1. Dawudi mwabugha athiki okw’iyikehya lya Yehova?

MBWINO kwenene thwangana bugha thuthi Yehova ayikehirye? Ee. Dawudi mwanabugha athi: “Wukanyihereraya engabo yawu y’omulhamu, n’eriyikehya lyawu likanyihamaya.” (2 Sam. 22:36, NW; Esy. 18:35, NW) Obundi Dawudi mwalengekania okwa kiro omuminyereri Samweli asa eyiri thatha wa Dawudi akasyahakabya oyukendi thasyabya mwami we Israeli. Yehova mwakangania eriyikehya akayisubya ahisi erisombolha Dawudi, oyuwabya mulere omwa balhwana munani, erisuba omo mwanya w’Omwami Saulo.​—1 Sam. 16:1, 10-13.

2. Omo mwatsi ono thukendikania okuki?

² Ahathe erithika-thika, Dawudi mwalighirana n’ebinywe ebya omuhandiki w’esyonyimbo abugha oku Yehova bino: “Akunama, erilhangira olhubulha n’ekihugho. Akasumba abera oko lhuthuthu, akasumba ab’obwagha . . . akahirabo omo balikyabo abanya-mwami.” (Esy. 113:6-8) Omo mwatsi ono, thukendi tsuka eriminya amasomo makulhu-kulhu malebe awahambire okw’iyikehya omw’irebya ngoku Yehova akanganaya omubere oyu. N’erilebya ebyo thwang’ighira oku Mwami Saulo, omuminyereri Danieli, na Yesu ebihambire okwa mubere w’eriyikehya.

3. Yehova akakolongana athi nethu, kandi eki kikakanganayaki?

³ Yehova akakanganaya ngoku ayikehirye akakolongana n’abaramya biwe abathahikene. Syalisubulira okw’iligha eriramya lyethu lisa aliwe kandi akathulhangira ng’abanywani biwe. (Esy. 25:14) Obunywani obo erithokekana, Yehova mwahayo Mughalha wiwe ng’ekihongwa busana n’ebibi byethu. Yehova ka mwathukangania obughanyiri kandi mwathukwira obulighe!

4. Ni kyahi ekya Yehova abirithuha, kandi busana naki?

 ⁴ Lebaya ekindi ekikakanganaya eriyikehya lya Yehova. Iyo ng’Omuhangiki, angana thuhangikire isithuwithe amaaka w’erisombolha ekya thwanzire omwa ngebe. Aliwe mwathakolha ekyo. Mwathuhangika omwa kisosekanio kiwe kandi mwathuha obughabe bw’eriyithwiramu. Anzire ithwe bandu bolho ithwamukolera erilhua oko muthima kundi thumwanzire kandi ithwaminya omughaso owali omw’imwowa. (Ebi. 10:12; Isa. 48:17, 18) Thukasima kutsibu kundi Yehova ayikehirye!

5. Yehova akathukangiriraya athi eriyikehya? (Lebaya ekisasani ky’okwa kidipa.)

⁵ Yehova akathukangiriraya eriyikehya omwa mibere akakolonganiramu nethu. Yehova yuwithe amenge manene kutsibu omwa buhangwa bwosi. Nomwabine, akaligha amenge agho abandi bakaha. Ng’eky’erileberyako, Yehova mwalighira Mughalha wiwe erimuwathikya erihangika ebindu byosi. (Emi. 8:27-30; Kol. 1:15, 16) Kandi nomwakine indi Yehova ni muthoki w’ebyosi, akaha abandi b’obuthoki. Ng’eky’erileberyako, mwasombolha Yesu ng’Omwami w’Obwami, kandi akendisyaha abandu 144,000, abakendi syathabalha haghuma na Yesu b’obuthoki bulebe. (Lk. 12:32) Nibya kandi, Yehova mwathendeka Yesu eribya Mwami kandi Muhereri Mukulhu. (Ebr. 5:8, 9) Kandi anemuthendeka abakendi syathabalha na Yesu, aliwe syalibaha omubiiri neryo kandi iniayingirya mugho eribya nga n’iyo akakolhagho. Omwakanya k’ekyo, ayikethere ngoku bakendi kolha erisonda liwe.​—Erib. 5:10.

