1. Kii David a bi kal inyu suhulnyuu i Yéhôva?

BAA di nla toi kal le Yéhôva a yé suhulnyuu? Ñ, pééna i ta bé. David a kal lisañga jada le: “U nti me ben yoñ i tohi, yak suhulnyuu yoñ i nyilha me bañga mut.” (2 Samuel 22:36; Tjémbi 18:36, MN.) I nene le David a bé hoñol i kel mpôdôl Samuel a bi lo i tehe isañ inyu hoo i mut a bé lama yila kiñe Israel. David a bé man nu sôk ikété bon bôlôm juem; ndi nyen Yéhôva a pohol inyu héñha Kiñe Saulô.​—1 Samuel 16:1, 10-13.

2. Kii di ga tehe munu yigil ini?

² I mpôna le David a bééna minlélém mi mahoñol ni ntôp tjémbi nu a kal inyu Yéhôva le: “Nu a nsuhus nyemede i béñge mam ma yé ngii ni ma hisi. A nyodol [hiyeyeba] ikété nluñ ték. A nhéa ki [nu a] nsamb . . . le a téé nye lôñni baane.” (Tjémbi 113:6-8) Munu yigil ini, di ga bôk di tehe lelaa Yéhôva a bi unda suhulnyuu, ni biniigana di nla ôt mu. I mbus di ga tehe i yom di nla nigil mu ndémbél i Kiñe Saulô, i mpôdôl Daniel ni i Yésu inyu jam li ñem nsôhga.

3. Lelaa Yéhôva a ntehe bés, kii hala a ñunda?

³ Suhulnyuu i Yéhôva i nene mu maada mé ni bagwélél bé ba ba yé bikwéha bi bôt. A neebe  bibégés gwés, a ntehe ki bés kiki mawanda mé. (Tjémbi 25:14) Inyu boñ le di bana i nya maada i ni Yéhôva, a bi ti Man wé kiki sesema inyu bibéba gwés. Kinje konangoo ni ñem ngôô!

4. Kii Yéhôva a bi ti bés, inyuki?

⁴ Di béñge njel ipe Yéhôva a ngwélél inyu unda suhulnyuu. A bé le a hek bés i nya i yé le di laa bé yoñ makidik ni bésbomede. Ndi a bi boñ bé hala. A bi hek bés i pôna yé, a ti ki bés kunde i yoñ makidik. Tolakii di yé nluñ ték, a ngwés le di gwélél nye ni ñem wés wonsôna inyule di ngwés nye, ni le di nyi le a niiga bés inyu loñge yés. (Ndiimba Mbén 10:12; Yésaya 48:17, 18) Di yé maséé ngandak ngéda di ntehe suhulnyuu i Yéhôva!

5. Lelaa Yéhôva a niiga bés suhulnyuu? (Béñge titii i lipep li bisu.)

⁵ Ngéda di ntehe kiki Yéhôva a nyoñ bés, hala a ntinde bés i bana suhulnyuu. Yéhôva a yé Batupék. Ndi to hala, a yé bebee i emble mahoñol ma bôt bape. Kiki hihéga, Yéhôva a bi sal ni Man wé inyu hek gwom gwobisôna. (Bingéngén 8:27-30; Kôlôsé 1:15, 16) Ni ki le, to hala kiki Yéhôva a yé nu ngui yosôna, a mbééga bôt bape minson. Kiki hihéga, a bi téé Yésu Kiñe i Ane yé, a ga gwélél ki 144 000 bôt inyu énél ni Yésu. (Lukas 12:32) Ñ, Yéhôva a bi kôôba Yésu inyu boñ le a ba Kiñe ni Prisi keñi. (Lôk Héber 5:8, 9) A bi kôôba yak i bet ba ga ane ni Yésu, ndi a nyéñ bé yi hiki jam mu kiki ba ngwel  nson wap. A mbôdôl bo ñem, a nyi ki le ba ga boñ sômbôl yé.​—Masoola 5:10.

6-7. Bimbe biniigana di nla ôt mu ndémbél i Yéhôva i ngéda di mbééga bôt bape minson?

⁶ Ibale Tata wés nungingii, nu a gwé bé ngôñ ni mahôla ma mut nye ki nye, a mbééga bôt bape minson, bôô ni ngélé yañen ni bés! Kiki hihéga, baa u yé isañ mbai tole mañ u likoda? Kiki Yéhôva, bééga bôt bape minson, u yéñ bañ to i ba ha hiki ngéda ba nsal. Ibale u nigle Yéhôva, bôlô yoñ i ga séla loñge, u ga niiga yak bape i sal ibabé i kon woñi. (Yésaya 41:10) Kii ipe mimañ ni basañ mbai ba nla boñ inyu nigle Yéhôva?

⁷ Bibel i ñunda le Yéhôva a ñemble yak mahoñol ma biañgel. (1 Bikiñe 22:19-22) A bagwal, lelaa ni nla kôna ndémbél i Yéhôva? Ngim mangéda, ni nla bat bon banan mahoñol map inyu ngim jam. I mbus, ni boñ i yom ba nkal.

