1. Etɛ Davidi ka ɖɔ dó mɛɖéesɔ́hwe Jehovah tɔn wu?

MǏ KA sixu ɖɔ nǔgbo nǔgbo ɖɔ Jehovah nyí mɛɖéesɔ́hwetɔ́ à? Ganji. Davidi wlán ɖɔ: “A na mì gǎglónú hwlɛngán tɔn towe, bɔ mɛɖéesɔ́hwe towe sɔ́ mì sù.” (2 Sam. 22:36, nwt; Ðɛh. 18:35, nwt) Vlafo, Davidi sixu ko ɖò gbè e gbè gbeyiɖɔ Samuwɛli wá tɔ́ tɔn xwé, bo na sɔ́ ami dó ɖè Axɔ́su Izlayɛli tɔn sɔgudo tɔn ɔ é flín wɛ. Davidi wɛ nyí mɛ kpɛví ɔ ɖò vǐ sunnu tantɔn lɛ mɛ có, éyɛ wɛ Jehovah ka sɔ́ bɔ é na ɖyɔ Axɔ́su Sawulu.—1 Sam. 16:1, 10-13.

2. Etɛ lɛ jí mǐ ka na ɖɔ xó dó ɖò xóta elɔ mɛ?

² É ɖò wɛn ɖɔ Davidi na yí gbè nú lee nǔ cí nú ɖɛhan-wlantɔ́ e ɖɔ xó elɔ dó Jehovah wu é: “É nɔ nya bo nɔ kpɔ́n jixwé kpo ayikúngban kpo sɛ́dó. É nɔ sɔ́ wamamɔnɔ site sín kɔ́gudu mɛ, é nɔ sɔ́ lelenɔ . . . jinjɔn mɛjɔmɛ lɛ kpá.” (Ðɛh. 113:6-8) Ðò xóta elɔ mɛ ɔ, mǐ na gbéjé nǔkplɔnmɛ taji ɖé lɛ kpɔ́n dó mɛɖéesɔ́hwe wu, gbɔn lee Jehovah ɖè jijɔ enɛ xlɛ́ gbɔn é jí ɖiɖɔ xó dó gblamɛ. Enɛ gudo ɔ, mǐ na gbéjé nǔ e kpɔ́ndéwú Axɔ́su Sawulu, gbeyiɖɔ Daniyɛli kpo Jezu kpo tɔn sixu kplɔ́n mǐ dó jlɛ̌jininɔ wu é kpɔ́n.

3. Nɛ̌ Jehovah ka nɔ wà nǔ xá mǐ gbɔn? Etɛ enɛ ka xlɛ́?

³ Jehovah nɔ gbɔn lee é nɔ wà nǔ xá mɛsɛntɔ́ tɔn hwɛhutɔ́ lɛ gbɔn é gblamɛ dó xlɛ́ ɖɔ emi nyí mɛɖéesɔ́hwetɔ́. É yí gbè bɔ mǐ nɔ sɛn ɛ, bo nɔ lɛ́ kpɔ́n mǐ dó mɔ xɔ́ntɔn tɔn lɛ. (Ja. 4:8) Bo na dó bló bɔ mǐ na nyí xɔ́ntɔn tɔn ɔ, Jehovah ɖè afɔ nukɔntɔn ɔ, bo sɔ́ Vǐ tɔn dó savɔ̌ dó hwɛ mǐtɔn lɛ tamɛ. Nǔblawukúnúmɛ kpo wuvɛ̌sexámɛ kpo tɛ ɖíe é ɖexlɛ́ mǐ è!

