1. Ihi yazwela Davidi yalungu ni kulenduka kwa Jihova?

O KWILA tutena kuzwela kwila Jihova muthu walenduka? Xé, tutena. Davidi wambe: “Ngubu ya ku ngi xitila i wa ngi bhana, o kubhuluka ku tunda ko kwé; o ku d’ivwa ni eye mba okulenduka kwê, kwene kwa ngi bhana o kijingo.” (2 Sam. 22:36; Jisá. 18:35) Kyoso Davidi kyasoneka o izwelu yiyi, nange mwene walembalala o kithangana kyoso Samwele kyayi kudibhata dya tata ya Davidi phala kumusola kala sobha weji bhingana o sobha Sawúlu mu Izalayele. Davidi wexile o mona wakanake, kutwana twa mala twa tate. Né kiki, mwene amusolo kwala Jihova phala kubhingana Sobha Sawulu, ku ungana.—1 Sam. 16:1, 10-13.

2. Ihi itwandadilonga mu mbandu yiyi?

² Yalungu ni Jihova, sephata Davidi weji xikina mu izwelu ya mukwa jisalamu wambe kwila Jihova, “u bhetama mu ku tala o ima i bhita ni mu dyulu ni mu ngongo? Ngadyama u mu zangula, . . . Phala a mu xikamese ni an’a jingana, xi, a mu bhane kididi kumoxi ni makota a jingana mu mundu wê.” (Jisá. 113:6-8) Mu mbandu yiyi, twandadilonga kyadyanga madisá alungu ni kulenduka ni kumona kyebhi Jihova kyalondekesa o kidifwa kiki. Mukusuluka twandamona se ihi itudilonga mu bhango ya Sobha Sawúlu, ya polofeta Daniyele ni ya Jezú, yalungu ni kidifwa kya kuditulula.

3. O ukexilu wa Jihova kudibhana ni etu, ulondekesa ihi?

³ Jihova ulondekesa o kulenduka kwê mu ukexilu wakudibhana ni athu akwa ituxi. Mwene kaxikina ngó o ubhezeleu wetu  maji ututala kala tumakamba mê. (Jisá. 25:14) Phala kukala tumakamba mê, Jihova wadyanga kutumikisa monê kala sata phala o muloloki wa ituxi yetu—se phata, Jihova mukwa kuloloka kyavulu.

4. Uhete webhi watubhana Jihova ni mukonda dyahi?

⁴ Xinganeka mu ukexilu wengi wa Jihova kulondekesa kulenduka. Kuma mwene Mubhangi, se Jihova wakimesenene kyeji tubhanga ni uhete wakusola mudyetu kyebhi ki twandakwambata o mwenyu wetu. Maji mwene kabhange kiki. Mwene watubhange mu kidifwanganu kyê, watubhana o uhete wakusola o ima mudyetu. Jihova ubhana valolo mu ima itusola, sumbala twatolo twakambe o nguzu mu kudisokesanê. Mwene wamesena kwila tusola kumubheza mukonda twamuzolo, twejiya o mbote ijila mukumubelesela. (Mate. 10:12; Iza. 48:17, 18) Tusakidila kyavulu mukwijiya kwila Jihova muthu walenduka!

5. Kyebhi Jihova kyatulonga o kulenduka? (Tala o foto yakapa.)

⁵ Jihova utulonga o kulenduka mu ukexilu wakudibhana netu. Jihova mwene o Muthu wabetakota mu kwijiya mu ngongo yoso. Né kiki, mwene wala polondo phala kwivwa o itendelesu ya akwa. Mukifika, Jihova weha Monê kumukwatekesa mukubhanga o ima yoso. (Jisa. 8:27-30; Kol. 1:15, 16) Sumbala Jihova mwene o mutenyayoso, mwene wabhana ikalakalu kwakwa. Mukifika, mwene wasolo Jezú phala kukala o Sobha ya Utuminu, wabhana we kutena ku 144.000 a athu andatumina kumoxi ni Jezú. (Luka 12:32) Se phata, Jihova walongo Jezú phala kukala Sobha, ni kukala we Mukunji Wadikota. (Jihe. 5:8, 9) Mwene walongo we yó akatumina kumoxi ni Jezú. Maji mukwabhana o kikalakalu kiki, mwene kasoto ku atonginina mukama kosokoso. Muveji dya kiki, mwene wadyelela kwila ene andabhanga o vondadi yê.—Dij. 5:10.

