1. Txini elogile David mwaha wa ovyeviha wa Yehova?

ENOFWANYELA-WENE ologa wi Yehova ddovyeviha? Ndde, enofwanyela. David wahiloga dhahi: ‘Nyuwo muddamelela, muddivuna, ovyeviha wenyu onoddunuwiha.’ (2 Sam. 22:36; Masal. 18:35) Enkala ninga David wobuwela labo nttile nadhile Samuel vatakulu va babe, bamuttikittela wi akale mwene wa Izrayel. David wali ettogoyiya ya abalaye otene, mbwenye masiki dhawenevi ohisakuliwa wi akale Mwene vamburoni va Sawul.—1 Sam. 16:1, 10-13.

2. Txini dhinasunzihu mwari mwa mutoma obu?

² David txibarene ohirumela dhologa dha munasalmo, dhawi Yehova: “Onoworamela wona elabo y’odhulu na ya vati. Nabuya onomvenyiha vambwebweni muhawi . . . wi amugilatihe vamodha na amwene, n’anddimuwa a nlogo naye.” (Masal. 113:6-8) Mwari mwa mutoma obu ninfuna voroma, noneni masunziho a ttima anloga dha ovyeviha, mwa wiyelela ologa ekalelo ena Yehova. Nigamala ninele wona ofuneya wa okala muttu wokurumuwa mwari mwa dhawira dha Mwene Sawul, namavuhulela Daniyel vamodha na Yezu

3. Yehova onneddiha dhavi, vina mweddihedho obu ononiha wi iyene oli Mulugu w’ekalelo gani?

³ Yehova onowoniha wi iyene Mulugu wovyeviha mwa orumela webedhiwa na attu ottega. Iyene kanrumela bahi webedha wehu, ononakela vina ninga amarho aye. (Masal. 25:14) Ddi iyene witile omarho obu, Yehova ohimuleva mwanaye wi  anikuttelena mukutto onttimiha dhottega dhehu. Ngani, eji kahiye supaje—na ttagaraga—yonihile Mulugu wehu?

4. Txini dhinnivaha Yehova, vina onnivahedha nni?

⁴ Karoma wona merelo mena anoniha ovyeviha wa Yehova. Kowiliwa iyene wela ofuna, kagamuttiyile muttu-muttu osakula enfuniye wira sabwani iyene ddi Mwinya wa dhotedhene. Mbwenye Mulugu kali dhawene. Iyene ohinikosa na mikalelo dhaye vina ohimvaha muttu-muttu osakula enfuniye. Mulugu onfuna wi muttu-muttu onihe omukwela ondda mmirimani, iyo vina ninowona opurelamo wa omulaba. (Olib. 10:12; Iza. 48:17, 18) Txibarene, ovyeviha oku wa Yehova onofwanyela onittukulela omutamalela venjene!

5. Yehova onnisunziha dhavi merelo ovyeviha? (Kang’ana foto ya kapa.)

⁵ Yehova onnisunziha merelo ovyeviha mwari mwa mweddihedho onneddihiyena. Iyene ddi mwinya wa dhetedhene, vina dduna owodha wa dhotedhene dha mwilaboni. Masiki dhawenevi, Mulugu onorumela dhubuwelo dha alabeli aye. Ninga motagiha, Yehova ohimuloba Mwanaye wi amukamihedhe osasanyedha dhotedhene dha mwilaboni. (Gano 8:27-30; Kol. 1:15, 16) Yehova namawodha-wodha, mbwenye iyene onowattomela attu ena mabasa. Nubuweleni wi ohimuttomela Yezu Omwene vina onela wavaha attu 144.000 mabasa a olamulela vamodha na Yezu. (Lk. 12:32) Txibarene, Yehova ohimusunziha Yezu mabasa a okala Mwene vina a Namakutta Munddimuwa. (Aheb. 5:8, 9) Ohaswagiha abale analabe na Yezu, vina ohavaha mabasa, masiki wavahilevi, iyene kangilatela wang’ana yovonya modha-modha enirani. Mulugu onokuluvela wi awene anela okosa ofuna waye.—Ovuh. 5:10.

