1. ?Deved i talem wanem long saed blong tingting daon blong Jehova?

?I STRET blong talem se Jehova i gat tingting daon? Yes i stret. Wan taem, Deved i talem se: “Yu yu givim sil blong yu long mi blong sevem mi, mo tingting blong yu we i stap daon i leftemap mi.” (2 Saml. 22:36, NW; Sam. 18:35, NW) Maet Deved i stap tingbaot taem ya we profet Samuel i kam long haos blong papa blong hem, blong makemaot fiuja king blong Isrel. Deved i lasbon long ol seven brata, be Jehova i jusum hem nao blong i tekem ples blong King Sol.—1 Saml. 16:1, 10-13.

2. ?Bambae yumi tokbaot wanem long stadi ya?

² I sua se Deved bambae i agri wetem tingting blong wan man blong raetem sam, we i tokbaot Jehova se: “Hem i bendaon blong lukluk heven mo wol, i stap leftemap man we i no gat nem, we i stap sidaon long das. Hem i leftemap puaman . . . blong mekem hem i sidaon wetem ol haeman.” (Sam. 113:6-8, NW) Long stadi ya, fastaem bambae yumi tokbaot sam samting we Jehova i mekem, we i soem se hem i gat tingting daon, mo ol impoten lesen we yumi save lanem long saed blong fasin ya. Biaen, bambae yumi lanem olsem wanem blong putum tingting blong yumi i stap daon, tru long stori blong King Sol, profet Daniel, mo Jisas.

3. ?Jehova i dil wetem yumi olsem wanem, mo hemia i pruvum wanem?

³ Jehova i pruvum se hem i gat tingting daon taem i dil wetem ol sinman we oli wosipim hem. Hem i akseptem wosip blong yumi, be tu, hem i luk yumi olsem fren blong hem. (Sam. 25:14) Jehova nao i mekem se yumi save fren wetem hem, taem hem i givim boe blong hem olsem wan sakrefaes from ol sin blong yumi. !Man! !Hem i kaen tumas mo hem i gat sore long yumi!

4. ?Jehova i mekem yumi olsem wanem, mo from wanem?

 ⁴ Hemia wan narafala samting we i soem se Jehova i gat tingting daon. Jehova i krietem yumi, mo sipos i wantem, hem nomo i save kontrolem laef blong yumi. Be hem i no mekem olsem. Hem i mekem yumi long pija blong hem, mo i mekem we yumi nomo yumi jusum samting we yumi wantem. Hem i wantem we yumi ol man, yumi wok blong hem long fulhat blong yumi from we yumi lavem hem mo yumi luksave gudfala frut we i kamaot taem yumi obei long hem. (Dut. 10:12; Aes. 48:17, 18) !Yumi glad tumas we Jehova i gat tingting daon olsem!

5. ?Olsem wanem Jehova i tijim yumi blong gat tingting daon? (Yu luk pija long fran pej.)

⁵ Taem Jehova i stap dil wetem yumi, hem i stap tijim yumi blong gat tingting daon. Jehova i waes moa bitim eniman long yunives. Nating se i olsem, hem i glad nomo blong akseptem tingting blong ol narafala. Eksampol, Jehova i letem boe blong hem i givhan long hem blong krietem olgeta samting. (Prov. 8:27-30; Kol. 1:15, 16) Mo nating se Jehova i gat olgeta paoa, hem i givim raet long ol narafala blong oli mekem sam wok. Eksampol, hem i putumap Jisas blong i King long Kingdom, mo hem i givim sam raet long 144,000 man blong oli rul wetem Jisas. (Luk 12:32) I sua se Jehova i trenem Jisas blong i kam King mo Hae Pris. (Hib. 5:8, 9) Hem i trenem tu olgeta ya we oli rul wetem Jisas, be hem i no givim wok mo i kam blong mekem evri smosmol samting long wok ya. Hem i trastem se olgeta oli save mekem wil blong hem.—Rev. 5:10.

