1. Bichi Daudi aliderhere oku bilolere obwirhohye bwa Yehova?

RHWAKADERHA oku Yehova aba mwirhohye si? Nechi kweri. Daudi aliderhere ntya: “Wampere empenzi y’okuyokola, n’obwirhohye bwawe bunanjira mukulu.” (2 Sa. 22:36; Zb. 18:35) Nkabaga Daudi aliri awaza oku lusiku omulebi Samweli ageraga emw’eshe n’okumuhira kw’amavurha yi nj’aba mwami we Izraeli. Daudi aliri murhabana wa munane omu barhabana b’eshe , aliko yi Yehova achishogaga y’aba mwami ahali h’Omwami Sauli.​—1 Sa. 16:1, 10-13.

2. Bichi rhwaganirira mu gunola mwazi?

² Daudi alikwanene kuyemera buzira ngangane eby’omwandisi w’Ezaburi aderhaga wayandikaga ntya eju ya Yehova: “Anayinama y’alola embingu n’egulu, anazusa omuntu w’ehali y’eshishi omu budaka. Anazusa omukene . . . y’amuyikaza haguma n’abantu bagwerhe ebyeo.” (Zb. 113:6-8) Mu gunola mwazi, rhwarhanga kubona masomo maguma m’akachiro rhwakayiga oku bilolere obwirhohye bwa Yehova omu kulola nka gurhe aliyerekene eyola ngeso. Rhwashuba kubona bichi omufano g’Omwami Sauli, omulebi Daniyeli na Yesu, gurhuyigirize oku biyerekere engeso y’olugero [kiasi].

3. Gurhe Yehova anarhukolera, na bichi biyerekene ntyo?

³ Yehova anayerekana oku ali mwirhohye kugerera okuntu anakolera abakozi bage barhashinganene. Arhafa chakuyemera obuharamye bwerhu konyine, s’ahubwe anashuba kurhubona nka bera bage. (Zb. 25:14) Yi bigalikana okugwarha obwira bukomere haguma na Yehova, yewe arhanga kurherekera Omugala  eju y’ebyaha byerhu. Orhabwene oku alirhuyerekere lukogo lunene n’okurhuyunvira obonjo si?

4. Buhuru buchi Yehova arhuhere, na bulagurhe?

⁴ Tala echindi chiyerekene oku Yehova ali mwirhohye. Bulala ye mulemi, nk’alonzaga akarhulemere buzira buhashe b’okuchishoga akalamo rhusimire kulama. Aliko arhajiraga ntyo. Arhulemere oku mufano gwage n’okurhuha obuhuru b’okuchishoga ebi rhwakola. Asimire rhube bantu bamukolera kurhenga oku murhima gwerhu bulala rhumuzigire, rhunamenyere enyungu rhwakapata nka rhumukengere. (Kum. 10:12; Isa. 48:17, 18) Rhugwerhe busime bunene okubona Yehova akav’aba mwirhohye ntyo!

5. Gurhe Yehova anarhuyigiriza okuba berhohye? (Olole efoto eli oku chiganda.)

⁵ Yehova arhuyigirize gurhe rhwakaba berhohye kugerera okuntu anarhukolera. Yehova ye Mukulu omu mahanga moshi. Chiro akaba ntyo, aba juba-juba kuyemera amawazo m’abandi. Omufano, aliyemerere Omugala amugwasa kulema ebintu byoshi. (Mez. 8:27-30; Kol. 1:15, 16) Na chiro akaba oku Yehova agwerhe misi minene, analekera abandi oburhambo. Omufano, ashimikire Yesu abe Mwami w’Obwami bwage, nj’Anaha bantu 144 000 obukulu yi barhambula haguma na Yesu. (Lu. 12:32) Okuderha okuli, Yehova akomeze (kuzoweza) Yesu y’aba Mwami na Mudahwa Mukulu. (Ebr. 5:8, 9) Anali akomeza aba nji barhegeka haguma na Yesu, aliko arhakabaha eyola ngabane n’okushuba kugenderera abalolereza gurhe bali bakola. Ahubwe, anihire oku nji baba eyi bali bajira obulonza bwage.​—Ufu. 5:10.