6-7. Thwang’ighaki oku Thatha wethu w’elhubulha bikahika okw’iha abandi b’obuthoki bulebe?

⁶ Thatha wethu w’elhubulha oyutheyithagha obuwathikya bw’omundu wosi-wosi amabya  inianganaha abandi b’obuthoki bulebe, ibbwa kwesi ithwe thutholere ithwakikolha bungahi! Ng’eky’erileberyako, wuli muthwe w’eka kutse omusyakulhu w’ekithunga? Gherereraya eky’erileberyako kya Yehova omw’iha abandi b’emibiiri n’eriyitheya okw’ithasyayingirya omwa mubiiri oyo eribya nga niwe wunemwendi kolhagho. Wamagherererya Yehova, omubiiri iniakendi kolhwa, iwathendeka n’abandi n’eribawathikya erikolha bingyi. (Isa. 41:10) Ni kindi kyahi ekyo abawithe obuthoki bulebe bang’ighira oku Yehova?

⁷ E Biblia yikakanganaya ngoku Yehova akahulikirira amalengekania w’abaghalha biwe abamalaika. (1 Bam. 22:19-22) Ababuthi, mwanga gherererya muthi eky’erileberyako kya Yehova? Kyamayithaghisibwa, bulhaya abaana bawu omubiiri mulebe ng’akolhawe athi. Ghendera okwa kya bamabugha, kyamabya ikinatholere.

8. Omw’ighumisirizya, Yehova mwakolongana athi na Abrahamu na Sara?

⁸ Kandi eriyikehya lya Yehova likalhangirika omw’ighumisirizya liwe. Ng’eky’erileberyako, Yehova akaghumisirizaya abakamukolera bakathika-thikira erithwamu liwe. Mwahulikirira Abrahamu akamubwira eriyowa liwe erihambire okw’ithwamu ly’erithoghothya e Sodomo ne Gomora. (Enz. 18:22-33) Kandi ibuka emibere Yehova akolonganiramu n’omukali wa Abrahamu ya Sara. Mwathapona kutse erihithana omughulhu Sara asekerera omulhaghe wiwe ow’eribugha indi akendibya mukule omwa bukekulhu. (Enz. 18:10-14) Omwakanya k’ekyo, mwaha Sara y’ekitsumbi.

9. Ni byahi ebyo babuthi n’abasyakulhu bang’ighira okwa ky’erileberyako kya Yehova?

⁹ Ababuthi n’abasyakulhu, ni byahi ebyo mwang’ighira okwa ky’erileberyako kya Yehova? Ni kyahi ekyo wukakolha abali ahisi sy’obuthoki bwawu bamathika-thikira erithwamu lyawu? Wukanalhuaho iwababwiriraho wuthi bawire? Kutse wukanalengaho eriyitheghererya amalengekania wabu? Ahathe erithika-thika, amaka n’ebithunga bikaghasirawa abawithe obuthoki bamagherererya Yehova. Thwamabirikania okwa bya thwang’ighira okwa ky’erileberyako kya Yehova ebihambire okw’iyikehya. Thulebaye ebyo thwang’ighira okwa by’erileberyako by’omwa Biblia ngoku thwanga kangania eriyikehya.

10. Yehova akakolesaya athi eby’erileberyako by’abandi erithukangirirya?

¹⁰ Yehova “Omukangirirya” wethu mukulhu, akahira omwa Kinywe kiwe mw’eby’erileberyako erithukangirirya. (Isa. 30:20, 21) Thuk’igha n’erighanirya okwa by’erileberyako by’omwa Biblia eby’abo abakakanganaya emibere ya Nyamuhanga, imwamuli eriyikehya. Kandi thuk’igha n’erilebya ebyahika okw’abalemawa erikangania emibere mibuya ng’eyo.​—Esy. 37:37; 1 Kor. 10:11.