4. Etɛ Jehovah ka na mǐ? Etɛwu?

 ⁴ Kpɔ́n ali ɖevo e nu Jehovah ɖè mɛɖéesɔ́hwe xlɛ́ ɖè é. Ðó Jehovah wɛ nyí Gbɛɖotɔ́ ɔ wutu ɔ, é sixu dá mǐ nǔwukpíkpé e nɔ zɔ́n bɔ mǐ na ɖɔ lee mǐ na zán gbɛ̀ gbɔn é mɛvo. Amɔ̌, é wà mɔ̌ ǎ. É dá mǐ ɖó akpajlɛ éɖesunɔ tɔn mɛ, bo na mǐ mɛɖesúsíninɔ. É ba ɖɔ wanyiyi ni sísɛ́ mǐ mɛ gbɛtɔ́ e ma hwɛ́n nǔɖe ǎ lɛ é bonu mǐ ni sɛn emi, ɖó mǐ tuùn lè e nɔ tɔ́n sín tónúsíse n’i mɛ lɛ é wutu. (Sɛ́n. 10:12; Eza. 48:17, 18) Mɛɖéesɔ́hwe enɛ e Jehovah ɖexlɛ́ é ɖó na sù nukún mǐtɔn mɛ tawun!

5. Nɛ̌ Jehovah ka nɔ kplɔ́n mǐ bonu mǐ na nɔ sɔ́ mǐɖée hwe gbɔn? (Kpɔ́n ɖiɖe e ɖò akpa ɔ jí é.)

⁵ Jehovah nɔ kplɔ́n mǐ ɖɔ mǐ ni nɔ sɔ́ mǐɖée hwe, gbɔn lee é nɔ wà nǔ xá mǐ gbɔn é gblamɛ. Jehovah wɛ nyí Mɛ e nyɔ́nǔi hugǎn ɖò wɛkɛ ɔ mɛ é. É ɖò mɔ̌ có, é nɔ ɖò gbesisɔmɛ bo nɔ yí gbè nú linlin mɛ ɖevo lɛ tɔn. Ði kpɔ́ndéwú ɔ, Jehovah yí gbè bɔ Vǐ tɔn d’alɔ ɛ ɖò nǔ lɛ bǐ didá kɔn. (Nǔx. 8:27-30; Kolo. 1:15, 16) Jehovah wɛ nyí Nǔbǐwukpétɔ́ ɔ có, é ka na acɛ mɛ ɖevo lɛ ɖó bǎ ɖé mɛ. Ði kpɔ́ndéwú ɔ, é sɔ́ Jezu Axɔ́su nú Axɔ́suɖuto ɔ, bo lɛ́ na acɛ gbɛtɔ́ 144 000 e na ɖu axɔ́su xá Jezu lɛ é ɖó bǎ ɖé mɛ. (Luk. 12:32) É ɖò wɛn ɖɔ Jehovah kplɔ́n azɔ̌ Jezu bɔ é na nyí Axɔ́su kpo Vɔsanúxwlémawutɔ́ Ðaxó kpo. (Ebl. 5:8, 9) É lɛ́ kplɔ́n azɔ̌ mɛ e na kp’acɛ xá Jezu lɛ é, amɔ̌, é sɔ́ azɔ̌ enɛ d’así nú ye é ɔ, é ɖò gudo yetɔn cɔcɔcɔ ɖò lee ye na wà azɔ̌ enɛ gbɔn é kɔn ǎ. É nyɔ́ wà ɔ, é ɖeji ɖɔ ye na wà jlǒ emitɔn.—Nǔɖe. 5:10.

6-7. Nɛ̌ tatɔ́ xwédo tɔn lɛ, mɛxo agun tɔn lɛ, kpo mɛjitɔ́ lɛ kpo ka sixu xwedó kpɔ́ndéwú Jehovah tɔn gbɔn?

