1. ¿Bin yilel ya yil Jehová te j-abatetik yuʼune?

TE Jehová mukʼ skʼoplal ya yil ta jujuntul te j-abatetik yuʼune. Manchukme yanyantik te bin ya jnaʼtik spasele, jpisiltik mukʼ jkʼoplaltik sok talel kʼaxel ya jkoltay jbatik. Te jpuk-kʼop Pablo la yakʼ jnaʼtik te yuʼun-nix jich-ae. ¿Bin-utʼil?

2. Jich bitʼil ya yal Efesios 4:16, ¿bin yuʼun ya skʼan ya kichʼ jbatik ta wenta sok te junuknax ya x-aʼtejotike?

² Jich bitʼil ya yal te teksto ta sjajchibal te artikulo, te Pablo la yal te ma xjuʼ te jich ya jnoptik ta stojol te kermanotaktik: «Ma xtuhunat cuʼun» (1 Cor. 12:21). Yuʼun lek ya kil jbatik ta kongregasion, ya skʼan ya kichʼ jbatik ta wenta sok te jun-nax ya x-aʼtejotike (kʼopona Efesios 4:16). Te kʼalal jun-nax ayotike ay yip yoʼtan te kermanotaktik sok kʼux aʼiybil ya yaʼiy sbaik.

3. ¿Bin ya kilbeytik skʼoplal ta artikulo ini?

³ ¿Bintik-utʼil ya kakʼtik ta ilel te ya kichʼtik ta mukʼ te kermanotaktike? Ta artikulo ini nail ya kiltik bin-utʼil ya xjuʼ ya yichʼ sbaik ta mukʼ te ansianoetike. Jaʼnix jich ya kiltik bin-utʼil ya kichʼtik ta mukʼ te ermanoetik sok ermanaetik te ma nujpunemike. Soknix ya kiltik  bin-utʼil ya kakʼtik ta ilel te ay ta koʼtantik te ermanoetik te ayik ta snopel te jkʼoptike.

4. ¿Bin la yal te Pablo ta Romanos 12:10 te ya skʼan ya spasik te ansianoetike?

⁴ Te ansianoetik ya yichʼ yaʼtelik ta swenta te chʼul espiritue, pero yanyantik-a te bin ya snaʼik spasel ta jujuntule (1 Cor. 12:17, 18). Ayniwan chaʼoxtul te ochelikto ta ansiano sok yakikto ta snopel, jaʼnix jich ay yantik te ayix yaʼbilalik o ayik ta chamel sok te maʼyuk bayal bin ya xjuʼ ya spasikixe. Pero ni jtuluk ansiano ya skʼan te jich ya snop: «Ma xtuhunat cuʼun». Jaʼ ya skʼan ya schʼuunik spasel te bin la yal te Pablo ta Romanos 12:10 (kʼopona).

5. 1) ¿Bin-utʼil ya yakʼik ta ilel te ya yichʼik ta mukʼ te sjoʼtakik te ansianoetike? 2) ¿Bin yuʼun ya skʼan ya yichʼ sbaik ta mukʼ?

⁵ Te ansianoetik ya yakʼik ta ilel te ya yichʼik ta mukʼ te sjoʼtakik ta ansiano te kʼalal ya schʼambey yaʼiyik te skʼope. Kʼaxto jich ya skʼan ya spasik-a te kʼalal ya stsob sbaik yuʼun ay bin ya yilbeyik skʼoplal. ¿Bin yuʼun? Te La Atalaya 1 yuʼun oktubre 1988 jich la yal: «Te ansianoetik ta jun kongregasion ya skʼan ya snaʼik te ma jtuluknax machʼa ya x-akʼbot te chʼul espiritue. Te Cristo ya stuuntes te chʼul espiritu ta stojol machʼauk ansianoil swenta ya yakʼ ta nopel te bin ya yal te Biblia kʼalal ay bin ya yichʼ chajpanele (Hech. 15:6-15). Maʼyuk jtuluk ansiano ya snop te jaʼnax stukel yichʼoj te chʼul espiritue».

6. 1) ¿Bin ya skʼan ya spasik yuʼun jun-nax ya x-aʼtejik te ansianoetike? 2) ¿Bin lekilal ya sta te kongregasione?

