1. Daudi owaco gin ango madok i kom mwolo pa Jehovah?

TIKA watwero waco ni Jehovah mwol? Ada, watwero. Daudi owaco ni: “Dong ityeko miya kwot me larri, dok mwoloni miyo adoko dit.” (2 Cam. 22:36, NW) Oromo bedo ni Daudi onongo tye ka tam i kom nino ma lanebi Camuel obino i ganggi me wiro ngat ma bidoko kabaka me Icrael i anyim. Jehovah onyuto mwolo i kare ma okulle piny me yero Daudi, ma onongo obedo awobi matidi loyo ki i kin awobe aboro me leyo kaka Kabaka Caulo.​—1 Cam. 16:1, 10-13.

2. Ngo ma wabinyamo i pwony man?

² Labongo akalakala mo, Daudi onongo ye lok ma kicoyo i Jabuli 113 i kom Jehovah, ni: ‘En kulle neno piny ki ka mabor kun neno polo ki lobo, en ilo lucan malo nia ki i apwa, . . . ci miyo gibedo kacel ki rwodi.’ (Jab. 113:6-8) I pwony man, wabicako ki nyamo pwony mogo ma pigi tego ma kubbe ki mwolo kun waneno kare mogo ma Jehovah onyuto kwede kit man. I nge meno, wabinyamo gin ma wapwonyo ki bot Kabaka Caulo, lanebi Daniel, ki Yecu madok i kom mwolo.

3. Jehovah terowa nining, dok meno nyuto gin ango?

³ Jehovah nyuto ni emwol i kit ma en tero kwede dano ma gitye ki roc ma giwore. En pe jolo worowa keken ento bene nenowa macalo lureme. (Jab. 25:14) Wek otwere botwa me bedo lureme, Jehovah omiyo Wode macalo gitum pi balwa. Jehovah pud dong onyutiwa kica madit ya!

4. Gin ango ma Jehovah ominiwa, dok pingo?

 ⁴ Nen kong dok labol mukene me mwolo pa Jehovah. Macalo Lacwecwa, Jehovah onongo oromo cweyowa labongo kero me yero gin ma wamito timo ki kwowa. Ento en pe otimo kit meno. En ocweyowa i calle dok oweko watye agonya me yero yo me kwo ma wamito. Yo ma wayero pire tek bot Jehovah, kadi bed rwomwa lapiny adada ka kiporowa kwede. En mito ni wayer me tic pire ki cwinywa ducu pien wamare dok waniang ber pa bedo luwiny bote. (Nwo. 10:12; Ic. 48:17, 18) Pud dong watye ki pwoc madit ya ni Jehovah obedo ngat mamwol!

5. Jehovah pwonyowa nining me bedo jo mamwol? (Nen cal ma tye i pok ngeye.)

⁵ Kit ma Jehovah terowa kwede pwonyowa me bedo jo mamwol. Jehovah aye obedo Ngat maryek loyo ducu i polo ki lobo. Kadi bed kit meno, en jolo tam ki bot jo mukene. Me labolle, Jehovah oye ni Wode okonye i cweyo jami ducu. (Car. 8:27-30; Kol. 1:15, 16) Dok kadi bed Jehovah obedo won twer ducu, en poko tic bot jo mukene bene. Me labolle, en ocimo Yecu me bedo Kabaka me Ker-ri, dok En bimiyo twero bot dano 144,000 ma gibiloc kacel ki Yecu. (Luka 12:32) Ngene kene ni, Jehovah opwonyo Yecu me bedo Kabaka ki Lalamdog Madit. (Ibru 5:8, 9) En bene pwonyo jo ma gibiloc kacel ki Yecu wek gucob ticgi maber, ento en pe bidoro jami ducu madok i kom kit ma omyero gucob kwede ticgi. Me ka meno, en geno ni gibitiyo mitine.​—Yabo 5:10.

6-7. Ngo ma waromo pwonyo ki bot Wonwa me polo ka odok i kom poko tic bot jo mukene?

⁶ Ka Wonwa me polo kulu​—ma pe mito  kony ki bot ngat mo keken—​poko tic bot jo mukene, ci wan dong omyero watim makato! Me labolle, tika itye lawi ot nyo laelda i kacokke? Lub lanen pa Jehovah kun ipoko tic bot jo mukene dok igwokke ki miti me bedo ka doro ticgi cawa ducu. Ka ilubo lanen pa Jehovah, pe ibicobo ticci maber keken ento bene ibipwonyo jo mukene dok ibiweko gidongo gen i komgi kekengi. (Ic. 41:10) Ngo mukene ma jo ma gitye ki twero mo olo giromo pwonyo ki bot Jehovah?

⁷ Baibul nyuto ni Jehovah tye ki miti me niang tam pa lumalaikane. (1 Luker 22:19-22) Lunyodo, wutwero lubo lanen pa Jehovah nining? Ka opore, peny tam pa lutinoni i kom kit ma omyero kitim kwede tic mo. Dok ka twere, lub tamgi.