⁶ Enyi Tɔ́ mǐtɔn jixwé tɔn e ma ɖó hudo alɔdó mɛ ɖě tɔn ǎ é nɔ na acɛ mɛ  ɖevo lɛ ɖó bǎ ɖé mɛ ɔ, mǐdɛɛ lɛ tɔn ɖó na zun kwínkwín ma kwín. Ði kpɔ́ndéwú ɔ, tatɔ́ xwédo tɔn ɖé wɛ nú we à alǒ mɛxo agun tɔn wɛ a nyí? Nɔ xwedó kpɔ́ndéwú Jehovah tɔn bo nɔ ɖè azɔ̌ nú mɛ ɖevo lɛ, ma ka nɔ nɔ gudo yetɔn cɔcɔcɔ ɖò lee ye na wà gbɔn é kɔn ó. Enyi a nɔ xwedó kpɔ́ndéwú Jehovah tɔn ɔ, a na w’azɔ̌ ɔ, bo na lɛ́ kplɔ́n azɔ̌ mɛ ɖevo lɛ, lobo bló bɔ ye na ɖó jiɖiɖe hugǎn. (Eza. 41:10) Nǔ ɖevo tɛ kpɔ́ndéwú Jehovah tɔn ka sixu kplɔ́n mɛ ɖěɖee ɖó acɛ ɖó bǎ ɖé mɛ lɛ é?

⁷ Biblu xlɛ́ ɖɔ Jehovah nɔ yí gbè nú linlin wɛnsagun lɛ tɔn. (1 Axɔ́. 22:19-22) Mɛjitɔ́ lɛ mi, nɛ̌ mi ka sixu xwedó kpɔ́ndéwú Jehovah tɔn gbɔn? Ðò hwenu e é jɛxa dó é ɔ, kanbyɔ vǐ towe ɖɔ, linlin tɛ é ka ɖó dó lee è na wà azɔ̌ lě gbɔn é wu à jí. Enyi linlin tɔn sɔgbe hǔn, xwedó.

8. Nɛ̌ Jehovah ka ɖó suúlu bo wà nǔ xá Ablaxamu kpo Sala kpo gbɔn?

⁸ Suúluɖiɖó Jehovah tɔn nɔ lɛ́ xlɛ́ ɖɔ é nɔ sɔ́ éɖée hwe. Ði kpɔ́ndéwú ɔ, enyi mɛ ɖěɖee ɖò sinsɛn ɛ wɛ lɛ é kan nǔ byɔ ɛ dó gbeta e kɔn é wá lɛ é wu kpo sísí kpo ɔ, é nɔ ɖó suúlu. Hwenu e Ablaxamu ɖò lee nǔ cí n’i dó kún súsú dó nú Sodɔmu kpo Gomɔ́ɔ kpo wu é xó ɖɔ wɛ é ɔ, É ɖótó è. (Bǐb. 18:22-33) Lɛ̌ flín lee Jehovah wà nǔ xá Ablaxamu sín asì Sala gbɔn é. Hwenu e Sala sè akpá e Mawu dó ɖɔ é na mɔ xò ɖò kpikpoxɔmɛ é ɔ, é ko nǔ, é ɖò mɔ̌ có, xomɛ ka sin Jehovah ǎ. (Bǐb. 18:10-14) É nyɔ́ wà ɔ, é wlí yɛ̌yi nú Sala.

9. Etɛ lɛ kpɔ́ndéwú Jehovah tɔn ka sixu kplɔ́n mɛjitɔ́ lɛ kpo mɛxo agun tɔn lɛ kpo?

⁹ Mɛjitɔ́ lɛ kpo mɛxo agun tɔn lɛ kpo è mi, etɛ lɛ kpɔ́ndéwú Jehovah tɔn ka sixu kplɔ́n mi? Lin tamɛ dó lee a nɔ wà nǔ gbɔn hwenu e mɛ ɖěɖee ɖò acɛ towe glɔ́ lɛ é kan nǔ byɔ we dó gbeta e kɔn a wá lɛ é wu é jí. A nɔ ba na gbɛ́ nǔ nú ye tlolo wɛ à? Alǒ, a nɔ tɛ́n kpɔ́n bo nɔ mɔ nǔ jɛ linlin yetɔn mɛ? É ɖò wɛn ɖɔ enyi mɛ ɖěɖee ɖò tɛn acɛkpikpa tɔn mɛ lɛ é nɔ xwedó kpɔ́ndéwú Jehovah tɔn ɔ, xwédo lɛ kpo agun lɛ kpo nɔ ɖu lè tɔn. Kaka jɛ dìn ɔ, mǐ ɖɔ xó dó nǔ e mɛɖéesɔ́hwe Jehovah tɔn sixu kplɔ́n mǐ lɛ é jí. Dìn ɔ, mǐ ni kpɔ́n nǔ e kpɔ́ndéwú ɖěɖee ɖò Xó Mawu tɔn mɛ, bo kúnkplá jlɛ̌jininɔ é sixu kplɔ́n mǐ lɛ é.