11. Thwang’ighaki okwa ky’erileberyako kibi kya Saulo?

¹¹ Lengekanaya okwa kyabya oko Mwami Saulo. Okw’itsuka abya mulhume oyuyikehirye. Mwaminya erilemererwa liwe kandi nibya mwasagha eryongerwa esyongwamirwa. (1 Sam. 9:21; 10:20-22) Aliwe, endambi muyahika, Saulo amatsuka erikolha ebyo athahamulirwe. Mwakangania omutse mubi oyu imwanamabiribya mwami. Buthuku bughuma, mwalemwa erighumisirizya akalinda omuminyereri Samweli. Omwakanya k’eriyikethera Yehova ayire ekyo akakolha busana n’abandu biwe, Saulo mwaha obuhere nomwakine indi syabya awithe ehamuli y’erikolha ekyo. Busana n’ekyo, Yehova mwaghana Saulo, kandi Saulo amaherya obwami bwiwe.  (1 Sam. 13:8-14) Ithukendibya b’amenge thwam’ighira okwa ky’erileberyako kibi eki n’eriyihighulha okw’ikolha ebyo thuthahamulirwe.

12. Danieli mwakangania athi eriyikehya?

¹² Mbaghane n’eky’erileberyako kibi kya Saulo, lebaya eky’erileberyako ekyuwene eky’omuminyereri Danieli. Omwa ngebe yiwe yosi, Danieli abya mughombe wa Nyamuhanga oyuyikehirye, iniakabera erisaba Yehova y’obusondoli. Ng’eky’erileberyako, Yehova abere akamukolesya erikumbulha esyonzoli sya Nebukadneza, Danieli mwathayipipa. Aliwe, omw’iyikehya, mwaha Yehova y’olhukengerwa busana n’ekyo. (Dan. 2:26-28) Thuk’ighaki? Balikyethu bamabya ibakasima emikania yethu kutse ithwabiribana ebibuya birebe omw’ithulira, thutholere ithw’ibuka eriha Yehova y’olhukengerwa olhwosi. Thutholere ithwaligha ngoku sithwanga thokire ebindu ebi ahathe obuwathikya bwa Yehova. (Fil. 4:13, NW) Thwamakolha ekyo, thukabya ithwamagherererya eky’erileberyako kya Yesu. Thuthi?

13. Ebinywe bya Yesu ebiri omu Yoane 5:19, 30 bikathweghesayaki okw’iyikehya?

¹³ Nomwakine indi Yesu abya Mughalha oyuhikene wa Nyamuhanga, mwayikethera Yehova. (Soma Yoane 5:19, 30.) Mwathanza eriyimirya obuthoki bwa Thatha wiwe w’elhubulha. Abanya Filipi 2:6, omwa New World Translation hakabugha hathi Yesu “nomwanabya omwa mulingo wa Nyamuhanga, mwathalengekania okw’iyimirya obuthoki, ni bugha ambu, athi alingirirane na Nyamuhanga.” Yesu, Omughalha omwowa, mwaminya aho akasubulira kandi mwasikya obuthoki bwa Thatha wiwe.

14. Yesu mwakolhaki akasabwa erikolha ekindu ekyo athahamulirwe?

¹⁴ Thalengekania Yesu nga mwakolhaki abigha biwe, Yakobo na Yoane haghuma na mama wabu, bakamusaba ekindu ekyo athawitheko buthoki. Aho n’aho, Yesu mwasubirya athi Thatha wiwe w’elhubulha musa yuwanga thwamu nga nindi oyukend’ikalha okwa byalha bya Yesu eby’amali n’eby’amalembe omo Bwami. (Mt. 20:20-23) Yesu mwakangania ngoku anasi aho akasubulira. Abya ayikehirye. Isyalikolha ekyo Yehova athethamubwira athi akole. (Yn. 12:49) Thwanga gherererya thuthi eky’erileberyako kibuya kya Yesu?

15-16. Thwanga ghendera thuthi okw’ihabulha lye Biblia eriri omwa 1 Abanya Korinto 4:6, NW?