8. I yo ma nining ma Jehovah odiyo kwede cwinye i kom Abraim ki Cara?

⁸ Yo mukene ma Jehovah nyuto kwede mwolone aye ki diyo cwinye. Me labolle, Jehovah diyo cwinye ka luticce gupenye ki mwolo pingo en omoko tam moni. En owinyo lok pa Abraim i kare ma Abraim otito tamme ni pe opore pi Jehovah me jwero Codom ki Gomora. (Acak. 18:22-33) Tam bene i kom kit ma Jehovah otero kwede Cara, dako pa Abraim. En pe okeco i kare ma Cara onyero cikke pa Lubanga ni ebinywalo latin i kare ma dong eti woko. (Acak. 18:10-14) Me ka meno, en otero Cara ki woro.

9. Ngo ma lunyodo ki luelda gitwero pwonyo ki i lanen pa Jehovah?

⁹ Lunyodo ki luelda, gin ango ma wutwero pwonyo ki i labol pa Jehovah? Ngo ma itimo ka lutinoni nyo jo mogo me kacokke pe gucwako tam ma imoko? Tika irune ka waccigi ni tamgi pe tye kakare? Nyo mono itute me niang tamgi maber? Jo me odi ki kacokke ginongo adwogi maber ka jo ma gitye ki twero gilubo lanen pa Jehovah. Nio wa i paragraf man, wabedo ka nyamo gin ma wapwonyo ki i lanen me mwolo pa Jehovah. Kombeddi dong, wabinongo pwony ki i labol mukene me Baibul i kom kit ma watwero nyuto ni waniang ka ma kerowa gik iye.

10. Jehovah tiyo ki labol pa jo mukene me pwonyowa nining?

¹⁰ Macalo ‘Lapwonywa,’ Jehovah oketo labol pa dano mapol i Lokke wek wanong pwony ki iye. (Ic. 30:20, 21) Wanongo pwony ka walwodo labol me Baibul i kom jo ma gunyuto kit mogo ma Lubanga pwoyo, ma i kine tye iye mwolo. Wanongo bene pwony ka wangiyo jami mutimme i kom jo ma pe gunyuto kit mabeco magi.​—Jab. 37:37; 1 Kor. 10:11.

11. Ngo ma watwero pwonyone ki i labol marac pa Caulo?

¹¹ Tam kong gin mutimme i kom Kabaka Caulo. I acakkine, en onongo obedo awobi mamwol. En onongo ngeyo ka ma kerone gik iye dok obedo ki lworo me jolo tic mukene. (1 Cam. 9:21; 10:20-22) Ento, i nge kare mo Caulo odoko lawaka dok ongwette me timo tic ma pe mege. En onyuto kit marac man cutcut i nge doko kabaka. I nino mo acel, en pe odiyo cwinye me kuro lanebi Camuel. Me kaka bedo ki mwolo kun geno ni Jehovah twero gwoko jone, Caulo owango gityer kadi bed onongo pe tye ki twero me timone. Macalo adwogine, Caulo orwenyo cwak pa Jehovah dok lacen Jehovah okwere woko ki i bedo kabaka. (1 Cam. 13:8-14) Wanyuto ryeko ka wanongo pwony ki i  labol me cikowa man dok wagwokke ki ngwette me timo jami ma wape ki twero me timone.

12. Daniel onyuto cwiny me mwolo nining?

¹² Kong wapor labol marac pa Caulo ki labol maber pa lanebi Daniel. I kare me kwone ducu, Daniel obedo laco mamwol dok onongo yenyo tira ki bot Jehovah. Me labolle, i kare ma Jehovah otiyo kwede me gonyo te lek pa Nebukadnejar, Daniel pe ojolo deyo pi gonyo lek meno. Me kaka meno, en omiyo deyo ki pak ducu bot Jehovah. (Dan. 2:26-28) Pwony ango ma wanongo? Ka omege gimaro pwonywa nyo ka watye ka nongo dano ma ginyuto miti i tic me pwony, wiwa myero opo me miyo deyo ducu bot Jehovah. Omyero wabed mwol kun waye ni pe watwero timo jami magi ducu labongo kony pa Jehovah. (Pil. 4:13) Ka watye ki kodi cwiny meno, nongo bene watye ka lubo lanen maber pa Yecu. I yo ma nining?

13. Ngo ma wapwonyo i kom mwolo ki i lok pa Yecu ma kicoyo i Jon 5:19, 30?

¹³ Kadi bed Yecu onongo pe ki roc, en pud ojenge i kom Jehovah. (Kwan Jon 5:19, 30.) En pe otemo mayo twero ki bot Wonne me polo. Jo Pilipi 2:6 tittiwa ni Yecu “pe oridde ki tek me bedo rom ki Lubanga.” Macalo Wod pa Lubanga ma lawiny, Yecu oniang ka ma kerone gik iye dok oworo twero pa Wonne.

