1. მუ მეჩჷ იეჰოვაქ მუშ თითოულ ართგურ მსახურს?

იეჰოვაქ თითოულ მუშ ართგურ მსახურს მეჩჷ ადგილ მუშ კრებას. მართალ რე, შხვადოშხვა მუდგარენს ვორთუთ კრებას, მარა თითოულ ძვირფას ვორეთ დო ართიან მოსაჭირნა. მუჭო მოხვარნა მოციქულ პავლე თე მნიშვნელოვან მუდგარენიშ გურაფას?

2. მუჭოთ ეფესოელეფიშ 4:16-ის ჭარჷ, მუშენ ოკო დუვაფასათ ართიან დო იფთანამშრომლათ ართიანწკუმა?

² მუჭოთ თე სტატიაშ მთავარ მუხლის ჭარჷ, პავლე ხაზის უსვანს თის, ნამდა იეჰოვაშ მსახურეფს ართიანშა ვა მარაგადენა: „ვა მოსაჭირუქია“ (1 კორ. 12:21). კრებას მშვიდობა ქორდასინ, ოკო დუვაფასათ ართიან დო იფთანამშრომლათ ართიანწკუმა (წეკითხით ეფესოელეფიშ 4:16). მუჟამსით გაერთიანებულო ფთანამშრომლენთ, კრებას წარმატება უღჷ დო ჸოროფას იმანგარებ.

3. მუს გუვარჩიენთ თე სტატიას?

³ ნამ რე თი მხარეეფ, სოდეთ შემლებნა ვოძირათ, ნამდა პატიცემას გიმიფრჩქინანთ თანაქრისტიანეფიშ მიმართ კრებას? თე სტატიას გუვარჩიენთ, მუჭო შეულებნა უხუცესეფს ოძირან, ნამდა პატის ცენა შხვა უხუცესეფს კრებას? თეშ უკულ, გუვარჩიენთ, მუჭო შემლებნა არძას, ვოძირათ, ნამდა ვაფასენთ დაუქორწინებელ და დო ჯიმალეფს. დო ბოლოს ქიგებგენთ, მუჭო შემლებნა, ვოძირათ, ნამდა ვაფასენთ თინეფს, მით შილებე ჯგირო ვეჩიებდან ჩქინ ნინაშა.

4. რომაელეფიშ 12:10-ის ინოჭარილ ნამ რჩევა ოკო გიმირინუან უხუცესეფქ?

⁴ კრებას არძა უხუცეს იეჰოვაშ წმინდა შურით რე დანიშნულ. მარა თითოულს შხვადოშხვა ძღვინ დო უნარ უღჷ (1 კორ.  12:17, 18). ნამთინე შილებე ახალ დანიშნულ დო ნაკლებო გამოცდილ რდას. შხვას შილებე ხანშა მიშულაშ დო ჯამრთელობაშ პრობლემეფიშ გურშენ ბრელ მუდგარენ ვაკეთებედას. მარა თითოულ მნიშვნელოვან საქმეს ასრულენს. ათეშენ, ვეჸუაფ ჯგირ, უხუცეს მუშ დამოკიდებულებათ ურაგადუდას შხვა უხუცესის: „ვა მოსაჭირუქია“. თეშ მანგიორო, თითოულ უხუცესიქ ოკო გეგმირინუას რომაელეფიშ 12:10-ის ინოჭარილ პავლეშ რჩევა (წეკითხით).

5. მუჭო ოძირანა უხუცესეფ, ნამდა აფასენა ართიანს დო მუშენ რე მნიშვნელოვან თაშ მოქციება?

⁵ მუჟამსით უხუცესეფ ყურადღებათ ურჩქილენა შხვა უხუცესეფს, ოძირანა, ნამდა აფასენა ართმაჟიას. თენა განსაკუთრებულო მნიშვნელოვან რე თიმწკუმა, მუჟამსით უხუცესეფიშ საბჭო იშაყარუ, სერიოზულ საკითხეფიშ გარჩიებელო. მუშენ იფჩიებუთ თეს? 1988 წანაშ 1 ოქტომბერიშ „გინაჯინალ კოშკის“ ჭარუდ: „უხუცესეფს არჩქილენა, ნამდა იესოს შეულებ წმინდა შურიშ საშვალებათ ნებისმიერ უხუცესის უხემძღვანელას უხუცესეფიშ საბჭოშ შეხვალამაშ დროს, ნამდა თიქ აღნიშნას ბიბლიურ პრინციპ, ნამუთ კონკრეტულ სიტუაციას გიმოდირთუ ვარდა მნიშვნელოვან გადაწყვეტილებაშ მეღებას მეხვარებ თინეფს (საქ. 15:6—15). წმინდა შურ უხუცესეფიშ საბჭოშ არძა წევრის ხემძღვანელენს დო ვართ ხოლო ხვალე ართის“.

