1. Hi ti zivisa kutxani ti to Jehovha wa ti veka hahatshi?

INA ngu ditshuri Jehovha wa tiveka hahatshi? Ina! Wona ti Dhavhidha a nga womba mayelano ni Jehovha: “MKOMA, awe wa ni ninga txitxhavangu txako txa ku ni vhikela . . . ni wunene [kutiveka hahatshi, NM] wako wu ni ningile kuzumbiseka.” (2 Sam. 22:36; Mas. 18:35) Mbimo yi Dhavhidha a nga womba mapswi yawa ti nga maha a txi khumbula mbimo yi mprofeti Samuwele a nga tsula mtini kwakwe ti to e ya mu tota ku e va mkoma wa Israyeli. Ka 8 wa vanana va Jese ene i ti wo gwita, hambiketo Jehovha a mu sawute ku e va mkoma kuvhaleta Sawule.—1 Sam. 16:1, 10-13.

2. Hi na gonda txani ka msungo wuwa?

² Ngu ditshuri Dhavhidha a ti ni mawonelo a mamwewo ni ya a m’bhali wa Masalmo awu a nga womba tiya ngu Jehovha: “Txi di kona txitimwiyo txona txa nama kasi kuwona si si ku nzumani ni si ku hahatshi ha mafuni. MKOMA wa wusa sisiwana si huma ha lithuluni e thavisa sikulungu ha ditalani, kasiku e si khalahatshisa hagari ka tinganakana.” (Mas. 113:6-8) Ka gondo yiya hi na wona siemo simwani asi Jehovha a nga tiveka hahatshi ni ku hi na gonda txani ka txikombiso txonetxo. Hi na tshumela hi gonda ka txikombiso txo dinganisela txa Mkoma Sawule, mprofeti Dhaniyeli ni Jesu.

3. Jehovha a ti kombisa kutxani ti to wa tiveka hahatshi?

³ Hi nga gonda to tala ka Jehovha ngako hi txi wona nzila yi a nga ñola ngu yona malanda akwe. Jehovha kha hi woni kota vakhozeli vakwe dwe, kambe kota vangana vakwe. (Mas. 25:14) Jehovha a humisile digandelo ngu mwanana wakwe ti to  hi va vangana vakwe. Hi nga wona wuxinji awu Jehovha a nga wukombisa! Totshe tiya ti kombisa ti to Jehovha wa tiveka hahatshi.

4. Nji txani txi Jehovha a nga hi ninga? Ngu kutxani?

⁴ Wona txikombiso tximwani txa Jehovha txo tiveka hahatshi. Aku i ku ene Mvangi ene a ndi na va ni fanelo yo womba a ti mmwani ni mmwani a fanelako kuhanyisa tona. Kambe ene kha mahi toneto. Jehovha a hi ningile mkhululeko wo maha ati hi ti lavako. Jehovha kha hi sinzisi ku hi mu thumela, kambe ene a lava ti to hi mu thumela ngu ku hi mu randako ni ngu kutitsakela. (Dhewut. 10:12; Isaya 48:17, 18) Ngu ditshuri ta tsakisa kuthumela Txizimu txo tiveka hahatshi.

5. Jehobvha a maha txani a ti ti hi gondisako kutiveka hahatshi? (Wona mfota wa kapa.)

⁵ Nzila yi Jehovha a hi ñolako ngu yona yi hi gondisa ku hi va vo tiveka hahatshi. Kha nga ho wo ziva kupala Jehovha ha mafuni ni nzumani. Hambiketo, ene wa tiveka hahatshi e tumela mawonelo a vamwani. Ngu txikombiso, mbimo yi a nga vanga silo ene kha thuma ekha kambe a thumile ni Mwanana wakwe. (Mav. 8: 27-30; Vakl. 1: 15, 16) Hambiku i ku Nyamitamo ene wa ningela mithumo ka vamwani. Ngu txikombiso ene a sawute Jesu ti to e va Mkoma wa Mfumo wakwe, e tshumela e sawula 144.000 wa vathu ti to ve ta fuma ni Jesu. (Luka 12:32) Phela Jehovha a to gondisa Jesu ti to e va Mkoma ni Mphaxeli. (Vaheb. 5:8, 9) Hambi vale va 144.000 o va gondisa kuva vakoma, kambe ene kha va phoyiseli ka mthumo wawe. Ene wa themba ti to va na mahisa ti a ti lavisako tona.—Mtu. 5:10.

