romanina 12:10 ao?

⁴ Sambe tinendre ty fagnahy masy i Jehovah iaby o androanavi-pagnahio faie sambe managne ty mampiambake aze iareo. (1 Kor. 12:17, 18) Ty ila’e amy iareo zao vaho tsiela ty tinendre ho androanavi-pagnahy, le mbe tsy le za-draha. Ty ila’e ka fa bey ndra tsy salama, le voafetra avao ty raha va’e ho vita’e. Faie tsy misy amy iareo toko’e hirehake amy ty androanavi-pagnahy hafa tie: “Tsy misy ilàko azo.” Toko’e hagnorike i toroheve i Paoly amy Romanina 12:10 aoy ty androanavi-pagnahy tsikiraidraike.​—Vakio.

5. Akore ty ampisehoa o androanavi-pagnahio fa magnaja ty androanavi-pagnahy hafa iareo, le nagnino zay ro tena ilaegne?

⁵ Trea tie magnaja ty androanavi-pagnahy hafa o androanavi-pagnahio naho fa mitsanogne soa ty hevetse rehafe’e. Tena ilaegne zay, lohotsie naho fa mivory iareo. Nagnino? Izao ty rehafe ty Fitalakesan-davitse 1 Oktobra 1988 (malagasy): “Toko’e heké o androanavi-pagnahio fa afake mampiasa ty fagnahy masigne ty Kristy mba hagnampeagne ty androanavi-pagnahy tsikiraidraike hahatrea ty toro lalagne ilaegne mba hahafantaragne ty raha toko’e hatao ndra ty fanapaha-kevetse mila rambese iareo. (Asa. 15:6-15) Tsy toko’e hieretseretse areke ty raike amy iareo tie ty heve’e avao ro tena ie.”

6. Ino ty hagnampe ty androanavi-pagnahy hiara-hiasa amim-piraisan-tsaigne, le ino ty ho voka izay amo o fiangonagneo?

⁶ Magnaja ty androanavi-pagnahy hafa ka ty androanavi-pagnahy raike naho mikezake mba tsy ho lava ho ie avao ro mirehake voaloha’e naho fa mivory iareo. Tsy toko’e hieretseretse ka reke tie ty heve’e avao ro maregne. Toko’e haseho’e tie miambane reke naho fa mirehake ty heve’e. Mila mitsanogne soa ty heve ty hafa ka reke. Fa ty tena lahibey le tihoe, toko’e hifagnarake amy ty Soratse Masigne naho ty tari-dalagne naboa o “mpanompo mahihitse naho mahimbagneo” ty hevetse rehafe’e. (Mat. 24:45-47) Naho mikezake maneho hatea naho magnaja ty androanavi-pagnahy hafa  o androanavi-pagnahio naho fa mivory iareo, le hiasa amy iareo ty fagnahy masy i Jehovah. Hagnatanjake o fiangonagneo amy izay ty fanapaha-kevetse rambese iareo.​—Jak. 3:17, 18.

7. Akore ty nihevera i Jesosy o Kristiana tsy manambalio?

⁷ Ahatreavagne ndaty mpivaly naho ndaty manambaly aman’anake ty agnivo fiangonagne eo amy izao. Faie misy ka ty tsy manambaly. Akore ty toko’e hiheverantikagne iareo? Akore ty nihevera i Jesosy iareo? Tsy nanambaly ty Jesosy. Nifily ty tsy hanambaly reke satria te hifantoke amy ty asa nagnirahagne aze. Faie tsy nampianatse ty Jesosy tie tsy toko’e hanambaly ty Kristiana raike ndra mila manambaly iareo. Izao avao aza ty nirehafe’e: ‘Misy Kristiana mifily ty tsy hanambaly.’ (Mat. 19:11, 12) Tena nagnaja o ndaty tsy manambalio areke ty Jesosy. Tsy nieretseretse reke tie ambane noho ze ndaty manambaly o tsy manambalio sady mampanahelo ty fiaigna iareo.