6. მუ მეხვარებ უხუცესეფს გაერთიანებულო ითანამშრომლან ართიანწკუმა დო მუ შედეგის მუღანს თენა კრებას?

⁶ უხუცეს, ნამუთ პატის ცენს შხვა უხუცესეფს, დღას ვაცად, უხუცესეფიშ შეხვალამას ირო მუქ დიჭყას რაგად. თინა ოცად, ირო მუქ ვეჩუას დო ვა ფიქრენს, ნამდა ირო მუშ აზრ რე სწორ. თეშ მანგიორო, თინა თანდაბლურო დო მოკრძალებურო იჩიებ ორაგადეს. თეცალ უხუცეს ყურადღებათ ურჩქილე შხვა უხუცესეფს. მუთ არძაშ უმოს მნიშვნელოვან რე, თინა მზათ რე იმსჯელას ბიბლიურ პრინციპეფშე დო მიაჸუნას „ართგურ დო გონიერ მონაშ“ ხემძღვანელობას (მათ. 24:45—47). მუჟამსით უხუცესეფ საკითხეფიშ გარჩიებაშ დროს ართიანს ჸოროფათ დო პატიცემათ ოქცუნა, ღორონთიშ წმინდა შურ თინეფწკუმა იჸუაფ დო უხემძღვანელენს, ნამდა თიცალ გადაწყვეტილებეფ მიღან, ნამუთ კრებაშ გამანგარებას შეუნწყუნს ხეს (იაკ. 3:17, 18).

7. მუჭო უჯინედ იესო დაუქორწინებლობას?

⁷ ამდღა კრებას ბრელ დაქორწინებულ წყვილ რე დო თინეფშე ნამთინეს ბაღანეფ ხოლო ჸუნს. მარა კრებას ბრელ დაუქორწინებელ და დო ჯიმა ხოლო რე. მუნერ დამოკიდებულება ოკო მიღდან თინეფიშ მიმართ? ქიგიფშინათ, მუჭო უჯინედ იესო დაუქორწინებლობას. დედამიწას მსახურებაშ დროს იესო დაუქორწინებელ რდუ დო მთელ დრო დო ყურადღება მუშ დავალებაშ შესრულებაშა აფუდ გინოღალირ. იესო ვაგურუანდჷ, ნამდა ქრისტიანქ აუცილებერო ოკო დექორწინკო ვარდა პირიქით, ვა დექორწინკო. მარა თიქ თქუ, ნამდა ნამთინე ქრისტიან დაუქორწინებლობას ისხუნუანდჷ (მათ. 19:11, 12). * იესო აფასენდჷ დაუქორწინებელეფს. თინა დაუქორწინებელეფს შხვეფიშ ნაკლებო ვემირჩქინანდჷ დო ვა ფიქრენდჷ, ნამდა თინეფს მუდგარენ განსაკუთრებულ ორკუდეს.

8. მუჭოთ 1 კორინთელეფიშ 7:7—9-ს ჭარჷ, მუ ელუჩ პავლექ ქრისტიანეფს?

⁸ იესოცალო, მოციქულ პავლე ხოლო მუშ მსახურებაშ განმავლობას ვა დაქორწინებე. თის დღას ვა უთქუალ, ნამდა ქრისტიანშო დაქორწინება ვეშილებედ. პავლეს ჯგირო არჩქილედ, ნამდა თენა პირად გინაჭყვიდირალ რდუ. მარა თიქ ელუჩ ქრისტიანეფს, დეფიქრესკო, შეიალებედეს დო ვარ დაუქორწინებელო ემსახურესკო იეჰოვას (წეკითხით 1 კორინთელეფიშ 7:7—9). პავლეს ვემიორჩქუდ, ნამდა დაუქორწინებელ ქრისტიანეფ შხვეფშე ნაკლებ რდეს. თიქ დიდ პასუხიშმგებლობეფ მიანდჷ ახალგაზრდა ტიმოთეს, ნამუთ დაუქორწინებელ ქრისტიან რდუ (ფილ. 2:19—22). * ათეშენ არასწორ იჸუაფუდ, ჯიმაშ გამოცდილება, ხვალე თიშ მიხედვით შევაფასითკო, ქორენ დო ვარ თინა დაქორწინებულ (1 კორ. 7:32—35, 38).

