1. Jé David a nga jô a lat a fulu éjote nyule Yéhôva?

YE BI ne fo’o kôme bo’olô na Yéhôva a ne éjote nyule nga? Ôwé. David a nga jô Yéhôva môs éziñe na: “Ô veya fe ma ébene ya nyiane wôé; a [éjote nyule jôé é neneya ma, nwt-F.]” (2 Sa. 22:36; Bs. 18:35) Éko éziñ a mbe a simesa’ane môse nkulu mejô Samuel a nga zu yen ésaa wé, amu a mbe a kômbô’ô telé mone wé wua njôô bôt Israël. Ésaa David a mbe a bili bobefam mwom; David nnye a mbe mesu’ulan, ve nnye Yéhôva a nga tobe na a fole Njôô bôte Saül.​—1 Sa. 16:1, 10-13.

2. Jé bia zu yen ayé’é di?

² Mejô me David ma lu’an a jame ntili besam mfe a nga jô a lat a Yéhôva na: “A suu émiene si a fombô biôm bi ne yôp été a si nyô. A bete môt a ne azoé si a vaa nye mbulu’u été. A bete môt a ne éngôngol . . .  ane a ye toé nye ba be bone bejôô bôt.” (Bs. 113:6-8) Ayé’é di, bia zu taté yen aval avé Yéhôva a liti fulu éjote nyul, éyoñ éte bia zu fe yen avale bi ne vu nye. Mvuse ya valé, bia zu kobô ajô Njôô bôte Saül, nkulu mejô Daniel, a Yésus, a yene mam éve’ela jap é ne ye’ele bia a lat a fulu éte.

3. Aval avé Yéhôva a belane bebo bisaé bé, a jé nalé a liti?

³ Éyoñ bia fas aval avé Yéhôva a belane bebo bisaé bé, bia kôme yen abim avé a ne éjote nyul. Akusa bo bi be’e metyi ya abé, Yéhôva a kañese ékaña’a jangan,  a yebe fe na bi bo bemvôé bé. (Bs. 25:14) Mbôle Yéhôva a mbe a yi na bi late ngbwa a nye, émien a nga bôndé fe’e na a lôme Mone wé si va, a zu wu a butane mam abé mangan. Ngo’o abime mvam ete!

4. Jé Yéhôva a nga ve bia, a amu jé?

⁴ Bi tame zu yene jam afe da liti na Yéhôva a ne éjote nyul. Éyoñ a nga té môta binam, A mbe ngule ya bo na a wulu ve aval A yi. Ve a nji de bo. A nga té bia éve’ela jé, a ve fe bia fili ya nyoñ mintyi’ane miangan. A mbe a yi na biabebien bi tyi’i na bia zu kañe nye amu bia nye’e nye, a amu bia yeme na mboan ôte ñwô ô ne soo bia bibotan. (Dt. 10:12; És. 48:17, 18) Nga bia yiane kôme ve Yéhôva akéva amu fulu éjote nyule jé?

5. Aval avé Yéhôva a ye’ele bia fulu éjote nyul? (Fombô’ô fôtô ya ékô’ôla.)

⁵ Bia yé’é fulu éjote nyul éyoñ bia yen aval avé Yéhôva a belane bia. Teke môte mfe a ne fe’e ane Yéhôva. Ve to’o nalé, a vô’ôlô ôsimesane bôte bevok. Éve’an é ne na, a nga kañese na Mone wé a saé a nye éyoñ a téé émo minlañ. (Min. 8:27-30; Beco. 1:15, 16) Yéhôva a ne fe Zambe ya ngul ése, ve nalé a nji kamane nye na a ve bôte befe mimbe’e. A nga telé Yésus Njôô ya Éjôé jé, A ye fe ve bôte 144 000 fane ya jôé a Mone wé yôp. (Luc 12:32) Teke bisô na Yéhôva a nga yañele Yésus asu na a bo Njôô a Beta prêtre. (Beh. 5:8, 9) A yañele fe bôte ba be Yésus ba ye jôé; ve a tebe ki be mvus awolo ese na a fombô nge ba bo fo’o ésaé avale da  yian. A too be ndi amu a yeme na ba ye bo nkômbane wé.​—Nli. 5:10.

6-7. Jé éve’ela Yéhôva é ne ye’ele bia a lat a mfi ya ve bôte bevo’o mimbe’e?

⁶ Nge Yéhôva nye a kañese saé a bôte bevok a too ke na ngule ja jembane ki nye, nguma’ane ñhe ke wo a môta binam? Ye ô ne nlô ya nda bôt nge ke mvendé? Tôñe’e éve’ela Yéhôva, va’a bôte befe mimbe’e, a vaa mis ésaé jap. Éyoñ wo bo nalé, jam ôsu, ésaé ja wulu mvo’é, jame baa, wo yañele môt a volô nye na a bo te ko mimbe’e woñ. (És. 41:10) Jé éfe Yéhôva a ne beta ye’ele bemvendé a minlô ya menda me bôt?

