1. ¿Tuku kalakgayawa Jehová chatunu xlakskujnin tiku ni makgxtakgkgo?

XLAKATA Jehová kapaxki kskujnin tiku ni makgxtakgkgo wi tuku kalakgayawa kcongregación. Maski chatunu akinin tanu tanu taskujut tlawayaw, kimputumkan xtapalh litaxtuyaw chu lamaklakaskinaw. Apóstol Pablo kinkamakgtayayan naʼakgatekgsaw uma tuku lu xlakaskinka. ¿La tlawa?

2. Chuna la wan Efesios 4:16, ¿tuku xlakata xlakaskinka xtapalh nalaʼakxilhaw chu akxtum naskujaw?

² Chuna la lichuwinan texto nema litsuku artículo, Pablo wa pi ni nakaʼakxilhaw amakgapitsi kskujnin Jehová chu nalakpuwanaw «Ni kkamaklakaskinan» (1 Cor. 12:21). Xlakata naʼanan takaksni kcongregación, xlakaskinka xtapalh nalaʼakxilhaw chu akxtum naskujaw (kalikgalhtawakga Efesios 4:16). Akxni makxtum layaw, natalan tatliwakglhkgo chu makgkatsikgo pi kapaxkikan.

3. ¿Tuku nalichuwinanaw kʼuma artículo?

³ ¿Niku tlan nalimasiyayaw pi kamaxkiyaw kakni kinatalankan? Kʼuma artículo, pulana naʼakxilhaw la lakgkgolotsin nakamaxkikgo kakni amakgapitsi lakgkgolotsin. Alistalh, nalichuwinanaw la tlan kimputumkan nalimasiyayaw pi xtapalh kaliʼakxilhaw kinatalankan lakgkgawasan chu laktsuman tiku nina makgaxtokgkgo. Chu xaʼawatiya, naʼakxilhaw la tlan nalimasiyayaw  pi xtapalh kaʼakxilhaw natalan tiku ni liwana chuwinankgo kintachuwinkan.

4. ¿Tuku xtastakyaw Pablo nema wi kRomanos 12:10 xlistalanitkan lakgkgolotsin?

⁴ Putum lakgkgolotsin kalilaksakkanit xʼespíritu santo Jehová, pero chatunu chatunu tanu tanu tuku tlan tlawakgo (1 Cor. 12:17, 18). Max makgapitsi nina makgas kamaxkika uma taskujut chu nina lhuwa tuku titaxtukgonit, chu amakgapitsin nialhla lhuwa tuku tlawakgo xlakata linkgoya kata o xlakata tatatlakgo. Pero ni xlilat pi chatum kgolotsin naʼakxilha achatum kgolotsin chu nawan «Ni kkamaklakaskinan». Wata putum xlistalanitkan xtastakyaw Pablo nema wi kRomanos 12:10 (kalikgalhtawakga).

5. ¿La limasiyakgo lakgkgolotsin pi kamaxkikgo kakni amakgapitsin lakgkgolotsin, chu tuku xlakata xlakaskinka chuna natlawakgo?

⁵ Lakgkgolotsin kalimasiyanikgo kakni amakgapitsin lakgkgolotsin akxni liwana kakgaxmatnikgo. Uma lu xlakaskinka akxni tamakxtumikgo xlakata wi tuku lu xlakaskinka nalichuwinankgo. ¿Tuku xlakata? Kaʼakxilhwi tuku lichuwinalh revista La Atalaya 1 xla octubre kata 1988: «Lakgkgolotsin katsikgo pi Cristo tlan nalipulalin espíritu santo xtalakapastakni chatum kgolotsin nema makgtapakgsi kʼakgtum congregación xlakata nalakapastaka tastakyaw xalak Biblia nema nakamakgtaya nakatsikgo tuku natlawakgo o tuku xlakaskinka nalaksakkgo (Hechos 15:6-15). Espíritu santo kamakgtaya putum lakgkgolotsin xalak congregación chu ni kaj chatum».

