1. Daudi uyero lembang’o pi jwigiri pa Yehova?

NYO andha Yehova tie ng’atu ma jwigere? Eyo. Daudi uwacu kumae: “Imio ira ban mi both peri . . . man [jwigiri] peri yunga.” (2 Sam. 22:36; Zab. 18:35, NWT) Saa moko nyo kinde ma Daudi ubino kiewo lembe maeni, eparu pi jabila Samuel m’ugam ucidho i bang’ won i pacu, pi niciwiro ng’atu ma bibedo ubimo mi Israel. Daudi ubino nyathin ma cogo kud i kind awiya pagi abora ma co, re en re ma Yehova ung’iye nibedo ubimo kaka Saul.​—1 Sam. 16:1, 10-13.

2. I thiwiwec maeni wabiweco iwi lembang’o?

² M’umbe jiji, Daudi ubino ku paru ma rom ku pa jagor Zaburi moko m’uwacu pi Yehova nia, ‘ejwigre gire kara enen gin ma ni i polo ku ma ni i ng’om. Eting’o dhanu ma sai kud i utur, man eting’o jacanpiny . . . kara eketh ebed karacelo ku judongo ma wijo.’ (Zab. 113:6-8) I thiwiwec maeni, wabilar neno ponji moko ma pigi tek ma wacopo nwang’u iwi jwigiri ma Yehova unyutho. Man i ng’eye, wabidok neno ponji mange ma wacopo nwang’u i kum lapor mi jwigiri p’ubimo Saul, pa jabila Daniel man pa Yesu.

3. Yehova utimo lembang’o iwa, man lembe maeno ubenyutho ang’o?

³ Kite ma Yehova ubetio ko ku dhanu ma gileng’ ungo,  unyutho kamaleng’ nia etie ng’atu ma jwigere. Ejolo ngo kende kende thier ma wabetimo ire, ento ekwanuwa bende ni jurimbe. (Zab. 25:14, B.M.A.) Yehova uthiero wode ni lam pi dubo mwa, kara wabed ku winjiri ma ceng’ini kude. Andha Yehova tie Mungu ma Jakisa!

4. Yehova umio iwa ang’o man ke pirang’o?

⁴ Wakenen ayi mange ma Yehova unyutho ie jwigiri. Calu Yehova tie Jacwic, nwang’u ecopo mio iwa ngo copo ma wang’ii ko gin m’umaku watim i kwo mwa. Ento ecwiowa kud ayi pare man emio iwa bed’agonya. Emito mer ma wamare ko re m’ucwalwa nitimo ire kud adunde mwa ceke, man wanwang’ bero nikum woro ma wawore ko. (Poi. 10:12; Isa. 48:17, 18) Nyo lembuno ubecwaluwa ngo nidwoko foyofoc ni Yehova pi jwigiri pare?

5. Yehova ubeponjowa nenedi nibedo ku jwigiri? (Nen cal m’i ng’eye.)

⁵ Kite ma Yehova ubetio ko kudwa, ubeponjowa nibedo ku jwigiri. Etie ng’atu ma riek m’usagu zoo. Re kadok kumeno de, etie ayika niwinjo paru mi jumange bende. Ku lapor, emio kaka ni Yesu ma Wode bende udikere kude kinde m’ebino cwio piny. (Rie. 8:27-30; Kol. 1:15, 16) M’umedo maeno, kadok etie Jategokpo de, re emio dito ni jumange bende. Ku lapor, eng’io Yesu ubed ubimo mi Ker pare, man ebimio bende dito moko ni dhanu 144 000 ma gibibimo karacelo ku Yesu. (Lk. 12:32) Bende, Yehova uponjo Yesu kara ebed ubimo man jalam ma dit. (Ebr. 5:8, 9) Ebeponjo bende ju ma gibibimo karacelo ku Yesu, kara gitim tic m’emio i korgi; man ebiroyere ngo i nyithilembe ma thindho thindho m’umaku gitim gigi. Ento etie ku genogen i wigi nia gibitimo yeny pare.​—Nyu. 5:10.

