1. Met Tafit a erá usun án Jiowa tipetekison?

SIA tongeni wesewesen erá pwe Jiowa a tipetekison? Ewer. Tafit a erá: “Ka amanawaei o eppeti seniei feiengaw, me óm tipetekison a etekiaeitá.” (2 Sam. 22:36, NW) Atun Tafit a makkeei ena, eli a chemeni ewe atun Samuel a etto ren imwen seman we pwe epwe fili ewe emén epwe king lón Israel. Tafit i ewe kúkkúnúffóch me lein ekkewe walimén át, nge fen i ewe Jiowa a filatá an epwe siwili King Saul.​—1 Sam. 16:1, 10-13.

2. Met sipwele pwóróusfengen wóón lón ei lesen?

² Ese mwáál Tafit epwe fókkun tipeeú ngeni alon emén soumakken kélfel ei usun Jiowa: “A nennetiu won ekewe läng, pwal won fanüfan. A apwätai ekewe chon wöüngau seni lepwül o atekiatäi ekewe chon mwelele . . . a amoteer ren ekewe samol.” (Kölf. 113:6-8) Lón ei lesen, sipwe akkomw ppii ekkóch lesen mi lamot usun tipetekison ren ach pwóróusfengen wóón ifa usun Jiowa a pwári ena napanap. Mwirin, sipwe pwal káé usun ena napanap tipetekison seni pwóróusen King Saul, ewe soufós Taniel, me Jesus.

3. Ifa féfférún Jiowa ngenikich, me met a pwári?

³ Jiowa a pwári pwe a tipetekison ren féfférún ngeni aramas tipis, iir kewe mi fel ngeni. Ese chék etiwa ach fel ngeni, nge me ren, kich pwal chiechian. (Kölf. 25:14) Ren án Jiowa  epwe atufichi ach sipwe chiechi ngeni, a akkomw mwékút ren an fang Néún we pwe epwe eú asor fán iten ach kewe tipis. A ifa me watteen án Jiowa úméúméch ngenikich!

4. Met Jiowa a fen ngenikich, me pwata?

⁴ Ekieki pwal eú alen án Jiowa pwári tipetekison. Pokiten Jiowa i ewe Chón Fératá, a tongeni férikich nge esap pwal ngenikich ewe tufichin pwisin filatá met sipwe féri lón manawach. Nge ese ina usun. A fen férikichetá lón pwisin napanapan me ngenikich ewe tufichin pwisin filatá. A mochen pwe kich aramas tekison sipwe angang ngeni seni letipach pokiten sia tongei me silei feiéchún ach álleasochisi. (Tut. 10:12; Ais. 48:17, 18) A ifa me kilisouch ren tipetekisonun Jiowa!

5. Ifa usun Jiowa a áiti ngenikich ach sipwe tipetekison? (Ppii ewe sasing wóón péén.)

⁵ Jiowa a áiti ngenikich ach sipwe tipetekison ren napanapen an féffér ngenikich. Jiowa i ewe mi tipachem seni meinisin lón unuselapen láng me fénúfan. Ikaamwo ina, nge a tipemecheres le etiwa meefien ekkewe ekkóch. Áwewe chék, Jiowa a mut ngeni Néún we an epwe álisi lón fférútáán mettóch meinisin. (SalF. 8:27-30; Kol. 1:15, 16) Me inaamwo ika Jiowa ewe mi unusen manaman, nge a pwal ewisa ngeni ekkewe ekkóch, ekkóch wis. Áwewe chék, a ewisa ngeni Jesus an epwe kingen an we Mwú, me I epwe pwal ewisa ngeni ekkewe 144,000 aramas ekkóch wis, iir kewe repwe fiti Jesus le nemenem. (Luk. 12:32) Pwúngún, Jiowa a áiti ngeni Jesus an epwe King me Souasor mi Lap. (Ipru 5:8, 9) A pwal áiti ngeni chókkewe repwe eti Jesus le nemenem ifa usun repwe féri wiser, nge ese sótun nemeni napanapen ar féri wiser. A fen lúkúlúk pwe repwe apwénúetá letipan.​—Pwär. 5:10.