8. Ino ty raha nirisihe i Paoly hodinehe o Kristianao, arake ty 1 Korintianina 7:7-9?

⁸ Tsy nanambaly manahake i Jesosy ka ty apostoly Paoly. Faie tsy nampianatse reke tie raty ty manambaly. Ty anto’e, nihai’e tie fanapaha-keve ty ndaty tsikiraidraike ty hanambaly ndra ty tsy hanambaly. Nandrisike o Kristianao avao ty natao’e mba handineke naho vita’e ty tsy manambaly mba hahafaha’e tena hifantoke amy ty fanompoagne. (Vakio ty 1 Korintianina 7:7-9.) Tena nagnaja o Kristiana tsy manambalio ty Paoly. Tsy nanambaly zao ty Timoty faie nijobogne aze ty Paoly mba hanao andraikitse lahibey. * (Fil. 2:19-22) Faie tsy toko’e hieretseretse tika tie azo meigne andraikitse ndra tsy azo meigne andraikitse ty rahalahy raike satria manambaly ndra tsy manambaly.​—1 Kor. 7:32-35, 38.

9. Ino ty azontikagne rehafegne miomba o ndaty manambaly naho tsy manambalio?

⁹ Tsy nampianatse ty Jesosy naho i Paoly tie tsy maintsy manambaly o Kristianao ndra tsy mahazo manambaly iareo. Ino areke ty azontika rehafegne miomba o ndaty manambalio naho o tsy manambalio? Tena soa ty vale’e mey ty Fitalakesan-davitse 1 Oktobra 2012 (malagasy). Izao ty voarehake ao: “Sambe fagnomezagne boake aman’Andrianagnahare ndra tihoe manambaly ndra tsy manambaly.... Amy i Jehovah, o ndaty tsy manambalio, le tsy tihoe ambane ndra mahaferenaigne.” Mila magnaja  o Kristiana tsy manambaly agnivo fiangonagne eò areke tika.

10. Akore ty ampisehoantikagne fa magnaja o Kristiana tsy manambalio tika?

¹⁰ Akore ty azontikagne ampisehoagne fa mihevetse ty fihetseham-po naho ty raha iaigna o rahalahy naho o rahavaventika tsy manambalio tika? Mila tadidientikagne fa nanapa-kevetse ty tsy hanambaly ty ila’e amy iareo. Ty ila’e amy iareo ka te hanambaly avao, faie mbe tsy mahita valy mete ama’e. Ty ila’e ka nimate ty vali’e. Faie ndra ino ndra ino mahavy iareo tsy manambaly, le tsy soa naho magnontane iareo tika tie: ‘Nagnino ihe tsy manambalio?’ Maregne fa misy Kristiana ila’e va’e hipay fagnampeagne amy ty hafa naho fa hipay valy. Faie naho tsy mipay izay iareo, le mila dinehentikagne tie: ‘Ino ty va’e ho tsapa’e naho agnonteneako izay reke?’ (1 Tesalonianina 4:11; 1 Timoty 5:13) Andao tika handineke ty raha nirehafe ty rahalahy naho rahavave tsy manambaly retoagne.

11-12. Ino amy ty raha ataontika ro va’e hahakivy o Kristiana tsy manambalio?

¹¹ Nirehake ty mpiandraikitse faritse raike tie maro ty tombo’e hoahy o Kristiana tsy manambalio. Faie hoe reke: “Naho fa misy Kristiana magnontane ahy tie: ‘Nagnino ihe tsy manambalio?’, le mahatsiaro ho kivy raho kindraike.” Hoe ka ty rahalahy raike tsy manambaly manompo amy Betela ao: “Misy fotoagne o mpiara-manompò manao ze hahatsapako tie mijale o ndaty tsy manambalio. Mahavy ahy hieretseretse ka zay tie haoreagne ze o tsy manambaly zao fa tsy fagnomezagne.”

¹² Hoe ka ze rahavave raike Betelita zay: “Misy mpitory mieretseretse tie: ‘Mipay valy iaby naho fa dogalahy ndra ampela tovo. Le naho fa misy fotoagne mahatafarake iareo amy ty ndaty maromaro, le magnararaotse magnente ty metemete ama’e iareo amy igne.’ Tinendre hanao asa i Betela amy ty toeragne hafa agne raho tie indraike. Halegne ty niaviako tagne tamy izay sady andro fivoriagne ka. Le hoe i rahavave nivantagnakoy tie: ‘Misy rahalahy roe mitovy taogne ama’o zay ty amy fiangona’ay ao.’ Faie tsy noho ireke te hagnampe ahy hahatrea valy, hoe reke, ty nahavy aze nirehake izay. Faie naho vaho niavy amy i Anjomba i Fanjakagney agne raho, le nindese’e amy rahalahy rey egne. Nimegnatse raho naho i rahalahy rey tamy izay.”

