1. Ncinzi Jehova ncaakapa mubelesi wakwe uuli woonse uusyomeka?

CALUYANDO, Jehova wakapa mubelesi wakwe uuli woonse uusyomeka busena mumbungano. Nokuba kuti tucita milimo iindene-indene, toonse tulayandika kapati alimwi tuyandika kugwasyanya. Mwaapostolo Paulo ulatugwasya kumvwisya makani aaya aayandika kapati. Munzila nzi?

2. Kweelana alugwalo lwa Baefeso 4:16, nkaambo nzi ncotweelede kubikkilana maano alimwi akubelekela antoomwe?

² Kweelana alugwalo aayeeme cibalo eeci, Paulo wakakulwaizya kuti kunyina mubelesi wa Jehova iweelede kwaambila mubelesinyina kuti: “Tokwe mulimo kulindime.” (1Kor. 12:21) Kutegwa kube luumuno mumbungano, tweelede kubikkilana maano alimwi akubelekela antoomwe. (Amubale Baefeso 4:16.) Kuti katubelekela antoomwe calukamantano, aumwi uyoolimvwa kuyandwa alimwi mbungano iyooyuma.

3. Ncinzi ncotutiilange-lange mucibalo eeci?

³ Muunzila nzi zimwi motukonzya kutondezya kuti tulabalemeka Banakristoma? Mucibalo eeci, tulalanga-langa kujatikizya baalu mbobakonzya kulemekana, mbotukonzya kulemeka bakwesu batakwete alimwi abacizyi batakwetwe. Mpoonya tulaiya mbotukonzya kubalemeka aabo ibatauzyi kabotu mwaambo wesu.

4. Ndulayo nzi ndwaakapa Paulo kulugwalo lwa Baroma 12:10 ndobeelede kutobela baalu?

⁴ Baalu boonse bakasalwa amuuya uusalala wa Jehova. Pele aumwi ulijisi cipego ciindene. (1Kor. 12:17, 18) Ambweni  bamwi bakasalwa caino-ino, aboobo tabajisi luzyibo lunji. Ibamwi tabakonzyi kucita zinji akaambo kakucembaala alimwi akuciswa-ciswa. Nokuba boobo, taakwe mwaalu iweelede kwaambila mwaalunyina kuti, “Tokwe mulimo kulindime.” Muciindi caboobo, mwaalu uuli woonse weelede kulutobela lulayo lwa Paulo iluli kulugwalo lwa Baroma 12:10.—Amubale.

5. Mbuti baalu mbobakonzya kulemekana alimwi nkaambo nzi ncociyandika kapati kucita boobo?

⁵ Baalu balatondezya kuti balalemekana kwiinda mukuswiililana. Eeci cilayandika kapati kwaambisya ciindi nobaswaangana kutegwa babandike makani aamwi. Nkaambo nzi? Ngazi Yamulindizi yamu October 1, 1988, yakaamba kuti: “Baalu balizyi kuti Kristo, kwiinda mukubelesya muuya uusalala, ulakonzya kusololela mwaalu uuli woonse ikwaamba njiisyo yamu Bbaibbele iikonzya kubagwasya baalu boonse kuzyiba cakucita mubukkale bumwi naa kusala cakucita mumakani aamwi. (Mil. 15:6-15) Muuya uusalala ulabagwasya baalu boonse ikutali omwe buyo pe.”