6-7. Wacopo nwang’u ponji ma kani i bang’ Wegwa mi polo iwi tic m’emio ni jumange?

⁶ Ka Yehova ma wegwa mi polo ngi, ma  nwang’u mbe ku yeny mi kony pa ng’atu moko, de ubemio dito ni jumange, dong’ wan ke nwang’u umaku watim rukani! Nyo itie jawi ot kunoke jadit cokiri? Ka eyo, lub lapor pa Yehova m’emio ko tic ni jumange man m’eroyere ko ngo i nyithilembe ma thindho thindho m’umaku gitim gigi. Pi nilubo lapor pa Yehova, kud imii tic amiya kende ni jumange, ento ponjgi bende ku tije, man konygi bende gibed ku genogen nia gibiromo nitimo tije. (Isa. 41:10) Ponji mange ma kani ma ju m’utie ku dito gicopo nwang’u i bang’ Yehova?

⁷ Biblia unyutho nia Yehova uwinjo paru mi jumalaika bende. (1 Ub. 22:19-22) Junyodo, wuneno wucopo lubo lapor pa Yehova nenedi? Ka copere, wubed wupenj awiya mwu bende gimii paru migi iwi kite m’ukwayu tic moko utimere ko. Man ka paru ma gimione wok ber, wutii kude.

8. Yehova unyutho cirocir ni Abraham giku Sara nenedi?

⁸ Jwigiri pa Yehova unen bende nikadhu kud i cirocir pare. Ku lapor, Yehova benyutho cirocir ka jurutic pare gimito ginyang’ i kum yub moko m’emaku. Egam ewinjo Abraham, kinde ma Abraham ubino koro adieng’acwiny pare i kum yub m’emaku m’ebecinyotho ko Sodoma ku Gomora. (Tha. 18:22-33) Poi bende iwi kite ma Yehova udwoko lembe ni Sara ma min ot pa Abraham. Ng’eicwiny umake ngo kinde ma Sara ung’iero lembang’ola pare m’eng’olo nia ebinyolo nyathin i tio pare. (Tha. 18:10-14) Ento edwoko lembe ni Sara ku woro.

9. Junyodo ku judong cokiri gicopo nilubo lapor pa Yehova nenedi?

⁹ Junyodo ku judong cokiri, wucopo nwang’u ponji ma kani i kum lapor mi jwigiri pa Yehova? Kan awiya mwu kunoke umego ku nyimego mi cokiri gifoyo ngo ku yub ma wumaku, wubed wutimo ang’o? Nyo lembe ma kwong’a ma wutimo utie nitwinyo paru migi? Kunoke nyo wutimo kero niwinjo paru migi bende? Juruot kunoke umego ku nyimego mi cokiri, ginwang’u bero ka ju m’ubetelo wigi ubelubo lapor pa Yehova. Eno tie ponji ma wanwang’u i kum lapor mi jwigiri pa Yehova. Kawoni dong’ wakenen ponji mange ma wacopo nwang’u i kum lapor mi jwigiri ma jugoro pire i Biblia.

10. Yehova ubetio nenedi ku lapor mi jumange pi niponjowa?

¹⁰ Yehova tie “Japonji mwa ma dit.” Eketho jukiewo pi lapor mi dhanu moko i Biblia kara uponjwa. (Isa. 30:20, 21) Ka wabenyamu i lembe ma wabesomo i Biblia, wanwag’u ponji i kum lapor mi dhanu moko ma ginyutho kite ma ber m’ufoyo i Mungu, ma calu ve jwigiri. Wanwang’u bende ponji i kum lembe m’unwang’u jumoko ma ginyutho ngo kite maeno ma ber mi jwigiri.​—Zab. 37:37; 1 Kor. 10:11.