6-7. ?Yumi save lanem wanem long fasin blong Papa blong yumi long heven blong givim wok long narafala?

⁶ Papa blong yumi long heven i no nidim help blong eniman, be yet, hem i givim raet long sam man blong oli mekem sam wok. ?Yu no ting se yumi tu i mas mekem sem mak? Eksampol, ?yu yu wan hed long famle o wan elda long  kongregesen? I gud yu folem eksampol blong Jehova blong givim wok long ol narafala, mo yu no mas kontrolem olgeta long evri smosmol samting long wok ya. Taem yu folem fasin blong Jehova, wok ya bambae finis gud, mo long rod ya, yu stap trenem ol narafala mo yu mekem se oli no fraet. (Aes. 41:10) ?Olgeta we oli gat sam responsabiliti oli save lanem wanem moa long fasin blong Jehova?

⁷ Baebol i soem se Jehova i wantem save tingting blong ol pikinini blong hem, ol enjel. (1 King 22:19-22) ?Ol perens, olsem wanem yufala i save folem eksampol blong Jehova? Sipos i stret, askem long ol pikinini sipos oli gat sam tingting long saed blong wan wok we yufala i stap mekem. Mo sipos tingting blong olgeta i stret, folem.

8. ?Olsem wanem Jehova i gat longfala tingting long Ebraham mo Sera?

⁸ Mo tu, Jehova i gat tingting daon taem hem i gat longfala tingting long ol man. Eksampol, Jehova i gat longfala tingting taem ol man blong hem oli askem wetem respek from wanem hem i mekem sam desisen. Taem Hem i tekem desisen blong spolem Sodom mo Gomora, Ebraham i wari nao i stap askem kwestin from, mo Jehova i lesin long hem. (Jen. 18:22-33) Mo tingbaot olsem wanem Jehova i dil wetem Sera, waef blong Ebraham. God i no kros long Sera taem hem i laf from promes ya se bambae hem i gat bel nating se hem i olfala finis. (Jen. 18:10-14) Be, hem i tritim Sera wetem respek.

9. ?Ol perens mo ol elda oli save lanem wanem long eksampol blong Jehova?

⁹ Ol perens mo ol elda, ?yufala i save lanem wanem long eksampol blong Jehova? Taem ol pikinini o ol narafala long kongregesen oli kwestinim desisen blong yufala, ?wanem faswan samting yufala i mekem? ?Yufala i kwik blong tok long olgeta? ?O yufala i traem blong kasemsave tingting blong olgeta? Taem ol perens mo ol elda oli traehad blong folem fasin blong Jehova, famle mo kongregesen bambae i glad bigwan. Yumi stap tokbaot samting we yumi save lanem long tingting daon blong Jehova. Be naoia, bambae yumi tokbaot sam eksampol long Baebol we oli save tijim yumi long fasin ya blong putum tingting blong yumi i stap daon.

10. ?Olsem wanem Jehova i yusum eksampol blong ol narafala blong tijim yumi?

¹⁰ Jehova i Bigfala Tija blong yumi, taswe hem i putum sam eksampol long Tok blong hem blong tijim yumi. (Aes. 30:20, 21) Yumi lanem lesen taem yumi tingting dip long ol stori blong ol man long Baebol, we oli soemaot ol fasin blong God, wetem fasin ya tu blong putum tingting blong yumi i stap daon. Yumi lanem lesen tu taem yumi stadi long samting we i hapen long olgeta we oli no folem ol gudfala fasin ya.—Sam. 37:37; 1 Kor. 10:11.

11. ?Yumi save lanem wanem long rabis eksampol blong Sol?