⁷ Bible a liti bia na Yéhôva a vô’ôlô ôsimesane beéngele. (1 Bb. 22:19-22) A bebiaé, aval avé mi ne vu Yéhôva? Éyoñ nalé a yian, mi ne sili bone benan ôsimesane wop a lat a aval ésaé éziñ ja yiane boban. Nge ôsimesane wop ô ne mvo’é, tôñané wô.

8. Aval avé Yéhôva a nga liti Abraham ba Sara fulu ôjibi?

⁸ Bia yene fe na Yéhôva a ne éjote nyul amu a yeme jibi bôt. Yéhôva a liti fulu ôjibi to’o éyoñ mbo ésaé wé a sôane ntyi’ane wé. Éyoñ Abraham a nga kate nye na ntyi’ane Wé ya tyame Sodome a Gomorrhe ô nji bo zôsôô, Yéhôva a nga nyoñ éyoñe ya vô’ôlô nye. (Met. 18:22-33) Yéhôva a nga liti fe Sara, minga Abraham, fulu ôjibi. Môs éziñ, Sara a nga bôé vioé amu a nga kate wô’ô aval avé Yéhôva a ne jô na nnôme minga ane nye ô ne beta biaé mon. (Met. 18:10-14) Yéhôva a nji wô’ô nye ôlun, ve a nga kobô nye a ésemé ése.

9. Jé éve’ela Yéhôva é ne ye’ele bebiaé a bemvendé?

⁹ A bebiaé a bemvendé, jé éve’ela Yéhôva é ne ye’ele mia? Ô wô’ô bo aya éyoñ môt a ne éjôé jôé si a nji bo tyiñe jia a wo? Ye ô wô’ô kômbô taté kat a nye? Ye ô wô’ô jeñe na ô wô’ô ôsimesane wé? Mekônda a menda me bôt ma bu’uban éyoñ bemvendé a bebiaé ba vu Yéhôva. Bi maneya yene mam bi ne yé’é a lat a fulu éjote nyule Yéhôva. Bi nto ve yen éyoñ ji aval avé bive’ela ya Kalate Zambe bia liti bia mfi ya bo éjote nyul.

10. Aval avé Yéhôva a belane bive’ela ya Bible asu na a ye’ele bia?

¹⁰ Yéhôva, Beta ñye’ele wongan, a nga futi mbamba bive’ela Kalate wé été mfa’a ya ye’ele bia. (És. 30:20, 21) Minkañete mi ne Bible été mia liti bia aval avé bebo bisaé be Yéhôva béziñ be nga liti mbamba mefulu, ane fulu éjote nyul. Bia bi fe beta besikôlô éyoñ bia yene minju’u mi nga kui ba be nji ba’ale mbamba mefulu mete.​—Bs. 37:37; 1 Bec. 10:11.

11. Jé éve’ela Saül ja ye’ele bia?

¹¹ Tame yene jam e nga kui Njôô bôte Saül. Atata’a, a mbe éjote nyule mone ndôman. A mbe a yeme’e minné mié, a ko fe woñe ya be’e beta mimbe’e. (1 Sa. 9:21; 10:20-22) Ve éyoñ a nga bo njôô bôt, mebun ve bete nye nlô, a taté na a bo bisaé njôô bôt a nji be a yiane bo. Môs éziñ, mbôl a nga jaé yange nkulu mejô Samuel, émien a  nga jibi ve mveane ba di’i nduan, a li’i tabe ndi na Yéhôva a ye volô bôte bé. Ane a nga jañele éto njôô jé a mbamba élat a mbe a bili a Yéhôva. (1 Sa. 13:8-14) Môt a ne fek a yiane kôme bindi nkañete ôte, a jeñe na a sa’ale fulu ya bo jame Yéhôva a nji ve nye ngule ya bo.

12. Aval avé Daniel a nga liti fulu éjote nyul?

¹² Tame yen aval avé nkulu mejô Daniel a selan a Saül. Daniel a nga bo Yéhôva ésaé ényiñe jé ése, a too éjote nyul, a sili’i fe nye melep kom ése. Éve’an é ne na, éyoñ Yéhôva a nga belane nye na a timine biyeyeme bi Nebucadnetsar, Daniel a nji tametane na a nga bo de a fe’e jé émien. A nga meme na Yéhôva nnye a nga ve nye fe’e ya timine biyeyeme bite. (Dn. 2:26-28) Jé éve’ela jé ja ye’ele bia? Nge bi ne atyeñ mfa’a ya bo minkañete nge ke na ésaé nkañete jangan ja wum mbamba bibuma, bi nji yiane vuane na Yéhôva nnye a yiane duma ése. Bia yiane meme na bi se ngule ya bo ésaé éziñ nge Yéhôva a volô ki bia. (Beph. 4:13) Éyoñ bia bo nalé, bia liti na bia vu mbamba éve’ela Yésus. Amu jé bia jô nalé?