6-7. Yalungu ni kubhana ikalakalu kwa akwetu, ihi itudilonga ku phangu ya Tata yetu ya dyulu?

 ⁶ Se Jihova—yo kabhindama o kikwatekesu kyamuthu—ubhana kikalakalu kwakwa, abha etu? Sephata twatokala kukayela o phangu yê! Mukifika, o kwila eye umutwameni wa mwiji mba ukafunga mukilunga? Kayela o phangu ya Jihova mukubhana ikalakalu kwa akwenu ni kubhanga yoso phala ki utonginine o kikalakalu kyawu mu kama kosokoso. Kyoso kitukayela o phangu ya Jihova, o kikalakalu kyandaya kupholo eye wandalonga akwenu, ene we andabhanga o kikalakalu kyâ ni kidyelelu kyoso. (Iza. 41:10) Yo ala ni mawujitu atena dingi kudilonga ihi kuphangu ya Jihova?

⁷ O Bibidya ilondekesa kwila Jihova wawabhela kwivwa o kixinganeku kya anê kudyulu. (1 Jis. 22:19-22) Jitata, kyebhi ki mutena kukayela o phangu ya Jihova? Se kibhana, sota kwijiya o kixinganeku kya monê yalungu ni kyebhi kyatokala o kubhanga o kikalakalu kubhata. Se kibhana, kayela o itendelesu yâ.

8. Kyebhi Jihova kyalondekesa mwanyu mukudibhana ni Mbalahamu ni Sala?

⁸ O kulenduka kwa Jihova kudimonekena mu mwanyu wê. Mukifika, Jihova ulondekesa mwanyu kyoso jiselevende jê ja fiyele jamwibhwidisa ni kuxila kwoso yalungu ni ima yasolo Jihova ene katendela kyambote. Mukifika, Jihova wevu Mbalahamu kyoso kyambe kwila mu kixinganeku kyê kikyatokalele Jihova kubwika Sodoma ni Ngomola. (Dim. 18:22-33) Lembalala we kyebhi Jihova kyadibhana ni muhatu wa Mbalahamu, Sala. Jihova kaluwala mba wadizangala kyoso Sala kyolela o kikanenu kyê, kya kwila, Sala weji kwimita sumbala o kithangana kya kuvwala kyamubhitile kyá. (Dim. 18:10-14) Muveji dya kiki mwene wamuxila, watalatala kyambote Sala.

9. Ihi itena kudilonga o jitata ni tufunga muphangu ya Jihova?

⁹ Enu mu jitata ni tufunga, ihi imutena kudilonga mu phangu ya Jihova? Ihi imwene mubhanga se o twana twenu mba phange mukilunga kaxikina o kima ki wasolo? O kwila o kima kyadyanga ki ubhanga o kwatangela kwila ene kamuxinganeka kyambote, inga usota kutendela se mukondadyahi amuxinganeka kiki? O miji kubhata ni ilunga se phata andakatula mbote yavulu se o yo ala ni mawujitu akayela o phangu ya Jihova. Kate bhabha twadilongo kyebhi kitutena kukayela o phangu ya Jihova mukulondekesa o kulenduka. Kindala twandamona se ihi itutena kudilonga kuphangu yotumbule mu Bibidya yalungu ni kulenduka mba kuditulula.

10. Kyebhi Jihova kyatulonga bhukaxi ka phangu yakwetu?

¹⁰ Kala ‘Mulongexi wetu Wadikotelele,’ Jihova waxila phangu mu Maka mê phala kutulonga. (Iza. 30:20, 21) Twandakatula mbote mukudilonga o misoso ya Bibidya yalungu ni yo alondesa o idifwa yambote kala o kuditulula. Twandamona we yabhiti ni yo mbaphe alembwa mukulondekesa o idifwa yiyi.—Jisá. 37:37; 1 Kol. 10:11.

