1. ¿Davidkwe dre niebare Jehová töi bobre yebätä?

¿ERAMETRE Jehová ye töi bobre ni raba niere? Jän, Jehová ye töi bobre ñobätä ñan aune Davidkwe niebare: “Escudo mäkwe ni mikakäre kwäre ye mätä bien tie, mä töi bobre ye tä ti mike ütiäte” (2 Sam. 22:36; Sal. 18:35). Davidkwe kukwe ne tikani ngwane Samuel janamane rün kwe känti rei gobrandi Israel yebiti ye diankakäre yebätä nämäne töbike raba ruin nie. David ye bäri chi etebatre kwe ye kräke akwa Jehovakwe dianinkä rabakäre reire Saúl ye täte (1 Sam. 16:1, 10-13).

2. ¿Nikwe ja tötikai drebätä kukwe ja tötikara nekänti?

² Salmista käkwe kukwe niebare ye erere David töi nämäne, salmista käkwe tikani: “Niara tä ja mikete kuintubu kä kwinta aune kä tibien mikakäre ñärärä, ni töi bobre tä dobro mününte ye gakrökäre. Ni bobre [...] ye niarata kainkä kwin mikakäre täke tibien nitre ütiäte ken” (Sal. 113:6-8). Jehová ye töi bobre ye bämikani kwe bä kabre aune ye tä dre driere nie ja töi kräke ye rabai gare nie kukwe ja tötikara nekänti. Biti ni ñaka raba kukwe jökrä nuainne tädre gare nie ye nitre ruäre käkwe bämikani ño yebätä nikwe töbikadre aune ye tä dre driere nie yebätä nibike ja tötike, ñodre rei Saúl, Daniel aune Jesús.

3. ¿Jehová tä ja töi mike ño ni kräke aune ye tä dre mike gare nie niarabätä?

³ ¿Jehová töi bobre ye tä bämike ño? Niara tä ja töi mike ño ni niara mikaka täte kräke yebiti tä bämike. Ñan tä jerekäbe ni tuenmetre ja mike täte, ñakare aune tä ni tuenmetre nemen ja ketamuko kwe arato (Sal. 25:14). Jehovakwe ja töi mikani Monso kwe juen ni kökatarikäre ye köböire ni raba ja kete ben. Ye kukwe ütiäte krubäte nuainbare kwe ni mikakäre tuin bobre jai.

4. ¿Jehovakwe ni sribebare ño aune ñobätä?

 ⁴ Kukwe mada tä bämike Jehová ye abokän töi bobre ye ani mike gare jai. Niara törbadre akräke ni sribedre kwe kukwe mikakäre täte aibe, akwa ñaka nuainbare kwe ye erere, ñakare aune ni sribebare kwe ja ngwankäre niara erere aune kukwe diankäre nuaindre jai. Ni abokän chi krubäte Jehová ken akwa niara tare nikwe aune niara kukwei mikadre täte ye kwin ni kräke yebätä nikwe mikadre täte ie niara tö (Deut. 10:12; Is. 48:17, 18). Jehová töi bobre yebätä nita debe bien krubäte.

5. ¿Ja töi mikata bobre ye Jehovata driere ño nie? (Üai kena täräkwatabätä mikadre ñärärä).

⁵ Nitre kä kwinbiti sribebare Jehovakwe kräke Jehovata ja töi mike ño yebiti töi bobre tä bämikata kwe. Niara ye bäri töbätä kä kwinbätä aune kä tibienbätä, akwa ni mada kukwe mikata ütiäte kwe jai. Ñodre Monso kwe tuanimetre kwe sribire jabe jondron jökrä ye sribekäre (Prov. 8:27-30; Col. 1:15, 16). Jehová ye bäri dite akwa tä nitre kädeke sribi ruäre nuainkäre. Ñodre Jesús ye kädekani kwe reire Gobran kwe yete. Aune nitre 144,000 gobrandi Jesube ye Jehovakwe kädekani kukwe ruäre nuainkäre (Luc. 12:32). Akwa niara ñaka tä nitre kädeke jerekäbe sribi kwe nuainkäre, ñakare aune tä tötike arato. Jesús ye tötikani kwe rabakäre reire aune sacerdote bäri kri (Heb. 5:8, 9). Arato nire nire käkwe gobrandi Monso kwebe ye tötikata kwe. Akwa sribi ye mikai kwe niaratre kisete ye bitikäre ñaka täi miketari ñärärä kwäräkwärä sribi nuaindi ño kwetre yebätä, ñakare aune niaratre käkwe niara töi mikai nemen bare yei tö ngwain kwe (Apoc. 5:10).