9. მუშ რაგად შემლებნა დაქორწინებაშე ვარდა დაუქორწინებლობაშე?

⁹ ვართ იესო დო ვართ პავლე ოგურუანდეს, ნამდა ქრისტიანეფქ აუცილებერო ოკო დექორწინესკო ვარდა პირიქით, ვა დექორწინესკო. თაშ ნამდა, მუშ რაგად შემლებნა დაქორწინებაშე ვარდა დაუქორწინებლობაშე? 2012 წანაშ 1 ოქტომბერიშ „გინაჯინალ კოშკის“ ჭარუდ: „შემლებნა თამამას ფთქუათ, ნამდა ქოთ ქორწინება დო ქოთ დაუქორწინებლობა ძღვინ რე იეჰოვაშე . . . იეჰოვა ვა ფიქრენს,  ნამდა დაუქორწინებელ პიროვნება დამცირებულ რე ვარდა ბედნერ ვა რე“. თენა ირიათო ოკო ფშუდან დო დუვაფასათ დაუქორწინებელ და დო ჯიმალეფიშ ადგილ კრებას.

10. მუჭო შემლებნა პატიცემა გიმიფრჩქინათ დაუქორწინებელ და დო ჯიმალეფიშ მიმართ?

¹⁰ მუჭო შემლებნა პატიცემა გიმიფრჩქინათ დაუქორწინებელ და დო ჯიმალეფიშ გრძნობეფიშ მიმართ? ჯგირ იჸუაფ ფშუდან, ნამდა ნამთინე ქრისტიანქ გინოჭყვიდ, დაუქორწინებელ ჸოფედკო. შხვეფს ოკონა დაქორწინება, მარა შესაფერის პიროვნებაქ ვაგორეს. შილებე, შხვეფს მეუღლე ღურაქ მიდუღ. დაუქორწინებლობაშ მიზეზ მუდგა ვა რდასინ, ქიჸუაფუნო სწორ, ქობკითხათ დაუქორწინებელ ქრისტიანეფს, მუშენ ვა რენა დაქორწინებულ ვარდა ქუწუათ, ნამდა მივეხვარებუთ მეუღლეშ გორუას? მუშ ოკო რაგად, ნამთინე დაუქორწინებელ ქრისტიანქ, შილებე ითხუას თე საკითხის მოხვარა. მარა თეს ვა ფთხინა დო ჩქი იშო ქურაგადუთ, ნამდა მივეხვარებუთ-და, მუჭო იგინანა დუდის დაუქორწინებელ და დო ჯიმალეფ? (1 თეს. 4:11; 1 ტიმ. 5:13). მორთ ქობძირათ, მუს იჩიებ ნამთინე დაუქორწინებელ ქრისტიან, მით ართგურო ომსახურ იეჰოვას.

11, 12. მუჭო შილებე გურ გუტახათ დაუქორწინებელეფს?

¹¹ ართ დაუქორწინებელ რაიონულ ზედამხედველ, ნამუთ ჯგირო ასრულენს მუშ დანიშნულებას, ფიქრენს, ნამდა დაუქორწინებლობას ბრელ ჯგირობუა მოუღ. მარა თინა იჩიებ, ნამდა გურიშ გუმატახალ რე, მუჟამსით და დო ჯიმალეფ მართალ რე, ჯგირ მოტივეფით, მარა ოკითხნა: „მუშენ ვა მორჸუნს ოსურ?“. ართ დაუქორწინებელ ჯიმაქ, ნამუთ ბეთელს მსახურენს, თქუ: „მინშა და დო ჯიმალეფ დუდის თეშ მოგინაფუანა ითამ დაუქორწინებელ ქრისტიანეფ საცოდალეფ რდან. თეცალ დამოკიდებულებაქ შილებე თიცალ შთაბეჭდილება შექმნას, ითამ დაუქორწინებლობა ოღალ რე დო ვართ ხოლო ძღვინ“.