8. Lelaa Yéhôva a bi yoñ Abraham bo Sara?

⁸ Suhulnyuu i Yéhôva i nene ki mu kiki a nhônba bés. Kiki hihéga, Yéhôva a ñunup bé i ngéda bagwélél bé ba mbat nye mambadga ni suhulnyuu inyu makidik mé. A bi emble Abraham i ngéda a bé bat nye too a ga tjé toi Sôdôm ni Gômôra. (Bibôdle 18:22-33) Di bigda ki i jam Yéhôva a bi boñ inyu Sara, nwaa Abraham. A bi unup bé i ngéda Sara a bi nol inyule a bi kal nye le a ga nembee tolakii a yé ñunuk. (Bibôdle 18:10-14) Bibuk a bi gwélél bi ñunda le a bé ti Sara lipém.

9. Bimbe biniigana bagwal ni mimañ ba nla nigil mu ndémbél i Yéhôva?

⁹ A bagwal, a mimañ, kii ni nla nigil mu ndémbél i Yéhôva? Lelaa ni yé ni mboñ i ngéda bôt ni ñéga ba neebe bé mahoñol manan? Baa ni yé ni nyéñ unda bo le i yom ni mpot yon i yé? Tole ni yé ni ñemble bo? I ngéda mimañ ni basañ mbai ba nigle Yéhôva, mahaa ni makoda ma yé maséé. Di ntehe biniigana di nla ôt mu ndémbél i suhulnyuu i Yéhôva. Nano di béñge kii di nla nigil inyu ñem nsôgha mu ndémbél i bagwélél ba Djob ba kôba.

10. Lelaa Yéhôva a ngwélél ndémbél i bagwélél bé inyu niiga bés?

¹⁰ ‘Malét wés Nunkeñi’ le Yéhôva a nyeelene bés ndémbél i bagwélél bé mu Bañga yé inyu niiga bés. (Yésaya 30:20, 21) I ngéda di ñañ Bibel, di ñôt biniigana mu miñañ mi bagwélél ba Djob ba ba bi kôna bilem gwé kiki bo ñem nsôgha. Di ntehe ki bikuu bi bi kwél i bet ba bi hôlôs bé bilem bilam bi.​—Tjémbi 37:37; 1 Korintô 10:11.

11. Kii ndémbél ibe i Saulô i niiga bés?

¹¹ Di bigda i jam li bi pémél Kiñe Saulô. I ngéda a bé njohok, a bééna ñem nsôhga. A bé yi minwaa nwé a tjélék yak ngim minson. (1 Samuel 9:21; 10:20-22) Ndi i mbus ngéda, Saulô a bi yila ngôk. Hala a bi nene i ngéda a bi yila kiñe. Lisañ jada, a bi hônba bé letee mpôdôl Samuel a lo. Iloole a bana botñem le Yéhôva a nla sôñ litén jé, Saulô a bi  ligis sesema ki le, a bééna bé kunde i boñ hala. Hala a bi boñ le Yéhôva a unbene nye. I mbus ngéda a nimis yak tel yé i kiñe. (1 Samuel 13:8-14) Ndémbél i Saulô i niiga bés le kekikel di boñok bañ jam ba nti bé bés kunde i boñ.

12. Lelaa Daniel a bi unda ñem nsôhga?

¹² Maselna ni Saulô, di béñge ndémbél ilam i mpôdôl Daniel. Niñ yé yosôna, Daniel a bi gwélél Yéhôva ni suhulnyuu ni ñem nsôhga, a badak ki nye mahôla. Kiki hihéga, i ngéda Yéhôva a bi gwélél nye inyu koble Kiñe Nébukadnézar eem yé, a bi bép bé woo i tôl le nyen a nkobol yo. Ni ñem nsôhga, Daniel a bi ti Yéhôva lipém jolisôna. (Daniel 2:26-28) Kii hala a niiga bés? Ibale lôk kéé i ngwés minkwel nwés, tole ibale nson wés u likalô u num matam malam, di nlama bigda le Yéhôva nyen a kôli ni lipém. Ni suhulnyuu di nlama neebe le ibale Yéhôva a nhôla bé bés, di ta bé le di boñ mam mana. (Filipi 4:13) I ngéda di mboñ hala di noñ yak ndémbél i Yésu. Lelaa?

13. Kii bibuk bi Yésu i kaat Yôhanes 5:19, 30, bi niiga bés inyu ñem nsôhga?

¹³ To hala kii a yé Man Djob, Yésu a bé boñ bé jam jo ki jo ibabé i bat Yéhôva. (Añ Yôhanes 5:19, 30.) A bi yéñ bé yoñ tel i Isañ. Kaat Filipi 2:6 i nkal le “a bi hoñol bé i kadal tel i Nyambe, ndik wengoñle bo Nyambe ba nkolna.” Kiki Yésu a bééna ñem nsôhga, a bé boñ bé mam Yéhôva a bi ti bé nye kunde i boñ, a bé ti Isañ lipém.