6. Mbuti baalu mbobakonzya kubelekela antoomwe calukamantano alimwi ino mbungano igwasyigwa buti ciindi nobacita boobo?

⁶ Mwaalu uulemeka baalunyina talili lyoonse nasaanguna nguwe kubandika amuswaangano wabaalu. Talinguwe waambaula ciindi coonse alimwi kunyina nayeeya kuti mizeezo yakwe lyoonse njiiluzi. Muciindi caboobo, ulaamba mbwayeeya cakulicesya. Ulaswiilila cakubikkila maano ciindi baalunyina nobaambaula. Alimwi kwiinda zyoonse, ulilibambilide kwaamba njiisyo zyamu Magwalo alimwi akutobela busolozi buzwa ‘kumuzike uusyomeka alimwi uucenjede.’ (Mt. 24:45-47) Ciindi baalu nobabandika twaambo munzila yaluyando alimwi akulemekana, muuya uusalala wa Leza unooliko alimwi unoobasololela kusala zintu zikonzya kuyumya mbungano.—Jak. 3:17, 18.

7. Mbuti Jesu mbwaakali kubabona aabo ibatakakwete naa kukwatwa?

⁷ Mumbungano muli banabukwetene alimwi amikwasyi. Kunze lyaboobo, muli bakwesu  banji batakwete alimwi abacizyi banji ibatakwetwe. Mbuti mbotweelede kubabona aabo ibatakwete alimwi abatakwetwe? Atubone Jesu mbwaakali kubabona. Mumulimo wakwe woonse waanyika, Jesu kunyina naakakwata. Wakazumanana katakwete akubikkila maano kumulimo wakwe. Kunyina naakayiisya kuti kukwata naa kukwatwa nceelelo ca Bunakristo. Nokuba boobo, wakaamba kuti Banakristo bamwi bayoosala kutakwata naa kutakwatwa. (Mt. 19:11, 12; 19:12) Jesu wakali kubalemeka aabo ibatakakwete naa kukwatwa. Kunyina naakali kubabona kuti mbaansi naa kuti kuli ncobaindwa.

8. Kweelana alugwalo lwa 1 Bakorinto 7:7-9, ncinzi Paulo ncaakakulwaizya Banakristo kucita?

⁸ Mbubwenya mbuli Jesu, mwaapostolo Paulo awalo wakazumanana katakwete mumulimo wakwe. Paulo kunyina naakayiisya kuti cililubide ku Munakristo kukwata naa kukwatwa. Wakalizyi kuti aaya makani aakulisalila. Nokuba boobo, Paulo wakakulwaizya Banakristo kubona naa balakonzya kusala kumubelekela Jehova kabatakwete naa kukwatwa. (Amubale 1 Bakorinto 7:7-9.) Paulo kunyina naakali kubona Banakristo batakwete naa batakwetwe kuti mbaansi kwiinda baabo ibakakwete naa kukwatwa. Mane buya, wakasala Timoteyo iwatakakwete kulanganya zintu ziyandika kapati mumulimo wa Jehova. * (Flp. 2:19-22) Aboobo inga kwaba kulubizya kuyeeya kuti mukwesu uleelela naa teeleli kupegwa mikuli kwiinda mukulanga buyo kuti ulikwete naa takwete.—1Kor. 7:32-35, 38.

9. Ncinzi ncotukonzya kwaamba kujatikizya kukwata naa kukwatwa alimwi akutakwata naa kutakwatwa?

⁹ Jesu alimwi a Paulo kunyina nobakayiisya kuti Banakristo beelede kukwata naa kukwatwa alimwi akuti tabeelede kukwata naa kukwatwa. Pele ino ncinzi ncotukonzya kwaamba kujatikizya kukwata naa kukwatwa alimwi akutakwata naa kutakwatwa? Ngazi Yamulindizi yamu October 1, 2012, yakacisalazya kwiinda mukwaamba kuti: “Kukwata naa kukwatwa alimwi akutakwata naa kutakwatwa kulakonzya kwaambwa kuti ncipego kuzwa kuli Leza. . . . Jehova kunyina nabona kuti bantu batakwete naa batakwetwe beelede kufwa nsoni naa kuusa akaambo kakuti tabakwete naa kukwatwa.” Katukayeeyede kaambo aaka, tweelede kubulemeka busena mbobajisi mumbungano bakwesu batakwete alimwi abacizyi batakwetwe.

