1. Ka lariñagubei Dawidi luagu lǘnabugun Heowá?

LE SAN lúgubu ǘnabugu lan Heowá? Anha, lugundun ariñagati Dawidi: “Bóunigirubadina lun nasalbarun, ani adügati bǘnabugun lun wéirigu nan” (2 Sam. 22:36, TNM; Sal. 18:35). Lau labürühani Dawidi dimurei le, háfuga lasaminaruña lan meha luagu weyu le ídanbei lidin profeta Samueli lúbiñe Hesé lun lanúadiruni Dawidi lurúeiteme Ísüraeli. Lau sun Dawidi lan meha agumuhóunibei hádangiñe widü lisaanigu Hesé, anúadira lumuti Heowá urúeime leweñegua Saulu (1 Sam. 16:1, 10-13).

2. Kaba uagu wakutiha lidan arütíkulu le?

² Chóuruti úaragua lan Dawidi luma le lariñagubei aban abürühati sálumu, le ariñagubei: “Lemuti lun larihini sielu luma múa. Iñuragua lumutiña Aburemei gudemetiña múarugugiñe, [...]; lun lañuuragüdüniña hadan gürigia wéirigutiña” (Sal. 113:6-8). Lidan arütíkulu le, wakutihaba saragu katei le ídanbei larufuda Heowá ǘnabuguni ani warihibei ka lan katei súdiniti gayaraabei wafurendeiruni lídangiñe. Lárigiñe, wakutihabei ka lan gayaraabei wafurendeirun luagu ǘnabuguni lúmagiñe urúei Saulu, profeta Danieli luma Hesusu.

3. Ida liña lóuseruniwa Heowá ani ka larufudubei katei le?

³ Aba katei le arufudubei ǘnabugu lan Heowá, ligaburi lóuseruniña lubúeingu ha charatiña. Mámarügü ánharügüti lun wáhuduragun lun, ariha lumutiwa giñe keisi lumadagu (Sal. 25:14). Gayara lubéi gamadagua wamá luma seremei lanúadirun furumiñe líchuguni Liráü kei adagaragüdüni luagu wafigoun. Ma lueirin lugudemehabu!

4. Ka burí katei ru laalibei Heowá woun ani ka uagu?

 ⁴ Ariha wamá ábaya igaburi le ídanbei larufuda Heowá ǘnabuguni. Mama meha mosu ladügüniwa lau iyarani lun wanúadirun kaba lan wadüga lau wabagari. Íbini ítara, adüga lumuti. Adüga lumutiwa lenege guánarügü ani lau iyarani lun wanúadirun kaba lan wadüga. Íbini ni kata lan wagía lóubawagu, busenti lun weseriwidun lun ladüga línsiñe woun luma ladüga subudi lan woun barǘ lan gaganbadi wamá lun buiti woun (2 Lur. 10:12; Isa. 48:17, 18). Wéiriti eteingiruni le wasandirubei luagu ǘnabugu lan Heowá.

5. Ida liña larufudahan Heowá woun lun ǘnabugu wamá? (Ariha huméi dibuhu le luágubei tidáü garüdia).

⁵ Arufudahati Heowá woun lun ǘnabugu wamá lau ligaburi lóuseruniwa. Lau sun ligía lan chútimabei au ligibuagu sun ubóu, ruti arigei lun le hariñagubei amu. Kei hénpulu, ígirati lun líderaguni Liráü lidan ladügǘniwa sun katei (Ari. 8:27-30; Kol. 1:15, 16). Ani lau sun Heowá lan Súntibeigabafu, ígirati lun híderaguni amu. Kei hénpulu, írida laali Heowá, Hesusu lun ligía lan Urúei lidan Larúeiha, ani líchuguba ubafu houn 144,000 ha lúnbaña harúeiha luma Hesusu (Luk. 12:32). Chóuruti, aranse lani Heowá Hesusu lun aban lan Urúei luma lun Fádiri lan le Íñutimati (Ebü. 5:8, 9). Arufudahati giñe houn ha lúnbaña harúeihan úara luma Lisaani, gama lumoun, lárigiñeme líchuguni dasi le houn merederunbei hárigi hárigi arihei anhein hadügüñein lubéi hadasin buidu. Lubaragiñe lira, afiñeti hadügübei lan lugundan (Aruf. 5:10).

