1. Rosai Daud ikofen ḇekur Allah Yahwe sne ḇerun Ḇyena?

KOKYAR kaku Yahwe ima nya sne ḇerun ke? Imboḇae. Daud ikofen kwar, ”Buk adai ḇeḇuk fasaspar Beja ḇe aya, ma sne ḇerun Bena naiso ḇewari yasmai baba.” (2 Sam. 22:36; Mz. 18:35) Fafisu Daud ikofen radine, imbude isya iswarepen mura ḇe ras Nabi Samuel ryama ḇe kmari rum ḇyedi fa ryem raja oso faro er Israel. Daud skoḇe mambekanaek riwar, mboi Daud iso ḇe bonso. Imbape, iso Yahwe kyinfir fa ḇye raja fadwer Raja Saul i.​—1 Sam. 16:1, 10-13.

2. Rosai nari kawos ro farkarkor ineni?

² Daud nya kakara oser raris manfasfas Mazmur 113 roi dakkofen ḇekur Yahwe I: ”Kyunem fa myam farsyos ma supswan, kyanow snonggaku ḇeryar ḇa ro roref. Kyanow snonggaku ḇesaḇarar . . . fa skain kuker ḇepoik sya.” (Mz. 113:6-8) Ro farkarkor ine, ḇepon ya nari kawos moḇsa Yahwe fyasnai sne ḇerun raya ma farkarkor ḇefandun rosai kun ro na. Mura, nari kawos rosai kofarkor ro Raja Saul, Nabi Daniel, ma Yesus sko ḇekur sne ḇerun ya.

3. Moḇsa Yahwe ifrur pyum ko rai, ma rosai kofawi ro roi anna?

³ Ro nyan Yahwe ifrur pyum snonggaku ḇenapes ḇa koine, kofawi nane nfasnai nya sne ḇerun. Imarisen faro samsyom koḇena monda ḇa, mboi myam ko ḇe bati Ḇyedi kako. (Mz. 25:14) Yahwe syewar nyan ḇepon insama bisa koḇebati kuker I, isoine ḇyuk Roma Ḇyedi fa imarwarek ko ro sasar koḇena. Yahwe ima isawarwar kaku!

4. Rosai Yahwe ḇyuk ḇe ko kwar, ma rosai ḇefnai fa ḇyuk roi anna ḇe ko?

 ⁴ Kokarapan nyan ḇese Yahwe fyasnai sne ḇerun. Yahwe iso ḇefrur konya. Inja imarisen ido, bisa ḇyuk ḇaḇemkei ḇe ko ḇa insama kokinfir rosai imbe kofrur ro kankenem koḇena. Imboi, ifrur rarirya ḇa. Yahwe ifrur ko imnis moḇ isnai raya, ma ḇyuk ḇaḇemkei ḇe ko fa kokinfir ro manggunko. Imarisen insama kokinfir fa kofarmyan ḇe I kuker sne ḇesiper kukro koswar I. Imarisen kako fa kofawi kosouser faro I ido, nari kosmai payamyum. (Ul. 10:12; Yes. 48:17, 18) Kokofen kasumasa kaku kukro Yahwe fyasnai sne ḇerun!

5. Moḇsa Yahwe fyarkor ko fa kona sne ḇerun rai? (Mam sonin ḇero ḇarpon.)

⁵ Yahwe fyarkor ko fa kona sne ḇerun. Ine nasnai ro moḇ ifrur pyum ko raya. Yahwe iso ḇefawinanem syadi ro farsyos ḇeba ine. Rarirya mboi, imarisen ryower snonggaku ḇese kakara sena. Imnis raris, Yahwe kyinfir Roma Ḇyedi fa ifnoḇek I ḇo sufrur roi ḇebor kam. (Ams. 8:27-30; Kol. 1:15, 16) Yahwe ima Allah ḇepoik syadi, mboi ḇyuk fararur ono ḇe ḇesesya fa sakkuf na. Rupa ra, Yahwe ryem Yesus i fa ḇye Raja ro Karajan Ḇyedi, ma ḇyuk papoik kako ḇe snonggaku ri 144.000 fa sakḇepoik fnoḇek Yesus i. (Luk. 12:32) Kakuḇae, na Allah Yahwe fyarkor Yesus i fa duf fararur ḇe Raja ma Imam Ḇeba. (Ibr. 5:8, 9) Fyarkor kako snonggaku na ḇepoik kayam fnoḇek Yesus i sya fa suf fararur sena. Mboi na ipok myam ker moḇsa sifrur fararur sena oser-oser raya ḇa. Ikyar nari sifrur imnis marisen Ḇyena.​—Why. 5:10.

