1. Anni i kinagi ni David meyannung ta kinapakalinno ni Jehova?

TALAGA kari nga makagi tam nga mapakalinno si Jehova? Wan. Nitura ni David: “Iyawa mu niakan i kalatag na pamaliag mu, anna i kinapakalinno mu i mangiyatannang niakan.” (2 Sam. 22:36; Sal. 18:35) Awayyana nga nononopan ni David i tiempo tagga ta zimittal si profeta Samuel ta balay na yamana tapenu pilian i mabbalin nga patul na Israel. Ta walu nga mawwaragi, si David i pinaka-abbing, ngem yayya i pinili ni Jehova tapenu manali kani Patul Saul.​—1 Sam. 16:1, 10-13.

2. Anni i ikonsidera tam taw nga artikulo?

² Siguradu nga umanugu si David ta nikagi na Salmo 113 meyannung kani Jehova: ‘Maggubbaw yayya tapenu i langi anna davvun ay masinganna. Iyatannanna i paddian na mariga ira. Ipanawna ta ziga i pakallallo ira. Danaw ay pagitubangnganna ta biko na prinsipe ira.’ (Sal. 113:6-8) Taw nga artikulo, ikonsidera tam labbi i karuan nga importante nga leksion meyannung ta kinapakalinno. Repasowattam i situasion ira nu kunnasi nga nipasingan ni Jehova yaw nga kualidad. Tapus ammuattam nu anni i magigiammu tam kani Patul Saul, profeta Daniel, anna kani Jesus meyannung ta kinapakalinno.

3. Kunnasi nga makilallang si Jehova nittam, anna anni i pakurugan naw?

³ Pakurugan ni Jehova nga mapakalinno yayya gukaban na pakilallanna ta imperfekto nga totolay. Arianna laman nga alawatan i paddayaw tam, nu ari, ibilanna paga ittam nga kokkofunna. (Sal. 25:14) Tapenu posible i pakikkofun kani Jehova, nabboluntariu yayya nga iyawa i Anana bilang sakrifisio para ta liwi-liwa tam. Anni ngana mabba nga pagallona!

4. Anni i niyawa ni Jehova nittam, anna ngatta?

 ⁴ Ikonsidera i tadday paga nga pinangipasingan ni Jehova tu kinapakalinno. Bilang Namaratu nittam, puede nakuan nga diniseniona ittam nga awan tu pakawayya nga pilian i kuattam ta pattoletam. Ngem arianna nga kingngua yatun. Pinaratuna ittam ta imahena anna niddanna ittam tu lallaguray nga mappili. Kayàna nga napafutuan nga masserbi ittam nga mapakalinno nga totolay megafu ta ayatattam yayya anna ammu tam i benefisio na pattuppal nisa. (Deut. 10:12; Isa. 48:17, 18) Talaga mappappabalo ittam taw nga pinangipasingan ni Jehova tu kinapakalinno!

5. Kunnasi ittam tudduan ni Jehova nga mappakalinno? (Innan i letratu ta vungun.)

⁵ Tudduan ittam ni Jehova nga mabbalin tu mapakalinno gukaban na pakilallanna nittam. Si Jehova i pinakamasirib nga Persona ta uniberso. Ngem maski paga kunna, sigga-paran yayya nga makipattrabahu ta tanakuan anna alawatan i suhestiodda. Tadday nga angngarigan, pinamavulunan ni Jehova nga uffunan yayya na Anana ta pamaro ta ngamin nga ganna-gannug. (Prov. 8:27-30; Col. 1:15, 16) Maski nu si Jehova i makapangngua-sa-ngamin, niddanna tu autoridad i tanakuan. Angngariganna, sinunnona si Jesus nga mabbalin tu Patul na Pappatulan, anna iddanna gapa noka tu autoridad i 144,000 nga totolay tapenu makipammaguray kani Jesus. (Luc. 12:32) Siempre, sinanay ni Jehova si Jesus tapenu mabbalin nga Patul anna Atannang nga Pari. (Heb. 5:8, 9) Sana-sanayanna gapa danuri makipammaguray kani Jesus tapenu ituppalda i responsibilidadda. Arianna ira kontrolan nu kunnasida kuan yaw nga responsibilidad, nu ari, mattalo yayya nga kuadda nu anni i urena.​—Nep. 5:10.

