1. Ania ti imbaga ni David maipapan iti kinapakumbaba ni Jehova?

TALAGA kadi a maibagatayo a napakumbaba ni Jehova? Wen. Naminsan, kinuna ni David: “Itedmo kaniak ti kalasagmo tapno maisalakanak, ket ti kinapakumbabam ti mangitan-ok kaniak.” (2 Sam. 22:36; Sal. 18:35) Nalabit pampanunoten idi ni David ti aldaw a napan idiay balayda ni propeta Samuel tapno dutokanna ti agbalin nga ari ti Israel. Ni David ti inaudi iti walo nga agkakabsat a lallaki; ngem isu ti pinili ni Jehova a mangsukat ken Ari Saul.​—1 Sam. 16:1, 10-13.

2. Ania ti usigentayo iti daytoy nga artikulo?

² Sigurado nga umanamong ni David iti maysa a salmista a nangibaga maipapan ken Jehova: “Agdumog tapno kitaenna ti langit ken ti daga, bangonenna ti nanumo manipud iti tapok. Aonenna ti napanglaw . . . tapno pagtugawenna iti abay dagiti natan-ok.” (Sal. 113:6-8) Iti daytoy nga artikulo, usigentayo nga umuna ti dadduma a napateg a masursurotayo maipapan iti kinapakumbaba babaen ti panangrepasotayo kadagiti pasamak nga impakita ni Jehova daytoy a kualidad. Kalpasanna, usigentayo dagiti masursurotayo kada Ari Saul, propeta Daniel, ken ni Jesus maipapan iti kinaemma.

3. Kasano ti panangtrato ni Jehova kadatayo, ken ania ti ipakpakita dayta?

³ Ipakpakita ni Jehova a napakumbaba babaen ti pamay-an ti panangtratona kadagiti imperpekto a tattao nga agdaydayaw kenkuana. Akseptarenna ti panagdaydayawtayo ken ibilangnatayo  pay kas gagayyemna. (Sal. 25:14) Ni Jehova ti immun-una a nangaramid iti pamay-an tapno agbalintayo a gagayyemna babaen ti panangipaayna iti Anakna kas daton maigapu kadagiti basoltayo. Anian nga asi ken pannakipagrikna ti impakitana kadatayo!

4. Ania ti impaay kadatayo ni Jehova, ken apay?

⁴ Usigentayo ti sabali pay nga ebidensia a napakumbaba ni Jehova. Kas Namarsua, mabalin koma nga inaramidnatayo nga awanan iti abilidad nga agpili iti kayattayo nga aramiden. Ngem saanna nga inaramid dayta. Inaramidnatayo iti ladawanna ken inikkannatayo iti wayawaya nga agpili. Kayatna a datayo a nanumo a tattao ket naimpusuan nga agserbi kenkuana gapu ta ay-ayatentayo ken apresiarentayo dagiti pagimbagan ti panagtulnog kenkuana. (Deut. 10:12; Isa. 48:17, 18) Anian a yamantayo iti daytoy nga ebkas ti kinapakumbaba ni Jehova!

5. Kasano nga isursuronatayo ni Jehova nga agbalin a napakumbaba? (Kitaen ti ladawan iti akkub.)

⁵ Isursuronatayo ni Jehova nga agbalin a napakumbaba babaen ti pamay-an ti panangtratona kadatayo. Ni Jehova ti kasisiriban a Persona iti uniberso. Nupay kasta, situtulok nga umawat kadagiti suhestion. Kas pagarigan, impalubos ni Jehova a tumulong kenkuana ti Anakna iti panangparsuana iti amin a banag. (Prov. 8:27-30; Col. 1:15, 16) Ken nupay ni Jehova ti mannakabalin-amin, ikkanna ti dadduma iti autoridad. Kas pagarigan, dinutokanna ni Jesus nga agbalin nga Ari ti Pagarian, ken ikkannanto iti autoridad ti 144,000 a tattao nga agbalin a kakadua ni Jesus nga agturay. (Luc. 12:32) Siempre, sinanay ni Jehova ni Jesus nga agbalin nga Ari ken Nangato a Padi. (Heb. 5:8, 9) Sansanayenna met dagiti kakadua ni Jesus nga agturay, ngem saanna nga ited kadakuada dayta nga annongen  sa bumallaet tapno kontrolenna ti tunggal detalye ti trabahoda. Imbes ketdi, agtalek nga aramidenda ti pagayatanna.​—Apoc. 5:10.

