1. David wa tja vi ohunga nomurisusuparisiro wa Jehova?

HAPO eṱe tjiri matu yenene okutja Jehova omurisusuparise? Ii matu yenene okutja nao. David wa tja: “NOve ue ndji pe oruvao ruombatero joje, . . . nomutim’ omure uoje ue ndji jarurire kounene.” (2 Sam. 22:36; Eps. 18: 36, EEP) Indu David tja tjanga omambo nga, mape ya aa zemburuka oruveze omuprofete Samuel tje ya konganda ya ihe okuyekutwirisa ingwi ngu ma rire ombara yOvaisrael moruyaveze. David ongwa ri omuṱiṱi movanatje ovazandu hambondatu va ihe, posi yokutja eye ongwa toororwa i Jehova okupingena Ombara Saul.—1 Sam. 16:1, 10-13.

2. Matu ke rihonga tjike morupa ndwi?

² David aai kumwe nomambo nga hungirwa i yomutjange wEpsalme ohunga na Jehova, nga tja: ‘Eye u tara pehi na munu eyuru nehi, u yera omusyona okumuisa mo moruuma, nu u yeura omuhepe . . . kutja e mu haamise puna ovaingona.’ (Eps. 113:6-8) Morupa ndwi matu katara komapu tjiva omananḓengu ohunga nomerisusuparisiro nu atu kahungirira komuano Jehova ma raisa otjikaṋena ho. Nu wina matu ke rihonga ovingi ohunga nomerisusuparisiro okuza kotjihorera tjOmbara Saul, omuprofete Daniel na Jesus.

3. Jehova u tu tjinda momuano uṋe, nu iho tji raisa ye?

³ Omuano Jehova me tjinda ovandu mbe he ri ohomonena nu mbe mu karera ku raisa kutja eye omurisusuparise. Eye ka yakura omerikotameneno wetu uriri, nungwari wina u tu vara  otjomapanga we. (Eps. 25:14) Jehova wa yandja Omuna we otjotjisuta tjonguturiro komauvi wetu, kokutja tu yenene okurira omapanga we. Tjiri Jehova we tu raisira otjari.

4. Jehova we tupa tjike, nu omena raye?

⁴ Ripura nomuano warwe Jehova maa raisa omerisusuparisiro. Otja ngwa uta oviṋa avihe, Jehova a tje tuungura momuano wokuhinoritoororera oveni kutja matu vanga okuhupa vi. Posi yokutja eye ka tjitire nao. Eye we tu uta kosaneno ye nu e tupe ouyara wokuritoororera oveni. Ozondando nḓu matu tjiti ozonanḓengu ku Jehova, nandarire kutja oweṱe ovehinonḓengu tji matu risasaneke kuna ye. Eye u vanga kutja tu mu karere okuza komutima mena rokutja twe mu suvera nu tu tjiwa kutja okukara nonḓuviro ku ye ma ku tu yetere ouwa. (Deut. 10:12; Jes. 48:17, 18) Eṱe tjiri tu nondangi tjinene komerisusuparisiro wa Jehova.

5. Omomuano uṋe Jehova me tu honga omerisusuparisiro? (Tara kotjiperendero tjokombanda yokambo nga.)

⁵ Omuano Jehova me tu tjinda u tu honga omerisusuparisiro. Jehova ongu ri omundu onongo mevaverwa arihe. Nandarire nao, eye u nonḓero okuyakura ondunge yomundu auhe. Otjotjihorera, Jehova wa yandjera Omuna we okumuvatera indu tja mema oviṋa avihe. (Omiano 8:27-30; Kol. 1:15, 16) Nandarire kutja Jehova omunamasaaehe eye u yenena okuyandja omerizirira tjiva ku varwe. Otjotjihorera, Eye wa zika Jesus otjOmbara yOuhona we, nu ma kayandja ouvara tjiva kovandu 144 000 mbu mave ka honapara puna Jesus. (Luk. 12:32) Otjiperi kutja, Jehova wa honga Jesus okurira Ombara nOmupristeri Otjiuru. (Hebr. 5:8, 9) Eye wina u honga imba mbu mave kahonapara puna Jesus, okuyenenisa otjiungura tjawo posi yokutja eye ka kara kombanda yawo tji mave  ungura. Nungwari, u kara nongamburiro yokutja mave tjiti ombango ye.—Omavan. 5:10.

