1. Na cava e kaya o Tevita me baleta na yalomalumalumu i Jiova?

VACAVA eda rawa ni kaya ni yalomalumalumu o Jiova? Io. E vola o Tevita: “Oni solia vei au na nomuni isasabai ni bula, au vakalevulevui ena nomuni yalomalumalumu.” (2 Sam. 22:36; Same 18:35) E rairai vakasamataka tiko o Tevita na siga a gole yani kina na parofita o Samuela ina vale nei Tamana, me lumuta na tui vou kei Isireli. E gone duadua o Tevita vei ratou na le walu na veitacini, ia e digitaki koya o Jiova me sosomitaki Tui Saula.—1 Sam. 16:1, 10-13.

2. Na cava eda na veivosakitaka ena ulutaga qo?

² E macala ga ni duavata o Tevita kei na ka e vola e dua na daunisame me baleti Jiova, e kaya: “E cuva sobu o koya me raica na lomalagi kei vuravura, e vakaduria na vakaloloma mai na kuvuniqele. E laveta cake na dravudravua . . . me vakatikori koya kei ira na turaga.” (Same 113:6-8) Eda na veivosakitaka e liu eso na tikina bibi me baleta na yalomalumalumu nida dikeva na ivakaraitaki nei Jiova. Eda na qai veivosakitaka tale ga na vuna e bibi kina meda kila ni vakaiyalayala na ka eda rawata, nida dikeva na ivakaraitaki nei Tui Saula, na parofita o Taniela kei Jisu.

3. Na cava e vakaraitaka vei keda o Jiova? Cava eda vulica kina?

³ E vakaraitaka o Jiova nona yalomalumalumu ena ka e cakava vei ira nona dauveiqaravi era sega ni uasivi. Ena sala cava? E vakadonuya meda sokaloutaki koya, meda nona itokani tale ga. (Same 25:14) E soli Luvena me isoro ni noda ivalavala ca me rawa nida veitokani kina kei koya. E vakaraitaka  gona o Jiova ni dauloloma, e dauveinanumi!

4. Na cava e solia vei keda o Jiova? Na vuna?

⁴ Dikeva e dua tale na ivakaraitaki ni yalomalumalumu i Jiova. Ni Dauveibuli, e rawa sara ga ni buli keda meda kua ni lewa na ka meda cakava. Ia e sega ni cakava qori. E buli keda meda ucui koya, e solia tale ga vei keda na galala ni vakatulewa. Eda ka malumalumu sara, ia e vinakata o Jiova meda qaravi koya ena lomada taucoko nida lomani koya. Eda kila tale ga ni na yaga noda talairawarawa vua. (Vkru. 10:12; Aisea 48:17, 18) Eda vakavinavinaka gona ni yalomalumalumu o Jiova!

5. E vakavulici keda vakacava o Jiova meda yalomalumalumu? (Raica na iyaloyalo ena waqana.)

⁵ E vakavulici keda o Jiova meda yalomalumalumu ena nona ivakaraitaki. E vuku duadua ena lomalagi kei na vuravura. Ia e tu vakarau me rogoca nodra vakatutu eso tale. Kena ivakaraitaki, e vakayagataki Luvena me tokoni koya ena nona bulia na ka kece. (Vkai. 8:27-30; Kolo. 1:15, 16) E Kalou kaukaua duadua o Jiova, ia e lesia na itavi vei ira eso tale. Kena ivakaraitaki, e lesi Jisu me Tui ni nona Matanitu, ena solia tale ga eso na lewa vei ira na le 144,000 era na veiliutaki kei Jisu. (Luke 12:32) E macala ga ni vakavulici Jisu o Jiova ena nona itavi vakaTui, vakaBete Levu tale ga. (Iper. 5:8, 9) E vakavulici ira tale ga na veiliutaki kei Jisu ena nodra itavi. Ia e sega ni via lewa vakamatailalai na sala mera qarava kina nodra itavi, e nuitaka ga nira na cakava na lomana.—Vkta. 5:10.

6-7. Na cava eda vulica vua na Tamada vakalomalagi me baleta na lesi ni itavi?

⁶ E sega ni vinakata noda veivuke na Tamada vakalomalagi, ia ke sa lesia na  itavi vei ira eso tale, e dodonu meda vakatotomuri koya tale ga! Kena ivakaraitaki, o dua na ulunivuvale se qase ni ivavakoso? Mo vakatotomuri Jiova ni o lesia na itavi, mo kua tale ga ni via lewa vakamatailalai na sala mera qarava kina nodra itavi. Ni o vakatotomuri Jiova, ena rawa vinaka na cakacaka, o na vakavulici ira eso tale, era na nuidei tale ga. (Aisea 41:10) Na cava tale eda rawa ni vulica vei Jiova nida lesi ena itavi?