¹² ართ დაუქორწინებელ დაქ, ნამუთ ბეთელს მსახურენს თქუ: „ნამთინე თანაქრისტიანს მიორჩქ, ნამდა არძა დაუქორწინებელ გორუნს მომავალ მეუღლეს ვარდა არძა დაუქორწინებელ ფიქრენს, ნამდა თანაქრისტიანეფიშ ირ შაყარუა მომავალ მეუღლეშ გორუაშ ჯგირ შესაძლებლობა რე. ართშა, მუჟამსით ჩქიმ ქიანაშ ართ-ართ კუნთხუს ბეთელიშ საქმეშა იბდჷ, ონჯუას კრებაშ შეხვალამაშა მიდაფრთჷ. დაქ, ნამდგაშ ჸუდეს ფსქიდუდ, მიწუ, ნამდა თე კრებას ჟირ ჩქიმ მახანა ჯიმა რდუ. თიქ დუმარწმუნ, ნამდა ვაცადუდ, მიდგაინ გამრიგკო, მარა, მუჭო სამეფო დარბაზშა გემნოფრთით თე ჟირ ჯიმას ქეშმოხვამილუ. ოკო ქოფთქუე, ნამდა თენა სუმხოლოშო მანგარ უხერხულ სიტუაცია რდუ“.

13. მუქ ელუკინ გურშა ართ დაუქორწინებელ დას?

¹³ ხოლო ართ დაუქორწინებელ დაქ, ნამუთ ბეთელს მსახურენს, აღნიშნჷ: „მა იფჩინენქ თიცალ პიონერეფს, მით ბრელ ხან რე დაუქორწინებელეფ რენა, მტკიცას გერენა რწმენას, ყურადღება სულიერშა აფნა გინოღალირ, დუდგინოდვალირეფ რენა დო მსახურებას ხიოლ მოუღ თინეფშა. თე და დო ჯიმალეფ ბრელ საქმეს ორთნა კრებაშო. თინეფს გაწონასწორებულ თვალსაზრის უღნა დაუქორწინებლობაშე, მუნეფიშ დუდ შხვეფიშ უჯგუშო ვემიორჩქნა, მუშენდა ვა რენა დაქორწინებულეფ დო ვართ თის ფიქრენა, ნამდა, მუდგარენ აუცილებერ ორკნა, მუშენდა მეუღლე დო ბაღანეფ ვა ჸუნა“. ათეშენ სასიამოვნო რე, რდე კრებას, სოდეთ პატის რცენა დო დუდის დაფასებულო გინაფლენქ. გიჩქჷ, ნამდა თანაქრისტიანეფს ვაცოდუქ თიშენ, ნამდა დაუქორწინებელ რექ, ვართ სქან ონჯარნა, ვართ ყურადღებაშ უმშო რექ დო ვართ ცას გიმგოხუნუანა. გინაფლენქ, ნამდა თინეფს უჸორქ.

14. მუჭო შემლებნა ვოძირათ, ნამდა ვაფასენთ დაუქორწინებელეფს?

¹⁴ დაუქორწინებელ და დო ჯიმალეფ მარდულეფ იჸუაფნა, მუჟამსით თინეფს ჯგირ თვისებეფიშ გურშენ დუვაფასენთ დო დაუქორწინებლობაშ  გურშენ საცოდალო ვემიფრჩქინანთ. თეშ მანგიორო, ჯგირ იჸუაფ, მუნეფიშ ართგურობაშო დუვაფასათ თინეფ. შედეგო, დაუქორწინებელ და დო ჯიმალეფ ჩქინდე დღას ვეგინანა, ითამ ვურაგადუდათ: „ვა მოსაჭირუქია“ (1 კორ. 12:21). თეშ გინაწონს, თინეფს არჩქვენნა, ნამდა პატის ფცენთ დო ვაფასენთ თინეფიშ ადგილს კრებას.

15. მუ აკეთ ნამთინექ, ნამდა მსახურება გაფართოვკო?

