1. Yisinke ga uyungire Ndafita kuhamena elinunupiko lyaJehova?

JEHOVA ga linunupika ndi? Nhi! Ndafita kwa tjenge asi: “Ove Hompa kupopera nge to parura nge,” elinunupiko lyoge kupa nge nonkondo. (2 Sam. 22:36; Epis. 18:35) Apa Ndafita ga tjenge nonkango odo, age nampo kwa diworokere apa Samwere ga wizire kembo lyoguhwe yipo aya mu gwaveke, aya kare hompa gokukwama ko gwaIsraeli. Ndafita, yige ga kere munona kovakuru vendi navenye. Nye nampili ngoso, age yige ga horowere Jehova yipo a pinganene pwa hompa Sauru.—1 Sam. 16:1, 10-13.

2. Yisinke natu ka zogera mosirongwa esi?

² Ndafita nampo ga kwatesere ko nonkango domuepisarome edi ga uyungire kuhamena Jehova asi: ‘Age kunyongama a tare eguru nevhu. Age kukatura mo muhepwe mombundu, ta yambura gehudi . . . makura ta va hamesere kohompagona.’ (Epis. 113:6-8) Mosirongwa esi, pomuhowo tatu ka lironga omu Jehova ga likidire elinunupiko. Tatu ka lironga hena kuhamena elinunupiko kwahompa Sauru, komuporofete Ndaniyera ntani kwaJesus.

3. Ngapi omu Jehova a tu tekura ntani yisinke ayi likida eyi?

³ Jehova kuyilikida asi age ga linunupika, monkedi omu a tekura vakareli vendi ava va dira kusikilira mo. Age kutambura ukareli wetu ntani age ku tu tara asi ose vakaume vendi. (Epis. 25:14) Mokuninka asi tu tulise po ukaume naJehova,  age kwa tulire po ewapaiko kupitira monzambo zaMunwendi yipo tu gwane edongweneno po lyononzo detu. Jehova, age Karunga gonkenda!

4. Yisinke ga tu pa Jehova ntani morwasinke?

⁴ Gazadara ko nkedi zimwe omu Jehova a likida elinunupiko. Mokumona asi age Musiti, age ngano na vhura kutu tokwera po eyi natu rugana meparu lyetu. Nye age kapi ayi rugana oyo. Age kwa tu sita mosihwi sendi ntani kwa tu pa emanguruko lyokutura po matokoro. Age ana hara vantu va mu karere kutundilira komutjima ntani morwa kwa mu hara. (Deut. 10:12; Jes. 48:17, 18) Ayo kutuhafesa kweyi Jehova ga kara nosikara selinunupiko!

5. Ngapi omu Jehova a tu rongo sikara selinunupiko? (Tara efano lyopontunda)

⁵ Monkedi omu Jehova a tu tekura, age kuturonga sikara selinunupiko. Jehova yige muntu gonondunge po mouzuni naunye. Nampili ngomu ya kara asi age kapi ga hepa magano gava wopeke, nye age kupurakena komagano govantu. Pasihonena, Jehova kwa pulire Munwendi yipo a mu vatere mokusita yininke nayinye. (Yis. 8:27-30; Koros. 1:15, 16) Nampili ngomu Jehova ga kara Munankondo nadinye, age kugava yitumbukira yimwe kwavamwe. Pasihonena, age kwa tulire Jesus yipo a kare Hompa goUhompa waKarunga ntani age nga ka gava nonkondo kovantu 144 000, ava ngava ka pangera kumwe naJesus. (Ruk. 12:32) Eyi kulikida asi Jehova kwa dewire Jesus yipo a kare Hompa noMupristeli goMunene. (Heb. 5:8, 9) Age hena kudeura ava ngava ka pangera kumwe naJesus, yipo va ka sikise mo sirugana sawo nye kapi nga ka va pangera kuhamena omu nava sikisa mo sirugana oso. Mevango lyokuyirugana ngoso, age kwa va huguvara asi ngava sikisa mo situmbukira oso.—Ehor. 5:10.

6-7. Yisinke natu lirongera ko kwaGuhyetu gemeguru kuhamena kugava yitumbukira yimwe kwava wopeke?

 ⁶ Mokumona asi Guhyetu gemeguru kwa gava yitumbukira yimwe kwava wopeke, nose twa hepa kuyirugana. Pasihonena, nsene asi ove nturagumbo ndi mukuronambunga, honena Jehova pokugava yitumbukira yimwe kwa vamwe. Ntani nyokera po kuvapangera omu nava yi rugana. Nsene o honena Jehova, yirugana ngayi pwa nosiruwo ntani ove ngo deura wopeke nokuvavatera va lizuvhe asi kuvhura va yi sikise mo. (Jes. 41:10) Yisinke hena nava lirongera ko kwaJehova ava va kara noyitumbukira?

⁷ Bibeli kulikida asi Jehova kupurakena komagano govaengeli. (1 Vah. 22:19-22) Ngapi omu vakurona nomu honena sihonena saJehova? Ya wapa kupura vana veni magano, kuhamena sirugana songandi. Ano nsene magano ogo mawa, ya wapa kugakwama.