⁷ Eda raica ena iVolatabu ni dau via rogoca o Jiova na nodra vakatutu na luvena vakayalo, o ira na agilosi. (1 Tui 22:19-22) Oni na vakatotomuri Jiova vakacava na itubutubu? Ena gauna veiganiti, taroga nodra vakatutu na luvemuni ena sala me qaravi kina e dua na itavi. Ke veiganiti, muria sara.

8. E vakaraitaka vakacava o Jiova na vosovoso vei Eparama kei Sera?

⁸ E laurai tale ga na yalomalumalumu i Jiova ena nona vosovoso. Kena ivakaraitaki, e vosovoso nira taroga ena veidokai na nona dauveiqaravi na vuna e vakatulewataka kina eso na ka. E vakarogoci Eparama ni vakamacalataka nona rai me baleta na kena vakarusai o Sotoma kei Komora. (Vkte. 18:22-33) Vakasamataka tale ga nona dredrevaka o Sera na wati Eparama, na yalayala i Jiova me na bukete ni sa itabaqase. E sega ni cudru o Jiova. (Vkte. 18:10-14) E dokai Sera tiko ga.

9. Na cava era vulica na itubutubu kei na qase ni ivavakoso vei Jiova?

⁹ Na cava oni rawa ni vulica na itubutubu kei na qase ni ivavakoso vei Jiova? Kaya mada ke so era vakalewa nomu vakatulewa, o dau vinakata mo vakadodonutaki ira sara? Se o saga mada mo kila na nodra rai? Ena yaga vakalevu ena vuvale kei na ivavakoso nira vakatotomuri Jiova na itubutubu kei na qase ni ivavakoso. Eda sa veivosakitaka mai na ka eda vulica ena yalomalumalumu i Jiova. Eda na veivosakitaka qo na ka eda vulica me baleta na yalomalumalumu, ena nodra ivakaraitaki eso era cavuti ena Vosa ni Kalou.

10. E vakavulici keda vakacava o Jiova ena ivakaraitaki era tu ena iVolatabu?

¹⁰ E “Dauniveivakavulici Levu” o Jiova, e vakarautaka gona ena nona Vosa eso na ivakaraitaki meda vuli kina. (Aisea 30:20, 21) Eda vuli vakalevu nida vakasamataka vakatitobu nodra ivakaraitaki eso ena iVolatabu, era vakaraitaka na itovo vakalou me vaka na yalomalumalumu, wili kina nodra kila ni vakaiyalayala na ka era rawata. Eda vuli tale ga nida vakasamataka nodra ivakaraitaki eso era sega ni muria na itovo vinaka va qori.—Same 37:37; 1 Kor. 10:11.

11. Na cava eda vulica ena ivakaraitaki ca nei Saula?

¹¹ Vakasamataka mada na ka e yacovi Tui Saula. A yalomalumalumu ena dua na gauna. E kila ni vakaiyalayala na ka e rawata, e tu suka tale ga me qarava eso tale na itavi. (1 Sam. 9:21; 10:20-22) Ia ni toso na gauna, e laurai vei Saula na dokadoka. E vakaraitaka na itovo qori ena gauna sa tui kina. Dua na gauna a sega ni vosovoso me waraka na parofita o Samuela, e mani cabora na isoro kama e sega ni lesi vua. E sega ni nuitaki Jiova me vukei ira nona tamata. Cava e qai yaco? E sega ni vakadonui koya o Jiova, e sega tale ni vakadonuya me tui. (1 Sam. 13:8-14) E ka vakayalomatua meda vuli ena ivakaraitaki qo meda kua ni dokadoka.

12. E vakaraitaka vakacava o Taniela na yalomalumalumu?

 ¹² E duidui sara na parofita o Taniela vei Saula, dikeva mada nona ivakaraitaki vinaka. E yalomalumalumu tiko ga o Taniela ena nona bula taucoko, e dau kerea na veidusimaki i Jiova. Kena ivakaraitaki, ni vakayagataki koya o Jiova me vakamacalataka na tadra nei Nepukanesa, e sega ni saga me rogo kina. E vakalagilagi Jiova ga. (Tani. 2:26-28) Na cava eda vulica kina? Ke ra taleitaka na tacida noda ivunau se vuavuaivinaka noda cakacaka vakaitalatala, meda nanuma tiko meda vakalagilagi Jiova ga. Meda vakaraitaka vakadodonu nida rawata ga qori ena veivuke i Jiova. (Fpai. 4:13) Ni tiko vei keda na rai qori, eda sa vakatotomuria tiko na ivakaraitaki vinaka i Jisu. Ena sala cava?

13. Me vaka e tukuni ena Joni 5:19, 30, e vakaraitaka vakacava o Jisu na yalomalumalumu?

¹³ E Luve ni Kalou uasivi o Jisu, ia e dau nuitaki Jiova. (Wilika Joni 5:19, 30.) E sega ni saga me kocova na itutu nei Tamana vakalomalagi. E tukuni ena Filipai 2:6 ni “sega ga ni via koco itutu, oya me tautauvata kei na Kalou.” Ena nona yalomalumalumu, e kila ni vakaiyalayala na ka e rawata, e doka tale ga na veiliutaki i Tamana.