13. Bela’ane mejô me Yésus bia koone me Jean 5:19, 20 na ô kat aval avé a nga liti fulu éjote nyul.

¹³ Akusa bo a mbe teke ayeñ, Yésus a mbe a sili’i Ésaa wé melep kom ése. (Lañe’e Jean 5:19, 30.) Teke môs éziñ a nga jeñe na a wôs éjôé Jé. Bephilipien 2:6 a jô na Yésus a nji ve’ele jeñ a zen éziñ na a bo nkôñe wua a Zambe. Yésus a mbe a yeme’e minné mié, a semé’é fe éjôé Ésaa wé.

14. Yésus a nga bo aya éyoñ be nga sili nye na a bo jam e nji be nkôñe wé?

¹⁴ Tame yen avale Yésus a nga bo éyoñe Jacques ba Jean a nyia wop be nga zu nye sili jam e nji be nkôñe wé. Yésus a nga yalane be été été na Ésaa wé étam nnye a ne ngule ya tyi’i za a ye nye tabe mbo nnôm nge mbo ngal Éjôé ya yôp. (Mt. 20:20-23) A zen éte, Yésus a nga liti na a yem minné mié. A mbe éjote nyul. Teke môs éziñ a nga bo jame  Yéhôva a nji ve nye ngule ya bo. (Jean 12:49) Aval avé bi ne vu Yésus?

15-16. Aval avé bi ne tôñe melep bia koone me 1 Becorinthien 4:6?

¹⁵ Bia vu Yésus éyoñ bia tôñe melebe bia koone me kalate 1 Becorinthien 4:6. Éfus éte ja jô na: “Mi bo te dañe nné ya mam me ne ntilan.” Ajô te éyoñ môt a sili bia melep, bi nji yiane kate nye mam ma so bia nlô. Ve bia yiane liti nye jam Bible nge ke bekalate bangan ba jô. Mboan ôte wo liti na bia yem minné miangan. Fulu éjote nyul ja volô bia na bi kañese na Yéhôva a ne fek adañe bia.​—Nli. 15:3, 4.

¹⁶ Ane ô vaa na fulu éjote nyul ja lu’u Yéhôva, bia yiane fe bo éjote nyul amu fulu éte ja soo bia meva’a ényiñ, ja volô fe na bi bi mbamba bilat a bôte bevok. Bi tame zu la’ase jam ete éyoñe ji.

17. Amu jé bi ne jô na bôt be ne éjote nyul ba bu’ubane mevak?

¹⁷ Môt a ne éjote nyul a bu’ubane meva’ ényiñ. Amu jé bia jô nalé? Amu éyoñ môt a yem minné mié, a yemelane mone mvaé ase môte mfe a ne bo nye, a nleme wo tindi nye na a ve akiba. Ye ô ngenan ô simesa’an nkañete minzezam awôm Yésus a nga saé? Wua wua étam ñwô ô nga bulan a zu ve nye akiba, amu valé ô ju’uya, teke ngule ya saéban. Môt ate a mbe éjote nyul, jôm ete nje a nga yeme yene mvaé Yésus a nga bo nye, a ve Zambe duma.​—Luc 17:11-19.

18. Aval avé fulu éjote nyul ja volô bia na bi nyiñe mvo’é a bôte bevok? (Beromain 12:10)

¹⁸ Bôt be ne éjote nyul ba yeme nyiñ a bôte bevok, a e ne be tyi’ibi na be  bi mbamba bemvôé. Amu jé bia jô nalé? Ba yeme yene mbamba mefulu me bôte bevok a be ne ntindane ya tabe be ndi. Ba wô’ô mvaé ya yen ane môt a bo mbamba ésaé, be ne fe avôle ya se’e nye a wumulu nye.​—Lañe’e Beromain 12:10.

19. Amu jé bia yiane sa’ale mebun?

¹⁹ Bôte ke be ne mebun ba yen ayaé ya se’e bôt bevok, ba yi ve na mbe étam be bi mese’esa. Ba nye’e fe mesengan angôndô! Ba vini be yañele’ bôte bevok a ve be mimbe’e. Ba simesane na nge ésaé éziñ é nji boban avale ba yi, wônaa ndoñ éziñ ja ye ke kui été. Môt a ne mebun a suñ minkôñ, a too fe éviele. (Beg. 5:26) Avale bôt ete da yeme ki ba’ale bemvôé. Nge wo kôme fase womien, éyoñ éte wo yene na fulu mebun é nga nyiine wo nlem, ji’a ye’elane Yéhôva na a volô wo na ô wosane je.​—Bero. 12:2.

20. Amu jé e ne mfi na bi bo éjote nyul?

²⁰ Bia ve Yéhôva akéva amu a liti bia mbamba éve’ela mfa’a ya bo éjote nyul! Éyoñ bia yen aval a belane bebo bisaé bé, nalé a tindi bia na bi vu nye. Bia jeñe fe na bi vu bebo bisaé bé ya melu mvus be nga liti fulu éjote nyul. Ngo’o nge bia bese bia nyoñe ntyi’ane ya ve Yéhôva duma da yiane nye melu mese ya ényiñe jangan. (Nli. 4:11) Nge bi bo nalé, wônaa bia fe bia ye bi ma’a ya wulu a Ésaa wongane ya yôp, amu a nye’e bôt be ne éjote nyul.