6-7. Met sia tongeni káé seni Semach we lón láng usun ach ewisa ngeni ekkewe ekkóch, ekkóch wis?

 ⁶ Ika Semach we lón láng, ewe ese lamot ngeni álillis, a ewisa ngeni ekkewe ekkóch, ekkewe wis, a fen ifa me lamoten ach sipwe pwal féri ena! Áwewe chék, en emén mékúren famili are mwán mi ásimaw lón ewe mwichefel? Áppirú Jiowa ren óm ewisa ngeni ekkewe ekkóch, ekkóch angang nge kosap nemeni napanapen ar féri wiser. Atun ka áppirú Jiowa, kese chék ataweei ewe angang, nge ka pwal asukula ekkewe ekkóch me álisiir le alapaaló ar lúkúlúk. (Ais. 41:10) Met ekkewe mi wor wiser ra pwal tongeni káé seni Jiowa?

⁷ Ewe Paipel a pwári pwe Jiowa a mochen silei meefien néún kewe chónláng. (1 King 22:19-22) Ámi kana sam me in, ifa usun oupwe tongeni áppirú Jiowa? Atun mi fich, eisini néúmi kewe meefier wóón ifa usun oupwe ataweei eú angang. Nge ika a múrinné meefier, iwe oupwe fiti.

8. Ifa usun Jiowa a mosonottam ngeni Apraham me Sara?

⁸ Pwal eú alen án Jiowa pwári tipetekison, ina an mosonottam. Áwewe chék, Jiowa a mosonottam atun chókkewe mi angang ngeni ra kapas eis ngeni fán súfél usun an kewe kefil. Jiowa a aúseling ngeni Apraham atun a erá pwe me ren ese pwúng an epwe ataieló Sotom me Komora. (Ken. 18:22-33) Me chemeni féfférún Jiowa ngeni Sara, pwúlúwen Apraham we. Ese song are letipengaw atun Sara a takiri an we pwon pwe epwe pwopwo lón an ierin chinnap. (Ken. 18:10-14) Nge a fen ésúfélú Sara.

9. Met ekkewe sam me in me mwán mi ásimaw ra tongeni káé seni Jiowa?

⁹ Ámi kana sam me in, me mwán mi ásimaw, met oua tongeni káé seni Jiowa? Met oupwe féri ika néúmi kewe are chón ewe mwichefel rese tipeeú ngeni ámi kewe kefil? Ka kan mwittir áwena meefier? Are ka achocho le weweiti meefier? Ekkewe famili me mwichefel repwe enletin feiéch atun chókkewe mi wor wiser ra áppirú Jiowa. Sia fen pwóróusfengen wóón met sia tongeni káé seni tipetekisonun Jiowa. Nge iei, sipwele ppii met sia tongeni káé seni án ekkewe ekkóch lón Paipel leenien áppirú usun tipetekison.

10. Ifa usun Jiowa a áeá pwóróusen ekkewe ekkóch le asukulakich?

¹⁰ Pokiten Jiowa i ach we “Soukait,” iwe a onómu lón an we Kapas pwóróusen ekkewe aramas pwe sipwe káé seniir. (Ais. 30:20, 21) Sia káé seni ewe Paipel pwóróusen chókkewe iir mi eáni ekkewe napanap mi apwapwaai Kot, kapachelong tipetekison. Sia pwal káé seni pwóróusen chókkewe rese eáni ekkena esin napanap mi múrinné.​—Kölf. 37:37; 1 Kor. 10:11.

