1. Kai si ikataken Daud kerna sipat Jahwe si meteruk ukur?

METERUK ukur nge Jahwe? Pasti. Pernah bagenda ikataken Daud, ‘BerekenNdu man bangku perisai keselamatenNdu. SipatNdu si meteruk ukur erban aku mulia.’ (2 Sam. 22:36; Msm. 18:35, NW) Sanga itulis Daud kata-kata enda, banci saja ingetna sanga reh Samuel ku rumah bapakna guna ngelantik ise pagi si jadi raja Israel. Arah waluh anak bapakna, Daud si nguda janah ia me si ipilih Jahwe guna nggantiken Raja Saul.​—1 Sam. 16:1, 10-13.

2. Kai kari sibahas bas artikel enda?

² Pasti setuju Daud man kata-kata pemasmur enda, “Itatap [Jahwe] nge ku teruh, ngenen langit ras doni. IpekekeNa si musil i bas abu taneh nari. . . . Jenari ijadikenNa ia jadi teman anak raja.” (Msm. 113:6-8) Bas artikel enda, sipelajari kari piga-piga pelajaren penting kerna sipat meteruk ukur arah Jahwe. Kenca si e, sibahas kari kai si banci sipelajari arah Raja Saul, Nabi Daniel, bage pe Jesus kerna sipat meteruk ukur.

3. Uga cara Jahwe erurusen ras kita, janah e mbuktiken kai?

³ Ibuktiken Jahwe Ia meteruk ukur arah caraNa erurusen ras manusia si la sempurna. Labo ngenca meriah ukurNa adi sisembah Ia, tapi ianggapNa ka kita temanNa. (Msm. 25:14) Gelah banci kita jadi temanNa, ikorbankenNa anakNa guna nebus dosata. Tuhu-tuhu kel Jahwe e perkuah!

4. Kai si ibereken Jahwe man banta, janah engkai?

 ⁴ Cuba ukuri bukti si deban maka Jahwe e meteruk ukur. Selaku Pencipta, banci saja iban Jahwe la lit kengasupenta guna nentuken kai si ateta silakoken. Tapi la bage ibanNa. IbanNa kita mirip ras Ia janah ibereNa kita kengasupen guna nentuken kai si ateta silakoken. Adi ibandingken ras Jahwe, seh kel kita kitikna janah lemah. Aminna pe bage, penting iakapNa pilihenta. AteNa silayani min Ia perban keleng ateta Ia janah siteh kai gunana patuh man baNa. (Ul. 10:12; Jes. 48:17, 18) Ngata bujur kel kita perban meteruk ukur kel Jahwe e!

5. Kai si ilakoken Jahwe guna ngajari kita gelah meteruk ukur? (Nen gambar sampul.)

⁵ Iajari Jahwe kita meteruk ukur arah caraNa erurusen ras kita. Jahwe me si pentarna bas alam semesta enda. Aminna pe bage, nggit Ia ngaloken pendapat arah si deban. Contohna, sanga iciptaken Jahwe kerinana, ikut Jesus nampati Ia. (Kua. 8:27-30; Kol. 1:15, 16) Aminna pe Jahwe e madakuasa, iberekenNa ka tanggung jawap man si deban. Contohna, ilantikNa Jesus jadi Raja bas KerajanNa janah ipilihNa 144.000 kalak guna merentah ras Jesus. (Luk. 12:32) Pasti ilatih Jahwe Jesus guna jadi Raja ras Imam si Mbelin. (Heb. 5:8, 9) Ilatih Jahwe ka si 144.000 e guna ndalanken tugasna. Tapi, labo iaturNa cara kalak e i bas ndalanken tugas seh ku bagin-bagin si kitikna kel.​—Ket. 5:10.

6-7. Kai si banci iusih kepala keluarga, pertua, ras orang tua arah Jahwe?

⁶ Adi Bapakta si i surga saja pe si la merluken penampat nggit mereken tugas man kalak si deban, terlebih ka  kita! Contohna, adi kam sekalak kepala keluarga ntah pe sekalak pertua bas runggun, usihlah Jahwe. Uga carana? Berekenlah tugas man kalak si deban janah ula atur cara kalak e i bas ngelakoken tugasna seh ku bagin-bagin si kitikna kel. Adi usihndu Jahwe, dung me kerina tugas e alu mehuli, enggo ka ilatihndu kalak si deban, janah ibanndu kalak e jadi lebih percaya diri. (Jes. 41:10) Kai deba nari si banci iusihndu arah Jahwe?

⁷ I bas Pustaka ikataken maka nggit Jahwe megiken kai si ikataken malekat-malekatNa. (1 Raj. 22:19-22) Orang tua, kai si banci ilakokenndu guna ngusih Jahwe? Adi cocok, pindolah pendapat anakndu kerna uga arusna sada tugas ilakoken. Adi pas iakapndu, ikutkenlah pendapatna e.