11. O phangu yayibha ya Sawulu itulonga ihi?

¹¹ Xinganeka yabhiti ni Sobha Sawulu. Kudimatekenu mwene wexile munzangala walenduka. Mwene wejidile kate bhebhi bhwasuku o kutena kwê, kate mwene wexile ni hele yakuxikina dingi ikalakalu. (1 Sam. 9:21; 10:20-22) Maji, kyoso kyakituka sobha kikwabhiti kithangana kyavulu, Sawulu wamateka kudizangeleka, wabhange ima kiyamutokalele. Mwene walembwa kulondekesa o mwanyu kyoso kyexile mukingila o polofeta Samwele. Muveji dyakuditulula mukudyelela kwa Jihova na zokele o  mundu wê, Sawulu wakwata o jisata ja kwoha wajibhakula sumbala kikyamutokale kubhanga kiki. Mukonda dya kiki, Jihova kexile mutala dingi kyambote Sawulu, kupholo dyakwenda Jihova wamuditunu kala sobha. (1 Sam. 13:8-14) Twandalondekesa unjimu se tudimuka mukonda dya musoso wa Sawulu, anga tudilanga phala kitubhange kima kikyatutokala kubhanga.

12. Kyebhi Daniyele kyalondekesa o kidifwa kyakuditulula?

¹² O phangu yayibha ya sobha Sawulu kiyadifu ni phangu yambote ya polofeta Daniyele. Kumwenyu wê woso, Danyele walondekesa kukala selevende yalenduka, uditulula mukusota o itendelesu ya Jihova mu ithangana yoso. Mukifika, kyoso kyamusolo kwala Jihova phala kujimbulula o nzoji ya Nabukodonozolo, Daniyele kasoto kutambula o fuma mukujimbulula o nzoji. Muveji dya kiki, mwene waditulula wabhana o fuma yoso kwa Jihova. (Dan. 2:26-28) Ihi itudilonga? Se phange utusakidila mukonda dya diskulusu mba twaditundu kyambote mu ukunji, twatokala kulembalala kwila Jihova mwene watokala kutambula o fuma yoso. Twatokala kuditulula mukuxikina kwila twatena ngó kubhanga o ima yiyi ni kikwatekesu kya Jihova. (Fil. 4:13) Kyoso ki tulondekesa o ukexilu yú, twamukayela o phangu yambote yatuxila Jezú. Kyebhi kitubhanga kiki?

13. Ihi itudilonga mukuditulula kwa Jezú kala kitusanga mudivulu dya Nzwá 5:19, 30?

¹³ Sumbala wexile Mona wayuka wa Nzambi, Jezú wexile mudyelela ngó kwa Jihova. (Tanga Nzwá 5:19, 30.) Mwene nuka wasoto kutambula o ungana wa Tatê ya dyulu. Yalungu ni Jezú, Filipe 2:6 yamba: “ka sotele mu nguzu o kusokela ni Nzambi.” Jezú wexile Mona wabelesela, watendela kate phephi bhwasuku o kutena kwê, waxila o ungana wa Tata yê.

14. Kyoso kyamubhingi phala kubhanga kima kikyexile mukutena kwê kyebhi Jezú kyatambwijila?

¹⁴ Xinganeka yabhange Jezú kyoso Tiyaku ni Nzwá kumoxi ni manyâ kyamubhingi phala kwabhana kima kikyexile mukutena kwê kukibhana. Sekubhana jihonda, Jezú wambe kwila o Tata yê mwene ngó wala ni ujitu wakusola se nanyi wandaxikama bhumbandu yakadilu ni kumbandu yakyasu ya Jezú mu Utuminu wê. (Mat. 20:20-23) Jezú walondekesa kwila wejidile kate bhebhi bhwasuku o kutena kwê. Mwene wexile mukwa kuditulula. Mwene nuka  wabhangele kima se Jihova kamubhana o ujitu wakukibhanga. (Nzwá 12:49) Kyebhi kitutena kukayela o phangu yiyi yambote yatuxila Jezú?

15-16. Kyebhi kitutena kukayela o kitendelesu kya Bibidya kitusanga mu 1 Kolindu 4:6?