6-7. Madhota ni misungo ya timwaya yi nga gonda txani ka txikombiso txa Jehovha txo ninga mithumo vamwani?

⁶ Hi na ni sivangelo so pfala so ningela mithumo ka vamwani nguko hambi Jehovha i ku  nyamitamo wa ningela mithumo. Ina awe u msungo wa mwaya mwendo u thuma kota didhota dibanzani? Se etetela Jehovha, ningela mithumo ka vamwani u nga londiseli ngu msana u va phoyisela. U txi etetela Jehovha hi nga ti to u no tsaka ngu kuwona mthumo wu txi mahwa dwe kambe u na tsaka ngu ku va u di vhuni vamwani ti to ve thuma va si thavi. (Isaya 41:10) Ngu tihi timwani a ti misungo ya timwaya ni madhota ma nga ti gondako ka Jehovha?

⁷ Bhiblia ya womba ti to makhambi mamwani Jehovha a tumete mawonelo a tingelozi. (1 Vafu. 22:19-22) Anu vaveleki mi nga txi etetelisa kutxani txikombiso txa Jehovha? Mi txi lava kumaha to kari mi nga wotisa mawonelo a vanana vanu ngako ti txi fanela. Ngako va txi humisa mawonelo a manene, ma thumiseni.

8. Jehovha a ti kombisile kutxani ti to wa timisela ka mhaka ya Abrahanu ni Sara?

⁸ Jehovha wa timisela. Etxo njikombiso tximwani txa kutiveka hahatshi. Ngu txikombiso, Jehovha wa pfisisa malanda akwe mbimo yi ngu nzila ya txithavo ma lavako kupfisisa to kari ka sisungo sakwe. Mbimo yi Jehovha a nga ti lava kulovisa Sodhoma ni Gomora, Abrahamu a kombisile kukarateka kwakwe ka Jehovha ngu ku mu mahela siwotiso se Jehovha a mu engisete. (Gen. 18:22-33) Sara a sekile mbimo yi Jehovha a nga thembisa ti to a ndi na va ni txirumo hambiku a nga ti kumbile, kambe Jehovha kha mu henyela. (Gen. 18:10-14) Hahanze keto ene a ñote Sara ngu nzila ya yinene.

9. Madhota ni vatate va nga maha txani kukombisa ti to va tiveka hahatshi kufana ni Jehovha?

⁹ Vatate mwendo madhota ma nga txi etetelisa kutxani txikombiso txa Jehovha? Ngako vanathu dibanzani mwendo vanana vako va txi lava kupfisisa to kari mayelano ni txisungo txi u nga maha, u nga va henyeli! Hahanze keto zama kupfisisa mawonelo awe. Dibanza da wuyelwa ngako madhota ma txi ti veka hahatshi, timwaya ni tona ta wuyelwa ngako vatate va txi ti veka hahatshi. Kala konkuwa hi gondile ti to hi nga txi etetelisa kutxani txikombiso txa Jehovha txo tiveka hahatshi. Ka Bhiblia ku ni vathu ava va nga kombisa kudinganisela, he wone to hi nga gonda txani?

10. Jehovha a hi gondisa ngu kuthumisa txani?

¹⁰ Jehovha ‘mgondisi’ wathu a vekile sikombiso a mu ka Bhiblia a si si hi gondisako. (Isaya 30:20, 21) Mbimo yi hi gondako Bhiblia ni kualakanyisisa hi mana sikombiso sa vathu va nga kombisa tifanelo ati Jehovha a ti tsakelako to fana ni kudinganisela. Ka yona hi tshumela hi mana sikombiso sa vathu va va nga mbi kombisa tifanelo toneto ni wuyelo ya kona.—Mas. 37:37; 1 Vak. 10:11.