10. Nɛ̌ Jehovah ka nɔ zán kpɔ́ndéwú mɛ ɖevo lɛ tɔn dó kplɔ́n nǔ mǐ gbɔn?

¹⁰ Jehovah “Mɛ̌si Ðaxó” mǐtɔn ɔ bló bɔ kpɔ́ndéwú gegě ɖò Xó tɔn mɛ, bo na kplɔ́n nǔ mǐ. (Eza. 30:20, 21, nwt) Tan Biblu tɔn ɖé lɛ ɖɔ xó dó jijɔ e nɔ nyɔ́ Mawu nukúnmɛ lɛ é jí, kaka jɛ jlɛ̌jininɔ jí. Enyi mǐ nɔ lin tamɛ dó ye jí ɔ, ye na kplɔ́n nǔ gegě mǐ. Enyi mǐ gbéjé nǔ e jɛ dó mɛ ɖěɖee ma ɖè jijɔ ɖagbeɖagbe mɔ̌hun xlɛ́ ǎ lɛ é jí é kpɔ́n ɔ, é nɔ lɛ́ kplɔ́n nǔ mǐ.—Ðɛh. 37:37; 1 Kɔ. 10:11.

11. Etɛ kpɔ́ndéwú nyanya Sawulu tɔn ka sixu kplɔ́n mǐ?

¹¹ Lin tamɛ dó nǔ e jɛ dó Axɔ́su Sawulu jí é jí. Ðò bǐbɛ̌mɛ ɔ, dɔnkpɛvu jlɛ̌jinɔtɔ́ ɖé wɛ n’i. É tuùn dogbó tɔn lɛ, bo tlɛ lɛ́ xò nǔ kpɔ́n dó gbeyiyi nú azɔ̌ ɖevo lɛ wu. (1 Sam. 9:21; 10:20-22) É ɖò mɔ̌ có, nukɔnmɛ ɔ, Sawulu wá huzu goyitɔ́. É huzu axɔ́su é ɔ, é lín ǎ bɔ é ɖè jijɔ nyanya mɔ̌hun xlɛ́. Ðò ninɔmɛ ɖé mɛ, hwenu e é ɖò te kpɔ́n wiwá gbeyiɖɔ Samuwɛli tɔn é ɔ, é ɖó suúlu ǎ. Sawulu ɖó na ko ɖeji ɖɔ Jehovah na wà nǔɖe dó togun  tɔn tamɛ, amɔ̌, é wà mɔ̌ ǎ, bo savɔ̌ e è nɔ dó zo é; é ka ɖó acɛ tɔn ǎ. Wǎgbɔ tɔn ɔ, Sawulu sín nǔ sɔ́ nyɔ́ Jehovah nukúnmɛ ǎ, b’ɛ ba axɔ́suzinkpo tɔn kpò ɖò nukɔnmɛ. (1 Sam. 13:8-14) Nǔnywɛnú wɛ é na nyí ɖɔ mǐ ni lin tamɛ dó kpɔ́ndéwú enɛ e gb’akpá nú mɛ é jí, bo nyi alɔ nú goyiyi.