14. I ngéda ba bi bat Yésu le a boñ jam a bééna bé kunde i boñ, lelaa a bi timbhe?

¹⁴ Di béñge lelaa Yésu a bi timbhe i ngéda Yakôbô bo Yôhanes ni nyañ wap ba bi lo i bat nye jam a bééna bé kunde i boñ. Mu manut ma, Yésu a bi kal bo le Yéhôva nyen a gwé kunde i pohol i nwet a ga ba i woo walôm tole i woo waé u Yésu i Ane yé. (Matéô 20:20-23) Yésu a bé lel bé minwaa. A bééna ñem nsôhga. Yésu a bi boñ bé  i jam Yéhôva a bi ti bé nye kunde i boñ. (Yôhanes 12:49) Lelaa di nla nigle Yésu?

15-16. Lelaa di nla noñ maéba ma yé kaat 1 Korintô 4:6?

¹⁵ Di nigle ndémbél i Yésu i ngéda di noñ maéba ma yé i kaat 1 Korintô 4:6. I nkal le: “Ni lel bañ nwaa u mam ma yé ntilga.” I ngéda ba mbat bés maéba, kekikel di nyégsa bañ bôt i neebe mahoñol més tole di kal bañ jam li bisu li lo bés mahoñol. Di nlama gwélél Bibel ni bikaat bi ntôñ inyu timbhe. I ngéda di mboñ hala, di ñunda le di nlel bé minwaa nwés. Ni ñem nsôhga di nti ‘mbagi i téé sép’ i Yéhôva lipém.​—Masoola 15:3, 4.

¹⁶ U héya le di nsômbôl ti Yéhôva lipém, mam mape ma ntinde ki bés i bana ñem nsôhga. Di ga tehe nano lelaa suhulnyuu ni ñem nsôhga bi nla hôla bés i ba maséé, ni i bana maada malam ni bôt bape.

17. Inyuki bôt ba suhulnyuu ni ñem nsôhga ba yé maséé?

¹⁷ I ngéda di yé suhulnyuu di ban-ga ñem nsôhga, di mbéna ba maséé. Inyuki? Inyule ngéda di nyi i het ngap yé i nsugul, di ga ba maséé i neebe mahôla ma bôt bape. Kiki hihéga, bigda i jam li bi bôña i ngeñ Yésu a bi mélés jôm li bakon lô. Ndik wada ikété yap nyen a bi lo i ti Yésu mayéga inyule a bi mélés nye kon, u nyemede a bé bé le a mélés. Jon i mut suhulnyuu ni ñem nsôhga nunu a bi lôôha ti Yésu mayéga, a bégés ki Nyambe.​—Lukas 17:11-19.

18. Lelaa suhulnyuu ni ñem nsôhga bi nhôla bés i nôgla ni bôt bape? (Rôma 12:10)

 ¹⁸ I bôt ba yé suhulnyuu ba ban-ga ñem nsôhga, ba mbéna nôgla ni bôt bape ba ban-ga ki bañga mawanda. Inyuki? Inyule ba yé maséé i tehe bilem bilam bi bôt bape, ba ñunda ki le ba mbôdôl bo ñem. Bôt ba suhulnyuu ni ñem nsôhga ba yé ki maséé i ngéda bôt bape ba ntibil gwel minson nwap, ba yé ki bebee i bégés bo.​—Añ Rôma 12:10.

19. Inyuki di nlama tjél ngôk?

¹⁹ Maselna ni hala, bôt ba ngôk ba nyi bé bégés bôt bape, ba ngwés lipém. Ba mbéna hégha bomede ni bôt bape, ba gwéhék pémsan. Iloole ba niiga bôt bape, ba bééga ki bo minson, ba mbéna kal le, “inyu boñ le bôlô i séla loñge, me nlama sal yo memede.” Mut ngôk a ngwés binene, a nkil ki bôt bape njôñ. (Galatia 5:26) I nya bôt i, i mbéna bé bana mawanda. Ibale di nyimbe le di yé ngôk, di yemhe Yéhôva le a hôla bés i ‘yilha mahoñol més yondo’ inyu boñ le ngôk u o bañ minkañ ikété yés.​—Rôma 12:2.

20. Inyuki di nlama bana suhulnyuu ni ñem nsôhga?

²⁰ Di yé maséé ngandak i yi le Yéhôva a nti bés ndémbél ilam! Di ntehe suhulnyuu yé mu maada mé ni bagwélél bé, hala a ntinde bés i nigle nye. Di nigle ki ndémbél i bagwélél ba Djob ba kôba ba ba bééna ñem nsôhga. Di kee ni bisu i ti Yéhôva lipém ni bibégés bi bi kôli ni nye. (Masoola 4:11) Ha ngéda i, yak bés di ga kiha ni Tata wés nungingii nu a ngwés bôt ba suhulnyuu ni ñem nsôhga.