8. Ngapi omu Jehova ga likidire elididimiko kwaAbirahamu naSara?

⁸ Nkedi zimwe omu Jehova a likida sikara selinunupiko, kuna kara pokulididimikira. Pasihonena, apa vantu ava dili kuhafera matokoro gendi, age kuvapurakena. Age kwa purakenene kwaAbirahamu apa ga kere nosinka kuhamena ezonauko lyaSodoma naGomora. (Gen. 18:22-33) Ntani diworoka omu Jehova ga tekwire mukadaAbirahamu, Sara. Jehova kapi ga handukire apa Sara ga zorere apa ga zuvhire asi nga kara nezimo. (Gen. 18:10-14) Nye age kwa tekwire Sara nefumadeko.

9. Yisinke nava lirongera ko vakurona ntani novakuronambunga kwaJehova?

⁹ Yisinke nava lirongera ko vakurona ntani novakuronambunga kwaJehova? Yisinke o rugana apa gumwe gomombungakriste a dili ku kwatesa ko etokoro lyoge ? Ove kugenderera kuvatantera asi mepuko vana kara ndi? Ndi ove kupurakena komagano gawo? Apa vakuronambunga ntani novakurona ava honene Jehova, vantu kugwanena mo uwa. Ngesi tuna zogere eyi natu lirongera ko kwaJehova kuhamena elinunupiko. Tuzeni hena tu tare eyi natu lirongera ko koyihonena yavamwe womoBibeli kuhamena elinunupiko.

10. Ngapi omu Jehova a tu rongo kupitira moyihonena yavamwe?

¹⁰ Mokumona asi Jehova yige murongi gomunene po, age kuturonga kupitira moyihonena yavamwe ava va tumbura moBibeli. (Jes. 30:20, 21) MoBibeli, ose kugwana mo yihonena yavamwe woyikara eyi nga yi hafesa Jehova, kukwatera mo elinunupiko. Ose hena kulirongera ko kwa vamwe ava ngava dili kulikida yikara yoyiwa.—Epis. 37:37; 1 Kol. 10:11.

11. Yisinke natu lirongera ko kosihonena sosidona saSauru?

¹¹ Gazadara ko kweyi ya horokerere hompa Sauru. Pomuhowo age kwa kere muntu gokulinunupika. Apa ga kere mudinkantu, age ga divire apa da hulira nonkondo dendi ntani kapi ga here kutambura yitumbukira yoyinzi. (1 Sam. 9:21; 10:20-22) Nye konyima, Sauru kwa ya tamekere kulinenepeka. Age kwa tamekere kulinenepeka konyima tupu zapa ga kere hompa. Posiruwo simwe, age kapi ga lididimikilire apa ga ndindilire muporofete Samwere siruwo sosire. Mevango lyokuhuguvara Jehova, Sauru kwa rugene nzambo zeswakerero nampili ngomu ya pilire kumutumbukira kuyirugana. Ngoyitundwamo, Jehova kapi ga mu haferere ntani ga zumbanesere uhompa wendi. (1 Sam. 13:8-14) Ose kuvhura ku lirongera ko kwaSauru pokudira kurugana yininke eyi va dira kutupulisira kurugana.

12. Ngapi omu Ndaniyera ga likidire sikara selinunupiko?

 ¹² Mokulisiga nosihonena sosidona saSauru, tu tareni sihonena sosiwa somuporofete Ndaniyera. Meparu lyendi nalinye, Ndaniyera kwa twikilire kulinunupika ntani nga pura nkenye apa mavyukiso kwaJehova. Pasihonena, apa Jehova ga mu ruganesere a faturure nonzodi daNebukadenesara, Ndaniyera kapi ga uyungire asi age kwa yi rugene mononkondo danyamwendi. Nye age kwa geve efumano nalinye kwaJehova. (Ndan. 2:26-28) Yisinke tuna kulirongera ko? Nsene vanavazinyetu kuhafera kupurakena yiuyungwa yetu, ndi nampo kututompoka unene mokuzuvhisa, twa hepa kugava efumano nalinye kwaJehova. Twa hepa kuyitambura nelinunupiko asi Jehova yige a tu vatere moyininke nayinye. (Fil. 4:13) Nsene tu kara nonkareso ozo, nga yi likida asi ose kuna kuhonena Jesus. Monkedi musinke?

13. Yisinke natu lirongera ko kononkango daJesus edi da kara mwaJohanesa 5:19, 30?

¹³ Nampili ngomu Jesus ga kere MunwaKarunga gokusikilira mo, age kwa huguvarere mwaJehova. (Resa Johanesa 5:19, 30.) Age kapi ga lihetakanesere noGuhwe. Vafilipi 2:6, kututantera kuhamena Jesus asi “nampili ngomu ga kere moukaro waKarunga, kapi ga sininikire mononkondo asi a hetakane naKarunga.” Mokumona asi Jesus kwa kere muntu gokulimburukwa, age ga divire apa da hulira nonkondo dendi ntani ga fumadekere oGuhwe.

