Ehecha oĩva pype

Ehecha oĩva pype

ARTÍKULO OJESTUDIÁVA 32

Ñaneumíldekena jaservívo Jehovápe

Ñaneumíldekena jaservívo Jehovápe

‘Neumíldekena reguatávo Ñandejára ndive’ (MIQ. 6:8).

PURAHÉI 31 Jehová ykére epyta

¿MBAʼE REHEPA ÑAÑEʼẼTA? *

1. ¿Mbaʼe iporãitévapa David heʼi vaʼekue Jehováre?

¿AÑETEHÁPE piko ikatu jaʼe Jehováre iñumildeha? Ikatu. Peteĩ jey David heʼi vaʼekue: “Nde reipuru nde eskúdo cheprotehe ha chesalva hag̃ua. Neumílde rupi, nde chemombaʼe ha chembotuicha” (2 Sam. 22:36; Sal. 18:35). Heʼírõ guare koʼã mbaʼe, David oiméne imanduʼa raʼe proféta Samuel ohórõ guare itúa rógape, oiporavo hag̃ua pe rréi opytátavape Saúl rekovia. Jehová ohechauka iñumildeha, pórke oiporavo Davídpe Saúl rekoviarã. Hiʼarive David haʼe vaʼekue pe imitãvéva umi 8 Jesé raʼykuéra apytépe (1 Sam. 16:1, 10-13).

2. ¿Mbaʼépa jahecháta ko artíkulope?

David katuete ohechakuaáne raʼe siertoha pe Salmo 113 heʼíva Jehováre: ‘Iñumílde rupi, ojayvy omaña hag̃ua yvágare ha ko yvy ape ári. Haʼe omopuʼã umi iñumíldevape pe yvýgui, omopuʼã umi imboriahúvape ha omboguapy umi orekóva autorida apytépe’ (Sal. 113:6-8). Ko artíkulope jahecha raẽta mbaʼéicha javépa Jehová ohechauka vaʼekue iñumildeha, ha mbaʼépa ikatu ñaaprende iñehémplogui. Upéi jahecháta mbaʼéicha javépa ñarrekonose vaʼerã umi mbaʼe ndaikatúiva jajapo, ñaanalisávo rréi Saúl, proféta Daniel ha Jesús ehémplo.

¿MBAʼÉPA IKATU ÑAAPRENDE JEHOVÁ EHÉMPLOGUI?

3. ¿Mbaʼéichapa Jehová ñandetrata, ha mbaʼépa ohechauka upéva?

Jehová ohechauka iñumildeha otrata lájare yvyporakuéra imperféktope. Haʼe ndahaʼéi ku ohejánteva jaadora chupe, síno ñanderecha voi iñamígoramo (Sal. 25:14). Ikatu hag̃uáicha jaiko Jehová amígoramo, haʼe ojapo raẽ vaʼekue álgo ñanderehehápe: Omeʼẽ Itaʼýra sakrifísioramo oñeperdona hag̃ua ñandéve ñande pekádo. ¡Mbaʼeichaitépa Jehová ñanembyasy ha ñandeporiahuvereko!

4. ¿Mbaʼépa Jehová omeʼẽ ñandéve, ha mbaʼérepa?

4 ¿Mbaʼéichapa avei Jehová ohechauka iñumildeha? Haʼe ningo ñande Apohare, upévare ikatu kuri ñandeapo ikatuʼỹ hag̃uáicha jadesidi mbaʼépa jajapóta ñande rekovégui. Péro haʼe nañandeapói upéicha. Haʼe ñandeapo ijoguaháramo ha omeʼẽ ñandéve liverta jaiporavo hag̃ua mbaʼépa jajapóta. Umi mbaʼe jadesidíva iñimportanteterei Jehovápe g̃uarã. Ñanemichĩeterei ha ñanekangýramo jepe hovake, haʼe oipota ñandejeheguiete jadesidi jaservitaha chupe ñande pyʼaite guive, pórke jahayhu chupe ha jahechakuaa ou porãtaha ñandéve ñaneñeʼẽrendúramo chupe (Deut. 10:12; Is. 48:17, 18). ¡Ajépa jaagradesete Jehová péicha iñumílde haguére!