6, 7. Ida luba háyeihani ha gabafubaña hawagu amu Wáguchi le siélubei?

⁶ Anhein ígira lubéi Wáguchi le siélubei lun híderaguni amu íbini memegeirun lan lun híderaguni, gébunatimati giñe lun wígirun lun híderaguniwa amu. Kei hénpulu, ida luba  háyeihani hachügüdina iduheñu hama wéiyaaña lidan afiñeni Heowá? Lau hígirun lun híderaguniña amu luma lau merederun hamá hárigi hárigi arihei anhein hadügüñein lubéi hadasin buidu. Lau igaburi le, mama ibiharügübaña lun ladügǘn wadagimanu, harufudahaba giñe houn amu ani híderagubaña lun chóurutima lan hasandiragun houngua (Isa. 41:10). Ka amu katei gayaraabei hafurendeirun lúmagiñe Heowá ha gabafubaña hawagu amu?

⁷ Arufudatu Bíbülia berese lan Heowá lau le hariñagubei ánheligu (1 Uru. 22:19-22). Ida luba háyeihani agübürigu Heowá? Lau hálügüdüniña hasaanigu ida luba lan ladügǘniwa ítaga dasi. Ani anhein gayara, gayaraati hánharun lun le hariñagunbei hasaanigu.

8. Ida liña larufudun Heowá gaguraasuni lun Abüraámü tuma Sara?

⁸ Arufuda lumuti giñe Heowá ǘnabugu lan lau gaguraasun lan. Kei hénpulu, gaguraasunti habá lubúeingu dan le hálügüdaguni luagu le lanúadirubei ladügün. Haritagua waméi aganba lumuti lan Heowá Abüraámü dan le lariñagunbalin Abüraámü lidiheri luagu lagünrinchawagun Sodoma luma Gomora (Agu. 18:22-33). Ani mabulieida waméi ida liña lan lóunabun Heowá dan le téherehanbei Sara, to lani Abüraámü weiriou, dan le taganbunbei tagaraüdüba lan lau sun wéiyaaru lan. Lubaragiñe lasafaragun o lagañidun Heowá, óusera lumutu lau inebesei (Agu. 18:10-14).

9. Ka gayaraabei hafurendeirun agübürigu hama wéiyaaña lidan afiñeni lúmagiñe Heowá?

⁹ Anhein agübürigu hubéi o wéiyaali lan lidan afiñeni huguya, ka gayaraabei hafurendeirun lúmagiñe Heowá? Samina humá ida liña lan hóunabun dan le lasigeneruni aban gürigia le lábugiñebei hubafu le lunbei hadügüni. Ererehatün san lun lau lóufudagun? O áfaaguatün lun hasubudiruni le lasaminarunbei? Chóuruti buídubei lan lidin houn iduheñu luma lun damuriguaü dan le háyeihani ha gabafubaña hawagu amu ligaburi Bungiu. Ayanuhaadiwa luagu le larufudahabei Heowá woun luagu ǘnabuguni. Guentó, akutiha wamá hawagu saragu gürigia ha uágubaña tabahüdagua Bíbülia ani ariha waméi le gayaraabei wafurendeirun luagu ǘnabuguni.

10. Ida liña ligaburi larufudahan Heowá woun?

¹⁰ Kei Heowá lan ‘Wamaisturunbei’, bürügüdaali tidan Lererun sügǘ le ídangiñebei gayara lan wafurendeirun (Isa. 30:20, 21). Gayaraati wasaminarun hawagu gürigia ha uágubaña tabahüdaha Bíbülia, ha arufudubalin igaburi le aubei lagundaara Bungiu, kei burí ǘnabuguni luma luagu le asuseredubei houn ha marufudubalin igaburi le (Sal. 37:37; 1 Ko. 10:11).