11. Lapor ma rac pa Saul ubemio iwa cimowang’ ma kani?

¹¹ Kepar pi lembe m’unwang’u ubimo Saul. Kinde ma fodi etie aradu, ebino jalawobi ma mol. Egam eng’eyo mupaka mi gin m’ecopo timo, uketho nindo moko elworo nia mito ngo ebed ku dito dupa. (1 Sam. 9:21; 10:20-22) Re yok’ung’eye, edoko jakuhaya. Enyutho kuhayane nyanok i ng’eye kinde m’edoko ubimo. Nindo moko enyutho ngo cirocir kinde m’ebino kuro jabila Samuel. Kakare nibedo ku genogen nia Yehova re ma bikonyo dhanu pare, Saul uthiero lam m’awang’a m’ebino mbe ku twerone. Lembuno uketho ebayu  winjiri pare m’ebino ko ku Yehova, man Yehova umayu bende Ker cen kud i cinge. (1 Sam. 13:8-14) Wabibedo dhanu ma riek tek lapor maeno mi cimowang’ ukonyowa nikoc i kum kuhaya.

12. Daniel unyutho nenedi nia etie ng’atu ma jwigere?

¹² Tung’ ku Saul, wakenen lapor ma ber pa jabila Daniel. Daniel ubino ng’atu ma jwigere i kwo pare zoo, man saa ceke ebed esayu telowic pa Yehova. Ku lapor, kinde ma Yehova uketho ekor the lek p’ubimo Nebukadnezar, Daniel ugoyo ngo kore nia en re m’etie jakor the lekne. Ento ku jwigiri, emio dwong’ ku yung ceke ni Yehova. (Dan. 2:26-28) Lembuno ubemio iwa ponji ma kani? Kan umego gibefoyowa pi korolembe moko ma ber ma wamio, kunoke nyo wanwang’u ma toke moko ma ber i tic mi lembanyong’a, ukwayu wamii dwong’ ceke ni Yehova. Ku jwigiri, ukwayu wang’ei nia watimo lembe maeno ceke ku kony pa Yehova. (Flp. 4:13) Ka watimo kumeno, nwang’u wabelubo bende lapor pa Yesu. Nenedi?

13. Wec mi jwigiri ma Yesu yero, ma nwang’ere i Yohana 5:19, 30 ubemio iwa ponji ma kani?

¹³ Yesu ubino Wod Mungu man ebino ku kum m’umbe dubo; re asu saa ceke ebed ejengere iwi Yehova. (Som Yohana 5:19, 30.) Epimo ngo apima de nia emai dito pa Won. Jufilipi 2:6 uyero pi Yesu nia, ‘i wang’e, bedo ma jubedo ko rom ku Mungu en e gin ma juketho cwiny i kume ngo.’ Yesu ubino Wod ma wor: eng’eyo m’upaka mi gin m’ecopo timo man ebed eworo dito pa Won.

14. Yesu dwoko lemb’ang’o kinde ma jupenje nia etim lembe moko m’ebino mbe ku twerone?

¹⁴ Kepar pi lembe ma Yesu dwoko kinde ma Yakobo man Yohana karacelo ku meggi, gibino i bang’e man gipenje ku lembe moko m’ebino mbe ku twero mi timo. M’umbe galu, Yesu dwoko igi nia, Won mi polo kende re m’utie ku copo mi ng’io nia ng’a m’ubed yo ku cinge ma yor acwic kunoke yo ku cinge ma yor acam i Ker mi polo. (Mat. 20:20-23) Eno unyutho kamaleng’ nia Yesu ung’eyo mupaka mi gin m’ecopo timo. Yesu ubino ng’atu ma jwigere, etimo ngo lembe moko acel de ma Yehova mio ngo ire twerone. (Yoh. 12:49) Wacopo lubo lapor pare nenedi?

15-16. Wacopo tio nenedi ku juk ma nwang’ere i 1 Jukorinto 4:6?

¹⁵ Pi nilubo la por pa Yesu, mito watii ku juk ma e, ma nwang’ere i 1 Jukorinto 4:6,  m’uwacu kumae: “Kud wukadh ku wi lembe m’ubedo agora.” Pieno, ka ng’atu moko ukwayu kony i bang’wa, mito ngo wayer ire paru mwa giwa, kunoke lembe moko ci m’utundo i wiwa. Ento mito wanwang’ paru ma wakonye ko i Biblia man i girasoma mwa mange m’ujengere iwi Biblia. I ayi maeno re ma wabinyutho nia wang’eyo mupaka mwa. Bende, eno binyutho nia watie dhanu ma wajwigara man wang’eyo nia juk pa Yehova re m’utie juk ma ber nisagu mwa.​—Nyu. 15:3, 4.

