1. Yehowa a shagrit shanem ai lam hte seng nna Dawi hpa tsun wa ai kun?

YEHOWA gaw shagrit shanem ai ngu gaja wa lu tsun ai kun? Lu tsun ai. Dawi ndai hku ka wa ai: “Na a hkye la ai n-gang nang ngai hpe jaw nit dai; Na a myit nem ai [shagrit shanem ai, NW] hku hta ngai kaba wa nngai.” (2 Sa 22:36; Shk 18:35) Htawm hpang hta byin wa na Israela hkawhkam hpe namman chya na matu kawa a nta de myihtoi Samuela sa wa ai nhtoi hpe Dawi dum nga ai rai na re. Dawi gaw shadang sha marai 8 hta hpungdim re. Hkawhkam Shawlu a malai Yehowa lata da ai wa re.​—1 Sa 16:1, 10-13.

2. Ndai sumhpa hta hpa lam hkaja na kun?

² Yehowa hte seng nna Shakawn Kungdawn sara langai a ndai ga hpe Dawi myit hkrum na re. “Lamu hte aga a arai guji guyang yu yu na, Shi a hkum hpe shagrit shanem wu ai, . . . Shi gaw sut n lu ai ni hpe nhpu hta na sharawt la mu ai; Matsan mayan ni gaw du salang ni a makau e, . . . dung nga mu ga.” (Shk 113:5-8) Yehowa a shagrit shanem ai lam hte seng ai kasi ningli kaw nna ahkyak ai lam nkau hpe shawng hkaja yu ga. Shagrit shanem ai lam hte seng nna Hkawhkam Shawlu, myihtoi Daniela hte Yesu kaw nna anhte hpa sharin la lu ai hpe mung hkaja yu ga.

3. Yehowa gaw anhte hpe gara hku kanawn mazum ai kun? Dai hpe sakse madun na matu hpa galaw ai kun?

³ N hkum tsup ai shinggyim masha ni hpe Yehowa gara hku kanawn mazum ai hpe yu yang, shi hta shagrit shanem myit nga ai hpe mu lu ai. Shi gaw anhte a nawku daw jau ai lam hpe hkap la ai sha n-ga, manang hku nna mung anhte hpe mu mada ai. (Shk 25:14) Anhte a mara raw dat hkrum na  matu, Kasha hpe gawng malai hkungga jaw ya ai hku nna shi hte hku hkau lu na matu shawng galaw wa ai. Yehowa hta matsan dum myit grai nga ai.

4. Yehowa gaw anhte hpe hpa ahkang jaw da ai kun? Hpa majaw kun?

⁴ Yehowa shagrit shanem ai lam madun ai kaga langai hpe yu yu ga. Shinggyim masha hpe hpan ai shaloi, lata na ahkang n jaw ai sha hpan da tim mai ai. Raitim, shi dai hku n galaw wa ai. Shi a hkrang bung sumla hte maren hpan da nna, wanglu wanglang lata na ahkang jaw da ai. Yehowa hpe tsawra nna ga madat yang, akyu hkam la lu na hpe anhte chye ai majaw, myit masin mahkra hte nawku shangun mayu ai. (Trj 10:12; Esa 48:17, 18) Yehowa shagrit shanem ai lam madun ai majaw, anhte grai chyeju dum ai.

5. Yehowa gaw anhte shagrit shanem lam nga na matu gara hku sharin ya ai kun? (Makawp sumla hpe yu u.)

⁵ Yehowa gaw shi a kanawn mazum ai lam hku nna shagrit shanem lam nga na matu anhte hpe sharin ya ai. Shi gaw ninggawn tawa hta hpaji rawng htum re. Raitim, kaga ni a hpaji jaw ga ni hpe sharawng awng let hkap la ai. Ga shadawn, yawng mayawng hpe hpan ai shaloi, shi hpe karum ya na matu Kasha hpe lit jaw ai. (Gsh 8:27-30; Kol 1:15, 16) Yehowa gaw chyahtum chyalai n-gun rawng tim, kaga ni hpe lit ni ap ya ai. Ga shadawn, shi gaw Mungdan A Hkawhkam hku nna Yesu hpe aya tang da ai. Yesu hte arau uphkang na matu shinggyim masha ni kaw nna 144,000 hpe mung ahkang aya nkau jaw ai. (Luk 12:32) Yesu hpe Hkawhkam hte Hkingjawng Agyi byin na matu Yehowa shaman ya ai. (Heb 5:8, 9) Yesu hte arau uphkang na ni hpe mung shaman ya ai. Raitim, bungli hpe gara hku galaw ra na hte seng nna gaw ahkri ahkrai matsun n jaw ai. Shi a myit ra ai lam hte maren galaw lu na hpe kam ai.​—Shr 5:10.