¹¹ Tingbaot samting we i hapen long King Sol. Fastaem hem i wan yang man we i putum tingting blong hem i stap daon. Hem i kasemsave se i gat sam samting we hem i no save mekem, mo hem i fraet tu blong mekem moa wok. (1 Saml. 9:21; 10:20-22) Be biaen, Sol i kam flas. Hem i soem fasin ya kwiktaem afta we i kam king. Wan dei, hem i no moa gat longfala tingting blong wet long profet Samuel. Hem i no putum tingting blong hem i stap daon blong trastem Jehova se i save halpem ol man blong hem, be i girap i bonem sakrefaes nating se hem i no gat raet blong mekem olsem. Frut we i kamaot se Jehova i no moa glad long Sol, mo biaen hem i no moa king. (1 Saml. 13:8-14) Sipos yumi waes, bambae yumi lanem lesen long eksampol ya we  i wan woning, mo yumi no mekem samting we yumi no gat raet blong mekem.

12. ?Wanem i soemaot se Daniel i putum tingting blong hem i stap daon?

¹² Naoia bambae yumi tokbaot gudfala eksampol blong profet Daniel, we i defren olgeta long rabis eksampol blong Sol. Long ful laef blong Daniel, hem i gat tingting daon, hem i mekem wok blong God we tingting blong hem i stap daon, mo oltaem i lukluk i go long Jehova blong lidim hem. Eksampol, taem Jehova i yusum hem blong talemaot mining blong drim blong Nebukadnesa, hem i no talem se save ya i kamaot long hem wan. Be hem i putum tingting blong hem i stap daon, mo i se olgeta save ya i kamaot long Jehova, mo i givim glori long Hem. (Dan. 2:26-28) ?Hemia i tijim wanem long yumi? Sipos ol brata sista oli laekem ol tok blong yumi o yumi gat gudfala frut long wok blong prij, yumi mas tingbaot blong leftemap nem blong Jehova. Yumi mas luksave se sipos Jehova i no givhan long yumi, bambae yumi no naf blong mekem ol samting ya. (Fil. 4:13) Taem yumi gat tingting ya, yumi stap folem gudfala eksampol blong Jisas tu. ?Wanem eksampol ya?

13. Folem Jon 5:19, 30, ?yumi lanem wanem long fasin blong Jisas?

¹³ Nating se Jisas i pikinini blong God mo i stret gud olgeta, be hem i dipen oltaem long Jehova. (Ridim Jon 5:19, 30.) Hem i neva traem blong tekemaot posisen blong Papa blong hem. Filipae 2:6 i talem se Jisas “i no wantem tekem posisen blong God blong talem se hem i sem mak long God.” Oltaem hem i putum hem i stap daon long Papa blong hem, mo hem i kasemsave se i gat sam samting we hem i no save mekem, mo i respektem posisen blong Papa blong hem.

14. Taem ol narafala oli askem blong Jisas i mekem samting we hem i no gat raet blong mekem, ?hem i mekem wanem?

¹⁴ Tingbaot tok we Jisas i talem, taem Jemes mo Jon wetem mama blong tufala, oli kam askem samting we hem i no gat raet blong givim. Wantaem nomo Jisas i ansa long olgeta se, Papa blong hem nao i gat raet blong talem se hu bambae i sidaon long raetsaed mo long lefsaed blong hem, long Kingdom. (Mat. 20:20-23) Jisas i respektem se i gat sam samting we hem i no gat raet blong mekem. Hem i putum tingting blong hem i stap daon. Hem i neva go bitim mak long ol samting we Jehova i askem hem blong mekem. (Jon 12:49) ?Yumi save folem gudfala eksampol ya blong Jisas olsem wanem?

15-16. ?Olsem wanem yumi save folem advaes blong 1 Korin 4:6?

 ¹⁵ Taem yumi folem advaes blong 1 Korin 4:6, yumi stap folem eksampol blong Jisas. Vas ya i talem se: “Yufala i no mas go bitim mak blong ol tok ya we oli raetem finis.” So taem ol narafala oli askem advaes, yumi no mas fosem olgeta blong oli folem prapa tingting blong yumi, mo yumi no mas kwik blong toktok. Be, yumi mas pulum tingting blong olgeta i go long ol advaes blong Baebol, mo long ol buk blong yumi. Long rod ya, yumi luksave se i gat sam samting we yumi no save mekem. Wetem tingting we i stap daon, yumi leftemap God Ya We i Gat Olgeta Paoa, we ‘ol loa blong hem oli stret.’—Rev. 15:3, 4.