10. Mbuti mbotukonzya kutondezya kuti tulabalemeka bakwesu batakwete alimwi abacizyi batakwetwe?

 ¹⁰ Mbuti mbotukonzya kutondezya kuti tulabalemeka bakwesu batakwete alimwi abacizyi batakwetwe? Inga cabota kuyeeya kuti Banakristo aaba bamwi bakalibikkila mbaakani yakuzumanana kabatakwete naa kukwatwa. Bamwi balayanda kukwata naa kukwatwa, nkuti buyo tabanajana muntu weelela. Mpoonya bamwi bakafwidwa. Kufwumbwa mbocibede, sena bamwi mumbungano beelede kubuzya Banakristo aaba ikaambo ncobatakwete naa kukwatwa naa ambweni kulyaaba kubagwasya kujana muntu wakukwatana limwi? Zimwi ziindi, batakwete naa kukwatwa balakonzya kulomba lugwasyo luli boobu. Pele kuti naa tiibalomba, mbuti mukwesu uutakwete naa mucizyi uutakwetwe mbwakonzya kulimvwa kuti umwi mumbungano walyaaba kumugwasya kujana muntu wakukwatana limwi? (1Tes. 4:11; 1Tim. 5:13) Lino atumvwe nzyobakaamba bakwesu batakwete alimwi abacizyi batakwetwe.

11-12. Mbuti mbotukonzya kubatyompya aabo ibatakwete naa kukwatwa?

¹¹ Mulangizi wabbazu umwi uutakwete uubeleka kabotu mumulimo wakwe ulimvwa kuti kuli bubotu bunji buliko akaambo kakutakwata. Pele wakaamba kuti cilatyompya kapati kuti bakwesu alimwi abacizyi basimide kumuuya kabamubuzya kuti: “Ino ncinzi cikupa kutakwata?” Mukwesu umwi uutakwete uubelekela kuofesi yamutabi wakaamba kuti: “Zimwi ziindi bakwesu alimwi abacizyi bandipa kulimvwa kuti aabo ibatakwete naa kukwatwa beelede kufwidwa luse. Eeci cilibonya mbuli kuti kutakwata naa kutakwatwa tacili cipego, pele ndipenzi.”

¹² Mucizyi uutakwetwe uubelekela ku Beteli wakaamba kuti: “Bakwesu abacizyi bamwi bayeeya kuti boonse batakwete naa kukwatwa bayandaula muntu wakukwatana limwi naa kuti kufwumbwa ciindi nobali ankamu yabantu, ncoolwe cakujana muntu wakukwatana limwi. Ciindi nondakaunka kubusena bumbi kuyoobeleka mulimo ngondibeleka amutabi, ndakasika buzuba bwamuswaangano. Mucizyi nkondakaswailide wakandaambila kuti kwakali bakwesu bobilo mumbungano ibaciimo cangu. Wakandaambila kuti tanaakali kusola kundijanina muntu wakukwatana limwi. Pele mbotwakanjilila buyo mu Ŋanda ya Bwami, wakanditola nkobakabede bakwesu aabo kutegwa tuzyibane ambabo. Kwaamba masimpe, eeci cakali kujazya nsoni.”

13. Nzikozyanyo nzi izyakamukulwaizya mucizyi umwi uutakwetwe?

¹³ Aumwi mucizyi uutakwetwe uubelekela ku Beteli wakaamba kuti: “Kuli bapainiya batakwete naa kukwatwa ibacita kabotu, ibajisi mbaakani zibotu, ibalyaabide kugwasya bamwi alimwi ibakkomene. Masimpe bapainiya aaba ncikozyanyo cibotu kapati mumbungano. Kutakwata naa kutakwatwa bakubona munzila yeelede. Kunyina nobalibona kuti bali kabotu kwiinda bamwi akaambo kakuti tabakwete naa kukwatwa akuti tabakkomene akaambo kakuti tabajisi mweenzinyina wamulukwatano alimwi abana.” Cilakkomanisya kuba mumbungano mwalo boonse mobalemekana alimwi akubikkilana maano. Inga ulimvwa kuti bakwesu abacizyi tabakufwidi luse naa munyono, balakubikkila maano alimwi tabayeeyi kuti ulabainda. Inga ulizyi buya kuti balakuyanda.