13. Ty modely ia ty nampahery ty rahavave raike tsy manambaly?

¹³ Misy rahavave Betelita hafa ka nirehake hoe izao: “Mahay manahatsahatse, managne tanjogne, tea magnampe ty hafa sady falefale o mpisava lalagne tsy manambaly sady fa beio. Tena magnampe o fiangonagneo iareo. Tena soa ty fomba fihevera iareo tihoe tsy manambaly. Tsy mieretseretse iareo tie ambone noho ty hafa ndra mampanahelo satria tsy manambaly naho managn’anake.” Tsy mahalatsa areke naho tena mahatsiaro ho fale rehe agnivo fiangonagne eo satria magnaja naho mihevetse azo ho sarobily o mpiara-manompò. Tsy mieretseretse iareo tie mampanahelo rehe, ndra ambone noho iareo. Tsy mialogne azo ka iareo fa tena midare naho tea azo.

14. Akore ty ampisehoantika fa magnaja o Kristiana tsy manambalio tika?

¹⁴ Tena fale o Kristiana tsy manambalio naho fa mihevetse iareo ho sarobily tika noho iareo managne toetse soa sady tsy mieretseretse tie mampanahelo iareo. Toko’e hidera iareo tika noho iareo tsy mivalike amy i Jehovah. Naho manao izay tika, le ho tsapa o rahalahy naho rahavaventikagne tsy manambalio tie tena mila iareo tika. (1 Kor. 12:21) Ho tsapa iareo ka amy izay fa tena magnaja iareo tika sady tena mahafale antika ty fisia iareo agnivo fiangonagne eo.

15. Ino ty fiovagne natao ty Kristiana ila’e mba hahafaha’e mampitombo ty fanompoa’e?

¹⁵ Maro ty rahalahy naho rahavave nianatse firehake hafa tato ho ato mba hahafaha iareo mampitombo ty fanompoa’e. Maro ka areke ty fagnovàgne tsy maintsy natao iareo tamy ty fiaigna’e. Mifindra amy ty fiangonagne mila mpitory maro ohatse iareo mba hagnampeagne ty mpitory amy fiangonagne mampiasa i firehake nianara iareoy. (Asa. 16:9) Nandrambe ze fanapaha-kevetse zay o Kristiana rehoe mba hampandrosoagne ty asa i Fanjakagney. Maregne fa va’e ho an-tao’e maro iareo vaho tena mahay soa i firehake nianara iareoy, faie tena magnampe i fiangonagne vaovao misy iareoy ty kezake atao iareo. Magnatanjake i fiangonagney ty toetse soa anagna iareo naho ty raha niaigna iareo vaho ty raha hay iareo. Toko’e ho sarobily amantika areke iareo noho iareo mahafoe tegna.

16. Ino ty raha toko’e ho hentea o androanavi-pagnahio naho fa hanendre rahalahy raike ho androanavi-pagnahy ndra mpagnampe amy ty fanompoagne iareo?

¹⁶ Tsy toko’e hieretseretse o androanavi-pagnahio tie tsy azo tendregne ho androanavi-pagnahy ndra mpagnampe amy ty fanompoagne ty rahalahy raike satria tsy mahay soa ty firehake ampiasaegne agnivo fiangonagne eo. Ty raha také ty Soratse Masigne ro toko’e ho hentea iareo fa tsy tihoe mahay soa ty firehake ampiasaegne agnivo fiangonagne eo vao i rahalahỳ sa tsy mahay.​—1 Tim. 3:1-10, 12, 13; Tit. 1:5-9.

17. Ino ty fagnonteneagne mila dinehe o keleiagneo naho fa mifindra an-tane hafa agne iareo?

¹⁷ Misy keleiagne ila’e tsy maintsy mifindra an-tane hafa agne noho ty asa’e ndra noho ty olagne misy an-tane iareo agne. Ino ty voka izay? Va’e hila hianatse ty firehake ampiasaegne an-toeragne eo ty ana iareo satria izay ty ampiasaegne an-dakilasy agne. Hoe izay ka ty rae aman-drene iareo fa naho tsy izay le tsy hahatrea asa. Akore naho misy fiangonagne ndra antoko mpitory mampiasa ty fireha iareo ty amy tane nifindrà iareoy agne? Aia ty fiangonagne toko’e hivoria i keleiagne rey? Amy fiangonagne mampiasa ty fireha iareoy vao sa amy fiangonagne mampiasa ty firehake amy taney eoy?