6. 1) ¿Tuku tlan nakamakgtaya lakgkgolotsin makxtum naskujkgo? 2) ¿La litamakgtaya congregación?

⁶ Komo chatum kgolotsin kamaxki kakni amakgapitsin lakgkgolotsin, ni wa pulana nawan tuku lakapastaka akxni tlawakgo xtamakxtumitkan. Ni wa tiku lu nachuwinan chu ni katilakpuwa pi ankgalhin tuku wan tlan kitaxtu. Wata akxni wi tuku nawan, nalimasiya pi taktuju chu pi ni putum matlani, chu liwana nakakgaxmatni amakgapitsin. Tuku tlakg xlakaskinka wa pi nalakputsanani tuku wan  Biblia chu na natlawa tuku wan «skujni xatalipaw chu xaskgalala» (Mat. 24:45-47). Akxni lakgkgolotsin lalimasiyanikgo tapaxkit chu kakni xʼespíritu santo Dios kamakgtaya nalaksakkgo tuku namatliwakglha congregación (Sant. 3:17, 18).

7. ¿Tuku xlakpuwan Jesús xpalakata tiku nina xmakgaxtokgkgo?

⁷ Kcongregaciones ni kajwatiya wilakgolh tiku makgaxtokgkgo chu tiku kgalhikgo kamanan, na wilakgolh lhuwa natalan lakgkgawasan chu laktsuman tiku nina makgaxtokgkgo. ¿La nakalikatsiniyaw umakgolh natalan tiku nina makgaxtokgkgo? Kalichuwinaw tuku xlakpuwan Jesús xlakata uma. Akxni xlama kKatiyatni, ni tamakgaxtokgli, wata lilakgaputsalh chu limaklakaskilh xkilhtamaku xlakata nalichuwinan Dios. Jesús nikxni masiyalh pi kstalaninanin xlitamakgaxtokgatkan o ni xlitamakgaxtokgatkan. Pero lichuwinalh pi makgapitsi kstalaninanin xʼamakgo laksakkgo ni natamakgaxtokgkgo (Mat. 19:11, 12). Xla xkamaxki kakni tiku ni xmakgaxtokgkgo chu ni lakpuwa pi nitu xlitaxtukgo o wi tuku xkatsankgani.

8. Chuna la wan 1 Corintios 7:7-9, ¿tuku wa Pablo pi xlilakpuwanatkan kstalaninanin Cristo?

⁸ Chuna la Jesús, apóstol Pablo chatum kskujni Dios tiku na ni xmakgaxtokga. Nikxni masiyalh pi nitlan tamakgaxtokgkan. Xkatsi pi uma chatunu kalakgchan nalaksaka. Maski chuna, kamakgpuwantinilh kstalaninanin Cristo nalilakpuwankgo komo tlan chuna kskujnanikgolh Jehová maski nina xmakgaxtokgkgo (kalikgalhtawakga 1 Corintios 7:7-9). Xlikana pi Pablo ni kalakgmakgalh tiku nina xmakgaxtokgkgo. Asta laksakli Timoteo, chatum kgawasa tiku nina xmakgaxtokga, xlakata xmakgantaxtilh lu xlakaskinka taskujut (Filip. 2:19-22). * Wa xlakata, lu nitlan komo nalakpuwanaw pi chatum tala tlan o nila wi tuku namakgantaxti kaj xlakata makgaxtokga o nina makgaxtokga (1 Cor. 7:32-35, 38).

9. ¿Tuku tlan nawanaw xlakata tamakgaxtokgat chu xlakata tiku nina makgaxtokgkgo?

⁹ Jesús chu Pablo nikxni masiyakgolh pi xtalakaskin natamakgaxtokgkan o ni. Wa xlakata, ¿tuku tlan nawanaw xlakata tamakgaxtokgat chu xlakata tiku nina makgaxtokgkgo? Revista La Atalaya 1 xla octubre kata 2012 liwana  lichuwinalh: «Akgtum xtamaskiwin Dios tamakgaxtokgat chu xlakata tiku nina makgaxtokgkgo. [...] Jehová ni lakpuwan pi tiku nina makgaxtokgkgo xlimaxanatkan o xlilipuwanatkan kaj xlakata nina makgaxtokgkgo». Uma masiya pi talakaskin nakamaxkiyaw kakni natalan xalak congregación tiku nina makgaxtokgkgo.