6, 7. ¿Nitre kwe sribi tärä ye raba ja ngwen ño ni Rün kä kwinbiti erere?

⁶ Ni Rün kä kwinbiti Jehová ñaka ja di ribere jai akwa tä sribi bien nuaindre ni madai, ni bärira jire käkwe nuaindre. Ñodre ni ji ngwanka mräkätre käne aune nitre umbre ji ngwanka  konkrekasionte, ¿rabadre ja ngwen ño Jehová erere? Rabadre sribi bien nuaindre ni madai. Aune sribi ye nuaindre ño ye ñaka tädre miketari ñärärä kwäräkwärä. Ye erere munkwe nuaindi ngwane sribi ye ñan aibe mikai nemen bare, ñakare aune munkwe nitre mada tötikai aune dimikai tö ngwen bäri (Is. 41:10). Nitre kwe sribi ruäre tä nuaindre, ¿ye raba dre mike gare bäri jai Jehovabätä?

⁷ Jehová tä angeletre kukwe mike ütiäte jai mikata gare Bibliabätä (1 Rey. 22:19-22). ¿Nitre rüne rabadre ja ngwen ño niara erere? Raba ngwane sribi ruäre nuaindre ño ye raba ngwentari monsotre kwe ie. Aune monsotre käkwe dre niedre ye nitre rüne raba kukwe ye ruäre kain ngäbiti.

8. ¿Jehovakwe Abrahán aune Sara ngübabare ño bätärekä?

⁸ Jehová tä ni ngübare bätärekä ye kukwe madabiti niara abokän töi bobre bämikata kwe. Ñodre Jehovata kukwe ükete ngwane ñobätä nuainta kore kwe ye ni niara mikaka täte tä ngwentari bökän ie ngwane niara tä ngübare bätärekä. Niarakwe ja töi mikani Sodoma aune Gomorra gainte ngwane ñobätä kukwe ye diani nuaindre kwe jai ye Abrahán namani ngwentari ie ngwane kukwe nuani kwe bätärekä (Gén. 18:22-33). Aune Sara Abrahán muko rabai murore mikani gare kwe ie ngwane kukwe ye namani nuäre Sara kräke ñobätä ñan aune namanina umbre yebätä, akwa Jehovakwe dre nuainbare ye nikwe ngwandre törö jai. Niara ñaka namani rubun, ñakare aune Sara mikani ütiäte kwe jai (Gén. 18:10-14).

9. Nitre rüne aune nitre umbre ji ngwanka konkrekasionte, ¿Jehovata kukwe kwin bämike yebätä dre raba nemen gare ja töi kräke munye?

⁹ Mä ni rüne o mä ni umbrere konkrekasionte, ¿Jehovata kukwe kwin bämike yebätä dre raba nemen gare ja töi kräke mäi? Töbike kukwe nebätä, mätä kukwe den nuaindre jai ye ñaka tä nemen kwin monsotre mäkwe kräke o ja mräkätre konkrekasionte ye kräke ngwane, ¿mätä dre nuainne? ¿Mätä mäträre bengwairebebätä? ¿O ñobätä tä töbike kore ye mätä mike nüke gare jai? Erametre nire nire tä kädekani mräkätre kwe aune konkrekasion jie ngwankäre ye tä ja ngwen Jehová erere ngwane tä nemen kwin krubäte nitre ye kräke. Jehová töi bobre ye tä dre driere nie ye nibira gare nie. Ni ñaka raba kukwe jökrä nuainne ye nitre mekera käkwe bämikani ño yebätä ani blite mada.

10. ¿Drebiti Jehovata kukwe driere ja töi kräke nie?

¹⁰ Jehová ye ni tötikaka bäri kri aisete kukwe kwe yebätä kukwe ruäre tikamana kwe ja töi kräke nie (Is. 30:20, 21). Ñodre, ni ñaka raba kukwe jökrä nuainne ye nämäne gare nitre ruäre Ngöbö mikaka täte mekera sete ie yebiti kä mikani juto kwe Ngöböbätä aune ruäre käkwe ñaka nuainbare ye köböite dre namani bare bätätre aune ye tä dre driere ja töi kräke nie yebätä ni rabadre töbiketari (Sal. 37:37; 1 Cor. 10:11).

11. ¿Saúl kukwe ñaka kwin bämikani ye tä dre driere ja töi kräke nie?