6-7. Kaga ni hpe lit ap ya ai hte seng nna Yehowa kaw na anhte hpa sharin la lu ai kun?

 ⁶ Yehowa gaw kade a karum shingtau lam mung n ra tim, kaga ni hpe ahkang aya ap ya ai. Dai majaw, anhte mung dai hta grau nna galaw ging ai. Ga shadawn, nang gaw dinghku a baw (sh) nawku hpung a myitsu salang langai rai kun? Rai yang, kaga ni hpe lit jaw ngut ai hpang, ahkri ahkrai bai matsun ai baw n galaw ai hku nna Yehowa hpe kasi la u. Yehowa hpe kasi la yang, bungli ni hpe ngut kre lu ai sha n-ga, kaga ni hpe mung shaman ya lu ai. Shanhte mung kamhpa ai myit grau nga wa na re. (Esa 41:10) Ram daw ahkang aya nga ai ni gaw, Yehowa kaw na hpa lam naw sharin la lu ai kun?

⁷ Yehowa gaw lamu kasa ni a ningmu hpe myit lawm ai lam Chyum Laika hta tsun da ai. (1 Hk 22:19-22) Kanu kawa ni gaw Yehowa hpe gara hku kasi la mai na kun? Htap htuk ai nga yang, bungli langai hpe gara hku galaw ging ai hte seng nna ma ni a ningmu hpe san yu u. Hkrak ai nga yang shanhte tsun ai hpe hkan galaw u.

8. Yehowa gaw Abraham hte Sara hpe myit galu let gara hku kanawn mazum wa ai kun?

⁸ Yehowa gaw myit galu ai hku nna mung shagrit shanem lam nga ai hpe madun ai. Ga shadawn, shi a dawdan lam ni hpe mayam ni hkungga let ga san san ai shaloi myit galu ai. Sodom hte Gomora mare hpe jahten na matu dawdan ai hte seng nna, Abraham gaw shi a hkamsha lam hpe tsun dan ai shaloi, Yehowa madat ya ai. (Nin 18:22-33) Abraham a madu jan Sara hpe gara hku tsun shaga wa ai hpe mung myit yu u. Asak kaba ai shaloi she ma hkum nga wa na ngu ai ga sadi hpe Sara mani ai shaloi hta mung Yehowa n pawt ai. (Nin 18:10-14) De a malai, Sara hpe hkungga ai hku tsun shaga wa ai.

9. Kanu kawa ni hte myitsu salang ni gaw Yehowa a kasi ningli kaw nna hpa sharin la lu na kun?

⁹ Kanu kawa ni hte myitsu salang ni gaw Yehowa kaw na hpa sharin la lu na kun? Tinang woi awn ai npu hta nga ai ni gaw, tinang a dawdan lam ni hte seng nna ga san san ai shaloi gara hku bai htang ai kun? Shanhte a ningmu hpe shading sharai ya na matu shawng shakut ai kun? Shing nrai, chye na hkra shakut ai kun? Ahkang aya nga ai ni gaw Yehowa hpe kasi la yang, dinghku hte nawku hpung gaw akyu lu la na re. Yehowa a shagrit shanem ai kasi ningli hte seng nna, anhte hkaja wa sai. Matut nna Chyum Laika hta lawm ai shagrit shanem ai hte seng ai kaga kasi ningli ni hpe mung hkaja yu ga.

10. Kaga ni a kasi ningli hku nna mung anhte hpe Yehowa gara hku sharin ya ai kun?

¹⁰ “Grau htum ai sharin achyin ya ai wa” re ai Yehowa gaw anhte hpe sharin ya na matu Chyum Laika hta kasi ningli ni hpe ka da ya ai. (Esa 30:20, 21, NW) Shagrit shanem ai atsam ningja hte kaga atsam ningja ni madun wa ai ni a Chyum Laika labau ni hpe myit sawn sumru ai hku nna sharin la mai ai. Dai zawn atsam ningja n madun wa ai ni hpa byin wa ai hpe mung hkaja lu na re.​—Shk 37:37; 1 Ko 10:11.