12. Nɛ̌ Daniyɛli ka ɖexlɛ́ ɖɔ emi nɔ nɔ jlɛ̌ jí gbɔn?

¹² Lin tamɛ dó kpɔ́ndéwú gbeyiɖɔ Daniyɛli tɔn e gbɔn vo nú kpɔ́ndéwú nyanya Sawulu tɔn é jí. Ðò gbɛzán Daniyɛli tɔn bǐ mɛ ɔ, é nɔ sɔ́ éɖée hwe, bo nɔ ba alixlɛ́mɛ Jehovah tɔn hwebǐnu. Ði kpɔ́ndéwú ɔ, hwenu e Jehovah zán ɛ, bɔ é tinmɛ dlɔ̌ Nabukodonɔzɔ́ɔ tɔn é ɔ, é xɔ susu nú éɖée ǎ. É nyɔ́ wà ɔ, é nɔ jlɛ̌ jí, bo sɔ́ susu ɔ bǐ jó nú Jehovah. (Dan. 2:26-28) Etɛ enɛ ka kplɔ́n mǐ? Enyi xóɖiɖɔ mǐtɔn lɛ nɔ nyɔ́ sè nú nɔví lɛ, alǒ enyi mǐ ɖó nukɔnyiyi ɖó bǎ ɖé mɛ ɖò sinsɛnzɔ́ ɔ mɛ ɔ, mǐ ɖó na flín bo sɔ́ susu ɔ bǐ jó nú Jehovah. Mǐ ɖó na tuùn ɖɔ mǐ kún sixu kpé nǔ enɛ lɛ wu bo wà Jehovah mɛvo ó. (Fili. 4:13) Enyi mǐ ɖó linlin enɛ ɔ, kpɔ́ndéwú ɖagbe Jezu tɔn xwedó wɛ mǐ lɛ́ ɖè. Gbɔn nɛ̌ é?

13. Etɛ mǐ ka kplɔ́n dó jlɛ̌jininɔ wu ɖò xó Jezu tɔn e ɖò Jaan 5:19, 30 mɛ é mɛ?

¹³ Jezu nyí Vǐ maɖóblɔ̌ Mawu tɔn có, é ganjɛ Jehovah wu. (Xà Jaan 5:19, 30.) É tɛ́n kpɔ́n gbeɖé bo na xò acɛ yí sín Tɔ́ tɔn jixwé tɔn ɔ sí ǎ. Filipunu lɛ 2:6 ɖɔ nú mǐ ɖɔ Jezu kún ‘zé éɖée ɖó Mawu hǎ jí kpo hlɔnhlɔn kpo ó.’ Ðó Jezu nyí Vǐ e nɔ hwíhwɛ́ éɖée ɖó glɔ̌ nú Tɔ́ tɔn é wutu ɔ, é tuùn dogbó tɔn lɛ, bo nɔ lɛ́ ɖó sísí nú acɛ Tɔ́ tɔn tɔn.

14. Hwenu e è byɔ Jezu ɖɔ é ni wà nǔ zɛ acɛ e é ɖó é wu é ɔ, nɛ̌ é ka wà nǔ gbɔn?

¹⁴ Hwenu e Jaki kpo Jaan kpo gɔ́ nú nɔ yetɔn sɛkpɔ́ Jezu, bo byɔ ɛ wǔjɔmɛ e é ma ɖó acɛ tɔn bo na na ye ǎ é ɖé é ɔ, kpɔ́n lee Jezu wà nǔ gbɔn é. Jezu xò nǔ kpɔ́n ɖebǔ ǎ, é ɖɔ tlolo ɖɔ Tɔ́ emitɔn jixwé tɔn ɔ kɛɖɛ wɛ ɖó acɛ bo na ɖɔ mɛ e na nɔ ɖisíxwé kpo amyɔxwé kpo nú emi é. (Mat. 20:20-23) Jezu xlɛ́ ɖɔ emi tuùn dogbó emitɔn lɛ. É ɖò jlɛ̌ jí. É nɔ wà nǔ zɛ nǔ e Jehovah ɖegbe ɖɔ é ni wà é wu gbeɖé ǎ. (Jaan 12:49) Nɛ̌ mǐ ka sixu xwedó kpɔ́ndéwú ɖagbe Jezu tɔn gbɔn?

15-16. Nɛ̌ mǐ ka sixu xwedó wěɖexámɛ e ɖò 1 Kɔlɛntinu lɛ 4:6 mɛ é gbɔn?