6-7. Babi wehu wa wirimu onnisunziha nni mwaha wa wattomela attu ena mabasa?

⁶ Akala Babihu wa wirimu—ohinfuna  nikamihedho na muttu-muttuvi—onowattomela mabasa attu ena, txibarene iyo vina ninofuniwana okosa yakakene! Weyo oli mwimeleli wa murala obe oli munddimuwa wa mulogo? Tagihá merelo a Yehova a wattomela attu ena mabasa, vina ogamala wattomela kukalele wang’anavi otamelaga dhovonya dhawa. Ogamutagihaga Yehova, kunakalele wonavi wireya wa mabasa awo, onela vina okana ewodhelo ya waswagiha vina wakuluvela attu akwawo. (Iza. 41:10) Masunziho gani mena a Yehova anfwanyela otagiha abale ana onddimuwa?

⁷ Bibilia ohikana mazu anoniha wi Yehova onovuruwana dhologa dha anju aye. (1 Amwe. 22:19-22) Amambali, munawodhe dhavi otagiha merelo a Yehova? Egawodheya mwavuzege aninyu, yawonamo yawa mwaha wa mabasa-mabasavi obe elobo-elobovi enfuna okosiwa vatakulu. Akala dhologa dhawa dhinokalela, kakosani ejuwene.

8. Yehova omweddihile dhavi Abrahamu na Sara n’ekalelo y’ovilela?

⁸ Ovyeviha wa Yehova onowoneya mwari mwa ovilela waye. Ninga motagiha, akala emeleli aye anomwaddela na nriho wi yogana yaye kikale, iyene onowavilela. Mulugu afunaga omutolotxa Sodoma na Gomora, Abrahamu wahimukosa mavuzo menjene, mbwenye iyene wanvuruwana n’ovilela. (Wita 18:22-33) Wubuwele vina mweddihedho omweddihile Yehova Sara, mwadhi wa Abramu. Mulugu kasilidhiwe muteyele Sara sabwa yawiwa nipikirelo nawi agahikana yari mukalabani mwaye. (Wita 18:10-14) Iyene ohimweddiha Sara na nttittimiho.

9. Merelo a Yehova anasunziha nni amambali vamodha na anddimuwa a mmulogoni?

⁹ Nyuwo amambali na anddimuwaya a mmulogoni, yotagiha ya Yehova enusunzihani nni? Karoma wubuwela mwakulelo wawo, akala abale anaweddihiwe anowutonyihedha yovonya yawo. Voroma-vene onowubuwela wasaddeya? Obe onoroma okurumuwa, wi ononelemo enfunani ologa? Vamuralani na mmulogonimwa munokala wagalala winjene, akala emeleliya anotagiha merelo a Yehova. Nihilogani venjene mwaha wa esile dhinfwanyelihu okosa wi nitagihe ovyeviha wa Yehova. Ovano ninfuna niloge dhotagiha dha okurumuwa dhili Mmaleboni a Mulugu.

10. Yehova onnilagiha dhavi dhotagiha dha ena wi anisunzihena?

¹⁰ Yehova ohika Mmaleboni mwaye dhotagiha dha attu ena wi anisunzihena, vowi iyene ddi ‘Namasunziha wehu Munddimuwa.’ (Iza. 30:20, 21) Iyo ninosunza venjene nigatanalelaga dhotagiha dha mBibiliani dhinaloga abale eddilena merelo a wirimu antaganyiha na ovipimelela. Ninosunza vina na dhotagiha dha abale avonyile weddana yeddelo eji ya wirimu.—Masal. 37:37; 1 Kor. 10:11.