6-7. Anni i magigiammu tam kani Jehova meyannung ta pangiyawa tu autoridad ta tanakuan?

⁶ Nu si Jehova nga ari tu magawag tu uffun  na maski sinni ay nangiyawa tu autoridad ta tanakuan, yammanno ngana nakuan ta nittam! Angngariganna, tadday ka kari nga ulu na familia onu elder ta kongregasion? Tuttulan i ehemplo ni Jehova gukaban na pangiyawa tu annungan ira ta tanakuan anna pallaban ta tendensia nga kontrolan i pangnguada tatun. Nu parigammu si Jehova, ariammu laman nga mabalin i trabahu, nu ari, masanay mu gapa i tanakuan anna mapadakal mu i pakkomfiansada. (Isa. 41:10) Anni paga i magigiammu danuri egga autoridadna kani Jehova?

⁷ Ipasingan na Biblia nga interesadu si Jehova ta opinion na ánana nga anghel. (1 Pat. 22:19-22) Sikamu nga magana, kunnasinu nga maparigan i ehemplo na Yama tam ta langi nga si Jehova? Nu posible, iyavu ta ánanu i opiniodda nu kunnasi nga makua i tadday nga trabahu. Nu mepangngo, tuttulan i suhestiodda ira.

8. Kunnasi nga pinasa-pasensian ni Jehova da Abraham anni Sara?

⁸ Masingan gapa i kinapakalinno ni Jehova ta pappasa-pasensiana. Angngariganna, pinasensian ni Jehova danuri aripanna nga manguestion ta desisionna ira. Gininnana si Abraham turi ta nikagina i vuru-vurunna ira meyannung ta desision ni Jehova nga daralan i Sodoma anna i Gomora. (Gen. 18:22-33) Daddamman gapa nu anni i reaksion ni Jehova kani Sara. Ari yayya nga napporay onu nattaki i nonona turi ta nigalo ni Sara i promesana nga mavussi yayya maski nu bako ngana yayya. (Gen. 18:10-14) Arianna nga pinasiranan si Sara.

9. Anni i magigiammu na mappagana anna elder ira ta ehemplo ni Jehova?

⁹ Anni i magigiammunu nga mappagana anna elder ira ta ehemplo ni Jehova? Anni i kuannu nu kuestionan na ánanu onu na karuan nga wawwaragi ta kongregasion i desisionnu? Insigida kari nga itununnu ira? Onu alippawatannu labbi i pagimammada? Siguradu nga mabbenefisio i familia anna i kongregasion nu parigan danuri na egga autoridadda si Jehova. Nammuattam ngana nu anni i magigiammu tam meyannung ta kinapakalinno kani Jehova. Gigiammuattam gapa i tanakuan ira nga ehemplo ta Biblia nu kunnasi nga mappakalinno.

10. Kunnasi nga usan ni Jehova i ehemplo na tanakuan tapenu tudduan ittam?

¹⁰ Bilang “Katannangan nga Instruktor” tam, iddiddan ittam ni Jehova tu ehemplo ira ta Uvovugna tapenu tudduan ittam. (Isa. 30:20, 21) Makagigiammu ittam nu pannonopattam i istoria ira na totolay ta Biblia nga nangipasingan tu makadios ira nga kualidad, gitta na pangammu ta limitasion ira. Makagigiammu ittam gapa nu usitakkattam i nesimmu ta totolay nga ari nga nakepasingan tatun ira nga makasta nga kualidad.​—Sal. 37:37; 1 Cor. 10:11.