11. Ifa ewe lesen sia tongeni káé seni án Saul leenien áppirú mi ngaw?

¹¹ Ekieki usun met a fis ngeni King Saul. Lealúwélún a mirititi aúkúkún tufichin, a pwal mwo nge pireir le etiwa ekkóch wis. (1 Sam. 9:21; 10:20-22) Nge mwirin och fansoun, a lamalamtekia me a féri minne itá esap féri. A poputá le ina usun mwirin an wiliti king. Lón eú atun ese mosonottam le witiwiti soufós Samuel. Saul ese tipetekison le lúkúlúk pwe Jiowa epwe wisen túmúnú néún kewe aramas, nge a fen eáni ewe asoren kek inaamwo ika ese wor an pwúúng le féri. Mwirilóón, Saul ese chúen kúna chen me ren Jiowa, me ló, ló, ló, ese chúen king. (1 Sam. 13:8-14) Sia mirit ika sia káé seni ena pwóróus me sisap féri ekkewe mettóch ese wor ach pwúúng le fériir.

12. Pwata pwóróusen Taniel ina eú leenien áppirú mi múrinné?

 ¹² Án Saul leenien áppirú mi ngaw a sókko seni án ewe soufós Taniel leenien áppirú mi múrinné. Lón unusen manawen Taniel, a chék tittipetekison me a kan kútta án Jiowa emmwen. Áwewe chék, atun Jiowa a néúnéú Taniel le áweweei án Nepukatnesar we ttan, ese erá pwe a áweweei ren pwisin an tufich. A fen tipetekison le elingaaló Jiowa. (Tan. 2:26-28) Ifa ewe lesen fán itach? Ika chienach kewe ra sani le aúseling ngeni ach kewe afalafal, are ika sia sópwéch lón ewe angangen afalafal, sipwe chechchemeni le elingaaló Jiowa ren. Sipwe tipetekison le mirititi pwe ika esap pwúnún án Jiowa álillis, iwe sise tongeni féri ekkena mettóch. (Fil. 4:13) Atun sia eáni ena esin ekiek, sia pwal áppirú án Jesus leenien áppirú mi fókkun múrinné. Ifa usun?

13. Met sia káé usun tipetekison seni alon Jesus ei lón Johannes 5:19, 30?

¹³ Inaamwo ika Jesus i Néún Kot we mi unuséch, nge a lúkúlúk wóón Jiowa. (Álleani Johannes 5:19, 30.) Ese fókkun sótun etiiaaló Seman we lón láng wóón an nemenem. Filipi 2:6 a erá pwe Jesus “esap ekiekin amwöchünükü an wewe ngeni Kot usun ach amwöchünükü mettochüch.” Pokiten Jesus emén Nau mi rongosich, iwe a weweiti pwe a aúkúk an nemenem me a súféliti nemenemen Seman we.

14. Met Jesus a apasa atun ekkewe ekkóch ra tingorei och mettóch ese wor an pwúúng wóón?

¹⁴ Ekieki met Jesus a apasa atun néún kewe chón káé James me Johannes fengen me iner we ra feito ren me tingorei och mettóch ese wor an pwúúng wóón le filatá. Mwittir chék Jesus a erá pwe Seman we chék lón láng a wor an pwúúng le filatá ié epwe mwoot peliefichin me pelieméngún lón ewe Mwú. (Mat. 20:20-23) Jesus a weweiti pwe a aúkúk an nemenem. A tipetekison. Ese fókkun féri och mettóch ese angei mumutáán me ren Jiowa an epwe féri. (Joh. 12:49) Ifa usun sipwe áppirú án Jesus leenien áppirú mi múrinné?

15-16. Ifa usun sipwe apwénúetá ewe kapasen emmwen lón 1 Korint 4:6?

¹⁵ Sia áppirú tipetekisonun Jesus ren ach apwénúetá án Paipel ei kapasen emmwen lón 1 Korint 4:6. A apasa: “Oupwe chök apwönüetä mine a mak.” Ina popun, atun emén a  tingorekich kapasen emmwen, sise fókkun mochen echchimwa an epwe etiwa pwisin ach ekiek me memmeef nge sise lóóm ekiekiéchú ewe mettóch. Sipwe fen álisi le kútta emmwen seni ewe Paipel me ekkewe minen álillis mi lóngólóng wóón ewe Paipel. Ach féri ena, a pwári pwe sia mirititi aúkúkún ach tufich. Fán tipetekison, sia elingaaló Ewe mi Unusen Manaman, ewe an “kewe föför mi pwüng.”​—Pwär. 15:3, 4.