8. Kai buktina sabar Jahwe man Abraham ras Sarai?

⁸ Bukti si deban maka Jahwe e meteruk ukur eme sabar Ia. Contohna, sanga lit umatNa si nungkun kerna keputusen si enggo ibanNa, sabar Ia megikenca. Ibegiken Jahwe sanga ikataken Abraham kekuatirenna kerna Sodom ras Gomora si nandangi ikernepken. (Kej. 18:22-33) Janah ingetlah uga Jahwe sanga erurusen ras Sarai ndehara Abraham. Sanga erjanji Jahwe maka hamil me Sarai, tawa Sarai perban ia enggo metua. Tapi Jahwe la tersinggung ntah pe merawa. (Kej. 18:10-14) Sebalikna, mehuli kel Jahwe man Sarai.

9. Kai si banci ipelajari orang tua bage pe pertua-pertua arah Jahwe nari?

⁹ Kam orang tua bage pe pertua-pertua, kai deba nari si banci ipelajarindu arah Jahwe? Cuba ukurindu, kai nge si ilakokenndu adi anakndu ntah pe turang senina bas runggun la setuju kerna keputusen si ibanndu. Mis nge ibelandu keputusenndu e? Ntah usahakenndu nge ngangkai perukurenna? Adi orang tua ras pertua-pertua ngusih Jahwe, pasti mbelin kel gunana man keluarga bage pe man runggun. Enggo sibahas kai si banci sipelajari arah Jahwe nari kerna sipat meteruk ukur. Gundari mari sibahas contoh-contoh si deban si lit bas Pustaka gelah banci kita meteruk ukur.

10. Kai nge si ilakoken Jahwe gelah banci kita erlajar arah contoh kalak si deban?

¹⁰ Selaku ‘Guru si Mulia,’ ibereken Jahwe melala contoh bas Pustaka guna ngajari kita. (Jes. 30:20, 21, NW) Bas Pustaka, banci sipelajari kerna kalak si ncidahken sipat-sipat si erban Dibata senang, termasuk sipat meteruk ukur. Sipelajari ka kari kerna kai si terjadi man kalak si la ncidahken sipat-sipat si mehuli e.​—Msm. 37:37; 1 Kor. 10:11.

11. Kai si banci sipelajari arah sipat Saul si la mehuli?

¹¹ Ukuri kai si terjadi man Raja Saul. Sanga nguda denga, ia kalak si meteruk ukur. Sadar ia maka lit keterbatasenna janah sangsi ia ngaloken terbuen tanggung jawap. (1 Sam. 9:21; 10:20-22) Tapi la ndekah kenca jadi raja, ia jadi sombong janah melebesa perbahanenna. I bas sada paksa, la ia sabar nimai Nabi Samuel. Perban la ia meteruk ukur, ipersembahkenna korban tutungen padahal e labo hakna. La ia tek maka Jahwe banci nelamatken umatNa. Akibatna, la senang Jahwe man bana janah dungna ipilih Jahwe raja si deban guna nggantiken ia. (1 Sam. 13:8-14) Banci kita jadi kalak pentar adi erlajar kita arah contoh  e ndai janah la silakoken kai si labo hakta.

12. Kai buktina Daniel meteruk ukur?

¹² Nabi Daniel eme contoh si mehuli. Beda kel ia ras Saul. Segedang geluhna, Daniel tetap meteruk ukur janah lalap ipindona petunjuk Jahwe. Contohna, sanga igunaken Jahwe ia ngertiken nipi Nebukadnesar, labo ikataken Daniel maka ia si ngertikenca. Tapi alu meteruk ukur iberekenna kerina kemulian ras pujin man Jahwe. (Dan. 2:26-28) Kai pelajarenna man banta? Adi ipuji turang senina kita perban mejile khotbahta ntah pe pengalamenta bas erberita, arus siakui maka la banci silakoken si e ndai kerina adi la kin isampati Jahwe. (Pil. 4:13) Adi bage siban, siusih me contoh si mehuli arah Jesus. Usihen kai saja si iberekenna?

13. Kai si banci sipelajari kerna sipat meteruk ukur arah kata-kata Jesus si lit bas Johanes 5:19, 30?

¹³ Aminna pe Jesus anak Dibata si sempurna, tetap iandalkenna Jahwe. (Baca Johanes 5:19, 30.) La pernah iusahakenna muat keduduken Bapakna. Bas Pilipi 2:6 ikataken maka “la pernah turah i bas ukur [Jesus] guna muat keduduken Dibata ntah pe gelah seri ras Dibata.” Selaku Anak si patuh, iangkaina keterbatasenna janah iergaina keduduken Bapakna.