⁶ Te ansiano te ya yichʼ ta mukʼ te sjoʼtak ta ansianoil, maba jaʼuk nail ya skʼan ya xkʼopoj spisil-ora te kʼalal ya stsob sbaike. Maba ya snop te jaʼ ya skʼan ya yichʼ pasel te bin ya yale sok ma spisiluk-ora jaʼnax ya skʼan ya xkʼopoj. Sok spekʼelil yoʼtan ya xkʼopoj sok ya schʼambey yaʼiy skʼop te  yantik ansiano. Te bin mukʼxan skʼoplale, jaʼ te ya yichʼ ta wenta te bin ya yal te Biblia sok te bin ya yal «te aʼbat te jun yoʼtan soc pʼij» (Mat. 24:45-47). Kʼalal ya yakʼik ta ilel skʼuxul yoʼtanik sok ya yichʼ sbaik ta mukʼ te ansianoetike, ya x-akʼbotik te chʼul espiritu yuʼun te Jehová yuʼun lekuk te bin ya staik ta nopele sok jich ya yichʼ yip te kongregasione (Sant. 3:17, 18).

7. ¿Bin la snop te Jesús ta swenta te machʼatik maba nujpunemike?

⁷ Ta jun kongregasion ay ermanoetik te nujpunemik, ay yantik te ay yal snichʼnabik, sok ay yantik te ma nujpunemike. ¿Bin-utʼil ya skʼan ya kiltik te ermanoetik te ma nujpunemike? Kiltik te bin la snop te Jesús ta swenta-abi. Te kʼalal kuxin ta Balumilal maba nujpun, jaʼ bajt ta yoʼtan scholel te skʼop Diose. Maʼyuk bin-ora la yakʼ ta nopel te puersa ya skʼan ya xnujpun te jchʼuunjeletik o te manchuk ya xnujpunike. Pero aynix la yal te ay machʼatik ya snopik te ma xnujpunike (Mat. 19:11, 12). * La yichʼ ta mukʼ te machʼatik ma nujpunemike, maba la snop te jaʼ pekʼelxan skʼoplalik o te maʼyuk stseʼelil yoʼtanike.

8. Jich bitʼil la yal te Pablo ta 1 Corintios 7:7-9, ¿bin ya skʼan ya staik ta nopel te jchʼuunjeletike?

⁸ Te jpuk-kʼop Pablo maba nujpun te kʼalal abatin ta stojol te Jehovae. Sok maʼyuk bin-ora la yakʼ ta nopel te ma lekuk te nujpunele. Snaʼoj te jujuntul ya sta ta nopele. Pero la yalbey te jchʼuunjeletik te yakuk snopik teme ya xjuʼ ya x-abatinik ta stojol te Jehová te bitʼil maba nujpunemike (kʼopona 1 Corintios 7:7-9). Te Pablo maba la spʼaj te machʼatik maba nujpunemike. Melel la stsa te Timoteo te maba nujpunem swenta ya spas aʼteliletik te mukʼ skʼoplale (Filip. 2:19-22). * Jaʼ yuʼun maba ya skʼan ya jnoptik te jtul ermano ya snaʼ o ma snaʼ spasel jun aʼtelil ta skajnax te ma nujpuneme (1 Cor. 7:32-35, 38).

9. ¿Bin ya kaltik ta swenta te machʼa ya xnujpun sok te machʼa maba ya xnujpune?

⁹ Te Jesús sok te jpuk-kʼop Pablo maba  la yakʼik ta nopel te puersa ya skʼan ya xnujpunotik o te manchuk ya xnujpunotike. Jich yuʼun ¿bin ya kaltik ta swenta te machʼa ya xnujpun sok te machʼa maba ya xnujpune? Te La Atalaya 1 yuʼun oktubre 2012 jich la yal: «Ta schebal jaʼ majtanil yuʼun Dios. [...] Te Jehová maba ya snop te ay swokol sok te kʼexlaltik sba te machʼa maba nujpuneme». Jaʼ yuʼun ya skʼan ya kichʼtik ta mukʼ te ermanoetik te maba nujpunemike.

10. ¿Bin-utʼil ya xjuʼ ya kakʼtik ta ilel te ya kichʼtik ta mukʼ te ermanoetik te ma nujpunemike?

¹⁰ ¿Bin-utʼil ya xjuʼ ya kakʼtik ta ilel te ya kichʼtik ta mukʼ te bin yaʼiyel ya yaʼiy sbaik te machʼatik ma nujpunemike? Ay ermanoetik te staojik ta nopel te ma xnujpunike. Ay yantik te ya skʼan ya xnujpunike, pero mato staojik te machʼa lek ya yaʼiy sbaik soke. Jaʼnix jich ay yantik te lajem te sjoyike. Chikan bin yuʼun te maba nujpunemik maba ya skʼan ya jojkʼoybeytik sok manchuk ya kalbeytik te ya jkoltaytik ta sleel sjoyike. Ayniwan machʼatik ya skʼanbat koltayel, pero teme maba ya yalbate, nopa awaʼiy bin yaʼiyel ya yaʼiy sba teme jaʼat nail ya awalbeye (1 Tes. 4:11; 1 Tim. 5:13). Kiltik bin yalojik chaʼoxtulik.