6-7. Matu rihongo tjike okuza ku Tate wetu womeyuru ohunga nokuyandja oviungura ku varwe?

⁶ Tjinangara Tate wetu womeyuru ngu ha hepa ombatero okuza kovandu, u yandja oviungura ku varwe, okutja ounahepero tjinene kweṱe okutjita nao. Hapo oove otjiuru tjeṱunḓu poo omunene wombongo? Horera ku Jehova mokuyandja oviungura ku varwe, nu okara kombanda yawo tji mave ungura. Indu tji wa tjiti nao, u vatera varwe okuungura oviungura nawa, nu wina u ve honga nokuvevatere okukara nongamburiro mu wo oveni. (Jes. 41:10) Otjikwaye tjarwe ovandu mbe hongorera po varwe tji mave yenene okurihongera ku Jehova?

⁷ Ombeibela i raisa kutja Jehova u puratena koumune wovaengeli ve. (1 Ozomb. 22:19-22) Ovanene mave horere vi ku Jehova? Indu tje ri ohepero pura ovanatje woye kutja otjiungura tjorive matji sokuungurwa vi. Nu ondunge ndji va yandja tji i ri ombwa, nga rire ndji wa ungurisa.

8. Jehova wa raisa vi omuretima ku Abraham na Sara?

⁸ Omuano warwe Jehova me raisa omerisusuparisiro omokukara nomuretima. Otjotjihorera, Jehova u kara nomuretima indu imba mbe mu karera tji mave pura ondyero ye momuano wondengero. Jehova wa puratena ku Abraham indu tje ha ri nohange nondyero ye yokunyona Sodom na Gomora. (Gen. 18:22-33) Nu zemburuka omuano Jehova ma tjinda Sara, omukazendu wa Abraham. Indu eye tja kwizika kutja Sara ma panduka moukurundu we, Sara wa yora nungwari Jehova ka pindikire. (Gen. 18:10-14) Posi yokutja eye wa tjinda Sara nondengero.

9. Ovanene, novanene wombongo mave rihongere ko tjike ku Jehova?

⁹ Ovanene, novanene wombongo mave rihongere ko tjike ku Jehova? Hapo ove u tjita vi indu ovanatje woye poo ovandu tjiva mombongo tji ve hi nokuyakura ondyero yoye? Hapo ove u hakahana okuveraera kutja va zunḓa? Poo u kondja okupuratena koumune wawo? Omaṱunḓu novandu mombongo ve ri ra ovaṋingandu tjiri, indu imba mbe ri mounane tji mave horere ku Jehova. Nai, twa hungirire ku imbi mbi matu yenene okurihonga ohunga nomerisusuparisiro wa Jehova. Nambano matu tara kutja matu rihongo tjike okuza kovihorera mbi ri mOmbeibela ohunga nomerisusuparisiro.

10. Jehova u ungurisa vi ovihorera vyovandu varwe okutuhonga?

¹⁰ Otja ‘Omuhonge’ omunene, Jehova u tupa ovihorera mEmbo re okutuhonga. (Jes. 30:20, 21) Eṱe tu rihonga okuza momahungi wOmbeibela ohunga novandu mbaave raisa ovikaṋena mbyaavi tjata ku Mukuru, tjimuna omerisusuparisiro. Nu wina tu rihonga kutja pa tjitwa tjike ku imba mbe hina va raisa ovikaṋena oviwa mbyo.—Eps. 37:37; 1 Kor. 10:11.