11. Ka wafurendeirubei lídangiñe luriban ligaburi Saulu?

¹¹ Samina wamá luagu le asuseredubei lun urúei Saulu. Dan meha le nibureingili ǘnabuguti meha ani sandiguati lungua ni kata lan darí lun hénrengu lan lun lánharun lun aban dasi wéiriti (1 Sam. 9:21; 10:20-22). Gama lumoun, murusun dan lárigiñe liridún kei urúei aba lanaagun lungua aba ladügün aban katei le moun lumuti yebe ladügüni. Luagu aban dan, aba leferidiruni luguraasun dan aniha lan agurabahei profeta Samueli. Lubaragiñe hamuga ǘnabugu lan luma lun lafiñerun luagu líderagubaña lan Heowá lumutuniña, ábarüga ladügüni adagaragüdüni gudawarügüti íbini ua lan yebe yu lan lun lun ladügüni. Adügati lira lun leferidiruni lufuleseihabu Heowá, ani dan lárigiñe aba lagidarún arúeihani luéi (1 Sam. 13:8-14). Buiti wadüga lau wafurendeirun lídangiñe sügǘ le luma lun madügün wamá aban katei le úati yu lan woun lun wadügüni.

12. Ida liña larufudun profeta Danieli ǘnabuguni?

 ¹² Mítaranti meha ligaburi profeta Danieli kei Saulu, ruti meha profeta Danieli aban lubuidun igaburi lun wáyeihani. Lidan sun libagari, ǘnabuguti meha súnwandan ani áluaha lumuti ladundehan Heowá. Kéiburi, dan layusurunbalin Bungiu lun lariñaguni lun Nabukodonosoru le mini lubéi luénedü urúei le, manügün lumuti uéiriguni lungua, ǘnabuguti, aba líchuguni uéiriguni lun Heowá (Dan. 2:26-28). Furendeitiwa lídangiñe le, ánhawa lan íchiga yanu le hínsiñebei houn íbirigu o anhein buidu lubéi lidin woun lidan wapurichihan, mosu wíchuguni uéiriguni lun Heowá. Ǘnabugu wamá ani subudi waméi siñabei lan hamuga wadügün ni kata sin lídehan Heowá (Fili. 4:13). Ítara liña giñe wáyeihani lubuidun ligaburi Hesusu. Ariha wamá ka lan uagu wariñaga ítara.

13. Ka larufudahabei Huan 5:19, 30 luagu ǘnabugu lan Hesusu?

¹³ Lau sun Liráü lan Bungiu Hesusu, ani mafigounti, súnwandan láluahani lídehan Heowá (aliiha huméi Huan 5:19, 30). Málugunti lun lagidaruni lubara Lúguchi le siélubei. Ariñawagúati lidan Filipuna 2:6, TNM, masaminarunti meha Hesusu “lagidaruni lubara Bungiu luéi, lun ítara lan kei ligía”. Gunfuranda lumuti halía lan lébeha ubafu le ichugúbei lun, ani inebeti lubafu Lúguchi lun ani gaganbaditi giñe lun.

14. Ida liña lóunabun Hesusu dan le lamuriahóunbei luma lun ladügün aban katei le úabei yu lan lun lun ladügün?

¹⁴ Samina wamá luagu ida liña lan lóunabun Hesusu dan le tamuriahanbei lúguchu Santiagu lau Huan lun hañuurun bián tisaanigu luéigiñe lóunwenren luma luéigiñe lubaünan Hesusu lidan Larúeihan. Lau lóufudagun, aba lariñagun Hesusu tun Lúguchirügüñein lan garicha lun líchuguni lubuidun ubaraü le houn tirahüñü (Mat. 20:20-23). Ítara liña larufuduni gébeha lan ubafu le ichugúbei lun. Ǘnabuguti meha ani mídinti meha yagürounméme luéi ubafu le líchugubei Heowá lun (Huan 12:49). Ida luba wáyeihani lubuidun ligaburi Hesusu?

15, 16. Ida luba wafalaruni adundehani le lídanbei 1 Korintuna 4:6?