10. ¿La tlan nalimasiyayaw pi kamaxkiyaw kakni natalan tiku nina makgaxtokgkgo?

¹⁰ ¿La tlan nalimasiyayaw pi kamaxkiyaw kakni tuku makgkatsikgo chu tuku titaxtukgo natalan tiku nina makgaxtokgkgo? Kililakapastakatkan pi makgapitsi kstalaninanin Cristo nina makgaxtokgkgo xlakata chuna laksakkgonit. Amakgapitsin tamakgaxtokgputunkgo, pero nina tekgskgo tiku tlan natatamakgaxtokgkgo. Amakgapitsin max nikgonita tiku xtamakgaxtokgkgo. Maski chuna titaxtumakgo, ni xlilat nakakgalhskinaw tuku xlakata ni makgaxtokgkgo, na ni nakawaniyaw pi nakaputsaniyaw tiku natatamakgaxtokgkgo. Max makgapitsi nakinkaskinikgoyan tamakgtay. Pero komo nichuna, kalilakpuwaw la nakamamakgkatsiniyaw komo wi tuku nakawaniyaw chu nitu kinkaskinikgonitan tamakgtay (1 Tes. 4:11; 1 Tim. 5:13). Kaʼakxilhwi tuku wankgonit makgapitsin natalan tiku nina makgaxtokgkgo.

11, 12. ¿Tuku xtlawalh pi nitlan xkamamakgkatsiniw natalan tiku nina tamakgaxtokgkgo?

¹¹ Chatum tala tiku superintendente de circuito chu tlan taskujut tlawama, lakpuwan pi tlan kitaxtu nina tamakgaxtokgkan. Pero wan pi min kilhtamaku nitlan limakgkatsi akxni makgapitsi natalan kgalhskinkgo tuku xlakata nina makgaxtokga. Chatum tala tiku skujma kʼakgtum sucursal chu nina tamakgaxtokga wan: «Min kilhtamaku, kmakgkatsi pi makgapitsi natalan lilakgalhamanat kaʼakxilhkgo tiku nina tamakgaxtokgkgo, ni akgtum tamaskiwin liʼakxilhkgo uma, wata la akgtum takuka liʼakxilhkgo».

¹² Chatum tala tsumat tiku nina makgaxtokga chu skujma kBetel wan: «Makgapitsi natalan lakpuwankgo pi putum natalan tiku nina makgaxtokgkgo tamakgaxtokgputunkgo o lakpuwankgo pi akxni naʼanan akgtum paskua tlan natekgskgo tiku natatamakgaxtokgkgo. Akgtum kilhtamaku, kimalakgachaka alakatanu kachikin pero watiya kpaís xlakata naktlawa akgtum taskujut, katsisni kchalh chu xwi tamakxtumit. Tala puskat tiku xakama tatamakgxtakga kiwanilh pi kxcongregación xwilakgolh chatiy natalan lakgkgawasan tiku watiya kata xkgalhikgo la akit. Kiwanilh pi ni xʼama putsa tiku xaktatamakgaxtokgli, pero lata ktanuw kPukgalhtawakga kimakgachipalh chu kililh asta niku xwilikgolh umakgolh chatiy natalan xlakata xakkalakgapasli. ¡Lu limaxana tuku ktitaxtuw kinkgalhtutukan!».

13. ¿Tuku makgtayalh chatum tala tsumat tiku nina makgaxtokga?