11. Yotagiha yotowa malago ya Sawul ennisunziha nni?

¹¹ Karoma wubuwela ejile ekosile Mwene Sawul. Voroma-vene, iyene woneya ninga muzombwe waweddeyana. Valiye muzombwe, wannonelamo wi wahikana dhahawodhiye okosa, iyene wahifiyedha okodda mabasa manddimuwa. (1 Sam. 9:21; 10:20-22) Mbwenye mwa ovira wa mudhidhi Sawul wahiroma ovittukulela obuwelaga wi wahikana ofuru wa okosa elobo-elobovi yafuniye. Dhotolo dhaye dhiromile muttomeliwiye omwene. Labo dhahi iyene wahifiyedha otowiwa ovilela, mudhidhi wamujedhiyi namavuhulela Samuwel. Sawul agahifwanyela okala muttu wokurumuwa, na nikuluvelo nawi Yehova agahittiddela nlogo naye; iyene wahifiyedha oddumeya mukutto  oku aziwaga wi mabasa a oddumeya mukutto kali aye. Ovuru-vuru waye ohimuttukulela oyelela wanddana waniye na Yehova, vina vasogorhova ohakiwa mpaddo waye womwene. (1 Sam. 13:8-14) Nona jofuneya iyo okala mento; nihipanelege wira mabasa ahittomeliwehu, nigakosa dhawene ninowoniha wi nili anoní vina ninorabela otolo wa Sawul.

12. Daniyel wonihile dhavi okala muttu wokurumuwa?

¹² Mottiyana na yotagiha yotowa malago ya Sawul, karoma wona yotagiha ya namavuhulela Daniyel. Daniyel mwari mwa egumi yaye yotene wanoniha okala muttu wa ovyeviha vina wali mwimeleli wamukurumuwela Mulugu, iyene wedda mpule mwamulagiha Yehova. Karoma wubuwela eji, mmalele Yehova omvaha Daniyel ewodhelo ya ofurumulelamo dhoroha dha Nabukodonosor, Daniyel konihile ekalelo ya ovigwarula sabwa ya ologa dhorohadha. Ottiya ejo, iyene omuttittimihile Yehova. (Dan. 2:26-28) Ninsunzavo nni? Akala abali anoziveliwa na diskursu dhehu obe akala ninokosa mabasa apama mmabasani a olaleya, bani enfwanyela wakela nttittimihona? Ddi Nabuya Yehova. Ninofwanyela okana ekalelo ya ovipimelela, venevo ninela owodha wubuwela wi dhotedhene dhikosilehu, kaniwodhile na guru dhehu, ddi Yehova oniwodhihile. (Fil. 4:13) Nigakosa vina dhahene ninowoniha wi ninotagiha ekalelo ya Yezu. Nintagiha dhavi?

13. Merelo a ovipimelela wa Yezu alebiwe va Joau 5:19, 30 annisunziha nni?

¹³ Masiki aziwaga wi wali Mwana Mulugu wotowa yottega, Yezu kakosa dhaye yeka, weddihiwa na Yehova. (Kengesa Joau 5:19, 30.) Iyene txipo kanattigi owanyedha onddimuwa wa Babe wa wirimu. Filipi 2:6 ononaddela wi Yezu “Walí Mulugu, kawadelé ekalelo yaye yʼomulugu.” Ninga Mwana wawiwelela, Yezu wannonelamo wi wahikana dhahawodhiye vina wanriha onddimuwa wa Babi waye.

14. Mukumbirheliwe Yezu wi akose elobo yahali ya onddimuwa waye, txini elogiliye?

¹⁴ Karoma wubuwela, siku dhahi, mayi wa Tiago na Joau ohimususela Yezu bamukumbirha ettomo yahaniye onddimuwa wa ovaha; txini ekosile Yezu? Yezu ohiloga s’ohivuba wi Babi waye wa wirimu ddunna onddimuwa wa omuttoma ole onfwanyela ogilate omononi waye woja na wemarani. (Mt. 20:20-23) Yezu ohoniha wi iyene kahiye mwinya  wa dhotedhene. Iyene wannivipimelela. Txipo kakosile dhihirumiwiye na Yehova. (Jo. 12:49) Niwodhe dhavi otagiha merelo apama a Yezu?

15-16. Ninawodhe dhavi olabihedha malago a Bibilia anfwanyeya va 1 Korinto 4:6?