14. Sanga Jesus isuruh ngelakoken kai si labo hakna, kai nge si ilakoken Jesus?

¹⁴ Cuba ukuri kai si ilakoken Jesus sanga ipindo Jakup, Johanes, bage pe mamakna kai si labo jadi hak Jesus merekenca. Mis ikataken Jesus maka Bapakna si i surga ngenca si banci nentuken ise si kundul arah kanan bage pe arah kiri Jesus bas Kerajan. (Mat. 20:20-23) Jenari teridah maka isadari Jesus lit keterbatasenna. Ia meteruk ukur. La pernah ilakokenna kai si la iperentahken Jahwe. (Joh. 12:49) Uga kita banci ngusih sipat Jesus si mehuli?

15-16. Uga kita banci ndalanken nasehat si lit bas 1 Korinti 4:6?

¹⁵ Siusih sipat Jesus si meteruk ukur alu ndalanken nasehat Pustaka si lit bas 1 Korinti 4:6. I je ikataken, “Ikutkenlah kai si tertulis.” Emaka adi lit si mindo nasehat man banta, ula pernah sibereken  nasehat menurut pendapatta sendiri, ntah pe mis sibereken nasehat alu la lebe siukuri uga kin situhuna situasina. Tapi, arus sibereken nasehat si erpalasken Pustaka bage pe si lit bas publikasita. Alu bage, sisadari maka lit keterbatasenta. Adi bage siban, kita kalak si meteruk ukur perban sibuktiken maka lalap ulin nasehat Jahwe asangken nasehatta.​—Ket. 15:3, 4.

¹⁶ Selain mereken kemulian man Jahwe, lit alasen si deban engkai maka perlu kita meteruk ukur. Gundari mari sibahas uga sipat meteruk ukur banci erban kita ermeriah ukur ras erban mehuli hubungenta ras kalak si deban.

17. Engkai kalak si meteruk ukur banci ermeriah ukur?

¹⁷ Adi kita meteruk ukur, mbelin kemungkinenna kita ermeriah ukur. Engkai? Adi sadar kita lit keterbatasenta pasti ngata bujur kel kita adi lit kalak si mereken penampat man banta. Contohna, cuba ukuri sanga ipepalem Jesus sepuluh kalak si kena pinakit kusta. Sekalak ngenca si mulihken ndahi Jesus guna ngataken bujur perban enggo ipepalem ia arah pinakitna si mekelek, penakit si la banci itambarina sisada. Dilaki si meteruk ukur enda ngata bujur kel perban enggo isampati. Imuliakenna ka Dibata perban ia enggo malem.​—Luk. 17:11-19.

18. Engkai maka sipat meteruk ukur banci erban dame hubungenta ras kalak si deban? (Roma 12:10)

¹⁸ Kalak si meteruk ukur biasana dame hubungenna ras kalak si deban janah menukah iakapna kompak ras kalak. Engkai? Perban nggit ia ngakui maka lit sipat-sipat si mehuli bas kalak si deban  janah tek ia man kalak e. Kalak si meteruk ukur meriah ukurna ngidah kalak si deban berhasil, mis ka pujina kalak e, janah iergaina ka.​—Baca Roma 12:10.

19. Uga nge kalak si sombong e?

¹⁹ Tapi kalak si meganjang rukur mesera iakapna muji kalak perban padin iakapna ia si ipuji. Ibanding-bandingkenna dirina ras kalak si deban janah iusahakenna gelah ia si hebatna. La ia nggit mereken pelatihen ntah pe mereken tugas man kalak si deban. Adi lit si perlu ilakoken, ia atena si ndahikenca, perban iakapna labo kari banci sikap adi kalak si ndahikenca. Kalak si meganjang rukur rusur atena ia jadi kalak si pentingna janah cian atena adi hebaten kalak asangken ia. (Gal. 5:26) Kalak si bage jarang banci ndekah erteman ras kalak si deban. Adi enggo lit siakap sipat meganjang rukur bas dirita, arus kita tutus ertoto man Jahwe gelah isampatiNa kita ‘ngobah perukurenta.’ Alu bage, sipat si la mehuli e la rurat bas dirita.​—Rom. 12:2.

20. Engkai kita arus meteruk ukur?

²⁰ Bujur kel sikataken perban enggo ibereken Jahwe usihen man banta! Siteh Jahwe meteruk ukur arah caraNa erurusen ras umatNa, janah siusih ateta Ia. Selain si e, siusih ateta kalak si lit bas Pustaka si ngelayani Jahwe alu meteruk ukur. Mbera-mbera lalap sibereken kemulian bage pe kehamaten man Jahwe perban patut Ia ndatkenca. (Ket. 4:11) Adi bage silakoken, banci kita jadi teman Jahwe seh rasa lalap perban keleng ateNa kalak si meteruk ukur.