6-7. Rosai kofarkor ro moḇ Yahwe ḇyuk fararur ḇe ḇesesya?

 ⁶ Allah Yahwe syambraḇ fa ifrur roi nakam ro manggundi, mboi imarisen ḇyuk fararur ḇe ḇesesya fa sakkuf na. Inja, fandun fa kakfrur raris Yahwe I. Raris, Auma ḇebukor ro kina ḇaido penatua ro sidang ke? Wakfrur raris Yahwe I kuker buk fararur fa ḇesesya sakkuf na, ma mam ker awer moḇsa sifrur na rai. Rarirya kada, nari fararur anna namnai pyum, farkor pyum si, ma nafnoḇek si kako fa simgak ḇa syadi. (Yes. 41:10) Rosai ḇebukor ro kina sya sfarkor ro Yahwe I wer?

⁷ Refo ikofenḇair Yahwe imarisen ryower malaikat sya kakara sena kako. (1 Raj. 22:19-22) Sinan Auya, moḇsa na wakfrur raris moḇ Yahwe ifrur nane rai? Mam ḇo nasrow ido, wor romawa Besya fa sikofenḇair kakara sena ḇekur moḇsa na mgofrur fararur ono rai. Rosai sikofen na namnis ido, waso na.

8. Rariso Yahwe kyaḇaḇ faro Abraham ma Sara su?

⁸ Yahwe fyasnai sne ḇerun kako kuker kyaḇaḇ. Imnis raris, fafisu manfamyan Ḇyesi sifakfuken I ḇekur roi imbe ifrur ya. Fafisu Yahwe dun snemuk fa myunpres mnu Sodom ma Gomora, ryower pyum fyor Abraham ikofenḇair makakwarek ḇyena. (Kej. 18:22-33) Oso wer ido, koswarepen Yahwe ifrur pyum Abraham swari, Sara i. Allah Yahwe doḇe Sara ḇye binsar kwar, mboi nari fyadores. Sara ryower ine mura imbrif, mboi Yahwe imsor i ḇa. (Kej. 18:10-14) Ḇyesyowi ma ifrur pyum kaku Sara i.

9. Sinan ma penatua sya, rosai sfarkor ro Yahwe I?

⁹ Sinan ma penatua mgoya, rosai mgofarkor ro Yahwe I? Mgokarapan rosai na mgofrur rofyor romawa ḇaido naek srar ro sidang sifakfuken snemuk mgun na. Fafisu ya ḇeri na mgoḇriwarek mgo ke? Ḇaido mgosewar fa mgofawi nyan kakara sena resari ke? Snonggaku ḇero kina ma sidang sya na sismai payamyum rofyor sinan ma penatua mgoya mgakfrur raris Yahwe I. Inja, kawos kwar nyan fa kofarkor sne ḇerun ro Allah Yahwe I. Kirine, rwama kawos rosai kofarkor ro fawar snonggaku sfas ro Refo ḇekur sne ḇerun ya.

10. Rosai Yahwe ḇyukifarkor ko ḇekur sne ḇerun ya?

¹⁰ Allah Yahwe, ”Guru Ḇeba” koḇedi, fyasos fawar ro Refo fa ḇyukifarkor ko. (Yes. 30:20, 21) Na kofarkor kuker kokarauser fawar ro snonggaku ḇefasnai rari ḇepyum imnis rosai Allah imarisen na, raris sne ḇerun. Na kofarkor kako kuker kawos roi ḇekur snonggaku ḇefasnai sne ḇerun ḇa sya.​—Mz. 37:37; 1 Kor. 10:11.