¹⁵ Áyeiha wamuti ǘnabugu lan Hesusu dan le gaganbadi wamá lun gumadi le lídanbei 1 Korintuna 4:6: “Midin humá yagürounméme luéi le bürüwañubei”. Ligíati, dan le lamuriahan  aban gürigia adundehani wama, maweiyasun wama ariñagei le wasaminarubei lun ni lun wariñagun furumiñeguarügü dimurei le ñǘbuinbei lidoun wachügü masaminarunga. Le lunbei wadügüni, warufuduni adundehani le tídanbei Bíbülia luma le tídanbei agumeiraguagüdüni lun. Ítara luba warufuduni ǘnabugu wamá, ladüga subuditi woun gébeha lan le gayara wabéi adüga ani warufudubei giñe buídutimati lan ladundehan Heowá súnwandan sügǘ luéi furumiñeguarügü adundehani le gayara wabéi íchiga (Aruf. 15:3, 4).

¹⁶ Kei warihini, rútiwa uéiriguni lun Heowá dan le ǘnabugu wamá. Guentó, warihaali gayara lan líderaguniwa igaburi le lun gunda wamá luma lun wanügagun woungua buidu hama amu.

17. Ka uagu gunda habéi gürigia ǘnabugutiña?

¹⁷ Ánhawa ǘnabugu, chóurubei gúndaatima baadiwa lan. Ka uagu? Ladüga lau wasubudiruni gébeha lan le wayaraabei adüga, weteingirubaña amu lau sun wagundan lau híderaguniwa. Samina wamá hawagu diisi gawagutiña lépüra ha lareidaguagüdübaña Hesusu. Ábanrügüñein agiribuda lun leteingiruni Hesusu luagu lareidaguagüdüni lídangiñe lanarime sandi le luágubei. Subudi lumuti meha wügüri ǘnabuguti le siñabei lan lareidagun lungua, ligía lasandiragunbei lungua lunti lan líchugun seremei lun Bungiu ani ru ligía uéiriguni lun (Luk. 17:11-19).

18. Ida liña líderaguniwa ǘnabuguni lun buidu lan wanügagun woungua hama amu? (Rómana 12:10).

¹⁸ Liibe-agei dan, buiti hanügagun ha ǘnabugubaña houngua hama amu ani buítimati hamadagu hama amu. Ka uagu? Ladüga ménrenguti houn lun hánharun lun lubuidun hagaburi amu ani afiñetiña giñe hawagu. Lanwoun lira, gúndaatiña dan le buidu lan lidin houn amu lidan heseriwidun lun Heowá ani  ménrengunti houn hariñagun houn amu buidu lan hadügün (aliiha huméi Rómana 12:10).

19. Ka uagu moun lumuti lubéi barügua wamá woungua?

¹⁹ Ánhañati ha barüguabaña houngua hénrenguti houn hariñagun houn amu buidu lan hadüga, busenrügütiña lun hóunrügü lan lariñawagúa ítara. Áfaaguatiña lun buidu lan harihín hawéi amu. Lubaragiñe harufudahan houn amu luma hígirun lun híderaguniña, adüga hamuti sun katei houngua ladüga saminatiña hagíarügüñanu lan gayara hadügüni katei buidu kei le aubei hagundaara. Lanwoun lira, ígiraguagüdatiña houngua lun luéinamun agu luma lun gimugaü (Gal. 5:26). Anihein dan, málüti hamadagua hamá amu. Ligíati, ánhawa ariha barügua wamá woungua, ayumuragua wamá lun Heowá lun líderaguniwa asansirei ligaburi wasaminan lun mahüchün lan igaburi le tidan wanigi (Rom. 12:2).

20. Ka uagu lunti lubéi ǘnabugu wamá?

²⁰ Ma lueirin weteingiruni Heowá luagu ǘnabugu lan. Gayaraati warihini igaburi le lidan ligaburi lóuseruniña lubúeingu ani busentiwa lun wáyeihani. Ani busentiwa giñe lun wáyeihani ǘnabuguni le harufudunbei gürigia ha awinwandubaña lidan tidaani Bíbülia ha meha éibugubaña luma Bungiu. Maweiyasun wamá ígira wíchuguni uéiriguni le yuubei lun Heowá (Aruf. 4:11). Ítarati, gayaraabei wéibugun luma Wáguchi le siélubei, le hínsiñehabubei houn ha ǘnabugubaña.