11, 12. ¿Bin maba ya skʼan ya jpastik ta stojol te ermanoetik te maba nujpunemike?

¹¹ Jtul superintendente yuʼun sirkuito ya yal te bayal bin lek ya sta te bitʼil maba nujpuneme. Pero kʼalal te ermanoetik ya sjojkʼoybeyik bin yuʼun te ma nujpuneme, ya yal te ma lek ya yaʼiy sba yuʼune. Jtul ermano te ya x-aʼtej ta sukursal te ma nujpuneme, jich la yal: «Jich ya kaʼiy te ay ermanoetik te ya snaʼbeyik yoʼbolil sba te machʼatik maba nujpunemike, jich yaʼiyel te ay swokolike, ma jaʼuk ya snopik te jaʼ jun majtanile».

¹² Jtul ermana te ya x-aʼtej ta Betel te ma nujpuneme, jich la yal: «Ay ermanoetik te ya snopik te jpisiltik ya jkʼan ya xnujpunotik o ya skuyik te kʼalal ya xbootik ta jun konbibio yakotik ta sleel jlekoltik. Ta jun buelta la stikunonik ta spasel jun aʼtelil ta yan lugar, ajkʼabalix kʼoon sok yorail tsoblej-a. Te ermana te banti ya xjilon ta snae la yalbon te ay chaʼtul ermanoetik ta skongregasion te pajal kaʼbilal soke. La yalbon ta jamal te ma yuʼunuk ya skʼan ya slebon jlekole, pero te kʼalal kʼootik ta sNail Tsoblej oranax la sniton bael ta stojol te chaʼtul ermanoetike. ¡Bayal kʼexawotik!».

13. ¿Bin koltayot jtul ermana te maba nujpuneme?

¹³ Yan ermana te ya x-aʼtej ta Betel te maba nujpuneme, jich la yal: «Ay ya jnaʼbey sba prekursoretik te maba nujpunemik te bayalix jaʼbil yakik ta abatinel ta stojol te Jehová, tseʼel yoʼtanik sok ya skoltayik bayal te kongregasion. Maba ya stoy sbaik yuʼun te maba nujpunemike sok maba kʼax pekʼel ya yaʼiy sbaik yuʼun». Leknax ya kaʼiy jbatik ta jun kongregasion te banti talel kʼaxel ya kichʼ jbatik ta mukʼ, maʼyuk machʼa pekʼel skʼoplal ya x-ilot o ya xpʼajot o te kʼax mukʼxan skʼoplal ya x-ilote. Jpisiltik kʼux aʼiybil ya kaʼiy jbatik.

14. ¿Bin-utʼil ya kakʼtik ta ilel te ya kichʼtik ta mukʼ te machʼatik maba nujpunemike?

¹⁴ Te kermanotaktik te maba nujpunemike lek ya yaʼiy sbaik kʼalal jaʼ ya kilbeytik te lekil talelil ay yuʼunike, ma jaʼuk te ya  kiltik bin yuʼun te ma nujpunemike. Maba ya skʼan ya jnoptik te ayik ta wokol yuʼune. Melel teme jich ya jpastike, jich kʼoem te ya kalbeytik, «ma xtuhunat cuʼun» (1 Cor. 12:21). Jaʼuk ya kiltik te jun yoʼtanik ta stojol te Jehovae. Jich ya kakʼtik ta ilel te ya kichʼtik ta mukʼ sok te mukʼ skʼoplalik ta kongregasion.

15. ¿Bin spasojik chaʼoxtul ermanoetik yuʼun ya xkoltaywanikxan ta scholel skʼop Dios?

¹⁵ Ta ora ini ay bayal ermanoetik te yakik ta snopel yan kʼopil yuʼun ya scholikxan skʼop Dios. Jaʼ yuʼun ay sjeltayoj skongregasionik te banti ya skʼanikxan koltayele (Hech. 16:9). Jujuntul ya staik ta nopel spasel. Manchukme maba orauk ya snopik te kʼopile, bayal ya xkoltaywanik ta kongregasion. Bayal bin snopojik sok lek stalelik te ya yakʼbey yip yoʼtan te ermanoetike. ¿Mabal jichuk te tulan ya x-aʼtejike?

16. ¿Bin ya yilik te ansianoetik kʼalal ya yalik teme ya xjuʼ ya yichʼ yaʼtel jtul ermanoe?

¹⁶ Te ansianoetik ma xjuʼ ya yalik te ma xjuʼ ya yichʼ yaʼtel jtul ermano ta ansiano o sierbo ministerial ta skajnax te maba snopoj ta lek te kʼopil ta skongregasione. Te bin ya skʼan ya yilike, jaʼ te talelil te ya yal te Biblia te ya skʼan ayuk yuʼunik te ansianoetik sok sierbo ministerialetik, ma jaʼuk teme ya snaʼ ta lek te kʼopile (1 Tim. 3:1-10, 12, 13; Tito 1:5-9).