6-7. Okuntu Darha w’embingu anaha abandi akasi, bichi kurhuyigirize?

⁶ Bunola Darha w’embingu orhakalagirira chiro mpu habe owamurhabala analekera abandi akasi; lero si rhwabo, orhabwene oku rhukwanene kujira oko kon’okola chiro  na bwenene kulusha? Omufano, oli rhwe ly’omulala changwa mushamuka omu chibaga si? Oyige omufano gwa Yehova omu kulekera abandi akasi, orhanayinjaga wabalolereza gurhe bali bakola akola kasi. Amango wamayiga Yehova, arhali mpu wagendereza akasi bwinja konyine, s’ahubwe wakomeza n’abandi n’okubarhabala bajire amaja-mbere. (Isa. 41:10) Lindi somo lihe omufano gwa Yehova gwakayigiriza balala bayimangire abandi?

⁷ Ebiblia eyerekene gurhe Yehova anayemera amawazo m’ebilemwa byage by’embingu. (1 Fa. 22:19-22) Bazere we, nka gurhe mwakayiga omufano gwa Yehova? Akaba byakagalikana, obaze abana bawe gurhe bawazize kasi kalebe kakakolwa. N’akaba obwene oku ebi baderhere bikwirire, oyunve amawazo mabo.

8. Nka gurhe Yehova alikolere Abrahamu na Sara omu kulindira?

⁸ Okubona gurhe Yehova analindira, kushubire rhuyereka kangana gurhe aba mwirhohye. Omufano, Yehova analindira amango hamaba omukozi wage wamagangana n’obukenge eju y’eby’ashondere kukola. Aliyunvirize amango Abrahamu aganganaga eju y’omuhigo gwage g’okulimbula Esodoma ne Gomora. (Mwa. 18:22-33) Shuba oyibuke okuntu Yehova akoleraga Sara muka Abrahamu. Arhagayaga changwa mpu ayunve oburhe amango Sara ashekeraga echilagane chage ch’okuderha oku aheka obukule omu bushaja bwage. (Mwa. 18:10-14) Ahali h’okujira ntyo, Yehova akolera Sara oku bukenge.

9. Bichi omufano gwa Yehova gwakayigiriza abazere n’abashamuka?

⁹ Mwabo bazere nenyu bashamuka b’echibaga, bichi omufano gwa Yehova gubayigirize? Waza gurhe onakolera abantu oyimangire barhayemerere eby’ohigirire kukola. Onayurukira wahamiriza omuhigo gwawe si? Changwa si, onachihangana kuyunviriza amawazo mabo? Kweri, abantu omu mulala n’omu bibaga bakayunguka amango balala babayumangire bali bakulikira omufano gwa Yehova. Kugera hanola, rhwaganirire eju y’eby’omufano gwa Yehova gwakarhuyigiriza oku bilolere obwirhohye. Rhukala kuja rhwabona ebi engani zili omu Chinwa cha Mungu zakarhuyigiriza oku bilolere olugero.

10. Gurhe Yehova anakolesa emifano y’abandi omu kurhuyigiriza?

¹⁰ Yewe nka “Mwigiriza werhu Mukulu,” Yehova arhuyerekere omufano omu Chinwa chage y’arhuyigiriza. (Isa. 30:20, 21) Rhwakayiga esomo amango rhuli rhwawaza oku ngani ze Biblia ziderhere eju ya balala baliyerekene engeso zinja, kuheba han’olugero. Rhunashuba kuyiga esomo amango rhwamawaza oku byahikiraga balala bagambwaga kuyerekana ezola ngeso zinja.​—Zb. 37:37; 1 Ko. 10:11.