¹⁵ ბოლო წანეფს ბრელ მაუწყებელქ გინოჭყვიდ ახალ ნინაშ გურაფა, ნამდა მსახურება გაფართოვან. თეშ გურშენ, მუნეფიშ ცხოვრებას მუდგარენეფქ აჸუეს ოთირალქ. თე და დო ჯიმალეფქ ქიდიტეს კრებეფ, ნამუთ მუნეფიშ მშობლიურ ნინაშა იტარებ დო გეგნორთეს შხვა ნინაშა იტარებუნ ფერ კრებეფშა, სოდეთ მაქადაგებელეფიშ დიდ საჭიროება რე (საქ. 16:9). თე ქრისტიანეფქ თეცალ გადაწყვეტილება პირადო მიღეს, ნამდა სამეფოშ ინტერესეფშო უმოს გაკეთესკო. მართალ რე, თინეფს შილებე წანეფქ დესაჭირან ახალ ნინაშ ჯგირო დაგურაფალო, მარა ბრელ მუდგარენიშ კეთება შეულებნა კრებაშო. თინეფიშ ჯგირ თვისებეფ დო გამოცდილება ამანგარენს და დო ჯიმალეფს. ჩქი ვაფასენთ თე დუდგინოდვალირ და დო ჯიმალეფს!

16. მუშ მიხედვით აფასენა უხუცესეფ ჯიმას, ნამდგას რეკომენდაციას უწიენა უხუცესო ვარდა მომსახურეთ მსახურებაშე?

¹⁶ უხუცესთა საბჭოქ ხვალე თიშ გურშენ ოკო ვა თქუას ჯიმაშა უხუცესო ვარდა მომსახურეთ მსახურებაშე რეკომენდაციაშ გაწევაშე ვარია, ნამდა თის დიო ჯგირო ვა უჩქჷ თი ნინა, ნამდგაშათ მუნეფიშ კრება იტარებ. უხუცესეფ ჯიმას თი მოთხოვნეფიშ მიხედვით შეაფასენა, ნამუთ ბიბლიას რე მოჩამილ უხუცესეფ დო მომსახურეეფშო დო ვართ ხოლო თიშ მიხედვით, მუჭო იჩიებ თე ჯიმა კრებაშ ნინაშა (1 ტიმ. 3:1—10, 12, 13; ტიტ. 1:5—9).

17. მუ კითხვეფ წიმიჭკირუ, მუჟამსით ოჯახ შხვა ქიანაშა გინურს ოცხოვრებშა?

¹⁷ ნამთინე ქრისტიან ოჯახიქ შხვა ქიანაშა გინილ ოცხოვრებელიშ მიოღებელო ვარდა სამუშაშ ოშიბელო. თეცალ შემთხვევეფს, შილებე თინეფიშ ბაღანეფ თი ქიანაშ სახელმწიფო ნინაშა ღებულენდან განათლებას. შილებე მშობლეფს ხოლო აფდან ახალ ნინა დაგურაფალ, ნამდა სამუშა ქიშუან. მარა მუჭო ოკო მიქცუან თინეფქ, ადგილობრივ ტერიტორიას მუნეფიშ ნინაშა იტარებუნ ფერ კრება ვარდა ჯგუფ ქორენ-და? ნამ კრებას ოკო დესწრას ოჯახიქ? თი კრებას, ნამუთ სახელმწიფო ნინაშა იტარებ დოვარ თი კრებას, ნამუთ მუნეფიშ მშობლიურ ნინაშა იტარებ?

18. გალატელეფიშ 6:5-იშ თანახმათ, მუჭო შემლებნა ვოძირათ, ნამდა პატის ფცენთ ოჯახიშ დუდიშ გადაწყვეტილებას?

¹⁸ ოჯახიშ დუდიქ ოკო გინოჭყვიდას, ნამ კრებაშა გილართას მუშ ოჯახიქ. თენა პირად გინაჭყვიდირალ რე, ათეშენ თიქ ოკო გეთვალისწინას, მუ იჸუაფ არძაშ უჯგუშ მუშ ოჯახშო (წეკითხით გალატელეფიშ 6:5). ჩქი პატი ოკო ფცათ ოჯახიშ დუდიშ გადაწყვეტილებას. თიქ მუდგა ვეგნოჭყვიდასინ, ვა გუვაკრიტიკათ  თიშ გადაწყვეტილება დო ხიოლით მიბღათ თე ოჯახ ჩქინ კრებაშა (რომ. 15:7).