¹⁵ Nigavirihamo magano a 1 Korinto 4:6 a “okodda okwaranya dhilebiwe” ninolagiha wi ninomutagiha Yezu. Ninofwanyela orumela malago, vina kaninfuna wakukusela attu orumela dhogana dhehu obe okosa dhilobodha ninga munfunelihu. Ottiya ejo iyo ninfuna wi malago anvahihu adhelege mBibiliani obe mmanivuruni a nikuru nehu. Nigakosa dhawene ninele olagiha wila kaninkuluvela eziwelo yehu bahi. Na oviyeviha ninele onvaha ‘nttittimiho’ notene Namadhulu-dhulu.—Ovuh. 15:3, 4.

¹⁶ Ottiya omuttittimiha Yehova bahi nihikana mwaha dhinjidhene dha olagiha okurumuwa. Ninoziwa wi weddana oviyeviha vina okurumuwa ononifwanyiha wagalala vina ononikamihedha okala wofiyedheya na attu ena.

17. Attu oviyeviha vina okurumuwa ankanelani wagalala?

¹⁷ Nigakala attu oviyeviha vina okurumuwa ninele owodha ofwanya wagalala. Sabwaya jani? Sabwani nigazinddiyela vangomela ewodhelo yehu, ninele okana ekalelo ya otamalela vina ohagalala na nikamihedho na attu akwihu. Ninga motagiha, karoma wubuwela mudhidhi obule wavulumutxile Yezu aliba maranya. Mvulumutxiwi mmodha bahi ddidhile omutamaalela Yezu mwaha wa omvuna mmakattamihoni mpule mwaliye—elobo yafwanyela okosiwa na otene abale avulumutxiwe. Mulobwana oddu woviyeviha vina wokurumuwa wahidha otamalela mwaha wa nikamihedho nakelile iyene, vina wahimuttittimiha  Mulugu mwaha wovulumutxiwa.—Lk. 17:11-19.

18. Ovyeviha na okurumuwa onikamihedha dhavi okana wiwanana muttu na mukwaye? (Roma 12:10)

¹⁸ Ovyeviha na okurumuwa ononiwananiha na attu ena vina ononikamihedha okana mandano oliba na amarho ehu. Na mukalelo gani? Awene anononelamo wila attu ena anokaana mikalelo dhapama vina anofwanyela okuluveliwa. Attu oviyeviha vina okurumuwa anowagalala agawona ena eddihaga pama mabasa awa obe akelaga ettomo ettomovi.—Kengesa Roma 12:10.

19. Ninfanyeelelani orabela ovittukulela?

¹⁹ Attu ovittukulela anorutxiwa watamalela akwawa, anziveliwa agatamaleliwaga bahi. Awene anoviladdaniha na akwawa na efunelo y’okaletxa attu a ttima. Ottiya waswagiha ena vina wattomela mabasa, mobuwelo wawa bwawi, “Akala weyo onofuna wi mabasaya akosiwe pama”—kumuttomele muttu mwina—“okose wamwinya.” Sabwaya jawi aliba ovittukulela amukumbela vawa vina attu a ntxiga. (Gal. 5:26) Attu ninga aba anorutxiwa omaga omarho ongonela. Nigoona wi nihikana ekalelo ya ovittukulela, ninofwanyela onfugulela Yehova murima wehu munlobeloni, nimukumbirhaga nikamihedho wi niwodhe ‘osaddula mobuwelo wehu,’ dhahene ovittukulela kunamele mitxitxi mmirimani mwehu —Rom. 12:2.

20. Ninfwanyelelani weddana ovyeviha vina okurumuwa?

²⁰ Ninotamalela venjene okaana yotagiha ya Yehova! Iyo nihona ovyeviha waye na mukalelo onaweddihiye emeleli aye, nona ninfuna nimutagihe iyene. Vina ninfuna nifware dhotagiha dhinfwanyeya mBibiliani dha attu eddilena ovyeviha vamentoni va Mulugu. Nigakosa ejuwene ninele omvaha Yehova nttittimiho vina nriho nininfwanyelela. (Ovuh. 4:11) Dhawene ninele ofwanyelela wedda na Babi wehu wa wirimu, odduwene onakwela attu aneddana oviyeviya vina okurumuwa.