18. Naho henteagne ty Galatianina 6:5, ino ty toko’e hataontika mba hampisehoagne fa magnaja ty fanapaha-kevetse rambese ty loha o keleiagneo tika?

¹⁸ Ty loha ty keleiagne ro manapa-kevetse tie aia ty fiangonagne hivoria iareo. Satria ty tsikiraidraike ro manapa-kevetse miomba izay, le ireke ro mila mandineke ze tena hahasoa ty keleia’e. (Vakio ty Galatianina 6:5.) Le ndra ino ndra ino fanapaha-kevetse rambese’e, le mila magnaja izay tika. Mila rambesentikagne soa iareo naho fa avy amy fiangonantikagne eo sady mila asehontikagne tie sarobily amantika iareo.​—Rom. 15:7.

19. Ino ty raha mila dinehe ty loha ty keleiagne am-bavake?

 ¹⁹ Misy keleiagne ila’e manapa-kevetse ty hivory amy ty fiangonagne mampiasa ty fireha iareo ndra tie an-tane hafa agne. Faie ty olagne va’e mbe tsy le mahay soa i firehan-draza iareoy ty ana iareo. Tena ho sahiragne areke i ana iareoy naho fa mivory satria i firehake an-toeragne eoy ty ampiasae iareo mateteke naho fa an-dakilasy agne. Voka’e, tsy le ho azo iareo fire ty raha rehafegne am-pivoriagne agne sady tsy handroso ara-pagnahy ka iareo. Naho izay ty raha miseho, le mila mivavake i loha ty keleiagney sady mandineke soa tie ino ty raha mila atao iareo mba hahavy i ana iareo rey hifandrambe soa amy i Jehovah naho amo o mpiara-manompò. Ndra iareo hagnampe i ana iareoy mba hahay soa i firehan-draza iareoỳ, ndra iareo hifindra amy ty fiangonagne mampiasa ty firehake an-toeragne eo naho ohatse izay ty firehake tena azo i ana iareoy soa. Faie ndra ino ndra ino fanapaha-kevetse rambese i loha ty keleiagney, le mila magnaja naho mihevetse iareo ho sarobily ze fiangonagne misy iareo.

20. Akore ty ampisehoantikagne tie magnaja o mpiara-manompo amantika mianatse firehake vaovaò tika?

²⁰ Faie ndra ino ndra ino anto’e mahavy o rahalahy naho rahavaventikagneo hifindra fiangonagne, le maro amy iareo ty mikezake mafe hianatse i firehake vaovao ama’ey. Va’e ho sarotse amy iareo ty hirehake ze raha an-tsai’e ao. Faie naho tsy mifantoke amy ze tsy fahaia iareo zay tika, le ho treantika tie tena tea i Jehovah iareo sady te hanompo aze. Hagnampe antika hagnaja iareo naho hihevetse iareo ho sarobily ty fahatreavantikagne izay. Tsy hirehake amy iareo ka tika tie: “Tsy misy ilàko azo”, noho iareo tsy mahay soa ty firehantikagne.

21-22. Ino ty tombotsoa miambake anagnantika?

²¹ Tena mankasitrake i Jehovah tika noho ireke nagnomey antika tombotsoa sarobily agnivo fiangonagne eo. Ndra lahilahy tika ndra ampela, ndra manambaly ndra tsy manambaly, ndra antetse ndra tanora, ndra mahay soa ty firehake ampiasaegne amy ty fiangonagne misy antikagne eo ndra tsy mahay soa, le sambe sarobily amy i Jehovah naho amo o mpiara-manompò tika.—Rom. 12:4, 5; Kol. 3:10, 11.

²² Maro ty lesogne nianarantika amy i fagnohara i Paoly miomba ty vata o ndatioỳ. Lonike abey mba hampiharentikagne i lesogne rey. Hahatrea fomba maro hampaherezagne o mpiara-manompò tika amy izay sady hagnaja naho ho tea iareo lognandro.