¹⁵ Twatokala kukayela o phangu ya kuditulula yatuxila Jezú, mu kukayela o kitendelusu kitusanga mu 1 Kolindu 4:6. Mu divulu didi, atutendelesa: “Kana kusomboka o ima yosoneke.” Kyenyikiphe, se atubhinga itendelesu, kitwamesena kuzwela o kixinganeku kyetu, mba kuzwela o kima kyadyanga kiza mu kilunji kyetu, kana. Muveji dya kiki, twamesena kubhana itendelesu bhukaxi ka Bibidya ni madivulu a kilunga. Se kyene kitubhanga, twamuxikina kate bhebhi bhwa suku o kutena kwetu. Ni kuditulula, etu tubhana o kijingu ku Mutenyayoso, yo wedi “o ikalakalu yé yayuka.”—Dij. 15:3, 4.

¹⁶ Etu tusota kuditulula phala kuxila Jihova. Maji kwala dingi ima yengi itubhangesa kuditulula. Kindala twandamona se kyebhi o kulenduka ni kuditulula kutubhekela kusanguluka, kutukwatekesa we kudibhana kyambote ni akwetu.

17. Mukonda dyahi o athu alenduka asanguluka we dingi?

¹⁷ Se tulenduka anga tuditulula, twandakala dingi ni kusanguluka. Mukonda dyahi tuzwela kiki? Se tuxikina kwila kitutena kubhanga yoso itwamesena, twandalondekesa kisakidilu, twandasanguluka ni kikwatekesu kyosokyoso kitubhana akwetu. Mukifika, xinganeka kyoso Jezú kyasake o dikwinyi dya mayala exile ni dibhute. Umoxi ngó wavutuka phala kusakidila Jezú, mu mbote yamubhange—mukonda mwene wejidile kwila kejitena kudisaka. O diyala didi dyalenduka, wasakidila o kikwatekesu kyatambula, waximana Nzambi.—Luka 17:11-19.

18. Kyebhi o kulenduka ni kuditulula kutukwatekesa kudibhana dingi kyambote ni akwetu? (Loma 12:10)

¹⁸ O athu alenduka, aditululula, adibhana dingi  kyambote ni akwa, kwabhonzo kukala ni makamba. Mukonda dyahi tuzwela kiki? Ene ni kisangusangu kyoso, axikina kwila, akwa ala ni idifwa yambote, adyelela akwa. O athu alenduka asanguluka kyoso akwa kyaditunda kyambote mu ikalakala yâ, a aximana, a axila ni muxima woso.—Tanga Loma 12:10.

19. Mukonda dyahi twatokala kubhanga yoso phala kitudizangeleke?

¹⁹ Maji kumbandu yengi, o athu adizangeleka mba akwa ukumbu, kya abhonza kuximana akwa, amesena kwila, ene ngó atambula o kiximanu. Muveji javulu asota kudisokesa ni akwâ, asota kukala kota akwâ ndenge. Muveji dya kulonga akwâ ni kwa abhana we ikalakalu mba mawujitu, ene awabhela kuzwela kiki: “Se wamesena kwila kima kitunda kyambote”—kifwa, kala kyamesena ene—“bhangakyu eye mwene.” O athu adizangela muveji javulu amesena kudizangeleka, akala ni difuba se akwa aditunda kyambote. (Nga. 5:26) o athu akidifwa kiki, kala ni ukamba anangena. Se tumona kwila, twamukala ni kidifwa kya kudizangeleka, twatokala kubhinga kikwatekesu kya Jihova bhukaxi kamusambu ni nguzu yoso, phala atukitule kyengi, phala o kifwa kyabolo kiki, kikikale ku muxima wé.—Loma 12:2.

20. Mukonda dyahi twatokala kukala tu athu alenduka, aditulula?

²⁰ Tusakidila kyavulu o phangu yatuxila Jihova! Tumona o kulenduka kwe kwonene mu ukexilu wadibhana ni jiselevende jê, etu twamesena kukayela o phangu yê. Kumbandu yengi, twamesena we kukayela o phangu yambote itusanga mu Bibidya, ya athu aditungula, exile ni ujitu wakwenda ni Nzambi. Tubhangyenu yoso phala kubhana jinga kwa Jihova o fuma ni kijingu kyamutokala. (Dij. 4:11) Se tubhanga o ima yoso yiyi, twandakala tumakamba a Jihova, kate ku hádya ni hádya, mukonda mwene wazola o athu alenduka, aditululula.