11. Anni i magigiammu tam ta marake nga angngarigan ni Saul?

¹¹ Nonopan i nesimmu kani Patul Saul. Minappakalinno yayya ta kabbinna. Ammuna i limitasionna ira anna nagalangan paga lagu yayya nga alawatan i kammungan ira nga responsibilidad. (1 Sam. 9:21; 10:20-22) Ngem zimittal i tiempo nga nappakatannang si Saul. Nasingan yaw nga marake nga ugalina turi ta patul ngana yayya. Mittan, nofu i pasensiana ta paginnagna kani profeta Samuel. Imbes nga mattalo si Saul kani Jehova nga magguyu para ta totolena, nangitavvung yayya tu matuggi nga sakrifisio maski nu ari yayya nga autorisadu nga kuan yatun. Bilang resulta, nawawan ni Saul i fabor ni Jehova anna maski  i kinapatulna. (1 Sam. 13:8-14) Makagigiammu ittam taw nga marake nga ehemplo nga ibita tam nga kuan i ganna-gannug nga awan tu kepangngattattam nga kuan.

12. Kunnasi nga nangipasingan si Daniel tu kinapakalinno?

¹² Ari tu kagitta ni Saul, makasta i ehemplo ni profeta Daniel. Ta interu nga pattolay ni Daniel, kanayun yayya nga nappakalinno anna nappegiya kani Jehova. Angngariganna, tagga ta inusa yayya ni Jehova tapenu ipakanawag i tatageno ni Nabucodonosor, ari nga ina ni Daniel i dayaw megafu tatun. Imbes tu kunna, mapakalinno nga niyawana i ngamin nga dayaw kani Jehova. (Dan. 2:26-28) Anni i magigiammu tam tatun? Nu maguggustuan na wawwaragi i pappalappa tam onu makasta ira i ekspiriensa tam ta ministerio, iyawa tam nakuan i ngamin nga dayaw kani Jehova. Mapakalinno nakuan nga anugutattam nga ariattam makua danaw nga ganna-gannug nu awan tu uffun ni Jehova. (Fil. 4:13, NW ) Nu kunnaw i kuattam, paparigattam gapa i makasta nga ehemplo ni Jesus. Kunnasi?

13. Anni i magigiammu tam kani Jesus segun ta Juan 5:19, 30?

¹³ Maski nu si Jesus i perfekto nga Ana na Dios, kawaganna lagapa i uffun ni Jehova. (Bibbigan i Juan 5:19, 30.) Arianna vuluvuga ninono nga apan i autoridad na nelangitan nga Yamana. Kagian nittam na Filipos 2:6 nga maski nu egga kani Jesus i ka-Dios, “arian na nga nifersa tu megitta yaya ta Dios.” Minappakalinno yayya nga Ana, yayya nga ammu ni Jesus i limitasionna ira anna irespetona i autoridad na Yamana.

14. Anni i reaksion i Jesus turi ta nekiddaw nisa i gannug nga awan tu kepangngattanna nga iyawa?

¹⁴ Nonopan i reaksion ni Jesus turi ta nakifabor i yena da Santiago anni Juan ta nisa tu gannug nga awan tu kepangngattanna nga iyawa. Insigida nga simibbag si Jesus nga i Yamana laman ta langi i makapaddesision nu sinni noka i magitubang ta ziwananna anna ta zimigina ta Pappatulan. (Mat. 20:20-23) Nipasingan ni Jesus nga ammuna i limitasionna ira. Mapakalinno yayya. Arianna vuluvuga kingngua i ari nga nipakua ni Jehova nisa. (Juan 12:49) Kunnasi tam maparigan i makasta nga ehemplo ni Jesus?

15-16. Kunnasi tam nga meyaplika i 1 Corinto 4:6?