11. Rosai kofarkor ro Saul i?

¹¹ Kokarapan fawar ro Raja Saul i. Fafisu ḇyabo kaker, fyasnai sne ḇerun. Ifawi samambraḇ ḇa ḇyena ma ikyar manggun ḇa na daksmai fararur nabor syadi. (1 Sam. 9:21; 10:20-22) Imbape, fafisu dakḇe raja kwar ḇo fyoro ḇa mura, dararer i ma ifrur roi siwan yoḇ i ḇa. Ras oso, imewer iwaf kawan Nabi Samuel i. Dararer i ma ikyar ḇa Yahwe na kyadaunwarek kawasa Ḇyesi. Oso wer ido, ryap farsarser ro rum ari, iso fararur ipok ifrur na ḇa. Eḇedari Yahwe imsor faro Saul i ma ḇye raja wer ḇa. (1 Sam. 13:8-14) Kun farkarkor ro fawar anine ma komewer kararer ko ido, kofrur roi ḇepyum.

12. Rariso Daniel fyasnai sne ḇerun rai?

 ¹² Kokarapan fawar ḇepyum ro Nabi Daniel i, ima iḇese ro Saul i. Ro Daniel kenem ḇyedi ḇesiper, fyasnai sne ḇerun pdef ma dor farkankin ro Yahwe I ḇesya kwar. Rupa ra, fafisu Yahwe ḇye Daniel i fa fyasnaiḇair Nebukhadnezar mafafu ḇyeja, syewar sanandik faro manggundi ḇa. Imboi, kuker sne ḇerun ḇyuk sanandik nakam faro Yahwe I. (Dan. 2:26-28) Farkarkor rosai kun ro fawar ine? Rofyor naek srar sya simarisen srower faya koḇena, ḇaido kosmai bon ḇepyum ro fararur ḇesren koḇena, fandun fa koḇuk sanandik nakam faro Yahwe I. Kofasnai sne ḇerun ido, na koḇe kofrur roi anna kam kukro Yahwe I ḇefnoḇek kondi. (Flp. 4:13) Kofrur roi ine ido, kofasnai koisya koso Yesus nyan ḇepyum ḇyena kako.

13. Rosai kofarkor ro Yesus wos ḇyena ḇero Yohanes 5:19, 30 ya?

¹³ Yesus ima Allah Rumgun ḇenapes kaku Ḇyedirya, mboi isnefer faro Yahwe I. (Wasya Yohanes 5:19, 30.) Syewar fa dunbur Kmari papoik Ḇyena ḇa. Filipi 2:6 doḇe Yesus ipok kyara fa dun Allah karapesa Ḇyedi ḇaido imbe imnis ra Allah ḇa. Yesus ifawi samambraḇ ḇa ḇyena ma ḇyesyowi Kmari papoik Ḇyena.

14. Rosai Yesus ifrur ya fafisu sor i fa ifrur rosai ipok ifrur ḇa na?

¹⁴ Kokarapan rosai Yesus ifrur ya fafisu Yakobus ma Yohanes sna suḇedi dor insama Yesus ḇyuk moḇ risuru faro roma ḇyesuine ro Karajan nanggi. Yesus kyarem ḇeri ḇo doḇe Kmari ro nanggi derer iso na ḇeyap mansei ḇekain ro ḇar raku ma ḇar rasar ḇyedi ro Karajan anya. (Mat. 20:20-23) Yesus fyasnai ima nya papoik syadi ro Kmari ḇa. Yesus nya sne ḇerun. Roi Yahwe iwan ḇe i ḇa, imewer ifrur na. (Yoh. 12:49) Moḇsa na kakfrur raris Yesus i rai?

15-16. Rariso na kosouser wos anun ḇero 1 Korintus 4:6 rai?

¹⁵ Koso Yesus sne ḇerun ḇyena kuker kosouser wos anun ḇero 1 Korintus 4:6. Mnuk ine doḇe, ”Mkokara syadi awer . . . ro rosai sfas kwar.” Inja fafisu ono sisya sor anun ro ko ido, komewer kodif snonggaku sya fa srower kakara  manggun koḇena ḇaido kokarem fasawsaw mboi kokara ḇepon na ḇa. Imbape ipyum ya, kofasnai ḇeri wos farkin ro Refo ma syap-syap koḇena. Kofrur na ido, kofasnai koma kofawi roi nakam ḇaim. Rarirya, kofasnai sne ḇerun snar kofawi anun ḇeramuma ro Yahwe nama napyum syadi ro ko.​—Why. 15:3, 4.