Jesús oĩ yvágape. Ijypýpe oĩ unos kuánto unhído ogovernátava hendive, ha omaña hína hikuái hetaiterei ánhel oĩvare henondepekuéra. Umi ánhel apytégui oĩ umi oúva ko yvy gotyo okumpli hag̃ua iñasignasión. Jehová omeʼẽ autorida entéro umi ojekuaávape ko taʼangápe (Ehecha párrafo 5)

5. ¿Mbaʼéichapa Jehová ñanemboʼe ñaneumílde hag̃ua? (Ehecha pe taʼanga oĩva ko rrevísta apére).

Ñandetrata lájare Jehová ñanemboʼe ñaneumílde vaʼerãha. Haʼe ningo pe persóna iñaranduvéva oĩva ko univérsope, upéicharõ jepe, vyʼápe haʼe oasepta oñemeʼẽ jave chupe peteĩ suherénsia. Por ehémplo, Jehová oheja vaʼekue Itaʼýra oipytyvõ chupe okreárõ guare opa mbaʼe (Prov. 8:27-30; Col. 1:15, 16). Ha Jehová haʼéramo jepe Todopoderóso, omeʼẽ autorida ótrope. Por ehémplo, oiporavo Jesúspe oiko hag̃ua chugui rréi pe Rréinope, ha omeʼẽta avei siérta autorida umi 144.000 yvypóra ogovernátavape Jesús ndive (Luc. 12:32). Jaikuaaháicha Jehová omboʼe ha ombokatupyry Jesúspe oiko hag̃ua chugui rréi ha súmo saserdóte (Heb. 5:8, 9). Haʼe omboʼe ha ombokatupyry avei umi ogovernátavape Jesús ndive okumpli hag̃ua hembiapo, péro upéi ndoikói okontrola entéro mbaʼe ojapóva hikuái iñasignasiónpe. Upéva rangue ojerovia hesekuéra okumplitaha ivolunta (Apoc. 5:10).

Ñande jasegi Jehová ehémplo ñameʼẽ jave ótrope entrenamiénto ha rresponsavilida (Ehecha párrafo 6 ha 7) *

6, 7. ¿Mbaʼéichapa ikatu osegi Jehová ehémplo umi omoakãva hogapy, ansianokuéra ha tuakuéra?

Ñande Ru yvagapegua ningo noikotevẽi avave oipytyvõ chupe, péro haʼe lomímonte omeʼẽ autorida ótrope, upéicharõ ñande koʼytevéntema jajapo vaʼerã upéicha. ¿Mbaʼéichapa ikatu osegi iñehémplo umi omoakãva hogapy ha umi ansiáno kongregasionpegua? Omeʼẽvo rresponsavilida ótrope, péro upéi ndoikóivo okontrolapase entéro mbaʼe. Resegíramo Jehová ehémplo, ojejapóta pe traváho, ha avei remboʼéta ha reipytyvõta ótrope ojeroviave hag̃ua ijehe (Is. 41:10). ¿Mbaʼépa ikatu oaprendeve Jehovágui umi oñemeʼẽ vaʼekuépe siérta autorida?

La Biblia ohechauka Jehová oikuaaseha mbaʼépa opensa umi ánhel (1 Rey. 22:19-22). Tuakuéra, ¿mbaʼéichapa ikatu pesegi Jehová ehémplo? Opyta porã jave, peporandu pene famíliape opensáva, heʼi hag̃ua mbaʼéichapa ikatu ojejapo peteĩ mbaʼe. Oiméramo oĩ porã upe heʼíva hikuái, ikatu pejapo upéicha.

8. ¿Mbaʼéichapa Jehová ohechauka vaʼekue ipasiensiaha Abrahán ha Sara rehe?

Jehová ningo ipasiénsia ha upéva ohechauka avei haʼe iñumildeha. Por ehémplo, Jehová ipasiénsia isiervokuéra noĩri jave de akuérdo, térã odudáramo peteĩ mbaʼe odesidi vaʼekuégui. Jehová ohendu Abrahánpe heʼírõ guare chupe haʼe opensaha noĩporãmoʼãiha ohundíramo Sodoma ha Gomorra (Gén. 18:22-33). Ñanemanduʼa vaʼerã avei mbaʼéichapa Jehová otrata vaʼekue Sárape, Abrahán rembirekópe. Haʼe ningo opuka vaʼekue Jehová oprometérõ guare haʼe hyeguasutaha ig̃uaig̃ui pyréma. Upéicharõ jepe, Jehová ndaipochýi ni noñeofendéi, síno ohechauka orrespetaha chupe (Gén. 18:10-14).

9. ¿Mbaʼépa ikatu avei oaprende umi túa ha ansianokuéra Jehová ehémplogui?