11. Hi gona txani ka txikombiso txo biha txa Sawule?

¹¹ Alakanya ngu ti ti nga humelela Mkoma Sawule. I di nga di mphya ene a txi dinganisela. Ene a txi ti pfisisa ti to hi nga totshe a nga txi ti kota kumaha se a thavile kumaha mkoma. (1 Sam. 9: 21; 10:20-22) Kambe ngu kutshimbila ka mbimo a vile m’thu wo ti guleta. Neti a nga va mkoma a to khata kuhuma sikoño. Ditshiku dimwani a tandekile kuemela mprofeti Samuwele. Hahanze ko va wo dinganisela e emela Jehovha ku e mu vhuna, Sawule a mahile ti a nga sa fanela ku e ti maha i ku kuhisa dingandelo. Ku gwitile kumaheka txani? A tsukutwe ngu Jehovha e tshumela e mu tekela wukoma. (1 Sam. 13:8-14) Eto ti hi gondisa ti to kha ha fanela kuva vo tiguleta kufana ni Sawule.

12. Dhaniyeli a ti kombisile kutxani ti to a txi dinganisela?

 ¹² Kuhambana ni txikombiso txo biha txa Sawule, wona txikombiso txa txinene txa mprofeti Dhaniyeli. Ene i ti m’thu wo tiveka hahatshi wutomi wakwe wotshe, mbimo yotshe a txi lava mkongomiso wa Jehovha. Mbimo yi Jehovha a nga mu vhuna kutxhamusela mloro wa Nabhukodhosori, Dhaniyeli kha lava kudhumiswa. (Dhan. 2:26-28) Hi gona txani ka mhaka yiya? Ngako u txi ndunduzelwa ngu kuveka kwati m’womba-wombo mwendo hi txi humelela ka mthumo wa thembwe u fanete kudhumisa Jehovha. Ti lava hi va ni mapimo a manene hi khumbula to hi nge mahi txilo hi sa vhunwa ngu Jehovha. (Vaf. 4:13) Ngako hi txi maha toneto hi na va hi txi etetela txikombiso txa Dhaniyeli hi tshumela hi etetela ni txa Jesu. Ngu nzila muni?

13. Mapswi ya ma ku ka Johani 5:19, 30 ma hi gondisa txani ngu kudinganisela ka Jesu?

¹³ Jesu i ti mwanana wa Txizimu, ene a ti hetisekile hambiketo ene a txi themba mtamo wa Jehovha. (Lera Johani 5:19, 30.) Ene kha duketa kuhonyola txikhalo txa Tate wakwe. Vafilipiya 2:6 yi khene: “Kha lava kuhumelelisa wuzimu wakwe” hambiku a nga ti fana ni Txizimu. Aku Jesu a nga ti ti veka hahatshi a txi ti ziva ti to hi nga totshe a nga ndi no ti kota, ni ku a txi xonipha wukoma wa Tate wakwe.

14. Jesu a mahile txani mbimo yi a nga kombelwa kumaha ati ti si mu lumbiko?

¹⁴ Ditshiku dimwani Jakobe ni Johani kumweko ni mame wawe va kombete Jesu ti to e va ninga sikhalo so guleka ka mfumo wakwe. Aku ti nga si mu lumbi wa khumbula ti a nga va xamula? Na a si kana-kani a ti vekile ha kubasani ti to ti lumba Tate wakwe kusunga to i mani a no zumba txineneni mwendo txibhabha ka Mfumo wakwe. (Mat. 20:20-23) Jesu a txi yi ziva mihingano a txi tiziva ti to timwani kha ti lumbi ene. Jesu a txi dinganisela. Ene kha ndaka mihingano yi a nga ti veketwe ngu Jehovha. (Joh. 12:49) Hi nga etetelisa kutxani txikombiso txa txinene txa Jesu?

15-16. 1 Vakorinto 4:6 yi nga hi vhunisa kutxani?

¹⁵ Hi nga etetela kudinganisela ka Jesu ngu kumaha a ti ti ku ka 1 Vakorinto 4:6, ayi yi hi khumbutisako “ku ambi ndaka muhingano wa tile ti nga bhalwa.” Ngu toneto hi txi kombelwa txivhuno kha hi na mbi womba mawonelo athu mwendo ati hi ti pimisako  koneho. Hahanze keto, hi na mu gela e ya wona ati Bhiblia mwendo mabhuku athu ma wombako tona ngu mhaka yoneyo. Hi txi maha toneto hi na kombisa ti to kha hi xamuli a ti ti si hi lumbiko. Hi txi va vo dinganisela hi na tsaniseka ti to milayo yo “lulama” ya Jehovha ngu yona hi ku ya lisima kupinda milayo yathu.—Mtu. 15:3, 4.