6-7. Ania dagiti masursurotayo iti nailangitan nga Amatayo maipapan iti panangted iti autoridad iti sabsabali?

⁶ No ti nailangitan nga Amatayo​—a saan nga agkasapulan iti tulong ti asinoman​—ket mangted iti autoridad iti sabsabali, datayo la ketdin? Kas pagarigan, maysaka kadi nga ulo ti pamilia wenno panglakayen iti kongregasion? Surotem ti ulidan ni Jehova babaen ti panangtedmo iti trabaho iti dadduma ken dika bumallaet tapno kontrolem ti tunggal detalye dayta a trabaho. No tuladem ni Jehova, saanmo laeng a maileppas ti trabaho no di ket masanaymo met ti dadduma ket mapabilegmo ti kompiansada. (Isa. 41:10) Ania pay ti masursuro dagidiay addaan iti autoridad manipud ken Jehova?

⁷ Ibaga ti Biblia nga interesado ni Jehova iti opinion dagiti annakna nga anghel. (1 Ar. 22:19-22) Nagannak, kasano a matuladyo ti ulidan ni Jehova? No maitutop, damagenyo ti opinion dagiti annakyo no kasano a maaramid ti maysa a banag. Ket no mayat dagiti suhestionda, surotenyo dagita.

8. Kasano ti naanus a panangtrato ni Jehova kada Abraham ken Sara?

⁸ Makita met ti kinapakumbaba ni Jehova iti kinaanusna. Kas pagarigan, naanus ni Jehova no siraraem a kuestionaran dagiti agserserbi kenkuana dagiti desisionna. Dimngeg ken Abraham idi imbagana ti pakaseknanna maipapan iti desision a madadael ti Sodoma ken Gomorra. (Gen. 18:22-33) Laglagipenyo met no kasano ti panangtrato ni Jehova ken Sara nga asawa ni Abraham. Saan a nasaktan wenno nakaunget ni Jehova idi nagkatawa ni Sara iti karina nga agsikog uray baketen. (Gen. 18:10-14) Imbes ketdi, trinatona ni Sara nga addaan iti dignidad.

9. Ania ti masursuro dagiti nagannak ken panglakayen iti ulidan ni Jehova?

⁹ Dakayo a nagannak ken panglakayen, ania ti masursuroyo iti ulidan ni Jehova? Ania ti reaksionyo no dagiti adda iti babaen ti autoridadyo kuestionaranda dagiti desisionyo? Dagus kadi a korehirenyo ida? Wenno ikagumaanyo a tarusan ti kapanunotanda? Sigurado a magunggonaan dagiti pamilia ken kongregasion no tuladen dagidiay addaan iti autoridad ti ulidan ni Jehova. Napagsasaritaantayon dagiti masursurotayo ken Jehova maipapan iti kinapakumbaba. Kitaentayo itan dagiti masursurotayo maipapan iti kinaemma manipud kadagiti ulidan a nairekord iti Sao ti Dios.

10. Kasano ti panangusar ni Jehova iti ulidan ti dadduma tapno isuronatayo?

¹⁰ Kas ‘Naindaklan nga Instruktortayo,’ nangipaay ni Jehova kadagiti ulidan iti Saona tapno suruannatayo. (Isa. 30:20, 21) Makasursurotayo bayat nga ut-utobentayo dagiti salaysay ti Biblia maipapan kadagiti nangipakita kadagiti kualidad a makaay-ayo iti Dios, a pakairamanan ti kinaemma. Makasursurotayo met bayat a sukimatentayo ti napasamak kadagidiay saan a nangipakita kadagita a nagsayaat a kualidad.​—Sal. 37:37; 1 Cor. 10:11.