Peẽ túa ha ansianokuéra, ¿mbaʼépa ikatu peaprende Jehová ehémplogui? ¿Mbaʼépa pejapo jepi pene família térã peteĩ ermáno noĩriramo de akuérdo térã ndogustáiramo upe pedesidi vaʼekue? ¿Ensegídapa pekorrehíma voi chupekuéra, térãpa peñehaʼã pentende haʼekuéra opensáva? Añetehápe entéro família ha kongregasiónpe ou porãiterei umi orekóva autorida osegíramo Jehová ehémplo. Koʼa peve jahecháma mbaʼéichapa ikatu jahechauka ñaneumildeha jasegívo Jehová ehémplo. Koʼág̃a jahecháta umi ótro ehémplo oĩva la Bíbliape, jaikuaa hag̃ua mbaʼéicha javépa ñarrekonose vaʼerã umi mbaʼe ndaikatúiva jajapo.

¿MBAʼÉPA IKATU ÑAAPRENDE SAÚL, DANIEL HA JESÚS EHÉMPLOGUI?

10. ¿Mbaʼéichapa Jehová ñanemboʼe umi ehémplo oĩva rupive la Bíbliape?

10 Jehová ningo ñane “Mboʼehára Ijojahaʼỹva”, ha Iñeʼẽme haʼe oheja heta ehémplo ñanerekomboʼe hag̃ua (Is. 30:20, 21). Jajepyʼamongetávo umi istória oĩvare la Bíbliape, ikatu ñaaprende umi oreko vaʼekuégui umi kualida Ñandejára oguerohorýva, ha avei umi orrekonose vaʼekuégui umi mbaʼe ndaikatúiva ojapo. Avei ñaaprende mbaʼépa oiko umi persóna ndorekói vaʼekuére umichagua kualida (Sal. 37:37; 1 Cor. 10:11).

11. ¿Mbaʼépa ikatu ñaaprende pe ehémplo vai oheja vaʼekuégui Saúl?

11 Ñapensamína upe oiko vaʼekuére rréi Saúl rehe. Haʼe ningo imitãme orrekonose vaʼekue umi mbaʼe ndaikatúiva ojapo, upéicha rupi ndojagarraséi vaʼekue hetave rresponsavilida (1 Sam. 9:21; 10:20-22). Péro oiko riremínte chugui rréi, Saúl oñepyrũma oñemombaʼeguasu ha ojapo umi mbaʼe nokorrespondéiva chupe. Por ehémplo, peteĩ vuéltape haʼe naipasiensiavéima ohaʼarõ aja og̃uahẽ proféta Samuel. Ojerovia rangue Jehová odefendetaha ipuévlope, Saúl ojapo pe sakrifísio ojehapýva nokorrespondéiramo jepe chupe. Upéva káusare Saúl noĩporãvéima Jehová renondépe, ha tiémpo rire haʼe oipeʼa chugui pe goviérno (1 Sam. 13:8-14). Iporã ningo ñaaprende iñehémplogui ndovaleiha jajapo umi mbaʼe nokorrespondéiva ñandéve.

12. ¿Mbaʼérepa Daniel omoĩ vaʼekue peteĩ ehémplo iporãva?

12 Proféta Daniel idiferénte vaʼekue Saúlgui, ha oheja ñandéve peteĩ ehémplo porã. Oikove aja pukukue, Daniel iñumílde vaʼekue, orrekonose umi mbaʼe ndaikatúiva ojapo ha siémpre oheka Jehová gía. Por ehémplo, Jehová ojevalérõ guare hese omombeʼu hag̃ua Nabucodonosórpe mbaʼépa heʼise upe osoña vaʼekue, haʼe ndeʼíri ijeheguínte oexplika hague upe suéño. Upéva rangue, omombaʼeguasu Jehovápe ha orrekonose haʼe rupive ojapo hague upéva (Dan. 2:26-28). ¿Mbaʼépa ñaaprende upévagui? Oiméramo ermanokuérape ogustaiterei ñande diskursokuéra, térã jareko umi experiénsia iporã porãva predikasiónpe, ñanemanduʼa vaʼerã ñamombaʼeguasu hag̃ua Jehovápe ha ñarrekonose haʼe ñanepytyvõ rupínte ikatu hague jajapo umi mbaʼe (Filip. 4:13). Jajapo jave upéicha, jasegi avei hína Jesús ehémplo. ¿Mbaʼéichapa?

13. ¿Mbaʼépa ñaaprende Jesúsgui heʼiháicha Juan 5:19, 30?