¹⁶ Hi txi va vo dinganisela hi na lava to kudhumiswa Jehovha. Kambe ku ni sivangelo simwani so hi kombisa fanelo yoneyo. Kutiveka hahatshi ni kudinganisela ti na hi vhuna kuva ni litsako ni kuhanyisana kwati ni vamwni, ngu nzila yihi? A hi ti woneni.

17. Ngu kutxani vathu va ku tiveka hahatshi ni kudinganisela va txi mana litsako?

¹⁷ Hi txi tiveka hahatshi ni kudinganisela ha mana litsako. Ngu kutxani? Nguko, ngako hi txi ziva to kuho amu hi tandekako kona hi na tsaka mbimo vamwani va hi ningako txivhuno. Ngu txikombiso, khumbula mbimo yi Jesu a nga hanyisa 10 wa vathu va nga ti ni tshekela. Ka 10 wa vathu ava va nga hanyiswa mmweyo dwe a nga tshumela a txi ya bonga. I si nga ku Jesu a nga mu vhuna a sa tikota kutihanyisa. Aku dihaja dile di nga txi tiveka hahatshi ni ku dinganisela di ti koti kubonga ni ku dhumisa Jehovha nguko di nga vhunwa.—Luka 17:11-19.

18. Kutiveka hahatshi ni kudinganisela ku hi vhunisa kutxani ti to hi hanyisana ni vamwani? (Varoma 12:10)

¹⁸ Awu a tivekako hahatshi ni ku dinganisela wa ti kota kuhanyisana ni vamwani ni kumana vangana. Ngu kutxani? Nguko vona va wona tifanelo ta tinene ta vamwani ni ku vava themba. I si ngeto dwe, ngako vamwani ti txi va tsimbilela kwati ka siavelo sawe va tsaka. Vona kha ti woni i di kuluza kundunduzela vamwani.—Lera Varoma 12:10.

19. Ngu kutxani hi di fanete kulwisana ni moya wo tiguleta?

 ¹⁹ Kuhambana ni vathu vo ti veka hahatshi vathu vo ti guleta kha va lavi kundunduzela vamwani, tshambi i di vona. Txawe ngu dhunda kutidinganisa ni kuphalisana ni vamwani. Hahanze ko gondisa ni kuninga mithumo vamwani, vona va tigela tiya: “U txi lava tako ti tsimbila maha upune.” Kwawe mthumo wu mahilwe kwati ngako wu di mahisilwe ti va ti lavisako tona. I si ngeto dwe, vathu vo tiguleta va na ni timbiti ni mabava. (Vag. 5:26) Va txi va ni vangana, wungana wawe kha wu vhu masani. Hi nga maha txani ngako hi txi wona ti to ha ti guletanyana? Ti lava hi maha mkombela ka Jehovha hi mu kombela ti to e hi vhuna ‘ku hi phinduka amu ka mapimo athu’ hi txi maha toneto kutiguleta ku na mbi thunga mu timbiluni kwathu.—Var. 12:2.

20. Ngu kutxani txi lava hi va vo tiveka hahatshi ni kudinganisela?

²⁰ Jehovha a hi vekete txikombiso, eto ngu ditshuri ha ti bonga. Ha ti wona to Jehovha wa tiveka hahatshi ngu nzila yi a ñolako ngu yona malanda akwe, se nanathu hi lava ku mu etetela. I si ngeto dwe hi tshumela hi lava kuetelela sikombiso sa malanda a Jehovha aya ma nga kombisa kudinganisela. Hi txi maha toneto hi na va hi txi dhumisa ni kupfalisa Jehovha nguko ta mu fanela. (Mtu. 4:11) Ni ku ti na tshumela ti hi vhuna kutsimbila ngu kutinamisa ni Txizimu txathu a txi txi randako vathu va ku ti namisa ni kudinganisela.