¹⁶ M’uweko mio yung ni Yehova, thelembe mange de nuti ma ber m’ucwaluwa nibedo dhanu ma jwigiri. Kawoni wakewec iwi kite ma jwigiri copo konyo kowa nibedo kud anyong’a man nikwo ma ber ku jumange.

17. Pirang’o dhanu ma gijwigiri man m’ung’eyo mupaka mi gin ma gicopo timo gibedo kud anyong’a?

¹⁷ Jwigiri ketho wabedo kud anyong’a lee. Pirang’o? Pilembe ka wang’eyo nia lembe moko nuti ma wambe ku copo mi timo, eno ketho wabedo kud anyong’a man ku foyofoc pi kony moko ci ma jumange ubemio iwa. Ku lapor, kepar kinde ma Yesu keyo kum weg dhobu apar. Ng’atu acel kende m’i kindgi re m’udok ufoye pi remo pare m’ekeyo m’ubed ucere nibedo i kind dhanu, ma nwang’u en gire ecopo keyo ngo. Ng’atu maeno ma won jwigiri ung’eyo nia ka ku kony pa Yesu ngo, nwang’u kume ukei ungo. Eno uketho ebedo ku foyofoc pi kony m’enwang’u man eyungo Mungu.​—Lk. 17:11-19.

18. Nimakere ku Jurumi 12:10, jwigiri man ng’eyo m’upaka mi lembe ma wacopo timo, konyowa nenedi nikwo ma ber ku jumange?

¹⁸ Wang’ mapol dhanu ma jwigiri gibedo ma ber ku jumange man ebedo yot igi ninwang’u jurimo ma beco. Pirang’o? Pilembe ging’eyo nia jumange utie ku kite ma beco m’usagu  migi, man gibedo ku genogen iwi jumange. Dhanu ma jwigiri man m’ung’eyo mupaka mi gin ma gitimo, gibedo kud anyong’a ka jumange utimo tic ma jumio igi uwotho ma ber. Gigalu ngo ku foyogi man nimio igi yung.​—Som Jurumi 12:10.

19. Lembang’o m’unyutho nia kuhaya tie gin ma rac?

¹⁹ Tung’ ku maeno, etie lembe ma tek ni jukuhaya nifoyo jumange, pilembe gimito gin re ma juyunggi. Wang’ mapol giporiri ku jumange, man giyenyo gin re ma gisag juwagi. Kakare niponjo jumange man nimio igi tic, giwacu nia “kan imito tic uwoth cuu, ukwayu itime giri.” Ng’atu ma jakuhaya mito en re m’ebed mi kwong’o man kumira nege i kum jumange. (Gal. 5:26) Dhanu ma kumeno mer m’ikindgi ku jurimbgi galu ngo. Ka wanwang’u nia pidoic mi kuhaya kunoke mi ting’iri ucaku bemondo i iwa, mito wakwai Yehova pio pio ukonywa wadwok pidoic mwa nyen, kara kite maeno ma rac kud ugur ulage i iwa.​—Rum. 12:2.

20. Pirang’o ukwayu wabed dhanu ma jwigiri?

²⁰ Wadwoko foyofoc ni Yehova pi lapor ma ber m’enyutho! Waneno jwigiri m’enyutho ni jurutic pare man wamito wan bende walub batiende. M’umedo maeno, wamito walub bende lapor mi jurutic pare ma gitimo ire ku jwigiri. Dong’ wek saa ceke wamiu yung ku dwong’ ni Yehova kum eromo. (Nyu. 4:11) Kawatimo gin maeno ceke, wabibedo jurimb Yehova rondo ku rondo kum emaru dhanu ma jwigiri.