¹⁵ Maparigattam i kinapakalinno ni Jesus gukaban na pangiyaplika ta 1 Corinto 4:6.  Mabibbig tam tatun: “Tuttulan nu i kagian na dob.” Nu egga i makitabarang nittam, ariattam vuluvuga ifuersa i opiniottam onu basta laman kagian i ollu nga manono tam. Lallagu, idirekta tam ira ta tabarang ta Biblia anna ta publikasiottam ira. Nu kunnatun, anugutattam i limitasiottam ira. Mapakalinno gapa nga medayaw tam i ‘matunung ira nga kikkingngua’ na Makapangngua-sa-ngamin.​—Nep. 15:3, 4.

¹⁶ Aru paga i tanakuan nga rason nu ngatta mappakalinno ittam fuera ta medayaw tam si Jehova. Gigiammuattam ngana sangawe nu kunnasi nga i kinapakalinno ay mamagayayya nittam anna makoffun nittam nga makasundu i tanakuan.

17. Ngatta magayayya danuri minappakalinno anna ammuda i limitasiodda?

¹⁷ Nu minappakalinno ittam anna ammu tam i limitasiottam ira, dakal i posibilidadna nga minaggayayya ittam. Ngatta kunnatun? Nu ammu tam i limitasiottam ira, mappabalo anna magayayya ittam ta uffun na tanakuan. Angngariganna, nonopan turi ta inuru ni Jesus i mafulu nga mallepproso. Tadday laman nira i nanoli tapenu mappabalo ta pinanguru ni Jesus ta kannama-nama nga takina. Inanugu natun nga lalaki nga arianna vuluvuga moruan i baggina lagapa. Mappabalo yaw nga mapakalinno nga lalaki ta uffun nga nalawana anna zinayona i Dios megafu tatun.​—Luc. 17:11-19.

18. Kunnasi nga makoffun nittam i kinapakalinno tapenu makasundu tam i tanakuan? (Roma 12:10)

¹⁸ Mabi nga makasundu na mapakalinno nga totolay i tanakuan anna egga ira i madukko nga kokkofudda. Ngatta? Megafu ta anugutadda nga egga i makasta ira nga kualidad na tanakuan nga totolay anna mattalo ira nira. Magayayya danuri mapakalinno nu metuppal tu mapia na tanakuan i annungadda anna  alistu laman ira nga makkomenda anna mangidayaw.—Bibbigan i Roma 12:10.

19. Ngatta lillitattam nakuan i pappakatannang?

¹⁹ Marigatan danuri minappakatannang nga komendan i tanakuan gafu ta mas kayàda nga ira i medayaw. Mahilig ira nga makikompetensia anna ikumpara i baggida ta tanakuan. Imbes nga sanayadda i tanakuan anna iddadda ira tu autoridad, baka kudda: “Nu kayà mu tu ari ka makkaproblema anna makasta i resultana, siko lapa ngana i magangngua.” Maruddu nga ambisioso anna minappassil i mapakatannang nga tolay. (Gal. 5:26) Ari kuruga nga mabbayag i pakkorofun na kuddanatun nga totolay. Nu masifutattam nga egga tendensia tam nga mappakatannang, mawag tu maki-uffuttam kani Jehova gukaban na pakimallo tapenu ‘matalibagu i appana-panono’ tam anna ari nga megamu yaw nga marake nga ugali ta nittam.​—Roma 12:2.

20. Ngatta mapakalinno anna ammu tam nakuan i limitasiottam?

²⁰ Kuruga mappabalo ittam ta ehemplo ni Jehova! Masingattam i kinapakalinnona ta pakilallanna ta aripanna ira anna kayà tam yayya nga parigan. Kunne na gapa, kayà tam nga parigan danuri mapakalinno nga nasserbi ta Dios. Kanayuttam nakuan gafu nga iyawa kani Jehova i dayaw anna kekakua nga mepangngo nisa. (Nep. 4:11) Nu kuattam ngamin danaw, mabbalin ittam tu kofun ni Jehova ta mannanayun, megafu ta ayatanna danuri mapakalinno anna ammuda i limitasiodda.