1. Nemene la hna qaja hnei Dravita göne la hni ne ipië i Iehova?

 HAPEU, ka hni ka ipië Iehova? Eje hi. Öni Dravita: “Hnei nyipëti hna hamë ni la petre ne iamele; nge hna atrunyi ni hnene la hni ne ipië i nyipë.” (2 Sam. 22:36, MN; Sal. 18:35) Maine jë, Dravita a mekun lo Samuela perofeta a iëne la ka troa joxu ne Isaraela. Ala 7 lao trejin me Dravita nge angeic la ka co. Ngo angeic la hna iën hnei Iehova troa nyihnai Saulo joxu.—1 Sam. 16:1, 10-13.

2. Nemene la hne së hna troa ce wang ngöne la tane mekun celë?

² Caasi hi la mekuna i Dravita göi Iehova memine la atre cinyihane la Salamo. Öni angeic: “Nyidrëti a aconyi nyidrëti kö matre troa goeëne la hnengödrai me ihnadro, me adraiëne la ka pë mo qa ngöne la xaxau. Nyidrëti a kapa draië la atr ka pë ewekë . . . matre troa ce alapane memine la itre joxu.” (Sal. 113:6-8) Ame ngöne la tane mekun celë, tro sa xomi ini qa ngöne la hni ne ipië i Iehova. Tro fe sa ithanatane la tulu i Saulo joxu, Daniela perofeta me Iesu göne la aqane troa hetre hni ne ipië.

3. Nemene la aqane ujë i Iehova koi së, nge nemene la lue thiina i Nyidrë ka mama e cili?

³ Kola mama la hni ne ipië i Iehova ngöne la aqane ujë i Nyidrë kowe la itre hlue i Nyidrëti ka tha pexeje kö. Iehova a kapa la hmi së me goeë së ceitu me itre sinee i  Nyidrë. (Sal. 25:14) Celë hi matre, hnei Nyidrëti hna huujëne la Nekö i Nyidrë matre troa köletrij la itre ngazo së. Eje hi, ka ihnim me utipine Iehova!

4. Nemene la aqane xupi së hnei Iehova, nge pine nemen?

⁴ Hetre ketre aqane amamane Iehova la hni ne ipië i Nyidrë. Ngacama pëkö ka musinë Iehova, ngo hnei Nyidrëti hna xupe la itre atr hnaiji Nyidrë. Hnei Iehova hna xupi së cememine la atreine troa ië ewekë. Ngacama Iehova la Atre Xupi së, ngo Nyidrëti a wangatrune la itre aja së. Iehova a ajane tro sa atrunyi Nyidrë cememine la ihnim, me wangatrehmekun laka, hetre eloine la troa drengethenge Nyidrë. (Deu. 10:12; Is. 48:17, 18) Tru la hni ne ole së kowe la aqane amamane Iehova la hni ne ipië i Nyidrë!

5. Tune kaa la aqane amamane Iehova la hni ne ipië i Nyidrë? (Wange ju la pane iatr.)

⁵ Iehova a amamane la hni ne ipië i Nyidrë ngöne la aqane ujë i Nyidrë. Ngacama ka inamacane Nyidrë, ngo Nyidrëti palahi a kapa la mekuna i itre xan. Hnei Iehova hna aijijë Iesu troa xatua Nyidrë troa xup la nöjei ewekë asë. (Ite Edomë 8:27-30; Kol. 1:15, 16) Ketre, ngacama ka Tru Trenge Men Nyidrë, ngo hnei Nyidrëti hna thue hnëqa koi itre xan. Hnei Iehova hna acili Iesu troa joxu ne la Baselaia. Nge Nyidrëti fe a aijijëne la 144 000 lao atr hna iën troa ce musi me Iesu. (Luka 12:32) Eje hi, hnei Iehova hna ini Iesu troa xome hnyawa la hnëqa ne Joxu me Atre Huuj Ka Sisitria. (Heb. 5:8, 9) Ketre, Nyidrëti fe a inine la itre ka troa ce musi me Iesu. Ngo tha Nyidrëti kö a amekötin  la aqane huliwa i angatr. Pine nemen? Pine laka Nyidrëti a mejiun laka, tro angatr a kuca la aja i Nyidrë.—Hna ama. 5:10.

6-7. Nemene la aqane tro sa nyitipu Iehova?

⁶ Ngacama ijiji Iehova hi troa xom asë la itre hnëqa, ngo hnei Nyidrëti fe hna hamë hnëqa koi itre xan. Tune kaa fe së? Hapeu, epuni kö la ketre kem maine qatre thup pena? Loi e tro epuni a hamë hnëqa koi itre xan tui Iehova. Ketre, tha tro kö a amekötin la aqane huliwa i angatr. Maine tro epuni a nyitipu Iehova, tro ha tro loi la huliwa, nge tro fe epuni a inine la itre xan troa xom hnyawa la hnëqa i angatr. (Is. 41:10) Jëne la tulu i Iehova, nemene la itre xaa ini hna xom hnene la itre ka hetre hnëqa?