14. Yisinke ga rugene Jesus apa vamwe va mu pulire a rugane yininke eyi va dira kumupulisira kurugana?

¹⁴ Gazadara ko eyi ga rugene Jesus, apa Jakopo naJohanesa ntani nazinyawo va mu pulire sininke esi ga dilire kukara nononkondo daso. Jesus kwa va limbwilire poopo asi oGuhwe vemeguru yiwo velike va kara nononkondo dokutokora asi yilye gokuvhura kukahingira korulyo rwaJesus ndi korumoho moUhompa. (Mat. 20:20-23) Eyi kulikida asi Jesus ga fumadekere unankondo woGuhwe. Age kwa linunupikire. Age kapi ga rugene yininke eyi va dira kumupulisira oGuhwe. (Joh. 12:49) Ngapi omu natu honena Jesus?

15-16. Ngapi omu natu tura pasirugana epukururo eli lya kara mo-1 Vakolinte 4:6?

¹⁵ Ose kuhonena Jesus pokutura pasirugana epukururo eli lya kara mo-1 Vakolinte 4:6. Alyo kutanta asi: “Walye omu pitakanesa pweyi va tjanga.” Yipo nye, nsene  vantu tava tu pura ko magano, kapi tuna hara ku va tantera magano ganyamwetu. Nye twa hepa kuvatantera magano aga ga kara moBibeli ntani nomoyimbapiratjangwa yetu. Mokuyirugana ngoso, ose ngatu yi likida asi kapi twa diva nayinye. Ntani apa atu yi rugana ngoso, ose kulikida sikara selinunupiko. Morwa ayo kulikida asi Jehova yige gelike ga diva nayinye.—Ehor. 15:3, 4.

¹⁶ Kugusa ko Jehova, pwa kara hena nokonda dimwe dononzi deyi natu linunupikira. Ngesi tatu ka zogera omu elinunupiko ali tu vatere tu hafe ntani tu ruganene kumwe novakwetu mombili.

17. Morwasinke vantu wokulinunupika va karera noruhafo?

¹⁷ Apa atu linunupike, ose kuhafa. Morwasinke? Apa atu dimburura asi koyili yininke eyi atu dili kuvhura pwanyamwetu, ayo kutuvatera tu tambure evatero lyokutundilira kovakwetu. Pasihonena, gazadara ko eyi ya horokere apa Jesus ga verwire vanayingondwe murongo. Munayingondwe gumwe tupu ga ka tengwire a ya pandure Jesus kweyi ga mu verwire uvera wendi. Esi kuna kara sininke esi ga dilire kuvhura kurugana pwanyamwendi. Munayingondwe ogu gokulinunupika, ga yi divire asi kapi ga kara nononkondo dokuliverura. Yipo nye, age kwa fumadekere Karunga.—Ruk. 17:11-19.

18. Ngapi omu elinunupiko ali tu vatere yipo tu ruganene kumwe novakwetetu nombili? (Varoma 12:10)

¹⁸ Elinunupiko kutuvatera turuganene kumwe novakwetetu nombili ntani tu tulise po vakaume wovanene. Morwasinke? Vantu wokulinunupika, awo kuyitambura asi vantu vakwawo va kara noyikara yoyiwa ntani awo kuvahuguvara. Vantu wokulinunupika, awo kuhafa  apa wopeke ayi va tompoka moyirugana yawo ntani awo kuvapandadeka nokuvafumadeka.—Resa Varoma 12:10.

19. Nokonda musinke deyi natu nyokerera po elinenepeko?

¹⁹ Vantu wokulinenepeka, kuvadigopera kupandadeka vakwawo. Awo kwa hara tupu wopeke va va pandadeke velike. Awo kwa hara kulihetakanesa novakwawo ntani kwa hara kurumbasana. Vantu wokulinenepeka kwa hara kurugana yininke pwa vene morwa awo kugazara asi magano govakwawo kapisi mawa. Muntu gokulinenepeka, kwa kara nosikara somfudu. (Gar. 5:26) Vantu vangoso, kapi ava tulisa po ukaume wokukarerera novakwawo. Nsene tuna dimburura asi ose twa kara nelinenepeko, twa hepa kukanderera kwaJehova a tu vatere tu ‘rundurure magazaro getu’ yipo tu dire kukara nosikara esi meparu lyetu.—Rom. 12:2.

20. Morwasinke natu linunupikira?

²⁰ Ose tuna hafa kweyi Jehova ga tu tulira po sihonena sosiwa. Ose kumona elinunupiko lyendi monkedi omu nga tekura vakareli vendi ntani ose tuna hara kumuhonena. Tuna hara kuhonena vakareli vendi vamwe, ava ngava mu karere nelinunupiko. Tu twikireni kugava eyererepeko nefumano kwaJehova. (Ehor. 4:11) Nsene tu yi rugana eyi, ose ngatu kara vakaume vaJehova dogoro narunye, morwa age kwa hara vantu wokulinunupika.