11. Matu rihongere ko tjike kotjihorera otjivi tja Saul?

¹¹ Ripura na imbi mbya tjitwa kOmbara Saul. Eye wa ri omurumendu omutanda omurisusuparise. Eye aa tjiwa kutja ma sokuyandera pi nu nandarire wa keyakeya okuyakura omerizirira omengi. (1 Sam. 9:21; 10:20-22) Posi yokutja, Saul kombunda wa uta okuritongamisa. Eye wa uta okuraisa ongaro ndjo ousupi kombunda ya indu tja ri ra ombara. Otjikando tjimwe, eye ka raisire omuretima indu tjaa sokuundja omuprofete Samuel. Pendje nokuundja ku Jehova okuhongorera po ovandu ve, Saul wa tjita ombunguhiro nandarire kutja kaari nousemba okuitjita.  Nu mena ranao, eye wa pandjara oupanga we kuna Jehova nu korusenina wa pandjara ouvara we otjombara. (1 Sam. 13:8-14) Ma rire nawa kweṱe tji twe rihongere kovihorera mbyo nu atu ha tjiti otjiṋa tji tu hi nousemba na tjo.

12. Daniel wa raisa vi omerisusuparisiro?

¹² Tara kotjihorera otjiwa tjomuprofete Daniel, ngwa pangukire ku Saul. Oure womuinyo we, Daniel wa ri omurisusuparise ngwaa tjiwa poṋa paa sokuyandera nu aruhe aa ṱaṱere ku Jehova okumuhongorera po. Otjotjihorera, indu Daniel tja ungurisiwa i Jehova okumangurura oruroto rwa Nebukadnesar, eye wa raisa kutja Mukuru ongwe mu pe omasa wokumangurura oruroto ndwo. Nu wina ondjozikiro aihe wa yandja ku Jehova. (Dan. 2:26-28) Matu rihongo tjike ku imbyo? Indu ovakambure ovakwetu tji va suvera okupuratena komahungi wetu poo komuano omuwa mbu tu ungura motjiungura tjokuzuvarisa, matu sokuzemburuka kutja ondjozikiro aihe mai sokuyenda ku Jehova. Eṱe matu sokuyakura kutja kamaatu yenene okuyenenisa avihe mbyo nokuhina ombatero ya Jehova. (Fil. 4:13) Tji twa tjiti nao, wina matu horere kotjihorera otjiwa tja Jesus. Omomuano uṋe?

13. Omambo wa Jesus nge ri mu Johanes 5:19, 30, maye tu hongo tjike ohunga nomerisusuparisiro?

¹³ Nandarire kutja Jesus wa ri Omuna wa Mukuru, eye aa ṱaṱere ku Jehova. (Lesa Johanes 5:19, 30.) Eye kena pa rora okurarakana ouvara wa Ihe womeyuru. Ovafilipi 2:6 ri tja, Jesus “ka panḓerere pokuripura kutja u ṱeki pu Ndjambi.” Jesus aa tjiwa pu ma sokuyandera nu wa ri nondengero kouvara wa Ihe, otjomuatje omurisusuparise.

14. Jesus wa raisa ongaro iṋe, indu tja ningirwa okutjita otjiṋa tje ha ri nousemba natjo?

¹⁴ Tara ku imbi Jesus mbya hungira indu ovahongewa ve Jakobus na Johanes, mba ri puna ina tji ve ya ku ye okumuningira otjiṋa tje hi nouvara natjo. Nokuhinomakeyakeyero Jesus wa tja, Ihe meyuru ongu ma yenene okutya kutja ouṋe ngu ma haama kokunene na kokumuho kwe mOuhona we. (Mat. 20:20-23) Jesus wa raisa kutja aa tjiwa poṋa pu ma sokuyandera nu wa ri omurisusuparise. Eye kaa tjiti otjiṋa Jehova tje he mu pere ousemba okutjita. (Joh. 12:49) Matu horere vi kotjihorera otjiwa tja Jesus?

15-16. Matu ṱakamisa vi erakiza ndi ri 1 Ovakorinte 4:6?