¹⁶ I tru se taem yumi putum tingting blong yumi i stap daon, yumi ona long Jehova. Be i gat sam narafala risen tu blong gat fasin ya. Naoia bambae yumi luk olsem wanem fasin ya blong putum tingting blong yumi i stap daon mo tingting daon, i save mekem yumi glad mo yumi frengud wetem ol narafala.

17. ?From wanem ol man we oli putum tingting blong olgeta i stap daon mo oli gat tingting daon, oli glad?

¹⁷ Taem yumi putum tingting i stap daon mo yumi gat tingting daon, bambae yumi glad. ?From wanem? Taem yumi luksave se i gat sam samting we yumi no save mekem, bambae yumi glad tumas taem narafala i halpem yumi, mo yumi talem tangkiu from. Eksampol, tingbaot taem ya we Jisas i hilim ten man we oli gat leprosi. Wan nomo long olgeta i kambak blong talem tangkiu long Jisas, from hem i luksave se hem wan i no save tekemaot rabis sik ya. Man ya we i putum tingting blong hem i stap daon mo we i gat tingting daon, i glad tumas long help we hem i kasem mo i givim glori long God.—Luk 17:11-19.

18. ?Olsem wanem fasin ya blong gat tingting daon mo putum tingting i stap daon, i halpem yumi blong joen gud wetem ol narafala? (Rom 12:10)

 ¹⁸ Ol man we oli putum tingting blong olgeta i stap daon mo oli gat tingting daon, oli save joen gud wetem ol narafala mo oli save gat ol gudfala fren. ?From wanem? From we oli kasemsave se ol narafala man oli gat ol gudfala fasin mo oli trastem ol man ya. Taem ol narafala oli mekemgud wok blong olgeta, ol man we oli putum tingting blong olgeta i stap daon mo oli gat tingting daon, oli glad mo oli kwik blong talem gudfala toktok long olgeta, mo oli ona long olgeta.—Ridim Rom 12:10.

19. ?From wanem yumi no mas kam praod?

¹⁹ Be ol man we oli praod, oli faenem i had blong talem gudfala toktok long ol narafala, from we oli wantem se ol narafala oli presem olgeta. Plante taem oli skelem olgeta wetem ol narafala, mo oltaem oli wantem winim narafala. Oli no wantem trenem ol narafala mo givim wok long olgeta, from we maet oli stap tingting se: “Sipos mi wantem se wok i stret (hemia i min se i stret folem tingting blong olgeta), mi nomo mi mas mekem.” Plante taem, wan man we i praod i wantem se hem i moa impoten long ol narafala, mo i jalus. (Gal. 5:26) Ol man olsem oli no save fren longtaem wetem ol narafala. Sipos yumi faenemaot se yumi gat fasin ya blong praod, yumi mas askem strong long Jehova blong i halpem yumi blong ‘jenisim tingting blong yumi fulwan,’ nao rabis fasin ya i no kam wan stamba fasin blong yumi.—Rom 12:2.

20. ?From wanem yumi mas putum tingting blong yumi i stap daon mo yumi gat tingting daon?

²⁰ !Yumi glad tumas long gudfala eksampol we Jehova i soemaot! Yumi luk tingting daon blong hem, taem hem i dil wetem ol man blong hem, mo yumi wantem folem fasin ya blong hem. Mo tu, yumi wantem folem gudfala eksampol blong ol man long Baebol we oli putum tingting blong olgeta i stap daon, mo oli gat blesing ya blong frengud wetem God. I gud oltaem yumi givim ona mo glori i go long Jehova from we i stret blong mekem olsem. (Rev. 4:11) Nao bambae yumi tu yumi naf blong frengud wetem Papa blong yumi long heven we i lavem ol man we oli putum tingting blong olgeta i stap daon, mo oli gat tingting daon.