 ¹⁵ Mǐ nɔ nɔ jlɛ̌ jí Jezu ɖɔhun gbɔn wěɖexámɛ Biblu tɔn e ɖò 1 Kɔlɛntinu lɛ 4:6 mɛ é xwixwedó gblamɛ. È ɖɔ nú mǐ ɖò finɛ ɖɔ: “Mi ma wà nǔ zɛ nǔ e è wlán é wu ó.” Enɛ wu ɔ, enyi mɛɖé byɔ mǐ ɖɔ mǐ ni ɖè wě xá emi ɔ, mǐ ɖó na sɔ́ linlin mǐɖesunɔ tɔn ɖ’ajo alǒ ɖɔ nǔ nukɔntɔn e wá ayi mɛ nú mǐ lɛ é kpowun gbeɖé ǎ. É nyɔ́ wà ɔ, wěɖexámɛ e ɖò Biblu kpo wema jinjɔn Biblu jí mǐtɔn lɛ kpo mɛ lɛ é jí wɛ mǐ ɖó na dɔn ayi mɛ ɔ tɔn wá. Enɛ na xlɛ́ ɖɔ mǐ tuùn dogbó mǐtɔn lɛ. Kpo jlɛ̌jininɔ kpo ɔ, mǐ nɔ xɔ susu nú “nǔ jlɔjlɔ” e Nǔbǐwukpétɔ́ ɔ nɔ wà lɛ é.—Nǔɖe. 15:3, 4.

¹⁶ Gɔ́ nú susu xixɔ nú Jehovah ɔ, mǐ lɛ́ ɖó hwɛjijɔ ɖagbe ɖevo lɛ, bo na ɖexlɛ́ ɖɔ mǐ nɔ nɔ jlɛ̌ jí. Lee mɛɖéesɔ́hwe kpo jlɛ̌jininɔ kpo sixu hɛn awǎjijɛ wá nú mǐ, bo lɛ́ d’alɔ mǐ bɔ mǐ na wà nǔ ɖó kpɔ́ xá mɛ ɖevo lɛ gbɔn é jí wɛ mǐ na ɖɔ xó dó dìn.

17. Etɛwu mɛ e nɔ sɔ́ yeɖée hwe, bo nɔ nɔ jlɛ̌ jí lɛ é ka nɔ ɖó awǎjijɛ?

¹⁷ Enyi mǐ nɔ sɔ́ mǐɖée hwe, bo nɔ nɔ jlɛ̌ jí ɔ, mǐ na ɖibla ɖó awǎjijɛ hugǎn. Etɛwu? Enyi mǐ tuùn dogbó mǐtɔn lɛ ɔ, alɔ e mɛ ɖevo lɛ nɔ dó mǐ lɛ é na nɔ sù nukún mǐtɔn mɛ bo na nɔ lɛ́ víví nú mǐ. Ði kpɔ́ndéwú ɔ, lin tamɛ dó nǔ e jɛ hwenu e Jezu gbɔ azɔn nú gudunɔ wǒ é jí. Mɛ ɖokpo jɛn lɛkɔ bo wá dókú nú Jezu ɖó azɔn baɖabaɖa e é gbɔ n’i é wu; nya ɔ ɖesunɔ sixu gbɔ azɔn enɛ nú éɖée gbeɖé ǎ. Alɔ e è dó nya mɛɖéesɔ́hwetɔ́ kpo jlɛ̌jinɔtɔ́ kpo enɛ é sù nukún tɔn mɛ, bɔ é kpa susu nú Mawu ɖó enɛ wu.—Luk. 17:11-19.