11. Bichi omufano gubi gwa Sauli gwakarhuyigiriza?

¹¹ Waza oku byahikiraga Omwami Sauli. Oburhanzi aliri murhabana ogwerhe obwirhohye. Alimenyere oku hali eby’akakolere n’eby’arhakakolere analigwerhe engangane y’okuyumangira makasi manene. (1 Sa. 9:21; 10:20-22) Aliko, hayinja gera amango Sauli aba byahuba. Arhonderaga kujira ntyo oku anamala kuba mwami ntya. Lusiku luguma, ahuba omu bisanzi aliri alinga omulebi Samweli. Ahali h’okugwarha olugero n’okulangalira Yehova alwire abantu bage, Sauli achirhumiriza okuhana enterekero y’okusirezwa n’obola arhaligwerhe oruhusa l’okujira ntyo. Echola charhuma Yehova amugaya, analuha aheza obwami bwage. (1 Sa. 13:8-14) Rhwakagwarha obwengehe nka rhuyigire esomo kugerera ogola mufano gurhuhanwire n’okuleka engeso y’okuhuba-huba.

12. Nka gurhe Daniyeli aliyerekene olugero?

¹² Rhwamamala shambala oku mufano gubi gwa Sauli, rhujage rhwaganira oku mufano  gwinja g’omulebi Daniyeli. Omu kalamo kage koshi, Daniyeli aligenderere kuba mukozi wa Mungu oli mwirhohye onagwerhe olugero, analigenderere kulangalira amango moshi Yehova amuyerekeze. Omufano, Amango Yehova akolesaga Daniyeli omu kuhugulira Nebukadneza ebilorho byage, arhachishingaga mpu ajirire ntyo oku buhashe bwage yenyine. Ahali h’okujira ntyo, olugero lwarhuma aha Yehova obukuze boshi. (Da. 2:26-28) Bichi ebyola birhuyigirize? Nka bene-berhu basimire okuntu rhwagezeze ejambo changwa akaba rhunapata amalehe menja omu kasi k’okuhubiri, rhukwanene kuyibuka okuha Yehova obukuze. Olugero lukwanene lurhushunike kuyibuka oku rhurhakagala kukola ebyola byoshi buzira burhabale bwa Yehova. (Flp. 4:13) Nka rhujirire ntyo, rhwanaba eyi rhuli rhwayiga omufano gwinja gwa Yesu. Nka gurhe si?

13. Bichi ebinwa bya Yesu bili omu Yohana 5:19, 30 birhuyigirize oku bilolere olugero?

¹³ Chiro akaba oku Yesu aliri Mugala mushinganyanya wa Mungu, alilekere akalamo kage omu fune za Yehova. (Osome Yohana 5:19, 30.) Arhapimaga chiro n’eliguma anyakura obukulu bw’Eshe w’embingu. Wafilipi 2:6 erhubwirire oku Yesu “arhachigeraga kuwaza mpu aje ahali ha Mungu, k’okuderha mpu abe kuguma na Mungu.” Bulala Yesu aliri Mugala w’obukenge, alimenyere oku hali eby’alikwanene kujira n’eby’arhalikwanene kujira, analiri akenga obukulu bw’Eshe w’embingu.

14. Gurhe Yesu alijirire amango bamubwiraga ajire echintu arhagwerhe obuhashe b’okukola?

¹⁴ Waza gurhe Yesu alijirire amango entumwa Yakobo na Yowane haguma na nyina wabo bamuyegeraga n’okuhema Yesu echintu arhaliherhe buhashe b’okuhana. Buzira ngangane, Yesu aderha oku Eshe w’embingu yenyine ye kwanene aderhe nde okwanene ayikale ekulyo changwa ekulembe kwa Yesu omu Bwami bwage. (Mt. 20:20-23) Yesu aliyerekene oku alikengere emipaka yage. Aligwerhe olugero. Nta lusiku achirhumirize kujira ebi Yehova arhamubwiraga akole. (Yoh. 12:49) Nka gurhe rhwakayiga ogola mufano gwinja gwa Yesu?

15-16. Gurhe rhwakakolesa ehano lye Biblia lili omu 1 Wakorinto 4:6?

¹⁵ Rhunayiga omufano gwa Yesu g’olugero, omu kukolesa ehano lye Biblia lili omu 1 Wakorinto 4:6. Hanola Ebiblia erhubwirire ntya: “Mumenye mwakachubuka ebiyandikirwe.” Bobola amango abandi bamarhuhema ehano, rhurhashondere chiro n’ehityu  kuheba amawazo merhu embere changwa mpu rhuyurukire rhwaderha ebyarhugwire omu bwenge bwerhu. S’ahubwe, rhukwanene rhushonde amahano Ebiblia erhuhere haguma n’ebitabu byerhu biyumangire oku Biblia. Nka rhujirire ntyo, rhwayerekana oku rhumenyere emipaka yerhu. Olugero lwarhushunika rhukuze “amarhegeko m’okuli” m’Ogala byoshi.​—Ufu. 15:3, 4.