¹¹ Rei Saulbätä dre namani bare yebätä ani töbike. Saúl nämäne bati ngwane niara ñaka raba kukwe jökrä nuainne ye nämäne gare ie aune ja nämäne nemen ruin chi ie yebätä ñaka tö namani sribi bäri kri ye kain ngäbiti (1 Sam. 9:21; 10:20-22). Akwa kädekani reire ye bitikäre jatani bike kri. Kukwe meden ñaka raba nuainne ye nuainbare kwe. Bati nämäne Samuel ngübare ngwane Samuel ñaka namani nüke jötrö yebätä ñan ngübabare bätärekä kwe. Niara ñaka raba kukwe jökrä nuainne aune Jehovakwe juta kwe dimikadre yei tö ngwandre kwe, akwa ye erere ñaka nuainbare kwe, ñakare aune niara ñaka nämäne kädekani jondron kukwakäre Jehovai ye nuainbare kwe.  Ye köböite Jehovakwe ñaka kani ngäbiti mada aune ja känenkäre gobran dianinkä kän kwe (1 Sam. 13:8-14). ¿Kukwe meden raba nemen gare ja töi kräke nie? Kukwe meden ni ñaka raba nuainne ye nikwe ñaka nuaindre.

12. ¿Daniel kukwe meden kwin bämikani ni kräke?

¹² Ni Ngöbö kukwei niekä Daniel ñaka ja ngwani Saúl erere yebiti kukwe kwin bämikani kwe ni kräke. Daniel käre ja töi mikani bobre aune niara ñaka raba kukwe jökrä nuainne ye nämäne gare ie. Yebätä Jehovakwe jie ngwandre ye ribebare kwe ie. Ñodre, Nabucodonosor köböbare ngwane Ngöbökwe mikani kukwe ye mike gare Nabucodonosor ie. Daniel ñaka ja käikitaninkä, ñakare aune Ngöbö köböire kukwe ye mikani gare kwe yebätä Ngöbö käikitaninkä kwe (Dan. 2:26-28). ¿Kukwe ye tä dre driere nie? Ye tä mike gare nie nita kukwe kädriere ye tä nemen kwin ja mräkätre kräke o kukwe kwin tä nemen bare nie kukwe driebätä, ye ngwane nikwe Jehová aibe käikitadrekä. Jehová ñaka ni dimikadre akräke kukwe ye ñaka raba nemen bare nie ye nikwe ngwandre törö jai (Filip. 4:13). Nikwe ye erere nuaindi ngwane nikwe ja ngwain Jesukristo erere. Ñobätä nita ye niere ye ani mike gare jai.

13. ¿Kukwe tä tikani Juan 5:19, 30 ye tä dre driere nie Jesús yebätä?

¹³ Jesús ye Ngöbö Monsoi töi metre, akwa käre ja di käräbare kwe Jehovai (ñäkädre Juan 5:19, 30 yebätä). Ñaka ja töi mikani kwe nemen Rün kwe ye täte. Filipenses 2:6 (TNM) tä niere: “Ñaka ja töi mikani kwe nemen Ngöböre aune ja mike Ngöbö täte”. Jesús ñaka raba kukwe jökrä nuainne ye nämäne gare ie. Rün ye abokän bäri kri kräke yebätä nämäne mike ütiäte jai aune nämäne kukwei mike täte.

14. ¿Kukwe ñan nämäne gare Jesús ie ye käräbare ie ngwane dre nuainbare kwe?

¹⁴ Nitre ja tötikaka Jesukwe, Santiago aune Juan ye nikani meye ben Jesús känti aune Jesukwe niaratre mikadre täte iti ja kise ruinkri aune iti ja kise ngeberekri Gobran kwe yete ribebare kwetre ie. ¿Ye ngwane Jesukwe dre nuainbare? Jesús ñan namani töbike kukwe yebätä, ñakare aune bengwairebe niebare kwe kukwe ye nämäne gare Rün kä kwinbiti aibe ie (Mat. 20:20-23). Jehovakwe dre mikani nuaindre ie ye erere nuainbare kwe aune ñaka nikani kukwe yebiti ta, yebiti bämikani kwe niara ñaka raba kukwe jökrä nuainne (Juan 12:49). ¿Ni raba ja ngwen ño Jesús erere?

15, 16. ¿1 Corintios 4:6 ye ni raba mike ño täte?