¹⁶ Kofasnai sne ḇerun kukro koḇesyowi Yahwe I monda ḇa, mboi koḇesyowi roi ḇepyum ḇesena kako. Komam moḇsa kofasnai sne ḇerun nari dun marasrisen ma nafnoḇek ko fa kokain pyum kuker snonggaku ḇesesya.

17. Rosai ḇefnai fa snonggaku ḇefasnai sne ḇerun na simarisen syadi?

¹⁷ Kofasnai sne ḇerun ido, nari kosmai marasrisen syadi. Kukro? Rofyor kofawi kosambraḇ ḇa kako ido, nari kokofen kasumasa ma komarisen fafisu snonggaku ḇesesya sifnoḇek ko. Raris, kokarapan fafisu Yesus ḇyuk pararei faro snon risamfur ḇeduf pado sya. Snon oser monda ḇekaḇer fa ikofen kasumasa ḇe Yesus i kukro ḇye i fa iprei ro dafduf ḇeḇyeḇa ḇyena kwar. Snon ḇefasnai sne ḇerun ine ifawi Yesus ifnoḇek i ḇa ido, na ipok iprei ro dafduf ḇyena ḇa. Iso ḇefnai fa ikofen kasumasa ḇe Yesus i ma isandik Allah.​—Luk. 17:11-19.

18. Rariso sne ḇerun nafnoḇek ko fa kokain pyum kuker snonggaku ḇesesya? (Roma 12:10)

¹⁸ Rosai ḇefnai fa snonggaku ḇefasnai sne ḇerun na skain pyum ma sḇebati fanam kuker snonggaku ḇesesya? Sifawi snonggaku ḇese sakna rari-rari ḇepyum ma sikyar faro si. Snonggaku ḇefasnai sne ḇerun nari simarisen fyor ḇesesya  sismai bon ḇepyum ro fararur sena ma sḇuk wos sandik yoḇ si ḇeri.​—Wasya Roma 12:10.

19. Rosai monda ḇefrur fa kararer ko awer?

¹⁹ Snonggaku ḇeararer sima siḇese kaku ro snonggaku ḇena sne ḇerun. Sima samswen fa sḇuk wos sandik faro ḇesesya, mboi simarisen syadi ḇesesya smanen si. Smam snonggaku ḇese imbe sisyadi ro si ido, na sisewar fa sipyum syadi ro si. Snonggaku ḇeararer na imarisen ifrur fararur oso ro manggundi kukro kyara na ḇesesya sipok sifrur mnis na ḇa. Snonggaku ḇeararer na imarisen isyadi ro ḇesesya ma fyafayaf rofyor snonggaku ḇese sifrur roi ḇepyum syadi ro i. (Gal. 5:26) Snonggaku ḇeradine sya sakna bati kako, mboi ḇaḇebati sena nakain fyoro ḇa. Komam mboi kararer ko ido, koḇenadi kaku kor Yahwe I fa ifnoḇek ko insama kofadwer kakara koḇena. Rarirya, na rari ararer neknam ro kenem koḇena ḇa.​—Rm. 12:2.

20. Rosai ḇefnai kaku fa kofasnai sne ḇerun?

²⁰ Kokofen kasumasa kaku ḇe Yahwe I kukro fyasnai nyan ḇepyum ḇe ko kwar! Komam moḇsa fyasnai sne ḇerun faro snonggaku ḇesyom faro I, ma komarisen kakfrur raris I. Oso wer ido, komarisen koso nyan ḇepyum ro fawar snonggaku sfas ro Refo ḇefarmyan faro Yahwe I kuker sne ḇerun. Iḇye kada, koḇuk ḇe Yahwe I ḇesya kwar roi isyus fa ismai na, isoine sanandik ma syowi. (Why. 4:11) Rarirya, na Yahwe nya ko ḇe bati Ḇyesi isof fyoro-fyoro kukro iswar snonggaku ḇefasnai sne ḇerun sya.