13 Jesús haʼéramo jepe Ñandejára raʼy perfékto, haʼe ohechauka vaʼekue odependeha Jehováre (elee Juan 5:19, 30). Haʼe núnka noñehaʼãi vaʼekue oipeʼa Itúa yvagapeguágui ijautorida. Heʼiháicha Filipenses 2:6, Jesús ‘núnka nopensái vaʼekue oipeʼávo Ñandejáragui ilugár oñembojojávo hese’. Jesús oñemoĩ vaʼekue Itúa poguýpe, orrekonose umi mbaʼe ndaikatúiva ojapo ha orrespeta Itúa autorida.

Jesús oikuaa vaʼekue ijautorida orekoha límite ha orrespeta upéva (Ehecha párrafo 14)

14. ¿Mbaʼépa Jesús ojapo vaʼekue ojejerurérõ guare chupe peteĩ priviléhio haʼe ndorekóiva autorida omeʼẽ hag̃ua?

14 Epensamíntena mbaʼépa Jesús ojapo vaʼekue Santiago, Juan ha isy ojerurérõ guare chupe peteĩ priviléhio haʼe ndorekóiva autorida omeʼẽ hag̃ua. Upepete voi Jesús heʼi Itúa añoite orekoha autorida odesidi hag̃ua mávapa oguapýta iderécha térã ijiskiérdape pe Rréinope (Mat. 20:20-23). Jesús orrespeta ha orrekonose vaʼekue umi mbaʼe ndaikatúiva ojapo. Haʼe núnka ndojapóiva mbaʼeve Itúa nomandái vaʼekue chupe (Juan 12:49). ¿Mbaʼéichapa ikatu jasegi Jesús ehémplo porãite?

¿Mbaʼéichapa ikatu jasegi Jesús ehémplo ha ñarrekonose umi mbaʼe ndaikatúiva jajapo? (Ehecha párrafo 15 ha 16) *

15, 16. ¿Mbaʼéichapa ikatu jajapo pe oĩva 1 Corintios 4:6-pe?

15 Ñande jasegi Jesús ehémplo, jajapóvo pe jatopáva 1 Corintios 4:6-pe. Upépe heʼi: “Pejesegi vaʼerã Ñandejára Ñeʼẽ heʼívarente”. Upéicharõ, ojejerure jave ñandéve peteĩ konsého, ndajaikoséi jaovliga ótrope opensa hag̃ua ñande ñapensaháicha, ha ndajaʼeséi avei upe ou raẽvévante ñandéve ñane akãme. Upéva rangue, jaipuruse umi konsého oĩva la Bíbliape ha ñane puvlikasionkuérape. Péicha jahechaukáta ñarrekonoseha umi mbaʼe ndaikatúiva jajapo ha ñaneumíldeta, pórke jahechaukáta Jehová konsého siémpre iporãveha ñande jaʼévagui (Apoc. 15:3, 4).

16 Jahecha haguéicha, ñaneumílde ha ñarrekonose jave umi mbaʼe ndaikatúiva jajapo, ñambotuicha hína Jehovápe. Koʼág̃a jahecháta avei mbaʼéichapa koʼã kualida ñanepytyvõ javyʼa ha jajogueraha porã hag̃ua ótrondi.

¿MBAʼÉREPA IPORÃ ÑANEUMÍLDE HA ÑARREKONOSE UMI MBAʼE NDAIKATÚIVA JAJAPO?

17. ¿Mbaʼérepa ovyʼa umi iñumíldeva ha orrekonoséva umi mbaʼe ndaikatúiva ojapo?

17 Ñaneumílderamo ha ñarrekonose umi mbaʼe ndaikatúiva jajapo, javyʼavéta katuete. ¿Mbaʼérepa? Pórke jahechakuaa jave oĩha umi mbaʼe ndaikatúiva jajapo, jaagradese ha ñamombaʼéta oĩramo ñanepytyvõva. Por ehémplo, ñapensamína Jesús omonguerárõ guare umi 10 leprósope, peteĩva añoite ou jey Jesús rendápe oagradese hag̃ua omonguera haguére chupe upe mbaʼasy vaietégui. Ko kuimbaʼe iñumílde ha ohechakuaa ndaikatumoʼãiha kuri okuera Jesús noipytyvõirire chupe, upévare haʼe oagradese oñepytyvõ haguére chupe ha ombotuicha Ñandejárape upe haguére (Luc. 17:11-19).