¹⁶ Olekere okukuza Yehova konyine, rhugwerhe ezindi mpanvu zinja z’okuyerekana olugero. Rhujage rhwalola nka gurhe obwirhohye n’olugero byakarhulerhera obusime n’okurhurhabala rhuyunvikane n’abandi.

17. Bulagurhe abantu berhohye banagwerhe olugero, bagwerhe obusime?

¹⁷ Nka rhuli berhohye rhunagwerhe olugero, rhwakagwarha obusime. Bulagurhe ntyo? Amango rhumenyere oku hali ebi rhwakakola n’ebi rhurhakakola, rhwagwarha eshukurani n’obusime ku buli burhabale abandi banarhuha. Omufano, waza oku byabaga amango Yesu afumyaga babenzi-benzi 10. Muguma yenyine waligalukire kusima Yesu okubona gurhe amufumizye obola bulwalala bukomere; k’okuderha oku chali chijiro chirhakajirirwe chiro n’omuntu muguma oku misi yage yenyine. Oyola mulume mwirhohye onagwerhe olugero, aligwerhe eshukurani oku burhabale ahabwaga, analikuzize Mungu kw’echola chijiro.​—Lu. 17:11-19.

18. Gurhe obwirhohye n’olugero binarhurhabala okuyunvikana n’abandi? (Waroma 12:10)

¹⁸ Abantu berhohye banagwerhe olugero, banayunvikana n’abandi juba-juba, binaba bibayorohere okugwarha abera benja. Bulagurhe? Baba juba-juba kumenya oku abandi bantu nabo bagwerhe engeso zinja n’okuyerekana oku babanihire. Abali berhohye banagwerhe olugero, banasima amango abandi bamagwarha  amalehe menja mu buli ngabane yoshi-yoshi bahabirhwe, banali juba-juba oku babwira koko oku bibajirire n’okuyerekana oku babakengere.​—Osome Waroma 12:10.

19. Mpanvu zihe ziguma zirhumire rhukwanene kulekana n’echiburi?

¹⁹ Aliko abantu b’omwibone barhabwira abandi koko oku bibajirire, barhakabaga akaba bonyine babahabwage ba koko. Banazigana kuchihuzanya n’abandi n’okuyerekana omurhima g’obuchi-lwira. Ahali h’okukomeza abandi n’okubaha amakasi bakola, banaba nka bali baderha oku, “akaba oshondere chintu chilebe chijirike bwinja,” k’okuderha omu njira ebasimisize; “okwanene ochikole wenyine.” Omuntu w’omwibone azigana kusima obukulu, anaba wa bongwa. (Gal. 5:26) Abantu bali nk’abola, barhayurukira kupata abera. Nka rhubwene oku rhuherhe echibazo ch’echiburi, rhukwanene kusalira Yehova n’obushiru arhurhabale ‘rhujire buhyahya obwenge bwerhu,’ che chirhumire rhuchihangane eyola ngeso mbi emenye yakakula omu mirhima yerhu.​—Ro. 12:2.

20. Bulagurhe rhukwanene kuba berhohye rhunagwarhe olugero?

²⁰ Berhu we, rhugwerhe shukurani nene eju y’omufano gwa Yehova! Rhunabona obwirhohye bwage kugerera okuntu anakolera abakozi bage, rhunalonzeze rhumuyige. Kandi, rhulonzeze kuyiga emifano minja eli omu Biblia y’abantu berhohye baligwerhe olukengo l’okulambagira haguma na Mungu. Rhukwanene buli mango kuha Yehova obukenge n’obukuze akwanene. (Ufu. 4:11) Ahola nerhu rhwayemerwa oku rhwakalambagira haguma na Darha w’embingu, osima abantu berhohye banagwerhe olugero.