11. Ania ti masursurotayo iti dakes nga ulidan ni Saul?

¹¹ Panunotenyo ti napasamak ken Ari Saul. Idi damo, isu ket naemma nga agtutubo. Ammona dagiti limitasionna ken nagkedked pay ketdi nga umawat iti kanayonan a responsabilidad. (1 Sam. 9:21; 10:20-22) Ngem idi agangay, timmangsit ni Saul ket inaramidna ti dina rumbeng nga aramiden. Impakitana dayta a dakes nga ugali di nagbayag kalpasan a nagbalin nga ari. Naminsan, saan a nakaanus  bayat nga ur-urayenna ni propeta Samuel. Imbes a sieemma nga agtalek nga agtignay ni Jehova para iti ilina, nagdaton ni Saul uray saan nga autorisado a mangaramid iti dayta. Nagbanaganna, napukawna ti pabor ni Jehova ken ti kinaarina idi agangay. (1 Sam. 13:8-14) Masiribtayo no makasursurotayo iti dayta a pakdaar ken ditay aramiden dagiti ditay rumbeng nga aramiden.

12. Kasano nga impakita ni Daniel ti kinaemma?

¹² Naiduma ti dakes nga ulidan ni Saul iti nasayaat nga ulidan ni propeta Daniel. Iti unos ti panagbiagna, nagtalinaed a napakumbaba ken naemma nga adipen ti Dios a kanayon a nagpaiwanwan ken Jehova. Kas pagarigan, idi inusar ni Jehova a mangibaga iti kaipapanan ti tagtagainep ni Nabucodonosor, saan nga inawat ni Daniel ti pammadayaw iti dayta a nagapuananna. Imbes ketdi, sieemma nga intedna ken Jehova ti amin a dayag ken dayaw. (Dan. 2:26-28) Ania ti masursurotayo? No maay-ayatan dagiti kakabsat a dumngeg iti palawagtayo wenno naballigitayo iti ministerio, laglagipentayo nga ited ken Jehova ti amin a dayaw. Masapul a sieemma a bigbigentayo a saantayo a maaramid dagita no awan ti tulong ni Jehova. (Fil. 4:13) No kasta ti kababalintayo, tultuladentayo met ti nasayaat nga ulidan ni Jesus. Kasano?

13. Ania ti masursurotayo maipapan iti kinaemma iti imbaga ni Jesus iti Juan 5:19, 30?

¹³ Nupay perpekto ni Jesus nga Anak ti Dios, nagpannuray ken Jehova. (Basaen ti Juan 5:19, 30.) Dina pulos pinadas nga agawen ti autoridad ti nailangitan nga Amana. Kuna ti Filipos 2:6 a ni Jesus “dina pulos pinanunot nga agawen ti posision ti Dios, kayatna a sawen, a makipada koma iti Dios.” Kas managpasakup nga Anak, naawatan ni Jesus dagiti limitasionna ken rinaemna ti autoridad ni Amana.

14. Ania ti reaksion ni Jesus idi adda nagkiddaw iti banag nga awan ti autoridadna a mangited?

¹⁴ Panunotenyo ti reaksion ni Jesus idi inasitgan isuna dagiti adalan a da Santiago ken Juan a kaduada ni nanangda tapno kiddawenda ti pribilehio nga awan ti autoridad ni Jesus a mangipaay. Imbaga a dagus ni Jesus a ti laeng nailangitan nga Amana ti makaikeddeng no asino ti agtugaw iti kannawan ken kannigid ni Jesus iti Pagarian. (Mat. 20:20-23) Impakita ni Jesus nga ammona dagiti limitasionna. Isu ket naemma. Dina pulos inaramid ti  nalablabes ngem iti imbilin ni Jehova nga aramidenna. (Juan 12:49) Kasanotayo a matulad ti nasayaat nga ulidan ni Jesus?

15-16. Kasanotayo a mayaplikar ti balakad ti Biblia iti 1 Corinto 4:6?