17. ¿Bin ya skʼan ya staik ta nopel te familiaetik te ya xbajtik ta yan nasion?

¹⁷ Ay familiaetik te baemik ta kuxinel ta yan nasion ta skaj te ay staojik swokolik o ta sleel aʼtelil. Te alnichʼanetik yaniwan xbajtik ta eskuela ta kʼopil te ya yichʼ tuuntesel tey-ae. Jaʼnix jich te meʼil tatiletik yaniwan skʼan ya snopik te kʼopil yuʼun ya sta yaʼtelik-a. Pero teme ay jun kongregasion o grupo te pajal sok te skʼope ¿jaʼbal ya skʼan ya xbajt ta kongregasion o grupo te ya yaʼiy te meʼil tatiletik o te ya yaʼiy te yal snichʼnabike?

18. Ta swenta te bin ya yal Gálatas 6:5, ¿bin-utʼil ya kakʼtik ta ilel te ya kichʼtik ta mukʼ te bin la sta ta nopel te jolal yuʼun te nae?

¹⁸ Te jolal ta na jaʼme ya skʼan ya sta ta nopel bin kongregasion ya xbajtik. Jaʼ ya snop te banti ya xjuʼ ya xkoltayot te sfamiliae (kʼopona Gálatas 6:5). Ya skʼan ya kichʼtik ta mukʼ te bin la sta ta nopel spasel te jolal ta nae, melel jaʼ ay ta swenta. Tseʼeluk koʼtantik yuʼun te talik ta jkongregasiontike (Rom. 15:7).

19. ¿Bin ya skʼan ya spas te tatil teme ma xkʼot ta yoʼtan te snichʼnab te bin ya xkʼax ta tsobleje?

¹⁹ Ayniwan familiaetik te ayik ta jun kongregasion  ta kʼopil te ya yaʼiyik te meʼil tatiletike. Pero te alnichʼanetik yaniwan xbajtik ta eskuela ta yan kʼopil, jaʼ yuʼun maniwan ya snaʼik ta lek te skʼop te smeʼ statike. Ta swenta-abi maniwan ya xkʼot ta yoʼtanik te bin ya xkʼax ta tsoblej sok maniwan yak ta chʼiel te schʼuunel yoʼtanike. Teme jich ya xkʼot ta pasele, te tatil ya skʼan ya skʼopon Dios sok ya snop bitʼil ya xjuʼ ya skoltay te snichʼnab yuʼun ya yamigoinik te Jehová sok ya x-ochik ta lum yuʼun. Ya skʼan ya stsa teme ya yakʼbey snop te skʼope o teme ya xbajt ta yan kongregasion te ya yaʼiyik te snichʼnabe. Chikan te bin ya sta ta nopele, te kongregasion te banti ya xbajtik ya skʼan ya spas tulan yuʼun lek ya yaʼiy sba te familiae.

20. ¿Bin ya skoltayotik yuʼun leknax ya kiltik te ermanoetik te yakik ta snopel yan kʼopil?

²⁰ Jich bitʼil la kiltikixe, yanyantik te bin yuʼun ya sjeltay skongregasion te ermanoetike. Yakik ta spasel tulan ta snopel yan kʼopil sok matoniwan ya snaʼik ta lek, pero teme ma jaʼuk ya kiltik te bitʼil ya xkʼopojike, yame jtatik ta ilel te kʼux ta yoʼtanik te Jehová sok te ya skʼan ya x-abatinik ta stojole. Jaʼme ya skoltayotik yuʼun leknax ya kiltik te kermanotaktike. Sok maba ya jnoptik te ma xjuʼ ya skoltayotik ta skaj te mato snopojik ta lek te jkʼoptike.

21, 22. ¿Bin yuʼun ya kalbeytik wokol te Jehovae?

²¹ Ya kalbeytik wokol te Jehová yuʼun te ayotik ta kongregasione. Te Jehová sok te ermanoetik mukʼ jkʼoplaltik ya yilotik chikan teme winikotik o antsotik, teme ma nujpunemotik o nujpunemotikix, teme achʼix keremotik o ayix kaʼbilaltik sok teme ma jnaʼtik ta lek jun kʼopile (Rom. 12:4, 5; Col. 3:10, 11).

²² Bayal bin la yakʼ jnoptik te Pablo kʼalal la yal te jich kʼoem bitʼil bakʼetalil te kongregasione. Teme jich ya kiltike, ya jletik bin-utʼil ya kakʼbeytik yip yoʼtan te kermanotaktike, sok te kʼuxuk ta koʼtantik sok te ya kichʼtik ta mukʼe.