19. მუშე ოკო ილოცას დო დეფიქრას ოჯახიშ დუდიქ?

¹⁹ შხვა შემთხვევას, ოჯახ შილებე მსახურენდას კრებას, ნამუთ მშობლეფიშ მშობლიურ ნინაშა იტარებ, მარა შილებე ბაღანეფს ჯგირო ვა უჩქუდან თე ნინა. თე კრება სახელმწიფო ნინაშა იჩიებნან ფერ ტერიტორიას ქორენ-და, ბაღანეფს შილებე გაუჭირდან კრებას მორჩქილაფირიშ გაგებაქ დო სულიერო წიმი ულაქ. მუშენ შილებე თაშ მოხვადას? ბაღანეფ შილებე თიცალ სკოლაშა გილულა, ნამუთ თი ქიანაშ სახელმწიფო ნინაშა იტარებ დო ვართ ხოლო მშობლეფიშ მშობლიურ ნინაშა. თეცალ შემთხვევას ოჯახიშ დუდიქ ოკო ქილოცას დო ჯგირო დეფიქრას მუშ კეთება შეულებ, ნამდა სქუალეფს იეჰოვაწკუმა დო თანაქრისტიანეფწკუმა დაახლოებას მეხვარას. მშობლეფქ ოკო მეხვარან სქუალეფს, ნამდა ჯგირო ქიდიგურუან მშობლიურ ნინა ვარდა ოკო დეფიქრან თი კრებაშა გინულაშე, ნამუთ მუნეფიშ ბაღანეფშო გასაგებ ნინაშა იტარებ. ოჯახიშ დუდიქ მუდგა ვეგნოჭყვიდასინ, კრებაქ, ნამდგაშათ თინეფ გინულა, ხიოლით ოკო მიღას თე ოჯახ.

20. მუჭო შემლებნა ვოძირათ, ნამდა პატის ფცენთ თი და დო ჯიმალეფს, მით ახალ ნინას გურაფლენა?

²⁰ ჟიშე გარჩიებულ მიზეზეფიშ გურშენ, ბრელ კრებას იჸუაფნა თიცალ და დო ჯიმალეფ, მიდგას უჭირა ახალ ნინაშ გურაფა. შილებე თინეფშო რთულ რდას აზრეფიშ გიმოხანტუა. მარა, მუჟამსით ყურადღებას თიშა ვეგნიბღანთ, მუ შეცდომეფს უშვენა ახალ ნინაშა რაგადიშ დროს, ქობძირუნთ, ნამდა თინეფს უჸორა იეჰოვა დო ოკონა, ემსახურან თის. თინეფიშ ჯგირ თვისებეფს ქობძირუნთ-და, დუვაფასენთ დო პატიცემას გეგმიფრჩქინანთ თე და დო ჯიმალეფიშ მიმართ. შედეგო, თინეფს ჩქინ დამოკიდებულებათ ვა ვუწინთ „ვა მოსაჭირუქია“, ხვალე თიშ გურშენ, ნამდა ჯგირო ვარაგადენა ჩქინ ნინაშა.

21, 22. მუ დიდებულ პატი მუჩეს იეჰოვაქ?

²¹ იეჰოვაქ თიშ დიდებულ პატი მუჩეს, ნამდა მნიშვნელოვან ადგილ მიღდან ქრისტიანულ კრებას. ქომოლკოჩ ვორეთ დოვარ ოსურკოჩ, დაუქორწინებელ დოვარ დაქორწინებულ, ახალგაზრდა დოვარ ხანშამიშულირ, ნამდგაინ ნინა ჯგირო მიჩქნა დო ვარ, ჩქი, არძა ძვირფასეფ ვორეთ იეჰოვაშო დო ართიანშო (რომ. 12:4, 5; კოლ. 3:10, 11).

²² მორთ გეგმიბრინუათ თი მნიშვნელოვან გაკვეთილეფ პავლეშ მოჸუნაფილ მაგალითშე, ნამუთ ადამიანიშ სხეულს ოხუდ. თეშნერო, უმოს მეტ საშვალებას დობგორუნთ, ნამდა დუვაფასათ ჩქინ დო შხვეფიშ ადგილ კრებას.