 ¹⁵ Thukagherereraya eky’erileberyako kya Yesu eky’eriyikehya omw’ighendera okw’ihabulha lye Biblia eriri omwa 1 Abanya Korinto 4:6. Omwa New World Translation hakathubwira hathi: “Isimwalhabaya oko myatsi eyabirihandikwa.” Neryo thwamasabwa amenge, sithutholere thukakaka abandi b’amalengekania wethu kutse eribugha butsira erilengekania ndeke oko mwatsi. Aliwe, thutholere ithwababwira erihabulha eriri omwa Biblia n’omwa bitabu byethu ebiseghemere okwa Biblia. Omwa nzira eyi, ithukendibya ithwamakangania ku thunasi aho thukasubulira. Omw’iyikehya, thukakanganaya ngoku “emibiiri yithunganene” ey’Omuthoki w’Ebyosi ya yihikire.​—Erib. 15:3, 4.

¹⁶ Eryongera okw’iha Yehova y’olhukengerwa, hane esindi nzumwa esyanga leka ithwayikehya. Thukendi lebya ngoku eriyikehya lyanga thulethera etseme kandi ngoku lyanga thuwathikya erikolongana ndeke n’abandi.

17. Busana naki abandu abayikehirye batsemire?

¹⁷ Thwamayikehya, ithukendibana etseme. Busana naki? Thwamabya ithunasi ku thunawithe aho thukasubulira, ithukendi sima n’eritsemera obuwathikya obo abandi bakathuha. Ng’eky’erileberyako, lengekanaya okwa buthuku Yesu alhamaya abahagha ikumi. Omughuma musa yuwasubulha erisingya Yesu busana n’erimulhamya kw’obulhwere bwiwe obukalire​—ekindu ekyo mulhume athe angathokire ahabwiwe. Omulhume oyuyikehirye oyu mwasima obuwathikya obo athunga, kandi ekyo mukyaleka iniapipa Nyamuhanga.​—Lk. 17:11-19.

18. Eriyikehya likathuwathikaya lithi bikahika okw’ikolongana n’abandi? (Abanya Roma 12:10)

¹⁸ Abandu abayikehirye, bakakolongana  ndeke n’abandi kandi kikabolhobera eribana abanywani. Busana naki? Kundi bakaminya ngoku abandi banawithe emibere eyuwene kandi bakabayikethera. Abayikehirye bakatsema abandi bakakolha ndeke esyongwamirwa syabu kandi bakanguhirawa eribasima n’eribasikya.​—Soma Abanya Roma 12:10.

19. Ni byahi ebyanga leka ithwayihighulha okwa miyiheko?

¹⁹ Mbaghane n’ekyo, kikakalira abandu b’emiyiheko erisima abandi, kundi bakanza in’ibo ibapipwa. Kyolhobire ibo erianza eriyilinganisya n’abandi n’eribya mw’omuthima w’amalingwatha. Omwakanya k’erithendeka abandi n’eribaha obuthoki bulebe, bangana bugha bathi, “Wamanza ekindu kikolhawe ndeke, iwayikolerakyo.” Mughulhu mungyi, omundu w’emiyiheko akanza inialhangirika ng’alengire abandi kandi ni w’eritsuru. (Gal. 5:26) Abandu ng’abo obunywani bwabu sibuli ghuma. Thwamayilhangiramo emiyiheko, thutholere ithwalemba-lemba Yehova athuwathikaye ‘erihindulha obulengekania’ nuku omutse mubi oyu aleke erithukotheramo.​—Abar. 12:2.

20. Busana naki thutholere ithwayikehya?

²⁰ Thukasima kutsibu eky’erileberyako kya Yehova! Thukalhangira eriyikehya liwe omwa mibere akakolonganiramu n’abaghombe biwe, kandi thwanzire erimugherererya. Eryongera okw’ekyo, thwanzire erigherererya eby’erileberyako bibuya ebiri omwa Biblia eby’abandu abathunga olhusunzo lhw’erilendera haghuma na Nyamuhanga. Ambi mughulhu wosi, ithwaha Yehova y’eripipa n’olhukengerwa ebimutholere. (Erib. 4:11) Nethu ithukendi tholera erilendera haghuma na Thatha wethu w’elhubulha, oyuwanzire abandu abayikehirye.