¹⁵ Matuladtayo ti kinaemma ni Jesus no iyaplikartayo ti balakad ti Biblia iti 1 Corinto 4:6. Kunana: “Dikay lumbes iti bambanag a naisurat.” Isu a no adda agpabalakad kadatayo, ditay pulos kayat nga ibaga ti opiniontayo wenno ti dagus a mapanunottayo. Iturongtayo ketdi ida iti balakad ti Biblia ken kadagiti publikasiontayo a naibatay iti Biblia. Iti kasta, bigbigbigentayo dagiti limitasiontayo. Sieemma nga ipakitatayo a kanayon a nasaysayaat ‘dagiti nalinteg a bilin’ ti Mannakabalin-amin.​—Apoc. 15:3, 4.

¹⁶ Malaksid iti panangpadayaw ken Jehova, adda pay dadduma a nasayaat a rason nga ipakitatayo ti kinaemma. Kitaentayo no kasano a ti kinapakumbaba ken kinaemma ket mangparagsak kadatayo ken makatulong iti pannakilangentayo iti sabsabali.

17. Apay a naragsak dagiti napakumbaba ken naemma a tattao?

¹⁷ No napakumbaba ken naemmatayo, naragragsaktayo. Apay? No ammotayo dagiti limitasiontayo, agyaman ken naragsaktayo iti aniaman a tulong a maawattayo. Kas pagarigan, panunotentayo ti napasamak idi pinaimbag ni Jesus ti 10 nga agkukutel. Maysa laeng kadakuada ti nagsubli tapno agyaman ken Jesus iti panangpaimbagna iti nakaar-ariek a sakitna​—banag a dina pulos maaramidan a bukbukodna. Agyamyaman daytoy a napakumbaba ken naemma a lalaki iti tulong a naawatna, ket indaydayawna ti Dios gapu iti dayta.​—Luc. 17:11-19.

18. Kasano a makatulong ti kinapakumbaba ken kinaemma tapno makatunosantayo ti sabsabali? (Roma 12:10)

 ¹⁸ Dagiti napakumbaba ken naemma a tattao nalakada a makatunosan ti sabsabali ken maaddaan iti nasinged a gagayyem. Apay? Situtulok a bigbigenda nga adda nasasayaat a kualidad ti dadduma a tattao ken agtalekda kadakuada. Naragsak dagiti napakumbaba ken naemma no agballigi ti dadduma iti aniaman a naawatda nga annongen ken alistoda a mangkomendar ken mangpadayaw kadakuada.​—Basaen ti Roma 12:10.

19. Ania ti dadduma a rason a masapul a liklikantayo ti kinapannakkel?

¹⁹ Iti sabali a bangir, marigatan dagiti napannakkel a tattao a mangkomendar iti sabsabali ta kayatda nga isuda koma ti mapadayawan. Masansan nga idiligda ti bagida iti sabsabali ken ipakitada a nalalaingda. Imbes a sanayenda ti dadduma ken ikkanda ida iti autoridad, posible nga ibagada iti bagida, “Siak man laengen ti mangaramid tapno maymayat”​—daydiay kayatda a pamay-an. Masansan nga ambisioso ken naimon ti napannakkel a tao. (Gal. 5:26) Saan nga agbayag ti pannakigayyem dagita a tattao. No madlawtayo a medio napannakkeltayo, sipapasnek nga ikararagtayo ken Jehova a tulongannatayo a ‘mangbalbaliw iti panunottayo’ tapno saan a mairamut kadatayo daytoy a dakes a kababalin.​—Roma 12:2.

20. Apay a masapul nga agbalintayo a napakumbaba ken naemma?

²⁰ Agyamantayo unay iti ulidan ni Jehova! Makitatayo ti kinapakumbabana iti pamay-an ti panangtratona kadagiti adipenna, ken kayattayo a tuladen isuna. Kayattayo met a tuladen dagiti nasayaat nga ulidan dagiti naemma a tattao iti Biblia a naaddaan iti pribilehio a makipagna iti Dios. Sapay koma ta kanayon nga itedtayo ken Jehova ti dayag ken dayaw a maikari kenkuana. (Apoc. 4:11) Iti kasta, kualipikadotayonto met a makipagna iti nailangitan nga Amatayo a mangay-ayat kadagiti napakumbaba ken naemma a tattao.