¹³ Atanu tala tsumat tiku nina makgaxtokga chu skujma kBetel wan: «Kkalakgapasa makgapitsi natalan tiku nina makgaxtokgkgo chu precursores litaxtukgo, ni malakatsalikgo tuku tlawakgo, xatapaxuwan kamakgtayakgo amakgapitsin, kajwatiya lilakpuwankgo chu lipaxuwakgo la skujnanimakgo Dios, chu lu makgtayanankgo kcongregación. Ni malakatsalikgo: ni xlakaskinka kamakgkatsikan xlakata ni makgaxtokgkgo chu na ni lakpuwankgo pi nitu litaxtukgo xlakata ni makgaxtokgkgo chu ni kgalhikgo kamanan». Lu tlan tamakgkatsi namakgtapakgsiya kʼakgtum congregación niku maxkikana kakni chu xtapalh akxilhkana, niku ni lilakgalhamanat akxilhkana chu nitu lakgkatsananikana, niku ni lakgmakgankana o xlakaskinka akxilhkana. Putum makgkatsikgo pi kapaxkikan.

14. ¿La tlan nalimasiyayaw pi kamaxkiyaw kakni tiku nina makgaxtokgkgo?

 ¹⁴ Kinatalankan tiku nina makgaxtokgkgo, paxtikatsininankgo pi xtapalh kaliʼakxilhaw xlakata kgalhikgo lakwan tayat chu ni xlakata makgaxtokgkgo o ni. Ni kakamamakgkatsiniw pi lilakgalhamanat litaxtukgo. Wata xtapalh kaʼakxilhwi pi ni makgatsankgananikgo Dios. Komo chuna natlawayaw, nikxni katimakgkatsikgolh pi kawanimaw «Ni kkamaklakaskinan» (1 Cor. 12:21). Wata nakatsikgo pi kamaxkiyaw kakni chu xlakaskinka akxilhaw tuku tlawakgo kcongregación.

15. ¿Tuku lakkaxwilikgonit makgapitsi natalan xlakata tlakg nalichuwinankgo Dios?

¹⁵ Umakgolh xaʼawatiya kata, lhuwa tiku lichuwinankgo Dios lakkaxwilikgonit nakatsinikgo atanu tachuwin xlakata tlakg nalichuwinankgo Dios. Uma tlawanit pi wi tuku nalakgpalikgo. Makgxtakgkgonit congregación niku chuwinankan xtachuwinkan chu ankgonit niku tlakg talakaskin nalichuwinankan Dios kʼatanu tachuwin (Hech. 16:9). Uma xʼakstukan chuna laksakkgo. Maski akglhuwa kata titaxtu xlakata liwana nakatsinikgo xasasti tachuwin, lu makgtayanankgo kcongregación. Xlakata kgalhikgo laktlan tayat chu tuku titaxtukgonit, uma kamatliwakglha natalan. ¿Ni xlikana pi xtapalh kaʼakxilhaw tuku tlawakgo?

16. ¿Tuku xliʼakxilhatkan lakgkgolotsin komo chatum tala tlan kgolotsin o siervo ministerial nalitaxtu?

¹⁶ ¿Xlilat pi lakgkgolotsin nawankgo komo chatum tala ni lakgchan kgolotsin o siervo ministerial nalitaxtu kaj xlakata ni liwana chuwinan tachuwin xalak congregación? Nichuna. Akxni naʼakxilhkgo komo chatum tala kgolotsin o siervo ministerial nalitaxtu, xliʼakxilhatkan tuku wan Biblia pi xlimakgatsit chu ni wa komo ni liwana chuwinan tachuwin xalak congregación (1 Tim. 3:1-10, 12, 13; Tito 1:5-9).

17. ¿Tuku xlilaksakatkan familias tiku ankgo kʼatanu país?

¹⁷ Makgapitsi familias ankgonit kʼatanu país xlakata kaputsastalanimaka o xlakata putsamakgolh taskujut. Max xkamanankan naʼankgo kʼescuela ktachuwin nema chuwinankan kʼuma país chu max xanatlatni na xlikatsinitkan uma tachuwin xlakata natekgskgo taskujut. Kalilakpuwaw pi anan akgtum congregación o grupo niku chuwinankan xtachuwinkan. ¿Niku xliʼanatkan? ¿Niku chuwinankan xtachuwinkan o niku chuwinankan tachuwin xalak país?