⁷ Tusi Hmitrötr a amamane laka, Iehova a nyipiewekëne la mekuna ne la itre angela. (1 Ite jo. 22:19-22) Itre kem me thine fe, nemene la aqane tro epuni a nyitipu Iehova? Hnyingëne jë la mekuna ne la itre nekö i epun. Nge maine ijij, loi e troa hane drei nyudren.

8. Nemene la aqane xomihni aqeanyi Iehova koi Aberahama me Sara?

⁸ Kola mama la hni ne ipië i Iehova ngöne la aqane xomihni aqeanyi Nyidrë. Maine kola hane qeje mekun hnene la ketre hlue i Iehova, Nyidrëti a xomihni aqeany. Hnei Iehova hna drei Aberahama ngöne la angeic a qaja la mekuna i angeic göi Sodroma me Gomora. (Gen. 18:22-33) Ketre, hnei Iehova hna xomihni aqeanyi Sara, föe i Aberahama. Ame lo kola qaja hnene la angela ka hape, tro Sara a hnaho ngacama qatre föe hë eahlo, hnei eahlo hna hnyima. Ngo tha hnei Iehova kö hna dreng akötrën maine wesitr pena. (Gen. 18:10-14) Hnei Iehova pe hna metrötrë Sara.

9. Nemene la ini hna xom hnene la itre kem me thin me itre qatre thup, qa ngöne la tulu i Iehova?

⁹ Itre kem me thin me itre qatre thup, nemene la ini hnei epuni hna xom qa ngöne la tulu i Iehova? Isa hnyinge jë ka hape: ‘Nemene la aqane ujëng ngöne la kola hane qeje mekun hnei ketre? Hapeu, eni kö a canga thele kepin, maine thele pena troa trotrohnine la mekuna i angeic?’ Maine tro la itre ka trene hnëqa a nyitipu Iehova, tro ha hetre eloine kowe la itre fami memine la ekalesia. Hne së hna xomi ini qa ngöne la aqane hni ka ipië i Iehova. Tro pena sa ce wang la itre xaa hna melën e hnine la Tusi Hmitrötr, göne la aqane troa hetre hni ne ipië.

10. Nemene la aqane ini së hnei Iehova?

¹⁰ Iehova la “Atre Ini Ka Tru,” nge Nyidrëti a ini së jëne la itre tulu ka loi me ka ngazo e hnine la Tusi Hmitrötr. (Is. 30:20, 21) Loi e tro sa lapa mekun la tulu ne la itre hlue i Iehova ka amamane la itre thiina ka lolo, tune la ipië. Ketre, hetre ini hne së hna troa xom qa ngöne la aqane ujë ka ngazo hnei itre xan.—Sal. 37:37; 1 Kor. 10:11.

11. Nemene la hna ini së hnene la tulu i Saulo?

¹¹ Tro sa ce wang la ka traqa koi Saulo joxu. Ka hni ne ipië angeic ngöne lo angeic a thöth. Atre hi angeic laka, hetre ifego i angeic, nge xou angeic troa hane xomi hnëqa. (1 Sam. 9:21; 10:20-22)  Ngo thupene la hna acili Saulo troa joxu, hnei angeic hna pi tru. Ame la ketre ijin, tha hnei angeice kö hna xomihni aqeany me treqe Samuela perofeta. Ketre, tha hnei angeice kö hna mejiun laka, tro Iehova a thupëne la nöje i Nyidrë. Hnei Saulo hna tro fë la ketre huuj, ngo tha hnëqa i angeice pe. E cili, hnei Iehova hna nuetriji angeic me thapa la mus qaathei angeic. (1 Sam. 13:8-14) Eje hi, tha tro kö sa pi tru. Loi e tro pe sa inamacan me xomi ini qa ngöne la aqane ujë ka ngazo i Saulo.

12. Nemene la aqane amamane Daniela la hni ne ipië i angeic?

¹² Isapengöne kö la aqane ujë i Saulo me Daniela perofeta. Hnei Daniela palahi hna hetre hni ne ipië me sipo ixatua koi Iehova. Ame lo Iehova a aijijë Daniela troa qejepengöne la pu i Nebukaneza, tha hnei angeice kö hna pi mama. Hnei angeice pe hna hni ne ipië me atrunyi Iehova. (Dan. 2:26-28) Nemene la ini koi së? Maine jë, itre trejin a qaja aloinyi së göne la aqane cile fë cainöj, maine göne la huliwa ne cainöje së pena. E cili, loi e tro palahi sa atrunyi Iehova. Eje hi, maine pëkö ixatua qaathei Nyidrë, thatreine kö së troa kuca la itre ewekë cili. (Fil. 4:13) Tro pena sa ce wang la tulu i Iesu.