¹⁶ Me lúkún ach elingaaló Jiowa, a pwal wor popun mi múrinné ach sipwe tipetekison. Sipwele ppii ifa usun tipetekison a tongeni atoto ngenikich pwapwa me álisikich le ririéch ngeni ekkewe ekkóch.

17. Pwata ra pwapwa chókkewe mi tipetekison?

¹⁷ Atun sia tipetekison, a lapóló ach pwapwa. Pwata? Pún atun sia mirititi pwe a chék aúkúk tufichich, iwe sipwe kilisou me pwapwa le etiwa ese lifilifil álillis seni ekkewe ekkóch. Áwewe chék, ekieki usun ewe atun Jesus a echikaraatá ekkewe engol mwán mi úriir rupun pwétúr. Emén chék me leir a liwinsefálito pwe epwe kilisou ngeni Jesus ren an echikara seni ewe semmwen mi annou. Ena mwán mi tipetekison a silei pwe ese tongeni pwisin echikara me lúkún án Jesus álillis, ina popun a kilisou ren ewe álillis a angei, me a elingaaló Kot ren.​—Luk. 17:11-19.

18. Ifa usun tipetekison epwe álisikich le chiechiéch ngeni ekkewe ekkóch? (Rom 12:10)

¹⁸ Ekkewe mi tipetekison ra kan chiechiéch ngeni aramas, me ese mwáál a wor chiechier ra ririéch ngeniir. Pwata? Pún ra mirititi pwe ekkewe ekkóch ra eáni ekkewe napanap mi múrinné me ra lúkúlúk wóór. Ekkewe mi tipetekison ra pwapwa atun ekkewe ekkóch ra sópwéch lón ese lifilifil met ra féri, me ra  kan mwittir apúnger me mwareitiir.​—Álleani Rom 12:10.

19. Ikkefa ekkóch popun sipwe túmúnú senikich ewe napanap lamalamtekia?

¹⁹ A weires ngeni ekkewe mi lamalamtekia ar repwe apúnga ekkewe ekkóch, pún ra fen mochen án aramas repwe mwareitiir. Ra apépééi pwisin iir ngeni ekkewe ekkóch me mochen okkuf ngeniir. Rese fen mochen ewisa ngeni ekkewe ekkóch och wis, me áiti ngeniir ifa usun repwe féri och mettóch, nge ra fen apasa, “Ika ua mochen epwe tawe och mettóch lón ewe napanap mi pwúng,” weween lón ewe napanap mi apwapwaai pwisin iir, “iwe epwe fen éch ai upwe chék pwisin féri.” Fán chómmóng, emén mi lamalamtekia a mochen tekia seni ekkewe ekkóch me a lólówó. (Kal. 5:26) Ese kan nómottam án ekkena esin aramas chiechiéch ngeni ekkewe ekkóch. Ika sia esilla pwe sia lamalamtekia, iwe sipwe tingormaú ngeni Jiowa an epwe álisikich le ‘asöföla unusen letipach’ pwe ete téé waren ena napanap mi ngaw lón kich.​—Rom 12:2.

20. Pwata a lamot ach sipwe tipetekison?

²⁰ A ifa me kilisouch ren án Jiowa leenien áppirú! Sia kúna an tipetekison ren féfférún ngeni néún kewe chón angang, me sia mochen áppirú. Pwal eú, sia mochen áppirú án néún Jiowa kewe chón angang leenien áppirú mi múrinné mi mak lón ewe Paipel iir mi angang ngeni fán tipetekison. Amwo fansoun meinisin sipwe ngeni Jiowa ewe súfél me ling mi chék fichiiti i. (Pwär. 4:11) Ika sia féri meinisin ekkena mettóch, iwe sipwe tongeni chiechi ngeni Jiowa tori feilfeiló, pún i a tongei chókkewe mi tipetekison.