11. Shawlu a mabyin kaw nna anhte hpa sharin la lu ai kun?

¹¹ Hkawhkam Shawlu hpa byin wa ai hpe myit yu ga. Shi gaw shawng nnan hta shagrit shanem ai wa re. Shi hta shadawn sharam sha nga ai hpe chye nna, lit ni hpe hkap la na matu mung hting nut wa ai. (1 Sa 9:21; 10:20-22) Raitim, Hkawhkam byin nna kade n na yang rai dum wa ai. Kalang mi hta, myihtoi  Samuela hpe la nga ai laman, myit n galu wa ai. Masha ni a matu Yehowa galaw ya na hpe shagrit shanem let kamhpa na malai, wan nat hkungga hpe ahkang n nga ai sha nawng kau ai. Dai majaw, Shawlu gaw Yehowa a myiman sum mat nna, hkawhkam langai hku nna shi hpe n sawn la sai. (1 Sa 13:8-14) Ndai sadi jaw ai ga shadawn kaw na sharin la na nga yang, rai dum ai hpe koi lu nna, hpaji rawng ai hku galaw lu na re.

12. Daniela gaw gara hku shagrit shanem wa ai kun?

¹² Shawlu hte n bung ai sha, kaja ai kasi ningli madun wa ai myihtoi Daniela a lam hpe hkaja yu ga. Daniela gaw shi a prat ting hta shagrit shanem wa nna, lam matsun lu na matu Yehowa hpe galoi mung hpyi shawn wa ai. Ga shadawn, Nebuhkadneza a yup mang hpe htai ya na matu, Yehowa shi hpe akyu jashawn ai shaloi, shi galaw wa ai lam ni a matu shi hkum shi n shagrau wa ai. Yehowa hpe sha shagrau wa ai. (Dan 2:26-28) Hpa sharin la lu ai kun? Anhte a mungga ni hpe hpunau nauna ni ra sharawng ai (sh) hkaw tsun bungli hta awng dang ai lam lu la ai shaloi, Yehowa hpe sha shagrau ging ai. Yehowa a karum shingtau lam n nga ai sha n lu galaw ai hpe, shagrit shanem let hkap la ra ai. (Hpl 4:13) Dai zawn myit jasat anhte hta nga ai rai yang, Yesu a kasi ningli ni hpe hkan sa nga ai re. Gara hku nna kun?

13. Yawhan 5:19, 30 hku nga yang Yesu kaw na hpa sharin la lu ai kun?

¹³ Yesu gaw Karai Kasang a hkum tsup ai Kasha raitim, Yehowa hpe kamhpa ai. (Yawhan 5:19, 30 hpe hti u.) Sumsing kawa a ahkang aya hpe kashun la na matu galoi n shakut ai. “Karai Kasang hte maren rai nga na shingjawng kashun ai hku n nawn ai” ngu Hpilipi 2:6 hta tsun da ai. Shagrit shanem ai Kasha langai hku nna, shi hta shadawn sharam sha nga ai hpe chye nna, Kawa a ahkang aya hpe mung hkungga ai.

14. Yesu gaw shi hta galaw na ahkang n nga ai hpe hpyi shawn hkrum ai shaloi gara hku bai htang wa ai kun?

¹⁴ Sape Yaku hte Yawhan gaw kanu hte arau sa nna, Yesu n jaw lu ai ahkang aya hpe sa hpyi shawn ai shaloi Yesu gara hku bai htang wa ai hpe myit yu ga. Mungdan hta Yesu a hkra maga hte pai maga hta dung na ahkang nga ai ni hpe, Kawa langai sha dawdan na ahkang nga ai ngu kalang ta tsun dan ai. (Mat 20:20-23) Yesu gaw shi hta shadawn  sharam sha nga ai hpe madun wa ai. Shi gaw shagrit shanem nna, Yehowa jaw da ai ahkang aya hta lai nna galoi mung n galaw ai. (Yhn 12:49) Yesu a kasi ningli hpe gara hku hkan sa lu na kun?

15-16. 1 Korinhtu 4:6 hta mu lu ai Chyum Laika hpaji jaw ga ni hpe anhte gara hku hkan sa lu na kun?