14. Mbuti mbotukonzya kutondezya kuti tulabalemeka aabo ibatakwete naa kukwatwa?

¹⁴ Bakwesu alimwi abacizyi batakwete naa kukwatwa balakkomana ikuti katubikkila maano kube bubotu mbobajisi, ikutali kubafwida luse akaambo kakuti tabakwete naa kukwatwa. Muciindi cakubafwida luse, tweelede kubalumbaizya akaambo kakusyomeka kwabo. Kuti twacita oobo, bakwesu alimwi abacizyi aaba  kunyina nobayoolimvwa kuti tubaambila kuti: “Tamukwe mulimo kulindime.” (1Kor. 12:21) Muciindi caboobo, bayoobona kuti tulabalemeka alimwi abusena mbobajisi mumbungano.

15. Nkucinca nzi bamwi nkobacita kutegwa bayungizye mulimo wabo wakukambauka?

¹⁵ Mumyaka misyoonto yainda, basikumwaya banji baiya myaambo iimbi kutegwa bayungizye mulimo wabo wakukambauka. Kutegwa bacite oobo, bakacinca bukkale bwabo. Bakwesu alimwi abacizyi aaba bakasiya mbungano izibelesya myaambo yabo kutegwa bakabelekele kumbungano zibulide basikumwaya ba Bwami izibelesya myaambo iimbi. (Mil. 16:9) Bakalisalila buya kucita boobo kutegwa babelekele Jehova kusikila mpobagolela. Nokuba kuti ambweni inga cabatolela myaka kwiizyiba kabotu myaambo mipya, balazigwasyilizya mbungano mumbazu zinji. Bakwesu abacizyi mumbungano balakulwaizyigwa akaambo kabube bubotu mbobajisi alimwi aluzyibo. Eelo kaka tulabayanda kapati bakwesu alimwi abacizyi aaba ibalyaabide!

16. Ncinzi cikonzya kupa kuti mukwesu ayelele kuba mwaalu naa mukutausi?

¹⁶ Kabunga kabaalu takeelede kuwayawaya kulumbaizya mukwesu kuti abe mwaalu naa mukutausi akaambo buyo kakuti tanauzyiba kabotu mwaambo uubelesyegwa ambungano. Baalu bayoomulanga-langa mukwesu kweelana azyeelelo zyamu Magwalo nzyeelede kuba anzizyo mukwesu kutegwa ayelele kuba mwaalu naa mukutausi, ikutali kweelana ambwauzyi mwaambo uubelesyegwa ambungano.—1Tim. 3:1-10, 12, 13; Tit. 1:5-9.

17. Mibuzyo nzi bazyali njobeelede kulibuzya ciindi nobalongela kucisi cimbi?

¹⁷ Mikwasyi ya Banakristo imwi yakalongela kuzisi zimbi kutegwa ijane lukwabililo naa mulimo. Mubukkale oobu, bana babo balakonzya kuunka kuzikolo ziyiisya mwaambo uubelesyegwa kapati mucisi eeco. Abalo bazyali balakonzya kwiiya mwaambo uubelesyegwa kapati mucisi eeco kutegwa bajane mulimo. Ino mbuti kuti kubusena nkobakkala kakuli mbungano naa kabunga kabelesya mwaambo wabo? Ino mukwasyi weelede kuunka kumbungano iibelesya mwaambo nzi? Sena nkuumbungano ibelesya mwaambo uubelesyegwa kapati mucisi naa kumbungano iibelesya mwaambo wabo?