18. Nɛ̌ mɛɖéesɔ́hwe kpo jlɛ̌jininɔ kpo ka nɔ d’alɔ mǐ bɔ mǐ nɔ nɔ ayǐ xá mɛ ɖevo lɛ ganji gbɔn? (Hlɔmanu lɛ 12:10)

 ¹⁸ Mɛ e nɔ sɔ́ yeɖée hwe, bo nɔ nɔ jlɛ̌ jí lɛ é nɔ kpéwú bo nɔ nɔ ayǐ xá mɛ ɖevo lɛ ganji, bo na lɛ́ ɖibla ɖó xɔ́ntɔn vívɛ́ gegě. Aniwu? Kpo xomɛhunhun kpo wɛ ye nɔ yí gbè ɖɔ mɛ ɖevo lɛ ɖó jijɔ ɖagbe lɛ, bo nɔ lɛ́ ɖeji dó ye wu. Enyi è sɔ́ azɔ̌ ɖebǔ d’así nú mɛɖé bonu é wà azɔ̌ ɔ ganji ɔ, xomɛ nɔ hun mɛ e nɔ sɔ́ yeɖée hwe, bo nɔ nɔ jlɛ̌ jí lɛ é bɔ ye nɔ yawǔ kpa ye, bo nɔ lɛ́ wlí yɛ̌yi nú ye.—Xà Hlɔmanu lɛ 12:10.

19. Hwɛjijɔ tɛ lɛ wu mɔ̌ mǐ ka ɖó na nyi alɔ nú goyiyi?

¹⁹ Ðò alɔ ɖevo mɛ ɔ, é nɔ vɛwǔ nú goyitɔ́ lɛ bɔ ye na kpa mɛ ɖevo lɛ; ye nɔ ba ɖɔ mɛ ɖevo lɛ wɛ na kpa emi. Ye nɔ yawǔ sɔ́ yeɖée jlɛ́ dó mɛ ɖevo lɛ wu, bo nɔ sɔ́ linlin agbahwlɛnhwlɛn tɔn ɖ’ajo. Ye nɔ kplɔ́n azɔ̌ mɛ ɖevo lɛ bo nɔ sɔ́ azɔ̌ d’así nú ye ǎ, é nyɔ́ wà ɔ, ye nɔ ɖɔ, “Enyi è jló na wà azɔ̌ ɖé b’ɛ na nyɔ́ ganji lee è ba gbɔn é ɔ, mɛɖesu wɛ ɖó na wà.” Hwɛhwɛ ɔ, mɛ e nɔ yí gò é nɔ jló nǔ dingan, bo nɔ lɛ́ hwanwǔ. (Ga. 5:26) É yá bonu mɛ enɛ lɛ na ɖó xɔ́ntɔn e nɔ nɔ ayǐ sɔyi lɛ é ǎ. Enyi mǐ ɖ’ayi wu ɖɔ mǐ nɔ yí gò ɔ, mǐ ɖó na xoɖɛ sɛ́dó Jehovah dó nǔjɔnǔ mɛ ɖɔ é ni d’alɔ mǐ bonu mǐ na ‘huzu ayi mǐtɔn,’ enɛ ɔ, jijɔ nyanya enɛ na dó ɖɔ dò ɖò ayi mǐtɔn mɛ ǎ.—Hlɔ. 12:2.

20. Aniwu mǐ ka ɖó na nɔ sɔ́ mǐɖée hwe, bo nɔ jlɛ̌ jí?

²⁰ Jehovah sín kpɔ́ndéwú sù nukún mǐtɔn mɛ tawun! Lee é nɔ wà nǔ xá mɛsɛntɔ́ tɔn lɛ gbɔn é nɔ xlɛ́ ɖɔ é nɔ sɔ́ éɖée hwe, bɔ mǐ lɔ jló na nɔ wà nǔ gbɔn mɔ̌. Gɔ́ na ɔ, mǐ lɛ́ ba na xwedó kpɔ́ndéwú mɛ ɖěɖee sɛn Jehovah kpo mɛɖéesɔ́hwe kpo lɛ é tɔn. Mi nú mǐ ni nɔ sɔ́ susu kpo yɛ̌yi kpo e jɛxa Jehovah é n’i hwebǐnu. (Nǔɖe. 4:11) Enyi mǐ wà mɔ̌ ɔ, mǐ sixu huzu xɔ́ntɔn Jehovah tɔn kaka sɔyi, ɖó é yí wǎn nú mɛɖéesɔ́hwetɔ́ lɛ kpo jlɛ̌jinɔtɔ́ lɛ kpo.