¹⁵ 1 Korinhtu 4:6 kaw mu lu ai Chyum Laika hpaji jaw ga ni hpe hkan sa ai hku nna Yesu a shagrit shanem ai myit hpe kasi la mai ai. Dai hta “ka da nga ai hte maren nanhte n lai lu na” ngu tsun da ai. Anhte hpe kaga ni hpaji hpyi wa ai shaloi, masa lam ni hpe atsawm n myit yu ai sha, tinang a ningmu hpe hkap la hkra, atik anang n shadut ging ai. Chyum Laika hte anhte a laili laika ni hta lawm ai hpaji jaw ga ni hpe tsun dan ging ai. Dai gaw, anhte hta shadawn sharam sha nga ai hpe hkap la ai re. Chyahtum Chyalai N-gun Rawng Ai Karai a amu ni ding hpring nga ai ngu anhte shagrit shanem ai myit hte shagrau na re.​—Shr 15:3, 4.

¹⁶ Yehowa hpe shakawn shagrau ai lam sha n-ga, shagrit shanem ai lam madun ging ai kaga lam ni naw nga ai. Shagrit shanem ai gaw anhte hpe ngwi pyaw shangun nna, kaga ni hte kanawn mazum lam kaja hkra karum ya ai lam hpe hkaja yu ga.

17. Shagrit shanem ai masha gaw hpa majaw kabu gara ai kun?

¹⁷ Anhte shagrit shanem yang grau pyaw wa na re. Hpa majaw kun? Anhte hta shadawn sharam sha nga ai hpe chye ai nga yang, kaga ni kaw nna karum shingtau lam lu la ai shaloi, chyeju dum nna kabu na re. Ga shadawn, manggang kap ai marai 10 hpe Yesu shamai ya ai shaloi na mabyin hpe myit yu u. Tsi shamai na matu n loi ai grai sawng ai ana hpe Yesu shamai ya ai shaloi, marai langai sha chyeju dum ga wa tsun ai. Ndai shagrit shanem ai masha gaw, shi lu la wa ai karum shingtau lam a matu chyeju dum nna,  Karai Kasang hpe mung shakawn shagrau wa ai.​—Luk 17:11-19.

18. Shagrit shanem ai gaw kaga ni hte hku hkau lam kaja hkra gara hku karum ya ai kun? (Roma 12:10)

¹⁸ Shagrit shanem ai masha ni gaw kaga ni hte hku hkau lam kaja nna, manang kaja ni lu la ma ai. Hpa majaw kun? Kaga ni hta kaja ai atsam ningja nga ai hpe hkap la nna kam ai lam madun ai majaw re. Kaga ni awng dang lam lu la ai shaloi kabu ya nna, kalang ta shakawn ya ai.​—Roma 12:10 hpe hti u.

19. Gumrawng ai myit hpe koi ging ai lam nkau gaw hpa rai kun?

¹⁹ Gumrawng ai masha ni gaw kaga ni hpe shakawn ya na matu grai yak nna, tinang sha shakawn shagrau hkrum mayu ai. Kaga ni hte shingdaw nna shing jawng mayu ai myit nga ai. Kaga ni hpe shaman ya nna, lit ni ap ya na malai, tinang galaw yang she hkum tsup ai ngu shadu chye ai. Kaga ni hta grau mayu ai myit nga nna, manawn ai myit mung nga ai. (Gal 5:26) Dai majaw, aten na na hku hkau ai manang n nga ai. Anhte hta gumrawng ai myit nga ai hpe sadi hkrup yang, “myit masin hpe tsep kawp galai shai” ya na matu Yehowa kaw aja awa akyu hpyi u. Rai yang, dai n kaja ai akyang lailen gaw anhte hta ru jung wa sana n re.​—Rom 12:2, JCLB.

20. Anhte hpa majaw shagrit shanem ging ai kun?

²⁰ Yehowa a kasi ningli a matu anhte grai chyeju dum ai. Shi a mayam ni hpe shagrit shanem let kanawn mazum ai hpe mu ai shaloi, shi hpe anhte kasi la mayu ai. Dai sha n-ga, Chyum Laika hta lawm ai Karai Kasang hte arau hkawm wa ai shagrit shanem ai ni a kasi ningli hpe mung, anhte hkan sa mayu ai. Yehowa lu ging ai shakawn shagrau ai lam hpe anhte galoi mung jaw mat ga. (Shr 4:11) Rai yang, shagrit shanem ai masha ni hpe tsawra ai sumsing Kawa hte arau hkawm lu na re.