18. Kweelana alugwalo lwa Bagalatiya 6:5, mbuti mbotukonzya kutondezya kuti tulakulemeka kusala kwasilutwe wamukwasyi?

¹⁸ Silutwe wamukwasyi weelede kusala mbungano nkobeelede kunoounka. Weelede kubona cikonzya kugwasya mukwasyi wakwe. (Amubale Bagalatiya 6:5.) Akaambo kakuti aaya makani aakulisalila, tweelede kukulemeka kusala kwasilutwe wamukwasyi. Kufwumbwa ncakonzya kusala, atukulemeke kusala ooko kwiinda mukuutambula amaanza obilo mukwasyi wakwe alimwi akuutondezya luyando.—Rom. 15:7.

19. Makani nzi basilutwe bamikwasyi ngobeelede kupailila?

 ¹⁹ Mubukkale bumwi, mikwasyi ilakonzya kaili kumbungano iibelesya mwaambo wabazyali babo, pele bana tabauzyi kabotu mwaambo ooyo. Ikuti mbungano eeyo kaili kubusena nkobabelesya mwaambo uubelesyegwa kapati mucisi, ambweni inga kacibakatazya bana kumvwisya ciindi camiswaangano alimwi tabakonzyi kuunka ambele kumuuya. Nkaambo nzi? Nkaambo kakuti bana ambweni baiya kucikolo nkobabelesya mwaambo uubelesyegwa kapati mucisi ikutali mwaambo wabazyali babo. Kuti naa kacili boobo, basilutwe bamikwasyi beelede kwaapailila makani aaya akubona ncobakonzya kucita kutegwa bagwasye bana babo kuba acilongwe a Jehova alimwi abantu bakwe. Bazyali beelede kubagwasya bana babo kuuzyiba kabotu mwaambo wabo naa kulongela kumbungano iibelesya mwaambo ngobazyi kabotu bana babo. Kufwumbwa ncaasala silutwe wamukwasyi, bakwesu abacizyi mumbungano eeyo nkobaunka beelede kubalemeka alimwi akubabikkila maano.

20. Mbuti mbotukonzya kutondezya kuti tulabalemeka bakwesu alimwi abacizyi ibaiya mwaambo mupya?

²⁰ Kujatikizya twaambo toonse ntotwabandika, mumbungano zinji, kuli bakwesu alimwi abacizyi ibasoleka canguzu kwiiya myaambo mipya. Cilakonzya kubakatazya kwaamba mbobalimvwa. Pele kuti twabikkila maano kukusolekesya nkobacita kwiiya mwaambo mupya, tuyoobona kuti balamuyanda kapati Jehova alimwi balayandisisya kumubelekela. Ikuti twabikkila maano kube bubotu mbobajisi, masimpe tuyoobalemeka alimwi akubayanda kapati bakwesu abacizyi aaba. Tatukabaambili kuti, “Tamukwe mulimo kulindime” akaambo buyo kakuti tabauzyi kabotu mwaambo wesu.

21-22. Ncoolwe nzi citaliboteli kapati ncotujisi?

²¹ Jehova watupa coolwe citaliboteli cakuba abusena mumbungano yakwe. Kufwumbwa naa tuli mwaalumi naa mukaintu, tatukwete naa kukwatwa, tuli bapati, bana naa tuwaambaula kabotu mwaambo uumbi naa tusola buyo, tulayandika kapati kuli Jehova alimwi akuli umwi amweenzinyina.—Rom. 12:4, 5; Kol. 3:10, 11.

²² Atube amakanze aakuzibelesya ziiyo zibotu kapati nzyotwaiya kuzwa kucikozyanyo ca Paulo camubili wamuntu. Kuti twacita oobo, tuyoojana nzila zinji mbotukonzya kutondezya kulumba kubusena mbotujisi mumbungano ya Jehova alimwi abusena bwabamwi.