 ¹⁵ Indu tji matu ṱakamisa erakiza ndi ri 1 Ovakorinte 4:6, tu horera komerisusuparisiro wa Jesus. Oro ri tja: “Amu katuka ko omaraerero Ndjambi nga zikamisa!” Kunao indu tji twa purwa okuyandja ondunge, eṱe katu sokuṋiṋikiza varwe okuyakura ondunge yetu poo okuhungira nokuhina okuripura ohunga nepu kaaṋi ndo. Nungwari, ondunge ndji matu yandja mai sokuzikamena komirari vyOmbeibela na komambo wetu nga zikamena kOmbeibela. Indu tji matu tjiti nao, tu raisa kutja eṱe katu tjiwa oviṋa avihe. Nu wina tu raisa kutja ‘ozondjito za Mukuru ozosemba,’ eye tjinga e ri Omunamasaaehe.—Omavan. 15:3, 4.

¹⁶ Pe nomapu warwe omawa nge tjita kutja tu rire overisusuparise. Nai matu katara komuano omerisusuparisiro mu ye tupa ondjoroka nokutuvatera kutja tu kare nomaunguriro omawa kuna varwe.

17. Ongwaye ovandu overisusuparise tji ve kara nondjoroka?

¹⁷ Eṱe mape ya atu kara nondjoroka indu tji tu ri ovandu overisusuparise. Ongwaye tji matu tja nao? Mena rokutja tji twa yakura kutja pe noviṋa tjiva mbi tu hi nokuyenena okutjita, tu raisa ondangi kombatero varwe ndji mave tupe. Otjotjihorera, ripura na indu Jesus tja verukisa ovandu omurongo mba verere omutjise wongana. Umwe wawo uriri ongwa kotoka ku Jesus, okuyekuraisa ondangi yokuverurwa komutjise mbwa ri omuzeu ku ye okuripanga omuini. Omurumendu omurisusuparise ngwo wa ri nondangi kombatero ndja muna nu wa hivirika Mukuru.—Luk. 17:11-19.

18. Omomuano uṋe omerisusuparisiro mu ye tu vatera okukara nomaunguriro omawa kuna varwe? (Ovaroma 12:10)

¹⁸ Ovandu overisusuparise nu mbe tjiwa kutja  kamaave yenene okuungura avihe, ve kara nomaunguriro wa pamwe omawa nokutunga oupanga ouwa kuna varwe. Omena ratjike? Owo ve yakura kutja ovandu varwe ve novikaṋena oviwa nu ve raisa ongamburiro mu wo. Ovandu overisusuparise ve kara nondjoroka indu varwe tji va toṋa moviungura kaaṋi mbi va pewa nu ve hakahana okuvetanga.—Lesa Ovaroma 12:10.

19. Ongwaye tji matu sokunakaura omeritongamisiro?

¹⁹ Ovandu overitongamise ve kara nouzeu okutanga varwe, nu ve vanga kutja owo a rire mba tangwa. Owo potuingi ve risasaneka kuna varwe nu ve kondja okurira ovasemba pu wo. Omundu omuritongamise potuingi u ripura kutja ma sokuungura oviṋa avihe omuini mena rokutja u muna kutja varwe kamaave ungura nawa. Eye potuingi u vanga okurira omunanḓengu tjinene pu varwe nu u ṱeruru omundu warwe tja ungura otjiṋa nawa pu ye. (Gal. 5:26) Ovandu otja imbo potuingi kave kara noupanga oukarerere. Indu tji twa munu kutja oweṱe overitongamise, matu sokukumba ku Jehova kutja metu “yarure koupe mourekoto womitima” vyetu, kokutja atu ha kara notjikaṋena otjivi ho.—Rom. 12:2.

20. Ongwaye tji matu sokurira overisusuparise?

²⁰ Eṱe tjiri tu nondangi kutja Jehova otjihorera otjiwa kweṱe. Eṱe tu muna omerisusuparisiro we momuano me tjinda ovakarere ve, nu matu vanga okuhorera ku ye. Nu wina, matu vanga okuhorera kovihorera oviwa vyovandu mba tamunwa mOmbeibela mbaave karere Mukuru nomerisusuparisiro. Nu aruhe Jehova ngatu mu pe ondjozikiro nohiviro ndje mu pwire. (Omavan. 4:11) Indu tji twa tjiti nao, eṱe matu yenene okurira omapanga wa Jehova nga aruhe mena rokutja eye wa suvera ovandu overisusuparise.