 ¹⁵ 1 Corintios 4:6 ye nita mike täte ngwane nita ja ngwen Jesús erere. Texto ye tä niere: “Kukwe tä tikani Ngöbö Kukweibtä, ye aibe mikadre täte munkwe”. Yebätä, ni iti käkwe dre nuaindre tä ngwentari nie ngwane, kukwe ye tuin ño nie o dre nüke käne ni töite ye ñan ai nikwe niedre käne ie. Käre nikwe töbikadre kwin käne blitakäre aune Biblia bätä täräkwata tä dre niere kukwe yebätä, yebiti nikwe dimikadre. Ye erere nikwe nuaindi ngwane ni ñaka raba kukwe jökrä nuainne täi gare nie nikwe bämikai aune kukwe nieta Jehovakwe tä Bibliabätä ye abokän bäri kwin nita ja töi jeñe driere ye kräke (Apoc. 15:3, 4).

¹⁶ Nita ja töi mike bobre aune ni ñaka raba kukwe jökrä nuainne ye nita bämike ngwane nita Jehová käikitekä nibira gare nie. Ne madakäre, nikwe ja ngwandre ye erere ye tä ni dimike nüne kä jutobiti aune ja kete kwin ni madabe yebätä ani ja tötike mada.

17. ¿Ni töi bobre aune ni ñaka raba kukwe jökrä nuainne ye nita bämike ngwane ñobätä nita nüne kä jutobiti?

¹⁷ Ni töi bobre aune ni ñaka raba kukwe jökrä nuainne ye nita bämike ngwane nita nüne bäri kä jutobiti. ¿Ñobätä? Ñobätä ñan aune ni ñaka raba kukwe jökrä nuainne gare nie ngwane kukwe meden medenbätä ni dimikadre ye nikwe kai ngäbiti kä jutobiti. Jesukwe nitre ni jätä bren lepra kisete ye mikaninta räre yebätä ani töbike. Itibe käkwe debe biani ie. Ni ye töi bobre yebätä kaibe ñan raba nementa räre nämäne gare ie, aisete debe biani kwe aune Ngöbö käikitaninkä kwe (Luc. 17:11-19).

18. ¿Ja töi mikadre bobre aune ni ñaka raba kukwe jökrä nuainne tädre gare nie ye tä ni dimike ño ja kete kwin ni madabe? (Romanos 12:10).

¹⁸ Nitre töi bobre aune ñaka raba kukwe jökrä nuainne gare ietre ye bäri tä ja kete kwin nitre madabe. ¿Ñobätä? Ñobätä ñan aune ni  töi bobre ie gare nitre mada ye töi kwin keta kabre tärä arato aune tö ngwan raba kwe ietre. Ne madakäre ni madakwe kukwe kwin tä nemen sribibätä Jehová kräke ye ni töi bobre tä käi ngwen juto jabätä aune tä kwin niere ie (ñäkädre Romanos 12:10 yebätä).

19. ¿Ñobätä nikwe ñaka bikadre kri?

¹⁹ Akwa ni bike kri ye ñan töta nemen kwin niei ni madai, ñakare aune töta nemen nitre tuai kwin niere jai. Tätre nemen ja dikaire aune ja gain nitre madabe. Nitre bikaka kri ye ñan töta nemen ni mada tötikai aune sribi mikai kisete, ñobätä ñan aune niaratre aibe ie kukwe ye nuain gare tätre nemen nütüre. Ne madakäre, nitre bikaka kri ye töta nemen ja aibe tuai ütiäte aune tä nemen mokrere nitre mada tä sribi kwin nuainne yebätä (Gál. 5:26). Ruäre ngwane ja ketamuko tä kwen ietre akwa ye ñaka nuin raire. Ye medenbätä, nane ni kite bike kri nikwe gadre jabätä ngwane, Jehovakwe ni dimikadre ja töi kwite kukwe yebätä nikwe ribedre ie ne kwe kukwe käme ye ñaka rabadre neketekä nibätä (Rom. 12:2).

20. ¿Kukwe jökrä ñan gare nie aune nikwe ja töi mikadre bobre ye ñobätä ütiäte?

²⁰ Jehová tä ja töi mike ño ni niara mikaka täte kräke ye köböire tä nemen gare nie niara ye töi bobre yebätä nita debe bien aune ni töta nemen ja ngwain niara erere. Nitre mekera ie nämäne gare, niaratre ñaka raba kukwe jökrä nuainne ye köböire nänbare kwetre Ngöböbe ye erere ni tö ja ngwanbätä arato. Käre nikwe Jehová mikadre ütiäte jai aune käikitadrekä (Apoc. 4:11). Ye erere nikwe nuaindi ngwane nikwe nändi ni Rün kä kwinbiti tä ni töi bobre tarere yebe.