14. Na cava e cakava o Jisu ni kerei vua e dua na ka e sega ni lewa?

¹⁴ Dikeva na ka e cakava o Jisu ni ratou golevi koya yani o Jemesa, Joni kei na tinadrau, eratou kerea e dua na ka e sega ni lewa o Jisu. E qai kaya vakadodonu ni lewa ga o Tamana vakalomalagi o cei me dabe ena yasana imawi kei na yasana imatau ni veiliutaki ena Matanitu ni Kalou. (Maciu 20:20-23) E kila gona o Jisu ni vakaiyalayala na ka e rawa ni cakava. E yalomalumalumu. E cakava ga na ka e vakaroti koya kina o Tamana. (Joni 12:49) Eda na vakatotomuria vakacava na ivakaraitaki vinaka i Jisu?

15-16. Eda na muria vakacava na ivakasala ena 1 Korinica 4:6?

¹⁵ Eda vakatotomuria na yalomalumalumu i Jisu nida muria na ivakasala ena 1 Korinica 4:6. E tukuni kina: “Kua ni kuria na ka e volai.” Ni kerei gona noda ivakasala, meda kua ni tukuna ga noda rai  se na ka ga eda vakasamataka mai. Meda vakayagataka ga na ivakasala e tu ena iVolatabu kei na noda ivola vakaivolatabu. Qori e vakaraitaka nida kila tiko ni vakaiyalayala na ka eda kila. Eda yalomalumalumu gona meda vakalagilagia ga na “ivakaro dodonu” ni Kalou Kaukaua duadua.—Vkta. 15:3, 4.

¹⁶ Eda yalomalumalumu nida rokovi Jiova, ia e tiko eso tale na vuna meda yalomalumalumu kina. Meda dikeva mada qo na sala eda na marau kina nida yalomalumalumu, ena vinaka tale ga kina noda veimaliwai kei ira eso tale.

17. Na cava era na marau kina na yalomalumalumu?

¹⁷ Eda na marau nida yalomalumalumu. Ena sala cava? Ke da kila ni vakaiyalayala na ka eda rawata, eda na marautaka nodra veivuke eso tale, eda na vakavinavinakataka tale ga. Kena ivakaraitaki, vakasamataka mada na gauna a vakabula kina o Jisu e tini na vukavuka. E dua ga e lesu mai me vakavinavinakataka ni sa vakabulai mai na kena mate, qori na ka e sega ni rawa ni cakava vakataki koya. E marau na turaga qori ni vukei, e vakalagilagia kina na Kalou.—Luke 17:11-19.

18. E yaga vakacava na yalomalumalumu ena noda veimaliwai? (Roma 12:10)

¹⁸ Nida yalomalumalumu eda na veimaliwai vinaka kei ira eso tale, eda na veivolekati tale ga kei ira na noda itokani. Na vuna? Eda kila ni tiko tale ga nodra itovo vinaka, eda nuitaki ira tale ga. Era marau na yalomalumalumu ni vuavuaivinaka nodra itavi eso tale, ena totolo nodra vakacaucautaki ira, era rokovi ira tale ga.—Wilika Roma 12:10.

19. Na cava eso tale na vuna meda kua kina ni dokadoka?

 ¹⁹ E dau dredre vei ira na dokadoka mera vakacaucautaki ira eso tale, era vinakata ga mera vakacaucautaki. Era dau vakatauvatani ira kei na so tale ra qai uqeta na yalo ni veisisivi. Era sega ni vakavulica eso tale qai lesia na itavi. Era na kaya, “Ena donu ga keu cakava o yau.” Era nanuma ni na sega ni vinaka na ka era cakava eso tale. O koya e dokadoka ena viavia rogo, ena dau vuvu tale ga. (Kala. 5:26) Ena sega ni vinaka nona veimaliwai. Ke da kila ni noda malumalumu na dokadoka, e bibi meda masuti Jiova me vukei keda me ‘vakavoui noda vakasama,’ me kua kina ni vakawakana vei keda na itovo ca qo.—Roma 12:2.

20. Na cava meda yalomalumalumu kina?

²⁰ Eda vakavinavinakataka na ivakaraitaki i Jiova! Eda raica nona dau yalomalumalumu vei ira na nona dauveiqaravi, eda vinakata gona meda vakatotomuri koya. Eda via vakatotomuria tale ga nodra ivakaraitaki eso e tukuni ena iVolatabu, era yalomalumalumu nira lako vata kei na Kalou. Meda rokovi Jiova da qai vakalagilagi koya tiko ga. (Vkta. 4:11) Nida cakava qori, eda na lako vata tiko ga kei na Tamada vakalomalagi, ni dau lomani ira na yalomalumalumu.