14. I kare ma kipenyo Yecu me timo gin mo ma en pe ki twero me timone, en odok iye nining?

¹⁴ Nen kong kit ma Yecu odok kwede iye i kare ma lupwonnyene Yakobo ki Jon, kacel ki mingi, gubino bote ci gupenye pi mot me tic ma onongo Yecu pe ki twero me miyone. Labongo galle, Yecu otittigi ni Wonne me polo keken aye twero moko anga ma bibedo i bade tung acuc ki tung acam i Kerre. (Mat. 20:20-23) Yecu onyuto ni engeyo ka ma kerone gik iye. En onongo mwol. En pe ongwette me timo gin ma Jehovah pe omine twero me timone. (Jon 12:49) Watwero lubo lanen maber pa Yecu nining?

15-16. Watwero lubo tira ma Baibul miyo i 1 Jo Korint 4:6 nining?

 ¹⁵ Walubo lanen pa Yecu ki keto i tic tira me Baibul ma tye i 1 Jo Korint 4:6. Ki kenyo, wakwano ni: “Wubed kun wulubo gin ma yam gicoyo.” Pi meno, ka ngat mo openyo tamwa i kom gin mo, pe omyero wadiye me ye tamwa nyo walok ata labongo kong lwodone. Me kaka meno, omyero wakonye me nongo tira ki i Baibul nyo bukkewa ma jenge i kom Baibul. I yo ma kit meno, nongo watye ka nyuto ni wangeyo ka ma twerowa gik iye. Ki mwolo, wamiyo deyo bot Won Twer Ducu ni ‘cikke ducu tye atir.’​—Yabo 15:3, 4.

¹⁶ Medo i kom miyo deyo bot Jehovah, watye bene ki tyen lok mukene me nyuto mwolo. I yo ma nining ma bedo ngat mamwol keliwa yomcwiny dok konyowa me bedo ki wat maber ki jo mukene? Man aye gin ma wabinyamo kombeddi.

17. Pingo jo mamwol gubedo jo ma cwinygi yom?

¹⁷ Ka wamwol dok wangeyo ka ma kerowa gik iye, ci watwero bedo jo ma cwinygi yom. Pingo tye kit meno? Ka wangeyo gorowa, ci wabibedo ki yomcwiny pi kony mo keken ma jo mukene gimiyowa. Me labolle, tam kong i kom kare ma Yecu ocango ludobo apar. Ngat acel keken aye odwogo cen ka pwoyo Yecu pi cange ki i kom two malit-ti. Laco mamwol man onongo ngeyo ni pe etwero cango kome kekene labongo kony pa Yecu. Pi meno, en obedo ki pwoc pi kony ma onongo dok omiyo pak ki deyo bot Lubanga pi cange.​—Luka 17:11-19.

18. Mwolo konyowa nining me bedo ki wat maber ki jo mukene? (Jo Roma 12:10)

 ¹⁸ Pol kare jo mamwol gibedo ki wat maber ki jo mukene, dok gitye ki lurem macok. Pingo? Pien giye ni jo mukene bene gitye ki kit mabeco dok ginyuto gengi i komgi. Jo mamwol cwinygi bedo yom ka jo mukene gucobo ticgi maber dok gipwoyogi kun gimiyo botgi deyo labongo galle.​—Kwan Jo Roma 12:10.

19. Tyen lok ango mumiyo omyero wagwokke ki awaka?

¹⁹ Ki tungcel, jo ma luwakke ginongo ni tek adada me pwoyo jo mukene, kun gimito ni gin keken aye kipwogi. Gimaro poro kwogi ki pa jo mukene kun bene gidongo cwiny me pyem. Me kaka pwonyo jo mukene ki pokigi tic, gin gimaro waco ni, “Ka imito ni tic moni ocobbe maber, ci omyero itim in kikomi.” Ngat ma lawakke pol kare mito ni kinene calo ngat ma pire tek loyo dok obedo lanyeko. (Gal. 5:26) Dano ma kit meno pol kare pe bedo ki lurem mabeco. Ka waniang ni watye ki goro me awaka, ci omyero waleg matek pi kony pa Jehovah wek kit marac man pe orwak lwite odony matut i cwinywa.​—Rom. 12:2.

20. Pingo omyero wabed jo mamwol?

²⁰ Pud dong watye ki pwoc madit ya pi lanen pa Jehovah! Waneno mwolone i kit ma en tero kwede ki luticce, dok wan bene wamito ni walub lanene. Medo i kom meno, wamito bene lubo lanen pa jo ma gutiyo pi Lubanga ki mwolo ma kicoyo i Baibul. Dong omyero wami bot Jehovah pak ki deyo ducu ma en opore me nongone. (Yabo 4:11) Ka watimo jami magi, ci wan bene wabibedo lurem Jehovah matwal, pien en maro jo mamwol ma gingeyo ka ma kerogi gik iye.