18. Chuna la wan Gálatas 6:5, ¿la limasiyayaw pi maxkiyaw kakni tuku laksaka tiku pulalin familia?

¹⁸ Tiku pulalin familia wa xlilaksakat tuku congregación naʼankgo. Wa xlakata, xlilakpuwanat tuku tlakg tlan namakgtaya xfamilia (kalikgalhtawakga Gálatas 6:5). Xlakata chatunu chatunu lakgchan nalaksaka uma, kilimaxkitkan kakni tuku nalaksaka tiku pulalin familia. Kamaxkiw kakni tuku nalaksaka chu xatapaxuwan kamakgamakglhtinaw uma familia kcongregación (Rom. 15:7).

19. ¿Tuku xlitlawat tiku pulalin familia komo xkamanan ni liwana akgatekgskgo tachuwin nema chuwinankan kcongregación?

 ¹⁹ Max makgapitsi familias wilakgo kʼakgtum congregación niku chuwinankan tachuwin nema chuwinankgo xanatlatni. Pero komo xakamanan ankgo kʼescuela ktachuwin nema chuwinankan kpaís, max umakgolh kamanan ni lu liwana chuwinankgo tachuwin nema chuwinankgo xnatlatnikan. Wa xlakata, max tuwa makgkatsikgo naʼakgatekgskgo tuku talichuwinan ktamakxtumit chu xtakanajlakan nila staka. Komo chuna tatekgskgo, tiku pulalin familia xlitlawanit oración Jehová chu xlilakpuwanat la nakamakgtaya xkamanan xlakata tlakg natalakatsuwinikgo Jehová chu xkachikin. Pulaktiy tuku tlan nalaksakkgo: liwana nakamasiyanikgo xkamanankan tachuwin nema xlakan chuwinankgo o naʼankgo kʼakgtum congregación ktachuwin nema xkamanankan akgatekgskgo. Lata tuku nalaksakkgo, kcongregación niku nalaksakkgo naʼankgo xlitlawatkan pi putuminika familia namakgkatsikgo pi kamaxkikan kakni chu xtapalh kaliʼakxilhkan.

20. ¿La limasiyayaw pi kamaxkiyaw kakni tiku katsinimakgo akgtum tachuwin?

²⁰ Putum tuku akxilhwi kinkamasiyaniyan pi klakalhuwa congregaciones wilakgolh natalan tiku liskujkgo xlakata nakatsinikgo akgtum tachuwin. Max tuwa makgkatsikgo nachuwinankgo, pero komo ni wa nakuentajtlawayaw tuku nila tlawakgo, naʼakxilhaw la paxkikgo Jehová chu pi lu skujnaniputunkgo. Uma natlawa pi nakamaxkiyaw kakni chu xtapalh nakaliʼakxilhaw. Ni kalakpuwaw pi ni kamaklakaskinaw kaj xlakata ni liwana chuwinankgo kintachuwinkan.

21, 22. ¿Tuku xlakata lu paxtikatsiniyaw Jehová?

²¹ Lu paxtikatsiniyaw Jehová xlakata kinkamaxkinitan talakaskin namakgtapakgsiyaw kxcongregación. Maski akinin lakchixkuwin o lakpuskatin, maski makgaxtokgaw o nina, o komo linawa kata o ni, o komo liwana chuwinaw akgtum tachuwin o ni: kimputumkan xtapalh litaxtuyaw kxlakatin Jehová chu natalan (Rom. 12:4, 5; Col. 3:10, 11).

²² Lu tlan tuku katsininitaw xlakata li’akxilhtit nema maklakaskilh Pablo xlakata makni. Komo nalilatamayaw, tlakg naputsayaw la tlan nalimasiyayaw pi lu xlakaskinka li’akxilhaw pi akinin chu amakgapitsin makgtapakgsiyaw kxcongregación Jehová.