18. ¿Mbaʼéichapa ñaneumílderamo ha ñarrekonose umi mbaʼe ndaikatúiva jajapo ñanepytyvõ jajogueraha porãve hag̃ua ótrondi? (Romanos 12:10).

18 Umi iñumíldeva ha orrekonoséva umi mbaʼe ndaikatúiva ojapo, ojogueraha porãve jepi hapichakuérandi ha ifasilve chupekuéra oreko hag̃ua umi amígo teete. ¿Mbaʼérepa? Pórke haʼekuéra vyʼápe orrekonose hapichakuéra orekoha umi kualida iporãva ha ohechauka ojeroviaha hesekuéra. Ovyʼa avei ótro ojapo porã jave umi asignasión oñemeʼẽva chupe, ha pyaʼe voi ofelisita ha omombaʼe chupe (elee Romanos 12:10).

19. ¿Mbaʼe mbaʼérepa ndovaléi ñandeorgullóso?

19 Péro umi ijorgullósovape ijetuʼu ofelisita hag̃ua hapichápe, haʼekuéra oipota ojeguerohory chupekuérante. Avei oñekompara jepi hikuái ótrore ha oikose ivalevévaramo hapichágui. Omboʼe ha omeʼẽ rangue ótrope rresponsavilida, pe ijorgullósova heʼi jepi: “Nde reipotáramo ojejapo porã álgo, ndete voi rejapo vaʼerã”. Umichagua persóna oñemoimportanteseve ótrogui ha iñenvidióso oĩramo ojapo porãvéva chugui álgo (Gál. 5:26). Haʼekuéra ndaikatúi jepi oreko heta tiémpore amígo tee. Upéicharõ, jahechakuaáramo ñañepyrũha ñandeorgullóso, ñañemboʼe vaʼerã Jehovápe ñande pyʼaite guive ha jajerure chupe tañanepytyvõ ‘ñakambia hag̃ua ñapensa lája’, péicha ndoikomoʼãi ñandehegui peteĩ persóna ijorgullósova (Rom. 12:2).

20. ¿Mbaʼérepa ñaneumílde ha ñarrekonose vaʼerã umi mbaʼe ndaikatúiva jajapo?

20 ¡Ajépa jaagradesete Jehovápe pe ehémplo porãite omeʼẽvare ñandéve! Jahechakuaa haʼe iñumildeha otrata lájare isiervokuérape, ha ñande jasegise iñehémplo. Avei jasegise umi ehémplo oĩva la Bíbliape, umi ohechakuaa vaʼekue umi mbaʼe ndaikatúiva ojapo, ha oreko vaʼekue pe priviléhio oguatávo Ñandejárandi. Siémprekena ñambotuicha Jehovápe, ha ñamombaʼeguasu chupe haʼe omereseháicha (Apoc. 4:11). Jajapóramo koʼã mbaʼe, ikatúta jaiko Jehová amígoramo pára siémpre, pórke haʼe ohayhu umi iñumíldevape ha orrekonosévape umi mbaʼe ndaikatúiva ojapo.

PURAHÉI 123 Ñañemoĩkena Jehová poguýpe

^ párr. 5 Pe iñumíldeva ombyasy ha oiporiahuvereko hapichápe. Upévare ikatu jaʼe Jehová iñumildeha. Ko artíkulope jahecháta mbaʼéichapa Jehová ehémplo ñanepytyvõ ñaneumildeve hag̃ua. Jahecháta avei rréi Saúl, proféta Daniel ha Jesús ehémplo jaikuaa hag̃ua mbaʼéicha javépa ñarrekonose vaʼerã umi mbaʼe ndaikatúiva jajapo.

^ párr. 58 JAHECHÁVA PE TAʼANGÁPE: Peteĩ ansiáno oñemotiémpo omeʼẽ hag̃ua entrenamiénto peteĩ ermáno imitãvape, oipurukuaa hag̃ua umi tarhéta de território kongregasionpegua. Upe rire pe ansiáno ndoikói okontrola entéro mbaʼe ojapóva pe ermáno imitãvéva, ha oheja chupe ojapo pe asignasión ijeheguieténte.

^ párr. 62 JAHECHÁVA PE TAʼANGÁPE: Peteĩ ermána oporandu peteĩ ansiánope oĩ porãtapa ohóramo kasamientohápe peteĩ tupaópe. Pe ansiáno ndeʼíri chupe mbaʼépa opensa, síno ohechauka chupe umi konsého oĩva la Bíbliape.