13. Nemene la ini hne së hna xom qa ngöne la hna qaja hnei Iesu ngöne Ioane 5:19, 30?

¹³ Iesu la Nekö i Akötresie. Ngacama ka pexeje Iesu, ngo hnei nyidrëti palahi hna mejiune kowe la Keme i nyidrë. (E jë la Ioane 5:19, 30.) Tha hnei Iesu kö hna thel troa thapa la musi Iehova. Kola qaja ngöne Filipi 2:6 ka hape, “tha hnei nyidrëti kö hna thele troa thapa la göhnë i Akötresie.” Atre hnyawa hi Iesu laka, hetre ifegone la musi nyidrë. Celë hi matre, hnei Iesu hna drengethenge me metrötrëne la musi Iehova, Keme i nyidrë.

14. Nemene la hna qaja hnei Iesu ngöne lo Salome a sipo nyidrë troa hamë hnëqa kowe la lue nekö i eahlo?

¹⁴ Hnei Salome hna sipo Iesu matre tro Iakobo me Ioane, lue nekö i eahlo, a lapa ezi nyidrë ngöne la Baselaia.  Öni Iesu ka hape, Akötresieti la atrekë hnëqane lai. (Mat. 20:20-23) Hnei Iesu hna amamane laka, ka hni ne ipië nyidrë. Tha hnei nyidrëti kö hna kuca la sipu mekuna i nyidrë, ngo hnei nyidrëti pe hna drengethenge Iehova. (Ioane 12:49) Tune kaa la aqane tro sa nyitipu Iesu?

15-16. Tro sa trongëne tune kaa la hna qaja ngöne 1 Korinito 4:6?

¹⁵ Maine easa ajane troa nyitipune la aqane hni ne ipië i Iesu, loi e tro sa trongëne la hna qaja ngöne 1 Korinito 4:6, ka hape: “Kuca ju hi la hna cinyihan.” Haawe, ame la kola hnyingëne la mekuna së, tha tro kö sa catre fë mekun maine canga ithanata. Loi e tro pe sa thele la mekuna i Iehova ngöne la Tusi Hmitrötr me e hnine la itre itusi së. Aqane tro hi së lai a amamane laka, ka hetre ifego së. Ketre, ka sisitria catre koi së la “itre wathebo ka meköti” Iehova.—Hna ama. 15:3, 4.

¹⁶ Eje hi, easa atrunyi Iehova ngöne la easa hetre hni ne ipië. Ngo hetre itre xaa kepin matre ka nyipiewekë la thiina cili. Tune la hne së hna troa ce wang, ka madrin la atr ka ipië, nge angeic a mele tingeting me itre xan.

17. Pine nemene matre ka madrin la itre atr ka hetre hni ne ipië?

¹⁷ Easa madrin la easa hetre hni ne ipië. Pine nemen? Pine laka, hetre ifego së matre easa madrin ngöne la kola xatua së. Pane mekune jë lo treen lao lepera hna aloin hnei Iesu. Caasi hi la ka bëeke troa olene koi nyidrë. Atre hi angeic laka, thatreine kö angeic troa sipu aloine la meci angeic. Hnei angeic  hna ipië me olene la ixatua i Iesu, me atrunyi Akötresie.—Luka 17:11-19.

18. Pine nemene matre nyimutre la itre sinee ne la atr ka hetre hni ne ipië? (Roma 12:10)

¹⁸ Ame la atr ka hetre hni ne ipië, tre, nyimutre la itre sinee i angeic. Pine nemen? Pine laka, canga öhne hi angeic la itre thiina ka lolo i angatr. Ketre, angeic a mejiune laka, tro angatr a xome hnyawa la hnëqa i angatr. Tha cile kö angeic troa qaja aloine la huliwa i angatr.—E jë la Roma 12:10.

19. Pine nemene matre tha tro kö sa pi tru?

¹⁹ Ame pena la atr ka pi tru, tre, tha ka qaja aloinyi itre xane kö. Angeice pe a treqene troa qaja aloinyi angeic. Angeic a wangesixane la itre xan me pi mama me zalu. Tha aja i angeice kö troa hamë hnëqa koi itre xan ke, tha mejiune kö angeic koi angatr. Ame koi angeic, ijiji angeice hi troa xom asë itre ej. (Gal. 5:26) Celë hi matre, pëkö sinee i angeic. Maine easa öhn laka, hetrenyi the së la pi tru, loi e tro sa sipo ielene koi Iehova troa xatua së troa ‘ahnyipixene la aqane mekuna së,’ matre tha tro kö a cia e kuhu hni së la thiina cili.—Rom. 12:2.

20. Pine nemene matre nyipiewekë tro sa hetre hni ne ipië?

²⁰ Ketre tulu ka lolo Iehova! Easa öhne la hni ne ipië i Iehova, ngöne la aqane ujë i Nyidrë kowe la itre hlue i Nyidrë. Celë hi kepin matre, easa ajane troa nyitipu Iehova memine la itre xaa hlue i Nyidrëti ekö. Haawe, catre pi së atrunyi Iehova. (Hna ama. 4:11) Tro hë sa ce tro me Iehova, Atre hnime la itre ka hetre hni ne ipië.